ᐅᖃᓚᐅᑎᓯᐅᑏᑦ

You are here

ᐃᖃᓗᐃᑦ ᐱᐊᓂᒃ ᕙᐃᓂᓂᒡᓗ ᓂᐅᕕᕐᕕᒃ ᐅᒃᑯᐃᖓᐃᓐᓇᖕᓂᐊᓕᕐᑐᖅ

ᔫᓂ 22, 2020

ᐱᕙᓪᓕᐊᔪᖅ ᓴᖅᑭᑎᑕᐅᔪᖅ

ᐃᖃᓗᐃᑦ ᐱᐊᓂᒃ ᕙᐃᓂᓂᒡᓗ ᓂᐅᕕᕐᕕᒃ ᐅᒃᑯᐃᖓᐃᓐᓇᖕᓂᐊᓕᕐᑐᖅ

ᐃᖃᓗᐃᑦ, ᓄᓇᕗᑦ (ᔫᓐ 22, 2020) – ᒥᓂᔅᑕ ᑮᓇᐅᔭᓕᕆᔨᒃᑯᓐᓄᑦ ᔪᐊᔾ ᕼᐃᒃᔅ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᐃᓱᒪᓕᐊᖑᓚᐅᕐᑐᒥᑦ ᐅᒃᑯᐃᖓᐃᓐᓇᖕᓂᐊᓕᕐᓗᓂ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᓱᕐᕋᓐᓇᖅᑐᓕᕆᓂᕐᒧᓪᓗ ᑲᑎᒪᔨᖏᑦ ᐃᖃᓗᖕᓂᑦ ᓂᐅᕕᕐᕕᐊᓂᑦ ᑕᐃᒪᙵᓕᒫᖑᓕᕐᓗᓂ. ᓂᐅᕕᕐᕕᒃ ᐅᒃᑯᐃᕐᖓᖅᑕᐅᓚᐅᕐᐳᖅ 2017 ᐊᕐᕌᒍᓄᑦ−ᐱᖓᓱᓄᑦ ᐆᒃᑑᑕᐅᓪᓗᓂ.

“ᑐᕌᒐᕆᔭᐅᔪᖅ ᐅᒃᑯᐃᕐᓯᓂᖕᒧᑦ ᐃᖃᓗᖕᓂᑦ ᐱᐊᓂᑦ ᕙᐃᓂᓂᒡᓗ ᓂᐅᕕᕐᕕᖕᒥᑦ ᐃᒥᐊᓗᓗᐊᖅᑕᐃᓕᒪᑎᓪᑎᓪᓗᑎᒃ ᓴᙱᓂᕐᓴᓂᑦ, ᐃᒥᑦᑎᐊᖃᑦᑕᖁᔭᐅᓪᓗᑎᒃ ᓄᖅᑲᖅᑎᑕᐅᓇᓱᒡᖢᓂᓗ ᐃᒥᐊᓗᖕᒥᑦ ᓂᐅᕕᐊᒃᓴᖃᓲᑦ,” ᐅᖃᖅᑐᕕᓂᑦ ᒥᓂᔅᑕ ᕼᐃᒃᔅ. “ᐃᓱᒪᓕᐊᖑᓚᐅᕐᑐᖅ ᓂᐅᕕᕐᕕᒃ ᐅᒃᑯᐃᖓᐃᓐᓇᖁᔭᐅᓕᕐᖢᓂ ᓯᕗᒧᐊᒍᑎᒌᓐᓇᖕᓂᐊᕐᐸᕗᑦ ᐊᑯᓂᐅᔪᒧᑦ−ᐋᓐᓂᕈᑕᐅᕙᒃᑐᖃᖁᓇᒍ.”

ᑐᑭᓯᑦᑎᐊᕋᓱᒡᓗᒍ ᐊᒃᑐᐃᓂᕆᓚᐅᕐᑕᖓ ᓂᐅᕕᕐᕕᐅᑉ, ᓄᓇᕗᒻᒥᑦ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᒪᕐᕉᖕᓂᒃ ᖃᐅᔨᓴᓚᐅᕐᐳᑦ – ᐊᑕᐅᓯᖅ 2018−ᒥᑦ ᐱᖃᑖᓂᒡᓗ 2020−ᒥᑦ. 2020−ᒥᑦ ᖃᐅᔨᓴᕈᑕᐅᓚᐅᕐᑐᑦ ᓴᖅᑭᑦᑎᓚᐅᕐᐳᑦ:

