ᐳᕙᒡᓗᖕᓇᖅᑐᖅ
ᑭᓲᕙ ᐳᕙᒡᓗᖕᓇᖅᑐᖅ?
ᐳᕙᒡᓗᖕᓇᖅᑐᖅ ᐊᐃᑦᑐᕐᓗᒍᑎᒋᔭᒃᓴᐅᓪᓗᓂ ᐋᓐᓂᐊᖑᕗᖅ ᓴᖅᑭᑎᑕᐅᕙᒃᖢᓂ ᖁᐱᕐᕈᓂᑦ ᓯᐅᒻᒪᒃᑎᖅᑕᐅᓲᓂᒃ ᐊᓂᖅᓵᖅᑐᒐᒃᑯᑦ ᑭᓇᑐᐃᓐᓇᖅ ᑕᐃᒪᐃᑦᑐᖅᑖᕐᓇᖅᑐᒥᒃ ᐳᕙᒡᓗᒃᑐᖅ, ᖁᐃᖅᓱᖅᐸᑦ, ᑕᒋᐅᖅᐸᑦ, ᐃᙱᖅᐸᑦ ᐅᖃᓪᓚᒃᐸᓪᓘᓐᓃᑦ. ᑕᒪᓐᓇ ᐊᒃᑐᖅᓯᓪᓗᐊᑕᖅᐸᒃᐳᖅ ᐳᕙᖕᓂᒃ ᐊᓂᖅᓵᖅᑐᕐᕕᖕᓂᒡᓗ, ᑭᓯᐊᓂᓗᑦᑕᐅᖅ ᐊᒃᑐᖅᓯᔪᓐᓴᕆᓪᓗᓂ ᐊᓯᖏᓐᓂᒃ ᑎᒥᒦᑦᑐᓂᒃ.
ᐳᕙᒃᓗᖕᓇᐅᑉ ᖁᐱᕐᕈᐊᕐᔪᖏᑦ ᐃᓯᕌᖓᑕ ᑎᒥᑦᑎᓐᓄᑦ ᐊᓂᖅᓵᕌᖓᑦᑕ ᖁᐱᕐᕈᐊᕐᔪᖕᓂ ᐊᓂᖅᑎᕆᕝᕕᐅᔪᓐᓇᖅᑐᒥ ᑭᓇᑭᐊᖅ ᐆᒻᒪᕆᒃᑐᒥ ᐳᕙᒃᓗᖕᓇᖅᑐᒥᒃ ᐋᓐᓂᐊᓕᖕᒥᑦ. ᑲᑎᐸᖕᓂᖏᑦ ᐳᕙᒡᓗᖕᓇᖅᑐᒧᑦ ᖁᐱᕐᕈᐃᑦ ᑕᐃᒪᐃᓕᖅᑎᑕᐅᒃᑲᓐᓂᖅᐸᒃᐳᑦ ᐅᑯᑎᒎᓇᖅ:
- ᖃᓄᖅ ᐊᐃᑦᑐᕐᓗᒃᑎᒋᔪᓐᓇᕐᓂᖓ ᑕᒪᑐᒪ ᐋᓐᓂᐊᕆᔭᐅᔫᑉ
- ᐊᓂᖅᓵᖅᑐᒐᐅᑉ ᓇᒧᙵᖅᐸᓪᓕᐊᓂᕆᕙᒃᑕᖓᒍᑦ ᓯᓚᒥᒡᓗ ᐃᓯᖅᑎᑦᑎᕙᓪᓕᐊᓂᐅᕙᒃᑑᑉ
- ᐊᒥᖅᑳᕈᑎᖃᕐᓗᓂ ᐊᓂᖅᓵᖅᑐᒐᕐᒥᒃ
- ᐃᓕᖅᑯᓯᖏᑦ ᐃᓄᒃ ᐆᒻᒪᕆᒃᑐᒥ ᐳᕙᒃᓗᖕᓇᓕᒃ
ᐱᑕᖃᖅᐳᖅ ᒪᕐᕉᖕᓂᒃ ᐳᕙᒡᓗᖕᓇᖅᑑᖕᓂᒃ; ᐆᒻᒪᕆᒃᑐᖅ ᐳᕙᒡᓗᖕᓇᖅᑐᖅ, ᐅᕝᕙᓘᓐᓃᑦ ᐆᒻᒪᕆᙱᑦᑐᖅ (ᐅᕝᕙᓘᓐᓃᑦ ᐃᒪᓐᓇ ᖃᐅᔨᒪᔭᐅᒋᓪᓗᓂ, ᓯᓂᒃᑐᖅ ᐳᕙᒡᓗᖕᓇᖅᑐᖅ).
