ᐅᖃᓚᐅᑎᓯᐅᑏᑦ

Logo Home

You are here

ᑲᑐᔾᔨᓗᑕ

ᓯᕗᓕᖅᑎᐅᑉ ᐅᖃᐅᓯᖏᑦ


ᑎᑎᕋᖅᓯᒪᔪᓂᒃ ᓴᖅᑭᔮᖅᑐᖃᓚᐅᖅᑐᖅ ᐊᑭᓐᓇᖏᓐᓂ ᐃᓪᓗᕈᓯᕐᒥ ᑲᑎᒪᕕᒋᓚᐅᖅᑕᑎᓐᓂ ᑐᕌᒐᑦᑎᓐᓂᒃ ᐋᖅᑭᑦᓱᐃᓂᐊᖅᑎᓪᓗᑕ ᐃᖃᓗᑦᑑᑦᑎᐊᕐᒥ, ᑲᔪᖏᑦᓯᐊᓕᕈᑕᐅᓚᐅᖅᑐᑦ ᐃᓘᓐᓇᑎᓐᓄᑦ ᐃᓱᒪᑦᓴᖅᓯᐅᕈᑎᖃᕐᓂᑎᓐᓄᑦ ᐊᖏᔫᑎᓂᒃ ᐊᐱᖅᑯᑎᓂᒃ ᖃᓄᖅ ᐋᖅᑭᑦᓯᓂᐊᕐᒪᖔᑦᑕ ᓯᕗᓪᓕᐅᑎᒍᒪᔭᑦᑎᓐᓂᒃ ᒐᕙᒪᒋᔭᑦᑎᓐᓄᑦ. ᑎᑎᕋᖅᓯᒪᓚᐅᖅᑐᖅ, “ᓴᖅᑭᖅᑎᑦᓯᕙᓪᓕᐊᓂᖅ ᓴᐱᓕᖅᑕᐃᓕᒍᑕᐅᓯᒪᔪᓂᒃ ᓯᓇᑦᑑᒪᕆᔭᐅᓯᒪᔪᓂᒃ ᑕᑯᔪᒪᔭᑦᑎᓐᓂᒃ.”

ᐅᑉᐱᕈᓱᓪᓚᕆᑦᑐᖓ ᑖᒃᑯᐊ ᑐᕌᒐᕗᑦ ᓴᖅᑭᖅᑎᑕᐅᓯᒪᓂᖏᓐᓂᒃ ᓴᐱᓕᖅᑕᐅᓕᒍᑕᐅᓯᒪᔪᓂᒃ ᓯᓇᑦᑐᐊᕆᔭᐅᓯᒪᔪᓂᒃ ᑕᑯᔭᐅᒍᒪᔪᓂᒃ.

ᓯᕗᓪᓕᖅᐹᑦᓯᐊᒥ ᓄᓇᕗᒻᒥ ᑭᖑᓂᒋᓯᒪᔭᑦᑎᓐᓂ, ᓄᓇᕗᑦ ᒐᕙᒪᒃᑯᖏᑕ ᑐᕌᒐᖏᑦ ᐋᖅᑭᑦᓱᖅᑕᐅᓯᒪᔪᖅ ᐅᖃᖃᑎᒌᒍᑎᖃᖅᑐᑎᒃ ᑕᐃᒪᐃᓚᐅᖅᓯᒪᙱᑦᑐᒥᒃ ᒪᓕᒐᓕᐅᖅᑎᓕᒫᑦ ᐃᓚᐅᖃᑕᐅᓪᓗᑎᒃ, ᓯᕗᓕᖅᑎᖏᑦ ᓄᓇᕗᑦ ᑐᙵᕕᒃᑯᓐᓂ ᓄᓇᕗᒻᒥᓗ ᐱᖓᓱᓂᒃ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ. ᑕᐃᒪᐃᒻᒪᑦ, ᑖᒃᑯᐊ ᑐᕌᒐᕗᑦ ᓇᓗᓇᐃᕈᑎᐅᓪᓚᕆᑦᑐᑦ ᐊᖏᖃᑎᒌᑦᓯᒪᓂᒃᑯᑦ ᐊᐅᓚᑦᓯᒍᑎᑦᑎᓐᓂᒃ ᑲᑐᔾᔨᓂᒃᑯᓪᓗ ᐊᑦᓱᕉᑎᖃᕈᒪᓂᑦᑎᓐᓂᒃ ᓄᓇᕗᒻᒥ ᑭᓱᑐᐃᓐᓇᐃᑦ ᐱᐅᓂᖅᓴᐅᓕᕈᓐᓇᖁᓪᓗᒋᑦ. ᑕᒪᓐᓇ ᐱᓕᕆᔾᔪᓯᖅ ᑐᕌᖓᓂᖃᖅᑐᖅ ᐃᓄᐃᑦ ᐱᖁᓯᖓᓄᑦ ᑐᙵᓇᕐᓂᕐᒧᑦ, ᐅᕝᕙᓘᓐᓃᑦ, “ᒪᑐᐃᖓᓂᖅ ᐱᑦᓯᐊᓂᒃᑯᑦ, ᐃᓚᕋᓇᙱᓐᓂᖅ ᐊᑕᖏᖅᑎᑦᓯᓂᕐᓗ.”

