2014-ᒥ ᐅᖃᐅᓯᕐᒧᑦ ᖁᕕᐊᓲᑎᖃᕐᓂ

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ
ᕕᕗᐊᕆ 17 – 21, 2014

ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ ᐃᓱᒪᒋᔭᖃᕐᓂᐅᔪᖅ ᐃᓄᒃᑎᑐᑦ-ᒥᑦ. ᐃᓕᑦᑎᓚᐅᖅᑕ ᐃᓕᓐᓂᐊᖅᑎᑦᑎᓗᑕᓗ. ᐃᒻᖏᓚᐅᖅᑕ ᐊᒪᓗ ᐅᓂᑉᑳᖃᑦᑕᕐᓗᑕ. ᐱᒋᐊᓚᐅᖅᑕ.

ᒫᓐᓇᐅᔪᖅ 2014-ᒧᑦ ᐅᑭᐅᕆᔭᑉᑎᖕᓅᖓᔪᖅ “ᐃᓄᐃᑦ ᐅᖃᐅᓯᖓᑦ ᐃᓄᐃᑦ ᐱᖅᑯᓯᖓᓂᑦ ᓴᙱᑎᑦᑎᔪᖅ”. ᐱᒋᐊᖅᑎᑕᐅᓚᐅᖅᑐᖅ ᒪᒃᑯᒃᑐᒧᑦ ᐃᓱᒪᒋᔭᖃᖅᑐᖅ ᐃᓄᒃᑎᑐᑦ ᐅᖃᐅᓯᖅ ᐱᖅᑯᓯᕆᔭᖓᓐᓄᑦ ᐃᓚᒋᔭᐅᓪᓗᐊᑕᕐᓂᖓᓄᑦ. ᒪᔾᔭ ᐃᓚᖏᑦ ᐃᓱᒪᒃᓴᖅᓯᐅᕈᑎᒃᓴᐃᑦ:

ᐅᖃᐅᓯᑉᑕ ᑐᙵᕕᖃᖅᑎᑖᑎᒍᑦ ᐱᖅᑯᓯᑉᑎᖕᓄᑦ. ᐅᖃᐅᓯᑉᑎᖕᓂᒃ ᐅᖃᓪᓚᒐᓱᖃᑦᑕᕈᕕᑦ, ᐱᖁᓯᕆᔭᕗᑦ ᓴᙱᒃᑎᑉᐹᓪᓕᖅᑎᑕᐃᑦ.
ᐅᖃᐅᓯᕗᑦ ᐱᖅᑯᓯᕗᓪᓗ ᐊᒃᑐᐊᔾᔪᑎᔫᒃ. ᐊᑕᐅᑎᒃᑯᑦ, ᑲᔪᓯᐅᔭᖅᑑᒃ!
ᐃᓄᒃᑎᑐᑦ ᐅᖃᓪᓚᖃᑦᑕᕐᓗᓂ ᐃᓄᐃᑦ ᐱᖅᑯᓯᑐᖃᖏᓐᓂᓕᕆᑎᓪᓗᓯ.
ᐃᓄᒃᑎᑐᑦ ᐅᖃᐅᓯᖅ ᐊᑐᕐᓗᒍ ᓄᑕᖅᑲᖕᓄᑦ ᐊᐃᓯᒪᓗᑎᑦ, ᐱᖃᓐᓈᕆᔭᐃᑦ ᐱᖃᑎᒋᓗᒍ ᐃᓚᒋᔭᐃᓪᓗ ᓄᓇᓕᖕᓂᑦ, ᐊᒪᓗ ᐱᓕᕆᖃᑎᒋᔭᕐᓄᑦ ᐱᓕᕆᕝᕕᖕᓂᑦ.
ᐃᓄᒃᑎᑐᑦ ᐅᖃᓪᓚᖃᑦᑕᖁᓗᒋᑦ ᑭᓇᑐᐃᓐᓇᖅ ᖃᕆᑕᐅᔭᒃᑯᕋᓗᒃ ᐃᓄᐃᓪᓗ ᑲᑎᓐᓂᕆᖃᑦᑕᖅᑕᖏᓐᓂᒃ ᓇᓂᑐᐃᓐᓇᖅ! ᓈᓚᒡᕕᐊᓛᕆᔭᕐᓂᑦ ᓈᓚᒡᓗᑎᑦ ᑐᓵᓂᐊᕐᓗᑎᑦ ᐃᓄᒃᑎᑐᑦ ᐅᖃᓪᓚᒃᑐᓂᒃ ᐅᓂᑉᑳᖅᑐᓂᒃ ᑎᑕᒃᑐᓂᒡᓗ. ᐃᓄᒃᑎᑑᖅᑐᓂᒃ ᑕᕐᕆᔭᐅᑎᓂᒃ ᑕᕐᕆᔭᕐᓗᑎᑦ ᕿᑉᓕᖅᑑᔭᓂᑦ ᖃᕆᑕᐅᔭᒃᑯᓪᓗ. ᐃᓄᒃᑎᑐᑦ ᐅᖃᓪᓚᖃᑎᖃᕐᓗᑎᑦ ᖃᕆᑕᐅᔭᒃᑯᑦ.

