ᐊᐱᖅᑯᑎᒃᓴᐃᑦ ᐊᐱᖅᑯᑕᐅᒐᔪᒃᑐᑦ

1) ᖃᓄᖅ ᑖᓐᓇ ᐱᖁᔭᖅ ᐃᓕᖕᓄᑦ ᖃᓄᐃᓕᐅᕈᑕᐅᕙᒃᐸ?

ATIPP-ᒧᑦ ᐱᖁᔭᖅ ᐃᓕᖕᓂᒃ ᐱᑎᑦᑎᕙᒃᐳᖅ ᐱᔪᓐᓇᐅᑎᒥᒃ ᐱᔪᒪᔪᓐᓇᕐᓂᕐᒥᒃ ᐊᑐᕈᒪᓂᕐᒥᒃ ᑐᓴᖅᑕᐅᔪᒃᓴᓂᒃ, ᐱᔪᒪᔪᓐᓇᕐᓂᕐᒥᒡᓗ ᐃᓕᖕᓄᑦ ᑐᕌᖓᔪᖅ ᑐᓴᖅᑕᐅᔪᒃᓴᐃᑦ ᐱᔭᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂᑦ ᑕᒻᒪᖅᓯᒪᔪᓐᓃᖅᑎᑕᐅᖁᓗᒋᑦ ᐃᓱᒪᒋᒍᕕᒋᑦ ᑕᒻᒪᖅᓯᒪᓇᓱᒋᓗᒋᑦ.

ATIPP-ᒧᑦ ᐱᖁᔭᖅ ᓇᓗᙱᑦᑎᐊᕈᑕᐅᒋᕗᖅᑕᐅᖅ ᓄᓇᕗᑦ ᒐᕙᒪᒃᑯᖏᑦ ᓴᐳᔾᔨᓯᒪᒐᓗᐊᕐᒪᖔᑕ ᐃᓕᖕᓄᑦ ᑐᕌᖓᔪᑦ ᖃᐅᔨᔭᐅᔭᕆᐊᖃᙱᓐᓂᕆᔭᑎᑦ. ᒪᓕᒐᑎᒍᑦ ᐊᑐᕆᐊᖃᒻᒪᕆᒃᐳᒍᑦ ᓴᐳᔾᔨᓯᒪᔭᕆᐊᖃᕐᓂᕐᒥᒃ ᖃᐅᔨᔭᐅᔭᕆᐊᖃᙱᑦᑐᓄᑦ ᓇᓕᐊᑐᐃᓐᓇᕐᓂᒃ ᐃᓄᖕᒧᑦ ᐊᑕᐅᓯᕐᒧᑦ ᑐᓴᖅᑕᐅᔪᒃᓴᓂ ᐱᓯᒪᔭᑦᑎᓐᓂᒃ, ᐃᓕᖕᓄᑦ ᑐᕌᖓᔪᓂᒃ.

2) ᑭᒃᑯᑦ ATIPP-ᒧᑦ ᐱᖁᔭᒃᑰᖓᑎᑕᐅᕙᑦ?

ᑕᒪᕐᒥᑦᑎᐊᖅ ᑭᒃᑯᑐᐃᓐᓇᓄᑦ ᑎᒥᒋᔭᐅᔪᑦ ᒪᓕᒋᐊᖃᖅᑎᑕᐅᕗᖅ ATIPP-ᒧᑦ ᐱᖁᔭᕐᒥᒃ. ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᔪᖅ ᓇᓗᓇᐃᖅᑕᐅᓯᒪᑦᑎᐊᖅᐳᖅ ᑎᑎᕋᖅᓯᒪᓂᖓᑎᒍᑦ 2-ᑯᒃ ᑖᒃᑯᓇᓂ ATIPP-ᒧᑦ ᐱᖁᔭᕐᓂ ᐃᒪᓐᓇ:

