ᐅᑭᐅᖅᑕᖅᑐᒥ ᓯᕗᓕᖅᑏᑦ ᐅᖃᐅᓯᖃᖅᐳᑦ ᐊᓯᔾᔨᖅᓴᕋᐃᑦᑐᓐᓇᖅᑐᒥᒃ ᐅᑭᐅᖅᑕᖅᑐᒥᒃ
ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
ᐅᑭᐅᖅᑕᖅᑐᒥ ᓯᕗᓕᖅᑏᑦ ᐅᖃᐅᓯᖃᖅᐳᑦ ᐊᓯᔾᔨᖅᓴᕋᐃᑦᑐᓐᓇᖅᑐᒥᒃ ᐅᑭᐅᖅᑕᖅᑐᒥᒃ
ᑎᓯᐱᕆ 11, 2020 – ᓯᕗᓕᖅᑎ ᓴᕕᑲᑖᖅ, ᓯᕗᓕᖅᑎ ᓯᐅᓪᕗ ᐊᒻᒪᓗ ᓯᕗᓕᖅᑎ ᑳᑯᕋᐃᓐ ᑲᑎᓚᐅᖅᐳᑦ ᐊᐴᑎᓯᒪᖃᑦᑕᐅᑎᙱᒃᑲᓗᐊᖅᖢᑎᒃ 18−ᖓᓄᑦ ᐊᕐᕌᒍᑕᒫᑦ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᓐᓂᕆᕙᒃᑕᖓᓄᑦ, ᑕᒪᓐᓇᓗ ᑲᔪᓯᑎᑕᐅᓪᓗᓂ ᓄᓇᑦᑎᐊᑉ ᒐᕙᒪᖓᓄᑦ
ᓯᕗᓕᖅᑏᑦ ᐅᖃᖃᑎᒌᒡᔪᐊᖃᑦᑕᖅᓯᒪᕗᑦ ᑕᒪᑐᒪᓂᓕᒫᖅ ᓄᓇᕐᔪᐊᕐᒥ ᖃᓂᒪᓐᓇᖅᑐᖃᕐᓂᓕᒫᖓᓂ, ᑕᒪᓐᓇᓗ ᖄᒃᑲᓐᓂᐊᒎᖅᑎᖦᖢᒍ ᐊᕐᕌᒍᑕᒫᑦ ᑲᑎᒪᓂᕆᕙᒃᑕᒥᓄᑦ. ᐅᓪᓗᒥ, ᐅᖃᐅᓯᕆᔭᒥᓂᒃ ᑲᔪᓯᑎᑦᑎᓚᐅᖅᐳᑦ ᖃᔅᓯᑲᓪᓚᖕᓄᑦ ᐃᓱᒪᒋᔭᒃᓴᓄᑦ ᐅᑯᐊ ᐃᓚᒋᔭᐅᓪᓗᑎᒃ: ᐋᓐᓂᐊᖃᕐᓇᙱᑦᑐᓕᕆᓂᖅ, ᓯᓚᐅᑉ ᐊᓯᔾᔨᖅᐸᔾᔨᐊᓂᖓᓄᑦ ᐱᓕᕆᕝᕕᖃᕐᓂᖅ ᐅᑭᐅᖅᑕᖅᑐᒥᓗ ᐅᑭᐅᒧᓪᓗ ᐊᑐᐊᒐᕐᓄᑦ ᐊᑐᖅᑕᐅᓂᐊᖅᑐᓂᒃ.
