ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᒫᔾᔨ 23, 2020

ᓯᕗᓕᖅᑎᒥ ᑐᓴᒐᒃᓴᖅ:

ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ  ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.

ᐋᓐᓂᐊᕕᖕᒥ ᖃᓂᒻᒪᓯᕐᓂᒃ ᐊᐃᑦᑐᕐᓘᑕᐅᔪᓐᓇᖅᑐᓂᒃ ᐱᓕᕆᔨᐅᖃᑎᒌᑦ 111−ᐸᓗᖕᓂᒃ ᐃᓄᖕᓂᒃ ᖃᐅᔨᓴᖅᓯᒪᓕᖅᑐᑦ. ᒫᓐᓇᒧᑦ ᑎᑭᖦᓗᖦᓗᒍ, 43-ᖑᓪᓗᑎᒃ ᐃᓄᐃᑦ ᖃᐅᔨᓴᖅᑕᐅᕌᓂᒃᓯᒪᔪᑦ ᐊᓂᑎᑕᐅᓯᒪᓕᖅᑐᑦ ᐃᓄᖃᙱᑦᑐᒦᑦᑕᕆᐊᖃᕈᓐᓃᖅᖢᑎᒡᓗ.

11:59−ᒥᑦ ᐊᐃᑉᐹᓂ, ᒫᑦᓯ 24−ᒥ ᐱᒋᐊᕐᓗᓂ, ᓴᙱᔪᒻᒪᕆᖕᓂᒃ ᐊᐅᓪᓚᕐᓂᕐᒧᑦ ᐃᓱᓕᑦᑕᖅᑎᑕᐅᔪᓂᒃ ᓄᓇᕗᒻᒧᑦ ᐋᖅᑭᒃᑕᐅᓯᒪᔪᖃᕐᓂᐊᓕᖅᐳᖅ. ᓄᓇᖃᖅᑐᑐᐊᑦ ᐱᔭᐅᔭᕆᐊᖃᒻᒪᕆᒃᑐᓪᓗ ᐃᖅᑲᓇᐃᔭᖅᑏᑦ ᑕᒪᐅᖓ ᐊᕕᒃᓯᒪᓂᕐᒧᙵᐅᔪᓐᓇᖅᑐᑑᓂᐊᖅᐳᑦ. ᑕᒪᕐᒥᑦᑎᐊᖅ, ᑭᓯᐊᓂ ᑕᐃᒃᑯᐊᑐᐊᖅ ᐱᔭᐅᔭᕆᐊᖃᒻᒪᕆᒃᑐᑦ ᑎᑎᕋᖅᓯᒪᔪᒥᒃ ᐱᔪᓐᓇᐅᑎᖃᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᕐᒥᑦ, ᐊᑐᓪᓚᕆᒋᐊᖃᖅᑕᖓᓂᒃ 14−ᓄᑦ ᐅᓪᓗᓄᑦ ᐅᐸᒃᑕᐅᔭᕆᐊᖃᔾᔮᙱᑦᑎᐊᖅᐳᑦ ᑕᐅᓇᓂ ᖃᓪᓗᓈᓂ ᑎᖕᒥᓲᒧᐊᕈᓐᓇᓚᐅᙱᓐᓂᕐᒥᓂ ᓄᓇᕗᓕᐊᖅᐸᓪᓕᐊᔪᒧᑦ.    ᑕᒪᓐᓇ ᐃᓚᖃᖅᐳᖅ ᓄᓇᖃᖅᑐᓂᒃ ᐃᓕᓐᓂᐊᖅᑎᓂᒡᓗ.

ᑕᒪᕐᒥᑦᑎᐊᖅ ᑭᒃᑯᑐᐃᓐᓇᐃᑦ ᐃᓄᒋᐊᒡᓗᑎᒃ ᑲᑎᒪᖃᑦᑕᕆᐊᖃᕈᓐᓃᑦᑎᐊᖅᑐᑦ, ᑕᒪᕐᒥᑦᑎᐊᕐᓗ ᓯᓚᒥ ᐱᙳᐊᕆᐊᖅᑐᕐᕖᑦ ᕼᐹᒻᓚᒃᑯᓐᓄᓪᓗ ᒥᕐᙳᐃᖅᓯᕐᕖᑦ ᒫᓐᓇ ᒪᑐᓯᒪᓕᖅᐳᑦ.

ᐃᖅᑲᐃᑎᑦᑎᔪᒪᒋᕗᖓᑦᑕᐅᖅ ᑭᒃᑯᑐᐃᓐᓇᑦᑎᐊᓂᒃ ᑐᑭᓯᓇᑦᑎᐊᖅᑎᓪᓗᒍᓗ, ᐊᑐᓪᓚᕆᒋᐊᖃᓪᓚᕆᕗᑦᑕᐅᖅ ᑭᓇᑐᓐᓇᑦᑎᐊᖅ ᑎᑭᑦᑐᕕᓂᖅ ᑕᒪᐅᖓ ᐅᑭᐅᖅᑕᖅᑐᒧᑦ ᐊᕕᒃᓯᒪᓂᕐᒧᑦ ᒫᑦᓯ 15−ᒥᑦ ᑕᐃᒪᙵᓂᓪᓘᓐᓃ, ᓇᖕᒥᓂᖅ−ᐃᓄᑑᓕᖅᑎᑦᑕᕆᐊᖃᕐᓂᖏᓐᓂᒃ.

ᖃᐅᔨᒪᒋᔅᓯ, ᑕᒪᓐᓇ ᐱᒻᒪᕆᐊᓘᑎᓐᓂᑎᓐᓂᒃ.

ᑭᖑᓂᑦᑎᓐᓂ ᓇᓗᓇᐃᖅᓯᓚᐅᖅᐳᖓ ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᖃᖅᑎᑦᑎᓂᐊᕐᓂᖏᓐᓂᒃ ᓄᑕᖅᑲᑦ ᑲᒪᒋᔭᐅᕕᖏᓐᓄᑦ ᐱᔪᓐᓇᐅᑎᓕᖕᓄᑦ ᐃᓂᓄᑦ, ᐊᑭᓖᔪᒪᓪᓗᑎᒃ ᐊᖓᔪᖅᑳᑦ ᐊᑭᓕᕆᐊᖃᖅᑕᖏᓐᓂᒃ ᒫᑦᓯ 17−ᒥᑦ ᐄᐳᕈ 7, 2020-ᒧᑦ. ᑖᒃᐊ ᑮᓇᐅᔭᑦ ᐱᓕᕆᐊᖑᓂᐊᖅᐳᑦ ᓇᒃᓯᐅᔾᔭᐅᓗᑎᒡᓗ ᓚᐃᓴᓕᖕᓄᑦ  ᐅᓪᓗᑐᐃᓐᓇᖅ, ᒫᑦᓯ 27, 2020 ᑎᑭᓚᐅᙱᓐᓂᖓᓂ.

ᓂᕈᐊᖅᓯᒃᑲᓐᓂᕐᓂᐅᓂᐊᓚᐅᖅᑐᖅ ᖃᒪᓂ'ᑐᐊᕐᒥ ᐅᖓᕙᕆᐊᖅᑕᐅᕗᖅ ᑭᓯᐊᓂ ᐊᐅᔭᐅᓕᖅᐸᑦ, ᑕᐃᒪᐃᑦᑐᒪᓂᖏᓐᓄᑦ ᕼᐋᒻᓚᒋᔭᐅᔪᑦ.

