ᐅᖃᓚᐅᑎᓯᐅᑏᑦ

You are here

ᑐᙵᕕᓕᐅᕐᓂᕐᒥᒃ ᑲᑎᒪᓂᖅ 2019

ᒫᑦᓯ 20, 2019

ᑐᙵᕕᓕᐅᕐᓂᕐᒥᒃ ᑲᑎᒪᓂᖅ 2019

 

ᐃᓕᓐᓂᐊᕐᓂᓕᕆᔨᒃᑯᑦ ᑲᑎᒪᓂᖃᖅᑎᑦᑎᓚᐅᖅᐳᑦ ᑕᐃᔭᒥᒃ ᑐᙵᕕᓕᐅᕐᓂᖅ ᑲᑎᒪᓂᖓᑦ ᒫᔨ 20 ᐊᒪ 21, 2019−ᒥ ᐸᓐᓂᖅᑑᒥ. ᑕᕝᕙᓂ ᑲᑎᒪᓂᕐᒥᒃ, ᐃᓐᓇᐃᑦ ᑲᑎᒪᔨᐅᖃᑕᐅᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔩᑦ ᐃᓚᓕᐅᑎᖁᔭᒥᓂᒃ ᐱᖁᔭᒃᓴᐃᑦ ᐱᕈᖅᑎᑕᐅᓂᖏᓐᓄᑦ ᐅᖃᕐᕕᖃᓚᐅᖅᐳᑦ. ᑲᑎᒪᓂᖅ ᐱᓕᕆᐊᖃᕋᓱᐊᕐᓂᐅᓚᐅᖅᑐᖅ ᐃᓐᓇᐃᑦ ᖃᐅᔨᒪᓂᖃᕐᓂᖏᑦ ᑐᑭᓯᕝᕕᐅᒃᑲᓐᓂᕐᓗᑎᒃ ᖃᓄᖅ ᐱᓕᕆᐊᖃᕐᓗᓂ ᐊᑲᐅᓛᖑᓇᔭᕐᒪᖔᑦ ᐃᓕᓐᓂᐊᕐᓂᓕᕆᓂᖅ ᐱᓕᕆᐊᖑᑎᓪᓗᒍ, ᐊᑦᑕᕐᓇᙱᓪᓗᓂ ᓇᒡᓕᒍᓱᖕᓂᖃᖅᑐᓂᒃ ᐃᓕᓐᓂᐊᕐᕕᖃᕐᓂᖅ ᐊᒻᒪᓗ ᐃᓕᓐᓂᐊᖅᑎᐅᔪᑦ ᐱᐊᓂᑦᑎᐊᕆᐊᖃᕐᓂᖏᓐᓂᒃ.

ᐃᓕᓐᓂᐊᖅᑐᓕᕆᔨᒃᑯᑦ ᐅᒃᐱᕈᓱᖕᒪᑕ ᐃᓐᓇᐃᑦ ᐱᓕᕆᐊᒃᓴᖃᓪᓚᕆᖕᒪᑕ ᐃᓕᓴᐃᔨᐅᖃᑕᐅᕙᒡᓗᑎᒃ ᖃᐅᔨᒪᔨᒋᔭᐅᕙᒡᓗᑎᒡᓗ ᓄᓇᕗᒻᒥ ᐃᓕᓐᓂᐊᕐᓂᓕᕆᑎᓪᓗᒋᑦ. ᐃᓐᓇᐃᑦ ᐱᓕᕆᖃᑕᐅᖃᑦᑖᓂᖕᒪᑕ ᐃᓕᖅᑯᓯᑐᖃᓕᕆᓂᕐᒥᒃ, ᐃᓄᓪᓚᕆᒃᓯᐅᑎᑎᒍᑦ ᐊᔪᕈᓐᓃᖅᓴᕐᓂᕐᒥᒃ, ᐅᖃᐅᓰᑦ ᐊᑐᖅᑕᐅᑦᑎᐊᕐᓂᖏᓐᓄᑦ ᖁᕝᕙᖅᓴᐃᓂᖅ, ᐊᑦᑕᕐᓇᙱᓪᓗᑎᒃ ᓇᒡᓕᒍᓱᖕᓂᖃᕐᓗᑎᒃ ᐃᓕᓐᓂᐊᕐᕖᑦ, ᐊᒻᒪ ᐊᔾᔪᒥᓇᖅᖢᑎᒃ ᐃᓅᓯᓕᒫᕐᒥᓂᒃ ᐃᓕᓐᓂᐊᖅᑎᐅᓂᖏᓐᓂᒃ.

