You are here

$10−ᐅᓪᓗᕐᒥᑦ ᐸᐃᕆᕕᖕᓄᑦ ᐱᓪᓚᕆᒃᐸᓪᓕᐊᔪᖅ ᐃᓚᒌᓄᑦ ᓄᓇᕗᒻᒥ ᑎᓯᐱᕆ 2022-ᒥᑦ

ᓄᕕᐱᕆ 17, 2022

ᐱᕙᓪᓕᐊᔪᑦ ᓴᖅᑭᑕᐅᔪᑦ

$10−ᐅᓪᓗᕐᒥᑦ ᐸᐃᕆᕕᖕᓄᑦ ᐱᓪᓚᕆᒃᐸᓪᓕᐊᔪᖅ ᐃᓚᒌᓄᑦ ᓄᓇᕗᒻᒥ ᑎᓯᐱᕆ 2022-ᒥᑦ

ᐃᒡᓗᓕᒃ, ᓄᓇᕗᑦ, ᓄᕕᐱᕆ 17, 2022 - ᐊᑯᓕᐅᓗᐊᖅᑐᒥᒃ, ᐃᓚᒌᑦ ᐊᑭᑐᔪᒻᒪᕆᖕᓂᑦ ᑕᖅᑭᒧᑦ ᐊᑭᓕᕐᓱᐃᖃᑦᑕᖅᓯᒪᕗᑦ ᐸᐃᕆᕕᖕᓄᑦ ᐊᑭᓕᕆᐊᓕᖕᓂᑦ, ᐊᑯᓂᐊᓗᒡᓗ ᐅᑕᖅᑭᕙᒃᖢᑎᒃ ᐱᑕᖃᑦᑎᐊᕋᓂᓗ ᐸᐃᕆᕕᒃᑲᓐᓂᕐᓂᑦ. ᒫᓐᓇᓕ, ᐱᑕᖃᕐᓂᖅᓴᐅᓕᖅᖢᓂ, ᐊᑐᒃᑲᓐᓂᕈᓐᓇᕐᓂᖅᓴᐅᓂᐊᓕᖅᑐᑦ ᐱᐅᓛᓂᒃ, ᐊᑭᑐᓗᐊᙱᑦᑐᓂᒃ, ᐊᓯᔾᔨᒐᒃᓴᐅᔪᓂ ᐃᓚᓕᐅᔾᔨᔪᓂᒡᓗ ᐸᐃᕆᕕᖕᒥ ᐱᔭᕆᐊᖃᓪᓚᕆᖕᒪᑦ ᓄᑕᖅᑲᑦ ᐱᔭᕆᐊᓕᖏᓐᓄᑦ ᐃᓅᓯᕐᓗ ᐊᑭᑐᓗᐊᙱᓕᕐᓗᓂ ᐃᓚᒌᓄᑦ ᑲᓇᑕᒥᑦ.

ᐅᓪᓗᒥ, ᑲᕇᓇ ᒎᓪᑦ, ᐃᓚᒌᓄᑦ ᒥᓂᔅᑕᕆᔭᐅᔪᖅ, ᓄᑕᖅᑲᓄᑦ ᐊᒻᒪ ᐃᓅᖃᑎᒌᓄᑦ ᐱᕙᓪᓕᐊᑎᑦᑎᓂᕐᒧᑦ, ᐃᓚᒋᔭᐅᓪᓗᓂ ᐹᒥᓚ ᒍᕌᔅ, ᓄᓇᕗᒻᒥ ᓯᕗᓕᖅᑎᐅᑉ ᑐᒡᓕᐊ ᐊᒻᒪ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᒥᓂᔅᑕ, ᑐᓴᖅᑎᑦᑎᖅᑲᐅᕗᑦ ᓄᓇᕗᒻᒥ ᓯᕗᓪᓕᖅᐸᐅᓗᑎᒃ ᑭᒡᒐᖅᑐᐃᕕᐅᓂᖓᓂ ᐊᓂᒍᐃᑎᑦᑎᓗᑎᒃ $10−ᐅᓪᓗᕐᒧᑦ ᐸᐃᕆᕖᑦ ᐱᔪᓐᓇᐅᑎᖃᖅᖢᑎᒃ ᑲᓇᑕᓕᒫᒥ ᐃᓕᓐᓂᐊᕆᐅᖅᓴᔪᓂᒃ ᐸᐃᕆᕕᓕᕆᔨᓂᒡᓗ ᐱᓕᕆᔾᔪᓯᕐᓂᒃ. ᓄᓇᕗᑦ ᐃᓚᐅᖃᑕᐅᓕᖅᐳᖅ ᔫᑳᓐᑯᓐᓄᑦ ᑯᐸᐃᖕᒧᓪᓗ ᐃᓚᒌᓂᒃ ᒪᓕᒋᐊᓕᒃᑎᒍᑦ ᐸᐃᕆᕕᖕᒧᑦ ᐊᑭᓕᖅᑕᐅᕙᓕᕐᓗᑎᒃ $10-ᐅᓪᓗᕐᒥ ᑐᖔᓂᓪᓘᓐᓃᑦ.