“ᐱᓕᕆᕝᕕᒋᔭᐅᔪᖅ, ᐃᓂᒋᔭᐅᔪᖅ ᑎᑎᕋᕐᕕᒋᔭᐅᔪᕐᓘᓐᓃᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᑐᑦᑕᕐᕕᒋᔭᐅᔪᕐᓘᓐᓃᑦ, ᑲᑎᒪᔨᒋᔭᐅᔪᖅ, ᑲᒥᓴᒋᔭᐅᔪᖅ, ᑯᐊᐳᕇᓴᒋᔭᐅᔪᖅ, ᑎᑎᕋᕐᕕᒋᔭᐅᔪᖅ ᐊᓯᖓᓘᓐᓃᑦ ᑭᒃᑯᑐᐃᓐᓇᓄᑦ ᑎᒥᒋᔭᐅᔪᖅ ᓇᓗᓇᐃᖅᑕᐅᓯᒪᓗᓂ ᑎᓕᔭᐅᓯᒪᓂᖓᓂᒃ ᒪᓕᒋᐊᓕᖕᓂ. 

ᑖᓐᓇ ᐅᑯᖕᓂᙵ ᐃᓚᖃᙱᓚᖅ:

ᑎᑎᕋᕐᕕᒋᔭᐅᔪᖅ ᒪᓕᒐᓕᐅᕐᕕᖕᒥᐅᓄᑦ ᑎᑎᕋᕐᕕᒋᔭᐅᔪᕐᓘᓐᓃᑦ ᐃᓚᒋᔭᐅᔪᒧᑦ ᒪᓕᒐᓕᐅᕐᕕᖕᒥᐅᓂᑦ ᐃᓚᒋᔭᐅᔪᕐᓘᓐᓃᑦ ᓯᕗᓕᖅᑎᓄᑦ ᑲᑎᒪᔨᒋᔭᐅᔪᓂᑦ.”

ᐊᑕᖐᔪᒥᒃ ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᓄᑦ ᑎᑎᕋᖅᓯᒪᔪᓂᒃ ᖃᐅᔨᒋᐊᕐᕕᐅᔪᓐᓇᕐᓂᖏᓐᓄᓪᓗ ᑐᓴᖅᑕᐅᔪᒃᓴᖁᑎᖏᑦ ᑕᑯᔭᐅᔪᓐᓇᖅᐳᑦ ATIPP-ᒧᑦ ᐊᐅᓚᑦᑎᔨᒋᔭᐅᔪᑦ ᖃᐅᔨᒋᐊᕐᕕᐅᔪᓐᓇᖅᑐᓪᓗ ᐊᑖᒍᑦ.

3) ᖃᓄᕆᑦᑐᓂᒃ ᑐᓴᖅᑕᐅᔪᒃᓴᓂᒃ ᐊᑐᖅᑕᐅᔪᖃᕈᓐᓴᖅᐸᒃᐸ ATIPP-ᒧᑦ ᐱᖁᔭᐅᑉ ᐊᑖᒍᑦ?

ATIPP-ᒧᑦ ᐱᖁᔭᐅᑉ ᐊᑖᒍᑦ, ᐱᔪᒪᔪᓐᓇᑐᐃᓐᓇᕆᐊᖃᖅᐳᑎᑦ ᐊᑐᕈᒪᓂᕐᒥᒃ ᓇᓕᐊᖕᓄᑐᐃᓐᓇᖅ ᑕᒪᐃᓐᓄᓪᓗ ᑐᓴᖅᑕᐅᔪᒃᓴᓄᑦ ᐱᔭᐅᓯᒪᔪᓄᑦ ᓄᓇᕗᑦ ᒐᕙᒪᒃᑯᖏᓐᓂ. ᑕᒪᓐᓇ ᐃᓚᖃᖅᐳᖅ ᐃᓕᕐᓄᖅ ᑐᕌᖓᔪᓂᒃ ᐃᓕᖕᓂᒃ ᐱᔾᔪᑎᖃᕐᓗᑎᒃ, ᐊᒻᒪᓗᑦᑕᐅᖅ ᖃᓄᑐᐃᓐᓇᖅ ᑐᓴᖅᑕᐅᔪᒃᓴᖁᑎᒋᔭᐅᔪᓂᒃ ᓄᓇᕗᑦ ᒐᕙᒃᑯᖏᓐᓄᑦ ᐱᓕᕆᐊᕆᔭᑦᑎᓐᓄᓪᓗ. 