ᓄᓇᕗᑦ ᒐᕙᒪᖓᑕ    ᑎᑎᕋᕐᕕᖏᑦ ᒫᓐᓇ ᑭᒃᑯᑐᐃᓐᓇᓄᑦ  ᒪᑐᓯᒪᓕᖅᐳᑦ. ᐃᓂᒃᒪᓴᓕᐅᖅᓯᒪᓐᓂᕈᕕᑦ, ᐅᖄᓚᖅᑳᕐᓗᑎᑦ ᖃᐅᔨᒪᑦᑎᐊᕈᒪᓂᕐᒧᑦ ᖃᓄᐃᓕᖓᔪᓂᒃ ᐱᕙᒌᔭᖅᑕᐅᓯᒪᔪᓂᒃ ᐃᓕᓯᓯᒪᔪᖃᕐᒪᖔᑦ.

ᓄᓇᕗᒻᒥᐅᑦ, ᐃᖅᑲᐃᓯᔪᒪᑐᐃᓐᓇᕐᖢᑕ ᑭᓱᐃᕈᑎᓕᙱᑦᑐᒍᑦ ᓂᖀᕈᑎᓕᙱᑦᑐᒍᓪᓘᓐᓃᑦ ᓄᓇᕗᒻᒥ. ᑕᒪᒃᑯᐊ ᑎᑭᑉᐸᓪᓕᐊᖏᓐᓇᖃᑦᑕᖅᐳᑦ. ᓄᕙᒡᔪᐊᕐᓇᖅ-19 ᑭᓱᐃᕈᑎᔾᔮᙱᑖᑎᒍᑦ ᓂᐅᕕᕐᕕᑦᑎᓐᓂᑦ ᓄᓇᓕᑦᑎᓐᓂᒡᓗ ᑭᓯᐊᓂ ᐱᓗᐊᕌᓗᖕᓂᑦ ᐊᕝᕗᑐᐃᓐᓇᖕᓂᕐᓗ ᓄᖑᕋᐃᓂᐊᕐᑐᑦ. ᑕᐃᒪᐃᓕᐅᖅᑕᐃᓕᒋᑦ. ᐱᔭᕆᐊᖃᖅᑕᓯ ᓈᒻᒪᓈᑐᐃᓐᓇᖅᐸᒡᓗᒋᑦ ᐊᓯᕗᑦᑕᐅᖅ ᐱᔭᕆᐊᖃᕐᒥᔪᑦ ᐃᖅᑲᒋᖕᒥᓗᒋᑦ.  ᐊᑕᐅᑦᑎᒃᑯᑦ ᑕᒪᓐᓇ ᐊᑐᕐᐸᕗᑦ.

ᐱᕕᒃᓴᖃᕐᓂᕐᓂ ᓇᓗᓇᐃᖅᓯᔪᒪᕗᖓ ᑕᖃᓴᕋᐃᙱᖦᖢᑎᒃ ᐱᓕᕆᔪᖃᖃᑦᑕᐃᓐᓇᕐᒪᑦ ᓄᓇᓕᑦᑎᓐᓂ. ᐱᒃᑯᒋᔭᖃᖅᑎᑕᐅᑦᑎᐊᖅᐳᖓ ᓴᙱᓂᕆᔭᐅᔪᓂᑦ ᐊᓯᔾᔨᕈᓐᓇᕐᓂᕆᔭᐅᔪᓂᓪᓗ ᑕᑯᒃᓴᐅᑎᑕᐅᔪᓂᑦ ᑕᒫᓂᓕᒫᖅ ᐊᕕᒃᓯᒪᓂᕆᔭᑦᑎᓐᓂᓕᒫᖅ. 

ᐋᓐᓂᐊᕕᖕᓂ ᐃᓗᐊᖅᓴᖅᑕᐅᕕᖕᓂᓗ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕆᕗᑦ ᐱᓕᕆᐊᖃᓯᖅᑳᖃᑦᑕᖅᐳᑦ, ᑲᒪᒋᔭᖃᑐᐃᓐᓇᙱᖦᖢᑎᒃ ᒫᓐᓇ ᓱᓕᓪᓗᓂ ᐱᑕᖃᓕᖅᑐᒥᒃ ᓄᕙᒡᔪᐊᕐᓇᖅ-19−ᒥᒃ, ᑭᓯᐊᓂᓗᑦᑕᐅᖅ ᐱᐅᔪᒻᒪᕆᖕᒥᒃ ᐋᓐᓂᐊᖃᕐᓇᙱᑦᑐᓕᕆᕙᖕᓂᕐᒥᒃ ᓄᓇᕗᒻᒥᐅᓄᑦ.

ᑎᒍᔭᐅᓯᒪᔪᓕᕆᓂᕐᒧᑦ ᐃᓂᖁᑎᑦᑎᓐᓂ, ᑎᒍᔭᐅᓯᒪᔪᓕᕆᔩᑦ ᐊᐅᓚᑦᑎᓂᕐᒧᓪᓗ ᐃᖅᑲᓇᐃᔭᖅᑐᑦ ᐱᓕᕆᐊᖃᖃᑦᑕᐃᓐᓇᖅᐳᑦ ᓇᓗᙱᑦᑎᐊᕈᒪᓂᕐᒧᑦ ᑕᒪᒃᑯᐊ ᐃᓃᑦ ᖁᐊᓵᕐᓇᖃᑦᑕᙱᒃᑲᓗᐊᕐᒪᖔᑕ, ᑕᒪᒃᑯᐊᓗ ᓄᓇᕗᒻᒥᐅᑦ ᑎᒍᔭᐅᓯᒪᔪᖁᑎᖏᑦ ᖁᐊᖅᓵᕐᓇᖅᑐᒦᙱᓪᓗᑎᒃ ᑲᒪᒋᔭᐅᓗᑎᒡᓗ. ᐅᐊᔅᓯᔩᑦ ᐱᒻᒪᕆᐊᓗᖕᒥᒃ ᐱᓕᕆᐊᖃᖅᐸᒃᐳᑦ, ᐃᓕᓴᕆᕙᕗᓪᓗ ᐱᓇᔪᖕᓂᕆᔭᖏᑦ ᒫᓐᓇ ᓇᓗᓇᕈᔪᒃᑐᒃᑰᕐᓂᐅᕐᓂᑦᑎᓐᓂ.

ᐃᓄᓕᕆᔨᒃᑯᑦ ᐃᖅᑲᓇᐃᔭᖅᑎᖁᑎᕗᑦ ᐱᑎᑦᑎᖃᑦᑕᐃᓇᖅᐳᑦ ᐱᔭᐅᔭᕆᐊᓕᖕᓂᒃ ᐃᑲᔪᖅᑐᐃᓂᕐᓂᒃ ᐱᔨᑦᑎᕋᕐᕕᖃᕐᓂᕐᓂᒡᓗ ᓄᑕᖅᑲᓄᑦ, ᐃᓄᑐᐃᓐᓇᓄᑦ ᐃᓚᒌᓄᓪᓗ, ᒫᓐᓇ, ᑕᐃᒪᐃᒃᑲᓐᓂᒻᒪᕆᓕᖅᖢᓂᓗ, ᐱᒻᒪᕆᐅᕗᖅ ᐃᑲᔪᖅᑐᐃᑦᑎᐊᕈᑦᑕ ᓄᓇᕗᒻᒥᐅᓕᒫᓂᒃ ᐃᑲᔪᖅᑕᐅᔭᕆᐊᓕᖕᓂᒃ.

ᓇᓗᓇᐃᖅᓯᔪᒪᒋᕗᖓᑦᑕᐅᖅ ᑕᒪᐃᓐᓂᒃ ᐅᑯᖕᓂᙵ, ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᒻᒥ ᐃᓕᓴᐃᔩᑦ ᑲᑐᔾᔨᖃᑎᒌᖓᑦ ᐱᓕᕆᖃᑎᒌᖕᓂᖏᖕᓄᑦ ᐱᔨᑦᑎᕋᖅᐸᓪᓕᐊᖏᓐᓇᖅᑎᓪᓗᑕ ᑕᒪᑐᒧᖓ ᐊᕕᒃᓯᒪᓂᕆᔭᐅᔪᒧᑦ ᓂᕆᐅᒋᔭᖃᖅᖢᑕᓗ ᐃᑲᔪᖅᑐᐃᖏᓐᓇᕐᓂᐊᕐᓂᖏᖕᓂᒃ ᓯᕗᒻᒧᐊᖅᐸᓪᓕᐊᓂᑦᑎᓐᓂ.

ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᖅᑎᖏᑦ ᓱᓕ ᐱᓇᔪᒍᓐᓇᓕᒫᒥᓂᒃ ᐱᓇᔪᒃᐳᑦ ᐱᑎᑦᑎᖃᑦᑕᕈᒪᓪᓗᑎᒃ ᐱᒻᒪᕆᐊᓗᖕᓂᒃ ᐱᓕᕆᐊᖑᕙᒃᑐᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒡᓗ. ᐊᖏᕐᕋᕆᔭᒥᓂ ᐃᖅᑲᓇᐃᔭᕋᓗᐊᕈᑎᒃ, ᓱᓕ ᑎᑎᕋᕐᕕᖕᒦᒃᑲᓗᐊᕈᑎᒃ, ᐱᓕᕆᐊᖃᖅᑳᓯᒋᐊᖅᐸᒃᑲᓗᐊᕈᑎᒡᓘᓐᓃᑦ, ᐊᑕᐅᑦᑎᒃᑯᑦ ᓴᐳᔾᔨᓯᒪᕗᑦ ᐱᖃᓐᓇᕆᔭᑦᑎᓐᓂᒃ ᓇᒡᓕᒋᔭᑦᑎᓐᓂᒡᓗ, ᑕᒪᒃᑯᓂᖓᓗ ᐊᒃᑐᖅᑕᐅᓴᕋᐃᓐᓂᖅᐹᓂᒃ.

ᑕᐃᒪᐃᓐᓂᖓᓄᑦ, ᑕᒪᔅᓯᑦᑎᐊᖅ ᖁᔭᓐᓇᒦᖑᔪᓯ ᐱᑎᑦᑎᕙᖕᓂᔅᓯᓐᓄᑦ ᐱᒻᒪᕆᐊᓗᖕᓂᒃ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᑕᒪᐃᓐᓂᓕᒫᖅ ᒐᕙᒪᒃᑯᑦ ᐊᐅᓚᑕᓕᒫᖏᑎᒍᑦ. ᖁᔭᓕᒻᒪᕆᒃᐸᑦᑎᒋᑦ ᐃᖅᑲᓇᐃᔭᕆᐊᖅᐸᖕᓂᕐᓄᑦ ᐃᑲᔪᖅᑐᐃᔪᒪᓪᓗᑎᑦ ᓄᓇᓕᑦᑎᓐᓂᒃ. ᐊᑕᐅᑦᑎᒃᑯᑦ ᓄᓇᕗᒻᒥ, ᐊᓂᒍᐃᑎᑦᑎᖃᑎᒌᖕᓂᐊᖅᐳᒍᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ. 

ᖃᐅᑕᒫᑦᑎᐊᖅ ᐅᖃᐃᓐᓇᖃᑦᑕᕐᓂᐊᖅᑕᕋ ᐅᓇ, −    ᐃᓅᖃᑎᖕᓂᒃ ᐅᖓᓯᒃᓴᕆᐊᖃᕐᓃᑦ ᐊᖏᕐᕋᖅᓯᒪᓃᓪᓗ ᐊᔪᕐᓇᙱᓐᓂᓕᒫᒐᓄᑦ ᐊᑐᖁᔭᐅᑐᐃᓐᓇᙱᓚᖅ. ᑕᐃᒪᐃᓪᓚᕆᒋᐊᖃᖅᐳᖅ ᓄᓇᕗᒻᒥᐅᑦ ᖃᓄᐃᙱᑦᑎᐊᖁᓗᒋᑦ. ᐃᓕᓐᓂᑦ ᐃᒃᐱᒋᑦᑎᐊᕐᓗᑎᑦ. ᐃᒃᐱᒋᑦᑎᐊᕐᓗᒋᑦ ᐃᓐᓇᖁᑎᕗᑦ ᓄᑕᖅᑲᕗᓪᓗ. ᑕᐃᒪᐃᓕᐅᕈᑎᒋᓗᒍ ᑕᒪᑦᑎᓐᓄᓕᒫᖅ. ᑕᒪᑦᑕᑦᑎᐊᖅ ᐱᓕᕆᐊᕆᔭᕆᐊᖃᖅᑲᑦᑎᓐᓂᒃ ᐱᓕᕆᐊᖃᕆᐊᖃᖅᐳᑦ. ᐅᖓᓯᒃᓴᕐᔫᒥᒋᐊᖅᐸᒡᓗᑎᑦ. ᐊᔪᓐᓂᓕᒫᓐᓄᑦ ᐊᖏᕐᕋᖅᓯᒪᓗᑎᑦ. ᑕᒪᓐᓇ ᐱᒻᒪᕆᐅᓗᐊᖅᐳᖅ ᐃᓱᒪᒋᙱᑦᑕᕆᐊᒃᓴᖅ.

ᓄᓇᕗᒻᒥᐅᑦ − ᐃᓄᑦᑎᐊᕙᐅᓚᐅᕆᔅᓯ. ᐃᒃᐱᒋᔭᖃᑦᑎᐊᓚᐅᕆᔅᓯ. ᐅᔾᔨᖅᓱᑦᑎᐊᓗᓯ ᐃᓱᒪᒃᓴᖅᓯᐅᑦᑎᐊᖅᓯᒪᒋᐊᖅᐸᒡᓗᓯᓗ.

ᒥᓂᔅᑕᐅᑉ ᑐᒡᓕᐊ ᐃᓄᓕᕆᔨᒃᑯᓐᓄᑦ ᓄᑖᙳᕆᐊᖅᑎᑦᑎᔪᖅ ᐱᔾᔪᑎᖃᖅᖢᓂ ᐃᓕᓐᓂᐊᑏᑦ ᓄᓇᕗᒻᒧᑦ ᐅᑎᕋᔭᕐᓂᖏᓐᓂᒃ:

ᐃᓄᓕᕆᔨᒃᑯᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐃᓕᓐᓂᐊᕐᓂᓕᕆᔨᒃᑯᑦ, ᐊᒻᒪᓗ ᓄᓇᓕᖕᓂ ᒐᕙᒪᒃᑯᓐᓂᓗ ᐱᔨᑦᑎᕋᖅᑎᒃᑯᑦ ᐱᓕᕆᖃᑎᒌᒃᓯᒪᕗᑦ ᓇᓗᙱᑦᑎᐊᕈᒪᓪᓗᑎᒃ ᖁᐊᖅᓵᕐᓇᙱᑦᑐᒃᑯᑦ ᐃᓕᓐᓂᐊᖅᑏᑦ ᓄᓇᕗᒻᒥᓕᒫᖅ ᐅᑎᕋᓗᐊᕐᒪᖔᑕ ᖃᓪᓗᓈᑦ−ᓄᓇᖓᓐᓂ ᑐᙵᕕᓕᖕᓂᑦ ᐃᓕᓐᓂᐊᕆᐊᖅᑐᕐᕕᒋᓯᒪᔭᒥᓂᑦ ᐊᖏᕐᕋᕆᔭᒥᓄᑦ. 

