ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2021
ᐱᕙᓪᓕᐊᔪᑦ ᓴᖅᑭᑕᖅ
ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2021
ᐃᖃᓗᐃᑦ, ᓄᓇᕗᑦ (ᕕᕗᐊᕆ 1, 2021) – ᕕᕗᐊᕆ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᐅᖕᒪᑦ, ᓄᓇᕘᑉ ᐊᕐᕌᒍᑕᒫᑦ ᖁᕕᐊᓱᑎᖃᕐᐸᖕᓂᖓ ᐃᓄᒃᑐᑦ ᐅᖃᐅᓯᖕᒥᑦ. ᑕᒪᑐᒪᓂ ᐊᕐᕌᒍᒥ ᐱᔾᔪᑕᐅᓂᐊᕐᑐᖅ ᐃᓄᐃᑦ ᐱᙳᐊᕈᓯᖏᑦ – ᐃᓄᐃᑦ ᐱᙳᐊᕈᑎᑐᖃᖏᑦ.
“ᐃᓄᐃᑦ ᐱᙳᐊᕈᓯᑐᖃᖏᑦ ᐃᓚᒋᔭᐅᓯᒪᒻᒪᕆᒃᐳᖅ ᐃᓕᖅᑯᓯᑦᑎᓐᓂᑦ ᑭᖑᕚᕇᓄᑦ, ᐃᑲᔫᑎᐅᓪᓗᓂ ᐊᓐᓇᐅᒪᔪᓐᓇᕋᓱᖕᓂᖕᓂᑦᒥ ᓴᙱᒃᑎᓴᕐᓂᒃᑯᑦ ᐊᒃᓱᕈᕐᓇᖅᑐᒃᑰᕈᓐᓇᕐᓂᕐᓗ, ᐊᒻᒪᓗᑦᑕᐅᖅ ᓯᓚᖅᑲᑎᒌᖕᓂᖕᒥᑦ ᓄᓇᓕᖕᓂᑦ,” ᐅᖃᓚᐅᕐᑐᖅ ᒥᓂᔅᑕ ᐃᓕᖅᑯᓯᓕᕆᔨᒃᑯᓐᓄᑦ, ᒫᒡᒍᓚᑦ ᓇᑲᓱᒃ. “ᐊᕐᕌᒍᓕᒫᑲᓴᖕᒥᑦ ᓄᕙᒡᔪᐊᕐᓇᖅ-19 ᓄᓇᕐᔪᐊᒥᑦ ᖃᓂᒪᓂᐅᔪᖅ, ᐃᓕᑕᑦ ᖃᐅᔨᔭᓪᓗ ᐱᙳᐊᕈᓯᒋᕙᒃᑕᑦᑎᓐᓂ ᐱᒻᒪᕆᐊᓗᖕᒥᑦ ᐃᖅᑲᐃᓯᔾᔪᑕᐅᕗᖅ. ᑲᓱᖅᓯᒪᐃᓐᓇᕐᑎᓪᓗᑕ, ᑲᑎᙵᖏᒃᑲᓗᐊᕐᑎᓪᓗᑕ, ᐱᙳᐊᕈᓯᑎᖃᕗᑦ ᐊᔪᕆᖅᓱᐃᕙᒃᐳᑦ ᐅᑕᖅᑭᓂᕐᒥᑦ ᐊᑐᕐᑎᓪᓗᑕ ᐃᓕᑦᑎᑎᓪᓗᑕᓗ ᐃᓄᐃᑦ ᐃᓕᖅᑯᓯᖏᓐᓂᑦ ᑭᓇᐅᓂᖏᓐᓂᓪᓗ.”
ᑕᒪᑐᒪᓂ ᐊᕐᕌᒍᒥᑦ, ᓄᓇᕗᒻᒥᐅᑦ ᐃᓚᐅᖁᔭᐅᕗᑦ ᖁᕕᐊᓲᑎᖃᖃᑕᐅᖁᔭᐅᓪᓗᑎᒃ ᑐᓴᖅᑎᑦᑎᓗᑎᒃ ᐊᑐᕐᐸᓚᐅᕐᑕᖏᓐᓂᑦ ᐅᓂᒃᑳᕐᓗᑎᒃᓗ ᑕᒪᑐᒪ ᐊᕐᕌᒍᒥᑦ ᐱᔾᔪᑕᐅᔪᒥᑦ. ᐃᓚᖏᑦ ᐊᕐᕌᒍᒥᑦ ᓴᖅᑭᔮᕐᑎᑕᐅᓂᐊᕐᑐᑦ ᐃᓐᓇᐃᑦ ᑐᓴᕐᑎᑦᑎᑎᓪᓗᒋᑦ ᐱᒻᒪᕆᐅᓂᖏᓐᓂᑦ ᐱᙳᐊᕐᓂᑦ ᐱᐅᕐᓱᐊᕐᑕᐅᓂᖏᑦ ᐃᓄᐃᑦ ᐃᓕᖅᑯᓯᖏᓐᓂᑦ ᐅᖃᐅᓯᖏᓐᓂᓪᓗ, ᐅᖃᐅᓯᖅ ᐱᓇᓱᐊᕈᓯᖕᒥᑦ, ᓄᑖᓪᓗ ᐱᓕᕆᐊᒃᓴᑦ ᐱᕙᓪᓕᐊᑎᑦᑎᔪᑦ ᐃᓄᒃᑐᑦ ᓲᕐᓗ ᐃᓚᓯᓪᓗᑎᒃ ᐃᓄᒃᑎᑐᑦ ᒪᐃᑯᓵᑉ ᑐᑭᓕᐅᕆᓂᖕᒧᑦ.
ᓄᓇᕗᑦ ᐊᔾᔨᐅᖏᑦᑐᖅ ᐊᔾᔨᐅᖏᓐᓂᖓᓄᓪᓗ ᐅᖃᐅᓯᓕᕆᓂᖅ ᑲᓇᑕᒥ. ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ ᐊᕐᕌᒍᑕᒫᖅ ᖁᕕᐊᓲᑎᖃᕐᓂᖅ ᐱᒻᒪᕆᐅᓂᖓᓂᑦ, ᐱᐅᓯᑐᖃᖅ ᐊᔾᔨᒌᖏᕈᓘᔭᕐᓂᕐᓗ ᐃᓄᒃᑐᑦ ᓄᓇᕗᒻᒥ. ᓄᓇᕗᒻᒥᐅᑦ ᑲᔪᖏᖅᓴᖅᑕᐅᕗᑦ ᐱᕚᓪᓕᕐᑎᑦᑎᕙᒡᓗᑎᒃ ᐃᓄᒃᑐᑦ ᖃᐅᑕᒫᒃ ᐅᓂᒃᑳᕐᓂᒃᑯᑦ, ᐱᙳᐊᕐᓂᒃᑯᑦ ᐃᓚᐅᓂᒃᑯᓪᓗ ᖁᕕᐊᓱᒃᑐᓂᑦ ᐃᓄᖕᓄᑦ ᑐᓴᐅᒪᔾᔪᑎᑎᒍᑦ ᐊᑐᕐᓗᑎᒃ #Quviasuutiqarniq.
ᑐᑭᓯᒋᐊᒃᑲᓂᕈᒪᒍᕕᑦ ᐅᕗᙵᐅᓗᑎ: https://www.gov.nu.ca/iu/iliqkusilirijikkut/information/2021-uqausirmut….
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᒪᐃᑯᓪ ᓵᓚᒨᓂ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᐃᓕᖅᑯᓯᓕᕆᔨᒃᑯᑦ
867-975-5526
@email