25 ᓄᑖᑦ ᓇᓗᓇᐃᖅᑕᐅᕗᑦ ᓄᕙᕐᔪᐊᕐᓇᖅ-19ᑖᖅᓯᒪᔪᑦ, ᒪᕐᕉᒃ ᖃᓄᐃᒍᓐᓃᖅᑑᒃ
ᐱᕙᓪᓕᐊᔪᖅ ᓴᖅᑭᑕᖅ
25 ᓄᑖᑦ ᓇᓗᓇᐃᖅᑕᐅᕗᑦ ᓄᕙᕐᔪᐊᕐᓇᖅ-19ᑖᖅᓯᒪᔪᑦ, ᒪᕐᕉᒃ ᖃᓄᐃᒍᓐᓃᖅᑑᒃ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 21, 2020) − ᐅᓪᓗᒥ ᓇᓗᓇᐃᖅᑕᐅᕗᖅ ᓄᓇᕗᒻᒥ 107ᓂᑦ ᓇᓗᓇᐃᖅᑕᐅᓯᒪᓪᓚᑦᑖᖅᑐᓂᑦ ᓄᕙᒡᔪᐊᕐᓇᖅ-19ᖃᕐᒪᖔᑕ ᖃᐅᔨᓴᖅᑕᐅᓯᒪᔪᑦ ᓇᓗᓇᐃᖅᑕᐅᕗᑦ ᐋᓐᓂᐊᓕᖅᓯᒪᓕᔪᑦ. ᒪᕐᕉᒃ ᓇᓗᓇᐃᖅᑕᐅᓯᒪᓚᐅᖅᑑᒃ ᓴᓂᑭᓗᐊᕐᒥᑦ ᐋᓐᓂᐊᒍᓐᓃᖅᑑᒃ ᖃᓄᐃᒍᓐᓃᖅᑑᒃ. 22 ᓄᑖᑦ ᓇᓗᓇᐃᖅᑕᐅᕗᑦ ᐊᕐᕕᐊᓂᑦ ᐋᓐᓂᐊᓕᖅᓯᒪᓂᖏᓐᓂᑦ, ᐊᕐᕕᐊᓂᑦ, ᑖᒃᑯᐊ ᓄᓇᖓᓐᓂᒃ ᐊᒥᓲᓂᖏᑦ ᓇᓗᓇᐃᖅᐅᓯᒪᓪᓚᑦᑖᖅᑐᑦ ᐋᓐᓂᐊᓕᖅᓯᒪᓂᖏᑦ 80ᐅᓕᖅᐳᑦ. ᐱᖓᓱᓂᑦ ᓄᑖᓂᑦ ᐃᓚᔪᑦ ᓇᓗᓇᐃᖅᑕᐅᔪᑦ ᑎᑭᕋᔪᐊᑦᒥ ᑖᒃᑯᐊ ᑲᑎᓪᓗᒋᑦ 14ᖑᑎᓕᖅᐳᑦ ᐋᓐᓂᐊᓇᖅᑐᖃᓕᖅᑐᑦ ᓇᓗᓇᐃᖅᑕᐅᔪᑦ. ᐊᓯᔾᔨᖏᑦᑐᑦ ᐊᒥᓲᓂᖏᑦ ᓇᓗᓇᐃᖅᑕᐅᓯᒪᔪᑦ ᑲᖏᖅᖠᓂᕐᒥᑦ. "ᓴᓂᑭᓗᐊᕐᒦᑦᑑᒃ ᑖᒃᑯᐊ ᒪᕐᕉᒃ ᐋᓐᓂᐊᒍᓐᓃᖅᑑᒃ, ᑭᓯᐊᓂ ᓱᓕ ᓄᖅᑲᖓᑎᑦᑎᔾᔪᑎᑕᐅᓪᓗᑎᑦ ᐃᓕᔭᐅᓯᒪᔪᑦ ᓄᓇᓕᒻᒧᑦ ᓱᓕ ᐊᑐᕆᐊᓖᑦ ᐊᒻᒪᓗ ᓴᓂᑭᓗᐊᕐᒥᐅᑦ ᒪᓕᒋᐊᖃᓪᓚᕆᑦᑐᑦ ᓱᓕ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᒪᓕᑦᑕᐅᔭᕆᐊᓖᑦ ᐋᖅᑭᑦᑕᐅᓯᒪᔪᑦ," ᐅᖃᖅᑐᖅ ᓘᑦᑖᖅ ᐹᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ. "ᐊᒻᒪᓗᑦᑕᐅᖅ ᐃᖅᑲᐃᑎᑦᑎᒋᐊᕈᒪᕗᖓ ᓄᓇᕗᒻᒥᐅᓂᑦ ᑖᒃᑯᐊ ᐋᓐᓂᐊᖃᕐᓇᖏᑦᑐᓕᕆᒃᑯᑦ ᐱᓕᕆᖃᑎᒌᒋᔭᖏᑦ ᑖᒃᑯᓂᖓ ᐱᔭᕇᖅᓯᑉᐸᑕ ᑭᓯᐊᓂ ᑕᐃᒪᐃᓐᓂᒃ ᖃᐅᔨᓴᖅᑎᓪᓗᒋᑦ ᑭᓇᒃᑯᑦ ᑲᑎᓯᓯᒪᓂᕐᒪᖔᑕ ᐋᓐᓂᐊᓕᖅᓯᒪᔪᒥᑦ ᐊᒻᒪᓗ ᑖᓐᓇ ᐋᓐᓂᐊᓕᕐᓇᖅᑐᖅ ᓯᐊᒻᒪᓐᓂᕆᔭᖓ ᓄᖅᑲᖅᑎᑕᐅᑉᐸᑦ ᑭᓯᐊᓂ, ᑖᒃᑯᐊ ᐊᒥᓲᓂᖏᑦ ᓇᓗᓇᐃᖅᑕᐅᔪᑦ ᐋᓐᓂᐊᓕᖅᓯᒪᔪᑦ ᐊᒥᓱᕈᖅᐸᓪᓕᐊᓂᐊᖅᑐᑦ ᐊᓯᔾᔨᖅᐸᓪᓕᐊᖏᓐᓇᕐᓗᓂ."
ᓇᓗᓇᐃᕈᑎᒃᓴᓪᓚᑦᑖᕐᒥᑦ ᐱᑕᖃᙱᑦᑐᖅ ᑖᓐᓇ ᓯᐊᒻᒪᓐᓂᕆᔭᖓᓐᓂᒃ ᑲᖏᖅᖠᓂᕐᒥᑦ ᐅᕙᓗ ᑎᑭᕋᔪᐊᕐᒥᑦ. ᑖᒃᑯᐊ ᑕᒪᕐᒥᒃ 107 ᓄᕙᕐᔪᐊᕐᓇᖅ-19ᑖᖅᓯᒪᔪᑦ ᐃᓄᑑᑎᑕᐅᔪᑦ ᐊᒻᒪ ᖃᓄᐃᙱᑦᑐᑦ, ᐋᓐᓂᐊᓗᐊᙱᑦᑐᑦ ᐊᒻᒪ ᐋᓐᓂᐊᕈᑕᐅᖃᑦᑕᖅᑐᖅ ᓇᓗᓇᐃᒃᑯᑎᖏᑦ ᑕᑯᒍᑦᑎᒍ ᐱᓗᐊᙱᑦᑐᑦ ᐋᓐᓂᐊᕆᔭᖏᑦ. ᖃᐅᔨᓴᖅᑕᐅᔪᑦ ᑭᓇᒃᑯᑦ ᑲᑎᓯᓯᒪᓐᓂᕐᒪᖔᑕ ᓄᓇᓕᓐᓂᑦ ᓱᓕ ᑲᔪᓯᕙᓪᓕᐊᖏᓐᓇᖅᑐᖅ ᐊᒻᒪᓗ ᑖᒃᑯᐊ ᐋᓐᓂᐊᕕᓐᓂᑦ ᐱᓕᕆᖏᑦ ᐅᔾᔨᖅᑐᖅᐸᓪᓕᐊᖏᓐᓇᖅᑐᑦ ᑖᒃᑯᓂᖓ ᐃᓄᑑᑎᑕᐅᔪᓂᑦ ᑕᒪᐃᓐᓂᒃ.
