ᒥᓂᔅᑕ

ᒪᓕᒐᓕᐅᖅᑎ ᔪᐊᔾᔨ ᕼᐃᒃᔅ
ᒥᓂᔅᑕ ᑮᓇᐅᔭᓕᕆᓂᕐᒧᑦ

ᔪᐊᔾᔨ ᕼᐃᒃᔅ ᓯᕗᓪᓕᕐᒥᒃ ᓂᕈᐊᖅᑕᐅᓚᐅᖅᓯᒪᕗᖅ ᑭᒃᑯᑐᐃᓐᓇᐃᑦ ᓂᕈᐊᕐᓂᖃᖅᑎᓪᓗᒋᑦ ᐅᑐᐱᕆ 28, 2013−ᒥ, ᑭᒡᒐᖅᑐᐃᓂᐊᖅᖢᓂ ᑭᒡᒐᖅᑐᕐᕕᐅᔪᒥᒃ ᐆᒥᖓ, ᐃᖃᓗᐃᑦ−ᑕᓯᓗᒃ ᑎᓴᒪᒋᔭᖓᓂ ᒪᓕᒐᓕᐅᕐᕕᓕᕆᑎᓪᓗᒋᑦ ᓄᓇᕗᒻᒥᐅᓄᑦ . ᓂᕈᐊᖅᑕᐅᒃᑲᓐᓂᓚᐅᖅᐳᖅ ᑕᓪᓕᒪᖓᓄᑦ ᒪᓕᒐᓕᐅᕐᕕᓕᕆᓂᕐᒧᑦ ᓄᓇᕗᒻᒥᐅᓄᑦ ᐅᑐᐱᕆ 30, 2017−ᒥ. ᔫᓂ 14, 2018−ᖑᑎᓪᓗᒍ, ᒥᔅᑕ ᕼᐃᒃᔅ ᐱᓕᕆᐊᒃᓴᖃᓕᓚᐅᖅᐳᖅ ᒥᓂᔅᑕᕆᔭᐅᓂᐊᓕᖅᖢᓂ ᑮᓇᐅᔭᓕᕆᓂᕐᒧᑦ.

ᓄᕕᐱᕆ 2015−ᖑᑎᓪᓗᒍ, ᒥᓂᔅᑕᙳᖅᑎᑕᐅᓚᐅᖅᐳᖅ ᑲᒪᒋᔭᒃᓴᖃᖅᑎᑕᐅᓪᓗᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂᒃ, ᒥᓂᔅᑕᐅᓪᓗᓂᓗ ᑲᒪᒋᔭᒃᓴᖃᖅᑎᑕᐅᓪᓗᓂ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂᒃ. ᔫᓂ 2016−ᒥ ᒥᓂᔅᑕᙳᖅᑎᑕᐅᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᐅᓪᓗᓂᓗ ᑲᒪᒋᔭᒃᓴᖃᖅᑎᑕᐅᓪᓗᓂ ᐃᓅᓯᕐᒥᓂᒃ ᑭᐱᓯᑎᑦᑎᑦᑕᐃᓕᒪᓂᕐᒥᒃ.

ᓂᕈᐊᖅᑕᐅᓚᐅᖅᑳᕋᓂ, ᒥᔅᑕ ᕼᐃᒃᔅ ᖁᑦᑎᒃᑐᒦᓐᓂᖅᓴᓂᒃ ᐃᓂᖃᖅᑎᑕᐅᓚᐅᖅᐳᖅ ᓄᓇᕗᑦ ᒐᕙᒪᖓᑕ ᐱᕙᓪᓕᐊᔪᓕᕆᔨᒃᑯᖏᓐᓂᒃ ᐃᖏᕐᕋᔪᓕᕆᔨᒃᑯᖏᓐᓂᓗ, ᐃᓕᓐᓂᐊᕐᓂᓕᕆᔨᒃᑯᓐᓄᑦ ᖁᓪᓕ ᐊᐅᓚᔪᓐᓇᐅᑎᓕᕆᔨᒃᑯ ᑎᒥᖁᑖᓄᓪᓗ. ᒥᔅᑕ ᕼᐃᒃᔅ ᐱᓕᕆᐊᖃᓚᐅᕆᕗᖅ ᓯᕗᓕᖅᑎᓄᑦ ᐃᑲᔪᖅᑎᐅᓪᓗᓂ ᒥᓂᔅᑕᕆᔭᐅᔪᒧᑦ ᐃᓕᓐᓂᐊᕐᓂᓕᕆᓂᕐᒧᑦ.

