ᐊᐱᖅᑯᑎᐅᒐᔪᒃᑐᑦ
ᐅᖃᓕᒫᕐᓗᒋᑦ ᐊᐱᖅᑯᑕᐅᒐᔪᒃᑐᑦ ᒥᒃᓵᓄᑦ ᓂᐅᕕᕐᓂᕐᒥᒃ, ᒥᓗᒃᓯᖃᑦᑕᕐᓂᕐᒥᒃ, ᐊᒻᒪᓗ ᓂᐅᕕᐊᒃᓴᖃᕐᓂᕐᒥᒃ ᓄᓇᕗᒻᒥ.
ᑭᓲᕙᑦ ᐊᔾᔨᒌᙱᑦᑐᑦ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᓕᖕᓄᑦ ᐱᔪᓐᓇᐅᑎᑦ (ᓚᐃᓴᓐᓰᑦ)?
ᒪᕐᕉᖕᓂ ᐊᔾᔨᒌᙱᑦᑐᓂᒃ ᐱᔪᓐᓇᐅᑎᑕᖃᖅᐳᖅ (ᓚᐃᓴᓐᓯ) − ᓂᐅᕕᕐᕕᖕᒦᑦᑐᑦ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᓖᑦ ᐊᒻᒪ ᐅᖓᓯᒋᔭᐅᔪᑦ ᓂᐅᕕᐊᒃᓴᓖᑦ. ᒪᕐᕉᖕᓂ ᐊᔾᔨᒌᙱᑦᑐᓂᒃ ᓂᐅᕕᕐᕕᒃᑕᖃᖅᖢᓂ − ᑕᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᖦᖢᑎᒃ ᐊᒻᒪ ᓂᐅᕕᕐᕕᖕᒦᖃᑕᐅᔪᑦ ᓱᕐᕋᖕᓇᖅᑐᖅᑖᕐᕖᑦ.
ᑭᓲᕙ ᑕᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᑦᑐᓂᒃ ᓂᐅᕕᐊᒃᓴᓖᑦ?
ᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᑦᑐᓂᒃ ᓂᐅᕕᐊᒃᓴᓖᑦ ᐃᒡᓗᖅᔪᐊᕐᒥ ᐊᑕᐅᓯᕐᒦᑦᑐᓐᓇᖅᑐᑦ ᐅᕝᕙᓘᓐᓃᑦ ᓂᐅᕕᕐᕕᖕᒥ ᐃᓂᖃᖅᑎᑕᐅᓲᑦ. ᑕᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᑦᑐᓂᒃ ᓂᐅᕕᕐᕖᑦ ᓂᐅᕕᐊᖑᓲᑦ ᐃᓐᓇᕐᓄᑦ ᐅᑭᐅᓕᖕᓄᑦ 19 ᐅᖓᑖᓂ, ᓴᓂᕋᓕᖅᓱᖅᓯᒪᓪᓗᑎᒃ ᐅᑭᐅᑭᑦᑐᓄᑦ ᐱᔭᐅᔾᔭᐃᖅᓯᒪᓪᓗᑎᒃ. ᑕᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᑦᑐᓂᒃ ᓂᐅᕕᕐᕖᑦ ᖃᐅᔨᓴᕈᑎᒃᓴᓂᒃ ᐊᑐᐃᓐᓇᐅᑎᑦᑎᓲᑦ ᐅᖃᐅᓯᖃᓲᖑᓪᓗᑎᒡᓗ ᓱᕐᕋᖕᓇᖅᑐᒦᑦᑐᑦ ᑐᑭᓯᒋᐊᕈᑎᓂᒃ ᓂᐅᕕᕆᐊᖅᑐᓄᑦ.
ᑭᓲᕙᓕ ᓂᐅᕕᕐᕕᖕᒧᑦ ᐊᑕᓪᓗᓂ ᓱᕐᕋᖕᓇᖅᑐᖅᑖᕐᕕᒃ?
