ᐅᖃᓚᐅᑎᓯᐅᑏᑦ

You are here

ᑲᑎᒪᔩᑦ

 

ᐊᒡᒍᖅᓯᒪᓂᖓ 3(2) ᑖᒃᑯᓇᖓᑦ ᐃᒥᐊᓗᓕᕆᓂᕐᒧᑦ ᐱᖁᔭᕐᓂᒃᐱᕕᖃᑦᑎᑦᑎᓲᑦ ᐊᕐᕕᓂᓖᑦ ᑎᓴᒪᓂᒃ (9) ᑲᑎᒪᔨᓂᒃ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᐱᔪᓐᓇᐅᑎᑖᖅᑎᑦᑎᓂᕐᒧᑦ ᑲᑎᒪᔩᑦ, ᑎᒃᑯᐊᖅᑕᐅᓯᒪᔪᓂ ᒥᓂᔅᑕᒧᑦ. 

ᒫᓐᓇᐅᔪᖅ ᑕᓪᓕᒪᐅᔪᑦ (5) ᑐᑭᒧᐊᒃᑎᑦᑎᔩᑦ ᑲᑎᒪᔨᓂ, ᐃᓚᒋᓪᓗᒍ ᐃᒃᓯᕙᐅᑕᖅ. ᖃᐅᔨᒋᐊᕐᕕᒋᔪᒪᒍᕕᒋᑦ ᑲᑎᒪᔩᑦ ᐊᐅᓚᑦᑎᔨᐅᓪᓗᑎᒃ, ᐃᕐᖐᓈᖅᑐᐊᒃᑯᑦ nlcb@gov.nu.ca.


ᑎᐅᕆ ᑖᐱᓐ (ᐃᒃᓯᕙᐅᑕᖅ)

ᓄᓇᕗᒻᒥᐅᑕᐅᔪᖅ ᐊᕙᑎᓄᑦ (20) ᐊᕐᕌᒍᓄᑦ, ᑎᐅᕆ ᐊᑐᕐᓂᖃᖅᐳᖅ ᓴᙱᓂᖃᖅᑐᒥ ᓄᓇᓕᖕᓂ ᐊᖏᖅᓯᒪᓂᖃᖅᑐᖅ NLLB-ᒧᑦ. ᐃᖃᓗᐃᑦ ᓄᓇᓕᐸᐅᔭᖓᓂ ᑲᑎᒪᔨᐅᓂᑯ, ᑎᐅᕆ ᐱᔨᑦᑎᕋᖅᓯᒪᔪᖅ ᑕᒪᐃᓐᓂ ᐃᖃᓗᐃᑦ ᓄᓇᓕᐸᐅᔭᖓᓂ ᐊᒻᒪ ᓄᓇᕗᑦ ᒐᕙᒪᖓᑦᑕ ᑲᑎᒪᔨᕋᓛᖏᓐᓂ. ᐃᒃᓯᕙᐅᑕᕐᒧ ᑐᒡᓕᕆᔭᐅᓚᐅᖅᑐᖅ ᓄᓇᓕᐸᐅᔭᐅᑉ ᐱᕙᓪᓕᐊᔪᓕᕆᓂᕐᒧᑦ ᑲᒪᔨᕋᓛᖏᓐᓂᑦ ᐱᕙᓪᓕᐊᑎᑦᑎᓇᓱᐊᖅᐸᒃᑐᓂᑦ ᐃᖃᓗᐃᑦ ᓄᓇᓕᖓᓂ ᐱᕙᓪᓕᐊᔪᓕᕆᓂᕐᒧᑦ ᐱᕙᒌᔭᐅᑎᖓᓂ ᐊᒻᒪ ᓴᖅᑭᑕᐅᓵᓚᐅᖅᑐᖅ ᓄᓇᓕᐸᐅᔭᐅᑉ ᐅᐸᓗᖓᐃᔭᖅᓯᒪᔪᖅ ᐱᕙᒌᔭᐅᑎᖓᓂ. ᑲᒪᒋᔭᖃᓚᐅᖅᑐᖅ ᒪᕐᕉᖕᓂ ᑲᑎᒪᔨᐅᕝᕕᖃᖅᑎᓪᓗᒍ ᐱᐅᓯᕚᓪᓕᖅᑎᑦᑎᓚᐅᖅᑐᖅ ᓄᓇᓕᐸᐅᔭᒥ ᓄᓇᓖᑦ ᒪᑭᒪᔾᔪᑎᖏᓐᓂᒃ ᑲᒪᒋᔭᖃᖅᖢᓂᓗ ᐃᒡᓗᑭᒃᓴᕐᓂᕐᒧᑦ ᐃᓱᒫᓗᑕᐅᕙᒃᑐᓂᒃ.