ᐆᒻᒪᕆᙱᑦᑐᖅ ᐳᕙᒡᓗᖕᓇᖅᑐᖅ
ᐱᓯᒪᒍᕕᑦ ᐆᒻᒪᕆᙱᑦᑐᒥᒃ(ᓯᓂᒃᑐᒥᒃ) ᐳᕙᒡᓗᖕᓇᖅᑐᒥᒃ ᐊᐃᑦᑐᕐᓗᒃᑕᐅᓯᒪᓂᕐᒥᒃ, ᐃᒪᓐᓇ ᑕᒪᓐᓇ ᑐᑭᖃᖅᐳᖅ, ᐳᕙᒡᓗᖕᓇᖅᑐᑦ ᖁᐱᕐᕈᐃᑦ ᑎᒥᖕᓃᑦᑑᒐᓗᐊᑦ ᑭᓯᐅᓂ ᓯᓂᒃᖢᑎᒃ ᐊᖏᒡᓕᕙᓪᓕᐊᙱᖦᖢᑎᒡᓗ. ᐆᒻᒪᕆᙱᑦᑐᒥᒃ ᐳᕙᒡᓗᒃᑯᕕᑦ:
- ᐋᓐᓂᐊᕐᓂᖃᔾᔮᙱᑦᑐᑎᑦ ᓯᐊᒻᒪᒃᑎᕆᔪᓐᓇᙱᖦᖢᑎᓪᓗ ᐳᕙᒡᓗᖕᓇᖅᑐᒥᒃ ᐊᓯᖕᓄᑦ.
- ᐊᐃᑦᑐᕐᓗᒃᓯᔪᓐᓇᙱᓚᑎᑦ
- ᑕᑯᒃᓴᐅᑎᑦᑎᔪᓐᓇᙱᓚᑎᑦ ᐳᕙᒡᓗᖕᓇᖅᑐᒧᑦ ᓇᓗᓇᐃᒃᑯᑕᕐᓂᒃ/ᖃᐅᔨᔾᔪᑕᐅᔪᓐᓇᖅᑐᓂᒃ
- ᖁᐊᖅᓵᕐᓇᖅᑐᒦᑉᐳᑎᑦ ᐱᖃᓕᕆᐊᒃᓴᖅ ᐳᕙᒡᓗᖕᓇᖅᑐᒥᒃ ᐋᓐᓂᐊᕐᓇᒥᒃ ᑭᓯᐊᓂ ᑲᒪᒋᔭᐅᒍᕕᑦ LTBI−ᒧᑦ ᐱᔭᕇᖅᑕᐅᒃᐸᓪᓗ
ᐆᒻᒪᕆᒃᑐᖅ ᐳᕙᒡᓗᖕᓇᖅᑐᖅ
ᐳᕙᒡᓗᖕᓇᖅᑐᖅ ᐋᓐᓂᐊᖑᔪᖅ ᓯᐊᒻᒪᒃᐸᓪᓕᐊᓲᖑᓪᓗᑎᒃ ᐃᓄᖕᒥᑦ ᐃᓄᖕᒧᑦ ᐊᓂᖅᑎᕆᔭᒃᑯᑦ. ᐳᕙᒡᓗᖕᓇᖅᑐᖅ ᐊᒃᑐᒃᓯᒐᔪᓲᖅ ᐳᕙᖕᓂᒃ, ᑭᓯᐊᓂ ᐊᒃᑐᖅᓯᔪᓐᓇᕐᒥᔪᖅ ᑎᒥᐅᑉ ᑭᓱᑯᑦᑎᖏᓐᓂᒃ, ᓲᕐᓗ ᖃᕋᓴᕐᒥᒃ ᐅᕝᕙᓘᓐᓃᑦ ᕿᒥᕐᓗᖕᒥᒃ. ᐳᕙᒡᓗᖕᓇᖅ ᒪᒥᓴᖅᑕᐅᔪᓐᓇᖅᑐᖅ ᐱᔪᓐᓃᖅᑎᑕᐅᓗᓂᓗ , ᑭᓯᐊᓂ ᐃᓅᓕᓴᖅᑕᐅᓗᓂ ᑲᒪᒋᔭᐅᙱᑉᐸᑦ ᐃᓅᔪᓐᓃᑐᐃᓐᓇᕆᐊᖃᖅᑐᑎᑦ.
