9-ᓂᑦ ᓄᑖᓂᒃ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᖅᓯᒪᔪᖃᓕᖅᐳᖅ ᓄᓇᕗᒻᒥ
ᐱᕙᓪᓕᐊᔪᑦ ᓴᖅᑭᑎᑕᐅᔪᑦ
9-ᓂᑦ ᓄᑖᓂᒃ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᖅᓯᒪᔪᖃᓕᖅᐳᖅ ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᑎᓯᐱᕆ 9, 2020) – ᐅᓪᓗᒥ, ᓄᓇᕗᒻᒥ ᑲᑎᖦᖢᒋᑦ 48−ᖑᓕᖅᐳᑦ ᓄᕙᒡᔪᐊᕐᓇᖅ-19−ᖃᖅᑐᑦ, 181−ᖑᓪᓗᑎᒃ ᑕᒪᑐᒥᖓ ᐊᓂᒍᐃᓯᒪᔪᑦ. 9 ᓄᑖᑦ ᓇᓗᓇᐃᖅᑕᐅᕗᑦ ᐋᓐᓂᐊᓕᖅᓯᒪᔪᑦ ᐊᕐᕕᐊᓂ, 48-ᖑᓕᖅᖢᑎᒃ ᐊᕐᕕᐊᓂ ᓄᕙᒡᔪᐊᕐᓂᕋᖅᑕᐅᔪᑦ.
"ᖃᐅᔨᒪᔪᖓ ᑕᒪᓐᓇ ᐊᔪᕐᓇᕐᓂᖓᓂ ᐊᕐᕕᐊᕐᒥᐅᓕᒫᓪᓗ ᖁᔭᓕᔪᒪᕙᒃᑲ ᐊᐃᑦᑐᕐᓗᐃᑎᑦᑎᑦᑕᐃᒪᓇᓱᒃᑐᑦ ᖃᓂᒪᓐᓇᒥ ᓄᓇᓕᖕᓂ," ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᑐᖅ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ. "ᑭᓯᐊᓂ, ᓄᕙᒡᔪᐊᕐᓇᖅ-19−ᑖᖅᐸᓪᓕᐊᔪᓂᑦ ᑕᑯᑲᑕᐃᓐᓇᕈᑦᑕ ᐊᕐᕕᐊᓂ, ᐊᕐᕕᐊᕐᒥᐅᓕᒫᑦᑎᐊᑦ ᐃᓚᒋᔭᐅᔭᕆᐊᖃᖅᐳᑦ ᒪᓕᒡᓗᑎᒡᓗ ᒫᓐᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖁᔭᖏᓐᓂᒃ. ᐅᖃᐅᓯᕆᔭᐅᓗᐊᕈᓐᓇᙱᓚᖅ ᖃᓄᖅ ᐊᒃᑐᐃᔪᓐᓇᖅᑎᒋᓂᖏᓐᓂᒃ ᐊᑐᓂ ᐃᓄᐃᑦ ᖃᓄᐃᓕᐅᕈᑎᒋᔭᖏᑦ ᒫᓐᓇᐅᔪᖅ. ᐅᓗᕆᐊᓇᖅᑐᒦᑎᑦᑎᑦᑕᐃᓕᒋᑦ; ᐱᓕᕆᖃᑕᐅᔭᕆᐊᖃᕐᓂᓐᓂᒃ ᐅᔾᔨᖅᓱᑦᑎᐊᕆᑦ."
ᐊᐃᑦᑐᕐᓗᒃᑕᐅᓯᒪᑐᐃᓐᓇᕆᐊᓕᖕᓂᒃ ᖃᐅᔨᓴᐃᓐᓇᖅᐳᑦ ᑕᒪᐃᓐᓂ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᑦ ᐋᓐᓂᐊᖃᓐᓇᙱᑦᑐᓕᕆᔨᒃᑯᓪᓗ ᐃᖅᑲᓇᐃᔭᖅᑎᖏᑦ ᖃᐅᔨᓴᖅᐸᓪᓕᐊᖏᓐᓇᖅᐳᑦ ᐃᓄᑐᐊᒃᑯᕕᖕᒦᑦᑐᓕᒫᓂᑦ. ᑎᓯᐱᕆ 8-ᒥ ᐱᒋᐊᖅᖢᓂ, ᐊᕐᕕᐊᓂ ᖃᐅᔨᓴᖅᑕᐅᔪᑦ 769-ᖑᕗᑦ ᐱᖃᙱᓐᓂᕋᖅᑕᐅᔪᑦ. ᓱᓕ ᓴᓂᑭᓗᐊᕐᒥ ᑲᖏᖅᖠᓂᕐᒥ ᑎᑭᕋᕐᔪᐊᕐᒥᓗ ᖃᐅᔨᓴᖅᐸᓪᓕᐊᖏᓐᓇᖅᐳᑦ.
ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᒃᐸᑦ ᓄᕙᕐᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᖅ−19 ᐅᖄᓚᕝᕕᖓᓄᑦ ᐅᕗᖓ 1-888-975-8601 10−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᒍᑦ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐃᒡᓗᒥᓂᓪᓗ ᐊᓂᑦᑕᐃᓕᒪᓯᑲᐅᑎᒋᓗᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.
ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: https://www.gov.nu.ca/health/information/covid-19-novel-coronavirus.
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᒫᓐᓇᓕᓴᕐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᓂᒃ, ᐅᕗᙵᕈᓐᓇᖅᐳᓯ: https://www.gov.nu.ca/health/information/nunavuts-path
ᓄᑖᑦ ᑐᓴᒐᒃᓴᑦ ᐅᖃᐅᓯᐅᓂᐊᖅᐳᑦ ᐱᕙᓪᓕᐊᔪᓕᕆᔨᑦ ᑲᑎᖃᑎᒌᓕᖅᐸᑕ 11−ᒥ ᐅᓪᓛᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓᑎᒍᑦ, ᐅᓪᓗᑐᐃᓐᓇᖅ, ᑎᓯᐱᕆ 11.
###
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᖅ
ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
@email
ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
867-975-5949
@email