ᖃᓄᕆᑦᑐᒻᒪᕆᖕᓂᑦ ᑐᓴᖅᑕᐅᔪᒃᓴᓂᒃ ᒪᓂᒪᙱᑦᑐᖃᑐᐃᓐᓇᕆᐊᓕᒃ ᓲᕐᓗ ᐅᑯᓂᖓ:

ᐃᓄᖕᒧᑦ ᐊᑕᐅᓯᕐᒧᑦ ᑐᓴᖅᑕᐅᔪᒃᓴᖁᑎᒋᔭᐅᔪᑦ ᐱᔾᔪᑎᖃᕐᓗᑎᒃ ᐊᓯᓂᒃ ᐃᓄᑐᐃᓐᓇᓂᒃ; ᐊᒻᒪᓗ
ᑐᓴᖅᑕᐅᔪᒃᓴᓂᒃ ᐃᒪᐃᑎᑦᑎᑐᐃᓐᓇᕆᐊᓕᖕᓂᒃ:

ᐃᓄᖕᒥᒃ ᑭᒃᑯᑐᐃᓐᓇᓄᓪᓘᓐᓃᑦ ᑎᒥᖁᑎᒋᔭᐅᔪᒥᒃ ᑮᓇᐅᔭᓕᐅᖅᑎᑦᑎᓗᓂ ᐊᓯᐅᔨᑎᑦᑎᓗᓂᓘᓐᓃᑦ ᑮᓇᐅᔭᓂᒃ;
ᖁᐊᖅᓵᕐᓇᖅᑎᑦᑎᓗᓂ ᑭᒃᑯᑐᐃᓐᓇᐃᑦ ᖁᐊᖅᓵᕐᓇᖅᑐᒦᙱᑦᑐᓐᓇᕐᓂᖏᓐᓄᑦ;
ᐊᒡᕕᐊᖅᓇᕐᓗᓂ ᒪᓕᒐᓄᑦ ᐊᑐᖅᑕᐅᓚᕆᒐᔭᖅᑐᓄᑦ; ᐊᒻᒪᓗ

ᒥᓂᔅᑕᐅᖃᑎᒌᑦ ᑎᑎᕋᖅᓯᒪᔪᖁᑎᖏᓐᓂᒃ ᐊᕐᕌᒍᓄᑦ 15-ᓄᑦ ᑎᑭᓪᓗᒍ.

4) ᐱᔭᕆᐊᖃᐃᓐᓇᐅᔭᖅᐲᑦ ᒪᓕᒃᑕᖃᑦᑎᐊᕐᓗᓂ ᐱᔪᒪᓂᕐᒦᒃ ᑐᓴᖅᑕᐅᔪᒃᓴᓂᒃ ᐱᔪᒪᒍᕖᑦ?

ᐋᒃᑲ. ATIPP-ᒧᑦ ᐱᖁᔭᖅ ᐱᕕᒃᓴᖃᖅᑎᑦᑎᕙᒃᑲᓗᐊᖅᑎᓪᓗᒍ ᐱᓇᔪᒃᑐᓂᒃ ᒪᓕᒃᑕᖃᓪᓚᑦᑖᕐᓗᓂ ATIPP-ᒧᑦ ᐱᔪᒪᔭᐅᔪᓂᒃ, ᐃᓇᖏᖅᓯᙱᓚᖅ ᐊᓯᖏᓐᓂᒃ ᑲᔪᓯᓂᐅᕙᒃᑐᓂᒃ ᐊᑐᕐᓂᐊᕐᓗᓂ ᒐᕙᒪᒃᑯᑦ ᑐᓴᖅᑕᐅᔪᒃᓴᖁᑎᖏᓐᓂᒃ ᑎᑎᕋᖅᓯᒪᔪᖁᑎᖏᓐᓂᒡᓘᓐᓃᑦ. ᑐᓴᖅᑐᖃᒃᑲᓐᓂᕈᒪᒃᐸᑦ ᒪᓕᒃᑕᖃᙱᓪᓗᑎᒃ ATIPP-ᒧᑦ ᐱᔪᒪᔾᔪᑕᐅᕙᒃᑐᓄᑦ, ᐅᕘᓇ ᓇᕿᓪᓗᒍ.

