ᐊᖏᕐᕋᒥᑦ, ᓄᓇᓕᖕᓂᑦ, ᑲᒪᒋᔭᐅᙱᓐᓇᖅᑐᒃᑯᕕᖕᒥᓗ

ᐊᖏᕐᕋᒥᑦ, ᓄᓇᓕᖕᓂᑦ, ᑲᒪᒋᔭᐅᙱᓐᓇᖅᑐᒃᑯᕕᖕᒥᓗ
ᐊᖏᕐᕋᕆᔭᐅᔪᒥ ᓄᓇᓕᖕᓂᓗ ᑲᒪᒋᔭᐅᕙᖕᓂᕐᒧᑦ (HCC) ᐱᓕᕆᐊᖑᕙᒃᑐᖅ ᐃᑲᔪᖅᐸᒃᑐᖅ ᓄᓇᕗᒻᒥᐅᓂᒃ ᓇᖕᒥᓂᑦ ᑲᒪᒋᔪᓐᓇᕐᓂᕐᒧᑦ ᐃᑲᔪᖅᑕᐅᓗᑎᒃ ᐃᓚᒥᓄᑦ ᓄᓇᓕᖕᒥᐅᓂᓪᓗ, ᐱᓯᒪᖁᓪᓗᒋᓪᓗ ᐃᒻᒥᒃᑰᕈᓐᓇᕐᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᕐᒥᓗ ᐃᒃᐱᒋᕙᒃᑕᖏᓐᓂᒃ. ᐊᖏᕐᕋᕆᔭᒥ ᓄᓇᓕᖕᓂᓗ ᑲᒪᔨᐅᓂᕐᒧᑦ ᐱᓕᕆᐊᖑᔪᖅ ᐊᑐᐃᓐᓇᐅᑎᑦᑎᓲᖑᕗᖅ ᐋᓐᓂᐊᖃᖅᑕᐃᓕᒪᓂᕐᒥᑦ ᐊᒻᒪ ᐃᑲᔪᖅᑐᐃᓂᕐᒧᑦ ᐱᔨᑦᑎᕋᖅᑐᐃᓂᕐᒥᑦ, ᖃᐅᔨᓴᕐᓂᖅ ᐊᑐᖅᖢᒍ, ᐊᖏᕐᕋᖅᓯᒪᑦᑎᐊᕐᓗᓂ ᑲᒪᒋᔭᐅᒃᑲᓐᓂᕆᐊᖃᖅᑐᖃᖅᐸᑦ ᐃᓄᖕᒥ ᐱᔾᔪᑎᒋᓗᒍ ᐋᓐᓂᐊᖃᑦᑕᕐᓂᖓᓄᑦ, ᖃᓂᒪᖃᑦᑕᕐᓂᖓᓄᑦ, ᐅᕝᕙᓘᓐᓃ ᐊᔪᕈᑎᖃᖅᐸᑦ.
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑎᓕᐅᕆᕗᑦ ᒪᒥᓴᕐᓂᕐᒥᑦ ᐊᖏᕐᕋᔅᓯᓐᓂ, ᐊᒻᒪ ᐊᑐᐃᓐᓇᐅᑎᑦᑎᕗᑦ ᐃᑲᔪᖅᓱᐃᓂᕐᒥᑦ ᓄᓇᕗᒻᒥᐅᓄᑦ ᐊᒻᒪ ᐃᓚᖏᓐᓄᑦ ᐃᑲᔪᖅᑕᐅᔭᕆᐊᖃᖅᑎᓪᓗᒋᑦ. ᐱᖃᓯᐅᑎᓗᒋᑦ ᐃᓚᒌᖑᔪᑦ ᑲᒪᒋᔭᐅᔪᖃᖅᑎᓪᓗᒍ ᐊᒻᒪ ᐃᑲᔪᖅᓱᑐᑦ ᐃᓚᖏᓐᓄᑦ ᐋᓐᓂᐊᖅᑐᖃᖅᑎᓪᓗᒍ, ᐊᖏᕐᕋᒥᑦ ᓄᓇᓕᖕᓂᓗ ᑲᒪᓂᕐᒧᑦ ᐱᓕᕆᐊᖅ ᒪᓂᒪᑎᑦᑎᕗᑦ ᐱᖁᓯᑦᑎᓐᓂ ᑐᕌᖅᑕᐅᓇᓱᒃᐳᖅ ᐋᓐᓂᐊᖃᓇᖏᑦᑐᓕᕆᓂᕐᒧᑦ.