ᖃᐅᔨᔾᔪᑕᐅᒐᔪᒃᐸᒃᑐᑦ ᖃᓄᐃᓕᖓᓕᕐᓂᕆᔭᐅᕙᒃᑐᓪᓗ:
- ᖁᐃᖅᓱᖅᐸᒡᓗᓂ ᖁᐃᖅᓱᖅᑕᖓᓗ ᐱᓇᓱᐊᕈᓰᑦ ᐱᖓᓱᑦ ᐅᖓᑖᓅᕐᓗᓂ
- ᐆᓇᖅᐸᒡᓗᓂ ᐅᓐᓄᐊᒃᑯᓪᓗ ᐊᐅᒪᔮᖅᐸᒡᓗᓂ
- ᓂᕆᔪᒪᔪᓐᓃᖅᓯᒪᓗᓂ ᐅᕿᒡᓕᕙᓪᓕᐊᓗᓂᓘᓐᓃᑦ
- ᐊᐅᓕᖕᒥᒃ ᖁᐃᖅᓱᖅᐸᒡᓗᓂ
- ᑕᖃᖓᓂᖅᓴᐅᖃᑦᑕᓕᕐᓗᓂ
ᐃᖃᐅᒪᓂᐊᖅᐳᑎᑦ! ᐆᒻᒪᕆᒃᑐᒥᒃ ᐆᒻᒪᕆᙱᑦᑐᒥᒡᓘᓐᓃᑦ ᐱᔪᓐᓇᙱᓚᑎᑦ ᐃᒪᐃᓕᐅᕋᓗᐊᕈᕕᑦ:
- ᐹ ᑎᒍᒻᒥᕕᖏᓐᓂᒃ ᐊᒃᑐᖅᓯᓗᑎᑦ
- ᑕᓯᐅᖃᑦᑖᖅᓯᓗᑎᑦ
- ᐊᒥᖅᑳᖃᑎᖃᖃᑦᑕᕈᕕᑦ ᐃᒥᐅᑎᓂᒃ
- ᐊᓐᓄᕌᕆᙱᑕᕐᓂᒃ ᐊᑐᕐᓂᕈᕕᑦ
- ᐃᕿᑦᑎᒍᕕᑦ
ᑲᑎᓚᐅᖅᑕ ᖃᐅᔨᓴᖅᑕᐅᓗᑕᓗ ᐃᓗᐊᖅᓴᖅᑕᐅᓗᑕᓗ
ᐋᓐᓂᐊᕕᓕᐊᕐᕕᔅᓯᓐᓄᙵᐅᓗᑎᑦ ᐃᓗᐊᖅᓴᖅᑕᐅᕝᕕᖕᒧᑦ ᖃᐅᔨᓴᖅᑕᐅᓗᑎᓪᓗ ᐳᕙᒡᓗᖕᓇᖅᑐᒧᑦ. ᐅᕗᖓᑦᑕᐅᖅ ᐅᖄᓚᔪᓐᓇᕆᕗᑎᑦ 1-833-975-6331, ᐊᑭᓕᕆᐊᖃᙱᑦᑐᒧᑦ, ᑐᓴᖅᑕᖃᒃᑲᓐᓂᕈᒪᒍᕕᑦ. ᑕᐃᑲᙵᑦ, ᐅᖃᓪᓚᖃᑎᖃᕈᓐᓇᖅᐳᑎᑦ ᐃᓄᖕᒥᒃ ᐅᒃᐱᕆᔭᒃᓴᐅᑦᑎᐊᖅᑐᒥᒃ ᖃᐅᔨᒪᓂᖃᑦᑎᐊᕐᓗᓂᓗ ᐳᕙᒡᓗᖕᓇᖅᑐᒧᑦ.