ᓂᐅᕕᕐᕕᖕᒧᑦ ᐊᑕᓪᓗᑎᒃ ᓱᕐᕋᖕᓇᖅᑐᖅᑖᕐᕖᑦ ᓂᐅᕕᕐᕕᖕᓃᖃᑕᐅᔪᑦ ᓂᐅᕕᕐᕕᒃᓴᐅᓪᓗᑎᒃ ᐃᓄᖕᓄᑦ (ᐋᓪᓕᕋᐅᔭᐅᑉ ᐅᖓᑖᓃᑦᑐᓐᓇᖅᑐᑦ, ᐃᒐᓚᔾᔨᖅᓯᒪᓗᑎᒡᓘᓐᓃᑦ ᐅᕝᕙᓘᓐᓃᑦ ᓂᕈᑭᓪᓗᓂ ᐊᕙᑎᓕᒫᖓ ᓴᓂᕋᖃᕐᓗᓂ). ᓂᐅᕕᕐᕕᖕᒧᑦ ᐊᑕᓪᓗᑎᒃ ᓱᕐᕋᖕᓇᖅᑐᖅᑖᕐᕖᑦ ᓂᐅᕕᐊᒃᓴᖃᑐᐃᓐᓇᓲᑦ ᓱᕐᕋᖕᓇᖅᑐᓂᒃ ᑭᓱᑐᐃᓐᓇᓂᒡᓗ ᓱᕐᕋᖕᓇᖅᑐᒧᑦ ᐊᑐᕆᐊᓕᖕᓂᒃ ᐊᑭᖏᑦ ᓇᓗᓇᐃᖅᓯᒪᓗᑎᒃ, ᐊᑐᐃᓐᓇᐅᑎᑕᐅᓗᑎᒃ ᓂᐅᕕᕋᓱᒃᑐᒧᑦ 19 ᐅᖓᑖᓂ ᐅᑭᐅᖃᕐᓂᕐᒥᓂᒃ ᖃᐅᔨᑎᑦᑎᔪᓄᑦ. ᑖᒃᑯᐊ ᓂᐅᕕᕐᕖᑦ ᐊᔪᖅᑎᑕᐅᔪᑦ ᒪᓂᓴᐅᑎᖃᕐᓂᕐᒥᒃ ᖁᕝᕙᕆᐊᕈᑎᒃᓴᓄᓪᓗ ᐃᑲᔫᑎᒃᓴᓂᒃ ᑲᓇᑕᒥ ᒪᓕᒐᖅ ᒪᓕᒃᖢᒍ. ᓱᕐᕋᖕᓇᖅᑐᓕᒫᑦ ᓱᕐᕋᖕᓇᖅᑐᒧᓪᓗ ᑐᕌᖓᔪᑦ ᑮᒍᔾᔭᐅᓯᒪᑦᑎᐊᖏᓐᓇᕆᐊᖃᖅᑐᑦ ᑕᑯᒃᓴᐅᔪᒦᑎᑕᐅᙱᓪᓗᑎᒡᓗ. ᐃᖅᑲᓇᐃᔭᖅᑎᒥᒃ ᑎᑭᓴᖅᑕᐅᔪᑦ ᑲᒪᒋᔭᐅᖃᑦᑕᕐᓂᐊᖅᑐᑦ, ᑎᑭᓴᖅᑕᐅᔪᑦ ᓇᒃᓯᐅᑎᕙᒡᓗᒋᑦ ᐴᖅᑲᕐᓗᒋᓪᓗ ᑕᑯᒃᓴᐅᓐᓇᙱᑦᑐᒧᑦ ᐴᒃᓴᐅᑎᒧᑦ ᓂᐅᕕᖅᑑᑉ ᐊᑭᓕᐅᑎᖓᓐᓂᒃ ᐱᓚᐅᙱᓐᓂᖓᓂ.
ᑭᓱᓪᓕ ᐃᑲᔫᑎᖃᖅᐸᑦ ᐅᖓᓯᒋᔭᐅᔪᒦᑦᑐᑦ ᓂᐅᕕᐊᒃᓴᓕᖕᓄᑦ ᓚᐃᓴᓐᓯᖃᖅᑐᓄᑦ?
ᐅᖓᓯᒋᔭᐅᔪᒦᑦᑐᑦ ᓂᐊᕕᐊᒃᓴᓖᑦ ᐱᔪᓐᓇᖅᑎᑦᑎᓂᐊᖅᑐᑦ ᓂᐅᕕᐊᒃᓴᖃᖅᑎᒥᒃ ᓂᐅᕕᐊᒃᓴᖃᕈᓐᓇᖅᑎᓪᓗᒍ ᖃᕆᑕᐅᔭᒃᑯᑦ ᐅᕝᕙᓘᓐᓃᑦ ᐅᖃᓘᑎᒃᑯᑦ ᑎᑭᓴᐃᔪᓄᑦ ᑎᑭᓴᖅᑕᐅᔪᓪᓗ ᐊᐅᓪᓚᖅᑎᑉᐸᒡᓗᒋᑦ ᓇᓕᐊᖕᓄᑐᐃᓐᓇᖅ ᓄᓇᕗᒻᒥ ᓄᓇᓕᖕᓂ ᑎᑭᓴᐃᔪᓄᑦ. ᐅᖓᓯᒋᔭᐅᔪᒦᑦᑐᑦ ᓂᐅᕕᕐᕖᑦ ᐃᒪᐃᓕᐅᕈᓐᓇᖅᑐᑦ ᑎᑭᓴᖅᑕᐅᔪᓂᒃ ᐊᐅᓪᓚᖅᑎᑦᑎᕙᒡᓗᑎᒃ ᑲᓇᑕᒥ ᑎᑎᖅᑲᒃᑯᕕᒃᑯᑦ ᐊᓯᖏᑦᑎᒍᓪᓘᓐᓃᑦ ᓇᒃᓯᐅᔾᔨᔾᔪᑕᐅᓲᒃᑯᑦ ᐅᕝᕙᓘᓐᓃᑦ ᐊᐃᔭᐅᑎᑦᑎᔪᓐᓇᖅᑐᑦ ᓚᐃᓴᓐᓯᖃᖅᑐᒥᒃ ᓱᕐᕋᖕᓇᖅᑐᖅᑖᕐᕕᖕᒥ.
ᓱᕐᕋᖕᓇᖅᑐᖅᑖᕐᕕᒃ ᐅᖓᓯᒋᔭᐅᔪᓄᑦ ᓂᐅᕕᕈᓐᓇᐅᑎᒥᒃ ᓚᐃᓴᓐᓯᖃᕈᓐᓇᕆᕙ?
ᐄ, ᓄᓇᕗᒻᒥ ᓱᕐᕋᖕᓇᖅᑐᒧᑦ ᒪᓕᒐᓕᐊᖑᔪᒪᔪᑦ ᐱᔪᓐᓇᖅᑎᑦᑎᔪᑦ ᓂᐅᕕᐊᒃᓴᖃᖅᑎᒥᒃ ᓱᕐᕋᖕᓇᖅᑐᓂᒃ ᓚᐃᓴᓐᓯᖃᖅᑎᑦᑎᓂᕐᒥᒃ ᐊᒻᒪ ᐅᖓᓯᒋᔭᐅᔪᒥᒃ ᓂᐅᕕᕐᕕᖕᒥ ᓚᐃᓴᓐᓯᖃᖅᑎᑦᑎᓂᕐᒥᒃ ᐊᑕᐅᓯᕐᒦᒃᑲᓗᐊᖅᐸᑕ, ᐊᑭᓕᒃᑲᓐᓂᕆᐊᖃᙱᓪᓗᓂ.
