ᐅᖃᓚᐅᑎᓯᐅᑏᑦ

You are here

ᐊᑐᐊᒐᓕᐅᖅᐸᓪᓕᐊᓂᕐᒧᑦ ᐃᓕᓐᓂᐊᒐᒃᓴᖅ

ᑭᓲᕙ ᐊᑐᐊᒐᓕᐅᖅᐸᓪᓕᐊᓂᕐᒧᑦ ᐃᓕᓐᓂᐊᒐᒃᓴᖅ?

ᓄᓇᕗᑦ ᒐᕙᒪᖓᓂ ᐊᑐᐊᒐᓕᐅᖅᐸᓪᓕᐊᓂᕐᒧᑦ ᐃᓕᓐᓂᐊᒐᒃᓴᖅ ᓇᓗᓇᐃᖅᑕᐅᓯᒪᓪᓗᓂ ᐃᖅᑲᓇᐃᔮᒧᑦ ᐃᓕᑉᐸᓪᓕᐊᓂᕐᒧᑦ ᐱᓕᕆᐊᖑᕗᖅ ᐃᓄᖕᓂᑦ ᐃᖅᑲᓇᐃᔭᖅᑎᓂᒃ ᐃᑲᔪᖅᑐᐃᓪᓗᓂ ᐊᒻᒪ ᐊᑐᐊᒐᓕᕆᔪᓐᓇᖅᓯᕙᓪᓕᐊᓗᑎᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ. ᐃᓄᐃᑦ ᐃᖅᑲᓇᐃᔭᖅᑎᑦ ᐊᑐᐊᒐᓕᕆᔨᐅᔪᑦ ᐅᓄᖅᓯᒋᐊᖅᑎᒃᑯᑎᒃ ᐃᑲᔪᖅᑐᐃᓕᕐᓂᐊᖅᐳᖅ ᐊᑐᐊᒐᐃᑦ ᐱᓕᕆᐊᒃᓴᐃᓪᓗ ᐱᕙᓪᓕᐊᑎᑕᐅᔪᑦ ᑲᔪᓯᑎᑕᐅᔪᓪᓗ ᐃᓄᐃᑦ ᐅᒃᐱᕆᔭᖏᓐᓂᒃ, ᐱᖅᑯᓯᖏᓐᓂᒃ, ᐱᒻᒪᕆᐅᒋᔭᖏᓐᓂᒃ ᐅᖃᐅᓯᖓᓂᒡᓗ ᒪᓕᒃᑐᓂᒃ.  ᐃᓕᓐᓂᐊᕈᑎᒃᓴᑦ ᐃᓄᐃᑦ ᐱᒻᒪᕆᐅᒋᔭᖏᓐᓂᒃ ᒪᓕᒃᐳᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᓕᕆᐊᒃᓴᖏᓐᓂᒃ, ᐋᖅᑭᒃᓯᒪᓂᖏᓐᓂᒃ ᐱᓕᕆᔾᔪᓯᖏᓐᓂᒡᓗ. ᑖᒃᑯᐊ ᐱᓕᕆᐊᖑᔪᑦ ᑲᑎᑎᑦᑎᕗᑦ ᐊᓯᔾᔨᖅᐸᓪᓕᐊᖏᓐᓇᓲᓂᒃ ᐊᒻᒪ ᐃᓚᐅᑎᑦᑎᔪᓂᒃ ᐃᓕᓐᓂᐊᒐᒃᓴᓂᒃ ᐅᓄᖅᑐᓂᒃ ᐱᓕᕆᐊᒃᓴᖃᖅᖢᑎᒃ, ᐅᖃᐅᓯᐅᔪᓐᓇᖅᑐᑦ ᐊᔪᕈᓐᓃᖅᓴᒐᒃᓴᐃᓪᓗ ᑐᕋᖓᔪᑦ ᐃᓚᐅᔪᑦ ᐊᑐᐊᒐᓕᕆᔪᓐᓇᖅᓯᕙᓪᓕᐊᖁᓪᓗᒋ ᐊᑐᐊᒐᓕᕆᔪᓐᓇᖅᓯᑦᑎᐊᕐᓗᑎᒡᓗ.

ᐋᖅᑭᒃᓯᒪᓂᖓ ᖃᓄᐃᓕᖓᕙ ᐊᑐᐊᒐᓕᐅᖅᐸᓪᓕᐊᓂᕐᒧᑦ ᐃᓕᓐᓂᐊᒐᒃᓴᖅ?

ᐊᑐᐊᒐᓕᐅᖅᐸᓪᓕᐊᓂᕐᒧᑦ ᐃᓕᓐᓂᐊᒐᒃᓴᐃᑦ ᐱᓕᒻᒪᒃᓴᐃᔾᔪᑕᐅᕙᒃᐳᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐱᖓᓱᓪᓗᑎᒃ ᐊᔾᔨᒌᙱᑦᑐᑦ (ᐃᓕᓐᓂᐊᒐᒃᓴᑦ):

  • ᐊᑐᐊᒐᑦ ᑐᙵᕕᖏᑦ − ᑎᓴᒪᐅᓪᓗᑎᒃ ᐅᓪᓗᓄᑦ ᐱᖓᓱᓄᑦ ᐱᓕᕆᐊᒃᓴᑦ
  • ᐊᑐᐊᒐᓕᕆᓂᕐᒥᒃ ᐃᓕᓐᓂᐊᖅᑎᑦᑎᓂᖅ
  • ᐊᔪᕐᓇᕐᓂᖅᓴᖅ ᐊᑐᐊᒐᕐᒥᒃ ᐃᓕᓐᓂᐊᖅᑎᑦᑎᓂᖅ−ᑎᓴᒪᐅᓪᓗᑎᒃ ᐅᓪᓗᓄᑦ ᐱᖓᓱᓄᑦ ᐱᓕᕆᐊᒃᓴᑦ

ᑭᒃᑯᑦ ᐃᓚᐅᔪᓐᓇᖅᐸᑦ ᐊᑐᓂ ᐃᓕᓐᓂᐊᒐᒃᓴᓄᑦ?

  • ᐊᑐᐊᒐᑦ ᑐᙵᕕᖏᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐃᓄᖕᓂᒃ ᐱᕕᒃᓴᖃᖅᑎᑦᑎᕗᑦ, ᐊᑐᐊᒐᓕᕆᕝᕕᖕᒥ ᒫᓐᓇ ᐃᖅᑲᓇᐃᔭᙱᑦᑐᓂᒃ, ᐊᑐᐊᒐᐅᑉ ᒥᒃᓵᓄᑦ ᑐᑭᓯᒃᑲᓐᓂᕈᒪᔪᓂᒃ ᓄᓇᕗᑦ ᐱᔾᔪᑎᒋᓪᓗᒍ.
  • ᐊᑐᐊᒐᓕᕆᓂᕐᒧᑦ ᐃᓕᓐᓂᐊᒐᒃᓴᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓕᒫᖏᓐᓄᑦ ᐅᒃᑯᐃᖓᕗᑦ ᒫᓐᓇ ᐊᑐᐊᒐᓕᕆᔪᓂᑦ ᐅᕝᕙᓘᓐᓃᑦ ᐊᑐᐊᒐᕐᒧᑦ ᐊᒃᑐᐊᓂᓕᖕᓂᒃ ᐱᓕᕆᕙᒃᑐᓂᒃ ᐊᓂᒍᐃᓯᒪᓗᓂᓗ ᐊᑐᐊᒐᑦ ᑐᙵᕕᖏᓐᓂᒃ. ᑖᒃᑯᐊ ᐃᓕᓐᓂᐊᒐᒃᓴᑦ ᑐᕌᖓᕗᑦ ᐃᖅᑲᓇᐃᔭᖅᑎᑦ' ᐊᑐᐊᒐᓕᕆᔪᓐᓇᖅᑐᑦ ᐱᐅᓯᒋᐊᒃᑲᓐᓂᕈᒪᓪᓗᒋᑦ.
  • ᐊᔪᕐᓇᕐᓂᖅᓴᖅ ᐊᑐᐊᒐᓕᕆᓂᕐᒧᑦ ᐃᓕᓐᓂᐊᕐᓂᖅ ᐃᓚᐅᔪᓂᑦ ᐃᑲᔫᑕᐅᓂᐊᖅᐳᖅ ᐊᕐᕌᒍᓂᒃ ᒪᕐᕉᖕᓂᒃ ᑭᒡᓕᖃᕐᓗᒍ ᐊᑐᐊᒐᓕᕆᖃᑦᑕᖅᓯᒪᔪᓂᑦ ᖁᑦᑎᖕᓂᖅᓴᒥᒃ ᐃᓕᓐᓂᐊᒃᑲᓐᓂᕈᒪᔪᓂᑦ.

