You are here

ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐊᕙᑎᓕᕆᓂᕐᒧᑦ ᐱᓕᕆᔾᔪᑎᓄᑦ ᐃᓕᓐᓂᐊᖅᑎᑦᑎᔪᑦ ᖁᕕᐊᓲᑎᖃᖅᐳᑦ ᐅᑭᐅᓄᑦ 35-ᓄᑦ

ᓄᕕᐱᕆ 10, 2022

ᒐᕙᒪᒃᑯᓐᓂ ᐃᓄᖕᓄᑦ ᑐᓴᖅᑕᐅᔪᒃᓴᖅ

ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᐊᕙᑎᓕᕆᓂᕐᒧᑦ ᐱᓕᕆᔾᔪᑎᓄᑦ ᐃᓕᓐᓂᐊᖅᑎᑦᑎᔪᑦ ᖁᕕᐊᓲᑎᖃᖅᐳᑦ ᐅᑭᐅᓄᑦ 35-ᓄᑦ

ᓄᓇᕗᒻᒥ ᓯᓚᑦᑐᖅᓴᕐᕕᖕᒥᐅᑦ ᐅᐱᒍᓱᑦᑎᐊᖅᐳᑦ ᖁᕕᐊᓲᑎᖃᕆᐊᒃᓴᖅ 35-ᒋᓕᖅᑕᖓᓂ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᐊᕙᑎᓕᕆᓂᕐᒧᑦ ᐃᓕᓐᓂᐊᖅᑕᐅᔪᓂᒃ, ᐊᔾᔨᒋᔭᐅᙱᖦᖢᓂ ᐊᑕᖐᓪᓗᓂᓗ ᐱᓕᕆᐊᒃᓴᖅ ᐃᓚᓕᐅᔾᔨᔪᓐᓇᖅᖢᓂ ᐃᓕᓐᓂᐊᕐᕕᐊᕈᓯᕐᓂᒃ, ᖃᐅᔨᓴᕐᕕᖕᓂᒃ, ᐊᒻᒪ ᓯᓚᒥ ᖃᐅᔨᓴᖅᑕᐅᒋᐊᓕᖕᓂᒃ ᐃᓕᓐᓂᐊᖅᑎᑦᑎᓕᕌᖓᑕ. 1987-ᖑᓚᐅᖅᑎᓪᓗᒍ, ᐊᕙᑎᓕᕆᓂᕐᒥᒃ ᐃᓕᓐᓂᐊᕐᓂᖅ ᐃᓕᓐᓂᐊᖅᑕᒥᓂᑦ ᐱᔭᕇᖅᓯᖃᑦᑕᖅᓯᒪᔪᑦ ‘ᓄᓇᕗᒻᒥ-ᓴᓇᐅᒐᐃᑦ’ ᐊᕙᑎᓕᕆᔨᙳᕐᓂᕐᒧᑦ. ᐅᓪᓗᒥᐅᔪᖅ ᐃᓕᓐᓂᐊᖅᑕᐅᓯᒪᓕᖅᑐᑦ ᐱᒻᒪᕆᐅᓪᓗᑎᒃ ᐊᓂᒍᐃᓚᐅᖅᑐᑦ, 90%-ᖑᓚᐅᖅᐳᑦ ᐃᓅᓪᓗᑎᒃ, ᑕᑯᔭᐅᔪᓐᓇᖃᑦᑕᕐᓂᐊᓕᖅᑐᑦ ᐱᓕᕆᖃᑕᐅᑎᓪᓗᒋᑦ ᖁᕕᐊᓇᑦᑎᐊᖅᑐᓂᒃ ᐱᓕᕆᐊᒃᓴᓂᒃ ᓇᓂᕈᓘᔮᓗᒃ ᓄᓇᕗᒻᒥ.

ᐃᓄᐃᑦ ᖃᐅᔨᒪᔭᑐᖃᖏᑦ ᓯᕗᓪᓕᖅᐹᒥ ᐱᓕᕆᐊᖑᓚᐅᖅᐳᑦ ᐅᑭᐅᖕᓄᑦ ᒪᕐᕉᖕᓄᑦ ᐱᔭᕇᕈᓯᐊᕋᓱᒃᑐᓂᒃ ᐃᓕᓐᓂᐊᖅᑕᖏᓐᓂᒃ ᑕᐃᒪᙵᑦ ᐃᓕᓐᓂᐊᖅᑕᐅᓯᒋᐊᓚᐅᖅᑎᓪᓗᒍ. ᐃᓄᐃᑦ ᖃᐅᔨᒪᔭᑐᖃᖏᑦᑕ ᑐᙵᕕᖏᑦ ᐃᓚᓕᐅᔾᔭᐅᓯᒪᔪᑦ ᐃᓐᓇᖅᑎᒍᑦ, ᐊᖑᓇᓱᒃᑎᑎᒍᑦ, ᐊᒻᒪ ᐃᓄᖕᓄᑦ ᐱᓕᕆᔨᒻᒪᕆᖕᓄᑦ ᐃᓕᓐᓂᐊᕐᕕᐊᕈᓯᕐᒧᑦ ᑐᙵᓱᒃᑎᑕᐅᔪᓄᑦ ᖃᐅᔨᒪᔭᑎᒃ ᐅᖃᐅᓯᕆᔭᖅᑐᖅᖢᒋᑦ.

ᐃᓚᖏᑦ ᐃᓕᓐᓂᐊᖅᑕᐅᔪᒃᓴᑦ ᓴᙱᔾᔪᑎᒋᓂᖅᐹᖏᑦ ᑐᙵᓂᖃᕐᒪᑕ ᐃᑲᔪᖅᑐᐃᔾᔪᑎᑖᖅᑎᑕᐅᑎᓪᓗᒋᑦ ᐱᓕᕆᔨᐅᖃᑎᑦᑎᓐᓂ ᐊᒻᒪ ᐊᓂᒍᐃᖃᑎᒋᔭᑦᑎᓐᓂ. ᓄᓇᕗᒻᒥ ᓯᓚᑦᑐᖅᓴᕐᕕᖕᒥᐅᑦ ᐊᖏᖅᓯᖕᒥᔪᑦ ᓄᓇᕗᑦ ᒐᕙᒪᒃᑯᓐᓂ, ᑲᓇᑕᒥ ᒐᕙᒪᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᓂᒃ, ᑭᓱᓕᕆᕝᕕᖕᓂ ᐃᓄᖕᓄᑦ ᒐᕙᒪᒋᔭᐅᔪᓂᒃ, ᐊᓯᖏᓪᓗ ᑲᒻᐸᓃᑦ ᓇᓂᕈᓘᔭᖅ ᓄᓇᕗᒻᒥ ᐃᑲᔪᖃᑦᑕᖅᓯᒪᔪᓄᑦ ᐃᓕᓐᓂᐊᖅᑕᐅᔪᒃᓴᓄᑦ ᖃᐅᔨᒪᔭᐅᖁᓪᓗᒋᑦ ᐆᒻᒪᕆᒃᑐᓂᒃ ᐊᒻᒪ ᐊᒃᑐᐊᓂᓕᖕᓂᒃ ᐃᓕᓐᓂᐊᕈᑎᒃᓴᓂᒃ.