ᐊᔪᖅᑎᑕᐅᙱᑦᑐᑦ
ᓄᓇᕗᒻᒥᐅᓕᒫᑦ ᐊᑎᓕᐅᖅᓯᒪᔪᑦ ᓄᓇᕗᑦ ᐋᓐᓂᐊᕕᓕᐊᖅᑐᖅᓯᐅᑎᖏᓐᓄᑦ ᐱᔪᓐᓇᖅᑐᑦ ᑕᐃᒪᐃᑦᑐᓂᑦ ᐊᖏᕐᕋᒥ ᓄᓇᓕᓐᓂᓪᓗ ᑲᒪᒋᔭᐅᓂᕐᒧᑦ ᐱᓕᕆᐊᒧᑦ.
ᐅᕗᖓ ᓇᕿᑦᑎᓗᑎᑦ ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ ᐋᓐᓂᐊᕐᕕᓕᐊᕈᓐᓇᐅᑎᒧᑦ.
ᐋᓐᓂᐊᖃᓲᔭᖃᑦᑕᕈᕕᑦ, ᐅᕝᕙᓘᓐᓃ ᐃᑲᔪᖅᑕᐅᔭᕆᐊᖃᖃᑦᑕᕈᕕᑦ ᖃᐅᑕᒫᖅ, ᐊᔪᖏᑎᑕᐅᔪᓐᓇᕋᔭᖅᑐᑎᑦ ᐱᔨᑦᑎᕋᖅᑕᐅᔾᔪᑎᒥᑦ ᐊᖏᕐᕋᒥᑦ ᓄᓇᓕᖕᓂᓘᓐᓃ ᑲᒪᒋᔭᐅᓂᕐᒧᑦ ᐱᓕᕆᐊᒥᑦ.
ᑭᓇᑐᐃᓐᓇᖅ ᐊᐱᕆᒃᐸᑦ ᐸᖅᑭᔭᐅᔪᒪᓪᓗᓂ ᐋᓐᓂᐊᕕᑎᒍᑦ ᐅᕝᕙᓘᓐᓃᑦ ᐊᖏᕐᕋᒥ ᐸᖅᑭᑦᑎᔨᓄᑦ ᑲᒪᔨᒥᑦ ᐱᔪᓐᓇᖅᑐᖅ. ᐋᓐᓂᐊᓯᐅᖅᑎᓪᓚᕆᖕᒥᑦ ᐱᔪᓐᓇᐅᑎᑖᕆᐊᖃᖏᑦᑐᑎᑦ ᐅᕙᓘᓐᓃ ᑕᑯᔭᐅᕝᕕᒃᓴᖅᑖᕆᐊᖃᖏᑦᑐᑎᑦ.
ᑐᔅᓯᕋᐅᑎᒃ ᐱᔭᐅᓯᒪᓕᖅᐸᑦ ᐊᖏᕐᕋᒥ ᑲᒪᒋᔭᐅᔾᔪᑎᒧᑦ, ᖃᐅᔨᓴᖅᑕᐅᖅᑳᕋᔭᖅᑐ ᐋᓐᓂᐊᓯᐅᖅᑎᒧᑦ ᖃᓄᖅ ᐃᑲᔪᖅᑕᐅᒍᓐᓇᖃᑦᑕᕋᔭᕐᒪᖔᖅ ᐊᒻᒪᓗ ᐊᖏᕐᕋᒥ ᐸᖅᑭᔭᐅᖃᑦᑕᕐᓗᑎᓘᓐᓃ ᖃᓄᕐᓗ ᓈᒻᒪᓂᖅᐹᖑᒐᔭᕐᒪᖔᖅ, ᑖᔅᓱᒧᖓ ᐃᓚᖏᓐᓄᓪᓘᓐᓃᑦ.