ᐅᓪᓗᒥ ᑐᓴᒐᒃᓴᕆᔭᐅᔫᑉ ᖃᓄᐃᓕᖓᓕᕈᑕᐅᓂᖓ, ᐃᓚᒌᑦ ᓄᓇᕗᒻᒥ ᐃᓕᓐᓂᐊᕆᐅᖅᓴᔪᓂᒃ ᐸᐃᕆᕕᖕᒥ ᐱᔪᓐᓇᐅᑎᖃᖅᑐᒥᒃ ᐊᒻᒪ ᐱᔪᓐᓇᐅᑎᖃᖅᑐᓂᒃ ᐊᖏᕐᕋᕆᔭᐅᓪᓗᑎᒃ ᐸᐃᕆᕝᕕᐅᓲᓂᒃ ᐊᑭᓖᖃᑕᐅᔪᓐᓇᕐᓂᐊᓕᕐᒥᔪᑦ $10−ᐅᓪᓗᕐᒧᑦ ᐱᒋᐊᕐᓗᒍ ᑎᓯᐱᕆ 1, 2022. ᓇᓗᓇᐃᒃᑯᑕᖓ ᐊᓂᒍᖅᑎᑕᐅᓚᐅᖅᓯᒪᓪᓗᓂ 15-ᓂᒃ ᑕᖅᑭᓂᒃ ᓄᓇᕗᒻᒥ ᐱᓕᕆᓂᐊᖅᑎᓪᓗᒋᑦ ᐸᕐᓇᐅᑎᖓᓐᓂ, ᐊᒻᒪ ᐅᑭᐅᑦ ᐱᖓᓱᑦ ᐅᖓᑖᓄᑦ ᓯᕗᕙᓯᒃᖢᓂ ᒫᑦᓯ 2026-ᒧᑦ ᑲᓇᑕᓕᒫᒥ ᑐᕌᒐᕆᔭᐅᔪᖅ ᐊᑐᓕᖅᑎᑦᑎᕙᓪᓕᐊᓂᕐᒧᑦ.

$10−ᒥ ᐊᑭᓖᕙᒡᓗᓂ ᐸᐃᕆᕕᖕᒧᑦ, ᐃᓚᒌᑦ ᓄᓇᕘᒥ ᑮᓇᐅᔭᓂᒃ ᐊᑐᙱᓐᓂᖅᓴᐅᓂᐊᓕᖅᐳᑦ $55 ᐅᓪᓗᕐᒧᑦ ᑕᒪᐃᓐᓄᑦ ᕿᑐᕐᖓᕆᔭᓄᑦ ᐸᐃᕆᔭᐅᒋᐊᓕᖕᓄᑦ, ᒥᒃᓴᐅᖦᖢᒋᑦ ᒫᓐᓇᓕᓴᑦ ᐊᑭᒋᑎᑕᐅᔪᑦ. ᐅᑯᐊ ᐊᑐᐃᓐᓇᐅᑎᑦᑎᓂᐊᖅᑐᑦ ᐊᒃᑐᒐᒃᓴᐅᔪᓂᒃ ᐃᑲᔫᑎᖃᕐᓗᑎᒃ ᐃᓚᒌᑦ ᓄᓇᕗᒦᑦᑐᑦ ᐃᓅᓇᓱᐊᕈᑎᓄᑦ ᐊᑭᑦᑐᓈᖅᓯᓯᒪᔪᑦ.