ᓄᓇᓕᖕᓂ ᐱᓕᕆᐊᕆᔭᕆᐊᖃᖅᑕᖏᓐᓂᒃ, ᓄᒃᑕᖃᑦᑕᖅᓯᒪᓪᓗᓂ ᓄᓇᕘᑉ ᕿᑭᖅᑖᓗᐊᓄᑦ, ᕿᑎᕐᒥᐅᑦ ᐊᒻᒪ ᑭᕙᓪᓕᖅ ᐊᕕᒃᑐᖅᓯᒪᓂᖏᓐᓄᑦ, ᑎᐅᕆ ᑐᑭᓯᐅᒪᓂᖃᑦᑎᐊᖅᑐᖅ ᓄᓇᓕᖕᒥᐅᑦ ᓄᓇᓕᖕᓂ  ᐊᒃᓱᕈᕐᓇᖅᑐᓂᒃ ᖃᓄᖅᑑᕈᑎᒃᓴᓂᒡᓗ ᐊᒃᑐᐊᓂᖃᖅᑐᓄᑦ ᑲᒪᒋᔭᖃᑦᑎᐊᕐᓂᕐᒥᒃ ᓄᓇᓕᖕᓂ ᐱᕙᓪᓕᐊᑎᑦᑎᓂᕐᒥᒃ. ᓄᓇᑦᑎᐊᕐᒥᑦ ᓄᓇᕗᒻᒥᓪᓗ ᐅᔭᕋᖕᓂᐊᕐᕕᓕᕆᔨᖕᓂ ᐃᓚᐅᓚᐅᙱᑎᓪᓗᒍ, ᐃᖅᑲᓇᐃᔭᓚᐅᖅᓯᒪᔪᖅ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᓐᓂᑦ ᐃᖃᓗᖕᓂ. ᐊᒻᒪᐃᓛᒃ, ᑎᐅᕆ ᓇᖕᒥᓂᖃᖅᑐᖅ ᐊᐅᓚᑦᑎᓪᓗᓂᓗ ᓇᖕᒥᓂᖁᑎᕋᓛᖓᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᐅᔫᑉ ᓄᓇᓕᐸᐅᔭᖓᓂ.

ᑎᐅᕆ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᕈᑎᑖᖅᓯᒪᔪᖅ ᓯᓚᑦᑐᖅᓴᕐᕕᒡᔪᐊᕐᒥ ᓂᐅ ᐳᕋᓐᓱᐃᒃᒥᐅᓄᑦ (New Brunswick) ᕗᕆᑐᕆᒃᑕᓐᒥᐅᓄᓪᓗ (Fredericton), ᓂᐅ ᐳᕋᓐᓱᐃᒃᒥ, ᐃᓱᓕᑦᑎᓂᕐᒧᑦ ᐃᓕᓴᕆᔭᐅᔪᖅᖃᖅᖢᓂ ᐃᓄᓕᕆᓂᕐᒥᒃ Chaplain ᐊᕕᒃᑐᖅᓯᒪᓂᐅᔪᓂ ᓯᓚᑦᑐᖅᓴᕐᕕᖕᒥ Lennoxville−ᒥ,  Québec-ᒥ, ᐊᒻᒪ ᒪᓕᒐᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᐃᓱᓕᑦᑎᓂᕐᒧᑦ ᐃᓕᓴᕆᔭᐅᔾᔪᑎᑖᖅᓯᒪᓪᓗᓂ Academy ᑲᓇᑕᒥ Corner Brook, ᓂᐅᕙᓐᓛᓐᒥ (Newfoundland). ᐊᓕᐊᓇᐃᒋᔭᖃᕐᒥᔪᖅ ᐃᖃᓗᒐᓱᖕᓂᕐᒥᒃ, ᑯᑭᑦᑕᐹᕐᓂᕐᒥᒃ ᕼᐋᑭᕐᓂᕐᒥᒡᓗ.