ᐱᔨᑦᑎᕋᖅᑎᑦ
ᐊᖏᕐᕋᒥᑦ ᓄᓇᓕᖕᓂᓗ ᑲᒪᒋᔭᐅᓂᖅ ᐱᓕᕆᐊᖅ ᐊᑐᐃᓐᓇᐅᑎᑦᑎᕙᒃᑐᖅ ᐊᔾᔨᒌᖏᑦᑐᓂ ᐱᔨᑦᑎᕋᕐᓂᕐᒥ, ᐱᖃᓯᐅᑎᓗᒋᑦ ᐅᑯᓂᖓ:
- ᐊᖏᕐᕋᓕᕆᓂᖅ − ᐊᖏᕐᕋᒥᑦ ᓴᓗᒻᒪᖅᓴᐃᓂᖅ ᐊᒻᒪ ᐃᑲᔪᖅᐸᒡᓗᓂ ᓂᕿᓕᐅᕐᓂᕐᒥ ᐊᒻᒪ/ᐅᕝᕙᓘᓐᓃ ᓂᕿᓂ ᓂᐅᕕᕆᐊᕈᔾᔨᕙᖕᓂᖅ.
- ᐃᒻᒥᓅᖓᔪᒧᑦ ᑲᒪᒋᔭᐅᓂᖅ − ᐅᕕᓂᖕᓂᐊᕐᓂᕐᒧᑦ ᐊᒻᒪ ᐊᓐᓄᕌᓂᕐᒧᑦ
- ᐋᓐᓂᐊᖅᑐᓕᕆᓂᕐᒧᑦ ᑲᒪᒋᔭᐅᓂᖅ − ᑲᐱᔭᐅᔭᕆᐊᖃᕐᓂᖅ ᐊᒻᒪ ᒪᑦᑐᑎᖅᑕᐅᔭᕆᐊᖃᕐᓂᖅ
- ᑕᖃᐃᖅᓯᕈᓐᓇᕐᓂᕐᒧᖅ ᐃᑲᔪᖅᑕᐅᓂᖅ - ᐃᓚᒋᔭᐅᔪᒧᑦ ᐃᓇᖏᖅᓯᓂᖅ ᐃᑲᔪᕐᓂᕐᒧᑦ
- ᐃᖃᐃᓕᓴᕐᓂᖅ - ᒪᒥᓴᕐᓂᕐᒧᑦ ᐃᖃᐃᓕᓴᕐᓂᖅ
ᑐᑭᓯᒋᐊᒃᑲᓐᓂᕈᒪᒍᕕᑦ
ᑐᑭᓯᒋᐊᒃᑲᓐᓂᕈᒪᒍᕕᑦ, ᓄᓇᓕᖕᓂ ᐋᓐᓂᐊᕕᓐᓄᑦ ᐊᐱᕆᔪᓐᓇᖅᐳᑎᑦ ᐅᕝᕙᓘᓐᓃ.
ᐃᓐᓇᑯᕖᑦ
ᐋᓐᓂᐊᖃᖕᓇᙱᑦᑐᓕᕆᔨᒃᑯᑦ ᐱᓇᓱᐊᖅᑐᑦ ᐸᖅᑭᑦᑎᐊᓛᖕᓂᖕᓂᑦ ᐃᓐᓇᖁᑎᑦᑎᓐᓂᑦ. ᒪᕐᕉᔫᒃ ᐃᓐᓇᕐᓄ ᐊᖏᕐᕋᐅᔪᑦ (ᐊᕐᕕᐊᓂ ᐃᖃᓗᖕᓂᓗ) ᐊᕐᕕᓂᓕᖕᓂ ᐱᖓᓲᔪᖅᑐᓂ ᐃᒡᓕᖃᕈᓐᓇᖅᖢᓂ ᐊᑐᓂ ᐋᕿᒃᓯᒪᔪᑦ ᐊᑐᐃᓐᓇᐅᓪᓗᑎᒃ ᒪᕐᕈᑦ ᐅᕝᕙᓘᓐᓃ ᐱᖓᓱᓂᒃ ᐱᔨᑦᑎᕋᖅᑕᐅᓂᕐᒧᑦ ᐃᒡᓗᒋᔭᐅᔪᓐᓇᖅᑐᑦ ᑲᒪᒋᔭᐅᔭᕆᐊᖃᖅᑐᓄᑦ ᐃᓐᓇᕐᓄᑦ ᓄᓇᕗᒥᑦ.