ᐱᒻᒪᕆᐅᕗᖅ ᖃᐅᔨᓴᖅᑕᐅᓗᓂ ᐳᕙᒡᓗᖕᓇᖅᑐᒧᑦ ᐃᒪᐃᓐᓂᖓᓄᑦ, ᐃᓕᖕᓂᒃ ᓴᐳᔾᔨᓯᒪᔪᓐᓇᕐᒪᑦ, ᐃᓚᖕᓂᒃ, ᓄᓇᓕᖕᒥᐅᑕᐅᖃᑎᖕᓂᒡᓗ. ᖃᐅᔨᓴᖅᑕᐅᓂᖅ ᓯᕗᓪᓕᖅᐹᖑᕗᖅ ᓇᓗᙱᑦᑎᐊᕈᒪᒍᕕᑦ ᓄᓇᓖᑦ ᓴᙲᓐᓇᕋᓗᐊᕐᒪᖔᑦ ᐳᕙᒡᓗᖕᓇᖅᑐᖅᑕᖃᕋᓂᓗ. ᑎᓕᐅᕐᓗᒋᑦ ᖃᑕᙳᑎᑎᑦ, ᐱᖃᓐᓇᕆᔭᑎᑦ ᓄᓇᓕᖕᒥᐅᓪᓗ ᖃᐅᔨᓴᖅᑕᐅᖁᓗᒋᑦ. ᓄᓇᔅᓯᓐᓂ ᐋᓐᓂᐊᕕᓕᐊᕐᕕᔅᓯᓐᓄᙵᐅᓗᑎᑦ ᖃᐅᔨᓴᖅᑕᐅᔭᖅᑐᕐᓗᑎᑦ ᐳᕙᒡᓗᖕᓇᖅᑐᒧᑦ, ᐅᕗᖓᓘᓐᓃᑦ ᐅᖄᓚᓗᑎᑦ 1-833-975-6331 ᑐᓴᖅᑕᖃᒃᑲᓐᓂᕈᒪᒍᕕᑦ ᑭᓲᖕᒪᖔᑦ ᐳᕙᒡᓗᖕᓇᖅᑐᒧᑦ ᖃᐅᔨᓴᖅᑕᐅᓂᖅ, ᓇᓂᓗ ᑕᒪᓐᓇ ᒪᓂᒪᑎᑕᐅᕙᖕᒪᖔᑦ.
ᐳᕙᒡᓗᖕᓇᖅᑐᒧᑦ ᖃᐅᔨᓴᖅᑕᐅᓂᖅ ᐊᒻᒪᓗ ᐃᖢᐊᖅᓴᖅᑕᐅᓂᖅ ᐊᑭᖃᖏᑦᑐᖅ. ᖃᐅᔨᓴᖅᑕᐅᓂᖅ ᐃᓕᖕᓂᒃ ᓴᐳᔾᔨᓯᒪᕙᒃᐳᖅ, ᖃᑕᙳᑎᖕᓂᒃ ᓄᓇᓕᖕᓂᒡᓗ, ᑕᑯᒃᓴᐅᑎᑦᑎᓪᓗᓂᓗ ᑲᒪᒋᔭᖃᑦᑎᐊᕐᓂᕐᓂᒃ ᖃᓄᙱᑦᑎᐊᕈᓐᓇᕐᓂᖏᓐᓂᒃ ᐃᓅᓯᑦᑎᐊᕆᒍᓐᓇᕐᓂᖏᓐᓂᒡᓗ ᑭᒃᑯᑐᐃᓐᓇᐃᑦ.
