ᑭᓱᑦ ᐱᕋᔭᖕᓂᐅᕐᒪᑕ?
ᐱᕋᔭᖕᓂᖅ ᓇᓗᓇᐃᖅᑕᐅᑦᑎᐊᖅᓯᒪᔪᖅ ᒪᓕᒐᓕᐊᖑᓯᒪᔪᓂᒃ. ᑐᑭᖃᖅᐳᖅ ᐅᑯᐊ ᓇᓕᐊᑐᐃᓐᓇᖅ ᐱᓕᕆᐊᖑᒃᐸᑕ ᐃᖅᑲᓇᐃᔭᖅᑎᒧᑦ ᐃᓇᖏᖅᑎᒋᓚᐅᑲᒃᑕᖓᓄᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐱᔪᓐᓇᕐᓂᕆᔮᓄᑦ:
(ᐃ) ᒪᓕᒐᓕᐅᕐᕕᖕᒥ ᒪᓕᒐᓕᐊᖑᔪᒥᒃ ᓱᕋᐃᓂᖅ, ᒪᓕᒐᓕᐅᕐᕕᒡᔪᐊᖅ ᑲᓇᑕᒥ ᐅᕝᕙᓘᓐᓃᑦ ᒪᓕᒐᓕᐅᕐᕕᖕᒥ ᑲᓇᑕᒥ ᐊᕕᒃᑐᖅᓯᒪᔪᓂ ᐅᕝᕙᓘᓐᓃᑦ ᓄᓇᕘᒥ ᐊᕕᒃᑐᖅᓯᒪᔪᓂᒃ, ᐅᕝᕙᓘᓐᓃᑦ ᒪᓕᒐᓕᐊᖑᓯᒪᔪᒥᒃ ᓇᓕᐊᖕᓂᑐᐃᓐᓇᑦᑎᐊᖅ ᐱᖁᔭᙳᖅᑎᑕᐅᓯᒪᔪᒥᒃ;
(ᐱ) ᒥᓂᔅᑕᒧᑦ ᖃᓄᐃᓕᐅᖁᔭᐅᔪᓂᒃ ᒪᓕᙱᑦᑐᑦ, ᒥᓂᔅᑕ ᑲᒪᒋᔭᒃᓴᓕᒃ ᑮᓇᐅᔭᓅᖓᔪᓂᒃ ᐱᖁᔭᕐᒥ, ᐅᕝᕙᓘᓐᓃᑦ ᑮᓇᐅᔭᓕᕆᔨᑦ ᑲᑎᒪᔨᖏᓐᓄᑦ ᐃᒃᐱᒋᓗᓂᒋᑦ ᐊᐅᓚᑦᑎᔾᔪᓯᖅ ᓄᓇᕗᑦ ᒐᕙᒪᒃᑯᓐᓄᑦ ᐱᖁᑎᒋᔭᓄᑦ ᐃᖅᑲᓇᐃᔭᖅᑎᒧᑦ ᑲᒪᒋᔭᒃᓴᐅᓕᖅᑎᑕᐅᔪᓄᑦ;
(ᑎ) ᒐᕙᒪᒃᑯᓐᓅᖓᔪᑦ ᑮᓇᐅᔭᑦ ᐊᑐᕐᓂᕐᓗᒃᑕᐅᒃᐸᑕ ᐅᕝᕙᓘᓐᓃᑦ ᒐᕙᒪᒃᑯᓐᓅᖓᔪᑦ ᓇᖕᒥᓂᕆᔭᐅᔪᑦ;
(ᑭ) ᐊᐅᓚᑕᐅᑦᑎᐊᙱᑦᑐᑦ ᒐᕙᒪᒃᑯᓐᓅᖓᔪᑦ ᓇᖕᒥᓂᕆᔭᐅᔪᑦ ᐱᖁᑏᓪᓘᓐᓃᑦ ᐃᖅᑲᓇᐃᔭᖅᑎᒧᑦ ᖃᓄᐃᓕᕐᓗᒃᑕᐅᔪᑦ, ᐃᓚᒋᔭᐅᓗᑎᒃ ᐱᓕᕆᔾᔪᓯᑦ ᐅᕝᕙᓘᓐᓃᑦ ᐱᑕᖃᙱᓐᓂᖅᑕᖃᖅᐸᑦ ᑕᑯᒃᓴᐅᑎᑦᑎᔪᒥᒃ ᐃᓱᒪᑦᑎᐊᖅᓯᒪᙱᑦᑐᓂᒃ ᐱᔮᕆᓐᓂᖅᐸᓪᓘᓐᓃᑦ ᓇᖕᒥᓂᕆᔭᐅᔪᕐᒥᒃ ᐊᐅᓚᑦᑎᑦᑎᐊᙱᓐᓂᕐᓗᓂ ᐱᖁᑎᖃᕐᕕᖓᓃᑦᑐᓂᒡᓘᓐᓃᑦ;