ᑕᐃᒃᑯᐊ ᐃᓕᓐᓂᐊᖅᑏᖅ ᒫᓐᓇ ᐊᖏᕐᕋᐅᔪᒪᔪᑦ, ᐅᐸᒃᑕᐅᔭᕆᐊᖃᙱᑦᑐᒦᓯᑲᐅᑎᒋᔭᕆᐊᖃᖅᐳᑦ ᑕᒪᒃᑯᓇᓂ ᐊᐅᓪᓚᕐᕕᒋᓯᒪᔭᒥᓂ, 14−ᓄᑦ ᐅᓪᓗᓄᑦ ᐋᖅᑭᒃᑕᐅᓯᒪᕙᒌᖅᑐᒧᑦ ᓵᑕᖅᑕᐅᓯᒪᔪᒧᑦ ᖃᑕᓲᒧᑦ ᓄᓇᕗᓕᐊᖅᑐᒧᐊᕈᓐᓇᓚᐅᙱᓐᓂᕐᒥᓂ.  ᒪᕉᒃ ᐱᓕᕆᕕᒋᔭᐅᓂᐊᖅᑑᒃ ᐃᓕᓐᓂᐊᖅᑎᓄᑦ ᐋᑐᕚᒥᐅᓂᐊᖅᐳᖅ ᐅᐃᓂᐹᒡᒥᓗ. ᑭᕙᓪᓕᕐᒥᐅᑦ ᕿᑎᕐᒥᐅᓪᓗ ᐃᓕᓐᓂᐊᖅᑏᑦ ᑲᑎᑉᐸᓪᓕᐊᓂᐊᖅᐳᑦ ᐅᐃᓂᐹᒡᒥ ᐱᒋᐊᕐᓂᐊᕋᒥᒃ 14−ᓄᑦ ᐅᓪᓗᓄᑦ ᐊᑐᕆᐊᖃᖅᑕᒥᓂᒃ, ᑭᖑᓪᓕᖅᐹᖅ ᐃᓕᓐᓂᐊᖅᑎ ᑕᐅᑯᙵᖅᑕᐅᕌᓂᑐᐊᖅᐸᑦ. ᕿᑭᖅᑕᓂ ᓄᓇᓖᑦ ᐃᓕᖅᓂᐊᖅᑏᑦ ᑲᑎᑉᐸᓪᓕᐊᓂᐊᖅᐳᑦ ᐋᑐᕚᒥ ᐃᓂᒋᔭᐅᓂᐊᖅᑐᒥ, ᐊᒻᒪᑦᑕᐅᖅ, ᑭᖑᓪᓕᖅᐹᖅ ᐃᓕᓐᓂᐊᖅᑎ ᑎᑭᑐᐊᖅᐸᑦ ᑕᐃᑯᖓ ᐃᓂᒧᑦ, 14−ᓄᑦ ᐅᓪᓗᓄᑦ ᐊᑐᕆᐊᖃᖅᑕᒥᓂᒃ ᐊᑐᓯᒋᐊᕐᓂᐊᖅᐳᑦ. ᓵᑕᒥᒃ ᑖᒃᑯᓇᙵᑦ ᓄᓇᓖᖕᓂᑦ ᐊᑐᓂᑦ ᐅᑎᖅᑎᑦᑎᔪᖃᕐᓂᐊᖅᐳᖅ ᓄᓇᕗᒻᒧᑦ ᐃᓕᓐᓂᐊᖅᑎᓂᒃ.

ᐅᐸᒃᑕᐅᑦᑕᐃᓕᒪᓂᕐᒥᓂ ᐋᑐᕚᒥ ᐅᐃᓂᐹᒡᒥᓗ, ᐃᓕᓐᓂᐊᑏᑦ ᐊᑐᖅᑎᑕᐅᖃᑦᑕᕈᓐᓇᕐᓂᐊᖅᐳᑦ ᐃᓕᓐᓂᐊᖅᑕᒥᓄᑦ ᐱᐊᓂᒃᓯᔾᔪᑎᒃᓴᖏᓐᓂᒃ, ᐊᑐᖅᓯᖃᑦᑕᕈᓐᓇᕐᓂᐊᖅᖢᑎᒃ ᐋᓐᓂᐊᓯᐅᑎᓂᒃ ᐱᓕᕆᔨᓪᓚᕆᖕᓂᒃ, ᑖᒃᑯᐊᓗ ᖃᐅᔨᓴᕐᓂᐊᖅᖢᑎᒃ ᖃᓄᐃᙱᑦᑎᐊᕈᓐᓇᕐᓂᖏᑦ ᑲᒪᒋᔭᐅᑦᑎᐊᕋᓗᐊᕐᒪᖔᑕ.  (ᐱᓕᕆᖃᑎᒌᒃᑐᖃᕐᓂᐊᕆᕗᖅᑕᐅᖅ ᐱᓕᕆᐊᒃᓴᖃᖅᑎᑕᐅᓗᑎᒃ ᓇᐅᑦᑎᖅᓱᖅᓯᓂᕐᒥᒃ ᐱᓕᕆᕝᕕᖃᕐᓂᕐᒥᒡᓗ ᐃᓱᒪᒋᔭᒃᓴᓂᒃ ᓴᖅᑭᑦᑐᓂᒃ ᑕᒫᙵᑦ  ᐊᐅᓚᓂᕆᔭᐅᔪᒥᑦ)

ᑐᓴᖅᑎᑦᑎᓂᖅ ᐃᓕᓐᓂᐊᖅᑎᓄᑦ: ᐊᖏᕐᕋᕈᒪᑐᐊᕈᔅᓯ ᐊᔪᕐᓇᕈᓐᓃᑐᐊᖅᐸᑦ, ᐱᖁᑎᔅᓯᓐᓂᒃ ᐴᖅᑲᐃᓯᒪᓂᐊᖅᐳᓯ ᐱᑐᐃᓐᓇᕆᐊᖃᖅᓯᒪᓗᓯᓗ ᓇᓕᐊᖕᓄᑐᐃᓐᓇᖅ ᑲᑎᕝᕕᐅᓂᐊᖅᑑᖕᓄᑦ. ᐃᓱᓕᖅᑕᖅᑐᓂᒃ ᐱᖁᑎᓂᒃ ᓇᒃᓴᖅᑐᖃᕈᓐᓇᕐᓂᐊᖅᐳᖅ ᑕᒪᐃᖕᓄᑦ ᐊᑭᓕᖅᑕᐅᕙᒃᑐᑎᒍᑦ ᖃᖓᑕᓲᑎᒍᑦ, ᑕᐃᔅᓱᒧᖓᓗ ᑭᖑᓪᓕᖅᐹᒧᑦ ᓵᑕᖅᑕᐅᓯᒪᔪᒧᑦ ᖃᖓᑕᓂᐅᓂᐊᖅᑐᒧᑦ.

ᑕᒪᒃᑯᓄᖓ ᐱᑐᐃᓐᓇᐅᙱᑦᑐᓂᒃ ᐱᔭᕆᐊᓕᖕᓄᑦ ᐊᑐᕆᐊᓕᖕᓄᓪᓘᓐᓃᑦ, ᓇᓗᓇᐃᖅᑕᐅᓪᓗᐊᖅᐳᑦ ᖃᖓᑕᖃᑎᒋᔭᖓᓄᑦ ᐃᓕᖕᓄᑦ ᖃᐅᔨᑎᑦᑎᔪᒧᑦ.

ᑕᐃᒃᑯᓄᖓᓗ ᑕᐃᑲᓃᖏᓐᓇᕈᒪᔪᓄᑦ ᐱᔭᕇᖅᓯᔪᒪᓗᑎᒃ ᐃᓕᓐᓂᐊᕐᓂᕆᔭᒥᓂᒃ ᑕᐃᑲᓂ, ᑭᓯᐊᓂ ᐊᖏᕐᕋᐅᔪᒪᓂᐊᕐᓗᑎᒃ ᐱᔭᕇᕈᑎᒃ, FANS−ᑯᑦ ᑕᒪᓐᓇ ᑲᒪᒋᓂᐊᖅᑕᖓᑦ ᑭᓯᐊᓂ ᓯᕗᓪᓕᖅᐹᓂᒃ ᒪᓂᒪᔪᓂᒃ ᖔᖅᑭᒃᓯᔪᖃᕈᓐᓇᓕᖅᐸᑦ ᐊᖏᕐᕋᐅᓂᐊᕐᓗᓂ.

