You are here

ᓯᕗᓕᖅᑎ ᑐᓴᖅᑎᑦᑎᕗᖅ ᐊᐅᓚᑦᑎᔨᒻᒪᕇᑦ ᐊᓯᔾᔨᕐᓂᖏᓐᓂᑦ

ᔭᓐᓄᐊᓕ 13, 2023

ᐱᕙᓪᓕᐊᔪᑦ ᓴᖅᑭᑕᐅᔪᑦ
ᓯᕗᓕᖅᑎ ᑐᓴᖅᑎᑦᑎᕗᖅ ᐊᐅᓚᑦᑎᔨᒻᒪᕇᑦ ᐊᓯᔾᔨᕐᓂᖏᓐᓂᑦ

ᐃᖃᓗᐃᑦ, ᓄᓇᕗᑦ (ᔮᓄᐊᕆ 13, 2023) – ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᐊᓯᔾᔨᖅᑐᓂ ᓄᓇᕗᑦ ᒐᕙᒪᒃᑯᑦ ᐊᖓᔪᖅᑲᐅᑎᖏᓐᓂᑦ.

ᒦᒐᓐ ᕼᐊᓐᑦ ᐃᓚᓕᐅᑎᕗᖅ ᓄᓇᕗᑦ ᒐᕙᒪᖓᓄᑦ ᒥᓂᔅᑕᐅᑉ ᑐᒡᓕᐊᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ. ᒪᐃᒐᓐ ᕼᐊᓐᑦ ᓄᓇᕗᒧᐊᓚᐅᖅᐳᖅ ᐳᕆᑎᔅ ᑲᓚᒻᐱᐊᒥᙶᖅᖢᓂ (B.C.) ᓯᕗᓕᖅᑎᓄᑦ ᑐᑭᒧᐊᖅᑎᑦᑎᔨᒋᔭᐅᓚᐅᖅᖢᓂ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖅᑐᓕᕆᔨᒃᑯᑦ ᐱᔪᓐᓇᐅᑎᓕᖕᓄᑦ. ᐱᓕᕆᖃᑦᑕᖅᓯᒪᕐᔪᐊᖅᐳᖅ ᖃᓄᖅᑑᕈᑎᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᐅᓚᑦᑎᕕᖕᒥ, ᑲᒪᒋᔭᖃᓪᓗᐊᑕᖅᖢᓂ ᓄᓇᖃᖅᑳᖅᓯᒪᔪᓂᒃ ᐊᒻᒪ ᐅᑭᐅᖅᑕᖅᑐᒥ ᓄᓇᓕᖕᓂ. ᐱᓕᕆᐊᕆᖃᑦᑕᓚᐅᖅᑕᖏᑦ ᓯᕗᓪᓕᐅᔾᔨᓯᒪᔪᑦ ᓄᓇᒥᑦ ᒪᒥᓴᕐᓂᕐᒥᑦ, ᑐᐊᕕᕐᓇᖅᑐᓕᕆᓂᕐᒥᑦ, ᐃᓕᖅᑯᓯᒃᑯᑦ ᐊᑦᑕᕐᓇᖏᑦᑐᒥᑦ ᐱᔨᑦᑎᕋᕐᓂᕐᒥᑦ, ᐊᒻᒪᓗ ᖃᕋᓴᐅᔭᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ.

ᐃᖅᑲᓇᐃᔭᖅᑐᓕᕆᔨᒃᑯᓐᓂ, ᓚᔅ ᕼᐃᑭ ᑲᔪᓯᓂᐊᖅᐳᖅ ᒥᓂᔅᑕᐅᑉ ᑐᒡᓕᕆᓗᓂᐅᒃ ᐋᒌᓯ ᓄᙳᐊᓄᑦ ᑎᑭᓪᓗᒍ. ᒥᔅᑕ ᕼᐃᑭ ᓄᓇᕗᑦ ᒐᕙᒪᒃᑯᓐᓄᑦ ᐃᑲᔫᑎᖃᖃᑦᑕᖅᓯᒪᕗᖅ ᐊᕐᕌᒍᒐᓴᖕᓄᑦ, ᖁᔭᒋᔭᐅᓪᓗᓂᓗ ᐃᑲᔪᖅᑐᐃᖃᑦᑕᖅᓯᒪᓂᖓᓄᑦ ᑖᔅᓱᒥᖓ ᐱᒻᒪᕆᐊᓗᖕᒥᒃ ᐱᓕᕆᕝᕕᐅᔪᒥᒃ.

ᒐᕙᒪᓕᕆᔨᒃᑯᑦ, ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᖓ ᐋᓇ ᕙᓗ ᑎᒃᑯᐊᖅᑕᐅᔪᖅ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᐊᓄᑦ ᐊᒻᒪ ᒥᓂᔅᑕᐅᑉ ᑐᒡᓕᐊᓄᑦ ᑎᑎᕋᖅᑎᒧᑦ ᒥᓂᔅᑕᐅᖃᑎᒌᓄᑦ. ᑖᓐᓇ ᐊᓯᔾᔨᕐᓂᐅᔪᖅ ᐊᖏᓪᓕᒋᐊᖅᑎᑦᑎᓂᐊᖅᑐᖅ ᐱᔪᓐᓇᕐᓂᖏᓐᓂᒃ ᐱᓕᕆᕕᐅᑉ ᓯᕗᓕᖅᑎᖏᓐᓂ.

"ᑖᓐᓇ ᐊᕐᕌᒍ ᑐᒡᓕᐊᓂ ᐊᑐᓕᖅᑎᑦᑎᓂᐊᕐᓗᓂ ᑲᑐᔾᔨᓗᑕ ᐱᔭᒃᓴᕆᔭᑦᑎᓐᓂᒃ ᐱᒻᒪᕆᐊᓘᕗᖅ ᑕᑯᓂᐊᕐᓗᓂ ᖃᓄᐃᓕᖓᓕᖅᑎᑕᐅᔪᓂᒃ ᓄᓇᕗᒻᒥᐅᓄᑦ. ᖁᓱᙱᑦᑎᐊᖅᐳᖓ ᓯᕗᓕᖅᑎᐅᓂᑦᑎᓐᓂᒃ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᑦᑎᓐᓄᑦ ᖃᐅᔨᒪᓪᓗᖓᓗ ᑖᒃᑯᐊ ᐊᓯᔾᔨᕐᓂᐅᔪᑦ ᓴᙱᒃᑎᒋᐊᖅᑎᑦᑎᓂᐊᕐᓂᖏᓐᓂᒃ ᒐᕙᒪᒃᑯᑦ ᐱᓕᕆᐊᖏᓐᓂᒃ," ᓯᕗᓕᖅᑎ ᐊᕿᐊᕈᖅ ᐅᖃᖅᑐᖅ.    

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᐸᑦ ᐳᓚᐅᓐ
ᐱᕙᓪᓕᐊᔪᓂᒃ ᑎᑎᕋᖅᑎ
ᑎᑎᕋᕐᕕᐊᓂᑦ ᓯᕗᓕᖅᑎ ᐊᕿᐊᕈᖅ
867-975-5059
bbrown6@gov.nu.ca