- ᖁᑦᑎᖕᓂᓕᒃ ᒪᕐᕉᓐᓂᒃ ᑲᒪᒋᔭᐅᓂᕐᒧᑦ: ᐃᓐᓇᐃᑦ ᑖᒃᑯᐊ ᐃᓅᓕᓴᓗᐊᕆᐊᖃᙱᑦᑐᑦ, ᐱᓱᑲᑕᒍᓐᓇᖅᑐᑦ ᐃᒻᒥᓂᒃ ᐊᔭᐅᑉᐱᐊᕐᓗᓂᓪᓘᓐᓃᑦ, ᐅᖃᓪᓚᒍᓐᓇᑦᑎᐊᙱᑐᐃᓐᓇᕆᐊᓕᒃ ᐃᑲᔪᖅᑕᐅᓗᐊᕆᐊᖃᙱᑦᑐᑦ ᐅᓪᓗᓕᒫᖅ − ᐊᖏᕐᕋᕆᔭᓂᑦ ᐸᖅᑭᔨᓂᑦ ᐃᒡᓗᕐᔪᐊᒥᓪᓘᓐᓃᑦ ᐃᑲᔪᖅᑐᐃᕕᓕᖕᓂᑦ.
- ᖁᑦᑎᖕᓂᓕᒃ ᐱᖓᔪᐊᓂ ᑲᒪᒋᔭᐅᓂᕐᒧᑦ: ᐃᓄᐃᑦ ᐋᓐᓂᐊᓪᓚᕆᒃᑐᑦ ᐊᔪᓕᖅᐸᓪᓕᐊᑐᐃᓐᓇᕆᐊᓖᑦ, ᐱᓲᑎᖃᖅᑐᑦ, ᐅᖃᓪᓚᒍᓐᓇᙱᑐᐃᓐᓇᕆᐊᓕᒃ ᐆᒃᑐᕋᐅᑎᖃᕐᓗᓂ ᑭᓯᐊᓂ, ᖃᐅᑕᒫᓪᓗ ᐃᑲᔪᖅᑕᐅᔭᕆᐊᖃᖅᖢᑎᒃ ᐊᖏᕐᕋᒥᑦ ᐸᖅᑭᔨᐅᔪᓂᑦ ᐃᑲᔪᖅᑐᐃᓲᖑᔪᓂᑦ.