2014 ᑕᑯᔭᐅᔪᒃᓴᖅ ᑕᑯᒃᓴᐅᑎᑦᑎᔪᖅ ᐃᓄᐃᑦ ᐃᒻᖏᖅᑐᑦ ᐅᖃᐅᓯᕗᑦ ᐊᑐᖅᖢᒋᑦ ᐊᒪᓗ ᓴᕆᒪᓲᑎᒋᑉᓗᒍ ᐱᖅᑯᓯᕗᑦ.

ᖃᕆᑕᐅᔭᒃᑯᑦ ᐱᓗᒍ 2014 ᓴᓂᕋᕐᒧᐊᖅᑐᒃᓴᖅ (PDF)

ᖃᓄᐃᓕᐅᕐᓂᐊᖅᐱᑦ?

ᑖᒻᓇ ᖁᕕᐊᓲᑎ ᑭᓇᑐᐃᓐᓇᕐᒨᖓᔪᖅ. ᑕᒪᑉᑕ ᐆᒃᑐᖃᑦᑕᕈᖕᓇᖅᑐᒍᑦ, ᐃᓕᓐᓂᐊᖅᑎᑦᑎᓗᑕ, ᐊᒪᓗ ᐃᓄᒃᑎᑐᑦ ᐅᖃᓪᓚᖕᓂᖅ ᐃᑲᔪᖅᑐᕐᓗᒍ.

ᕕᕗᐊᕆ 21 ᓇᓂᓗᒃᑖᖅ ᐅᖃᐅᓯᑐᖃᖃᖅᑐᓄᑦ ᐅᑉᓗᕆᔭᐅᔪᖅ!

ᐅᖃᐅᓯᑐᖃᕆᔭᐅᔪᑦ ᐃᑲᔪᐃᔪᑦ ᖃᓄᐃᖏᓐᓂᕐᒥᑦ ᐊᒪᓗ ᓄᓇᓕᖕᒥᑦ ᐱᕙᓪᓕᐊᓂᕐᒥᑦ. ᓇᓂᓗᒃᑖᖅ ᐅᖃᐅᓯᑐᖃᖃᖅᑐᓄᑦ ᐅᑉᓗᕆᔭᐅᔪᖅ ᐅᔾᔨᕈᓱᒃᑎᑦᑎᔪᖅ ᑕᒪᑐᒥᙵᑦ. ᑖᒻᓇ ᐅᑉᓗᖅ ᐱᔾᔪᑎᖃᕐᒥᔪᖅ ᐱᒻᒪᕆᐅᓂᖓᓂᒃ ᐅᖃᐅᓯᕆᔭᐅᔪᑦ ᐊᒥᓲᓂᖏᓐᓂᒃ.

ᓇᓂᓗᒃᑖᖅ ᐅᖃᐅᓯᑐᖃᖃᖅᑐᓄᑦ ᐅᑉᓗᕆᔭᐅᔪᖅ – ᕕᕗᐊᕆ 21

ᖃᓄᖅ ᐱᒋᐊᕐᓂᖓ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ

ᑕᒪᓐᓇ ᖁᕕᐊᓲᑎᒋᖃᑦᑕᖅᑕᕗᑦ ᕕᕗᐅᕆᑕᒫᑦ, ᐊᑕᐅᑎᒃᑯᑦ ᓇᓂᓗᒃᑖᖅ ᐅᖃᐅᓯᑐᖃᖃᖅᑐᓄᑦ ᐅᑉᓗᕆᔭᐅᔪᖅ ᐊᑐᖅᑎᓪᓗᒍ (ᕕᕗᐊᕆ 21).

