ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᓴᕕᑲᑖᖅ ᖁᕕᐊᓲᑎᓕᒃ ᓄᓇᕗᑦ ᐅᓪᓗᖓᓂ

ᔪᓚᐃ 09, 2018

ᐅᖃᐅᓯᑦᓴᖅ

ᓯᕗᓕᖅᑎ ᓴᕕᑲᑖᖅ ᖁᕕᐊᓲᑎᓕᒃ ᓄᓇᕗᑦ ᐅᓪᓗᖓᓂ

ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᐅᑯᓂᖓ ᓴᖅᑭᖅᑎᑦᓯᖅᑲᐅᔪᖅ ᐅᖃᐅᓯᑦᓴᖏᓐᓂᒃ:

"ᑕᕝᕙᓂ ᓄᓇᕗᑦ ᐅᓪᓗᖓᓂ, ᖁᕕᐊᓲᑎᖃᖅᑎᓪᓗᑕ 25 ᐊᕐᕌᒍᓂᒃ ᓇᓪᓕᐅᓂᖅᓯᐅᕈᑕᐅᓂᖓᓂᒃ ᐊᑎᓕᐅᖅᑕᐅᓚᐅᖅᓯᒪᑎᓪᓗᒍ ᓄᓇᕗᑦ ᐊᖏᕈᑎᖓ, ᐅᐱᒍᓱᑦᑐᖓ ᐊᒥᓱᓂᒃ ᐱᓕᕆᐊᖑᓯᒪᔪᓂᒃ. ᓄᓇᕗᒻᒥᐅᑦ ᓴᐱᓕᖅᑕᐃᓕᕙᑦᑐᑎᒃ ᐱᓕᕆᒍᓐᓇᑦᓯᐊᖅᑐᑦ ᓄᓇᓕᓐᓄᓪᓗ ᑐᕌᖓᓂᖃᑦᓯᐊᖅᑐᑎᒃ. ᓴᐱᓕᖅᑕᐃᓖᓐᓇᖃᑦᑕᖅᓯᒪᔪᒍᑦ ᓴᙱᓕᖅᐹᓪᓕᖅᓯᒪᓪᓗᑕᓗ ᐊᑦᓱᕈᕐᓇᖅᑐᒃᑰᖃᑦᑕᕋᓗᐊᖅᑎᓪᓗᑕ

ᐅᓪᓗᒥ, ᖁᕕᐊᓲᑎᖃᖅᑐᒍᑦ ᓴᐱᓕᖅᑕᐃᓕᓲᖑᓂᑦᑎᓐᓂᒃ ᓂᕆᐅᓐᓂᖃᑦᓯᐊᖅᑐᑕᓗ ᐊᕐᕌᒎᓂᐊᖅᑐᓂᒃ 25-ᑲᓂᕐᓂᒃ ᓂᕆᐅᓐᓂᖃᑦᓯᐊᕐᓗᑕ ᑲᔪᖏᕐᓂᖃᑦᓯᐊᕐᓗᑕᓗ. ᐃᓕᖅᑯᓯᕗᑦ, ᐅᖃᐅᓯᕗᑦ, ᐅᑉᐱᕆᔭᕗᑦ ᓴᓇᑐᓂᕗᓪᓗ ᑐᑭᒧᐊᒍᑏᓐᓇᕐᓂᐊᖅᑕᕗᑦ ᐱᓕᕆᖃᑎᒌᑦᑎᓪᓗᑕ ᓯᕗᓂᑦᓴᑎᓐᓄᑦ ᑕᑯᔪᒪᔭᑦᑎᓐᓂᒃ ᐱᓕᕆᐊᕆᒍᒪᔭᑦᑎᓂᓪᓗ.

ᐅᐱᒋᔭᒃᑲ ᓄᓇᕗᑦ, ᐃᓅᖃᑎᕗᑦ ᐱᕈᖅᐸᓪᓕᐊᓂᕗᓪᓗ ᐊᕕᑦᑐᖅᓯᒪᓂᑦᑎᓐᓂ ᐅᓪᓗᑕᒫᑦ. ᐃᖅᑲᐅᒪᖃᑦᑕᖅᑕ ᑕᑯᔭᐅᒍᒪᓚᐅᖅᓯᒪᔪᓂᒃ ᓄᓇᕗᒻᒥ, ᖁᕕᐊᓲᑎᖃᕐᓗᑕᓗ ᖃᓄᑎᒋ ᑎᑭᐅᑎᓯᒪᓂᑦᑎᓐᓂᒃ. ᐊᖅᑯᑎᑦᑎᓐᓂᒃ ᐊᑑᑎᖃᖅᐸᓪᓕᐊᑎᓪᓗᑕ, ᐱᓕᕆᖃᑎᒌᖏᓐᓇᖅᑕ ᖁᕕᐊᓇᖅᑐᒥᒃ ᓯᕗᓂᑦᓴᖃᑦᓯᐊᖁᓪᓗᑕ. ᖁᕕᐊᓱᒋᑦᓯ ᓄᓇᕗᑦ ᐅᓪᓗᖓᓂ!"

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
ᓯᕗᓕᖅᑎ ᓴᕕᑲᑖᖅ ᐊᓪᓚᕝᕕᖓᓂ
867-975-5059
cmacleod@gov.nu.ca