ᑭᓲᕙᑦ ᐊᔪᙱᑎᑕᐅᔪᓄᑦ ᐊᑐᖅᑕᐅᒋᐊᓕᑦ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᓕᖕᓄᑦ ᓄᓇᕗᒻᒥ?
ᓯᕗᓂᒃᓴᑦᑎᓐᓂ ᓂᐅᕕᐊᒃᓴᖃᖅᑎᐅᔪᒫᖅᑐᑦ ᐅᑭᐅᖃᕆᐊᓖᑦ 19−ᓂᒃ ᐅᖓᑖᓂᒡᓘᓐᓃᑦ ᐸᓯᔭᒃᓴᙳᖅᑎᑕᐅᓂᑰᙱᓪᓗᑎᒡᓗ ᖃᓄᑐᐃᓐᓇᖅ ᐋᖓᔮᕐᓇᖅᑐᓂᒃ ᐱᔾᔪᑎᖃᕐᓗᑎᒃ ᐸᓯᔭᒃᓴᙳᕈᑕᐅᔪᓂᒃ ᓄᓇᕗᒻᒥ ᐅᕝᕙᓘᓐᓃᑦ ᑲᓇᑕᒥ ᒪᓕᒐᑦ ᒪᓕᒡᓗᒋᑦ. ᐱᓇᔪᒃᑐᑦ ᐱᕋᔭᓚᐅᖅᓯᒪᖕᒪᖔᑕ ᖃᐅᔨᓴᕈᑎᓂᒃ ᐱᕝᕕᐅᖃᑦᑕᕆᐊᖃᖅᑐᑦ ᐊᖏᖅᑕᐅᓚᐅᙱᓐᓂᖏᓐᓂᒃ. ᐊᔪᙱᑎᑕᐅᔪᓄᑦ ᐊᑐᖅᑕᐅᒋᐊᓕᑦ ᓇᓗᓇᐃᖅᑕᐅᓯᒪᔪᑦ ᑐᑭᓯᓇᖅᖢᑎᒃ ᐊᒡᒍᖅᓯᒪᓂᓕᒃ 25 ᓱᕐᕋᖕᓇᖅᑐᑦ ᒪᓕᒃᑕᐅᒋᐊᓕᖕᓂᒃ.
ᖃᓄᕐᓕ ᓱᕐᕋᖕᓇᖅᑐᖅᑖᕐᕖᑦ ᓚᐃᓴᓐᓯᖏᑦ ᓂᐅᕕᐊᒃᓴᖃᕈᑎᓄᑦ ᐊᖏᖅᑕᐅᖃᑦᑕᕐᓂᐊᕐᒪᑕ?
ᓚᐃᓴᓐᓯᑖᖅᑎᑕᐅᖃᑦᑕᕐᓂᐊᖅᑐᑦ ᐅᑯᐊ ᒪᓕᒃᑕᐅᓗᑎᒃ:
-
ᓂᐅᕕᐊᒃᓴᓕᖕᓄᑦ ᐱᓇᔫᑎᑦ ᓇᒃᓯᐅᔾᔭᐅᓲᑦ ᓚᐃᓴᓐᓯᑖᖅᑎᑦᑎᔨᒃᑯᑦ ᐊᖓᔪᖅᑳᒻᒪᕆᖓᓐᓄᑦ;
-
ᐊᖓᔪᖅᑳᒻᒪᕆᒃ ᐱᐊᓂᒃᓯᔭᕆᐊᖃᓲᖑᕗᖅ ᕿᒥᕐᕈᔭᐅᖅᑳᕆᐊᓕᖕᓂᒃ ᐱᓇᔫᒻᒥᒃ ᖃᐅᔨᒪᔪᒪᓪᓗᒋᑦ ᐊᔪᙱᑎᑕᐅᔪᓄᑦ ᒪᓕᑦᑎᐊᕋᓗᐊᕐᒪᖔᑕ ᓇᓗᓇᐃᖅᑕᐅᓯᒪᔪᑦ ᒪᓕᒋᐊᓕᖕᓂᒃ (ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᓴᕈᑎᑦ, ᓇᖕᒥᓂᖃᕐᓂᕐᒧᑦ ᓚᐃᓴᓐᓯᑦ, ᒪᓕᑦᑎᐊᕋᓗᐊᕐᒪᖔᑕᓗ ᐊᑦᑕᕐᓇᖅᑐᒧᐊᖅᑕᐃᓕᓂᕐᒧᑦ ᒪᓕᒃᑕᐅᒋᐊᓕᖕᓄᑦ ᓇᓗᓇᐃᖅᑕᐅᓯᒪᔪᑦ ᒪᓕᒋᐊᓕᖕᓂᒃ, ᐊᓯᖏᓪᓗ).
-
ᓄᓇᓕᖕᓂ ᑐᓴᕋᓱᖅᑳᖅᐸᒡᓗᑎᒃ ᓱᕐᕋᖕᓇᖅᑐᑦ ᓂᐅᕕᕐᕕᒃᑖᕐᓂᐊᖅᑐᓂᒃ; ᐊᒻᒪ
-
ᓚᐃᓴᓐᓯᑖᖅᑎᑕᐅᒋᐊᖃᕐᒪᖔᑦ ᐃᓱᒪᓕᐅᕈᑕᐅᓲᑦ ᒥᓂᔅᑕᒧᑦ ᓱᕐᕋᖕᓇᖅᑐᕐᓂᒃ ᓂᐅᕕᕐᕕᓕᖕᓄᑦ ᐅᕝᕙᓘᓐᓃᑦ ᐊᖓᔪᖅᑳᒻᒪᕆᒃ ᐊᖏᖅᓯᓲᖑᓪᓗᓂ ᓱᕐᕋᖕᓇᖅᑐᖅ ᓂᐅᕕᕐᕕᓕᖕᓄᑦ ᓚᐃᓴᓐᓯᒧᑦ ᐊᖏᖅᑕᐅᓯᒪᔪᓄᑦ ᐅᖓᓯᒋᔭᐅᔪᑦ ᓱᕐᕋᖕᓇᖅᑐᖅᑖᕐᕕᖕᓄᑦ (ᓄᓇᓕᖕᓂ ᑐᓴᕋᓱᒡᕕᐅᒋᐊᖃᙱᓐᓂᖏᓐᓄᑦ).