 

ᓖᓴ ᓴᐅᓪᓗᐊᐱᒃ

ᓖᓴ ᐱᕈᖅᓴᔭᐅᓚᐅᖅᑐᖅ ᐸᖕᓂᖅᑑᖅ, ᓄᓇᕗᒻᒥ, ᑭᓯᐊᓂ ᒫᓐᓇ ᓄᓇᖃᓕᖅᑐᖅ ᐃᖃᓗᖕᓂ.

2000-ᒥ, ᓖᓴ ᐃᖅᑲᓇᐃᔭᓕᓚᐅᖅᓯᒪᔪᖅ ᓄᓇᕗᑦ ᒐᕙᒪᖓᓐᓄᑦ. ᑕᐃᒪᖓᓂᑦ ᐃᓚᐅᓕᓚᐅᖅᑎᓪᓗᒍ ᓄᓇᕗᑦ ᒐᕙᒪᖓᓐᓄᑦ, ᓖᓴ ᐱᔨᑦᑎᕋᖅᑎᐅᓚᐅᖅᑐᖅ ᐊᐅᓚᖃᑦᑕᖅᑐᓕᕆᔨᓂᑦ, ᐃᖅᑲᓇᐃᔭᖅᑎᓂᑦ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᐊᖃᓪᓗᐊᑕᖅᐸᒃᖢᓂ ᐊᒻᒪ ᑮᓇᐅᔭᓕᕆᔨᐅᓪᓗᓂ ᐋᓐᓂᐊᖃᙱᑦᑐᓕᕆᔨᒃᑯᓐᓄᑦ ᐃᓄᓕᕆᔨᒃᑯᓐᓄᓪᓗ ᐃᖃᓗᖕᓂ, ᓄᒃᑎᖅᑕᐅᓪᓗᓂᓗ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᕿᑭᖅᑕᓂ ᐃᓕᓐᓂᐊᕐᕕᓕᕆᔨᖏᑦ ᒥᑦᑎᒪᑕᓕᖕᒥ.  ᒫᓐᓇ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐃᖅᑲᓇᐃᔭᓕᖅᑐᖅ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᓄᒃᑕᖅᑎᐅᓪᓗᓂ ᐊᒻᒪ ᓄᖅᑲᖓᓂᐊᖅᑐᓄᑦ ᐊᒻᒪ ᑎᑎᕋᕐᕕᓕᕆᓂᕐᒧᑦ.

ᒥᑦᑎᒪᑕᓕᖕᒥ, ᓖᓴ ᐃᓚᒋᔭᐅᓚᐅᖅᑐᖅ ᕼᐋᒻᒪᓚᒃᑯᑦ ᑲᑎᒪᔨᖏᓐᓂᒃ ᐊᒻᒪ ᐋᓐᓂᐊᖃᙱᑦᑐᓕᕆᔨᒃᑯᑦ ᐃᓄᓕᕆᔨᒃᑯᓪᓗ ᑲᑎᒪᔨᕋᓛᖏᓐᓂᒃ, ᓇᐅᑦᑎᖅᓱᖅᐸᒃᖢᓂ ᐊᖏᕈᑎᖃᖅᐸᒃᖢᓂᓗ ᐃᒥᐊᓗᖕᓂ ᑐᒃᓯᕋᐅᑎᓂᒃ ᓄᓇᓕᖕᓄᑦ.