ᐊᔪᖅᑎᑕᐅᙱᑦᑐᑦ
ᐱᔪᓐᓇᖅᑐᑐᐊᑦ ᓄᓇᕗᒻᒥᐅᑦ (ᐊᕌᒍᓖᑦ 55ᓂᑦ ᐅᖓᑖᓂᓪᓗ) ᓄᓇᕗᒻᒥᐅᓂᑦ ᐋᓐᓂᐊᕕᓕᐊᕈᓐᓇᐅᑎᓖᑦ ᖃᐅᔨᓴᖅᑕᐅᕌᓂᒃᓯᒪᔪᑦ ᖁᑦᑎᖕᓂᓕᒃ 2−ᒥᑦ ᖁᑦᑎᖕᓂᓕᒃ 3−ᒧᑦ ᐸᖅᑭᔭᐅᔭᕆᐊᖃᖕᒪᖔᑦ ᑭᒡᒐᖅᑐᖅᑎᓄᑦ ᐋᓐᓂᐊᖃᖕᓇᙱᒃᑐᓕᕆᔨᒃᑯᓐᓂᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ
ᑐᑭᓯᒋᐊᒃᑲᓐᓂᕈᒪᒍᕕᑦ, ᓄᓇᓕᖕᓂ ᐋᓐᓂᐊᕕᓐᓄᑦ ᐊᐱᕆᔪᓐᓇᖅᐳᑎᑦ ᐅᕝᕙᓘᓐᓃ:
ᐅᖃᓗᒡᕕᒋᓗᒍ ᓄᓇᕗᑦᒥᑦ ᐊᖏᕐᕋᒥᑦ ᓄᓇᓕᖕᓂᓗ ᑲᒪᒋᔭᐅᓂᕐᒧᑦ ᐱᓕᕆᐊᖅ 867-975-5941
ᐃᕐᖐᓐᓇᒃᑯᑦ [email protected]
ᐊᑯᓂᐅᔪᑯᒃ ᑲᒪᒋᔭᖃᕐᓂᖅ
ᐋᓐᓂᐊᖃᖕᓇᙱᑦᑐᓕᕆᔨᒃᑯᓪᓗ ᐱᓇᓱᐊᖅᑐᑦ ᐸᖅᑭᑦᑎᐊᓛᖕᓂᖕᓂᑦ ᐃᓐᓇᖁᑎᑦᑎᓐᓂᑦ. ᑖᒃᑯᐊ ᐋᓐᓂᐊᖃᖕᓇᙱᑦᑐᓕᕆᔨᒃᑯᑦ ᐃᓂᖃᖅᑎᑦᑎᕙᒃᐳᑦ ᐊᑯᓂᐅᔪᒥᑦ ᐸᖅᑭᔭᕆᐊᓕᖕᓂᑦ ᓄᓇᕗᒻᒥᐅᓄᑦ ᐱᔭᕆᐊᑐᔪᓂᑦ ᐸᖅᑭᔭᐅᔾᔪᑎᖃᕆᐊᓕᖕᓂᑦ, ᖁᑦᑎᖕᓂᓕᒃ 4 ᐅᕝᕙᓘᓐᓃᑦ 5−ᒥᑦ ᐸᖅᑭᔭᐅᔭᕆᐊᓕᒃ ᐃᑲᔪᖅᑕᐅᔪᓐᓇᐃᓪᓕᓗᓂᓗ ᐊᖏᕐᕋᒥᓂᑦ ᐃᓐᓇᒃᑯᕕᖕᓂᓪᓘᓐᓃᑦ.
ᑖᒃᑯᐊ ᐱᖓᓱᑦ ᐸᖅᑭᔭᐅᙱᓐᓇᖅᑐᒃᑯᕖᑦ (ᐃᖃᓗᒃᑑᑦᑎᐊᒥᑦ; ᐃᒡᓗᓕᖕᒥᑦ; ᐅᖅᓱᖅᑑᒥᓪᓗ) ᑲᑎᓕᒫᖅᖢᒋᑦ 28−ᓂᑦ ᐃᒡᓕᓖᑦ. ᐅᒃᑯᐃᖅᑕᐅᓂᖃᓚᐅᖅᐳᖅ ᓄᑖᙳᕆᐊᖅᑕᐅᔪᖅ ᐃᓐᓇᒃᑯᕕᐊᓂ ᕿᑎᖕᒥᐅᑦ ᐋᓐᓂᐊᕕᐊᓂᑦ ᒫᑦᓯᐅᑉ ᕿᑎᖅᐸᓯᐊᓂᐅᓚᐅᖅᐳᖅ 2017−ᒥᑦ.