ᐃᓚᐅᖃᑕᐅᔪᑦ ᐃᓐᓇᐃᑦ ᓂᕈᐊᖑᓚᐅᖅᑐᑦ ᐃᓕᖅᑯᓯᓕᕆᔨᒃᑯᑦ ᐃᑦᑕᕐᓂᓴᓕᕆᓂᕐᒧᑦ ᐱᓕᕆᔨᖏᓐᓂᒃ ᑕᐃᔭᐅᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔩᑦ. ᐃᓕᓴᕆᔭᐅᓯᒪᔪᐃᑦ ᖃᐅᔨᒪᔨᒻᒪᕆᐅᒋᔭᐅᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᖃᐅᓯᕆᖃᑦᑕᖅᓯᒪᔭᖏᓪᓗ ᐊᑐᓕᖅᑎᑕᐅᕙᒃᖢᑎᒃ ᐊᔾᔨᒌᙱᑦᑐᓄᑦ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ ᑎᒥᖁᑎᒋᔭᖏᓐᓄᓪᓗ.

ᑕᐃᒪ ᑐᕌᖅᑕᕗᑦ ᐊᖅᑯᑎᒋᔭᐅᓪᓗᓂ ᐃᓕᓴᐃᓂᕐᒧᑦ, ᑕᒪᓐᓇ ᐱᓕᕆᖃᑎᒌᖃᑦᑕᕐᓂᖅ ᓴᙱᔫᔭᕆᐊᖃᖅᐳᖅ ᐃᓐᓇᐃᑦ ᐃᓕᓐᓂᐊᕐᕖᓪᓗ ᐱᓕᕆᖃᑎᒌᖕᓂᖓᑦ, ᐃᓕᓐᓂᐊᕐᕕᒃᑎᒍᑦ ᐱᐊᓂᒃᖢᑎᒃ ᐊᓂᒍᐃᔪᑦ ᑭᓇᐅᓂᕐᒥᓂᒃ ᓇᓗᖅᑯᑎᙱᑦᑎᐊᕐᓗᑎᒃ ᐃᓅᓯᕐᒥ ᐃᑲᔪᖅᑎᙳᖃᑕᐅᔪᓐᓇᕐᓂᐊᕐᒪᑕ.

ᐃᓐᓇᐃᑦ ᑲᑎᒪᖃᑕᐅᔪᑦ ᑐᙵᕕᓕᐅᕐᓂᖅ ᑲᑎᒪᓂᖓᓐᓄᑦ ᐅᖃᐅᔾᔨᐃᔨᐅᖃᑦᑕᖅᑐᑦ ᐃᓕᖅᑯᓯᓕᕆᔨᒃᑯᑦ ᑲᑎᒪᔨᖁᑎᖏᓐᓄᑦ ᑕᐃᔭᐅᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔩᑦ.

ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔩᑦ ᐃᓚᐅᓚᐅᖅᑐᑦ ᑐᙵᕕᓕᐅᕐᓂᕐᒥᒃ ᑲᑎᒪᓂᖏᓐᓄᑦ ᐅᑯᐊ:

  • ᑭᒍᑎᒃᑳᕐᔪᒃ ᓴᐸ, ᐃᒃᐱᐊᕐᔪᖕᒥᑦ
  • ᔩᒃ ᐃᔨᑦᓯᐊᖅ, ᑭᙵᐃᑦ−ᐃᒃᓯᕙᐅᑕᐅᑉ ᑐᒡᓕᐊ
  • ᐋᓂ ᑐᑲᓗᒃ, ᓴᓂᑭᓗᐊᖅ
  • ᒥᐊᓕ ᑲᓇᔪᖅ ᕗᐃᓯ, ᑎᑭᕋᕐᔪᐊᕐᒥᑦ
  • ᐋᓂ ᓇᐸᔪᖅ, ᑎᑭᕋᕐᔪᐊᖅ
  • ᔩᓐ ᓯᒪᐃᓚᒃ, ᖃᒪᓂ’ᑐᐊᕐᒥᑦ
  • ᒪᕆ ᐊᖑᑎ, ᑰᒑᕐᔪᖕᒥᑦ
  • ᓴᐃᒪᓐ ᕿᙵᖅᑑᖅ, ᑕᓗᕐᔪᐊᖅ−ᐃᒃᓯᕙᐅᑕᖅ 

 

ᑐᓴᓚᐅᖅᑕᕗᑦ

 

"ᐃᓄᐃᑦ ᖃᐅᔨᒪᔭᑐᖃᖏᑦ ᑐᙵᕕᒋᔭᐅᕗᖅ ᐱᓕᕆᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓂ"