ᔭᓄᐊᕆ 2022-ᒥ, ᐊᖏᖃᑎᒌᒍᑕᐅᓂᑯ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᑲᓇᑕᒥ ᒐᕙᒪᒃᑯᓐᓂ ᐊᑎᓕᐅᖅᑕᐅᓚᐅᖅᓯᒪᕗᖅ ᐱᔭᐅᔾᔭᐃᖅᖢᒍ $66.1 ᒥᓕᐊᓐ ᐅᑭᐅᓄᑦ ᑕᓪᓕᒪᓄᑦ ᐃᑲᔪᖅᓱᕐᓂᐊᕐᓗᒋᑦ ᐸᐃᕆᔭᐅᒋᐊᖃᖅᐸᒃᑐᑦ ᓄᓇᕗᒻᒥ. ᑕᐃᔅᓱᒪᓂᐅᓚᐅᖅᑎᓪᓗᒍ, ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᖃᑦᑕᖅᓯᒪᕗᑦ ᐃᓄᐃᑦ ᑲᑐᔾᔨᖃᑎᒌᓂᒃ ᐱᓕᕆᖃᑎᒥᓂᒃ ᐊᓂᒍᐃᔪᒪᓪᓗᑎᒃ ᑐᕌᒐᕆᔭᖏᓐᓂᒃ ᐊᒻᒪ ᐱᓕᕆᐊᒃᓴᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᐊᖏᖃᑎᒌᒍᑎᒥᒃ.

ᐅᑭᐅᑦ ᑕᓪᓕᒪᑦ ᐊᓂᒍᖅᑐᓂᒃ, ᑲᓇᑕᒥ ᒐᕙᒪᒃᑯᑦ ᐅᖃᐅᓯᖃᓚᐅᖅᓯᒪᕗᑦ ᐊᑯᓂᐅᔪᒃᑯᑦ ᑕᐅᑐᖅᑰᖅᑕᖏᑦ ᖃᐅᔨᒪᔭᐅᖁᓪᓗᒋᑦ ᓄᑕᖅᑲᑦ ᑲᓇᑕᒥ ᐊᑲᐅᓂᖅᐹᒃᑯᑦ ᐱᒋᐊᕈᑎᖃᖃᑦᑕᖁᓪᓗᒋᑦ ᐱᐅᑦᑎᐊᖅᑐᓂᒃ, ᐊᑭᓕᒐᕐᓂᖅᑐᓂᒃ, ᐊᓯᔾᔨᒐᒃᓴᐅᔪᓂᒃ, ᐊᒻᒪ ᐃᓚᓕᐅᔾᔨᒐᔪᒃᑐᓂᒃ ᐸᐃᕆᕕᖕᓂᒃ.  ᑮᓇᐅᔭᑦ ᐊᑐᖅᑐᒃᓴᑦ 2021−ᒧᑦ, ᑲᓇᑕᒥ ᒐᕙᒪᒃᑯᑦ ᑐᓴᖅᑎᑦᑎᓚᐅᖅᓯᒪᓪᓗᑎᒃ ᐸᕐᓇᑦᑎᐊᕙᒃᑖᓗᐊᓂᒃ ᐅᓪᓗᕐᒧᑦ ᐊᑕᐅᓯᕐᒧᑦ ᐊᑭᓕᖅᓱᐃᖁᔨᓪᓗᑎᒃ $10−ᓂᒃ ᐸᐃᕆᕕᓕᕆᔨᓄᑦ. ᑲᓇᑕᒥ ᒐᕙᒪᒃᑯᑦ ᐊᑎᓕᐅᖃᑕᐅᓯᒪᓕᖅᑐᑦ ᐊᑐᓕᖅᑎᑦᑎᕙᓪᓕᐊᓕᖅᖢᑎᒡᓗ ᐊᖏᖃᑎᒌᒍᑕᐅᓯᒪᔪᓂᒃ ᑲᓇᑕᒥ/ᓄᓇᕗᒻᒥᓗ ᐊᕕᒃᑐᖅᓯᒪᔪᓕᒫᓂᒃ ᐋᖅᑭᒃᓯᖁᓪᓗᒋᑦ ᑲᓇᑕᓕᒫᒧᑦ ᐃᓕᓐᓂᐊᕆᐅᖅᓴᔪᓂᒃ ᐊᒻᒪ ᐸᐃᕆᔭᐅᒋᐊᓕᖕᓂᑦ, ᑐᕌᒐᖃᕐᓗᑎᒃ ᐊᑭᓕᒃᑲᓐᓂᕆᐊᓖᑦ ᐱᔪᓐᓇᐅᑎᓕᖕᓄᑦ ᐸᐃᕆᕕᖕᓄᑦ ᑲᓇᑕᓕᒫᒥ ᐊᒃᐸᕆᐊᕐᓗᑎᒃ $10−ᐅᓪᓗᓕᒫᒧᑦ ᒫᑦᓯ 2026-ᒥ ᐱᒋᐊᕐᓗᒍ.