5) ᖃᓄᖅ ᐱᔪᒪᔭᖃᕋᔭᖅᐱᑦ ᑐᓴᖅᑕᐅᔪᒃᓴᓄ ᐱᔪᒪᓂᕆᔭᕐᓂᒃ?

ᑐᓴᖅᑕᖃᕈᒪᒍᕕᑦ ᖃᓄᖅ ᐱᔪᒪᓂᖃᕐᓂᕐᒧᑦ ᑐᓴᖅᑕᐅᔪᒃᓴᓂᒃ ᐱᔪᒪᒍᕕᑦ, ᐅᕘᓇ ᓇᕿᓪᓗᒍ.

6) ᖃᓄᖅ ᐊᑯᓂᐅᑎᒋᓇᔭᖅᐸ ᑭᐅᔭᐅᓂᐊᕐᓗᓂ ᒪᓕᒃᑕᖃᑦᑎᐊᕐᓗᓂ ATIPP-ᒧᑦ ᐱᔪᒪᔾᔪᑕᐅᔪᒥᒃ?

ᑕᒪᐃᓐᓄᑲᓴᑦᑎᐊᖅ, ᑭᐅᔭᐅᔪᖃᕋᔭᖅᑐᖅ 30 ᐅᓪᓗᐃᑦ ᐃᓗᐊᓂ ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᔪᖅ ᐱᐊᓪᓚᓚᐅᕐᓗᓂ ᐱᔪᒪᔾᔪᑎᒋᔭᕐᓂᒃ, ᑭᓯᐊᓂ ᑖᓐᓇ ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᔪᖅ ᐱᔭᕆᐊᖃᖅᐸᑦ ᐅᖓᕙᕆᐊᖅᑎᑦᑎᓂᕐᒥᒃ ᑎᑎᕋᖅᓯᒪᔪᖅ 12 ᒪᓕᒡᓗᒍ ᐱᖁᔭᕐᓂ.

ᑭᐅᔭᐅᓂᖓ 30 ᐅᓪᓗᐃᑦ ᐅᖓᑖᓅᑐᐃᓐᓇᕆᐊᓕᒃ ᐅᑯᐊᒃ ᓇᓕᐊᑐᐃᓐᓇᖅ ᐊᑐᖅᐸᑦ:

ᑖᒃᑯᓇᓂᕐᒥᐅᑕᐅᙱᑦᑐᒥᒃ ᐊᒃᑐᖅᑕᐅᓂᖃᖅᑐᖃᖅᐸᑦ ᐱᔪᒪᓂᕆᔭᕐᓄᑦ; ᐅᕝᕙᓘᓐᓃᑦ
ᐱᔪᒪᔾᔪᑎᒋᔭᐃᑦ ᑐᑭᓯᓇᑦᑎᐊᙱᑉᐸᑦ ᖃᐅᔨᓴᖅᑕᐅᒃᑲᓐᓂᕆᐊᖃᖅᐸᓪᓘᓐᓃᑦ ᐱᕙᒌᔭᑦᑕᐅᕕᒃᑲᓐᓂᖃᕆᐊᖃᖅᐸᓪᓘᓐᓃᑦ.

ᑭᒃᑯᑐᐃᓐᓇᓄᑦ ᑎᒥᒋᔭᐅᔪᖅ ᐅᖓᕙᕆᐊᖅᑎᑦᑎᔭᕆᐊᖃᕐᓂᖅᐸᑦ ᐅᓪᓗᐊᓂᒃ ᑭᖑᓪᓕᖅᐹᕆᑎᑕᐅᔪᒥᒃ ᐱᔪᒪᓂᕆᔭᕕᑦ 30 ᐅᓪᓗᐃᑦ ᐅᖓᑖᓄᑦ, ᖃᐅᔨᑎᑕᐅᓂᐊᖅᐳᑎᑦ ᖃᓄᑐᐃᓐᓇᖅ ᑭᖑᕙᕆᐊᖅᑎᑕᐅᔪᒥᒃ.