ᓴᐃᒪᓐ ᕿᙵᖅᑑᖅ, ᑕᓗᕐᔪᐊᕐᒥᐅᑕᖅ

 

"ᑐᓴᐅᒪᓂᖃᓕᒃᑲᓐᓂᕈᒪᖃᑦᑕᕋᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪ ᑕᑯᖃᑦᑕᒃᑲᓐᓂᕈᒪᓪᓗᒍ ᐅᖃᓕᒫᒐᓂ ᐊᑐᖅᑕᐅᑎᓪᓗᒍ. ᖁᔭᓐᓇᒦᖏᒃᑯᐊ ᐊᓗᑭ ᐃᓕᓐᓂᐊᕐᕕᐊᓂᒃ ᐊᑐᖅᑎᑦᑎᔪᑯᓗᐃᑦ ᑕᕝᕙᓂ ᐃᖃᐃᓕᓴᕐᕕᖕᒥ ᑲᑎᒪᔪᓐᓇᖅᐳᒍᑦ.

ᐃᓐᓇᐃᑦ ᑐᓴᐅᒪᓕᕆᐊᖃᕋᓗᐊᕐᒪᑕ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔩᑦ ᐱᓕᕆᐊᕆᕙᒃᑕᖏᓐᓂᒃ; ᐅᖃᐅᓯᒃᓴᖏᑦ ᑐᓴᖃᑦᑕᓪᓗᐊᕋᓗᐊᕐᒥᒐᑦᑎᒍ ᐅᖃᓕᒫᒐᒃᓴᓕᕆᑎᓪᓗᒋᑦ ᐃᓕᓐᓂᐊᕐᕕᖁᑎᑦᑎᓐᓂ."

ᒥᐊᓕ ᐃᑦᑐᐊᖓᑦ, ᐃᓕᓐᓂᐊᖅᑎᓂᒃ ᖃᐅᔨᓴᖅᑎ ᐊᒻᒪ ᐱᓕᕆᐊᓄᑦ ᕿᒥᕐᕈᔨ

 

“ᕿᑐᙵᕗᑦ ᐊᐱᕆᖃᑦᑕᖕᓂᐊᕐᒪᑕ ᑭᒃᑰ`ᖕᒪᖔᕐᒥᓂᒃ, ᓇᑭᙶᕐᒪᖔᕐᒥᓂᒡᓗ. ᖃᓄᖅ ᖃᐅᔨᒪᓂᕆᔭᕗᑦ ᕿᑐᕐᖓᑦᑎᓐᓄᑦ ᖃᐅᔨᒪᓂᖅᑖᖑᔪᓐᓇᖅᐸ ᐊᑲᐅᓛᒃᑯᑦ?”

ᒥᐊᓕ ᐃᑦᑐᐊᖓᑦ, ᐃᓕᓐᓂᐊᖅᑎᓂᒃ ᖃᐅᔨᓴᖅᑎ ᐊᒻᒪ ᐱᓕᕆᐊᓄᑦ ᕿᒥᕐᕈᔨ, ᐅᖃᓚᐅᖅᑐᖅ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔨᓄᑦ

 

ᑐᓴᖅᑕᐅᑦᑎᐊᖁᔭᕋ ᐱᒻᒪᕆᐅᖕᒪᑦ ᐱᓕᕆᐊᕗᑦ ᐊᒃᓱᐊᓗᒃ ᐅᐱᓯᒪᔾᔪᑕᐅᔪᓐᓇᕐᒪᑕ ᐃᓕᓐᓂᐊᕐᕕᑦᑎᓐᓂ ᓄᑕᖅᑲᑦᑎᓐᓄᓪᓗ. ᐱᓕᕆᑦᑎᐊᖅᑐᐊᓘᔪᓯ, ᐊᒃᓱᕈᕐᓇᖅᑐᖅ ᑭᓯᐊᓂ ᐱᒻᒪᕆᐊᓘᔪᖅ.

ᕿᑐᕐᖓᕗᑦ ᐅᖃᐅᑎᖃᑦᑕᓚᐅᖅᑕᕗᑦ ᐃᓕᓐᓂᐊᖅᑕᒥᓂᒃ ᐱᐊᓂᒃᓯᙱᑎᓪᓗᒋᑦ ᐊᔪᙱᓐᓂᖅ 12−ᒥ ᐊᒃᓱᕈᕐᓗᑎᒃ ᐅᔾᔨᕈᓱᖃᑦᑕᖁᓪᓗᑎᒍ ᐱᓕᕆᐊᒃᓴᖏᓐᓂᒡᓗ ᐱᐊᓂᒃᓯᕙᒡᓗᑎᒃ ᓲᖃᐃᒻᒪ ᐱᓕᕆᑦᑎᐊᙱᑉᐸᑕ ᓈᒻᒪᙱᓕᐅᕈᑎᖃᕐᓂᐊᕐᒪᑕ ᐃᓕᓴᐃᔨᒥᒃ ᑕᐃᒫᒡᓗ ᓈᒻᒪᒌᙱᖃᑦᑕᐅᑎᓂᕐᒥᒃ ᐱᑕᖃᖅᑎᑦᑎᑕᐃᓕᔭᕆᐊᖃᕋᑦᑕ”.