ᐱᓕᕆᖃᑎᒌᓐᓂᖅ, ᐊᑕᐅᓯᕐᒥᒃ ᓂᐱᖁᑎᖃᕐᓂᖅ, ᓴᙱᓂᖅᓴᐅᒍᑎᕗ ᓄᓇᕗᒻᒥ. ᖄᒃᑲᓐᓂᖓᒍᑦ ᐊᑑᑎᖃᕋᓱᐊᕐᓂᐊᑎᓪᓗᑕ ᐱᓕᕆᔾᔪᑎᑦᓴᓕᒫᓂᒃ ᐊᔾᔨᒌᑦᓴᐃᓐᓇᕐᓂᒃ ᐱᔾᔪᑎᖃᕐᓗᑕ ᓴᙱᓂᖃᕈᓐᓇᖅᑐᒍᑦ ᐱᔭᕇᖅᑕᐅᖃᑦᑕᕈᓐᓇᖁᓪᓗᒋᑦ ᓴᖅᑭᖅᑕᐅᓚᐅᖅᓯᒪᙱᑦᑐᓂᒃ ᐃᓄᖁᑎᑦᑎᓐᓄᑦ. ᐋᔩᖃᑎᒌᓐᓂᖅ, “ᐃᓱᒪᓕᐅᖃᑎᒌᓪᓗᓂ, ᐅᖃᖃᑎᒌᓐᓂᒃᑯᑦ ᐊᒻᒪᓗ ᐊᖏᖃᑎᒌᓐᓂᒃᑯᑦ,” ᑐᙵᕕᐅᔪᖅ ᐊᑐᐊᒐᕆᓂᐊᖅᑕᕗᑦ ᐱᓕᕆᔾᔪᓯᒋᓂᐊᖅᑕᑎᓐᓄᑦ. ᓄᓇᕗᒻᒥ ᑎᑭᐅᑎᕙᓪᓕᐊᓂᐊᖅᑎᓪᓗᑕ ᓇᒻᒥᓂᖅᓱᕐᓂᕐᒧᑦ, ᓲᕐᓗ ᒪᑐᐃᒃᑲᓐᓂᕈᑕᐅᓂᐊᖅᑐᓂ ᓄᓇᕗᒻᒥ, ᐱᒻᒪᕆᐅᓕᒃᑲᓐᓂᕐᓂᐊᖅᑐᖅ ᐱᓕᕆᖃᑎᒌᓐᓂᕐᒧᑦ ᐊᑕᐅᑦᓯᒃᑯᑦ ᑐᕌᕐᓗᑕ.

