You are here
ᒥᓂᔅᑕᐃᑦ ᐃᓱᒪᑦᓴᖅᓯᐅᕈᑎᖃᖅᑐᑦ ᓯᕗᓪᓕᐅᔾᔭᐅᖁᓂᐊᖅᑕᒥᓂᒃ
ᐱᕙᓪᓕᐊᔪᖅ ᓴᖅᑭᑎᑕᐅᔪᖅ
ᓴᖅᑭᖅᑕᐅᑦᓴᐅᑎᒋᒋᐊᓕᒃ
ᒥᓂᔅᑕᐃᑦ ᐃᓱᒪᑦᓴᖅᓯᐅᕈᑎᖃᖅᑐᑦ ᓯᕗᓪᓕᐅᔾᔭᐅᖁᓂᐊᖅᑕᒥᓂᒃ
ᑰᒑᕐᔪᒃ, ᓄᓇᕗᑦ (ᕕᕝᕗᐊᓕ 7, 2014) - ᒥᓂᔅᑕᐃᑦ ᑲᑎᒪᔨᖏᑦ ᑲᑎᓚᐅᖅᑐᑦ ᑰᒑᕐᔪᒻᒥ ᐅᓪᓗᓂᒃ ᐱᖓᓱᓂᒃ ᐋᖅᑭᑦᓱᐃᓪᓗᑎᒃ ᑐᙵᕕᒋᓂᐊᖅᑕᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᓯᑕᒪᖓᓐᓂ ᓂᕈᐊᖅᑕᐅᓯᒪᔪᑦ ᑐᕌᒐᕆᓂᐊᖅᑕᖏᓐᓂᒃ.
"ᑐᕌᒐᖃᑦᓯᐊᖅᑐᑕ ᐱᓕᕆᔾᔪᓯᖃᕐᓂᐊᖅᑐᒍᑦ ᐱᔾᔪᑎᖃᕐᓗᑎᒃ ᐱᒻᒪᕆᐅᓂᖅᐹᓂᒃ ᐱᐅᓯᕚᓪᓕᖅᑕᐅᒍᓐᓇᖁᓪᓗᒋᑦ ᐃᓅᓯᕆᔭᖏᑦ ᓄᓇᕗᒻᒥᐅᑦ," ᐅᖃᖅᓯᒪᔪᖅ ᓯᕗᓕᖅᑎ ᑕᑉᑑᓇ. "ᓴᖅᑭᖅᓯᓂᐊᖅᑐᒍᑦ ᒪᓕᒐᓕᐅᖅᑎᐅᖃᑎᑦᑎᓐᓄᑦ ᑐᕌᒐᕐᓂᒃ ᑐᙵᕕᖃᕐᓗᑎᒃ ᑲᔪᓯᑦᓯᐊᕈᑕᐅᓯᒪᔪᓂᒃ ᓴᙱᓕᖅᐹᓪᓕᖅᑎᑦᓯᒍᑕᐅᓂᐊᖅᑐᓂᓪᓗ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ ᐊᐅᓚᑦᓯᖃᑦᑕᕐᓂᕐᒥᒃ."
ᒥᓂᔅᑕᐃᑦ ᑲᑎᒪᔨᖏᑦ ᑕᑯᒍᒪᔪᑦ ᐃᓕᓐᓂᐊᖅᑐᓕᕆᓂᕐᒥᒃ ᐱᓕᒻᒪᑦᓴᐃᖃᑦᑕᓂᕐᒥᓪᓗ ᓄᓇᕗᒻᒥᐅᓂᒃ ᐱᕚᓪᓕᕈᑎᖃᕈᓐᓇᖁᓪᓗᒋᑦ ᑮᓇᐅᔭᓕᐅᕈᑎᖃᕈᓐᓇᓂᕐᒧᑦ ᐃᖅᑲᓇᐃᔮᖃᕈᓐᓇᓂᕐᒧᓪᓗ ᐅᓪᓗᒥ ᓯᕗᓂᑦᓴᑎᓐᓂᓗ; ᐃᑲᔪᖅᓱᕆᐊᖅᑕᐅᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓱᒪᓕᕆᓂᕐᒧᓪᓗ ᐃᓅᓯᖃᑦᓯᐊᕈᓐᓇᕐᓂᖏᖏᓐᓂᒃ; ᐱᕚᓪᓕᕈᑎᖃᕈᓐᓇᖁᓪᓗᒋᓪᓗ ᓇᖕᒥᓂᖅ ᒪᑭᑕᔪᓐᓇᖅᓯᓂᕐᒧᑦ.
"ᑲᒪᒋᔭᖃᕐᓂᖅ ᓯᕗᓪᓕᐅᑎᒍᒪᓂᐊᖅᑕᑦᑎᓐᓂᒃ ᑲᑐᔾᔨᖃᑎᒌᒍᑕᐅᒋᐊᖃᕐᓂᐊᖅᑐᑦ ᓵᑕᒃᓴᐅᒍᑎᖃᕐᓗᑎᓪᓗ ᒐᕙᒪᒃᑯᑦ ᐱᓕᕆᔾᔪᓯᖏᑎᒍᑦ," ᐅᖃᖅᓯᒪᔪᖅ ᑕᑉᑑᓇ. "ᑖᒃᑯᐊ ᑐᕌᒐᕆᓂᐊᖅᑕᕗᑦ ᐱᕙᓪᓕᐊᑎᑦᓯᒍᑕᐅᓂᐊᖅᑐᑦ ᑲᒪᒋᔭᖃᕐᓂᕐᒥᒃ ᓄᓇᕗᒻᒥ ᐊᑯᓂᐅᔪᒧᑦ ᐊᑦᓱᕉᑎᒋᔭᖏᓐᓂᒃ ᐱᕕᖃᕐᕕᒋᒍᓐᓇᖅᑕᖏᓐᓂᓪᓗ.
ᑭᖑᓪᓕᖅᐹᒥ ᓇᓗᓇᐃᖅᑕᐅᓛᖅᑐᖅ ᒐᕙᒪᒃᑯᑦ ᑐᕌᒐᖏᑦ ᐋᖅᑭᑦᑕᐅᓗᑎᒃ ᑐᓴᕆᐊᕐᕕᖃᓚᐅᖅᑎᓪᓗᒋᑦ ᒪᓕᒐᓕᐅᖅᑎᓕᒫᓂᒃ. ᒪᓕᒐᓕᐅᖅᑎᓕᒫᑦ ᐊᐅᓪᓚᖅᓯᒪᓗᑎᒃ ᑲᑎᒪᒋᐊᖅᑐᓛᖅᑐᑦ ᕕᕝᕗᐊᓕ 2014.
###
ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᖅᑕᐅᒍᓐᓇᖅᑐᖅ:
ᔮᔅᒦᓇ ᐱᐸ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
ᓯᕗᓕᖅᑎᐅᑉ ᐊᓪᓚᕝᕕᖓᓂ
ᓄᓇᕗᑦ ᒐᕙᒪᖓ
ᐅᖃᓘᑖ: 867-975-5059
ᐅᖄᓚᐅᑎᕋᓛᒃᑯᑦ: 867-222-0961
