ᓄᓇᕗᒻᒥ ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖓ ᓄᓇᓕᖕᓂ ᑐᖁᖓᔪᓕᕆᔨᒃᓴᓂᒃ ᕿᓂᓕᖅᐳᑦ

ᒐᕙᒪᒃᑯᓐᓂ ᐃᓄᖕᓄᑦ ᑐᓴᒐᒃᓴᖅ
ᓄᓇᕗᒻᒥ ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖓ ᓄᓇᓕᖕᓂ ᑐᖁᖓᔪᓕᕆᔨᒃᓴᓂᒃ ᕿᓂᓕᖅᐳᑦ

ᓄᓇᕘᒥ ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖓ ᐃᖅᑲᓇᐃᔭᖅᑎᒃᓴᓂᒃ ᕿᓂᖅᐸᓪᓕᐊᔪᑦ ᓄᓇᓕᖕᓂ ᑐᖁᖓᔪᓕᕆᔨᒃᓴᓂᒃ ᓄᓇᕘᓕᒫᒥ.

ᓄᓇᓕᖕᓂ ᑐᖁᖓᔪᓕᕆᔩᑦ ᐊᑐᐃᓐᓇᐅᑎᑦᑎᕙᒃᑐᑦ ᐱᔨᑦᑎᕋᐅᑎᓂᒃ ᐱᔭᕆᐊᖃᓕᕌᖓᑕ ᐊᑭᓕᖅᑕᐅᕙᒃᖢᑎᒡᓗ, ᐊᑕᐅᓯᐅᑦᑕᖅᖢᑎᒃ. ᖃᐅᑕᒫᑦ ᐃᖅᑲᓇᐃᔭᖃᑦᑕᔾᔮᙱᑦᑐᑦ. ᑐᖁᖓᔪᓕᕆᔩᑦ ᑲᒪᒋᔭᖃᕆᐊᓖᑦ ᑐᖁᖓᔪᓕᕆᔩᑦ ᐱᖁᖓ ᒪᓕᒃᖢᒍ ᐱᓕᕆᑦᑎᐊᕐᓗᑎᒃ, ᐃᓛᒃᑯᑦ ᖃᐅᔨᓴᖅᐸᒡᓗᑎᒃ ᑕᒪᐃᓐᓂᒃ ᑐᖁᑳᓪᓚᒃᑐᓂᒃ, ᓂᕆᐅᓇᙱᑦᑐᓂᑦ ᐊᒻᒪᓗ ᑐᑭᓯᐅᒪᔭᐅᙱᑦᑐᓂᒃ ᐃᓅᔪᓐᓃᖅᑐᓂᒃ. ᑐᖁᖓᔪᓕᕆᔨᒃᑯᓐᓂ ᖃᐅᔨᓴᖅᑎᑦ ᐃᓅᔪᓐᓃᖅᑐᓂᑦ ᓱᖁᑎᒃᓴᙱᑐᐃᓐᓇᖅᑎᑦᑎᕙᙱᓚᑦ, ᐃᔨᕋᖅᑑᑎᖃᖅᐸᙱᓚᑦ, ᓱᖁᑎᒋᔭᐅᙱᑐᐃᓐᓇᕐᓗᓂᓘᓐᓃᑦ. ᐅᓇ ᐱᔾᔪᑕᐅᓛᖑᔪᖅ ᑐᖁᖓᔪᓕᕆᔨᒃᑯᓐᓂ ᖃᐅᔨᓴᖅᑕᐅᖃᑦᑕᖅᑐᑦ ᓇᓗᓇᐃᖅᓯᖃᑦᑕᖁᓪᓗᒋᑦ ᐊᑦᑕᕐᓇᕈᑕᐅᔪᓐᓇᖅᑐᓂᑦ ᑕᐃᒪᓐᓇ ᐃᓅᔪᓐᓃᖅᑐᖃᒃᑲᓐᓂᖁᓇᒍ ᓯᕗᓂᒃᓴᑦᑎᓐᓂ.

