ᐅᖃᓚᐅᑎᓯᐅᑏᑦ

You are here

ᓄᑖᙳᕆᐊᖅᓯᒪᔪᑦ ᐃᑭᓚᐅᖅᑐᒧᑦ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥ

ᒫᑦᓯ 23, 2021

ᐅᖃᐅᓯᐅᔪᖅ

ᓄᑖᙳᕆᐊᖅᓯᒪᔪᑦ ᐃᑭᓚᐅᖅᑐᒧᑦ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥ

ᐃᖃᓗᐃᑦ, ᓄᓇᕗᑦ (ᒫᑦᓯ 22, 2021) - ᒥᓂᔅᑕ ᒪᓕᒐᓕᕆᓂᕐᒧᑦ ᔪᐊᔾ ᕼᐃᒃᔅ ᐅᓪᓗᒥ ᐅᑯᓂᖓ ᐅᖃᐅᓯᒃᓴᓂᒃ ᓴᖅᑭᑎᑦᑎᓚᐅᖅᐳᖅ:

"ᐱᓕᕆᐊᖃᓯᑲᐅᑎᒋᓚᐅᕐᓂᖏᓐᓄᑦ ᐃᓂᒥ ᐃᖅᑲᓇᐃᔭᖅᑏᑦ ᓯᕗᓪᓕᖅᐹᐅᕙᒃᑐᓪᓗ ᐱᓕᕆᕙᒃᑐᑦ, ᑭᓇᑐᐃᓐᓇᑦᑎᐊᒥᒃ ᐃᓕᙵᒃᑐᖃᓚᐅᙱᓚᖅ ᐃᑭᑦᑐᖃᖅᑎᓐᓗᒍ ᑕᐃᑲᓂ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥ ᒫᑦᓯ 18, 2021−ᒥ.

ᑕᐃᒪᓐᓇ ᐱᓕᕆᔪᖅᑕᖃᓚᐅᖅᑎᓪᓗᒍ, ᑎᒍᔭᐅᓯᒪᔪᑦ ᐃᓂᑖᖅᑎᑕᐅᓚᐅᖅᐳᑦ ᐃᓂᒋᓚᐅᑲᕐᓂᐊᖅᑕᖏᓐᓂ ᐃᓂᓂ ᐃᑲᔪᖅᑐᖅᑕᐅᓪᓗᑎᒃ ᐸᓖᓯᒃᑯᓐᓂᑦ V−ᒥ ᐃᓂᓕᖕᓂᑦ, ᓄᓇᕗᒻᒥ ᐃᖅᑲᖅᑐᐃᕕᓕᕆᔩᑦ ᐸᓖᓯᖏᓐᓂᒃ ᐊᓯᖏᓐᓂᓗ ᑎᒍᔭᐅᓯᒪᕕᖕᒧᑦ ᐃᓂᒋᔭᐅᕙᒃᑐᓂ ᐃᖃᓗᖕᓂ.

24 ᐃᑲᕐᕋᐃᑦ ᐃᓗᐊᓂ, ᒪᓕᒐᓕᕆᔨᒃᑯᑦ ᓇᓂᓯᓚᐅᖅᐳᑦ ᓈᒻᒪᒃᑐᓂᒃ ᐃᓂᒋᔭᐅᓂᐊᓕᕐᒥᔪᓂᒃ ᑎᒍᔭᐅᓯᒪᔪᓄᑦ ᐃᓂᖃᕈᓐᓃᖅᑕᐅᔪᓄᑦ ᐃᑭᑦᑐᒥᑦ. ᐱᓕᕆᖃᑎᖃᕐᓂᑦᑎᓐᓄᑦ ᐱᓕᕆᖃᑎᒋᕙᒃᑕᑦᑎᓐᓂᒃ ᑎᒍᔭᐅᓯᒪᔪᓕᕆᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓂᑦ ᑲᓇᑕᒥᐅᓄᑦ, ᓅᑎᑦᑎᓯᒪᕗᒍᑦ 30−ᓂᒃ ᑎᒍᔭᐅᓯᒪᔪᓂᒃ ᐃᓂᒋᔭᐅᓂᐊᓕᖕᒥᔪᒧᑦ ᓇᓗᓇᐃᖅᑕᐅᓯᒪᔪᒧᑦ ᐅᕙᓂ, Joyceville ᑎᒍᔭᐅᓯᒪᕝᕕᖕᒥ ᑭᖕᔅᑕᓐ−ᒥ ᐱᓇᓱᐊᕈᓯᐅᓵᖅᑐᒥ ᓄᖑᓕᖅᑎᓪᓗᒍ. ᑕᐃᖕᓇ ᐃᓂ ᓄᕙᒡᔪᐊᕐᓇᖅ-19−ᖃᙱᓯᒪᕗᖅ ᕕᕗᐊᕆ 26, 2021−ᖑᓚᐅᕐᓂᖓᓂᑦ. ᐊᒥᐊᒃᑯᐃᑦ 30 ᑎᒍᔭᐅᓯᒪᔪᑦ ᒫᒃᓇᒃᑯᑦ ᐊᓯᖏᓐᓂ ᑎᒍᔭᐅᓯᒪᕝᕕᖕᓃᑉᐳᑦ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ.