ᖃᐅᔨᒋᐊᕈᓐᓇᖅᑐᑎᑦ ᑐᑭᓯᓇᖅᑐᓂᒃ ᑎᑎᕋᖅᓯᒪᔪᓂᒃ ᐱᓇᔫᑎᑦ ᐊᒻᒪ ᓚᐃᓴᓐᓯᑖᕆᐊᖃᕐᓂᕐᒧᑦ ᐱᓕᕆᔾᔪᓯᕐᓂᒃ ᓄᓇᕗᒻᒥ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᖃᖅᑎᑦ ᐅᖃᓕᒫᒐᖓᓐᓂᒃ ᐊᒻᒪ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᖃᖅᑎᑦ ᐱᓇᔫᑎᓄᑦ ᖃᐅᔨᒋᐊᕈᑎᓂᒃ.
ᑭᓲᕙᑦ ᐱᓇᔫᑎᒥᒃ ᐊᒻᒪ ᓚᐃᓴᓐᓯᒥᒃ ᐊᑭᓕᒃᑲᓐᓂᕆᐊᓕᑦ ᓱᕐᕋᖕᓇᖅᑐᕐᓂᒃ ᓂᐅᕕᐊᒃᓴᖃᖅᑎᐅᔪᒪᓗᓂ?
- ᐱᓇᔫᑎᒧᑦ ᐊᑭᓕᒃᑲᓐᓂᕆᐊᓕᒃ - $2,000
- ᓱᕐᕋᖕᓇᖅᑐᕐᓂᒃ ᓂᐅᕕᕐᕖᑦ ᓚᐃᓴᓐᓯᑖᖓ/ᓄᑖᙳᕆᐊᕈᑎᒧᑦ ᐊᑭᓕᒃᑲᓐᓂᕆᐊᓕᒃ - $1,000
- ᐅᖓᓯᒋᔭᐅᔪᒥᒃ ᓱᕐᕋᖕᓇᖅᑐᖅᑖᕐᕕᖕᓄᑦ ᓚᐃᓴᓐᓰᑦ/ᓄᑖᙳᕆᐊᕈᑎᓄᑦ ᐊᑭᓕᒃᑲᓐᓂᕆᐊᓕᒃ - $500
- ᐊᑭᓕᒃᑲᓐᓂᕆᐊᓕᒃ ᐊᔾᔨᒌᖃᑦᑕᙱᑦᑐᑦ ᓚᐃᓴᓐᓯ ᖃᓄᐃᑦᑑᓂᖓ ᒪᓕᒃᑕᐅᓪᓗᓂ - $500
- ᐊᑭᓕᒃᑲᓐᓂᕆᐊᓕᒃ ᓚᐃᓴᓐᓯᒥᒃ ᓅᑦᑎᓂᐊᕐᓗᓂ - $500
ᓄᓇᕗᒻᒥ ᓱᕐᕋᖕᓇᖅᑐᕐᓂᒃ ᓂᐅᕕᐊᒃᓴᖃᖅᑎᑦ ᐊᑭᓖᔭᕆᐊᖃᕐᒥᔪᑦ ᐊᕐᕌᒍᒥ ᑎᓴᒪᐃᖅᓱᕐᓗᒍ ᓚᐃᓴᓐᓯᒧᑦ ᐊᑭᓕᒃᑲᓐᓂᕆᐊᓕᖕᒥᒃ 2% ᑮᓇᐅᔭᓕᐊᖏᓐᓂᒃ ᓱᕐᕋᖕᓇᖅᑐᕐᓂᒃ ᓂᐅᕐᕈᑎᒋᓯᒪᔭᖏᓐᓄᑦ.
ᖃᔅᓯᓂᒃ ᐱᔪᓐᓇᐅᑎᓂᒃ (ᓚᐃᓴᓐᓯᓂᒃ) ᐱᔪᓐᓇᖅᑎᑦᑎᔭᕆᐊᖃᖅᐱᑕ ᑕᒪᐃᓐᓄᑦ ᓄᓇᓕᖕᓄᑦ?
ᖃᓄᕐᓕ ᓂᕈᐊᖃᑦᑕᕐᓂᐊᖅᐱᓯ ᑭᒃᑯᓐᓂᒃ ᐱᔭᐅᒋᐊᖃᕐᒪᖔᑕ? ᒪᓕᒐᐃᑦ ᐊᑐᐊᒐᖏᑦ ᐊᔪᖅᑎᑦᑎᙱᑦᑐᑦ ᓚᐃᓴᓐᓯᑖᕆᔭᐅᔪᑦ ᐅᓄᕋᓗᐊᖅᐸᑕ ᓇᓕᐊᖕᓂᑐᐃᓐᓇᖅ ᓄᓇᓕᖕᓂ. ᐊᖓᔪᖅᑳᒻᒪᕆᖕᒧᑦ ᑎᑎᕋᕐᕕᐊᓂ ᖃᐅᔨᓴᖃᑦᑕᕐᓂᐊᖅᑐᑦ ᓈᒻᒪᒃᑐᓂᒃ ᑭᓯᐊᓂ ᐱᐅᓛᖑᓂᕋᐃᖃᑦᑕᔾᔮᙱᑦᑐᑦ ᓚᐃᓴᓐᓯᑖᖃᑕᐅᔪᓂᒃ. ᐅᖃᐅᓯᐅᔪᑦ ᓄᓇᓕᖕᓂ ᑐᓴᕋᓱᒡᕕᐅᔪᓂᒃ ᓱᕐᕋᖕᓇᖅᑐᕐᒥ ᓂᐅᕕᕐᕕᖕᓄᑦ ᐃᓱᒪᒋᔭᐅᖃᑦᑕᕐᓂᐊᖅᑐᑦ ᓚᐃᓴᓐᓯᒧᑦ ᐱᓇᔫᑎᑦ ᕿᒥᕐᕈᔭᐅᓕᕌᖓᑕ.