ᐃᓗᐊᖅᓴᖅᑕᐅᓂᖅ ᐱᓕᕆᐊᖑᕙᒃᐳᖅ ᓇᖕᒥᓂᖅ ᓄᓇᔅᓯᓐᓂ. ᐃᓗᐊᖅᓴᖅᑕᐅᓂᖅ ᐃᑲᔪᖅᐸᒃᐳᖅ ᐱᑕᖃᖅᑎᑦᑎᙱᖦᖢᓂ ᓯᐊᒻᒪᒃᑎᕆᓂᕐᒥᒃ ᐳᕙᒡᓗᖕᓇᖅᑐᒥᒃ. ᓇᒧᑐᐃᓐᓇᖅ ᐊᐅᓪᓚᕆᐊᖃᙱᓚᑎᑦ ᖃᐅᔨᓴᖅᑕᐅᓂᐊᕐᓗᑎᑦ ᐃᓗᐊᖅᓴᖅᑕᐅᓂᐊᕐᓗᑎᓪᓘᓐᓃᑦ ᐳᕙᒡᓗᖕᓇᖅᑐᒧᑦ. ᐱᔪᓐᓇᖅᐳᑎᑦ ᐳᕙᒡᓗᖕᓇᖅᑐᒧᑦ ᖃᐅᔨᓴᖅᑕᐅᓂᕐᒥᒃ ᐃᓗᐊᖅᓴᖅᑕᐅᓂᕐᒥᒡᓗ ᓄᓇᔅᓯᓐᓂ ᐋᓐᓂᐊᕕᓕᐊᕐᕕᔅᓯᓐᓂ. ᐱᒻᒪᕆᐅᕗᖅ ᐃᓗᐊᖅᓴᖅᑕᐅᓂᐊᕐᓗᑎᒃ ᖃᐅᔨᔭᐅᒍᕕᑦ ᐳᕙᒡᓗᖕᓇᖅᑐᖅᑕᖃᕐᓂᕐᓄᑦ. ᑎᓕᐅᕐᓗᒋᑦ ᖃᑕᙳᑎᑎᑦ, ᐱᖃᓐᓇᕆᔭᑎᑦ ᓄᓇᓕᖕᒥᐅᓪᓗ ᖃᐅᔨᓴᖅᑕᐅᖁᓗᒋᑦ ᐊᒻᒪᓗ, ᑕᐃᒪᐃᑦᑕᕆᐊᖃᖅᐸᑦ, ᐃᓗᐊᖅᓴᖅᑕᐅᓗᑎᒃ ᐳᕙᒡᓗᖕᓇᖅᑐᒧᑦ ᐋᓐᓂᐊᕕᓕᐊᕐᕕᖕᒥᓂ.
ᐳᕙᒡᓗᖕᓇᖅᑐᖅ ᐱᑕᖃᕈᓐᓃᖅᑎᑕᐅᔪᓐᓇᖅᐳᖅ
ᐳᕙᒡᓗᖕᓇᖅᑐᒧᑦ ᖃᐅᔨᓴᖅᑕᐅᓃᑦ ᓇᓗᓇᐃᖅᓯᒃᐸᑦ ᐳᕙᒡᓗᖕᓂᕐᓂᒃ, ᑕᐃᒪᓕ ᖃᐅᔨᓴᖅᑕᐅᔭᕆᐊᖃᒃᑲᓐᓂᕋᔭᖅᐳᑎᑦ. ᑕᒪᒃᑯᐊ ᖃᐅᔨᓴᖅᑕᐅᒃᑲᓐᓂᕐᓃᑦ, ᐃᓚᖃᕈᓐᓇᖅᖢᑎᒃ ᑎᕝᕗᐊᖅᑕᐅᔪᒥᒃ ᖃᐅᔨᓴᖅᓯᓂᕐᒥᒃ, ᐳᕙᒃᑯᑦ ᑕᕐᕋᓕᐊᖅᑕᐅᓂᕐᒥᒃ, ᖃᐅᔨᔾᔪᑕᐅᑕᔪᓐᓇᖅᑐᓄᓪᓗ ᐊᐱᖅᓱᖅᑕᐅᓂᕐᒥᒃ, ᐱᔭᕇᖅᑕᐅᕙᒃᐳᑦ ᖃᐅᔨᒪᓕᕈᒪᓂᕐᒧᑦ ᑕᒪᓐᓇ ᐳᕙᒡᓗᖕᓇᖅᑐᖅ ᐆᒻᒪᕆᙱᒻᒪᖔ ᐆᒻᒪᕆᖕᒪᖔᓪᓘᓐᓃᑦ.