ᐋᖅᑭᒃᓯᓂᐊᕐᓗᓂ ᑲᓇᑕᓕᒫᒧᑦ ᐃᓕᓐᓂᐊᕆᐅᖅᓴᕕᖕᓂ ᐸᐃᕆᕕᖕᓂᓪᓗ ᓈᒻᒪᒋᔭᐅᔪᓂᒃ ᐃᓚᒌᓕᒫᓄᑦ ᑕᒪᐃᓐᓂᒃ ᐊᕕᒃᑐᖅᓯᒪᔪᓂᒃ ᐃᓚᒋᔭᐅᓪᓚᕆᖕᓂᐊᕐᒪᑦ ᑲᓇᑕᒥ ᒐᕙᒪᒃᑯᓐᓂ ᐸᕐᓇᐅᑎᖓᓐᓄᑦ ᐃᓅᓯᖅ ᐊᑭᑐᓗᐊᕈᓐᓃᕐᓗᓂ ᐃᓚᒌᓄᑦ, ᓴᖅᑭᑉᐸᓪᓕᐊᓗᒋᓪᓗ ᐃᖅᑲᓇᐃᔮᒃᓴᑦᑎᐊᕙᑦ ᐊᐅᓚᔪᓐᓇᐅᑎᓪᓗ ᐱᕚᓪᓕᖅᑎᑉᐸᓪᓕᐊᖏᓐᓇᕐᓗᒋᑦ.

ᐅᖃᐅᓯᐅᓯᒪᔪᑦ

"ᐅᓪᓗᒥ ᑐᓴᒐᒃᓴᕆᔭᐅᖅᑲᐅᔪᖅ ᐱᕐᔪᐊᖑᓪᓗᓂ ᐊᓂᒍᕈᑕᐅᕗᖅ ᒐᕙᒪᒃᑯᓐᓂ ᑕᒪᐃᓐᓂᒃ ᑕᐅᑐᖅᑰᖅᑕᐅᔪᖅ ᐋᖅᑭᒃᓯᕙᓪᓕᐊᑎᓪᓗᑕ ᐊᑭᓕᖅᓱᒐᕐᓂᖅᑐᓂᒃ, ᐃᓚᓕᐅᔾᔨᒐᔪᒃᑐᓂᒃ ᐃᓕᓐᐊᓂᕆᐅᖅᓴᔪᓂᒃ ᐊᒻᒪ ᐸᐃᕆᕕᓕᕆᔨᓂᒃ ᐃᓚᒌᓄᑦ ᓄᓇᕗᒻᒥ. ᐅᑯᐊ ᐊᓂᒍᖅᑎᑕᐅᔪᑦ ᐊᓯᔾᔨᕈᑕᐅᓪᓚᕆᖕᓂᐊᖅᑐᑦ ᐃᓚᒌᓄᑦ, ᐊᖓᔪᖅᑳᕆᔭᐅᔪᑦ ᓄᓇᕘᓕᒫᒥ ᑕᑯᔪᓐᓇᓛᕐᒪᑕ ᕼᐊᓐᓇᓚᖏᓐᓃᑦᑐᓂᒃ ᑮᓇᐅᔭᓂᒃ ᐊᑐᙱᑉᐹᓪᓕᖅᑐᓂᒃ ᑕᖅᑭᑕᒫᑦ. ᓂᕆᐅᑦᑎᐊᖅᑐᖓ ᑕᐃᓐᓇ ᐅᓪᓘᓕᖅᐸᑦ ᐃᓚᒌᑦ ᓇᓂᕈᓘᔭᖅ ᑲᓇᑕᒥ ᖁᕕᐊᓲᑎᖃᕈᓐᓇᕐᓂᐊᕐᒪᑕ ᐃᓚᒌᓄᑦ ᐃᑲᔫᓯᐊᕈᑕᐅᔪᓂᒃ ᓄᓇᕗᒻᒥ ᐊᓂᒍᖅᑎᑕᐅᖅᑲᐅᔪᒥᒃ ᐅᓪᓗᒥ.
ᒪᓕᒐᓕᐅᖅᑎ ᑲᕇᓇ ᒎᓪᑦ, ᐃᓚᒌᓄᑦ ᒥᓂᔅᑕ, ᓄᑕᖅᑲᓄᑦ ᐊᒻᒪ ᐃᓄᖕᓄᑦ ᐱᕙᓪᓕᐊᑎᑦᑎᓂᕐᒥ