ᑐᑭᓯᐅᒪᕗᖓ ᐃᒪᓐᓇ, ᐊᓯᖏᓐᓄᑦ ᐅᑎᖅᑐᓄᑦ ᓄᓇᕗᒻᒧᑦ, ᐱᑕᖃᖅᐳᖅ ᐊᑐᕆᐊᖃᕋᔭᖅᑕᖏᓐᓂᒃ. ᐊᐅᓪᓚᕈᑎᒃᓴᓂᒃ ᐱᓂᐊᕐᓗᓂ, FANS−ᒧᑦ ᐊᑐᖅᑕᐅᒐᔪᒃᐸᒃᑐᖅ ᑲᔪᓯᓇᔭᖅᐳᖅ.

ᖃᕆᑕᐅᔭᒃᑯᑦ ᑎᑎᖅᑲᓂᒃ ᐅᓪᓗᒥ ᐃᓕᓐᓂᐊᖅᑎᓄᑦ ᐊᐅᓪᓚᖅᑎᑦᑎᔪᖃᕐᓂᐊᖅᑐᖅ ᐊᐱᕆᔭᐅᓗᑎᒃ ᐱᑎᑦᑎᖁᔭᐅᓗᑎᒃ   FANS−ᑯᓐᓂᑦ ᐱᔭᐅᔭᕆᐊᓕᖕᓂᒃ ᑐᓴᖅᑕᐅᔪᒃᓴᖁᑎᖕᓂᒃ, ᐱᑎᓪᓗᒋᓪᓗ ᐱᔪᒪᔭᖏᓐᓂᒃ.

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᐱᓯᒪᓕᑐᐃᓐᓇᕆᐊᖃᕐᓂᕐᒧᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ, ᓄᓇᕗᑦ ᒐᕙᒪᒃᑯᖏᑕ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐱᒋᐊᕐᓗᓂ ᒫᑦᓯ 24, 2020-ᒥ, ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖃᕐᕕᖏᑦ ᐃᒡᓗᕐᔪᐊᑦ ᑭᒃᑯᑐᐃᓐᓇᓄᑦ ᒪᑐᓯᒪᓂᐊᓂᖅᐳᑦ.  ᑭᓇᑐᐃᓐᓇᑦᑎᐊᖅ ᑕᖅᑳᙵᑐᐃᓐᓇᑦᑎᐊᖅ ᐃᓅᖃᑎᖃᕐᓗᓂ ᐅᐸᒃᓯᔭᕆᐊᓕᒃ ᓇᓕᐊᖕᓄᑐᐃᓐᓇᖅ ᓄᓇᕗᑦ ᒐᕙᒪᖓᑕ ᐊᑐᓪᓚᕆᒋᐊᖃᖅᑐᓄᑦ ᐱᔨᑦᑎᕋᖅᑎᒋᔭᐅᔪᓄᑦ ᓄᓇᕗᑦ ᒐᕙᒪᖓᑕ ᑎᑎᕋᕐᕕᐊᓄᑦ ᐃᒡᓗᕐᔪᐊᒦᑦᑐᒧᑦ, ᑕᐃᔅᓱᒧᖓᒻᒪᕆᒃ ᐃᓄᖕᒧᑦ ᖃᐅᔨᒋᐊᕆᐊᖃᖅᐳᖅ ᐋᖅᑭᒃᓯᖃᑎᒋᓗᒍᓗ ᓈᒻᒪᒃᑐᓂᒃ ᐋᖅᑭᐅᒪᓕᕈᑎᓂᒃ.  

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

• ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑕᒪᕐᒥᑦᑎᐊᖅ ᑐᐊᕕᕐᓇᙱᑦᑐᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑎᒍᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᒻᒥᑦ ᐱᔨᕈᑎᒋᖃᑦᑕᖅᑕᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, 7−ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑕᒪᕐᒥᑦᑎᐊᖅ ᐃᓗᐊᖅᓴᖅᑕᐅᔭᕆᐊᓖᑦ ᐊᐱᕆᔭᐅᕗᑦ ᐅᖄᓚᖃᑦᑕᖁᔭᐅᓪᓗᑎᒃ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕋᕐᓇᙱᑦᑐᓕᕆᓂᕐᒧᑦ ᐃᓂᒋᔭᐅᔪᒥ.
• ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᙶᖏᓐᓇᕐᓂᐊᖅᑐᑦ.
• ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᖅᑐᖅᓯᓂᐅᕙᒃᑐᑦ ᑲᐱᔭᐅᕙᖕᓃᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
• ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᕆᕙᑦᑕᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

• ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᓄᖃᖅᑎᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᓐᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᑕᒪᒃᑯᐊ ᐊᓯᔾᔨᕐᓂᕆᔭᐅᔪᑦ ᐅᖃᖃᑎᒌᖃᑕᐅᑎᑕᐅᓗᑎᓪᓗ ᑐᓴᕆᐊᓕᖏᓐᓂᑦ.
• ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᔅᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ. ᑕᒪᕐᒥᑦᑎᐊᖅ ᑕᑯᔭᔅᓴᓕᐊᖑᓯᒪᔪᑦ ᐃᓂᔅᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.
• ᑯᑦ ᓅᓯᒪᓕᖅᐳᑦ ᐅᖄᓚᐅᑎᒃᑯᑦ ᖃᐅᔨᒋᐊᕐᕕᖃᖃᑦᑕᕐᓂᕐᒥᒃ ᐃᑲᔪᖅᑐᐃᕙᖕᓂᕐᒥᒡᓗ ᐃᓚᖏᓐᓄᑦ ᐱᓕᕆᕝᕕᒋᕙᒃᑕᒥᓄᑦ. ᑕᑯᔭᔅᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᔅᓯᕆᐊᓖᑦ ᐊᒻᒪ ᐱᓕᕆᖃᖅᑕᕐᓂᕆᕙᑦᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ.
• ᐊᖏᕐᕋᕆᔭᐅᔪᓄᑦ ᐅᐸᑦᑕᐅᖃᑦᑕᖅᑐᑦ ᐄᔭᒐᖏᑕ ᒥᔅᓵᓄᑦ ᐊᑕᐅᓯᐅᓈᖅᑎᕐᓗᒋᑦ ᐱᓕᕆᐊᖃᑦᑕᕐᓂᐊᖅᑐᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

• ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᖃᐅᔨᒪᓕᕈᒪᓂᕐᒧᑦ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.
• ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᑕᒪᕐᒥᑦᑎᐊᖅ ᑕᐃᒪᐃᓪᓚᕆᒋᐊᖃᙱᑦᑐᓕᒪᑦ ᓄᒃᑕᕐᓂᕆᔭᐅᕙᒃᑐᑦ ᐃᓚᒌᓄᑦ ᑕᑯᔭᖅᑐᖅᓯᔪᓄᑦ ᑲᒪᒋᔭᐅᔪᓂᒃ, ᓄᖅᑲᖅᑎᑕᐅᕗᑦ