ᖃᓄᕐᓕ ᑐᑭᓯᒋᐊᒐᒃᓴᑦ ᓄᓇᓕᖕᓂ ᑐᓴᕋᓲᑕᐅᔪᓂᒃ ᐱᓕᕆᔾᔪᑕᐅᖃᑦᑕᕐᓂᐊᖅᐸᑕ?
ᓱᕐᕋᖕᓇᖅᑐᖅ ᐱᖁᔭᒃᑯᑦ, ᓄᓇᓕᖕᓂ ᑐᓴᕋᓱᖃᑦᑕᕆᐊᖃᕐᓂᐊᖅᑐᑦ ᓱᕐᕋᖕᓇᖅᑐᕐᓂᒃ ᓂᐅᕕᕐᕕᒃᑖᕈᒪᔪᓄᑦ. ᓄᓇᓕᖕᓂ ᕼᐋᒻᒪᓚᒃᑯᓐᓄᑦ ᑲᑎᒪᔩᑦ ᐊᐱᕆᔭᐅᖃᑦᑕᕐᓂᐊᖅᑐᑦ ᐊᑐᐃᓐᓇᕈᖅᑎᑦᑎᖁᔭᐅᓗᑎᒃ ᑭᐅᔾᔪᑎᓂᒃ ᐊᒻᒪ ᓄᓇᓕᖕᓂ ᐃᓚᒋᔭᐅᔪᑦ ᐱᕕᖃᖅᑎᑕᐅᖃᑦᑕᕐᓂᐊᕐᒥᔪᑦ ᑭᐅᔪᓐᓇᖅᑎᑕᐅᓗᑎᒃ. ᑐᑭᓯᒋᐊᒐᒃᓴᑦ ᓴᖅᑭᑕᐅᖃᑦᑕᕐᓂᐊᖅᑐᑦ ᓄᓇᓕᖕᓂ ᐅᐸᒃᑕᐅᒐᔪᒃᑐᓂᒃ, ᐊᒻᒪ ᓄᓇᓕᖕᓂ ᓈᓚᐅᑎᒃᑯᑦ ᐊᒻᒪ ᐃᓄᖕᓄᑦ ᑐᓴᐅᒪᔪᓕᕆᔾᔪᑎᒃᑯᑦ ᐊᑐᖅᑕᐅᖃᑦᑕᕐᓂᐊᕐᒥᔪᑦ ᑐᓴᐅᒪᑎᑦᑎᔾᔪᑕᐅᓗᑎᒃ ᓄᓇᕗᒥᐅᓄᑦ ᐱᓇᔫᑎᑦ ᓱᕐᕋᖕᓇᖅᑐᕐᒥᒃ ᓂᐅᕕᕐᕕᒃᑖᕈᒪᔪᓄᑦ ᓄᓇᖏᓐᓂᒃ ᐱᔭᐅᓂᖓᓂᒃ ᓇᓗᓇᐃᕐᕕᐅᓗᑎᒃ. ᑭᐅᔾᔪᑎᒃᓴᑦ ᓇᒃᓯᐅᔾᔭᐅᔪᓐᓇᖅᑐᑦ ᐊᖓᔪᖅᑳᒻᒪᕆᐅᑉ ᑎᑎᕋᕐᕕᐊᓄᑦ ᐃᕐᖐᓐᓈᖅᑕᐅᒃᑯᑦ, ᐅᖃᓘᑎᒃᑯᑦ, ᑎᑎᖅᑲᒃᑯᕕᒃᑯᑦ ᐅᕝᕙᓘᓐᓃᑦ ᒐᕙᒪᒃᑯᓐᓂ ᑐᓴᐅᒪᔪᓕᕆᔨᒃᑯᑎᒍᑦ. ᑐᓴᕋᓱᖕᓂᕐᒧᑦ ᑭᐅᔾᔪᑕᐅᔪᓕᒫᑦ ᑲᑎᖅᓱᖅᑕᐅᓗᑎᒃ ᐅᓂᒃᑳᓕᐊᖑᓛᖅᐳᑦ ᐃᓱᒪᒋᔭᐅᓗᑎᒡᓗ ᒥᓂᔅᑕᒧᑦ ᐃᓱᒪᓕᐅᕈᑕᐅᓚᐅᙱᓐᓂᖏᓐᓂᒃ ᓚᐃᓴᓐᓯᑖᕆᐊᖃᕐᒪᖔᑕ ᐋᒃᑲᓘᓐᓃᑦ. ᓄᓇᓖᑦ ᐱᖃᖅᑎᑕᐅᓂᐊᕐᒥᔪᑦ ᐊᔪᓕᖅᑎᑦᑎᔾᔪᑎᒃᓴᓂᒃ ᐋᖅᑭᒃᓱᐃᖁᔭᐅᓗᑎᒃ ᑭᒡᓕᖃᖅᑎᑕᐅᔪᑦ ᒪᓕᒐᕋᓛᒃᑯᑦ ᐊᒻᒪ ᓇᖕᒥᓂᖃᖅᑎᓄᑦ ᓚᐃᓴᓐᓯᑖᕈᑎᓄᑦ.
