34 ᓄᑖᑦ ᓇᓗᓇᐃᖅᑕᐅᔪᑦ ᓄᕙᔾᔪᐊᕐᓇᖅ 19-ᖃᖅᑐᑦ ᓄᓇᕗᒻᒥ
ᐱᕙᓪᓕᐊᔪᑦ ᑐᓴᕋᑦᓴᑦ
34 ᓄᑖᑦ ᓇᓗᓇᐃᖅᑕᐅᔪᑦ ᓄᕙᔾᔪᐊᕐᓇᖅ 19-ᖃᖅᑐᑦ ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 17, 2020) – ᐅᓪᓗᒥᒧᑦ, ᓄᓇᕗᒻᒥ ᑲᑎᓕᒫᖅᑐᒋᑦ 60 ᓇᓗᓇᐃᖅᑕᐅᓯᒪᔪᑦ ᓄᕙᔾᔪᐊᕐᓇᖅ 19-ᑖᖅᓯᒪᔪᑦ. ᓯᑕᒪᐅᔪᖅᑐᑦ ᓇᓗᓇᐃᖅᑕᐅᓯᒪᔪᑦ ᑎᑭᕋᕐᔪᐊᕐᒥ. ᖄᒃᑲᓐᓂᖓᒍᑦ 26 ᓄᑖᑦ ᓇᓗᓇᐃᖅᑕᐅᓯᒪᔪᑦ ᐊᕐᕕᐊᓂ, ᓄᓇᓕᖓᓐᓂ ᑲᑎᓪᓗᒋᑦ 46-ᖑᓕᖅᑐᑦ. ᐃᓘᓐᓇᑎᒃ ᐊᓂᑦᑕᐃᓕᑎᑕᐅᔪᑦ ᖃᓄᐃᒐᑎᓪᓗ. ᑐᐊᕕᕐᓇᖅᑐᒃᑯᑦ ᐃᑲᔪᕆᐊᖅᑏᑦ ᒫᓐᓇᐅᔪᖅ ᐃᑲᔪᖅᑐᑦ ᐋᓐᓂᐊᕐᕕᒻᒥ ᐃᖅᑲᓇᐃᔭᖅᑎᖏᓐᓂᒃ ᑎᑭᕋᕐᔪᐊᒥ ᑎᑭᓯᒪᒐᑎᒃ.
“ᐃᓚᖓᑦ ᓇᓗᓇᐃᖅᑕᐅᓯᒪᔪᖅ ᑎᑭᕋᕐᔪᐊᒥ ᑐᕌᖓᔪᖅ ᐊᕐᕕᐊᓂ ᓯᐊᕐᒪᐸᓪᓕᐊᓂᐅᓯᒪᔪᒧᑦ, ᓯᐊᕐᒪᕐᕕᐅᔪᒥᓂᖅ ᐊᓯᒃᑲᓐᓂᖏᓐᓄᑦ 7-ᓄᑦ. ᑲᑎᔭᒥᓂᖏᓐᓂᒃ ᖃᐅᔨᓴᖅᐸᓪᓕᐊᓕᖅᑐᑦ ᐃᓘᓐᓇᖏᓐᓂ ᐊᑦᑐᖅᑕᐅᓯᒪᔪᓂ ᓄᓇᓕᓐᓂ,” ᐅᖃᖅᓯᒪᔪᖅ ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᒃ. “ᐱᓇᓱᐊᕈᓯᐅᓯᒪᔪᒥ ᖃᐅᔨᓯᒪᔪᒍᑦ ᖃᓄᑎᒋ ᓱᑲᑦᑐᒥᒃ ᓄᕙᔾᔪᐊᕐᓇᖅ 19 ᓯᐊᕐᒪᒍᓐᓇᕐᒪᖔᖅ. ᐊᒥᓱᕐᖑᐸᓪᓕᐊᓂᖏᑦ ᓯᐊᕐᒪᒍᓐᓇᕐᓂᖓᓗ ᓱᓕ ᐊᒥᓱᕐᖑᐸᓪᓕᐊᓂᐊᖅᑐᑦ ᐊᑕᖏᕐᓗᑕ ᐃᑲᔪᖃᑕᐅᙱᒃᑯᑦᑕ. ᓄᓇᕗᒻᒥᐅᑦ ᒪᓕᒋᐊᓖᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒪᓕᑦᑕᐅᖁᔭᐅᓯᒪᔪᓂᒃ ᓯᐊᕐᒪᐸᓪᓕᐊᒃᑲᓐᓂᖁᓇᒍ ᓄᕙᔾᔪᐊᕐᓇᖅ.”