ᑕᒪᕐᒥᒃ ᐆᒻᒪᕆᙱᑦᑐᑦ ᐳᕙᒡᓗᖕᓇᖅᑐᑦ ᐆᒻᒪᕆᒃᑐᓪᓗ ᐳᕙᒡᓗᖕᓇᖅᑐᑦ ᐃᓗᐊᖅᓴᖅᑕᐅᔪᓐᓴᖅᐳᒃ ᖁᐱᕐᕈᓄᑦ ᐋᓐᓂᐊᕈᑕᐅᔪᓄᑦ ᑐᖁᓴᐅᑎᓄᑦ. ᐃᓗᐊᖅᓴᖅᑕᐅᓯᒪᙱᒃᑯᓂ, ᐆᒻᒪᕆᙱᑦᑐᖅ ᐳᕙᒡᓗᖕᓇᖅᑐᖅ ᐆᒻᒪᕆᒃᓯᓗᓂ ᐳᕙᒡᓗᓕᕈᑕᐅᔪᓐᓇᖅᐳᖅ. ᐆᒻᒪᕆᒃᑐᖅ ᐳᕙᒡᓗᖕᓇᖅᑐᖅ ᑐᖁᔾᔪᑕᐅᔪᓐᓇᖅᐳᖅ ᐃᓗᐊᖅᓴᖅᑕᐅᙱᒃᑯᓂ.
ᑭᒃᑯᑐᐃᓐᓇᑦᑎᐊᑦ ᐃᓚᐅᓕᕈᓐᓇᖅᐳᑦ ᓴᙱᓂᕐᒧᑦ ᐳᕙᒡᓗᖕᓇᖅᑐᖅᑕᖃᙱᑦᑐᒧᓪᓗ. ᑭᒃᑯᑐᐃᓐᓇᑦᑎᐊᑦ ᐃᑲᔪᕈᓐᓇᖅᐳᑦ ᐃᑲᔪᖅᑐᐃᓗᑎᒃ ᓄᓇᓕᖕᒥᓂᒃᓴᙱᓂᕐᒧᑦ ᐳᕙᒡᓗᖕᓇᖅᑐᖅᑕᖃᙱᑦᑐᒧᓪᓗ. ᑎᓕᐅᖃᑦᑕᐅᑎᓗᓯ ᖃᐅᔨᓴᖅᑕᐅᓇᔭᕐᓂᕐᒧᑦ, ᐃᑲᔪᖅᑐᐃᓗᓯ ᑕᒪᒃᑯᓂᖓ ᐃᓗᐊᖅᓴᖅᑕᐅᔪᓂᒃ, ᐃᑲᔪᕐᓗᓯᓗ ᑐᓴᐅᒪᑎᑦᑎᓂᕐᒧᑦ ᓱᓕᔪᓂᒃ ᐳᕙᒡᓗᖕᓇᖅᑐᒧᑦ.
ᐳᕙᒡᓗᖕᓇᖅᑐᒧᑦ ᓱᓕᔪᑦ:
ᓱᓕᔪᖅ # 1: ᐳᕙᒡᓗᖕᓇᖅᑐᖅ ᐱᑕᖃᕈᓐᓃᖅᑎᑕᐅᔪᓐᓇᖅᐳᖅ.
ᓱᓕᔪᖅ #2: ᐳᕙᒡᓗᖕᓇᖅᑐᖅ ᖁᐱᕐᕉᕗᖅ ᐊᒃᑐᖅᓯᔪᓐᓇᖅᖢᓂ ᓇᐅᒃᑯᓕᒫᖅ ᑎᒥᒥ, ᑭᓯᐊᓂ ᐊᒃᑐᕈᓐᓇᙱᑕᖏᑦ ᐅᑯᐊᖑᕗᑦ, ᓄᔭᑦ, ᑯᑮᑦ, ᑭᖑᑏᓪᓗ
ᓱᓕᔪᖅ #3: ᐆᒻᒪᕆᙱᑦᑐᖅ ᐳᕙᒡᓗᖕᓇᖅᑐᖅ ᑐᑭᖃᖅᐳᖅ ᐃᒪᓐᓇ, ᑕᒪᓐᓇ ᐳᕙᒡᓗᖕᓇᖅᑐᖅ ᓯᓂᖕᓂᖓᓂᒃ ᐆᒻᒪᕆᙱᖦᖢᓂᓗ ᑎᒥᒥ. ᐳᕙᒡᓗᖕᓇᖅᑐᖅᑖᕈᓐᓇᙱᓚᑎᑦ ᐃᓄᖕᒥᑦ ᐆᒻᒪᕆᙱᑦᑐᒥᒃ (ᓯᓂᒃᑐᒥᒃ) ᐳᕙᒡᓗᖕᓇᖅᑐᓕᖕᒥᑦ.