ᐊᔪᖅᑎᑕᐅᙱᑦᑐᑦ
ᐱᔪᓐᓇᖅᑐᑐᐊᑦ ᓄᓇᕗᒻᒥᐅᑦ ᓄᓇᕗᒻᒥᑦ ᐋᓐᓂᐊᕕᓕᐊᕈᓐᓇᐅᑎᓖᑦ (ᐊᕐᕌᒍᓖᑦ 55 ᐅᖓᑖᓄᓪᓗ) ᖃᐅᔨᓴᖅᑕᐅᕌᓂᒃᓯᒪᔪᑦ ᖁᑦᑎᖕᓂᓕᒃ 4−ᒥᑦ ᐅᕝᕙᓘᓐᓃᑦ 5−ᒧᑦ ᐸᖅᑭᔭᕆᐊᓕᖕᓄᑦ ᑭᒡᒐᖅᑐᐃᔨᓄᑦ ᐋᓐᓂᐊᖃᖕᓇᙱᑦᑐᓕᕆᔨᒃᑯᓐᓂᑦ.
ᐃᓐᓇᒃᑯᕕᖕᒧᐊᖅᑎᑦᑎᔩᑦ ᓄᓇᕘᑉ ᐱᖓᓱᓄᑦ ᐸᖅᑭᔭᐅᖏᓐᓇᖅᑐᒃᑯᕕᖏᓐᓄᑦ; ᐃᓐᓇᒃᑯᕕᖕᓄᓪᓘᓐᓃᑦ ᓯᓚᑖᓅᕆᐊᓕᑦ ᓄᓇᕘᑉ ᑲᑐᔾᔨᔾᔪᑕᐅᕙᒃᐳᑦ ᐱᓕᕆᖃᑎᖃᖅᑐᑎᑦ ᐃᓐᓇᖕᒧᑦ ᐃᓚᖏᓐᓄᓪᓗ/ᐸᖅᑭᔨᐊᓄᓪᓗ; ᐊᕕᒃᑐᖅᓯᒪᔪᓂᑦ ᐸᖅᑭᓂᖕᒧᑦ ᐱᓕᕆᖃᑎᒌᖑᔪᓂᑦ, ᐋᓐᓂᐊᖃᖕᓇᙱᑦᑐᓕᕆᔨᒃᑯᑦ ᓄᓇᕗᒻᒥᑦ ᐸᖅᑭᔭᐅᑯᑖᒋᐊᓕᖕᓄᑦ ᑐᑭᒧᐊᖅᑎᑦᑎᔨᓂᑦ, ᒪᓕᒡᓗᑎᒃ ᓯᕗᓪᓕᐅᔾᔭᐅᔭᕆᐊᓕᖕᓄᑦ ᐅᓂᒃᑎᑦᑎᓂᖕᒧᑦ ᓄᓇᕗᒻᒥᐅᓂᑦ ᐊᑯᓂᐅᔪᑯᒃ ᑲᒪᒋᔭᖃᕐᓂᒃᑯᕕᖕᓄᑦ.
ᓄᓇᕗᒻᒥᐅᑦ ᐱᔭᕆᐊᑐᔪᓂᑦ ᐸᖅᑭᔭᐅᔭᕆᐊᓖᑦ, ᐱᓗᐊᖅᑐᒥᑦ ᓱᖅᑯᐃᑦᑕᐅᓯᒪᓕᖅᑐᑦ ᐃᓐᓇᑐᖃᐅᓂᕐᒧᑦ ᐳᐃᒍᑐᓕᖅᑐᓄᑦ, ᐃᓐᓇᖅᑎᑕᐅᖃᑦᑕᖅᐳᑦ ᐃᒻᒪᓯ ᐅᐃᔅᑦ ᐃᓐᓇᒃᑯᕕᐊᓄᑦ (EWSL) ᐋᑐᕚᒥᑦ ᐱᓕᕆᓲᖑᒻᒪᑕ ᐃᓐᓇᑐᖃᐅᓂᕐᒧᑦ ᐳᐃᒍᑐᓕᖅᑐᓄᑦ ᐸᖅᑭᔨᐅᕙᖕᓂᖏᓐᓄᑦ. EWSL−ᒥᐅᑦ ᐃᓕᓐᓂᐊᕐᓯᒪᔪᓂᑦ ᐃᖅᑲᓇᐃᔭᖅᑎᖃᖅᐳᑦ ᑕᒪᒃᑯᓂᖓᓗ ᐸᖅᑭᓂᖕᒧᑦ ᐊᑐᐃᓐᓇᖃᖅᖢᑎᒃ ᐃᓐᓇᐃᑦ ᐊᑦᑕᖕᓇᖅᑐᒦᖁᓇᒋᑦ ᑲᒪᒋᔭᐅᑦᑎᐊᕐᓗᑎᒡᓗ. ᓄᓇᕘᑉ ᓯᓚᑖᓅᖅᑕᐅᓂᐊᖅᑐᑦ ᐋᖅᑭᒃᑕᐅᕙᒃᐳᑦ ᐅᖃᖃᑎᖃᖕᓂᒃᑯᑦ ᐃᓐᓇᐅᑉ ᐃᓚᖏᓐᓄᑦ ᐸᖅᑭᔨᐊᓄᓪᓘᓐᓃᑦ ᐸᖅᑭᔨᖓᒍᑦ.
