You are here
ᓄᓇᕗᑦ ᖃᐅᔨᓇᓱᖕᓂᐊᖅᑐᑦ ᐱᔾᔪᑎᖃᕐᓗᑎᒃ ᐊᖏᕐᕋᖃᙱᑦᑐᑦ/ᐅᕙᑦᑎᖃᙱᑦᑐᑦ ᓇᐃᓴᖅᑕᐅᓗᑎᒃ
ᑐᓴᒐᒃᓴᖅ ᓴᖅᑭᑕᖅ
ᓄᓇᕗᑦ ᖃᐅᔨᓇᓱᖕᓂᐊᖅᑐᑦ ᐱᔾᔪᑎᖃᕐᓗᑎᒃ ᐊᖏᕐᕋᖃᙱᑦᑐᑦ/ᐅᕙᑦᑎᖃᙱᑦᑐᑦ ᓇᐃᓴᖅᑕᐅᓗᑎᒃ
ᐃᖃᓗᐃᑦ, ᓄᓇᕗᑦ (ᕕᕝᕗᐊᕆ 10, 2014) – ᐱᖓᓲᔪᓂ ᓄᓇᓕᖕᓂ, ᐊᖏᕐᕋᖃᙱᑦᑐᑦ/ᐅᕙᑦᑎᖃᙱᑦᑐᑦ ᖃᐅᔨᔭᐅᓇᓱᖕᓂᐊᕐᒪᑕ ᓄᓇᕘᒥ ᒐᕙᒪᒃᑯᑦ ᐃᓄᓕᕆᔨᖁᑎᖏᓐᓂᑦ. ᓇᐃᓴᐃᓯᒋᐊᕐᓂᐊᖅᑐᑦ ᐅᓪᓗᒥ ᑲᖏᕐᖠᓂᕐᒥ ᐊᒻᒪᓗ ᐃᓱᖃᓛᖅᖢᓂ ᕕᕝᕗᐊᕆ 12, 2014-ᒥ.
ᓇᐃᓴᖅᑕᐅᓗᑎᒃ ᐊᖏᕐᕋᖃᙱᑦᑐᑦ/ᐅᕙᑦᑎᖃᙱᑦᑐᑦ (ᐃᓄᑐᐊᑦ ᐊᒻᒪᓗ ᐃᓚᒌᒃᑐᑦ ᐃᒡᓗᒃᓴᖃᙱᑦᑎᐊᖅᑐᑦ) ᖃᐅᔨᔭᐅᓇᓱᖕᒥᔪᑦ ᐃᖃᓗᖕᓂ, ᕕᕝᕗᐊᕆ 17-ᒥᑦ 19-ᒧᑦ, ᐊᒻᒪ ᐃᖃᓗᒃᑑᑦᑎᐊᕐᒥ, ᕕᕝᕗᐊᕆ 24-ᒥᑦ 26-ᒧᑦ. ᓇᐃᓯᐊᐃᓗᑎᒡᓗ ᑲᙳᓇᖅᑑᑎᑕᐅᓂᐊᖅᑐᑦ ᐊᒻᒪᓗ ᓇᓗᓇᕐᓗᑎᒃ ᖃᐅᔨᓇᓲᑕᐅᔪᑦ ᐃᓄᑐᐊᓂᑦ ᐱᔨᑦᑎᖅᑕᐅᕙᒃᑐᓂᑦ, ᓲᕐᓗ ᓂᕆᔭᖅᑐᕐᕖᑦ ᐊᒻᒪᓗ ᓂᕿᑖᖅᑎᑦᑎᕙᒃᑐᑦ ᑲᑎᖅᓱᐊᒐᕐᓂᒃ, ᐊᒻᒪᓗ ᐃᓂᒋᔭᐅᓚᐅᑲᖃᑦᑕᖅᑐᑦ, ᐃᒡᓗᕋᓛᑦ, ᑐᐲᑦ ᐊᒻᒪᓗ ᐊᓯᖏᑦ ᐃᒡᓗᒃᓴᐅᓗᐊᖏᑦᑐᑦ ᐃᓄᖕᓄᑦ ᐊᑯᓂᐅᔪᒧᑦ. ᖃᐅᔨᓴᖅᐸᓪᓕᐊᖕᒥᔪᑦ ᐅᖄᓚᐅᑎᒃᑯᑦ ᐊᓯᖏᓐᓂ ᓄᓇᓕᖕᓂ.