7) ᖃᔅᓯᓂᒃ ᐊᑭᖃᕋᔭᖅᐸ ᐋᖅᑭᒃᓯᓂᐊᕐᓗᓂ ᒪᓕᒃᑕᖃᑦᑎᐊᕐᓗᓂ ATIPP-ᒧᑦ ᐱᔪᒪᓂᕆᔭᐅᔪᒥᒃ?

ᐱᔪᒪᓂᖃᖅᑐᖃᖅᐸᑦ ᐊᑐᕈᒪᓂᕐᒥᒃ ᑐᓴᖅᑕᐅᔪᒃᓴᒥᒃ ᐱᔭᐅᔪᒪᔪᒥ ATIPP-ᒧᑦ ᐱᖁᔭᐅᑉ ᐊᑖᒍᑦ ᑭᒃᑯᑐᐃᓐᓇᓄᑦ ᑐᓴᖅᑕᐅᔪᒃᓴᒥᒃ, ᐊᑭᓖᔭᕆᐊᖃᖅᑎᑕᐅᓇᔭᖅᐳᑎᑦ ᑐᙵᕕᒋᔭᐅᔪᒥᒃ ᐊᑭᓕᒐᒃᓴᒥᒃ $25.00-ᒥᒃ. ᐱᔪᒪᓂᕆᔭᐃᑦᒃ ᑐᓴᖅᑕᐅᔪᒃᓴᓂᒃ ᐱᔪᒪᓗᑎᑦ ᐃᓕᖕᓄᑦ ᑐᕌᖓᔪᓂᒃ ᑐᓴᖅᑕᐅᔪᒃᓴᓂᒃ, ᐱᑎᑦᑎᔭᕆᐊᖃᕋᔭᙱᓚᑎᑦ ᑐᙵᕕᒋᔭᐅᔪᒥᒃ ᐊᑭᓕᒐᒃᓴᒥᒃ.

ᑭᒃᑯᑐᐃᓐᓇᓄᑦ ᑎᒥᒋᔭᐅᔪᖅ ᐃᓱᒪᒋᔭᖃᖅᐸᑦ ᓈᒻᒪᒐᓱᒋᓗᓂᐅᒃ ᐊᑐᖅᑎᑦᑎᓂᕐᒥᑦ ᖄᒃᑲᓐᓂᐊᒍᑦ ᐊᑭᓕᒐᒃᓴᓂᒃ ᐊᑐᕐᓂᕐᓄᑦ ᑐᓴᖅᑕᐅᔪᒃᓴᓂᒃ ᐱᔪᒪᔾᔪᑎᒋᔭᕐᓂᒃ, ᑐᓂᔭᐅᓕᕋᔭᖅᑐᑎᑦ ᖃᔅᓯᑐᕐᓂᐊᕋᓱᒋᔭᐅᔪᒥᒃ ᐊᑭᖓᓄᑦ ᐊᖏᕆᐊᖃᕋᔭᖅᑕᕐᓂᒃ ᑖᒃᓇ ᐱᔪᒪᓂᕆᔭᐃᑦ ᐱᓕᕆᐊᖑᓚᐅᙱᓐᓂᖓᓂ.