ᐱᓇᔪᒃᑐᑦ ᐃᓕᓐᓂᐊᖅᓯᒪᓗᑎᒃ ᐅᕝᕙᓘᓐᓃᑦ ᐱᓕᕆᐊᖃᑦᑕᖅᓯᒪᓗᑎᒃ ᒪᓕᒐᓕᕆᓂᕐᒥᑦ, ᐋᓐᓂᐊᖅᑐᓕᕆᓂᕐᒥᑦ, ᐅᕝᕙᓘᓐᓃᑦ ᖃᐅᔨᓴᖅᑎᐅᖃᑦᑕᖅᓯᒪᓗᓂ ᐱᔪᒥᒋᔭᐅᓇᔭᖅᑐᖅ. ᑐᓴᐅᒪᑎᑦᑎᔪᓐᓇᑦᑎᐊᕐᓗᓂ, ᖃᐅᔨᓴᕈᓐᓇᑦᑎᐊᕐᓗᓂ, ᐅᖃᕈᓐᓇᕐᓗᓂᓗ ᑎᑎᕋᕈᓐᓇᕐᓗᓂᓗ ᖃᓪᓗᓈᑎᑐᑦ ᑎᑎᕋᖅᓯᒪᔪᓂᑦ ᓴᖅᑭᑎᑦᑎᔪᓐᓇᖁᓪᓗᒍ. ᖃᐅᔨᒪᒃᐸᑦ ᐃᓄᐃᑦ ᐅᖃᐅᓯᖓᓂᒃ, ᓄᓇᓕᖕᓂ, ᐃᓕᖅᑯᓯᖓᓂ, ᓄᓇᒥᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔫᑎᖃᕋᔭᖅᐳᖅ.

ᐱᓇᔪᒃᑐᑦ ᐱᓕᕆᖃᑦᑕᖅᓯᒪᔭᕆᐊᓖᑦ ᐃᓚᙵᖃᑦᑕᖅᑐᓂᑦ ᐃᓚᒌᓂᑦ ᐃᒃᐱᒍᓱᑦᑎᐊᕐᓗᓂ, ᐃᑲᔪᖅᑐᐃᔪᓐᓇᕐᓗᓂᓗ ᓯᕗᓕᖅᑎᐅᔪᓐᓇᕐᓗᓂ, ᑐᑭᒧᐊᒃᑎᑦᑎᔪᓐᓇᕐᓗᓂᓗ ᑐᓴᐅᒪᑎᑦᑎᔭᕆᐊᖃᕈᓂ ᑐᓴᐅᒪᑎᑦᑎᔪᓐᓇᕐᓗᓂ.

ᑐᖁᖓᔪᓕᕆᔨᒃᑯᑦ ᑎᑎᕋᕐᕕᖏᑦ ᐊᑐᐃᓐᓇᐅᑎᑦᑎᔪᑦ ᑕᒪᐃᓐᓂᒃ ᐃᓕᓐᓂᐊᕐᕕᐊᕈᓯᕐᒥᑦ ᐱᓕᒻᒪᒃᓴᕐᕕᖕᒥᓪᓗ ᓄᓇᓕᖕᓂ ᑐᖁᖓᔪᓕᕆᔨᓄᑦ. ᐃᖅᑲᓇᐃᔮᖅᑖᖅᑐᑦ ᐊᐅᓪᓚᑲᑕᒍᓐᓇᕆᐊᓕᑦ ᑐᖁᖓᔪᖃᕐᕕᖕᒧᑦ ᑐᖁᕝᕕᒋᔭᐅᔫᓪᓘᓐᓃᑦ ᐃᓂᖓᓄᑦ ᓯᓚ ᖃᓄᐃᑦᑑᒐᓗᐊᖅᐸᑦ ᖃᖓᑐᐃᓐᓇᕐᓗ.

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᓗᒍ ᑭᓐ ᓴᖓᑦᕌᑲ, ᑐᖁᖓᔪᓕᕆᔨᓄᑦ ᐊᐅᓚᑦᑎᔨᒻᒪᕆᒃ ᐅᕗᖓ 867-975-6562 ᐅᕝᕙᓘᓐᓃᑦ ksagadraca@gov.nu.ca.

###

ᑐᓴᒐᒃᓴᓕᕆᔨᑦ: 

ᐲᑕ ᕙᐅᒐ
ᐊᑐᐊᒐᓕᕆᓂᕐᒧᑦ ᑐᓴᒐᒃᓴᓕᕆᓂᕐᒧᓪᓗ ᕿᒥᕐᕈᔨ
ᒪᓕᒐᓕᕆᔨᒃᑯᑦ
867-975-6369
pvarga@gov.nu.ca