"ᖃᐅᔨᒪᔪᒍᑦ ᐊᖏᕐᕋᖃᙱᓐᓂᖅ/ᐅᕙᑦᑎᖃᙱᓐᓂᖅ ᐱᒻᒪᕆᐊᓘᓪᓗᓂ ᐱᔾᔪᑕᐅᕙᖕᓂᐊᓂᒃ, ᐊᒻᒪᓗ ᑎᑎᕋᕆᐊᖃᕋᑦᑕ ᓱᓕᔪᓂᒃ ᖃᓄᐃᓕᖓᓂᐅᓪᓚᑦᑖᖅᑐᓂᒃ ᐊᖏᕐᕋᖃᙱᑦᑐᑦ ᐱᓪᓗᒋᑦ ᐃᓚᒋᔭᐅᖁᓪᓗᒋᑦ ᓂᐱᖏᑦ ᐊᒃᑐᖅᑕᐅᔪᑦ," ᐅᖃᖅᑐᖅ ᔩᓂ ᐅᒡᔪᒃ, ᒥᓂᔅᑕ ᐃᓄᓕᕆᔨᒃᑯᓐᓄᑦ. "ᐱᐅᓂᖅᓴᒃᑯᑦ ᐊᑐᐊᒐᕐᓂᒃ ᐊᒻᒪᓗ ᐱᓕᕆᐊᓂᒃ ᑕᑎᖃᕆᐊᖃᕋᑦᑕ ᑕᒪᐃᓐᓄᑦ ᓱᓕᔪᓄᑦ ᑎᑎᖅᑲᑎᒍᑦ. ᐊᒻᒪᓗ ᑐᑭᓯᓗᒍ ᐱᔾᔪᑕᐅᔪᑦ ᐃᓱᒪᒋᔭᐅᔪᑎᒍᑦ ᓄᓇᓕᖕᓂᑦ."
ᖃᐅᔨᓴᕐᓂᖅ ᐃᓚᖃᖅᑐᖅ ᐊᐱᖅᓱᖅᑕᐅᕙᒃᖢᑎᒃ ᓄᓇᓕᖕᓂ ᐱᓕᕆᖃᑕᐅᔪᑦ ᐱᓕᕆᕙᒃᑐᑦ ᐃᓄᑐᐊᓄᑦ ᐊᒻᒪᓗ ᐊᖏᕐᕋᖃᙱᑦᑐᓄᑦ/ᐅᕙᑦᑎᖃᙱᑦᑐᓄᑦ ᓄᓇᕘᒥ, ᐊᒻᒪᓗ ᑕᐃᒃᑯᐊ ᐱᔨᑦᑎᖅᓯᕙᒃᑐᑦ ᐊᖏᕐᕋᖃᙱᑦᑐᓂᒃ/ᐅᕙᑦᑎᖃᙱᑦᑐᓂᒃ ᓄᓇᓕᐅᔪᓂ, ᐱᖃᓯᐅᑎᓪᓗᒍ ᔭᓗᓇᐃᕝ.
ᖃᐅᔨᔭᐅᔪᑦ ᐊᖏᕐᕋᖃᙱᑦᑐᑦ ᓇᐃᓴᖅᑕᐅᔪᑦ ᐊᒻᒪᓗ ᐊᐱᖅᓱᖅᑕᐅᔪᑦ ᐱᐊᓂᒃᑕᐅᓯᒪᓕᕐᓂᐊᖅᑐᑦ ᐊᐃᕆᓕ 2014-ᒥ.
###
ᑐᓴᒐᒃᓴᒧᑦ ᖃᐅᔨᒋᐊᕐᕕᐅᔪᓐᓇᖅᑐᖅ:
ᐊᓐᑕᕇ ᐃᐸᓂᔅ ᑐᓴᒐᒃᓴᓕᕆᔨᒻᒪᕆᒃ ᐃᓄᓕᕆᔨᒃᑯᑦ
867-975-7821