ᓯᕗᓕᖅᑏᑦ ᖁᔭᒋᔭᖃᖅᐳᑦ ᑲᓇᑕᐅᑉ ᒐᕙᒪᖓᑕ ᑲᔪᓰᓐᓇᖅᑐᒃᑯᑦ ᑮᓇᐅᔭᑎᒍᑦ ᐃᑲᔪᖅᑐᐃᖏᓐᓇᕐᓂᖏᓐᓄᑦ ᓄᓇᕐᔪᐊᓕᒫᒥ ᖃᓂᒪᓐᓇᖅᑐᖃᕐᓂᖓᓂ ᐃᓱᒪᒃᓴᖅᓯᐅᕈᑎᒃᓴᓄᓪᓗ ᐊᔾᔨᖃᙱᑦᑐᓄᑦ ᐊᓂᒍᖅᑎᓐᓇᓱᒋᐊᖃᖅᐸᒃᑐᓄᑦ ᖃᓄᐃᓕᖓᓂᖏᓐᓄᓪᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᑦ. ᑖᒃᑯᐊ ᑲᑐᔾᔨᓪᓗᑎᒃ ᐱᓕᕆᖃᑎᒌᒃᐳᑦ ᓴᖅᑭᑎᑦᑎᔪᒪᓪᓗᑎᒃ ᐅᑭᐅᖅᑕᖅᑐᒥ ᐃᓱᒪᒋᔭᒃᓴᓂᒃ ᓯᕗᓪᓕᖅᐸᐅᑦᑎᐅᑎᓗᒋᓪᓗ ᑲᐱᔭᐅᓇᔭᕐᓂᕐᒧᑦ ᓴᓂᕐᕙᒃᓯᕕᐅᓂᕐᒧᑦ ᐅᖃᖅᖢᑎᒡᓗ ᒐᕙᒪᑐᖃᒃᑯᓐᓄᑦ ᐋᖅᑭᒋᐊᖅᓯᒃᑲᓐᓂᖁᓪᓗᒋᑦ ᑕᒪᑐᒥᖓ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ ᐱᓕᕆᖃᑎᒌᖕᓂᕐᒧᑦ. ᓈᒻᒪᒃᑐᓂᒃ, ᐊᕗᖓᑲᓪᓚᒃ ᒐᕙᒪᑐᖃᒃᑯᓐᓂᑦ ᑮᓇᐅᔭᖃᖅᑎᑕᐅᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔭᐅᔭᕆᐊᖃᖅᐳᖅ ᖃᐅᔨᒪᑦᑎᐊᕈᒪᓂᕐᒧᑦ ᑲᔪᓯᕙᓪᓕᐊᖏᓐᓇᕈᓐᓇᖃᑦᑕᖅᑐᒥᒃ ᓯᕗᓂᒃᓴᖃᖁᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᐸᒃᑕᕗᑦ.
ᓯᕗᓕᖅᑏᑦᑕᐅᖅ ᐅᖃᐅᓯᖃᓚᐅᕆᕗᑦ ᐊᖏᒡᓕᕙᓪᓕᐊᔪᓂᒃ ᐊᓂᒍᖅᑎᓐᓇᓱᒋᐊᖃᖅᐸᒃᑐᓂᒃ ᑕᒪᓐᓇ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓴᖅᑭᑎᑦᑎᕙᖕᓂᖓᓄᑦ ᐅᑭᐅᖅᑕᖅᑐᒧᑦ ᐊᖏᖃᑎᒌᒃᖢᑎᒡᓗ ᐱᒻᒪᕆᐊᓘᓂᖓᓂᒃ ᐱᓕᕆᖃᑎᖃᕐᓂᖅ ᓄᓇᖃᖅᑳᖅᑐᓄᑦ ᒐᕙᒪᒋᔭᐅᔪᓂᒃ ᓈᑦᒪᒃᑐᓄᑦ, ᐊᓯᔾᔨᒋᐊᒐᒃᓴᐅᔪᓂᒃ ᒐᕙᒪᑐᖃᒃᑯᓐᓂᑦ ᐃᑲᔪᖅᑐᖅᑕᐅᓂᕐᒧᑦ ᐱᓕᕆᕝᕕᖃᕐᓂᐊᕐᓗᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒥᑭᓈᖅᑐᒃᑰᖅᑎᑦᑎᓇᓱᖕᓂᕐᒧᑦ ᐊᑐᓕᖅᓯᓂᕐᒧᓪᓗ ᐱᓇᔪᒃᑕᐅᔪᓄᑦ.
ᓯᕗᓕᖅᑏᑦ ᐱᒃᑯᓕᕗᑦ ᒐᕙᒪᑐᖃᒃᑯᑦ ᑲᔪᓯᕙᓪᓕᐊᓂᖏᓐᓂᒃ ᐊᑐᓕᖅᑎᑦᑎᓂᕐᒥᒃ ᐅᑭᐅᖅᑕᖅᑐᒥ ᐅᑭᐅᒥᓗ ᐊᑐᐊᒐᕐᓄᑦ ᐊᑐᖅᑕᐅᖃᑦᑕᕋᔭᖅᑐᒥ, ᓂᕆᐅᒋᖃᖅᖢᑎᒡᓗ ᑕᑯᓂᐊᕐᓂᕐᒥᒃ ᐆᒻᒪᕆᒃᑐᓂᒃ ᑮᓇᐅᔭᓕᐅᕋᓱᖕᓂᐅᕙᒃᑐᓂᒃ ᓇᓗᓇᙱᑦᑐᓂ ᐃᓂᓂ ᐱᔭᕆᐊᖃᕐᓂᕐᓂ, ᑕᒪᒃᑯᐊᓗ ᓇᓗᓇᐃᖅᑕᐅᓯᒪᓪᓗᑎᒃ.