ᐱᔾᔪᑎᒋᔭᖓ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ ᐊᑐᖅᑕᐅᖁᑉᓗᒍ ᐃᓄᒃᑎᑐᑦ ᐅᖃᐅᓯᖅ ᐅᔾᔨᕈᓱᓕᖅᑎᑦᑎᖁᔨᒧᓪᓗ ᐱᒻᒪᕆᐅᓂᖓᓂᒃ, ᓇᑭᙶᕐᓂᖓ, ᓇᓃᓐᓂᕆᔭᖓ ᐊᒪᓗ ᐊᔾᔨᒌᖏᑦᑑᑕᐅᓂᖓ ᓄᓇᕗᒻᒥᑦ. ᐃᓄᓗᒃᑖᓄᓪᓗ ᖃᐅᔨᒪᔭᐅᓕᖁᑉᓗᒍ ᐃᓄᒃᑎᑑᖓᔪᑦ ᑐᑭᓯᐅᒪᔾᔪᑏᑦ ᐊᒪᓗ ᐱᕝᕕᐅᔪᖕᓇᖅᑐᑦ (ᒪᓕᒡᓗᒋᑦ ᐃᓄᐃᑦ ᐅᖃᐅᓯᖏᑦ ᒥᐊᓂᕆᔭᐅᓂᖏᓐᓄᑦ ᐱᖁᔭᖅ).

ᐃᓄᒃᑎᑐᑦ ᐅᖃᐅᓯᖅ ᐱᖓᓱᒋᔭᐅᖃᑕᐅᔪᖅ ᓄᓇᖃᖅᑳᖅᑐᓄᑦ ᐅᖃᐅᓯᐅᔪᓂᑦ ᑲᓇᑕᒥᑦ ᐱᕕᖃᖅᖢᓂ ᐊᑯᓂ ᐊᑐᖅᑕᐅᔪᖕᓇᕋᓗᐊᕐᓂᖓᓄᑦ. ᑭᓯᐊᓂ, ᐃᓄᒃᑎᑐᑦ ᐅᖃᐅᓯᖅ ᐊᓯᐅᔨᙱᑦᑐᖕᓇᖅᑕᕗᑦ ᐱᒋᐊᕐᓂᖃᕐᓗᑕ. ᐊᑐᖅᑕᐅᓂᖓ ᐃᓄᒃᑎᑐᑦ ᐅᖃᐅᓯᖅ ᓱᑲᐃᑦᑐᒥᑦ ᐊᓯᐅᕙᓪᓕᐊᔪᖅ ᑕᐃᒪᙵᑦ ᖄᖏᖅᑐᓂᑦ ᖁᓖᑦ ᐅᑭᐅᑦ ᖃᑉᓰᖅᑖᕐᔪᒃᓯᒪᓕᖅᑐᓂᑦ. ᑲᓇᑕᒥᑦ ᓈᓴᐃᔩᑦ ᖃᐅᔨᓴᐃᓂᕆᔭᖏᑦ, ᐃᓄᒃᑎᑑᖃᑦᑕᕐᓂᖅ ᐅᕙᒍᒋᔭᐅᔪᓂᑦ ᑲᑕᒃᐹᓪᓕᖅᓯᒪᓕᖅᑐᖅ 76%-ᒥᑦ 1996-ᒥᑦ 64%-ᒧᑦ 2006-ᒥᑦ. ᐊᓯᐊᖑᕐᓂᖅ ᐃᓄᒃᑎᑑᕐᓂᕐᒧᑦ ᐅᕙᒍᒋᔭᐅᔪᓂᑦ ᓇᓗᓇᐃᖅᓯᔪᖅ ᐅᔾᔨᖅᑐᕆᐊᖃᕐᓂᕐᒥᒃ, ᐅᕙᒍᒋᔭᐅᔪᓂᑦ ᓄᑕᖅᑲᕗᑦ ᐃᓕᑦᑎᖃᑦᑕᕐᒪᑕ ᐅᖃᐅᓯᕆᖅᑲᐅᑕᐅᔭᑉᑎᖕᓂᑦ.