ᐃᓚᒋᔭᐅᔪᑦ ᑎᒍᔭᐅᓯᒪᔪᓄᑦ ᐱᑎᑕᐅᓂᐊᖅᐳᑦ ᓄᑖᙳᕆᐊᖅᓯᒪᒧᓂᒃ ᖃᐅᔨᒋᐊᕐᕕᖃᕐᓂᕐᒧᑦ ᑐᓴᖅᑕᐅᔪᒃᓴᓂᒃ ᑐᓴᕐᕕᒋᔪᒪᓗᒋᑦ ᓇᒡᓕᒋᔭᑎᒃ.

ᓱᕋᒃᓯᒪᔪᓕᕆᓂᕐᒧᑦ ᐱᓕᕆᔩᑦ ᖃᐅᔨᓴᖅᓯᕗᑦ ᓱᕋᒃᑐᒥᒃ ᑕᕝᕙᓂ ᐃᓂᒥ, ᐋᖅᑭᒃᓱᐃᕙᓪᓕᐊᓪᓗᑎᒡᓗ ᐋᖅᑭᒃᓯᒪᓕᖅᑎᑦᑎᒃᑲᓐᓂᕐᓂᕐᒧᑦ ᐱᕙᒌᔭᕈᑎᓂᒃ ᖃᐅᔨᒪᓕᕈᒪᓂᕐᒧᑦ ᖃᖓᒃᑰᕋᔭᕐᒪᖔᑦ ᒪᑐᐃᖅᑕᐅᒃᑲᓐᓂᕐᓂᕆᓛᖅᑕᖓ ᕿᑭᖅᑕᓗᖕᒥ ᐃᑲᔪᖅᑕᐅᕝᕕᒃ. ᑭᒃᑯᓕᒫᑦᑎᐊᑦ ᐱᓕᕆᖃᑕᐅᓯᒪᔪᑦ ᖁᔭᒋᔪᒪᕙᒃᑲ ᐃᑲᔪᕐᓂᖏᓐᓄᑦ ᐋᖅᑭᒃᓯᒪᓕᖅᑎᑦᑎᔪᒪᓪᓗᑎᒃ ᑕᒪᑐᒥᖓ ᖃᓄᐃᓕᐅᓂᕆᔭᐅᓕᖅᑐᒥᒃ, ᓇᓗᙱᑦᑎᐊᕈᒪᓂᕐᒧᓪᓗ ᖁᐊᖅᓵᕐᓇᖅᑐᒦᙱᒃᑲᓗᐊᕐᒪᖔᑕ ᖃᓄᐃᙱᑦᑎᐊᕈᓐᓴᕐᓗᑎᒡᓗ ᐃᖅᑲᓇᐃᔭᖅᑏᑦ ᑎᒍᔭᐅᓯᒪᔪᓪᓗ ᖃᖓᓕᒫᑦᑎᐊᒃᑯᑦ."

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᒫᒃ ᐅᐃᑦᔮᓂ
ᑐᑭᒧᐊᑦᑎᑦᑎᔨᐅᓚᐅᑲᒃᑐᖅ ᐊᑐᐊᒐᓕᕆᓂᕐᒧᑦ
ᐸᕐᓇᐃᓂᕐᒧᓪᓗ ᒪᓕᒐᓕᕆᔨᒃᑯᑦ
867-975-6346
MWitzaney@gov.nu.ca