ᓖᓴ ᑎᒃᑯᐊᖅᑕᐅᓚᐅᖅᑐᖅ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᐱᔪᓐᓇᐅᑎᑖᖅᑎᑦᑎᓂᕐᒧᑦ ᑲᑎᒪᔨᓂᒃ ᑎᓯᐱᕆ 2007-ᒥ, ᒫᓐᓇᐅᔪᕐᓗ ᑕᓪᓕᒪᖓᓂ ᑲᑎᒪᔨᐅᕝᕕᖃᓕᖅᑐᖅ.

 

ᕿᓪᓚᖅ ᑯᓱᒐᒃ

ᕿᓪᓚᖅ ᑯᓱᒐᒃ, ᑎᒃᑯᐊᖅᑕᐅᓚᐅᖅᑐᖅ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᐱᔪᓐᓇᐅᑎᑖᖅᑎᑦᑎᓂᕐᒧᑦ ᑲᑎᒪᔨᓂᒃ 2017-ᒥ, ᒫᓐᓇᐅᔪᖅ ᓄᓇᖃᖅᑐᖅ ᐃᖃᓗᖕᓂ, ᑭᓯᐊᓂ ᐱᕈᖅᓴᓯᒪᔪᖅ ᑲᖏᖅᖠᓂᕐᒥ. ᕿᓪᓚᖅ ᑐᑭᒧᐊᒃᑎᑦᑎᔨᐅᓚᐅᖅᑐᖅ ᓴᖅᑭᑕᐅᑎᓪᓗᒍ ᓄᓇᕗᑦ ᑐᙵᕕᒃ ᑎᒥᖓ ᑕᐃᒪᖓᓂᑦ 2015-ᒥ, ᐃᖅᑲᓇᐃᔮᖃᖅᓯᒪᓂᑰᓪᓗᓂᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᓂ, ᓄᓇᕗᑦ ᒐᕙᒪᖓᓐᓂ ᐊᒻᒪ ᓄᓇᕗᑦ ᐸᕐᓇᐃᔨᖏᑕ ᑲᑎᒪᔨᖏᓐᓂ.

ᕿᓪᓚᖅ ᑲᑎᒪᔨᐅᖃᑕᐅᖃᑦᑕᖅᓯᒪᓂᑰᔪᖅ ᐊᕐᕌᒍᓄᑦ ᖁᓕᓪᓗ ᒪᕐᕉᒡᓗ (12), ᐃᓚᒋᓪᓗᒍ ᓄᓇᕗᒻᒥ ᐃᒪᓕᕆᔩᑦ ᑲᑎᒪᔨᖏᓐᓂᒃ, ᖃᕆᓴᐅᔭᑎᒍᑦ ᐱᕙᓪᓕᐊᔪᓕᕆᓂᕐᒧᑦ ᑲᑐᔾᔨᖃᑎᒌᖓᓂ ᐊᒻᒪ ᑭᕙᓪᓕᕐᒥᑦ ᐅᔭᕋᒃᑕᕆᐊᕐᓂᕐᒧᑦ ᐊᔪᕈᓐᓃᖅᓴᖅᑎᑦᑎᓂᕐᒧᑦ ᑲᑐᔾᔨᖃᑎᒌᖏᓐᓂᒃ. ᐃᖅᑲᓇᐃᔭᖃᑦᑕᕐᓂᑯᖏᑦ ᓄᓇᓕᖕᓂᓗ ᐱᓕᕆᖃᑦᑕᖅᓯᒪᓂᑯᖏᑦ ᐃᑲᔫᑎᖃᑦᑎᐊᖅᑐᑦ ᐊᑐᕐᓂᖃᑦᑎᐊᖅᑐᒃᑯᑦ ᑲᔪᓯᓂᖃᑦᑎᐊᖅᑐᒃᑯᓪᓗ ᑖᒃᑯᓇᖓᑦ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᐱᔪᓐᓇᐅᑎᑖᖅᑎᑦᑎᓂᕐᒧᑦ ᑲᑎᒪᔨᓂᒃ.

ᕿᓪᓚᖅ ᓄᓕᐊᖓᓗ ᑎᓃᔅ ᒪᕐᕉᖕᓂᒃ ᒪᒃᑯᒃᑑᖕᓂᒃ ᕿᑐᕐᖓᖃᖅᑑᒃ: ᐸᓂᖓ ᑏᓗ ᐊᒻᒪ ᐃᕐᓂᖓ ᑎᓕᓐ.  