ᐅᕙᒍᑦ, ᐅᑎᖅᑎᑦᑐᖕᓇᖅᑕᕙᑦ ᐊᓯᐅᔨᕙᓪᓕᐊᓂᖅ ᐃᓄᒃᑎᑐᑦ ᐅᖃᓪᓚᖕᓂᖅᐳᑦ. ᐅᖃᐅᓯᕗᑦ ᓴᙱᔪᒥᑦ ᑐᙵᕕᖃᕐᒪᑦ ᓱᓕ. ᐊᒪᓗ, ᐅᖃᐅᓯᕗᑦ ᒥᐊᓂᕆᔭᐅᓕᖅᖢᓂ ᓄᓇᕗᑦ ᒪᓕᒐᖏᓐᓄᑦ. ᑭᓯᐊᓂ, ᖃᓄᐃᓕᐅᕈᑎᒋᔭᕆᐊᖃᖅᑕᕗᑦ – ᐅᕙᒍᒋᔭᑉᑎᖕᓂᑦ, ᐃᓕᓐᓂᐊᕐᕕᖕᓂᑦ, ᑎᑎᕋᕐᕕᖕᓂᑦ, ᐊᒪᓗ ᓄᓇᓕᑉᑎᖕᓂᑦ.

ᖃᓄᐃᓕᐅᕈᖕᓇᖅᐱᑕ?

ᐃᓄᐃᑦ ᖃᓄᐃᓕᐅᕈᖕᓇᖅᐸᑦ? ᐊᑐᕐᓗᒍ ᐃᓄᒃᑎᑑᕐᓂᖅ ᖃᐅᑕᒫᑦ. ᐅᖃᐅᓯᕗᑦ ᐊᑐᖃᑎᒋᓗᒋᑦ ᐊᓯᑉᑎᖕᓄᑦ, ᐱᓗᐊᖅᑐᒥᑦ ᓄᑕᖅᑲᑉᑎᖕᓂᑦ. ᐅᖃᓪᓚᖃᑎᖃᖃᑦᑕᕐᓗᑕ ᑎᑎᕋᖃᑦᑕᐅᑎᖃᑦᑕᕐᓗᑕᓗ ᐊᓯᖏᓐᓂᑦ. ᓇᓂᓯᓗᑕ ᐃᓄᒃᑎᑐ ᐅᖃᓪᓚᖃᑦᑕᖅᑐᓂᑦ ᐃᑲᔪᖅᑎᒋᓂᐊᕐᓗᒋᑦ. ᐊᑐᕌᖓᕕᑦ ᐃᓄᒃᑎᑑᕐᓂᕐᒥᒃ, ᐃᑲᔪᐃᔪᑎᑦ ᐊᓯᐅᔨᙱᓐᓂᕐᒥᒃ ᐅᖃᐅᓯᑉᑎᖕᓂᑦ ᐊᒪᓗ ᐱᖅᑯᓯᕆᔭᑉᑎᖕᓂᒃ ᓴᙱᑎᑦᑎᓂᕐᒥᑦ.