ᒪᓕᒐᓕᐅᖅᑎᐅᓪᓗᑕ ᐃᑦᓯᕚᖅᑎᓪᓗᑕ ᒪᓕᒐᓕᐅᕐᕕᒻᒥ ᐊᕙᓗᓯᒪᓗᑕ − ᐃᓪᓗᕈᓯᖅ ᓴᓇᔭᐅᓯᒪᔪᖅ ᑐᓴᖅᓴᐅᒍᓐᓇᖁᓪᓗᒋᑦ ᐋᖅᑭᐅᒪᓂᕗᑦ ᐊᖏᖃᑎᒌᑦᑎᐅᓂᕐᒧᑦ ᒐᕙᒪᓂᒃ ᐊᐅᓚᑦᓯᔾᔪᓯᑦᑎᓐᓂᒃ − ᐋᖅᑭᐅᒪᔭᐅᓂᖓ ᑐᕌᖓᓂᖃᑦᓯᐊᖅᑐᖅ ᐃᓄᐃᑦ ᐃᓅᖃᑎᒌᓐᓂᕐᒧᑦ ᐱᖅᑯᓯᖏᓐᓂᒃ. ᐃᑦᓯᕚᖅᑎᓪᓗᑕ ᐊᕙᓗᖃᑎᒌᑦᓯᒪᓗᑕ ᐃᖅᑲᐃᑎᑦᓯᒍᑎᐅᖃᑦᑕᓂᐊᖅᑐᖅ ᓂᐱᒋᔭᐅᔪᓕᒫᑦ ᐊᑑᑎᖃᖅᑐᐃᓐᓇᓂᖏᓐᓂᒃ − ᐃᓚᒋᔭᐅᔪᐃᓐᓇᐅᓂᑦᑎᓐᓂᒃ ᐊᑕᐅᓯᐅᖃᑎᒌᓐᓂᕐᒧᑦ ᐊᑕᖏᖅᑐᑕ.

ᑖᒃᑯᐊ ᑐᕌᒐᕗᑦ ᑲᔪᓯᒋᐊᕈᑎᐅᔪᖅ ᑐᕌᖅᑕᑎᓐᓄᑦ, ᓇᓗᓇᐃᒃᑯᑕᐅᔪᖅ ᐊᑦᓱᕉᑎᖃᕐᓂᑎᓐᓂᒃ ᓄᑖᕐᖑᕆᐊᖅᓯᒪᔪᒃᑯᑦ ᐱᓕᕆᖃᑎᖃᕈᒪᓂᑦᑎᓐᓂᒃ ᐅᑉᐱᕆᖃᑎᒌᑦᓯᐊᕐᓗᑕ ᐊᖅᑯᑎᖃᕐᓗᑕᓗ ᑲᑐᔾᔨᓂᒃᑯᑦ ᖃᓄᐃᓕᒋᐊᕈᑎᖃᕐᓂᕐᒧᑦ ᐊᓯᔾᔨᖅᓯᓪᓚᕆᒍᒪᓂᑦᑎᓐᓄᑦ.

ᑐᕌᒐᑦᑎᓐᓂᒃ ᐋᖅᑭᑦᓱᐃᓯᒪᓂᕗᑦ ᓴᖅᑭᕈᑕᐅᓯᒪᔪᖅ ᑐᕌᒐᕗᑦ ᓇᓕᒧᒌᑦᓯᐊᕐᓂᖏᓐᓂᒃ, ᑲᑐᔾᔨᓪᓗᑕ ᓇᓗᓇᐃᖅᓯᓚᐅᖅᑐᒍᑦ ᑕᓪᓕᒪᐅᓗᐊᖑᐊᖅᑐᓂᒃ ᓯᕗᓪᓕᐅᑎᔭᐅᖁᔭᑦᑎᓐᓂᒃ ᒐᕙᒪᒋᔭᑦᑎᓐᓄᑦ.
• ᐃᓐᓇᒻᒪᕆᕈᖅᐸᓪᓕᐊᓂᖅ ᐅᐱᒋᔭᐅᓂᒃᑯᑦ ᓄᓇᕗᒻᒥ;
• ᐊᒥᓱᕐᖑᕆᐊᖅᓯᓂᖅ ᐃᓪᓗᓕᕆᓂᕐᒧᑦ ᐊᔾᔨᒌᙱᑦᑐᓂᒃ ᐊᑐᐃᓐᓇᐅᒍᓐᓇᖅᑐᓂᒃ;
• ᐱᔪᓐᓇᕐᓂᖅᑖᖅᑎᑦᓯᓂᖅ ᐋᓐᓂᐊᖃᕐᓇᖏᑦᑐᓕᕆᓂᒃᑯᑦ ᖃᓄᐃᑦᑕᐃᓕᑎᑦᓯᓂᕐᒧ ᒪᒥᓴᕐᓂᒧᓪᓗ;
• ᑮᓇᐅᔭᖃᖅᑎᑦᓯᒋᐊᒃᑲᓐᓂᕐᓂᖅ ᐃᓕᓐᓂᐊᖅᑐᓕᕆᓂᕐᒧᑦ; ᐊᒻᒪᓗ
• ᐊᔾᔨᒌᙱᑦᑐᓂᒃ ᓴᖅᑭᖅᑎᑦᓯᓂᖅ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ.