ᑭᓱᑦ ᓱᕐᕋᖕᓇᖅᑐᕐᓄᑦ ᑐᕌᖓᔪᑦ ᓂᐅᕐᕈᑕᐅᔪᓐᓇᖅᐸᑦ ᓱᕐᕋᖕᓇᖅᑐᕐᓂᒃ ᓂᐅᕕᐊᒃᓴᖃᖅᑎᓄᑦ?
ᓄᓇᕗᖕᒥ ᓱᕐᕋᖕᓇᖅᑐᕐᒧᑦ ᒪᓕᒐᓕᐊᖑᔪᒪᔪᑦ ᐱᕕᖃᕈᑕᐅᕗᑦ ᓂᐅᕐᕈᑎᖃᕐᓂᕐᒧᑦ ᓱᕐᕋᖕᓇᖅᑐᕐᒧᑦ ᑐᕌᖓᔪᓂᒃ ᓱᕐᕋᖕᓇᖅᑐᖅ ᐱᖁᔭᕐᒥ ᓇᓗᓇᐃᖅᓯᒪᔪᑦ ᒪᓕᒃᖢᒋᑦ. ᖃᐅᔨᒪᔭᐅᖁᓪᓗᒋᑦ ᒪᓕᑦᑎᐊᕋᓗᐊᕐᒪᖔᑕ ᑲᓇᑕᒥ ᓱᕐᕋᖕᓇᖅᑐᖅ ᒪᓕᒐᕐᓄᑦ, ᓂᐅᕕᕐᕕᖕᓂ ᑲᑎᙵᖃᑕᐅᔪᑦ ᓱᕐᕋᖕᓇᖅᑐᕐᓂᒃ ᓂᐅᕕᕐᕕᓖᑦ ᓂᐅᕐᕈᑎᖃᕈᓐᓇᖅᑎᑕᐅᓂᐊᖅᑐᑦ ᒪᓕᒐᖅᑎᒍᑦ ᓱᕋᐃᙱᑦᑐᓂᒃ ᓱᕐᕋᖕᓇᖅᑐᕐᓂᒃ ᓱᕐᕋᖕᓇᖅᑐᕐᒧᓪᓗ ᑐᕌᖓᔪᓂᒃ ᑖᒃᑯᓂᖓᑐᐊᖅ. ᑕᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᑦᑐᓂᒃ ᓂᐅᕕᐊᒃᓴᓖᑦ ᐊᒻᒪ ᐅᖓᓯᒋᔭᐅᔪᒦᑦᑐᑦ ᓱᕐᕋᖕᓇᖅᑐᖅᑖᕐᕖᑦ ᐊᔪᖅᑎᑕᐅᔾᔮᙱᑦᑐᑦ ᓂᐅᕐᕈᑎᖃᕈᓐᓇᕐᓗᑎᒃ ᒪᓕᒐᖅᑎᒍᑦ ᓱᕋᐃᙱᑦᑐᓂᒃ ᓱᕐᕋᖕᓇᖅᑐᕐᓂᒃ, ᓱᕐᕋᖕᓇᖅᑐᕐᓄᑦ ᑐᕌᖓᔪᓂᒃ, ᑲᑐᔾᔨᖃᑎᒌᒧᓪᓗ ᐱᓕᕆᔾᔪᑎᓂᒃ. ᐱᔭᕆᐊᖃᖅᑐᓄᑦ ᐃᑲᔫᑎᑦ ᒪᓕᒋᐊᖃᕐᒥᔪᑦ ᑲᓇᑕᒥ ᓱᕐᕋᖕᓇᖅᑐᖅ ᐱᖁᔭᕐᒧᑦ. ᑭᓲᕙᑦ ᓱᕐᕋᖕᓇᖅᑐᓂᒃ ᖃᐅᔨᓴᕈᑎᒃᓴᑦ? ᓱᕐᕋᖕᓇᖅᑐᓂᒃ ᖃᐅᔨᓴᕈᑎᒃᓴᑦ ᐊᓕᒍᕐᒧᑦ ᐴᖅᓯᒪᓪᓗᑎᒃ ᓇᐃᔭᒃᓴᐅᓪᓗᑎᒃ ᑕᑯᒃᓴᐅᓪᓗᑎᒃ ᓱᕐᕋᖕᓇᖅᑐᑦ ᓂᐅᕕᕈᒪᔪᑦ ᓇᐃᔭᐅᔪᓐᓇᕐᓗᑎᒃ ᓂᐅᕕᕐᕕᖕᒦᖃᑕᐅᔪᑦ ᓱᕐᕋᖕᓇᖅᑐᖅᑖᕐᕕᖕᓂ ᓇᐃᔪᒪᒑᖓᑕ ᑕᑯᔪᒪᒑᖓᑕᓗ ᓱᕐᕋᖕᓇᖅᑐᕐᓂᒃ ᖃᐅᔨᓴᕈᑎᒃᓴᓂᒃ. ᓱᕐᕋᖕᓇᖅᑐᓂᒃ ᖃᐅᔨᓴᕈᑎᑦ ᑮᒍᔾᔭᐅᓯᒪᓲᑦ ᐱᔭᐅᔾᔭᐃᖅᓯᒪᓲᖑᓪᓗᑎᒡᓗ/ᐊᑦᑕᑕᖅᑎᑕᐅᓯᒪᓪᓗᑎᒃ ᓱᕐᕋᖕᓇᖅᑐᖅᑖᕐᕕᖕᒧᑦ. ᓱᕐᕋᖕᓇᖅᑐᓂᒃ ᖃᐅᔨᓴᕈᑎᑕᖃᕆᐊᖃᙱᑦᑐᖅ ᓂᐅᕕᕐᕕᖕᓂ ᓂᐅᕕᐊᒃᓴᕆᔭᐅᔪᓂᒃ.