ᐱᓕᕆᖃᑦᑕᖅᓯᒪᓂᑰᓂᖓ ᑮᓇᐅᔭᓕᕆᓂᕐᒧᑦ ᐊᑐᐊᒐᓕᕆᓂᕐᒧᑦ ᒐᕙᒪᓕᕆᓂᕐᒧᓪᓗ ᓴᖅᑭᑎᑦᑎᓯᒪᕗᖅ ᐋᖅᑭᒃᑎᐊᖅᓯᒪᔪᒥᒃ ᐊᔪᙱᓐᓂᖃᕐᓂᕐᒥᒃ ᐃᑲᔪᖅᓯᔪᓐᓇᕐᓂᕐᒥᒃ ᒪᓕᒐᓕᐅᖅᑎᐅᕝᕕᒋᔭᒥᓂᒃ ᐃᖃᓗᖕᒥᐅᓂᒃ ᓄᓇᕗᒻᒥᓗ ᐃᓄᖕᓂᒃ.  

ᒥᔅᑕ ᕼᐃᒃᔅ ᐃᓅᓚᐅᖅᓯᒪᕗᖅ ᑰᒡᔪᐊᕌᓗᖕᒥ, ᒪᓂᑑᐸᒥ ᐃᓕᓐᓂᐊᓚᐅᖅᓯᒪᓪᓗᓂᓗ ᐅᕙᓂ, Red River ᓯᓚᑦᑐᖅᓴᕐᕕᖕᒥ ᐅᐃᓂᐹᒡᒥ. ᐃᖃᓗᐃᑦ ᐊᖏᕐᕋᖅᑖᕆᓚᐅᙱᓐᓂᕐᒥᓂᐅᒃ 2004−ᒥ, ᒥᔅᑕ ᕼᐃᒃᔅ ᓴᓇᓚᐅᖅᓯᒪᕗᖅ ᑮᓇᐅᔭᒃᑯᕕᖕᒥ ᐱᓕᕆᓂᕆᔭᐅᕙᒃᑐᓂ ᓇᖕᒥᓂᕆᔭᒥᓂᒡᓗ ᒥᑭᑦᑐᒥ ᓴᓇᕝᕕᐅᕙᒃᑐᒥᒃ ᓇᖕᒥᓂᖃᖅᖢᓂ ᑖᒻᓴᓐ, ᒪᓂᑑᐸᒥ.

ᒥᔅᑕ ᕼᐃᒃᔅ ᐊᑭᓕᖅᓱᖅᑕᐅᙱᖦᖢᓂ ᖃᑦᑎᕆᔨᐅᖃᑦᑕᖅᓯᒪᕗᖅ, ᐅᓇᑕᖅᑐᒃᓴᙳᐊᖑᖃᑕᐅᓯᒪᓪᓗᓂ ᒪᒃᑯᒃᑐᓄᓪᓗ ᕼᐋᑭᖅᑎᓄᑦ ᑲᒪᔨᒋᔭᐅᓯᒪᓪᓗᓂ.

ᔪᐊᔾᔨ ᐊᐃᐸᖓᓗ, ᓯᒡᓂ, ᐱᖓᓱᓂᒃ ᕿᑐᕐᙵᖃᖅᐳᒃ. ᕼᐆᑉ, ᓕᓕ (ᐱᐅᖕᐊᔅᓗᒃ) ᐊᒻᒪᓗ ᓴᐃᕋ (ᐳᑐᒍᖅ) ᒥᔅᑕ ᕼᐃᒃᔅ ᓇᖕᒥᓂᖅ ᐱᓕᕆᔪᒪᕙᒃᑕᖏᑦ ᐅᑯᐊᖑᕗᑦ, ᐊᖑᓴᓱᖕᓂᖅ, ᐃᖃᓗᒐᓱᖕᓂᑦ ᐊᓇᐅᓕᒑᕐᓂᕐᓗ ᐊᕐᓴᑯᓗᖕᓂᒃ.