ᐅᖃᓚᐅᑎᓯᐅᑏᑦ

You are here

ᑕᐃᕕᑎ ᔪᐊᓇᓯ, ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓄᑦ

ᑕᐃᕕᑎ ᔪᐊᓇᓯ ᓂᕈᐊᖅᑕᐅᒃᑲᓐᓂᓚᐅᖅᑐᖅ ᓂᕈᐊᕐᓇᐅᑎᓪᓗᒍ ᐅᒃᑐᐱᕆ 30, 2017-ᒥᑦ, ᑭᒡᒐᖅᑐᐃᓪᓗᓂ ᕿᑭᖅᑖᓘᑉ ᓂᒋᐊᓂᑦ, ᑕᓪᓕᒪᒋᔭᖓᓂᒃ ᒪᓕᒐᓕᐅᖅᑎᓄᑦ ᓄᓇᕗᒻᒥᑦ. ᐅᑯᐊ ᑭᒡᒐᖅᑐᖅᑕᖏᑦ ᐃᓚᒋᔭᐅᔪᑦ, ᑭᙵᐃᑦ ᐊᒻᒪᓗ ᑭᒻᒥᕈᑦ.

ᒥᔅᑕ ᔪᐊᓇᓯ ᓂᕈᐊᖅᑕᐅᓚᐅᖅᐳᖅ ᑲᑎᒪᔨᕐᔪᐊᓄᑦ ᓄᕕᒻᐱᕆ 17, 2017-ᒥᑦ, ᓄᓇᕗᒻᒥᑦ ᓯᕗᓕᖅᑎᒃᓴᐅᓂᕐᒧᑦ. ᒥᓂᔅᑕ ᔪᐊᓇᓯ ᐊᖏᖅᑎᑕᐅᓚᐅᖅᐳᖅ ᒥᓂᔅᑕᒃᓴᐅᓂᕐᒧᑦ ᓄᕕᒻᐱᕆ 21, 2017-ᒥᑦ. ᒥᓂᔅᑕᐅᓕᖅᐳᖅ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐃᓕᖅᑯᓯᓕᕆᔨᒃᑯᓐᓄᑦ, ᓄᓇᕗᒻᒥᑦ ᓯᓚᑦᑐᖅᓴᕐᕕᖕᒥᑦ ᐊᒻᒪᓗ ᐅᖃᐅᓯᓕᕆᓂᕐᒧᑦ.

ᑕᐃᕕᑎ ᔪᐊᓇᓯ 4−ᒋᔭᖓᓂᑦ ᒪᓕᒐᓕᐅᕐᕕᒻᒥᑦ ᑲᑎᒪᔨᐅᓚᕆᕗᖅ. ᒥᔅᑕ ᔪᐊᓇᓯ ᐃᒃᓯᕙᐅᑕᐅᖃᑕᐅᓚᐅᕆᕗᖅ ᒪᓕᒐᓕᐅᖅᑎᓄᑦ ᐃᓚᒋᔭᐅᓪᓗᓂ ᐊᐅᓚᑦᑎᓕᕆᓂᕐᒧᑦ ᐊᒻᒪᓗ ᐱᔨᑦᑎᕋᖅᑎᓄᑦ.

ᓱᓕ ᓂᕈᐊᖅᑕᐅᓚᐅᖏᑎᓪᓗᒍ, ᒥᔅᑕ ᔪᐊᓇᓯ ᑐᓴᒐᒃᓴᓕᕆᓂᕐᒧᑦ ᐊᐅᓚᑦᑎᔨᐅᓚᐅᖅᐳᖅ ᐃᓄᐃᑦ ᕿᑭᖅᑕᓂᒃᑯᓂᑦ. ᒥᔅᑕ ᔪᐊᓇᓯ ᐃᖅᑲᓇᐃᔭᖅᑎᒋᔭᐅᓚᐅᕆᕗᖅ ᐃᓕᖅᑯᓯᓕᕆᔨᒃᑯᓐᓂᑦ, ᐅᖃᐅᓯᓕᕆᓂᕐᒧᑦ, ᐃᓐᓇᕐᓄᑦ ᐊᒻᒪᓗ ᒪᒃᑯᒃᑐᓄᑦ, ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥᑦ.

ᒥᔅᑕ ᔪᐊᓇᓯ ᓇᓗᓇᐃᒃᑯᑕᖅᑖᖅᓯᒪᕗᖅ ᐱᔅᓂᓯᒧᑦ ᑐᓴᒐᒃᓴᓕᕆᓂᕐᒧᑦ ᑖᒃᑯᓇᖓᑦ ᓴᐃᓐᑦ ᒥᐊᓕ ᓯᓚᑦᑐᖅᓴᕐᕕᒡᔪᐊᖓᓂᑦ ᐊᒻᒪᓗ ᓇᓗᓇᐃᒃᑯᑕᖅᑖᕆᓪᓗᓂ ᑖᒃᑯᓇᙵᑦ ᐋᒡᒐᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂᑦ. ᒥᔅᑕ ᔪᐊᓇᓯ ᐃᓕᓐᓂᐊᖃᑕᐅᓚᐅᕆᕗᖅ ᓄᓇᕗᑦ ᓯᕗᓂᒃᓴᕗᒥᑦ ᐋᑐᕙᒥᑦ.

ᒥᔅᑕ ᔪᐊᓇᓯ ᐃᓚᐅᓚᐅᕆᕗᖅ ᓄᓇᕗᑦ ᐱᙳᐊᖅᑎᕐᔪᐊᖏᑦᑕ ᐃᖅᑲᓇᐃᔭᖅᑎᖏᓐᓂᒃ ᐊᒻᒪᓗ ᐃᓚᐅᓚᐅᕆᓪᓗᓂ ᐅᑭᐅᖅᑕᖅᑐᒥᑦ ᒪᒃᑯᒃᑐᒫᓄᑦ. ᒥᔅᑕ ᔪᐊᓇᓯ ᐃᓚᒋᔭᐅᓚᐅᖅᓯᒪᒋᕗᖅ ᓯᕗᓕᖅᑎᓄᑦ ᑲᑎᒪᔨᓄᑦ ᑖᒃᑯᓇᓂ ᑐᒥᑯᓗᐃᑦ ᓴᐃᐹᕿᕕᒃ ᐸᐃᕆᕝᕕᐊᓂᑦ.

ᑕᐃᕕᑎ ᐊᒻᒪ ᐃᒥᓕ ᔪᐊᓇᓯ ᕿᑐᕐᖓᖃᖅᐳᒃ ᑎᓴᒪᓂᒃ: ᓴᐃᕆ, ᓯᓐᑎᐊ, ᖁᓕᑦᑕᓕᒃ, ᐊᒻᒪᓗ ᐱᑦᑖᓗᒃ. ᒥᔅᑕ ᔪᐊᓇᓯᐅᑉ ᖁᕕᐊᒋᔭᖃᕆᕗᖅ ᐊᖑᓇᓱᖕᓂᕐᒥᑦ, ᐃᖃᓪᓕᐊᕐᓂᕐᒥᑦ, ᕼᐊᑭᓐᓂᕐᒥᒃ, ᓇᒧᑐᐃᓐᓇᖅ ᐊᐅᓪᓚᑲᑕᖕᓂᕐᒥᑦ, ᐃᓄᐃᑦ ᐃᓕᖅᑯᓯᖏᑦᑐᑦ ᓄᓇᒧᑦ ᐊᐅᓛᑲᑕᖕᓂᕐᒧᑦ ᐊᒻᒪᓗ ᐃᓄᐃᑦ ᐅᖃᐅᓯᖏᑎᑐᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ.