ᐅᖃᓚᐅᑎᓯᐅᑏᑦ

You are here

ᒥᓂᔅᑕᒨᖓᔪᑦ

ᒪᓕᒐᓕᐅᖅᑎ ᑕᐃᕕᑦ ᐊᕿᐊᕈᖅ

ᑕᐃᕕᑦ ᐊᕿᐊᕈᖅ ᐅᑐᐱᕆ 30, 2017-ᒥᑦ ᓂᕈᐊᖅᑕᐅᓚᐅᖅᐳᖅ,  ᓄᓇᕘᓕᒫᒥ ᓂᕈᐊᖅᑎᓪᓗᒋᑦ ᒪᓕᒐᓕᐅᖅᑎᐅᖃᑕᐅᔪᓄᑦ ᒪᓕᒐᓕᐅᕐᕕᖕᒥ ᓄᓇᕗᒻᒥ ᖁᑦᑎᒃᑐᕐᒧᑦ. ᓄᕕᐱᕆ 21, 2017-ᒥᑦ, ᑎᓕᔭᐅᓚᐅᖅᐳᖅ ᒥᓂᔅᑕᒧᑦ ᑮᓇᐅᔭᓕᕆᔨᒃᑯᓐᓄᑦ, ᒥᓂᔅᑕ ᑲᒪᒋᔭᓕᒃ ᐃᖅᑲᓇᐃᔭᖅᑎᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑎᓄᑦ, ᒥᓂᔅᑕ ᑲᒪᒋᔭᓕᒃ ᐃᒥᐊᓗᓕᕆᔨᕐᔪᐊᒃᑯᓐᓄᑦ ᐊᒻᒪ ᒥᓂᔅᑕ ᑲᒪᒋᔭᓕᒃ ᐃᒥᐊᓗᒃᑖᕈᓐᓇᐅᑎᓕᕆᔨᑦ ᑲᑎᒪᔨᖏᓐᓄᑦ.

ᐅᒃᐱᕈᓱᒃᐳᖅ ᐱᓕᕆᔭᕆᐊᖃᕐᓂᖏᓐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐃᓕᖅᑯᓯᑐᖃᖏᓐᓂᒡᓗ ᑐᙵᕕᖃᖅᑐᓂᑦ, ᐊᒻᒪ ᐊᑐᖃᑦᑕᕐᓗᑎᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐱᒻᒪᕆᐅᒋᔭᖏᓐᓂᒡᓗ ᐋᖅᑭᒋᐊᕈᑎᒃᓴᓂᒃ ᕿᓂᖅᑎᓪᓗᒋᑦ ᐅᓪᓗᒥ ᐃᓱᒫᓘᑕᐅᔪᓂᒃ ᐊᒃᓱᕈᕐᓇᖅᑐᓂᓪᓗ.

ᑕᐃᕕᑦ ᐃᖅᑲᓇᐃᔮᒥᓂᒃ ᐅᑯᓇᓂ ᐃᓂᖃᓪᓗᐊᑕᖃᑦᑕᖅᓯᒪᕗᖅ ᓄᓇᕗᑦ ᒐᕙᒪᖓᓂ, ᑎᑎᕋᖅᑎᐅᖃᑦᑕᖅᓯᒪᓪᓗᓂᓗ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ, ᒥᓂᔅᑕᐅᑉ ᑐᖓᓕᕆᓪᓗᓂᐅᒃ ᐊᕙᑎᓕᕆᓂᕐᒧᑦ, ᒥᓂᔅᑕᐅᑉ ᑐᖓᓕᕆᓪᓗᓂᐅᒃ ᒐᕙᒪᓕᕆᔨᒃᑯᓐᓄᑦ, ᒥᓂᔅᑕᐅᑉ ᑐᖓᓕᕆᓪᓗᓂᐅᒃ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ, ᒥᓂᔅᑕᐅᑉ ᑐᖓᓕᕆᓪᓗᓂᐅᒃ ᐃᓕᖅᑯᓯᓕᕆᔨᒃᑯᓐᓄᑦ, ᐊᒻᒪ ᐊᔾᔨᒌᙱᑦᑐᓂᑦ ᒥᓂᔅᑕᒧᑦ ᑐᖓᓕᕆᔭᐅᒃᑲᓐᓂᖃᑦᑕᖅᓯᒪᓪᓗᓂ.

ᑕᐃᕕᑦ ᐋᔩᖃᑎᒌᒃᑎᓪᓗᐊᑕᐅᓚᐅᖅᐳᖅ ᓄᓇᕗᑦ ᒐᕙᒪᖓᓄᑦ ᓇᖕᒥᓂᖅᓱᕐᓂᕐᒧᑦ ᐋᔩᖃᑎᖃᖅᑎᓪᓗᒋᑦ ᒐᕙᒪᑐᖃᒃᑯᓐᓂ, ᐊᒻᒪ ᓄᓇᕗᑦ ᒐᕙᒪᖓᓄᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑳᑦᑐᓛᒥᒃ ᓄᓇᕗᒻᒥ ᐊᖏᖃᑎᒌᖕᓂᕐᒧᑦ.
ᐃᓚᒋᔭᐅᓚᐅᖅᓯᒪᖕᒥᔪᖅ ᐃᓄᖕᓄᑦ ᐋᔩᖃᑎᒌᒃᑎᓄᑦ ᑲᓇᑕᒥ ᒥᕐᙳᐃᖅᓯᕐᕕᓕᕆᓂᕐᒧᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᒧᑦ. ᓇᓗᓇᐃᖅᑕᐅᓯᒪᑦᑎᐊᖅᑐᖅ ᑲᔪᓯᑎᑦᑎᑦᑎᐊᖃᑦᑕᖅᓯᒪᓂᖓᓂᒃ ᐱᓕᕆᖃᑎᒌᒃᑎᑦᑎᓪᓗᓂ ᐊᒻᒪ ᑲᑐᔾᔨᖃᑎᒌᒃᑎᑦᑎᓪᓗᓂ, ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᓯᓚᑖᓃᑦᑐᓂᑦ ᐱᓕᕆᖃᑎᒋᔭᖏᓐᓂᒃ.

ᑕᐃᕕᑦ ᓄᓕᐊᖓᓗ, ᑭᐅᕈᓪ, 7-ᓂᒃ ᕿᑐᕐᙵᖃᖅᑐᑦ. ᐊᖑᓇᓱᒃᑎᒻᒪᕆᐅᓪᓗᓂ ᐃᖃᓗᒐᒃᓱᒃᑎᐅᓪᓗᓂᓗ, ᓴᐳᔾᔨᓯᒪᔪᒪᓪᓚᑦᑖᖅᐳᖅ ᐊᕙᑎᑦᑎᓐᓂ, ᐃᒪᕐᒥᒃ ᐊᒻᒪ ᐆᒪᔪᓂᒃ, ᑭᖑᕚᒃᓴᑦᑎᓐᓄᑦ ᐃᑲᔫᑕᐅᖁᓪᓗᒋᑦ ᐊᒻᒪ ᖁᕕᐊᒋᔭᐅᖁᓪᓗᒋᑦ. ᑕᐃᕕᑦ ᐊᐅᓱᐃᑦᑐᒥ, ᓄᓇᕗᒻᒥ ᐱᕈᖅᓴᓚᐅᖅᓯᒪᔪᖅ, ᒫᓐᓇᓕ ᐃᖃᓗᖕᓂ ᓄᓇᖃᓕᖅᑐᖅ ᖃᑕᙳᑎᖏᓪᓗ.