ᐱᔪᒪᔪᓐᓇᑐᐃᓐᓇᕆᐊᖃᖅᑐᑎᑦ ᐊᑐᙱᑎᑦᑎᓂᕐᒥᒃ ᐊᑭᓕᒐᒃᓴᓄᑦ ᑎᑎᕋᖅᓯᒪᓗᓂ ᐃᓱᒪᒍᕕᑦ ᐊᑭᓖᓂᖅ ᑕᒪᐃᓐᓂᒃ ᐃᓚᐃᓐᓇᖓᓂᒡᓘᓐᓃᑦ ᐊᑭᓕᕆᐊᓕᖕᓂ ᓈᒻᒪᙱᓐᓇᓱᒋᓗᒍ ᓴᖅᑭᑎᑦᑎᑐᐃᓐᓇᕆᐊᖃᖅᐸᓪᓘᓐᓃᑦ ᐃᓕᖕᓄᑦ ᑮᓇᐅᔭᑎᒍᑦ ᐊᑲᐅᙱᓕᐅᕈᑎᒥᒃ.

ᑐᓴᖅᑕᖃᒃᑲᓐᓂᕈᒪᒍᕕᑦ ᐊᑭᓕᒐᒃᓴᓄᑦ ATIPP-ᒧᑦ ᐱᖁᔭᐅᑉ ᐊᑖᒍᑦ, ᐅᕘᓇ ᓇᕿᓪᓗᒍ.

8) ᖃᓄᐃᓕᐅᕈᓐᓇᖅᐱᑦ ᒪᓕᒃᑕᖃᑦᑎᐊᙱᓪᓗᓂ ᐱᔪᒪᔾᔪᑎᒋᔭᐃᑦ ᑐᓴᖅᑕᐅᔪᒃᓴᓂᒃ ᐋᒃᑳᖅᑕᐅᒃᐸᑦ?

ᒪᓕᒃᑕᖃᑦᑎᐊᙱᓪᓗᓂ ᐱᔪᒪᓂᕆᔭᐃᑦ ᐋᒃᑳᖅᑕᐅᒃᐸᑦ ᑭᓱᑐᐃᓐᓇᒥᒃ ᐱᔾᔪᑎᖃᕐᓗᓂ, ᐋᖅᑭᒃᓱᐃᓕᕈᓐᓇᖅᑐᑎᑦ ᒪᓕᒃᑕᖃᑦᑎᐊᕐᓗᓂ ᐱᔪᒪᓂᕐᒥᒃ ATIPP-ᑯᑦ ᑎᑎᕋᕐᕕᖓᒍᑦ. 

ᑐᓴᖅᑕᖃᕈᒪᒍᕕᑦ ᖃᓄᖅ ᐋᖅᑭᒃᓱᐃᓇᔭᕆᐊᒃᓴᖅ ᒪᓕᒃᑕᖃᑦᑎᐊᕐᓗᓂ ᐱᔪᒪᔾᔪᑎᒧᑦ, ᐅᕘᓇ ᓇᕿᓪᓗᒍ.

9) ᖃᓄᐃᓕᐅᕈᓐᓇᖅᐱᑦ ᒪᓕᒃᑕᖃᑦᑎᐊᕐᓗᓂ ᐱᔪᒪᓂᕆᔭᐃᑦ ᐋᒃᑳᖅᑕᐅᒃᐸᑦ ᐃᓚᐃᓐᓇᖓ ᐊᑕᖏᕐᓗᓂᓘᓐᓃᑦ?

ᐊᐱᕆᔪᓐᓇᖅᐳᑎᑦ ᕿᒥᕐᕈᐊᕈᒪᓂᕋᕐᓗᑎᑦ ᑭᒃᑯᑐᐃᓐᓇᓄᑦ ᑎᒥᒋᔭᐅᔫᑉ ᐋᖅᑭᒃᓯᒪᓕᖅᑎᑕᖓᓂᒃ ᓄᓇᕗᒻᒥᐅᑦ ᑐᓴᐅᒪᑎᑦᑎᓂᕐᒧᑦ ᖃᐅᔨᔭᐅᔭᕆᐊᖃᙱᑦᑐᓄᓪᓗ ᑲᒥᓯᓇᒋᔭᖓᓂᑦ, ᑖᓐᓇᓗ ᖃᓄᐃᓕᐅᖁᔨᓕᕋᔭᖅᖢᓂ ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᔪᒧᑦ. ᓂᐊᖁᕆᔭᐅᔪᖅ ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᔪᒧᑦ ᒪᓕᑐᐃᓐᓇᕆᐊᖃᖅᐳᖅ ᖃᓄᐃᓕᐅᖁᔭᐅᓯᒪᔪᓂᒃ ᑐᓴᐅᒪᑎᑦᑎᓂᕐᒧᑦ ᖃᐅᔨᔭᐅᔭᕆᐊᖃᙱᑦᑐᓄᓪᓗ ᑲᒥᓯᓇᒋᔭᐅᔪᒥᑦ ᐊᓯᐊᓂᒡᓘᓐᓃᑦ ᐋᖅᑭᒃᓯᒪᓕᖅᑎᑕᐅᔪᒧᑦ ᑖᔅᓱᒪ ᓂᐊᖁᕆᔭᐅᔫᑉ ᐃᓱᒪᒋᔭᖓᓄᑦ ᓈᒻᒪᒐᓱᒋᓪᓗᓂᐅᒃ.