ᑭᓲᖕᒪᑕ ᐱᔭᕆᐊᖃᖅᑐᓄᑦ ᐃᑲᔫᑎᑦ?
ᐱᔭᕆᐊᖃᖅᑐᓄᑦ ᐃᑲᔫᑎᑦ ᐱᖁᑎᐅᕗᑦ ᐊᒃᑐᐊᓂᓖᑦ ᓱᕐᕋᖕᓇᖅᑐᕐᒧᑦ ᐊᑐᖅᑕᐅᓲᒧᑦ ᑭᓯᐊᓂ ᓂᕆᔭᒃᓴᓕᐊᕆᓯᒪᙱᑦᑐᓂᒃ ᓱᕐᕋᖕᓇᖅᑐᓂᒃ. ᐅᑯᐊ ᑎᑎᕋᖅᓯᒪᔪᑦ ᐱᔭᕆᐊᖃᖅᑐᓄᑦ ᐃᑲᔫᑎᑦ ᓂᐅᕕᐊᒃᓴᐅᔪᓐᓇᖅᑐᑦ ᑕᑯᒃᓴᐅᒐᓗᐊᖅᖢᑎᒃ ᑎᒍᑐᐃᓐᓇᐅᙱᑦᑐᑦ ᓱᕐᕋᖕᓇᖅᑐᕐᓂᒃ ᓂᐅᕕᐊᒃᓴᓖᑦ ᐊᒻᒪ ᐅᖓᓯᒋᔭᐅᔪᒦᑦᑐᑦ ᓱᕐᕋᖕᓇᖅᑐᖅᑕᕐᕖᑦ:
- ᐃᓅᓕᓴᐅᑎᑦ ᑮᒃᑕᖅᑐᑦ ᕿᔪᖁᑎᑦ
- ᐆᓇᕐᓂᖓᓄᑦ ᖃᐅᔨᓴᕈᑎᑦ
- ᐳᔪᕐᒥᒃ ᒥᓗᒃᓯᔾᔪᑎᒧᑦ ᓴᓗᒻᒪᖅᓴᐅᑎᒃᓴᑦ
- ᓇᓗᓇᐃᒃᑯᑕᖃᖅᑐᑦ ᑕᖅᓴᓖᑦ
- ᓇᓗᓇᐃᒃᑯᑦᑎᖅᓯᒪᔪᑦ ᐊᑐᖅᑕᐅᒃᑲᓐᓂᕈᓐᓇᖅᑐᑦ ᓂᐅᕕᐊᒃᑯᕖᑦ
ᓂᐅᕕᖅᑎᒥᒃ ᓂᐅᕐᕈᑎᖃᖅᑐᖃᕈᒪᒃᐸᑦ ᐱᔭᕆᐊᖃᖅᑐᓄᑦ ᐃᑲᔫᑎᓂᒃ ᖁᓛᓂ ᓇᓗᓇᐃᖅᓯᒪᙱᑦᑐᓂᒃ, ᐊᖓᔪᖅᑳᒻᒪᕆᖕᒥᒃ ᐊᖏᖅᑕᐅᔭᕆᐊᖃᖅᑐᑦ.
ᓂᐅᕕᖅᑎᐅᖃᑕᐅᔪᑦ ᐃᓕᓐᓂᐊᖃᑦᑕᕆᐊᖃᖅᐸᑦ ᓂᐅᕐᕈᑎᖃᖃᑦᑕᓯᒋᐊᓚᐅᙱᓐᓂᖏᓐᓂᒃ ᓱᕐᕋᖕᓇᖅᑐᕐᓂᒃ ᓄᓇᕗᒥᐅᓄᑦ?
ᐄ, ᐃᖅᑲᓇᐃᔭᖅᑎᑦ ᐱᔨᑦᑎᕋᖅᑎᐅᔪᑦ ᓂᐅᕕᖅᐸᒃᑐᓂᒃ ᓇᓗᓇᐃᒃᑯᑕᖅᑖᖅᓯᒪᔭᕆᐊᖃᖅᑐᑦ ᓱᕐᕋᖕᓇᖅᑐᖅ ᓂᐅᕕᖅᑎᐅᓂᕐᒧᑦ ᐃᓕᓐᓂᐊᕈᑎᓂᒃ. ᐃᓕᓐᓂᐊᒐᒃᓴᑦ ᐊᑐᐃᓐᓇᐅᓂᐊᖅᑐᑦ ᑕᒪᐃᓐᓂ ᐃᓕᓴᕆᔭᐅᓯᒪᔪᑦ ᐅᖃᐅᓯᕐᓂᒃ ᓄᓇᕗᒻᒥ. ᐅᑯᐊ ᐃᓕᓐᓂᐊᒐᒃᓴᑦ: • ᑲᓇᑕᒥ/ᓄᓇᕗᒻᒥ ᓱᕐᕋᖕᓇᖅᑐᒧᑦ ᒪᓕᒐᑦ ᐱᔾᔪᑎᒋᓪᓗᒋᑦ ᓱᕐᕋᖕᓇᖅᑐᑦ ᓂᐅᕕᐊᒃᓴᑦ; • ᑲᒪᒋᑦᑎᐊᕐᓗᒋᑦ ᓂᐅᕐᕈᑎᒃᓴᑦ ᑲᒪᒋᑦᑎᐊᕐᓗᒋᓪᓗ ᓱᕐᕋᖕᓇᖅᑐᑦ; • ᖃᐅᔨᔪᓐᓇᖅᓯᓂᖅ ᓂᐅᕕᕋᓱᒃᑐᖅ ᐋᖓᔮᕐᒪᖔᑦ; ᐊᒻᒪ • ᓱᕐᕋᖕᓇᖅᑐᖅᑑᒪᓂᖅ ᑲᒪᒋᑦᑎᐊᕐᓗᒍ.