ᓄᕕᐱᕆ 20ᒥᑦ ᐱᒋᐊᖅᑐᒍ, 110ᓂᑦ ᖃᐅᔨᓴᖅᑕᐅᔪᖃᖅᓯᒪᔪᖅ ᑲᖏᖅᖠᓂᕐᒥᑦ, ᑖᒃᑯᐊ ᑕᒪᕐᒥᒃ ᐱᑕᖃᕐᓂᕋᖅᑕᐅᖏᑦᑐᑦ ᖃᐅᔨᓴᖅᑕᐅᔾᔪᑎᖏᑦ. ᐊᕐᕕᐊᓂᑦ ᖃᐅᔨᓴᖅᑕᐅᔾᔪᑎᐅᓯᒪᔪᑦ 210 ᐱᑕᖃᕐᓂᕋᖅᑕᐅᓯᒪᙱᑦᑐᑦ ᖃᐅᔨᓴᖅᑕᐅᓯᒪᔪᑦ. ᖃᐅᔨᖅᑕᐅᔪᑦ ᑎᑭᕋᔪᐊᕐᒥᑦ 26ᓂᑦ ᖃᐅᔨᓴᖅᑕᐅᓯᒪᔪᖃᓕᖅᑐᖅ ᑖᒃᑯᐊ ᐱᑕᖃᕐᓂᕋᖅᑕᐅᓯᒪᖏᑦᑐᑦ. ᐅᔾᔨᖅᑐᖅᑕᐅᔪᑦ ᓴᓂᑭᓗᐊᕐᒥᑦ ᓱᓕ ᒫᓐᓇ ᑲᔪᓯᔪᖅ.
"ᖃᐅᔨᒪᔪᖓ ᐅᓪᓗᑕᒫᖅ ᐊᒥᓲᓂᖏᑦ ᓄᕙᕐᔪᐊᕐᓇᖅ-19ᖃᖅᑐᑦ ᓇᓗᓇᐃᖅᑕᐅᔪᑦ ᓄᓇᕗᒻᒥᑦ ᑲᑉᐱᐊᓱᓕᕐᓇᖅᑐᑦ, ᑭᓯᐊᓂ ᐅᐃᒻᒪᔅᓯᒪᒍᑕᐅᔭᕆᐊᖃᙱᑦᑐᖅ. ᑕᑯᕙᓪᓕᐊᖏᓐᓇᕐᓂᐊᖅᑐᒍᑦ ᖃᑦᓯᐅᓂᖏᑕ ᐃᓚᖓᑉᐸᓪᓕᐊᓂᖏᓐᓂᑦ ᐊᒻᒪ ᐊᒥᓱᕈᖅᐸᓪᓕᐊᖃᑦᑕᖅᑐᓂᑦ ᓇᓗᓇᐃᖅᑕᐅᔪᓂᑦ ᐊᑯᐅᑐᐃᓐᓇᕆᐊᑐᓂᓗ ᑕᒪᓐᓇ," ᐅᖃᖅᑐᖅ ᓯᕗᓕᖅᑎ ᔫ ᓴᕕᑲᑖᖅ. "ᐅᐱᒋᓪᓚᕆᑉᐸᒃᑲ ᓄᓇᕗᒻᒥᐅᑦ ᓄᖅᑲᑎᑦᑎᓐᓇᓯᒪᓂᕆᔭᖏᓐᓂᑦ ᑖᓐᓇ ᓯᐊᒻᒪᖅᐸᓪᓕᐊᖁᓇᒍ ᐋᓐᓂᐊᓇᖅᑐᖅ ᐊᒻᒪᓗ ᖁᔭᓕᕗᖓᓗ ᑕᒪᐃᓐᓄᑦ ᓄᓇᕗᒻᒥ
ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᐱᓕᕆᖃᑎᒌᖏᓐᓄᑦ ᐊᔅᓱᕈᑦᑎᐊᖅᑐᑎᑦ ᐱᓕᕆᒻᒪᑕ ᓄᓇᓕᒋᔭᑦᑎᓐᓂᑦ. ᐊᑏᑦ ᐊᔅᓱᕈᑦᑎᐊᕐᓗᑕ ᑲᔪᓯᑐᐃᓐᓇᖅᑕ ᐊᒻᒪᓗ ᐃᑉᐱᒋᖃᑦᑕᐅᑦᑎᓂᖃᑦᑎᐊᕐᓗᑕ ᑖᓐᓇ ᓄᖅᑲᖅᑎᓇᓱᑦᑎᓪᓗᑎᒍᑦ ᓄᕙᕐᔪᐊᕐᓇᖅ-19 ᓄᓇᕗᒻᒥ."