ᑮᓇᐅᔭᓕᕆᔨᒃᑯᑦ

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

• ᓄᓇᕗᒻᒥᐅᑦ ᓄᓇᕗᒻᒥᓗ ᓇᖕᒥᓂᖃᖅᑎᐅᔪᑦ ᑎᓕᐅᖅᑕᐅᕗᑦ  ᑖᒃᓯᒥᓂᒃ ᐊᑭᓕᖅᓯᖃᑦᑕᖁᔭᐅᓪᓗᑎᒃ ᐅᖄᓚᐅᑎᒃᑯᑦ ᐅᕗᖓ ᐊᑭᓕᕆᐊᖃᙱᑦᑐᒧᑦ 1-800-316-3324−ᒧᑦ ᐅᖄᓚᓗᑎᒃ ᖃᕆᑕᐅᔭᒃᑯᓪᓘᓐᓃᑦ ᐋᖅᑭᒃᓱᖅᓯᒪᔭᒥᑎᒍᑦ ᑮᓇᐅᔭᓕᕆᓂᕐᒧᑦ ᐱᓕᕆᖃᑎᒋᕙᒃᑕᒥᓂᒃ ᐋᖅᑭᒃᓱᐃᖃᑎᖃᕐᓗᑎᒃ.
• ᐊᐅᓪᓚᖅᑎᑦᑎᔪᓐᓇᕐᒥᔪᑦᑕᐅᖅ ᑮᓇᐅᔭᒃᓴᒥᒃ ᑎᑎᖅᑲᑎᒍᑦ ᑎᑎᕋᕐᕖᒃᑰᖅᑎᓪᓗᒋᑦ. ᐊᐱᖅᑯᑎᒃᓴᖃᖅᑐᖃᖅᐸᑦ ᐱᔾᔪᑎᖃᕐᓗᑎᒃ ᐱᖁᑎᒋᔭᐅᔪᓄᑦ ᑖᒃᓯᓄᑦ, ᖃᕆᑕᐅᔭᒃᑯᑦ ᐅᕗᖓ ᑎᑎᕋᕐᓗᑎᑦ @email.
• ᐊᐱᖅᑯᑎᒃᓴᖃᖅᑐᖃᕐᓂᖅᐸᑦ ᐱᔾᔪᑎᖃᕐᓗᑎᒃ ᐃᖅᑲᓇᐃᔭᖅᑏᑦ ᐊᑭᓕᖅᓱᖅᑕᐅᕙᖕᓂᖏᓐᓄᑦ ᑖᒃᓯᓕᕆᓂᕐᒧᑦ, ᖃᕆᑕᐅᔭᒃᑯᑦ ᑎᑎᕋᖃᑦᑕᐅᑎᕝᕕᒃᑯᒃ ᐅᕗᖓ ᑎᑎᕋᕐᓗᑎᑦ @email.
• ᓄᓇᕗᒻᒥᐅᑦ ᓄᓇᕗᒻᒥᓗ ᓇᖕᒥᓂᕆᔭᐅᔪᓂᒃ ᓇᖕᒥᓂᖃᖅᑏᑦ ᑎᓕᐅᖅᑕᐅᕗᑦ ᐊᑭᓖᖃᑦᑕᖁᔭᐅᓪᓗᑎᒃ ᓄᓇᕗᑦ ᒐᕙᒪᒃᑯᓐᓄᑦ ᐊᑭᓕᒐᒃᓴᖁᑎᒥᓂᒃ, ᐅᖄᓚᓗᑎᒃ ᐅᑯᓄᖓ ᐅᖄᓚᐅᑎᓄᑦ, ᐱᑎᓪᓗᒋᓪᓗ ᐊᐅᒃᑕᔫᖏᑕ ᓈᓴᐅᑎᖏᓐᓂᒃ.
  • ᐃᖃᓗᐃᑦ: 867-975-5808
  • ᑲᖏᖅᖠᓂᖅ: 867-645-8517
  • ᐃᖃᓗᒃᑑᑦᑎᐊᖅ: 867-983-4043
• ᓄᓇᕗᑦ ᒐᕙᒪᒃᑯᓐᓄᑦ ᓂᐅᕕᖅᑎᒋᔭᐅᕙᒃᑐᑦ ᑎᓕᐅᖅᑕᐅᕗᑦ ᖃᕆᑕᐅᔭᒃᑯᑦ ᐊᑭᓕᒐᒃᓴᖁᑎᒥᓂᒃ ᑐᓂᓯᖁᔭᐅᓪᓗᑎᒃ, ᓇᒃᓯᐅᑎᓗᒋᑦ ᐅᑯᓄᖓ, @email.
• ᐊᔪᙱᑎᑕᐅᔪᑦ ᐃᖅᑲᓇᐃᔭᖅᑏᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑎᓕᐅᓪᓗᐊᖅᐳᑦ ᑕᐃᒪᐃᑦᑐᖃᕐᕕᒃᒡᑕᕈᒪᓗᑎᒃ ᐅᕘᓇ, ᓇᖕᒥᓂᖅ-ᐱᔨᑦᑎᕋᕐᕕᖃᕐᓂᕐᒧᑦ ᐱᔪᒪᔪᓐᓇᖅᓯᓗᑎᒡᓗ ᐊᑭᓕᖅᑕᐅᓂᕐᒧᑦ ᑎᑎᖅᑲᖁᑎᒥᖕᓂᒃ ᖃᕆᑕᐅᔭᒃᑯᑦ. ᐊᑎᓕᐅᕈᒪᒍᕕᑦ ᑕᒪᑐᒧᖓ, ᖃᕆᑕᐅᔭᒃᑯᑦ ᐅᑯᐊ ᑎᑎᕋᕐᕕᒋᓗᒋᑦ @email.

ᓄᓇᕗᑦ ᒐᕙᓚᒃᑯᓐᓂᑦ ᐊᑭᓕᖅᓱᖅᑕᐅᓂᖅ

ᐊᐃᕆᓕ 3, 2020

• ᐃᓘᓐᓇᑎᒃ ᒐᕙᒪᒃᑯᓐᓄᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᐊᑭᓕᖅᑐᖅᑕᐅᖏᓐᓇᕐᓂᐊᖅᑐᑦ ᑕᐃᒫᖑᖃᑦᑕᕐᒪᑦ. ᑭᖑᕙᕆᐊᖅᓯᒪᓂᐊᖅᑐᒃᓴᐅᔪᑦ ᐱᓕᕆᐊᖑᓂᖏᑦ ᒪᓕᒃᑕᐅᒋᐊᖃᙱᑦᑐᓕᖕᓄᑦ ᐊᑭᓕᐅᑎᑦ ᓲᕐᓗ ᐃᖅᑲᓇᐃᔭᕐᓇᐅᙱᑦᑐᒃᑯᑦ ᐃᖅᑲᓇᐃᔭᕈᑎᑦ ᐅᕝᕙᓘᓐᓃᑦ ᑭᖑᕝᓯᒪᔾᔪᑎᑦ. ᐃᖅᑲᓇᐃᔭᐃᓐᓇᖃᑦᑕᖅᑐᑦ ᐊᑭᓕᖅᓱᖅᑕᐅᖏᓐᓇᕐᓂᐊᖅᐳᑦ ᐊᑭᓕᖅᑕᐅᓂᕆᕙᒃᑕᒥᑎᒍᑦ, ᑕᒪᒃᑯᐊᓗ ᐃᖅᑲᓇᐃᔭᓚᐅᑲᒃᑎᑕᐅᔪᖅ ᐃᓇᖏᖅᓯᓯᒪᔪᓪᓗ ᐊᑭᓕᖅᑕᐅᖃᑦᑕᕐᓂᐊᖅᖢᑎᒃ ᒪᓕᒃᑐᖃᕐᓗᓂ ᑐᓐᓂᖅᑯᑕᐅᓯᒪᔪᓂᒃ ᐃᑲᕐᕋᓕᐅᕈᑎᓂᒃ.
• ᐃᖅᑲᓇᐃᔭᖅᑏᑦ ᓯᒃᑭᑖᖃᑦᑕᖅᑐᑦ ᓯᒃᑭᑖᖏᓐᓇᖃᑦᑕᕐᓂᐊᖅᑐᑦ. ᑕᐃᒃᑯᓄᖓ ᑮᓇᐅᔭᒃᑯᕕᒻᒨᖅᑕᐅᑎᑦᓯᖃᑦᑕᖅᑐᑦ, ᑮᓇᐅᔭᑦᓵᑦ ᓇᓕᖅᑲᖏᑦ ᓴᖅᑭᖅᑕᐅᓛᖅᑐᑦ ᑭᖑᓂᐊᒍᑦ ᐅᓪᓗᖅ.
• ᑐᑭᓯᒋᐊᑲᓂᕈᒪᒍᕕᑦ, ᖃᐅᔨᒃᑲᐅᑎᓗᒍ ᑐᕋᐃᓯ ᒧᐊᐃᐅᓪᔅ, ᑐᑭᒧᐊᑦᑎᑦᓯᔨ ᐊᑭᓕᖅᑕᐅᔾᔪᑎᓄᑦ ᐃᑲᔫᑎᓄᓪᓗ ᐅᕗᖓ @email.

