ᐸᓐᓂᖅᑑᕐᒥ
ᐸᖕᓂᖅᑑᖅ ᐱᔾᔪᑎᒋᓪᓗᒍ
ᐸᖕᓂᖅᑑᖅ, 50 ᑭᓚᒦᑕᓂᒃ ᐅᖓᓯᒃᑎᒋᔪᖅ ᐅᑭᐅᖅᑕᖅᑑᑉ ᑭᒡᓕᙳᐊᖓᓄᑦ, ᓄᓇᙳᐊᑎᒍᑦ ᐃᓂᖃᖅᑐᖅ N66 10' W65 44' ᓯᒡᔭᒃᑯᑦ ᐊᑐᖅᑕᐅᔅᓲᔭᖃᑦᑕᓕᖅᑐᒃᑯᑦ ᐸᖕᓂᖅᑑᑉ ᑲᖏᖅᖢᐊᓂ ᑎᓄᔾᔭᕐᕕᐅᑉ ᐅᐊᖕᓇᖓᓂ.
ᐸᖕᓂᖅᑑᖅ ᑕᐃᔅᓱᒪᓂᓕᑖᓗᒃ ᐊᕐᕙᒐᓱᒡᕕᐅᕙᓕᓚᐅᖅᓯᒪᕗᖅ ᑎᓄᔾᔭᕐᕕᒃ ᑮᓇᐅᔭᓕᐅᕋᓱᐊᕐᕕᐅᓪᓗᓂ ᐊᕐᕙᒐᓱᖃᑦᑕᓕᓚᐅᖅᓯᒪᑎᓪᓗᒋᑦ 1820-ᒥ. 1838-ᒥ ᑕᕆᐅᑉ ᐊᑭᐊᓂᙶᖅᑐᖅ ᐊᕐᕙᒐᓱᐊᖅᑎ ᐊᑎᖃᖅᖢᓂ ᕕᓕᐊᒻ ᐱᐊᓂ ᐃᓄᖕᒥ ᖃᐅᔨᒪᔨᑕᖃᖅᖢᓂ ᑎᓄᔾᔭᕐᕕᖕᒧᐊᒃᑲᓐᓂᓚᐅᖅᓯᒪᕗᖅ. ᑎᓄᔾᔭᕐᕕᖕᒥ ᐊᕐᕕᒃᑕᖃᑦᑎᐊᖃᑦᑕᓚᐅᕐᒪᑦ, ᐃᓄᐃᑦ ᐃᓅᓯᖓᑦ ᐊᓯᔾᔨᖅᐸᓪᓕᐊᓕᓚᐅᖅᓯᒪᕗᖅ ᐊᕐᕙᒐᓱᖕᓂᖅ ᐱᒋᐊᖅᑎᑕᐅᑎᓪᓗᒍ. 1850's ᐊᒃᐸᖅᑎᓪᓗᒍ, ᖃᔅᓯᑲᓪᓛᓗᐃᑦ ᐃᓄᐃᑦ ᓄᓇᖃᕐᕕᖕᒥᓂ ᐊᐅᓪᓛᖅᖢᑎᒃ ᓴᓇᔭᖅᑐᖅᐸᓚᐅᖅᓯᒪᕗᑦ ᐊᕐᕙᒐᓱᒃᑎᓂᒃ ᐃᑲᔪᕆᐊᖅᖢᑎᒃ Nuvuyen−ᒥ (ᐃᓂᖃᖅᑐᖅ ᓯᒡᔭᖓᑕ ᓂᒋᖅᐸᓯᐊᓂ) ᐊᒻᒪ ᕿᑭᖅᑕᓂ (ᐃᓂᖃᖅᑐᖅ ᓯᒡᔭᖓᑕ ᑲᓇᖕᓇᖅᐸᓯᐊᓂ).
1860's ᕿᑎᖅᐸᓯᐊᓂ, ᑎᓄᔾᔭᕐᕕᒃ ᓇᓗᓇᕈᓐᓃᓚᐅᖅᐳᖅ ᐊᕐᕖᑦ "ᓄᖑᕋᖅᑕᐅᓗᐊᓕᕐᓂᖏᓐᓂᒃ". 1870-ᒥ Nuvuyen ᓱᒃᑯᓯᒪᑦᑎᐊᓕᓚᐅᖅᐳᖅ ᐅᒥᐊᕐᔪᐊᓂᒡᓗ ᐊᖅᑯᓵᖅᑕᐅᕙᒍᓐᓃᖅᖢᓂ ᐊᕐᕙᒐᓱᒡᕕᐅᕙᒍᓐᓃᖅᖢᓂ ᐃᓄᐃᓪᓗ ᓄᓇᓕᕋᓛᖃᕐᕕᖕᒥᓄᑦ ᐅᑎᖅᓯᒪᑦᑎᐊᓕᖅᖢᑎᒃ ᑎᓄᔾᔭᕐᕕᐅᑉ ᐊᕙᑖᓂ.