ᖃᔅᓰᓐᓇᕐᓄᑦ ᐃᑲᕐᕋᓄᑦ ᓱᕐᕋᖕᓇᖅᑐᖅᑖᕖᑦ ᓄᓇᕗᒻᒥ ᒪᒃᐱᖅᓯᒪᖃᑦᑕᕐᓂᐊᖅᐸᑦ?
ᒪᓕᒃᖢᒍ ᓄᓇᕗᒻᒥ ᓱᕐᕋᖕᓇᖅᑐᒧᑦ ᒪᓕᒋᐊᓕᑦ, ᓱᕐᕋᖕᓇᖅᑐᖅᑖᕐᕖᑦ ᒪᒃᐱᖅᓯᒪᖃᑦᑕᕐᓂᐊᖅᑐᑦ ᐃᑲᕐᕋᖃᕐᓗᑎᒃ 8:00−ᒥ ᐅᓪᓛᒃᑯᑦ 10:00−ᒧᑦ ᐅᓐᓄᒃᑯᑦ ᐃᖅᑲᓇᐃᔭᕐᓇᒃᑯᑦ ᕿᑲᕐᓇᐅᙱᑐᐊᕌᖓᑦ. ᑭᓯᐊᓂ, ᓄᓇᓕᖕᓂ ᑐᓴᐅᒪᑎᑦᑎᔾᔪᑎᑦ ᑐᓴᐅᒪᔾᔪᑕᐅᓂᐊᖅᐳᑦ ᓂᐅᕕᕐᕖᑦ ᐃᑲᕐᕋᖏᓐᓂᒃ ᑕᒪᐃᓐᓄᑦ ᓱᕐᕋᖕᓇᖅᑐᖅᑖᕐᕕᖕᓂᒃ, ᒪᒃᐱᖅᓯᒪᓂᕆᔭᖓᑕ ᐃᑲᕐᕋᖏᑦ ᐃᓱᒪᖅᓲᑕᐅᙱᑐᐃᓐᓇᕆᐊᖃᕐᒥᔪᑦ. ᓄᓇᓕᖕᓂ ᓴᖅᑭᑦᑎᔪᓐᓇᕐᒥᔪᑦ ᐃᑲᕐᕋᖏᑦ ᐃᓱᒪᖅᓱᕐᓇᙱᓐᓂᖅᓴᐅᓗᑎᒃ ᓄᓇᓕᖕᓂ ᒪᓕᒐᕋᓛᖏᑦ ᒪᓕᒃᑕᐅᓗᑎᒃ. ᐊᑐᓂ ᓚᐃᓴᓐᓰᑦ ᓇᓗᓇᐃᖅᓯᖃᑦᑕᕐᓂᐊᖅᑐᑦ ᐃᑲᕐᕋᓂᒃ ᒪᒃᐱᖅᓯᒪᓂᕆᖃᑦᑕᕐᓂᐊᖅᑕᖏᓐᓂᒃ ᓱᕐᕋᖕᓇᖅᑐᖅᑖᕐᕕᖕᓂ.
ᖃᓄᕐᓕ ᓄᓇᕗᒻᒥ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᓖᑦ ᓂᐅᕕᖃᑦᑕᕐᓂᐊᕐᒪᑕ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᕆᔪᒪᔭᖏᓐᓂᒃ?
ᓄᓇᕗᒻᒥ ᓱᕐᕋᖕᓇᖅᑐᓂᒃ ᓂᐅᕕᐊᒃᓴᓖᑦ ᐱᕕᖃᖅᑎᑕᐅᓂᐊᖅᑐᑦ ᓱᕐᕋᖕᓇᖅᑐᕐᓂᒃ ᓂᐅᕕᕈᓐᓇᕐᓗᑎᒃ ᐅᑯᓇᙵᑦ ᓇᓕᐊᖕᓂᑐᐃᓐᓇᖅ ᓱᕐᕋᖕᓇᖅᑐᖅᑖᕐᕕᖕᓂᒃ:
- ᐊᑎᖃᖃᑕᐅᔪᓂᒃ ᓱᕐᕋᖕᓇᖅᑐᖅᑖᕐᕖᑦ;
- ᓄᓇᕗᒻᒥ ᐃᒥᐊᓗᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ; ᐊᒻᒪ
- ᐊᓯᖏᓐᓂᒃ ᓄᓇᕗᒻᒥ ᓱᕐᕋᖕᓇᖅᑐᖅᑖᕈᑎᓂᒃ ᓚᐃᓴᓐᓯᖃᖅᑐᓂᒃ.
ᐊᖓᔪᖅᑳᒻᒪᕆᐅᑉ ᑎᑎᕋᕐᕕᐊᓂ ᐸᐸᑦᑎᖃᑦᑕᕐᓂᐊᖅᑐᑦ ᐊᑎᓕᐅᖅᑕᐅᖃᑕᐅᓯᒪᔪᓂᒃ ᓂᐅᕕᐊᒃᓴᖃᓲᓂᒃ ᓂᐅᕕᕐᕕᓕᖕᓄᑦ. ᑕᒪᒃᑯᐊ ᐊᑐᐃᓐᓇᕈᖅᑎᑕᐅᔪᓐᓇᖅᑐᑦ ᐃᓄᓕᒫᓄᑦ ᑮᓇᐅᔭᓕᕆᔨᒃᑯᑦ ᐃᑭᐊᖅᑭᕕᖓᑎᒍᑦ ᑭᓯᐊᓂᓕ ᑐᓴᐅᒪᔭᐅᔪᒪᙱᑦᑐᖃᕐᓂᖅᐸᑦ ᓂᐅᕕᐊᒃᓴᖃᓲᒥᒃ ᓴᖅᑭᑎᑕᐅᙱᑦᑐᓐᓇᖅᑐᖅ.