ᑭᓇ ᐃᓕᓐᓂᐊᕐᑎᑦᑎᖃᑦᑕᖅᐸ?

ᐃᓕᓐᓂᐊᕐᑎᑦᑎᓲᑦ ᑳᓐᑐᕌᖃᖅᑐᓂᑦ ᐊᔪᙱᑦᑐᓂᑦ ᐱᓕᒻᒪᒃᓴᖅᓯᒪᔪᓂᒡᓗ ᐃᓕᓐᓂᐊᖅᑎᑦᑎᔨᓂᑦ. ᐃᓐᓇᐃᑦ, ᐃᓄᐃᑦ ᓯᕗᓕᖅᑎᐅᔪᑦ ᓄᓇᕗᑦ ᒐᕙᒪᒃᑯᖏᓐᓂᖔᖅᑐᓂᒡᓗ ᖃᐅᔨᒪᔨᑕᐃᑦ ᖃᐃᖁᔨᓲᑦ ᐅᖃᓪᓚᒋᐊᖅᑐᖅᑎᑦᑎᓪᓗᑎᒃ.

ᑭᓲᕙ ᐊᑐᐊᒐᓕᐅᖅᐸᓪᓕᐊᓂᕐᒧᑦ ᐃᓕᓐᓂᐊᒐᒃᓴᖅ?

ᐊᔾᔨᒌᙱᑦᑑᑎᓂᑦ ᐃᓕᓐᓂᐊᕐᑎᑦᑎᓲᑦ ᐊᕐᕌᒍᑕᒫᑦ. ᐃᓕᓐᓂᐊᒐᒃᓴᓕᒫᑦᑎᐊᑦ ᑎᑎᕋᖅᓯᒪᔪᑦ ᓄᓇᕗᑦ ᒐᕙᒪᒃᑯᑦ ᐱᓕᒻᒪᒃᓴᓂᕐᒧᑦ ᐅᓪᓗᖅᓯᐅᑖᓂᑦ ᓴᖅᑭᔮᖅᑎᑕᐅᕙᒃᖢᑎᒃᓗ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂ ᐃᖅᑲᓇᐃᔭᖅᑎᓄᑦ. 

ᑐᑭᓯᒋᐊᒃᑲᓐᓂᕈᒪᒍᕕᑦ ᐊᑎᓕᐅᕈᒪᒍᕕᓪᓘᓐᓃᑦ ᐱᓕᒻᒪᒃᓴᒐᒃᓴᓄᑦ, ᓄᓇᕗᑦ ᒐᕙᒪᒃᑯᖏᑦᑕ ᐱᓕᒻᒪᒃᓴᕐᓂᕐᒧᑦ ᐅᓪᓗᖅᓯᐅᑖᓄᐊᕐᓗᑎᑦ ᐅᕙᓂ https://www.gov.nu.ca/iu/training-calendar  ᐃᕐᖐᓐᓇᒃᑰᕈᑖᓄᓪᓘᓐᓃᑦ training@gov.nu.ca.