  • 75 ᐳᓴᓐᑎᑦ ᑭᐅᓚᐅᕐᑐᑦ ᐃᑲᔪᖅᑐᐃᔪᑦ ᓂᐅᕕᕐᕕᒃ ᐅᒃᑯᐃᖓᓗᓂ.
  • ᐅᒃᑯᐃᓚᐅᕐᑎᓪᓗᒍ ᓂᐅᕕᕐᕕᒃ, 37 ᐳᓴᓐᑎᑦ ᐃᓄᐃᑦ ᐅᖃᓚᐅᕐᐳᑦ ᐊᒥᓗᐊᙱᓐᓂᕐᓴᐅᓕᖕᓂᕋᖅᖢᑎᒃ ᑖᒃᑯᐊᓗ 15 ᐳᓴᓐᑎᑦ ᐅᖃᓚᐅᕐᖢᑎᒃ ᐃᒥᕐᓂᕐᓴᒻᒪᕆᐅᓕᖕᒪᑕᒎᖅ.
  • ᐊᒥᓲᔪᓐᓃᖅᐹᓪᓕᕐᑐᑦ ᐃᓄᐃᑦ (ᐃᒻᒪᖄ 67 ᐳᓴᓐᑎᒥᑦ ᐊᒥᓲᙱᓐᓂᕐᓴᐃᑦ) ᓂᐅᕕᖃᑦᑕᕐᑐᑦ ᐃᒥᐊᓗᖕᓂᑦ ᓂᐅᕕᐊᒃᓴᖃᓲᓂᑦ ᓂᐅᕕᕐᕕᒃ ᐅᒃᑯᐃᓚᐅᕐᑎᓪᓗᒍ.
  • ᑭᐅᔪᑦ ᐊᒥᓱᑦ (80 ᐳᓴᓐᑎ) ᐊᔾᔨᓪᓗᐊᑕᖓᓂᑦ ᑮᓇᐅᔭᓂᑦ ᐊᑐᓲᑦ ᑐᖔᓂᒡᓘᓐᓃᑦ ᐊᑐᓲᑦ ᐃᒥᐊᓗᖕᒥᑦ ᓂᐅᕕᕐᕕᒃ ᐅᒃᑯᐃᓚᐅᕐᑎᓐᓇᒍ.

2020 ᓄᓇᕗᒻᒪᑦ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗ ᖃᐅᔨᓴᕈᑎᑭ ᐃᖃᓗᖕᓂᓪᓗ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗᑦ ᓂᐅᕕᕐᕕᐊ ᐆᒃᑑᑕᐅᔪᖅ ᖃᐅᔨᓴᕈᑖᑕ ᐅᓂᒃᑳᖓ ᐊᑐᐃᓐᓇᐅᕗᖅ ᑮᓇᐅᔭᓕᕆᔨᒃᑯᑦ ᐃᑭᐊᖅᑭᕕᐊᓂᑦ https://gov.nu.ca/iu/kiinaujalirijikkut/information/iqalungni-imialuktaa....

ᓄᓇᕗᒻᒥᑦ ᐃᒥᐊᓗᓕᕆᔨᒃᑯᑦ ᓱᕐᕋᖕᓇᖅᑐᓕᕆᔨᒃᑯᓪᓗᑦ ᐊᑐᓚᐅᕐᑐᑦ $500K ᐊᕐᕌᒍᒧᑦ ᐊᑕᐅᓯᖕᒧᑦ ᐃᓄᖕᓄᑦ ᑲᒪᑦᑎᐊᖕᓂᖕᒧᑦ ᐱᓕᕆᐊᓄᑦ ᑐᓴᕐᓴᐅᑎᑦᑎᑲᑕᖕᓂᒃᑯᓪᓗ. ᑐᑭᓯᒋᐊᒃᑲᓐᓂᕈᒪᔪᓄᑦ ᓄᓇᕗᑦ ᒐᕙᒪᒃᑯᖏᑦᑕ ᐃᒥᑦᑎᐊᖕᓂᖕᒧᑦ ᐅᔾᔨᖅᓱᖅᑕ, responsiblenunavut@gov.nu.ca−ᒧᑦ ᐅᕝᕙᓘᓐᓃᑦ ujjiqsuqta@gov.nu.ca−ᒧᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᐅᐃᓯᓐ ᓵᓐ
ᐊᐅᓚᑦᑎᔨ, ᑐᓴᒐᒃᓴᓕᕆᔨᒃᑯᓐᓄᑦ
ᑮᓇᐅᔭᓕᕆᔨᒃᑯᑦ
867-975-6818
FinanceComs@gov.nu.ca