 

ᒧᕌᓐᑕ ᐊᑖᑕᕼᐊᒃ

ᒧᕌᓐᑕ ᐊᑖᑕᕼᐊᒃ ᑐᑭᒧᐊᒃᑎᑦᑎᔨᐅᔪᖅ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᐱᔪᓐᓇᐅᑎᑖᖅᑎᑦᑎᓂᕐᒧᑦ ᑲᑎᒪᔨᓂᒃ ᑕᐃᒪᖓᓂᑦ ᐅᑐᐱᕆ 2017-ᒥ. ᐱᕈᖅᓴᔭᐅᓯᒪᔪᖅ ᖁᕐᓗᖅᑐᕐᒥ, ᒧᕌᓐᑕ ᐃᖅᑲᓇᐃᔮᓄᑦ ᐱᕚᓪᓕᖅᑎᑦᑎᔨᐅᔪᖅ ᓄᓇᓕᖕᒥ ᐊᕐᕌᒍᑦ ᐊᕐᕕᓂᓖᑦ ᒪᕐᕉᖕᓂ (7) ᐅᖓᑖᓂᑦ ᐊᒻᒪ ᒫᓐᓇ ᐊᑭᓕᖅᓱᖅᑕᐅᙱᒃᑲᓗᐊᖅᖢᓂ ᐃᑲᔪᖅᑎᐅᖃᑕᐅᓲᖅ ᐊᔾᔨᒌᙱᕈᓘᔭᖅᑐᓄᑦ ᐱᓕᕆᐊᒃᓴᓄᑦ, ᐃᓚᒋᓪᓗᒍ ᓇᑦᑎᖅ ᖁᕕᐊᓱᖃᑎᒌᒃᑐᑦ ᐊᒻᒪ ᖁᕕᐊᓱᒡᕕᖕᒥ ᑲᑎᒪᔨᕋᓛᖑᖃᑕᐅᓪᓗᓂ. ᒧᕌᓐᑕ ᒫᓐᓇᐅᔪᖅ ᐱᔨᑦᑎᕋᖅᑐᖅ ᒪᐃᔭᐅᑉ ᑐᒡᓕᐊᓂ ᕼᐋᒻᒪᓚᒃᑯᑦ ᖁᕐᓗᖅᑑᕐᒥ. ᐃᓚᖏᑦ ᑲᑎᒪᔨᐅᑎᓪᓗᒍ ᐱᓕᕆᖃᑦᑕᕐᓂᑯᖏᑦ ᐃᓚᖃᖅᑐᑦ ᖁᕐᓗᖅᑐᕐᒥ ᐃᓕᓐᓂᐊᖅᑐᓕᕆᔨᒃᑯᑦ ᐊᒻᒪ ᖁᕐᓗᖅᑐᕐᒥ ᓄᓇᓕᖕᓂ ᐱᕙᒌᔭᕐᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ.

ᒧᕌᓐᑕᐅᑉ ᐃᓚᐅᓂᕆᓚᐅᖅᑕᖓ ᒪᒃᑯᒃᑐᓄᑦ ᑭᒡᒐᖅᑐᖅᑎᐅᓪᓗᓂ ᓄᓇᕗᒻᒥ ᐃᒥᐊᓗᓕᕆᓂᕐᒧᑦ ᐱᖁᔭᕐᒥ ᕿᒥᕐᕈᓂᕐᒧᑦ ᐱᔭᒃᓴᓂᒃ 2010-ᒥ 2012-ᒧ ᐱᓕᒻᒪᒃᓴᖅᑎᓪᓗᒍ ᖃᐅᔨᒪᓂᖃᖅᑎᓪᓗᒍᓗ ᐃᒥᐊᓗᓕᕆᓂᕐᒧᑦ ᐱᖁᔭᕐᒥᑦ, ᐱᒻᒪᕆᐅᓂᖃᖅᑐᒥ ᐃᑲᔫᑎᖃᕐᓂᕐᒧᑦ ᑲᑎᒪᔨᐅᖃᑕᐅᓪᓗᓂ ᓄᓇᕗᒻᒥ ᐃᒥᐊᓗᓕᕆᔨᒃᑯᑦ ᐱᔪᓐᓇᐅᑎᑖᖅᑎᑦᑎᓂᕐᒧᑦ ᑲᑎᒪᔨᓂᒃ.