1921-ᒥ ᓂᐅᕕᖅᑎᒃᑯᑦ ᓂᐅᕕᕐᕕᓕᐅᓚᐅᖅᓯᒪᕗᑦ ᐸᖕᓂᖅᑑᒥ ᐃᓄᐃᓪᓗ ᐸᖕᓂᖅᑑᒧᑦ ᑲᑎᑉᐸᓪᓕᐊᓕᓚᐅᖅᓯᒪᕗᑦ. ᐅᑭᐅᒃ ᒪᕐᕉᒃ ᐊᓂᒍᖅᑎᓪᓗᒋᑦ ᐸᓖᓯᖃᕐᕕᓕᐅᓚᐅᖅᓯᒪᕗᑦ. 1929-ᒥ, St. Luke's Mission ᐋᓐᓂᐊᕐᕕᐊᓗᓕᐅᓚᐅᖅᓯᒪᕗᑦ. ᑕᐃᔅᓱᒪᓂᐅᑎᓪᓗᒍ, ᐃᓄᐃᑦ ᐸᖕᓂᖅᑑᕐᒥᐅᑕᑦ ᖃᔅᓰᓐᓇᐅᓚᐅᖅᓯᒪᕗᑦ, 1962-ᒥ ᐃᓄᑲᓪᓛᓗᐃᑦ ᑎᓄᔾᔭᕐᕕᖕᒥᐅᑕᑦ ᐸᖕᓂᖅᑑᒧᑦ ᓅᓚᐅᖅᓯᒪᕗᑦ ᑕᐃᔅᓱᒪᓂᓗ ᕿᒻᒦᔭᖅᑕᐅᔪᕕᒡᔪᐊᕌᓘᓚᐅᖅᓯᒪᓪᓗᑎᒃ. ᑕᐃᔅᓱᒪᓂᔅᓴᐃᓐᓇᖅ ᑲᓇᑕᒥ ᒐᕙᒪᒃᑯᑦ ᑎᑎᕋᕐᕕᓕᐅᓚᐅᖅᓯᒪᒋᓪᓗᑎᒃ ᐊᒡᓚᕝᕕᒋᓂᐊᖅᑕᒥᓂᒃ ᓯᕗᓪᓕᖅᐹᑦᑎᐊᒥᒡᓗ ᐃᓕᓴᐃᔨᑖᖅᖢᑎᒃ ᐸᖕᓂᖅᑑᒥ.
ᐊᐃᕆᓕ 1, 1973-ᒥ, ᐸᖕᓂᖅᑑᒥ ᕼᐋᒻᒪᓚᒃᑯᑦ ᐱᖁᔭᑎᒍᑦ ᑎᒥᙳᖅᑎᑕᐅᓚᐅᖅᓯᒪᓪᓗᓂ. ᒪᐃᔭᓗ ᑲᑎᒪᔩᓪᓗ ᓂᕈᐊᖅᑕᐅᓪᓗᑎᒃ ᓄᓇᖅᑲᑎᒌᓄᑦ ᑲᒪᔨᒋᔭᐅᔪᒪᓪᓗᑎᒃ ᐊᒡᓚᕝᕕᓕᕆᔾᔪᑎᑦ ᓄᓇᓕᖕᓂ ᕼᐋᒻᒪᓚᒃᑯᓐᓂ ᐱᔨᑦᑎᕋᖅᑎᖃᓕᕐᓗᑎᒃ. ᐊᔾᔨᒌᙱᑦᑐᓂᒃ ᑲᑎᒪᔨᕋᓛᖃᐅᖅᑐᑦ ᕼᐋᒻᒪᓚᒃᑯᑦ ᑲᑎᒪᔨᖏᓐᓂᒃ ᓲᕐᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᕋᓛᖏᑦ, ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᑦ ᐊᒻᒪ ᒪᒃᑯᒃᑐᓕᕆᔨᒃᑯᑦ.
ᐃᓄᒋᐊᖕᓂᖏᑦ: 1,645
ᖃᐅᔨᒋᐊᕐᕕᒃᓴᖅ
ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-473-8953
ᓱᒃᑲᔪᒃᑯᑦ: 867-473-8832
ᐃᑭᐊᖅᑭᕕᒃ: www.pangnirtung.ca