ᐊᐃᕆᓕ 17, 2020

• ᐃᓘᓐᓇᑎᒃ ᒐᕙᒪᒃᑯᓐᓄᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᐊᑭᓕᖅᑐᖅᑕᐅᖏᓐᓇᕐᓂᐊᖅᑐᑦ ᑕᐃᒫᖑᖃᑦᑕᕐᒪᑦ. ᒪᓕᑦᑕᐅᒋᐊᖃᖏᑦᑐᓕᓐᓄᑦ ᐊᑭᓕᐅᑎᓄᑦ ᓲᕐᓗ ᐃᖅᑲᓇᐃᔭᕐᓇᐅᖏᑦᑐᒃᑯᑦ ᐃᖅᑲᓇᐃᔭᕈᑏᑦ ᐃᓇᖏᖅᓯᒪᓂᕐᒧᓪᓘᓐᓃᑦ ᐊᑭᓕᐅᑏᑦ ᐅᑎᖅᑎᑦᓯᓂᕐᒧᓪᓗ (ᐃᓚᒋᔭᐅᓗᑎᒃ ᓄᖅᑲᖓᖏᔾᔪᑎᖃᕐᓗᓂ ᐊᑭᓕᖅᑕᐅᒐᓂᓗ ᓄᖅᑲᖓᓂᕐᒧᑦ) ᑲᒪᒋᔭᐅᓂᐊᖅᑐᑦ ᑭᖑᓂᐊᒍᑦ ᐅᓪᓗᖅ.
• ᐃᖅᑲᓇᐃᔭᐃᓐᓇᖅᑐᓄᑦ ᐃᖅᑲᓇᐃᔭᖅᑎᓄᑦ ᐊᑭᓕᖅᑐᖅᑕᐅᓂᐊᖅᑐᑦ ᑮᓇᐅᔭᑦᓵᖏᓐᓂᑦ.
• ᐃᓘᓐᓇᑎᒃ ᐃᖅᑲᓇᐃᔭᑲᐃᓐᓇᖃᑦᑕᖅᑐᑦ ᐃᖅᑲᓇᐃᔭᖅᑏᑦ ᐅᖓᕝᕙᕆᐊᖅᑕᐅᓯᒪᔪᑦ ᒪᐃ 15-ᒧᓄ ᑐᓂᓯᒋᐊᑐᒐᑎᓪᓗ ᐃᑲᕐᕋᓕᐅᕈᑎᖏᓐᓂᑦ.
• ᐃᓇᖏᔩᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖅᓯᒪᔪᑦ ᒫᑦᓯ 21-ᒥ ᐄᐳᓗ 3-ᒧ ᑐᓂᓯᒋᐊᓖᑦ ᐃᑲᕐᕋᓕᐅᕈᑎᖏᓐᓂᑦ ᐅᕗᖓ @email 5-ᒥ ᐅᓐᓄᓴᒃᑯᑦ ᐄᐳᓗ 3.
• ᒫᓐᓇᐅᔪᖅ, ᑭᓯᐊᓂ ᐃᖅᑲᓇᐃᔭᖅᑏᑦ ᐊᖓᔪᖅᑳᓪᓗ ᐊᑎᓕᐅᕆᔭᕆᐊᓖᑦ ᐃᑲᕐᕋᓕᐅᕈᑎᓂᑦ.  ᑭᖑᕙᕐᓗᑎᒃ ᑐᓂᓯᓂᐅᔪᑦ ᑲᒪᒋᔭᐅᓚᖓᖏᑦᑐᑦ.
• ᐃᖅᑲᓇᐃᔭᖅᑏᑦ ᓯᒃᑭᑖᖃᑦᑕᖅᑐᑦ ᓯᒃᑭᑖᖏᓐᓇᖃᑦᑕᕐᓂᐊᖅᑐᑦ. ᑕᐃᒃᑯᓄᖓ ᑮᓇᐅᔭᒃᑯᕕᒻᒨᖅᑕᐅᑎᑦᓯᖃᑦᑕᖅᑐᑦ, ᑮᓇᐅᔭᑦᓵᑦ ᓇᓕᖅᑲᖏᑦ ᓴᖅᑭᖅᑕᐅᓛᖅᑐᑦ ᑭᖑᓂᐊᒍᑦ ᐅᓪᓗᖅ.
• ᑐᑭᓯᒋᐊᑲᓂᕈᒪᒍᕕᑦ, ᖃᐅᔨᒃᑲᐅᑎᓗᒍ ᑐᕋᐃᓯ ᒧᐊᐃᐅᓪᔅ, ᑐᑭᒧᐊᑦᑎᑦᓯᔨ ᐊᑭᓕᖅᑕᐅᔾᔪᑎᓄᑦ ᐃᑲᔫᑎᓄᓪᓗ ᐅᕗᖓ @email.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᓕᕆᕝᕕᖓ

• ᐃᓕᓐᓂᐊᕐᓂᓕᕆᔨᒃᑯᑦ ᑮᓇᐅᔭᖃᖅᑎᑦᑎᓂᐊᖅᑐᑦ ᓄᑕᖅᑲᑦ ᑲᒪᒋᔭᐅᕕᖏᓐᓄᑦ ᐱᔪᓐᓇᐅᑎᓕᖕᓄᑦ ᐃᓂᓄᑦ, ᐊᑭᓖᔪᒪᓪᓗᑎᒃ ᐊᖓᔪᖅᑳᑦ ᐊᑭᓕᕆᐊᖃᖅᑕᖏᓐᓂᒃ ᒫᑦᓯ 17−ᒥᑦ ᐄᐳᕈ 7, 2020-ᒧᑦ.
• ᑕᒪᕐᒥᑦᑎᐊᖅ ᓄᓇᕗᒻᒥ ᐸᐃᕆᕝᕖᑦ ᐱᔪᓐᓇᐅᑎᓖᑦ ᐊᑭᓕᒐᒃᓴᖅᑖᖅᑎᑦᑎᕙᒃᑐᑦ ᐊᖓᔪᖅᑳᓂᑦ ᐊᑭᓕᖅᑕᐅᔭᕆᐊᖃᖅᐸᒃᑐᓂᒃ ᐊᔪᖅᑎᑕᐅᔾᔮᙱᓚᑦ ᑐᓐᓂᖅᑯᓯᐊᕈᓐᓇᕐᓄᑎᒃ ᑮᓇᐅᔭᓂᒃ.
• ᑖᒃᑯᐊ ᑮᓇᐅᔭᑦ ᐱᓕᕆᐊᖑᓂᐊᖅᐳᑦ ᓇᒃᓯᐅᔾᔭᐅᓗᑎᒡᓗ ᓚᐃᓴᓕᖕᓄᑦ ᐸᐃᕆᕝᕕᖕᓄᑦ, ᐅᓪᓗᑐᐃᓐᓇᖅ, ᒫᑦᓯ 27, 2020 ᑎᑭᓚᐅᙱᓐᓂᖓᓂ.
• ᑕᒪᓐᓇ ᒫᓐᓇ ᐊᑐᕐᓂᑦᑎᓐᓂ, ᐊᖓᔪᖅᑳᕆᔭᐅᔪᑦ ᐊᑭᓖᔭᕆᐊᖃᔾᔮᙱᓚᑦ ᐊᖓᔪᖅᑳᕆᔭᐅᔪᓂᑦ ᐊᑭᓕᖅᑕᐅᔭᕆᐊᖃᖅᐸᒃᑐᓂᒃ.
• ᒪᑐᓯᒪᔪᑦ ᑲᔪᓰᓐᓇᖅᐸᑕ ᐄᐳᕈ 7 ᑎᑭᐊᓪᓚᓚᐅᖅᑎᓪᓗᒍ, ᑖᓐᓇ ᐱᓕᕆᕝᕕᒋᔭᐅᔪᖅ ᖃᐅᔨᓴᖅᓯᒃᑲᓐᓂᓕᕐᓂᐊᖅᐳᖅ ᐃᑲᔪᖅᓯᓕᕐᓗᓂᓗ ᐱᔪᓐᓇᐅᑎᓕᖕᓂᒃ ᐸᐃᕆᕝᕕᖕᓂᒃ ᐃᓂᒋᔭᐅᔪᓂᒃ ᐋᖅᑭᒃᓯᖃᑎᒋᓗᒋᑦ ᖃᓄᖅ ᓯᕗᒻᒧᐊᕈᓐᓇᕋᔭᕐᒪᖔᑕ.

ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᕆᔭᖏᑦ

• ᐱᓕᕆᕝᕕᒋᔭᐅᔪᖅ ᑭᖑᓪᓕᖅᐹᖅᓯᐅᑎᓂᑦ ᑐᓐᓂᖅᑯᑕᐅᕙᒃᑐᓄᑦ ᐅᓂᒃᑳᕐᕕᒋᔭᕆᐊᖃᖅᖢᒋᑦ ᐋᖅᑭᒃᓱᐃᓯᒪᓕᖅᐳᖅ, ᐊᑕᐅᓯᐊᕐᓗᓂ ᑐᓂᓯᓇᔭᕐᓂᕐᒥᓂᒃ $25,000.-ᓂᒃ ᐊᑕᐅᓯᕐᒧᑦ ᓄᓇᓕᖕᓂ ᐊᖑᓇᓱᖕᓂᕐᒧᑦ ᐱᓕᕆᐊᖑᔪᒧᑦ. ᑖᒃᑯᐊ ᐅᓪᓗᒥ ᓇᒃᓯᐅᔾᔭᐅᓂᐊᖅᑐᑦ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᐱᒋᐊᕐᓗᓂ ᒫᑦᓯ 24, 2020-ᒥ, ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖃᕐᕕᖏᑦ ᐃᒡᓗᕐᔪᐊᑦ ᑭᒃᑯᑐᐃᓐᓇᓄᑦ ᒪᑐᓯᒪᓂᐊᓂᖅᐳᑦ. ᑭᓇᑐᐃᓐᓇᑦᑎᐊᖅ ᑕᖅᑳᙵᑐᐃᓐᓇᑦᑎᐊᖅ ᐃᓅᖃᑎᖃᕐᓗᓂ ᐅᐸᒃᓯᔭᕆᐊᓕᒃ ᓇᓕᐊᖕᓄᑐᐃᓐᓇᖅ ᓄᓇᕗᑦ ᒐᕙᒪᖓᑕ ᐊᑐᓪᓚᕆᒋᐊᖃᖅᑐᓄᑦ ᐱᔨᑦᑎᕋᖅᑎᒋᔭᐅᔪᓄᑦ ᓄᓇᕗᑦ ᒐᕙᒪᖓᑕ ᑎᑎᕋᕐᕕᐊᓄᑦ ᐃᒡᓗᕐᔪᐊᒦᑦᑐᒧᑦ, ᑕᐃᔅᓱᒧᖓᒻᒪᕆᒃ ᐃᓄᖕᒧᑦ ᖃᐅᔨᒋᐊᕆᐊᖃᖅᐳᖅ ᐋᖅᑭᒃᓯᖃᑎᒋᓗᒍᓗ ᓈᒻᒪᒃᑐᓂᒃ ᐋᖅᑭᐅᒪᓕᕈᑎᓂᒃ.  

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

• IM\IT−ᑯᑦ ᑲᔪᓰᓐᓇᕐᓂᐊᖅᐳᑦ ᐃᑲᔪᖅᑐᐃᓂᕐᒥᒃ ᐱᓕᕆᕝᕕᒋᔭᖏᑕ ᐱᓕᕆᕝᕕᒋᔭᓕᒫᖏᓐᓄᑦ, ᑕᒪᒃᑯᐊ ᑕᒪᕐᒥᑦᑎᐊᖅ ᓄᓇᕗᒻᒥᐅᓄᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᒪᓂᒪᒐᓗᐊᕐᒪᖔᑕ ᐱᑐᐃᓐᓇᕆᐊᖃᖅᖢᑎᒡᓗ.
• IM\IT−ᑯᑦ ᐱᓕᕆᐊᖃᒻᒪᕆᒍᒪᕗᑦ ᖃᐅᔨᒪᑦᑎᐊᕐᓗᑎᒡᓗ ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᐱᔨᑦᑎᕋᕐᓂᕆᕙᒃᑕᖏᑦ ᐊᑐᕆᐊᖃᓪ\ᓚᕆᒃᐸᒃᑐᑦ IM\IT−ᒥᒃ ᑲᔪᓯᒐᓗᐊᕐᒪᖔᑕ ᐃᖏᕐᕋᓪᓗᑎᒡᓗ ᒥᑭᓛᒃᑰᖅᑎᑦᑎᔪᒪᓂᕐᒥᓄᑦ ᐊᒃᑐᖅᓯᓂᕆᔭᐅᔪᓂᒃ ᓄᓇᕗᒻᒥᐅᓄᑦ.
• ᓄᓇᕗᒻᒥᐅᑦ ᐊᑐᑐᐃᓐᓇᕆᐊᖃᖅᐳᑦ ᐃᓚᖓᒍᑦ ᑭᖑᕙᕆᐊᖅᑎᑕᐅᔪᓂᒃ ᐱᔨᑦᑎᕋᐅᑎᒋᕙᒃᑕᒥᓂ. 
• ᐱᕙᒌᔭᖅᐸᓪᓕᐊᓂᖅ ᒫᓐᓇ ᐱᓕᕆᐊᖑᔪᓕᒫᓄᑦ ᑲᔪᓯᓂᐊᖅᐳᑦ ᑲᔪᓯᓂᕆᕙᒃᑕᒥᑎᑐᑦ. ᓄᑖᓂᒃ ᐱᓕᕆᐊᒃᓴᓄᑦ ᐱᔪᒪᔾᔪᑕᐅᔪᓂᒃ ᒫᓐᓇᐅᔪᒃᑯᑦ ᐱᔪᖃᔾᔮᙱᓚᖅ, ᑭᓱᑐᐃᓐᓇᐃᓪᓗ ᓄᑖᑦ ᓄᖅᑲᖓᑎᑕᐅᓂᐊᖅᐳᑦ.

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐊᒡᓗᒋᑦ ᖃᕆᔭᐅᒧᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓇᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐊᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.