ᑭᖑᓕᖅᐹᒥᒃ, ᓯᕗᓕᖅᑏᑦ ᐅᖃᐅᓯᖃᓚᐅᖅᐳᑦ ᐊᓯᔾᔨᖅᓴᕋᐃᑦᑐᓐᓇᖅᐸᖕᓂᖏᓐᓂᒃ ᐅᑭᐅᖅᑕᖅᑐᒥᐅᑦ, ᐱᓗᐊᙳᐊᖅᖢᓂ ᑕᒪᑐᒪᓂ ᐊᕐᕌᒍᒥ ᖃᔅᓯᑲᓪᓚᐅᑎᓪᓗᒋᑦ ᐊᓂᒍᖅᑎᓐᓇᓱᒋᐊᖃᖅᐸᒃᑐᑦ. ᑕᒪᑐᒪᓂᓕᒫᖅ ᓄᕙᒡᔪᐊᕐᓇᖅᑐᒥᒃ ᓄᓇᕐᔪᐊᓕᒫᒥ ᖃᓂᒪᓐᓇᕐᓂᕆᔭᐅᔪᒥ, ᐅᑭᐅᖅᑕᖅᑐᒥᐅᑦ ᑲᑎᖃᑦᑕᖅᓯᒪᕗᑦ ᐃᒻᒥᓂᒃ
ᐃᑲᔪᖅᑐᐃᖃᑎᒌᒍᒪᓪᓗᑎᒃ, ᐊᕕᒃᓯᒪᖃᑦᑕᕆᐊᖃᖦᖤᕋᓗᐊᕋᒥᒃ. ᑕᐃᒪᐃᓐᓂᖓᓄᑦ, ᓯᕗᓕᖅᑏᑦ ᐅᓪᓗᒥ ᐱᕕᒃᓴᒥᓂᒃ ᐊᑐᓚᐅᖅᐳᑦ ᓄᑖᙳᕆᐊᖅᑎᑦᑎᔪᒪᓪᓗᑎᒃ ᐱᓕᕆᐊᖃᓪᓚᕆᒍᒪᓂᕐᒥᓂᒃ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᐱᓕᕆᖃᑎᒌᖕᓂᕐᒥᒃ ᑲᔪᓯᑎᑦᑎᔪᒪᓂᕐᒧᓪᓗ ᐅᑭᐅᖅᑕᖅᑐᒥ−ᐋᖅᑭᒃᓱᖅᑕᐅᓯᒪᔪᓄᑦ ᑲᑐᔾᔨᓪᓗᑎᒃ ᓯᕗᓪᓕᖅᐸᐅᔾᔭᐅᓯᒪᔪᓄᑦ.
ᓄᓇᕗᑦ ᓇᓗᓇᐃᖅᑕᐅᓪᓚᕆᓚᐅᖅᐳᖅ ᑲᔪᓯᑎᑦᑎᔨᐅᓂᐊᓕᕐᓂᖓᓂᒃ 2021−ᒥ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᖃᑎᒌᖕᓂᕆᓛᖅᑕᖓᓄᑦ. ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓂᕆᕙᒃᑕᖓᑦ ᐱᓕᕆᐊᖑᕙᒃᐳᖅ ᐊᕐᕌᒍᑕᒫᑦ ᐱᖓᓱᓂᒡᓗ ᓯᕗᓕᖅᑎᓂᒃ ᑲᑎᖃᑎᒌᒃᑎᑦᑎᕙᒃᖢᓂ.
###
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᖅ:
ᑖᑦ ᓴᓴᑭ
ᑐᓴᒐᒃᓴᓕᕆᔨᒻᒪᕆᒃ
ᒐᕙᒪᓕᕆᔨᒃᑯᓐᓄᑦ ᓄᓇᑦᓯᐊ ᒐᕙᒪᖓ
@email
ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
@email
ᒫᑎᐅ ᑳᒧᕋᓐ
ᒥᓂᔅᑕᐃᑦ ᑐᓴᐅᒪᑎᑦᑎᔨᖓᑦ
867-393-7136
@email