ᐅᑭᐅᓄᑦ 35-ᓄᑦ ᐊᑐᓵᖅᑕᕗᑦ ᐊᔪᕐᓇᙱᑎᑕᐅᓵᕐᒪᑕ ᐃᓄᖕᓂ ᐃᓕᓐᓂᐊᖅᑕᐅᔪᒪᑦᑎᐊᕐᓂᖓᓄᑦ ᐊᒻᒪ ᒫᓐᓇ ᐊᒻᒪ ᑭᖑᓂᖔᑦᑎᓐᓂ ᐃᓕᓴᐃᔨᒋᖃᑦᑕᖅᓯᒪᔭᕗᑦ ᐃᑲᔪᖃᑦᑕᖅᓯᒪᓂᖏᓐᓄᑦ ᐃᓕᓐᓂᐊᖅᑕᐅᔪᒃᓴᓂᒃ ᐃᓕᓐᓂᐊᖅᑎᑦᑎᑦᑎᐊᖅᖢᑎᒃ. ᓄᓇᕗᒻᒥ ᓯᓚᑦᑐᖅᓴᕐᕕᒃ ᐃᓕᑕᖅᓯᔪᒪᖕᒥᔪᑦ ᓄᓇᕗᒥᐅᓕᒫᓂᒃ ᐱᓇᔪᒃᓯᒪᔪᓂᒃ ᐃᓕᓐᓂᐊᖃᑕᐅᔪᓂᒡᓗ ᑖᒃᑯᓂᖓ ᐃᓕᓐᓂᐊᖅᑕᐅᒋᐊᓕᖕᓂᒃ. ᐃᓕᓐᓂᐊᖅᑎᕗᑦ ᓴᙱᓂᕆᒐᑦᑎᒍᑦ, ᐱᔾᔪᑎᒋᓪᓗᑎᒍᓪᓗ ᓯᓚᑦᑐᖅᓴᕐᕕᑦᑎᓐᓂ ᐊᒃᓱᕈᖅᖢᑎᒃ ᐃᓕᓐᓂᐊᖃᑕᐅᖃᑦᑕᕐᓂᖏᓐᓄᑦ.

ᐊᕙᑎᓕᕆᓂᕐᒥᒃ ᐃᓕᓐᓂᐊᕐᓂᖅ ᐱᕈᖅᐸᓪᓕᐊᑐᐃᓐᓇᖅᑎᓪᓗᒍ, ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᑲᔪᓯᑎᑦᑎᕙᓪᓕᐊᔪᑦ ᐊᕙᑎᓕᕆᓂᕐᒥᒃ ᐃᓕᓐᓂᐊᕐᓂᕐᒥᑦ, ᐃᓕᓐᓂᐊᖅᑕᒥᓂᑦ ᐃᓱᓕᑦᑎᔪᑦ ᐅᓄᕐᓂᖅᓴᐅᓪᓗᑎᑦ, ᐱᐅᔪᒃᑯᓪᓗ ᐊᒃᑐᐃᓂᖃᕐᓂᖏᑦ ᐃᑲᔫᑎᖃᑦᑎᐊᕐᓂᕐᒥᒡᓗ ᓄᓇᕗᒻᒨᖓᓕᕐᓂᐊᖅᑐᓂ. ᐊᕙᑎᓕᕆᓂᕐᒧᑦ ᐃᓕᓐᓂᐊᕈᑕᐅᔪᑦ ᓂᕆᐅᑦᑎᐊᖅᐳᑦ ᐱᕙᒌᔭᓛᕈᒪᓪᓗᑎᒃ ᓄᓇᕗᒥᐅᓄᑦ ᐊᓕᐊᓇᐃᑦᑎᐊᖅᑐᓂᒃ ᐱᔪᓐᓇᕐᓂᖅᑖᕐᓇᖅᑐᓂᒡᓗ ᐃᖅᑲᓇᐃᔮᕆᔭᐅᓕᕈᓐᓇᖅᑐᓂᒃ ᐅᑭᐅᒃᑲᓐᓂᕐᓄᑦ 35-ᓄᑦ.

ᐃᓕᓐᓂᐊᖃᑕᐅᔪᒃᓴᓂᒃ ᐱᓇᔪᖃᑕᐅᔪᒪᒍᕕᑦ, ᖃᐅᔨᒋᐊᕈᓐᓇᖅᐳᑎᑦ ᐅᑯᓄᖓ EnviroTechProgram@arcticcollege.ca.

###

ᐱᕙᓪᓕᐊᔪᓄᑦ ᖃᐅᔨᒋᐊᕐᕕᒃᓴᖅ:

ᒥᐊᕆᐋᓇ ᐹᓂ
ᐊᐅᓚᑦᑎᔨ, ᓂᐅᕐᕈᑎᒃᓴᓕᕆᓂᖅ ᑐᓴᐅᒪᑎᑦᑎᓂᕐᓗ
ᓄᓇᕗᒻᒥ ᓯᓚᑦᑐᖅᓴᕐᕕᒃ
Mariana.Barney@arcticcollege.ca