ᑲᑐᔾᔨᓗᑕ, ᓴᙱᓂᖃᖅᑐᒍᑦ ᑲᒪᒋᔭᖃᕈᓐᓇᓂᕐᒧᑦ ᐊᖏᔫᑎᓂᒃ ᓴᖅᑭᐅᒪᔪᓂᒃ,
ᐱᓕᕆᔾᔪᑎᑦᓴᖃᖅᑐᒍᑦ ᐱᓕᕆᐊᖃᕈᓐᓇᓂᕐᒧᑦ ᐊᓯᔾᔨᖅᓯᒻᒪᕆᓐᓂᕐᒧᑦ. ᓄᓇᕗᒻᒥ
ᓂᕆᐅᓐᓂᖃᐃᓐᓇᕈᓐᓇᖅᓯᒪᒐᑦᑕ, ᐊᖏᕐᕋᕆᔭᐅᑐᐃᓐᓇᙱᓪᓗᓂ ᐃᓄᓐᓄᑦ,
ᑭᓯᐊᓂᑦᑕᐅᖅ ᓇᓗᓇᐃᒃᑯᑕᐅᓗᓂ ᑭᓱᓂᒃ ᐱᓕᕆᐊᖃᕈᓐᓇᓂᑦᑎᓐᓂᒃ ᐱᓕᕆᔾᔪᓯᐅᔪᓂ
ᐊᑦᓱᕈᕐᓇᖅᑐᖃᕋᓗᐊᖅᑎᓪᓗᒍ.
ᓂᕆᐅᑦᓯᐊᖅᑐᖓ ᐊᑐᓕᖅᑎᑦᓯᓂᐊᕐᓂᑎᓐᓂᒃ ᑐᕌᒐᑦᑎᓐᓂᒃ ᑲᑐᔾᔨᖃᑎᒋᓗᒋᑦ ᒥᓂᔅᑕᐅᖃᑎᒃᑲ, ᒪᓕᒐᓕᐅᖅᑎᑐᐃᓐᓇᓕᒫᑦ ᓄᓇᕗᒻᒥᓗ ᐃᓄᐃᑦ ᑲᑐᔾᔨᖃᑎᒌᖏᑦ − ᖃᐅᔨᒪᔪᖓ ᐱᓕᕆᖃᑎᒌᓐᓂᒃᑯᑦ ᑖᒃᑯᓄᖓᑦᓴᐃᓐᓇᖅ ᐱᔾᔪᑎᑦᑎᓐᓂᒃ, ᐱᓕᕆᖃᑎᒌᓐᓂᒃᑯᑦ/ᐃᑲᔪᖃᑎᒌᓐᓂᒃᑯᑦ, ᓴᖅᑭᖅᑎᑦᓯᒍᓐᓇᖅᑐᒍᑦ ᓴᐱᖅᑕᐃᓕᓪᓗᑎᒃ ᓯᓐᓇᑑᒪᒋᔭᐅᓯᒪᔪᓂᒃ ᓄᓇᕗᒻᒥ ᑕᑯᒍᒪᓯᒪᔭᑦᑎᓐᓂᒃ.

ᖁᔭᓐᓇᒦᒃ.

ᒥᓂᔅᑕ ᐸᐅᓗᓯ ᐊᕿᐊᕈᖅ
ᓯᕗᓕᖅᑎ ᓄᓇᕗᒻᒥᐅᓄᑦ

 

ᑲᑐᔾᔨᓗᑕ