ᒫᓐᓇᐅᔪᖅ ᓇᓗᓇᐃᖅᑕᐅᓯᒪᔪᖃᙱᑦᑐᖅ ᓄᓇᓕᓐᓂ ᓯᐊᕐᒪᐸᓪᓕᐊᒻᒪᖔᖅ ᑎᑭᕋᕐᔪᐊᒥ, ᒫᓐᓇᐅᔪᖅ ᓇᓗᓇᐃᖅᑕᐅᓯᒪᔪᑦ ᑐᕌᖓᒻᒪᑕ ᐊᕐᕕᐊᓄᑦ. ᑲᖏᖅᖠᓂᕐᒥ ᓱᓕ ᓯᑕᒪᑦ ᓇᓗᓇᐃᖅᑕᐅᓯᒪᔪᑦ ᐊᒻᒪᓗ ᓴᓂᑭᓗᐊᕐᒥ ᓱᓕ ᒪᕐᕉᒃ ᓇᓗᓇᐃᖅᑕᐅᓯᒪᔫᒃ.
ᓄᕕᐱᕆ 16-ᒧᓄᑦ, 65-ᓂᒃ ᖃᐅᔨᓴᖅᑕᓯᒪᔪᑦ ᓴᓂᑭᓗᐊᕐᒥ ᓄᕙᔾᔪᐊᕐᓇᖅᑐᖃᙱᓐᓂᖏᓐᓂᒃ ᓴᖅᑭᖅᑕᐅᓯᒪᔪᑦ. ᑲᖏᖅᖠᓂᕐᒥ, 45-ᓂᒃ ᖃᐅᔨᓴᖅᓯᒪᔪᑦ ᓄᕙᔾᔪᐊᕐᓇᖅᑐᖃᙱᑦᑐᑦ. ᐊᕐᕕᐊᓂ ᖃᐅᔨᓴᓚᐅᖅᑎᓪᓗᒋᑦ 63 ᓄᕙᔾᔪᐊᕐᓇᖅᑐᖃᙱᑦᑐᑦ. ᓱᓕ ᖃᐅᔨᓴᖅᐸᓪᓕᐊᔪᑦ ᑎᑭᕋᕐᔪᐊᒥ.