ᑭᒍᑎᒃᑳᕐᔪᒃ ᓴᐸ, ᐃᒃᐱᐊᕐᔪᒃ

 

“ᑐᓴᕐᓂᕆᖅᑲᐅᔭᕋ ᓴᒦᒻ ᐅᖃᖅᑕᖓ. ᓂᓪᓕᐅᑎᖃᖅᑲᐅᖕᒪᑦ ᐱᒻᒪᕆᐊᓗᖕᒥᒃ ᓱᓕᔪᒥᒃ. ᐅᖃᖅᖢᓂ ᕿᑐᕐᖓᕗᑦ ᐊᒃᓱᕈᕐᓇᖅᑐᖅᓯᐅᖅᐸᑕ ᐃᓄᖕᓂᒃ ᐃᑲᔪᕈᓐᓇᖅᑐᓂᒃ ᑲᔪᖏᖅᓴᐃᔪᓐᓇᖅᑐᓂᒃ ᐃᑲᔪᖅᑎᒋᔭᐅᔪᓐᓇᖅᑐᓂᒃ ᑕᑎᖃᕈᓐᓇᕐᒪᑕ. ᐃᓕᓐᓂᐊᕐᓂᕆᔭᖏᓐᓂᒃ ᐱᐊᓂᒃᓯᒪᓕᕋᓗᐊᖅᑎᓪᓗᒋᓪᓗ.

ᑲᔪᖏᖅᓴᕈᓐᓇᖅᐸᕗᑦ ᕿᑐᕐᖓᕗᑦ, ᐅᖃᐅᑎᖃᑦᑕᕐᓗᒋᑦ ᐅᐱᒋᓂᕋᕐᓗᑎᒍ ᐱᓕᕆᐊᕆᔭᖏᓐᓄᑦ ᐊᒃᓱᕈᖃᑦᑕᕐᓂᖏᓐᓄᓪᓗ. ᓂᖅᑐᖅᐸᒡᓗᒋᓪᓗ ᐅᔾᔨᕆᔪᓐᓇᕐᓂᐊᕐᒪᑕ ᐃᓗᒥᒍᑦ ᐊᒃᓱᕉᑎᖃᕈᓐᓇᕐᓂᕐᒥᒃ ᐱᓕᕆᓕᕌᖓᒥᒃ. ᐱᕈᖅᓴᑎᓪᓗᒋᑦ ᖃᐅᔨᒪᑎᓪᓗᒋᑦ ᐊᓯᒥ ᓇᒡᓕᒍᓱᒍᓐᓇᕐᓂᕐᒥᒃ ᓲᖃᐃᒻᒪ ᖃᐅᔨᒪᒐᑦᑕ ᑕᕝᕙᐅᖏᓐᓇᔾᔮᙱᓐᓂᑦᑎᓐᓂ.

ᖁᔭᓕᕗᖓ ᐆᒻᒪᑎᓐᓂᙶᖅᑐᒥᒃ ᐃᓕᓴᐃᔪᒪᓂᕐᒥᒃ ᐱᓕᕆᔪᒪᓚᐅᖅᓯᒪᒐᕕᒃ ᐅᕙᒍᓪᓗ ᓵᑦᑎᓐᓄᑦ ᐅᓂᒃᑳᕈᓐᓇᖅᖢᑎᑦ ᓲᖃᐃᒻᒪ ᕿᑐᕐᖓᕗᑦ ᐃᓕᓐᓂᐊᕌᓂᒋᐊᖃᕐᒪᑕ ᐊᔪᙱᓐᓂᖅ 12−ᒥ ᐊᓂᒍᐃᓗᑎᒃ ᐊᒻᒪ ᓯᕗᒧᒃᑲᓐᓂᖅ ᐃᓕᓐᓂᐊᒃᑲᓐᓂᕐᒥᓗᑎᒃ.”

ᒥᐊᓕ ᑲᓇᔪᖅ ᕗᐃᓯ, ᑎᑭᕋᖅᔪᐊᖅ