ᑭᓇᑐᐃᓐᓇᖅ ᐊᐃᑦᑐᖅᑕᐅᓯᒪᓇᓱᒋᑉᐸᑦ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖃᐅᔾᔨᖁᔭᐅᕗᖅ ᐅᖄᓚᓗᓂ ᓄᕙᒡᔪᐊᕐᓇᖕᒧᑦ ᐅᖄᓚᕕᒻᒧ ᐅᕗᖓ 1-888-975-8601 ᐅᑯᐊ ᐃᑲᕐᕋᖏᓐᓂᑦ 10−ᒥᑦ ᐅᓪᓛᒃᑯᑦ ᐊᒻᒪᓗ 6−ᒧᑦ ᐅᓐᓄᒃᑯᑦ. ᑲᓇᖕᓂᕐᒥᐅᑦ ᖃᐅᔨᓴᐅᑎᖓᑎᒍᑦ, ᖃᐅᔨᑎᓪᓗᒍᓘᓐᓃᑦ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᒃᑎᒃ ᖃᐅᔨᑎᑲᐅᑎᒋᓗᒍ, ᐃᒻᒥᓂᒡᓗ ᐅᐸᒃᑕᐅᑦᑕᐃᓕᒪᑎᓯᑲᐅᑎᒋᓗᓂ ᐊᖏᕐᕋᒥᓂ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᒻᒥᓂᖅ.
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus
ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᒫᓐᓇᓕᓴᕐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᓂᒃ, ᐅᕗᙵᕈᓐᓇᖅᐳᓯ: https://www.gov.nu.ca/health/information/nunavuts-path
ᓄᑖᙳᕆᐊᖅᓯᒪᔪᓂᒃ ᐱᑎᑦᑎᔪᖃᕐᓂᐊᖅᐳᖅ ᐱᕙᓪᓕᐊᔪᓄᑦ ᑐᓴᖅᑎᑦᑎᔪᖃᓕᖅᐸᑦ 11−ᒥ ᐅᓪᓗᒥ. ᑲᓇᓐᓂᕐᑦᒥ, ᓇᒡᒐᔾᔭᐅ, ᓅᕖᕝᕙ 23.
###
ᐱᕙᓪᓕᐊᔪᓂᑦ ᖃᐅᔨᒋᐊᕐᕕᒃᓴᖅ
ᑲᐃᑦ ᒪᒡᓚᐅᑦ
ᐱᕙᓪᓕᔪᓄᑦ ᑎᑎᕋᖅᑎ ᓯᕗᓕᖅᑎᒧᑦ ᓴᕕᑲᑖᕐᒧᑦ
867-975-5059
@email
ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᖕᓄᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ
867-975-5949
@email