ᓄᓇᕗᒻᒥᐅᑦ ᐃᑲᔪᖃᑕᐅᒋᐊᓖᑦ ᓯᐊᕐᒪᐸᓪᓕᐊᓕᖁᓇᒍ ᓄᕙᔾᔪᐊᕐᓇᖅ − ᐊᓯᑦᓯᓐᓂᒃ ᑲᑎᓯᓗᐊᑦᑕᐃᓕᒋᑦᓯ, ᒪᑐᐊᖅᓯᒪᖃᑦᑕᕐᓗᓯ ᐊᓂᓂᐊᑐᐊᕈᑦᓯ ᐊᖏᕐᕋᓯᓐᓂᒃ, ᐳᓛᕆᐊᖃᑦᑕᙱᓪᓗᑎᒃ, ᐊᒡᒐᓯ ᐅᐊᓴᐃᓐᓇᖃᑦᑕᕐᓗᒋᑦ, ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖃᑦᑕᕐᓗᑎᒃ ᑕᐃᒪᐃᒍᓐᓇᕋᐃᒍᑎᒃ, ᑎᒎᑎᖃᑦᑕᙱᓪᓗᓯ, ᐊᖏᕐᕋᖅᓯᒪᐃᓐᓇᕐᓗᓯᓗ ᖃᓂᒪᑐᐊᕈᑦᓯ. ᑭᓇᑐᐃᓐᓇᖅ ᐊᕐᕕᐊᓃᑦᑐᒥᓂᖅ ᐅᕝᕙᓘᓐᓃᑦ ᐊᖅᑯᓵᖅᑐᒥᓂᖅ ᓄᕕᐱᕆ 2-ᒥᓂᑦ ᒫᓐᓇᑦᓴᐅᑎᒋ ᐊᓂᑦᑕᐃᓕᒋᐊᓖᑦ 14-ᓂᒃ ᐅᓪᓗᓂᒃ. ᑭᒃᑯᓕᒫᑦ ᖃᓄᐃᓕᐅᕈᑎᖏᑦ ᐊᑦᑐᐃᓂᖃᕈᓐᓇᖅᑐᑦ ᑭᒃᑯᓕᒫᑦ ᖃᓄᐃᓐᓂᖏᓐᓂᒃ.
ᑭᓇᑐᐃᓐᓇᖅ ᖃᓂᒋᔭᖃᖅᑐᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᓕᒻᒧᑦ ᐅᖄᓚᖁᔭᐅᔪᖅ ᓄᕙᔾᔪᐊᕐᓇᐅᑉ ᒥᑦᓵᓄᑦ ᐅᖃᓚᕕᒻᒧᑦ 1-888-975-8601 ᐊᑯᓐᓂᖏᓐᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᓴᒃᑯᑦ, ᖃᐅᔨᒃᑲᐃᑦᓴᐅᑎᒋᓗᑎᓪᓘᓐᓃᑦ ᓄᓇᓕᓐᓂ ᐋᓐᓂᐊᕐᕕᖓᓄᑦ, ᐊᓂᑦᑕᐃᓕᑦᓴᐅᑎᒋᓕᕐᓗᑎᓪᓗ ᐊᖏᕐᕋᒥᓐᓂᒃ ᐅᓪᓗᓂᒃ 14-ᓂᒃ. ᐅᐸᒍᑎᑦᑕᐃᓕᓗᑎᒃ ᐋᓐᓂᐊᕐᕕᒻᒧᑦ.
ᓄᑖᖑᓂᖅᐹᓂᒃ ᑐᑭᓯᒋᐊᖃᑦᑕᕈᒪᒍᕕᑦ ᐃᑲᔫᑎᑦᓴᐃᓪᓗ ᒥᑦᓵᓄᑦ ᓄᕙᔾᔪᐊᕐᓇᖅ 19 ᓄᓇᕗᒻᒥ, ᐅᕗᖓᕐᓗᑎᑦ: https://www.gov.nu.ca/iu/aanniaqangnanngittulirijikku/information/aniqs…-
19.
ᑐᓴᖅᑎᑦᓯᒋᐊᓚᖓᔪᑦ ᐱᕙᓪᓕᐊᔪᓕᕆᔨᓂᒃ ᖃᐅᔨᒃᑲᐃᓕᖅᑲᑕ 11:00 ᐅᓪᓛᓴᒃᑯᑦ ᑲᓇᓐᓇᕐᒥ ᓯᕿᕐᖑᔭᖓᒍᑦ, ᐱᖓᑦᓯᕐᒥ, ᓄᕕᐱᕆ 18.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓵᒃ:
ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᖃᑖᕐᒧᑦ
867-975-5059
@email
ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᐊᐅᓚᑦᓯᔨᐅᑲᐃᓐᓇᖅᑐᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5949
@email