ᓄᓇᕗᑦ ᒐᕙᒪᒃᑯᖏᑦ ᐱᓂᐊᕐᓂᖃᖅᑐᑦ ᐱᓕᕆᓂᕐᒥᒃ ᐃᓄᒃᑎᑑᕐᓗᑎᒃ ᐊᒪᓗ ᐃᑲᔪᐃᓗᑎᒃ ᐊᑐᖅᑕᐅᓂᖓ ᐃᓄᒃᑎᑑᕐᓂᖅ ᐃᓅᖃᑎᒋᔭᑉᑎᖕᓂᑦ. ᐱᓂᐊᕐᓂᖃᖅᑐᒍᑦ ᒪᓕᒃᖢᒍ ᐅᖃᐅᓯᓄᑦ ᒪᓕᒐᐅᔪᓂᒃ (ᐅᖃᐅᓯᓄᑦ ᐱᖁᔭᖅ ᐊᒪᓗ ᐃᓄᐃᑦ ᐅᖃᐅᓯᖏᓐᓂᒃ ᒥᐊᓂᖅᓯᓂᕐᒧᑦ ᐱᖁᔭᖅ). ᐅᖃᐅᓯᕆᔭᖏᓐᓂᒃ ᐱᔭᐅᔪᑦ ᐃᓄᖕᓂᑦ ᑲᑐᔾᔨᖃᑎᒌᓂᒡᓗ ᓄᓇᕗᒻᒥᑦ, ᓴᖅᑭᑦᑎᔪᒍᑦ ᐊᖏᔪᑲᓪᓚᖕᒥᑦ ᐸᕐᓇᐅᑎᒥᒃ ᐊᑐᓕᖅᑎᑦᑎᓂᕐᒥᒃ ᓄᑖᒥᒃ ᐅᖃᐅᓯᓕᕆᓂᕐᒧᑦ ᒪᓕᒐᓂᒃ. ᐸᕐᓇᒃᑕᕗᑦ ᑕᐃᔭᐅᔪᖅ ᐅᖃᐅᓯᕗᑦ.

ᖃᕆᑕᐅᔭᒃᑯᑦ ᐱᓗᒍ ᐅᖃᐅᓯᕗᑦ ᐸᕐᓇᐅᑎ 2012-2016

ᐅᔾᔨᕈᓱᓕᖅᑎᑦᑎᓂᖅ ᐊᑐᕈᒪᒃᑲᓐᓂᕐᓂᖅ ᐃᓄᒃᑎᑐᑦ ᐅᖃᐅᓯᕐᒥᑦ ᐊᒪᓗ ᐅᔾᔨᕈᓱᖕᓂᖅ ᐃᓱᒫᓘᑕᐅᔪᓂᒃ ᐃᓚᒋᔭᐅᔪᖅ ᐸᕐᓇᐅᑎᑉᑎᖕᓂᑦ. ᐊᖏᒡᓕᒋᐊᕈᒪᔭᕗᑦ ᓇᓃᓐᓂᕆᔭᖓ ᐃᓄᒃᑎᑐᑦ ᐅᖃᓪᓚᖕᓂᖅ ᖃᐅᑕᒫᑦ ᐃᓅᓯᕆᔭᑉᑎᖕᓄᑦ. ᐊᒥᓱᒃᑲᓐᓂᕐᓂᒃ ᐃᓄᖕᓂᒃ ᐅᖃᓪᓚᒃᑲᓐᓂᖁᔨᔪᒍᑦ ᐃᓄᒃᑎᑐᑦ ᐅᕙᒍᒋᔭᐅᔪᓂᑦ, ᐃᓕᓐᓂᐊᕐᕕᖕᓂᑦ, ᓄᓇᓕᑉᑎᖕᓂᑦ, ᐊᒪᓗ ᐱᓕᕆᕝᕕᑉᑎᖕᓂᑦ. ᐅᑉᓗᑕᒫᑦ, ᐅᖃᐅᓯᕗᑦ ᓴᙱᒃᑎᑉᐸᓪᓕᐊᓂᐊᖅᑐᑦ ᐊᒪᓗ ᐱᖅᑯᓯᕆᔭᕗᑦ ᑲᔪᓯᓂᖃᕐᓗᓂ.

ᐱᔾᔪᑎᒋᑉᓗᒍ ᐊᑎᔭᖓ: ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ

ᓯᕗᓪᓕᖅᐹᒥᑦ ᖁᕕᐊᓲᑎᒋᒐᑉᑎᒍᑦ ᐃᓄᒃᑎᑐᑦ ᐅᖃᓪᓚᖕᓂᖅ, ᑕᐃᔭᐅᓚᐅᖅᑐᖅ ᐃᓄᒃᑎᑐᑦ ᐅᖃᐅᑦᑎᓐ-ᒥᑦ. ᑐᑭᖃᖅᑐᖅ “ᐅᖃᓪᓚᖕᓂᖅ ᐃᓄᐃᑦ ᐅᖃᓪᓚᐅᓯᖏᑦᑎᒍᑦ” (ᐃᒡᓗᓕᖕᒥᐅᑦ ᐅᖃᐅᓯᖏᑦᑎᒍᑦ).