ᓱᓕᔪᖅ #4: ᖃᐅᔨᔾᔪᑕᐅᒐᔪᒃᑐᑦ ᐆᒻᒪᕆᒃᑐᒧᑦ ᐳᕙᒡᓗᖕᓇᖅᑐᒧᑦ ᐃᓚᖃᖅᐳᑦ ᐅᑯᓂᖓ: ᐊᐅᓕᖕᒥᒃ ᖁᐃᖅᓱᖅᑐᖃᖅᐸᒡᓗᓂ ᐱᓇᓱᐊᕈᓰᑦ ᐱᖓᓱᑦ ᐅᖓᑖᓄᑦ, ᐅᓐᓄᐊᒃᑯᑦ ᐊᐅᒪᔮᖅᐸᒡᓗᓂ ᐆᓇᖅᐸᒡᓗᓂᓗ, ᑕᖃᓯᒪᕙᒡᓗᓂ ᐅᕿᒡᓕᕙᓪᓕᐊᓗᓂᓗ ᑕᐃᒪᐃᑦᑕᐃᓕᒐᓗᐊᕐᓗᓂ.
ᓱᓕᔪᖅ #5: ᐳᕙᒡᓗᖕᓇᖅᑐᖅ ᐊᓂᖅᓵᖅᑐᕐᓇᖅᑐᒃᑯᑦ ᖃᖓᑕᕙᒃᐳᖅ, ᑕᒪᓐᓇ ᑐᑭᖃᖅᖢᓂ ᐃᒪᓐᓇ, ᓯᐊᒻᒪᒃᑎᖅᐸᖕᓂᖓᓂᒃ ᐊᓂᖅᓵᖅᑐᒐᒃᑯᑦ ᑭᓇᑭᐊ ᐆᒻᒪᕆᒃᑐᒥᒃ ᐳᕙᒡᓗᒃᐸᑦ ᐳᕙᖕᒥᒍᑦ ᐊᒥᖅᑳᖃᑎᖃᖅᐸᒃᖢᓂᓗ ᐊᓂᖅᓵᖅᑐᒐᕐᒥᒃ ᐊᓯᒥᓄᑦ ᐃᓄᖕᓄᑦ.
ᓱᓕᔪᖅ #6 ᐃᓄᐃᑦ ᓴᙲᒡᓕᒋᐊᖅᓯᒪᔪᒥᒃ ᑎᒥᒥᒍᑦ ᐱᓯᒪᒃᐸᑕ, ᓲᕐᓗ ᒪᑯᐊ, ᒪᒃᑯᒃᑐᒻᒪᕆᑯᓗᐃᑦ, ᐃᓐᓇᐃᑦ ᐃᓄᐃᓪᓗ ᐊᓯᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᖃᓄᐃᓐᓂᖃᖅᑐᑦ, ᖁᐊᖅᓵᕐᓇᖅᑐᒦᓐᓂᖅᓴᐅᕗᑦ ᐱᖃᓕᕋᔭᕐᓂᕐᒥᒃ ᐳᕙᒡᓗᖕᓇᖅᑐᒥᒃ ᐋᓐᓂᐊᕐᓂᕐᒥᒃ.