"ᐊᑭᓕᒐᒃᓴᒃᑲᓐᓃᑦ ᐱᔪᓐᓇᐅᑎᓕᖕᓄᑦ ᐸᐃᕆᕕᖕᓄᑦ ᐊᑭᒃᖠᒋᐊᕐᓗᑎᒃ $10−ᐅᓪᓗᓕᒫᕐᒧᑦ ᓴᖅᑭᑦᑎᓂᐊᖅᐳᑦ ᐱᕕᒃᓴᕆᔭᐅᔪᓐᓇᖅᑐᓂᒃ ᐃᓚᒌᓄᑦ ᐱᐅᓯᕚᓪᓕᖅᑎᑦᑎᔪᒪᔪᓄᑦ ᐃᓅᓇᓱᐊᕈᑎᖏᓐᓄᑦ, ᐃᑲᔪᕐᓗᑎᒡᓗ ᓄᓇᕗᒻᒥ ᐊᐅᓚᔪᓐᓇᐅᑎᖏᓐᓄᑦ. ᑖᓐᓇ ᐊᑐᖅᑕᐅᓚᐅᖅᓯᒪᙱᑦᑐᖅ ᐊᓯᔾᔨᖅᐸᓪᓕᐊᓪᓗᓂᓗ ᓯᕗᒻᒧᑦ ᓄᑕᖅᑲᓄᑦ ᐃᓚᒌᓄᓪᓗ ᓄᓇᕗᒻᒥ, ᖁᔭᓕᑦᑎᐊᖅᐳᒍᓪᓗ ᒐᕙᒪᑐᖃᒃᑯᓐᓄᑦ ᐃᓄᐃᓪᓗ ᑲᑐᔾᔨᖃᑎᒌᑦ ᐱᓕᕆᔨᖏᓐᓄᑦ ᐃᑲᔪᖅᑐᐃᖕᒪᑕ ᑖᔅᓱᒥᖓ ᐱᓕᕆᐊᖑᑎᑕᐅᔪᒥᒃ.
ᒪᓕᒐᓕᐅᖅᑎ ᐹᒥᓚ ᒍᕌᔅ, ᒥᓂᔅᑕᐅᑉ ᑐᒡᓕᐊ ᐊᒻᒪ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᒥᓂᔅᑕ

ᓱᓕᔪᑦ

  • ᔭᓄᐊᕆ 24, 2022-ᒥ, ᓄᓇᕗᒻᒥ ᑲᓇᑕᒥᓪᓗ ᑐᓴᖅᑎᑦᑎᓚᐅᖅᐳᑦ ᑲᓇᑕᒥ−ᓄᓇᕗᒻᒥ ᑲᓇᑕᓕᒫᒥ ᐃᓕᓐᓂᐊᕆᐅᖅᓴᔪᑦ ᐸᐃᕆᕖᓪᓗ ᐊᖏᖃᑎᒌᒍᑎᖏᑦ − 2021-ᒥ 2026-ᒧᑦ. ᐊᖏᖃᑎᒌᒍᑎ ᐊᑐᐃᓐᓇᐅᑎᑦᑎᓂᐊᖅᑐᖅ $66 ᒥᓕᐊᓐ ᐅᖓᑖᓂ ᑲᓇᑕᒥ ᑮᓇᐅᔭᕆᔭᐅᓂᐊᖅᑐᓂᒃ ᐅᑭᐅᓄᑦ ᑕᓪᓕᒪᓄᑦ ᐃᑲᔪᕐᓗᒋᑦ ᐱᐅᓯᒋᐊᖅᑕᐅᑎᓪᓗᒍ ᐃᓕᓐᓂᐊᕆᐅᖅᓴᔪᑦ ᐊᒻᒪ ᐸᐃᕆᕖᓪᓗ ᓄᑕᖅᑲᓄᑦ ᓄᓇᕗᒥᐅᑕᓄᑦ.
  • ᐅᑯᐊ ᐃᓚᒋᐊᖅᑕᐅᔪᑦ $13 ᒥᓕᐊᓐ ᖃᓂᒋᔮᓃᑦᑐᑦ ᐅᖃᐅᓯᐅᓚᐅᖅᑐᓄᑦ ᐋᒡᒌᓯ 2021-ᖑᑎᓪᓗᒍ ᐊᖅᑯᑎᒋᔭᐅᓪᓗᓂ ᑲᓇᑕᒥ−ᓄᓇᕗᒻᒥ ᐃᓕᓐᓂᐊᕆᐅᖅᓴᔪᑦ ᐸᐃᕆᕖᓪᓗ ᐊᖏᖃᑎᒌᒍᑎᖓᑦ 2021-ᒥ 2025-ᒧᑦ, ᐃᓚᖃᓚᐅᖅᖢᓂᓗ $2.8 ᒥᓕᐊᓂᒃ ᐊᑕᐅᓯᐊᖅᑕᐅᓪᓗᓂ ᑮᓇᐅᔭᓕᐅᕈᑕᐅᓇᓱᒃᑐᕕᓂᖅ 2021-2022−ᒥ ᐃᑲᔪᖅᓱᐃᔾᔪᑕᐅᓪᓗᓂ ᐃᓕᓐᓂᐊᕆᐅᖅᓴᕐᕕᖕᒥ ᐃᖅᑲᓇᐃᔭᖅᑎᓄᑦ.
  • ᐅᓪᓗᒥ ᑐᓴᒐᒃᓴᕆᔭᐅᖅᑲᐅᔪᖅ, ᑲᓇᑕᓕᒫᒥ ᓄᓇᕗᒻᒥᓗ ᐊᕕᒃᑐᖅᓯᒪᔪᓂᒃ ᑐᓴᒐᒃᓴᖃᖅᑲᐅᓂᖏᓐᓂᒃ ᐸᐃᕆᕕᖕᓄᑦ ᐊᑭᓕᐅᑎᑦ ᐊᑭᒃᖠᒋᐊᕐᓂᖏᓐᓂᒃ, ᐅᕝᕙᓘᓐᓃᑦ ᐸᐃᕆᕕᓕᐊᖅᑎᑦᑎᑲᑕᓕᕇᖅᑐᓄᑦ $10-ᒥ ᐅᓪᓗᓕᒫᒧᑦ ᐊᑭᓕᖅᓱᐃᓗᑎᒃ ᑐᖔᓂᓪᓘᓐᓃᑦ.
  • ᐊᖏᖃᑎᒌᒍᑎᒧᑦ ᐃᓚᒋᔭᐅᓪᓗᓂ, ᓄᓇᕗᒻᒥ ᓴᖅᑭᑦᑎᓛᖅᑐᑦ 238 ᓄᑖᓂᒃ ᐱᔪᓐᓇᐅᑎᓕᖕᓂᒃ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᑦ ᐃᓂᒃᓴᕆᔭᐅᔪᓂᒃ ᒫᑦᓯ 2026-ᒧᑦ ᐃᓱᖃᕐᓗᒍ, 30−ᓂᒃ ᐸᐃᕆᕕᒃᑕᖄᓂᒃᑎᓪᓗᒍ.
  • ᐊᖏᖃᑎᒌᒍᑎ ᐃᓕᑕᖅᓯᖃᑕᐅᖕᒥᔪᖅ ᐱᕐᔪᐊᖑᓪᓗᑎᒃ ᐱᓕᕆᐊᒃᓴᕆᔭᐅᔪᑦ ᐃᓕᓴᐃᔨᓄᑦ ᖃᐅᔨᒪᔭᐅᑎᖦᖢᒋᑦ ᐃᓚᒌᑦ ᐱᓇᔪᖃᑕᐅᔪᓐᓇᕐᓂᖏᓐᓄᑦ ᐱᐅᑦᑎᐊᖅᑐᓄᑦ ᐸᐃᕆᕕᓕᕆᔾᔪᑎᓄᑦ.  ᓄᓇᕗᒻᒥ ᑐᒃᓯᕋᕐᒪᑕ ᐊᑐᕈᒪᓪᓗᑎᒃ 20% ᐅᖓᑖᓂ ᑮᓇᐅᔭᓂᒃ ᐊᖏᖃᑎᒌᒍᑎᒦᑦᑐᓂᒃ ᐃᑲᔪᖅᓱᐃᔾᔪᑎᒋᓗᒋᑦ ᐃᖅᑲᓇᐃᔭᕐᕕᖏᓐᓄᑦ ᑮᓇᐅᔭᓕᐊᑎᒃ ᐊᑭᑦᑐᕆᐊᖅᑕᐅᓗᑎᒃ, ᐃᑲᔫᑕᐅᓇᔭᕐᒥᖕᒪᑦ ᐸᐃᕆᕕᖕᓄᑦ ᐱᕈᖅᐹᓪᓕᕈᑕᐅᓗᓂ.
  • ᑕᒪᑐᒪᓂ ᐊᕐᕌᒍᒥ, ᐃᑲᔪᖅᑐᐃᔾᔪᓯᑦ ᐸᐃᕆᕕᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᓚᓕᐅᔾᔨᓯᒪᔪᖅ ᐃᖅᑲᓇᐃᔮᖃᐃᓐᓇᓕᖅᑐᑦ ᐊᑭᓕᐅᓯᐊᖏᓐᓄᑦ ᐃᓚᒋᐊᕈᑎᒃᑲᓐᓂᐅᓗᑎᒃ ᐱᔪᓐᓇᐅᑎᓕᖕᓂᒃ ᐸᐃᕆᕕᓕᖕᓄᑦ.
  • ᐃᓚᒋᔭᐅᓪᓗᓂ ᑮᓇᐅᔭᑦ ᐊᑐᖅᑐᒃᓴᓄᑦ 2021-ᒥ, ᑲᓇᑕᒥ ᒐᕙᒪᒃᑯᑦ ᑮᓇᐅᔭᓕᐅᕋᓱᐊᑦᑎᐊᓚᐅᖅᓯᒪᖕᒪᑕ $27 ᐱᓕᐊᓂᒃ ᐅᑭᐅᑦ ᑕᓪᓕᒪᓄᑦ ᐋᖅᑭᒃᓯᓇᓱᒃᖢᑎᒃ ᑲᓇᑕᓕᒫᒧᑦ ᐃᓕᓐᓂᐊᕆᐅᖅᓴᕕᖕᓄᑦ ᐸᐃᕆᕕᖕᓄᓪᓗ ᑲᓇᑕᒥ ᓄᓇᕗᒻᒥᓗ ᐊᕕᒃᑐᖅᓯᒪᔪᓂᒃ. ᑲᑎᖅᓱᒐᐅᓪᓗᑎᒃ ᐊᓯᖏᓐᓄᑦ ᑮᓇᐅᔭᓕᐅᕈᑕᐅᓇᓱᐊᖅᑐᓄᑦ, ᐃᓚᓕᐅᑎᓗᒋᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕆᐅᖅᓴᕐᕕᖏᑦ ᐸᐃᕆᕕᖏᓪᓗ, $30 ᐱᓕᐊᓄᑦ ᑎᑭᓪᓗᒍ ᐅᑭᐅᓄᑦ ᑕᓪᓕᒪᓄᑦ ᐊᑐᐃᓐᓇᕈᖅᑎᑕᐅᓛᖅᑐᑦ ᐃᑲᔪᖅᓲᑕᐅᓪᓗᑎᒃ ᐃᓕᓐᓂᐊᕆᐅᖅᓴᔪᓄᑦ ᐊᒻᒪ ᐸᐃᕆᕕᓕᕆᔨᓄᑦ.

ᐊᒃᑐᐊᓂᓖᑦ ᐊᑦᑕᑕᕐᕕᐅᔪᓐᓇᖅᑐᑦ

ᑲᓇᑕ−ᓄᓇᕗᑦ ᐃᓕᓐᓂᐊᕆᐅᖅᓴᔪᓄᑦ ᐸᐃᕆᕕᓐᓄᓪᓗ ᐊᖏᖃᑎᒌᒍᑎ − 2021-ᒥ 2026-ᒧᑦ
https://www.canada.ca/en/early-learning-child-care-agreement/agreements-...

ᑲᓇᑕ−ᓄᓇᕗᑦ ᐃᓕᓐᓂᐊᕆᐅᖅᓴᔪᓄᑦ ᐸᐃᕆᕕᓐᓄᓪᓗ ᐊᖏᖃᑎᒌᒍᑎ − 2021-ᒥᑦ 2025-ᒧᑦ.
https://www.canada.ca/en/early-learning-child-care-agreement/agreements-...

$10-ᐅᓪᓗᕐᒨᖓᔪᕐᒧᑦ: ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ
https://www.canada.ca/en/employment-social-development/campaigns/child-c...

- 30 -

ᑐᓴᐅᒪᔪᓕᕆᔨᒃᑯᓐᓄᑦ ᖃᐅᔨᒋᐊᕈᒪᒍᕕᑦ ᐅᓇ ᖃᐅᔨᒋᐊᕐᕕᐅᔪᓐᓇᖅᑐᖅ:

ᒧᕼᐋᒥᑦ ᕼᐆᓴᐃᓐ
ᐱᕙᓪᓕᐊᔪᓂᒃ ᑎᑎᕋᖅᑎ
ᐊᓪᓚᕝᕕᖓ ᒥᓂᔅᑕᐅᑉ ᐃᓚᒌᓄᑦ ᓄᑕᖅᑲᕐᓄᑦ ᐃᓄᓕᕆᓂᕐᒧᓪᓗ ᐱᕙᓪᓕᐊᑎᑦᑎᓂᕐᒥᑦ, ᑲᕇᓇ ᒎᓪᑦ
mohammad.a.hussain@hrsdc-rhdcc.gc.ca

ᑯᑐᓚ ᒪᑦᓴᔨ   
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᓂᕐᒧᑦ
ᐃᓕᓐᓂᐊᕐᓂᓕᕆᔨᒃᑯᑦ,
ᓄᓇᕗᑦ ᒐᕙᒪᖓᑦ
867-975-5649
kmatshazi@gov.nu.ca

ᑮᓯ ᓚᓱᑦ
ᑐᑭᒧᐊᒃᑎᑦᑎᔨ ᑐᓴᐅᒪᔪᓕᕆᔨᒃᑯᓐᓂᑦ,
ᓄᓇᕗᑦ ᒐᕙᒪᒃᑯᓐᓂ
867-975-6004
clessard2@gov.nu.ca

ᑐᓴᒐᒃᓴᓕᕆᔨᒃᑯᑦ ᑎᑎᕋᕐᕕᖓᑦ
ᐃᖅᑲᓇᐃᔭᖅᑐᓕᕆᓂᕐᒧᑦ ᐃᓅᖃᑎᒌᓄᓪᓗ ᐱᕙᓪᓕᐊᔪᓕᕆᔨᒃᑯᑦ ᑲᓇᑕᒥ
819-994-5559
media@hrsdc-rhdcc.gc.ca
ᒪᓕᒃᑕᐅᔪᓐᓇᖅᑐᒍᑦ Twitter−ᑯᑦ