ᐃᒪᐃᓐᓂᖅᐸᑦ, ᐊᖏᖃᑎᒋᙱᓐᓂᕈᕕᐅᒃ ᖃᓄᐃᓕᐅᖁᔭᐅᓯᒪᔪᖅ ᓄᓇᕗᒻᒥᐅᓐᓄᑦ ᑐᓴᐅᒪᑎᑦᑎᓂᕐᒧᑦ ᖃᐅᔨᔭᐅᔭᕆᐊᖃᙱᑦᑐᓄᓪᓗ ᑲᒥᓯᓇᒋᔭᐅᔪᒥᑦ, ᓈᒻᒪᒃᓴᙱᒃᑯᕕᓪᓘᓐᓃᑦ ᐋᖅᑭᒃᓯᒪᓕᖅᑎᑕᐅᓯᒪᔪᒥᒃ ᓂᐅᖁᕆᔭᐅᔪᒥᑦ ᑭᒃᑯᑐᐃᓐᓇᓄᑦ ᑎᒥᒋᔭᐅᔪᒥᑦ, ᐱᓇᔪᒃᑲᓐᓂᕐᕕᖃᕈᓐᓇᖅᑐᑎᑦ ᓈᒻᒪᒃᓴᙱᓐᓂᕐᒧᑦ ᓄᓇᕗᒻᒥ ᐃᖅᑲᖅᑐᐃᕕᖕᒧᑦ ᒪᓕᒐᓕᕆᓂᕐᒧᑦ, ᑖᒃᑯᐊᓗ ᑎᓕᓯᔪᓐᓇᖅᖢᑎᒃ ᓴᖅᑭᑎᑕᐅᖁᓪᓗᒋᑦ ᑐᓴᖅᑕᐅᔪᒃᓴᐃᑦ ᐃᓕᖕᓂᒃ ᐃᑲᔪᖅᑐᐃᓗᑎᒃ ᐋᖅᑭᒃᓯᒪᓕᖅᑎᑦᑎᑉᐸᑕ.

10) ᖃᓄᖅ ᓇᓗᙱᑦᑎᐊᕈᓐᓇᖅᐱᑦ ᑐᓴᖅᑕᐅᔪᒃᓴᐃᑦ ᐃᓕᖕᓄᑦ ᑐᕌᖓᔪᑦ ᑕᒻᒪᖅᑕᖅᓯᒪᙱᒃᑲᓗᐊᕐᒪᖔᑕ?

ᐃᓱᒪᒍᕕᑦ ᑖᒃᑯᐊ ᑐᓴᖅᑕᐅᔪᒃᓴᐃᑦ ᑭᒃᑯᑐᐃᓐᓇᓄᑦ ᑎᒥᖁᑎᒋᔭᐅᔫᑦ ᐱᓯᒪᔭᖏᑦ ᑕᒻᒪᖅᑕᖅᓯᒪᓇᓱᒋᓗᒋᑦ ᑕᐃᒫᑦᑎᐊᖑᙱᓐᓇᓱᒋᒍᕕᒋᓪᓗ, ᐊᐱᕆᔪᓐᓇᖅᑐᑎᑦ ᑖᒃᑯᐊ ᐊᓯᔾᔨᖅᑕᐅᖁᓗᒋᑦ .