ᓄᓇᕐᔪᐊᓕᒫᒥ ᐳᕙᒡᓗᖕᓇᖅᑐᒧᑦ ᐅᓪᓗᕆᔭᐅᕗᖅ
ᐊᑏ ᐱᓕᕆᐊᖃᓚᐅᖅᑕ ᐱᓕᕆᔪᓐᓇᖅᑕᑦᑎᓐᓂᒃ ᓄᓇᕗᒻᒥ ᓴᙱᔪᒪᓗᑕ ᐳᕙᒡᓗᖕᓇᖅᑐᒥᒡᓗ ᐱᓯᒪᙱᓪᓗᑕ! ᑎᓕᐅᕆᕗᒍᑦ ᑕᒪᐃᓐᓂᑦᑎᐊᖅ ᓄᓇᓕᖕᓂᒃ ᐃᓚᐅᖁᓪᓗᒋᑦ ᓄᓇᕐᔪᐊᓕᒫᒥ ᐳᕙᒡᓗᖕᓇᖅᑐᒧᑦ ᐅᓪᓗᕆᔭᐅᔪᒧᑦ ᖃᐅᔨᒪᓕᖅᑎᑦᑎᓂᕐᒥᒃ. ᐱᒻᒪᕆᐅᓂᖅᐸᖑᓪᓗᓂ ᐅᓇ, ᐃᓄᐃᑦ ᓄᓇᓕᖕᒥᓂ ᐋᓐᓂᐊᕕᓕᐊᖃᑦᑕᖁᓪᓗᒋᑦ ᖃᐅᔨᓴᖅᑕᐅᔭᖅᑐᕐᓗᑎᒃ. ᖃᐅᔨᓴᖅᑕᐅᓂᖅ ᓯᕗᓪᓕᖅᐹᖑᕗᖅ ᓇᓗᙱᑦᑎᐊᕈᒪᒍᕕᑦ ᓄᓇᓖᑦ ᓴᙲᓐᓇᕋᓗᐊᕐᒪᖔᑦ ᐳᕙᒡᓗᖕᓇᖅᑐᖅᑕᖃᕋᓂᓗ.
ᓄᓇᕐᔪᐊᓕᒫᒥ ᐳᕙᒡᓗᖕᓇᖅᑐᒧᑦ ᐅᓪᓗᕆᔭᐅᔪᖅ ᐋᖅᑭᒃᑕᐅᓯᒪᕗᖅ ᐊᖏᒡᓕᒋᐊᖅᑎᑦᑎᔾᔪᑕᐅᔪᒪᓪᓗᓂ ᑭᒃᑯᑐᐃᓐᓇᐃᑦ ᖃᐅᔨᒪᓂᕆᔭᖏᓐᓂᒃ ᑕᒪᓐᓇ ᐳᕙᒡᓗᖕᓇᖅᑐᖅ ᑭᒃᑯᕈᓘᔭᕐᓄᐊᖅᐸᖕᓂᖓᓂᒃ ᓇᓂᕈᓘᔭᖅ ᓄᓇᕐᔪᐊᕐᒥ. ᑖᓐᓇᑦᑕᐅᖅ ᐅᓪᓗᖅ ᐃᖅᑲᐅᒪᕝᕕᐅᒋᕗᑦ ᐅᓪᓗᒥᒃ 1882-ᖑᑎᓪᓗᒍ ᓘᒃᑖᖅ ᕌᐳᑦ ᑰᔅ ᐅᖃᐅᓯᖃᖅᑎᓪᓗᒍ ᓇᓂᓯᒪᓕᕐᓂᕐᒥᓂᒃ ᐱᔾᔪᑕᐅᕙᒃᑐᒥᒃ ᐳᕙᒡᓗᖕᓴᖅᑐᒧᑦ, ᐅᒥᖓ, ᐳᕙᒡᓗᖕᓇᖅᑐᒧᑦ ᖁᐱᕐᕈᕐᒥᒃ. ᑰᔅ ᓇᓂᔭᖓ ᒪᑐᐃᖅᓯᓚᐅᖅᐳᖅ ᐊᑐᖅᑕᐅᔪᓐᓴᖅᑐᒥᒃ ᖃᐅᔨᔾᔪᑕᐅᓗᓂ ᐱᑕᖃᕈᓐᓃᖅᑎᑦᑎᓗᓂᓗ ᐳᕙᒡᓗᖕᓇᖅᑐᒥᒃ.
ᖃᐅᔨᓴᖅᑕᐅᒋᑦ, ᐃᓗᐊᖅᓴᖅᑕᐅᒋᑦ. ᑕᑯᔭᖅᑐᕐᓗᒍ ᓄᓇᔅᓯᓐᓂ ᐋᓐᓂᐊᕕᓕᐊᕐᕕᒃᓯ ᖃᐅᔨᓴᖅᑕᐅᔭᖅᑐᕐᓗᑎᑦ, ᐅᕗᖓᓘᓐᓃᑦ ᐅᖄᓚᓗᑎᑦ 1-833-975-6331 ᑐᓴᖅᑕᖃᒃᑲᓐᓂᕐᓂᐊᕋᕕᑦ!