ᐅᖃᐅᑦᑎᓐ ᐅᖃᐅᓯᑐᖃᐅᔪᖅ ᐅᖃᐅᓯᖅ -ᒥᑦ (“ᐅᖃᖅᑕᐅᔪᖅ,” “ᐅᖃᐅᓯᖅ”). ᑖᒻᓇ ᓱᓕ ᐊᑯᑭᑦᑐᕐᒥᐅᓄᑦ ᐊᑐᖅᑕᐅᔪᖅ (ᑎᑎᕋᖅᑕᐅᖃᑦᑕᖅᑐᖅ ᐅᖄᑦᓯᑦ), ᐃᓄᑉᐱᐊᖅ ᐊᒪᓗ ᐃᓄᕕᐊᓗᒃᑐᓐ (ᐅᖃᐅᑦᓯᑦ/ᐅᖃᐅᑦᑎᑦ), ᐊᒪᓗ ᐊᓯᖏᑦᑎᒍᑦ ᐅᐊᓕᓂᕐᒥᐅᑦ ᐅᖃᐅᑎᖏᑦᑎᒍᑦ. ᑖᒻᓇ ᐊᑐᖅᑕᐅᒐᔪᓚᐅᖅᑐᖅ ᓯᕗᓂᕆᔭᑉᑎᖕᓂᑦ ᑲᓇᖕᓇᕐᒥᑦ ᐅᑭᐅᖅᑕᖅᑐᒥᐅᓄᑦ ᑭᓯᐊᓂ ᒫᓐᓇᐅᔪᖅ ᐊᑐᖅᑕᐅᓗᐊᕌᓗᒍᖕᓃᖅᑐᖅ.

ᐅᖃᖃᑎᖃᓚᐅᖅᑐᒍᑦ ᓄᓇᕗᒻᒥ ᓄᓇᓕᖕᓂᑦ ᐊᑎᐅᑉ ᒥᒃᓵᓄᑦ. ᐅᖃᖃᑎᖃᑦᑕᐅᑎᓂᐅᔪᖅ ᐊᑐᖅᖢᒍ, ᐊᓯᐊᖑᓚᐅᖅᑕᕗᑦ ᐊᑎᖓ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ -ᒥᑦ 2005-ᒥᑦ. ᓂᕈᐊᓚᐅᖅᑕᕗᑦ ᐊᑎᖓ ᑐᑭᓯᔭᐅᔪᖕᓇᕐᓂᖓᓄᑦ ᐊᔾᔨᐅᖏᑦᑐᓄᑦ ᐅᖃᐅᓯᐅᔪᓄᑦ. ᑐᑭᖃᖅᑐᖅ “ᖁᕕᐊᓲᑎᖃᕐᓂᖅ ᐅᖃᐅᓯᑉᑎᖕᓂᑦ.”

ᓱᓇᐅᓇ “ᐃᓄᒃᑎᑐᑦ”?

ᓄᓇᕗᑦ ᒐᕙᒪᒃᑯᖏᑦ ᐊᑐᖃᑦᑕᓕᖅᑐᑦ ᑐᑭᖓᓂᒃ ᐃᓄᒃᑎᑐᑦ ᐱᔾᔪᑎᖃᖅᖢᑎᑦ ᑕᒪᐃᓂᒃ ᐃᓄᐃᑦ ᐅᖃᐅᓯᖏᓐᓂᒃ ᓄᓇᕗᒻᒥᑦ. ᑕᒡᕙᓂ ᐃᓚᐅᔪᑦ ᐃᓄᒃᑎᑐᑦ ᐊᒪᓗ ᐃᓄᐃᓐᓇᖅᑐᓐ. ᑖᒻᓇ ᑐᑭᐅᔪᖅ ᐃᓇᖐᔪᖅ ᖃᑉᓗᓈᑎᑑᖅᓯᒪᔪᒥᑦ “ᐃᓄᐃᑦ ᐅᖃᐅᓯᖓᑦ.”-ᒥᑦ.