 

ᐹᑉ ᔮᖕᒃ

ᐹᑉ ᔮᖕᒃ ᕿᑎᕐᒥᐅᑕᐅᔪᖅ 35 ᐊᕐᕌᒍᑦ ᐅᖓᑖᓄᑦ, ᐊᐅᓚᑦᑎᔨᒻᒪᕆᐅᓪᓗᓂᓗ ᓇᓄᖅ ᕿᔪᓕᕆᔨᓂᒃ ᐃᖃᓗᒃᑑᑦᑎᐊᒥ - ᐃᒡᓗᓕᐅᖅᑎ, ᑭᒃᑯᑐᐃᓐᓇᕐᓄ ᐊᖏᖃᑎᒌᒍᑎᒃᑰᖅᓯᒪᔪᓂ ᐊᒻᒪ ᐱᖁᑎᓂᒃ ᐊᐅᓚᑦᑎᓂᕐᒧᑦ ᐱᓕᕆᕝᕕᖕᒥ.

ᐹᑉ ᐊᑭᓕᖅᓱᖅᑕᐅᙱᒃᑲᓗᐊᖅᖢᓂ ᐃᑲᔪᖃᑦᑕᖅᓯᒪᔪᖅ ᐃᖃᓗᒃᑑᑦᑎᐊᒥ ᑕᐃᒪᖓᓂᑦ 1994-ᒥ, ᐃᓚᒋᓪᓗᒋᑦ ᖃᑦᑎᕆᔨᐅᖃᑕᐅᓂᖅ, ᕼᐋᑭᖅᑎᕋᓛᓂ ᑲᒪᔨᐅᓂᕐᒥᒃ, ᐊᒻᒪ ᐃᑲᔪᖅᓱᐃᓂᕐᒥᒃ ᑮᓇᐅᔭᓕᐅᕋᓱᐊᕐᓂᕐᒥᒡᓗ ᐅᓄᖅᑐᓂ ᐊᔾᔨᒌᙱᕈᓘᔭᖅᑐᓂ ᒪᒃᑯᒃᑐᓄᑦ ᓄᓇᓕᖕᓄᓪᓗ ᐱᓕᕆᐊᒃᓴᓂᒃ. ᓇᖕᒥᓂᕋᓛᖁᑎᖃᖅᖢᓂ ᐱᖁᑎᓂᒡᓗ ᓇᖕᒥᓂᖃᖅᖢᓂ, ᐹᑉ ᐊᑐᕐᓂᖃᖅᐳᖅ ᐱᒻᒪᕆᐅᔪᓂᒃ ᓇᖕᒥᓂᖃᕐᓂᕐᒧᑦ ᓄᓇᓕᖕᓄᓪᓗ ᐱᓕᕆᖃᑦᑕᖅᓯᒪᓂᑯᖏᓐᓂᒃ ᑲᑎᒪᔨᓄᑦ, ᐊᒻᒪ ᒪᐃ 2018-ᒥ ᑎᒃᑯᐊᖅᑕᐅᓚᐅᖅᖢᓂ ᐱᖃᑖᓂ ᑲᑎᒪᔨᐅᕝᕕᖕᒥᓂ.

ᐹᑉ ᐊᓕᐊᓇᐃᒋᔭᖏᑦ ᐃᓚᖃᖅᑐᑦ ᖃᑕᙳᑎᖏᓐᓃᖃᑎᖃᕐᓂᕐᒥᒃ, ᓯᓚᒥ ᐱᓕᕆᕈᓘᔭᕐᓂᕐᒥᒃ ᐊᒻᒪ ᕿᔪᓕᕆᓂᕐᒥᒃ.