ᖃᓄᐃᓕᐅᕆᐊᖃᕐᓃᑦ ᖃᓄᖅ ᐋᖅᑭᒃᓯᒪᓕᖅᑎᑦᑎᓂᐊᕐᓗᑎᑦ ᐃᓕᖕᓄᑦ ᑐᕌᖓᔪᓂᒃ ᑐᓴᖅᑕᐅᔪᒃᓴᓂᒃ ᒪᓂᒪᕗᑦᐅᕙᓂ.

11) ᑭᓇᐅᓃᑦ ᓴᐳᔾᔭᐅᓯᒪᕙᒃᐹ ᐱᔪᒪᔭᖃᕌᖓᕕᑦ ᑐᓴᖅᑕᐅᔪᒃᓴᓂᒃ ᖃᐅᔨᑎᑦᑎᒑᖓᕕᓪᓘᓐᓃᑦ ᑭᒃᑯᑐᐃᓐᓇᓄᑦ ᑎᒥᒋᔭᐅᔪᒥᒃ ᖃᐅᔨᔭᐅᔭᕆᐊᖃᙱᑦᑐᓄᑦ ᓱᕋᐃᔪᖃᕌᖔᑦ?

ᐃᓕᖕᓄᑦ ᑐᕌᖓᔪᑦ ᑐᓴᖅᑕᐅᔪᒃᓴᐃᑦ ᑭᓇᐅᓃᓪᓗ ᑭᓇᑐᐃᓐᓇᑦᑎᐊᒧᑦ ᓴᖅᑭᑎᑕᐅᓇᔭᙱᑦᑐᑦ ᓯᓚᑖᓃᑦᑐᓄᑦ ᑭᒃᑯᑐᐃᓐᓇᓄᑦ ᑎᒥᒋᔭᐅᔫᑉ. ᑕᐃᒃᑯᐊᑐᐊᖅ ᐱᔭᕆᐊᓖᑦ ᑐᓴᖅᑕᐅᔪᒃᓴᖁᑎᖕᓂᒃ ᐱᓕᕆᐊᖃᕈᒪᓪᓗᑎᒃ ᐱᓕᕆᐊᒃᓴᕆᔭᒥᓂᒃ ᐃᖅᑲᓇᐃᔮᕆᔭᒥᓂ ᐱᔪᓐᓇᐅᑎᖃᖅᑐᓪᓗ ᑕᑯᔪᓐᓇᕐᓂᕐᒥᒃ ᑖᒃᑯᓂᖓ ᑐᓴᖅᑕᐅᔪᒃᓴᓂᒃ ᐱᑎᑕᐅᔪᓐᓇᖃᑦᑕᕐᓂᐊᖅᐳᑦ ᐊᑐᕈᓐᓇᕐᓂᕐᒥᒃ.

12) ᖃᓄᖅ ᐃᑲᔪᖅᑕᐅᔪᒪᓇᔭᖅᐱᑦ ᖃᐅᔨᒃᑲᓐᓂᕐᓗᑎᓪᓘᓐᓃᑦ?

ᐃᑲᔪᖅᑕᐅᔪᒪᒍᕕᑦ ᑐᓴᖅᑕᖃᒃᑲᓐᓂᕈᒪᒍᕕᓪᓘᓐᓃᑦ, ᖃᐅᔨᒋᐊᕐᕕᒋᔪᓐᓇᖅᑕᑎᑦ ATIPP-ᒧᑦ ᑎᑎᕋᕐᕕᒋᔭᐅᔪᖅ ATIPP-ᒧᓪᓘᓐᓃᑦ ᐊᐅᓚᑦᑎᔨᒋᔭᐅᔪᓄᑦ ᐱᓕᕆᐊᒃᓴᖃᖅᑎᑕᐅᔪᓄᑦ ᑭᒃᑯᑐᐃᓐᓇᓄᑦ ᑎᒥᒋᔭᐅᔪᓄᑦ.