- ᖁᑦᑎᖕᓂᓕᒃ 4−ᒥᑦ ᐸᖅᑭᔭᕆᐊᓖᑦ ᐃᑲᔪᖅᑕᐅᔭᕆᐊᖃᓪᓚᕆᒃᑐᑦ ᖃᓄᑐᐃᓐᓇᖅ, ᐅᖃᓪᓚᒍᓐᓇᓗᐊᙱᑦᑐᑎᑦ, ᐋᓐᓂᐊᓯᐅᖅᑎᓄᓪᓗ ᐸᖅᑭᔭᐅᔭᕆᐊᖃᖅᖢᑎᒃ – ᐸᖅᑭᔭᐅᙱᓐᓇᖅᑐᒃᑯᕕᖕᓂᑦ ᐱᓕᕆᐊᕆᔭᐅᔪᓐᓇᖅᐳᑦ. ᑕᒪᓐᓇ ᐸᖅᑭᓂᕆᔭᐅᓂᖅ ᐊᖏᕐᕋᕆᔭᒥᑦ ᐊᑐᕐᑕᐅᓗᐊᕈᓐᓇᖏᑦᑐᖅ ᓇᒥᑐᐃᓐᓇᖅ ᑲᓇᑕᒥ ᐊᒻᒪᓗ ᐱᓕᕆᐊᒃᓴᕆᔭᐅᓇᑎᒡᓗ ᐊᖏᕐᕋᒥᑦ ᐸᖅᑭᓂᖕᓂᑦ ᓄᓇᕗᒻᒥᑦ.
- ᖁᑦᑎᖕᓂᓕᒃ 5−ᒥᑦ ᐃᓄᐃᑦ ᐸᖅᑭᔭᕆᐊᓖᑦ ᐃᓅᓕᓴᐅᑎᑎᒍᑦ ᐋᓐᓂᐊᓯᐅᑎᓄᓪᓗ ᐃᑲᔪᖅᑕᐅᔭᕆᐊᓕᓪᓚᕇᑦ ᓱᖅᑯᐃᑦᑕᐅᓯᒪᓕᖅᑐᑎᓪᓗ ᐃᓐᓇᑐᖃᐅᓂᕐᒧᑦ ᐳᐃᒍᑐᓕᖅᑐᓄᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ
ᑐᑭᓯᒋᐊᒃᑲᓐᓂᕈᒪᒍᕕᑦ, ᓄᓇᓕᑉᐱᑦ ᐋᓐᓂᐊᕕᖓᓂᑦ ᐊᐱᕆᔪᓐᓇᖅᐳᑎᑦ ᐅᕝᕙᓘᓐᓃ:
- ᐅᖃᓗᒡᕕᒋᓗᒍ ᓄᓇᕗᑦᒥᑦ ᐊᖏᕐᕋᒥᑦ ᓄᓇᓕᖕᓂᓗ ᑲᒪᒋᔭᐅᓂᕐᒧᑦ ᐱᓕᕆᐊᖅ 867-975-5941
- Email [email protected]