(ᒋ) ᐸᒡᕕᓵᖃᖅᐸᑦ ᐅᖃᐅᓯᒃᑯᑦ ᐱᓂᕐᓗᒃᓯᓂᒃᑯᓪᓘᓐᓃᑦ ᐊᓯᒥᓂᒃ ᐃᖅᑲᓇᐃᔭᖅᑎᐅᙱᑦᑐᒧᑦ ᓱᕋᒃᓯᒃᐸᓪᓘᓐᓃᑦ ᐃᓄᖕᒧᑦ ᐅᕝᕙᓘᓐᓃᑦ ᑳᓐᑐᓛᒃᑯᑦ ᐱᔪᓐᓇᐅᑎᒋᔭᐅᔪᓂᒃ ᑭᒃᑯᑐᐃᓐᓇᑦᑎᐊᓄᑦ ᐱᔨᑦᑎᕋᖅᑎᐅᔪᓄᑦ ᐱᔨᑦᑎᕋᖅᑕᐅᔪᓄᓪᓘᓐᓃᑦ ᐅᕝᕙᓘᓐᓃᑦ ᑐᑭᓯᒋᐊᒐᒃᓴᖃᖅᑐᓄᑦ ᐱᔨᑦᑎᕋᐅᑎᓂᒃ ᖃᓄᐃᑦᑐᑐᐃᓐᓇᑦᑎᐊᓂᒃ ᒐᕙᒪᒃᑯᑦ ᐱᓕᕆᕝᕕᖓᓐᓂᙶᖅᑐᒥᒃ ᐅᕝᕙᓘᓐᓃᑦ ᑎᒥᖓᓐᓂᙶᖅᑐᒥᒃ;
(ᒥ) ᐱᓕᕆᔪᖃᖅᐸᑦ ᐅᕝᕙᓘᓐᓃᑦ ᐱᑕᖃᙱᓐᓂᐅᔪᑦ ᓴᖅᑭᑦᑎᔾᔪᑕᐅᔪᓐᓇᕐᒪᑕ ᐊᖏᔪᐊᓗᖕᒥ ᐊᒻᒪ ᐊᑦᑕᕐᓇᖅᑐᒧᐊᕈᑕᐅᔪᓐᓇᖅᖢᓂ ᐃᓅᓯᕐᒧᑦ, ᖃᓄᐃᙱᑦᑎᐊᕈᓯᕐᒧᑦ ᐃᓄᖕᓄᑦ, ᒐᕙᒪᒃᑯᓐᓄᑦ ᐅᕝᕙᓘᓐᓃᑦ ᐃᓄᖕᓂᒃ ᓇᖕᒥᓂᕆᔭᐅᔪᓂᒃ, ᐅᕝᕙᓘᓐᓃᑦ ᓯᓚᒥ ᖃᓄᐃᓕᓐᓂᖅᐸᑦ, ᐊᓯᖏᓐᓄᓪᓘᓐᓃᑦ ᐊᑦᑕᕐᓇᖅᑐᓂᒃ ᖃᓄᐃᑦᑑᓂᕆᔭᓄᑦ ᐱᓕᕆᐊᖑᑎᓪᓗᒋᑦ ᐊᐅᓚᑕᐅᑎᓪᓗᒋᓪᓘᓐᓃᑦ ᐃᖅᑲᓇᐃᔭᖅᑎᒧᑦ;
(ᓂ) ᐱᕕᒡᔪᐊᒃᑯᑦ ᓱᕋᐃᒃᐸᑦ ᐱᓕᕆᐊᓄᑦ ᐱᒻᒪᕆᐅᒋᔭᐅᔪᓄᑦ ᐊᐅᓚᑕᐅᔪᓄᓪᓗ ᑐᙵᕕᒋᔭᓄᑦ;
(ᓯ) ᖃᓄᑐᐃᓐᓇᖅ ᐱᓕᕆᔾᔪᓰᑦ ᐊᑭᓂᐊᕈᑎᑦ ᐃᖅᑲᓇᐃᔭᖅᑎᐅᖃᑎᒋᔭᒧᑦ ᐊᓯᐊᓄᓪᓘᓐᓃᑦ ᐃᓄᖕᒧᑦ;
(ᓕ) ᑐᒃᓯᕋᐅᑦ, ᖃᓄᐃᓕᐅᖁᔭᐅᔪᖅ ᐅᕝᕙᓘᓐᓃᑦ ᑎᓕᓯᔾᔪᑕᐅᔪᑦ ᐃᖅᑲᓇᐃᔭᖅᑎᐅᑉ ᐊᖓᔪᖅᑳᖓᓄᑦ ᐊᐅᓚᑦᑎᔨᒻᒪᕆᖕᒧᓪᓘᓐᓃᑦ ᐅᕝᕙᓘᓐᓃᑦ ᓴᓇᔨᒧᑦ ᐊᓯᖏᓐᓄᑦ ᐱᕋᔭᖕᓂᖅᐸᑦ ᖁᓛᓃᑦᑐᑦ ᒪᓕᒡᓗᒋᑦ.
ᓇᓗᕗᑎᖅᑲᐃ ᑭᓱᑦ ᓴᖅᑭᔾᔪᑕᐅᔪᓐᓇᕐᒪᖔᑕ ᐱᕋᔭᒍᑕᐅᔪᑦ? ᐋᖅᑭᐅᒪᑎᑦᑎᔨᒧᑦ ᖃᐅᔨᒋᐊᕈᓐᓇᖅᑐᑎᑦ ᑐᑭᓯᒋᐊᓪᓚᒃᑎᑕᐅᔪᒪᓗᑎᑦ. |