ᐅᖃᓚᐅᑎᓯᐅᑏᑦ

You are here

ᓯᕗᓕᖅᑎ ᓴᕕᑲᑖᖅ ᐃᑉᐱᒍᓱᓐᓂᕐᒧᑦ ᐃᖅᑲᐅᒪᑦᑎᕗᖅ ᐱᓂᕐᓗᒃᑕᐅᓯᒪᔪᓂᑦ ᑕᐃᑲᓂ ᑳᒻᓘᑉᔅᒥ ᐊᓪᓚᓄᑦ ᐃᓕᓐᓂᐊᕆᐊᖅᑎᑕᐅᓯᒪᔪᓂᑦ

ᒪᐃ 30, 2021

ᐅᖃᐅᓯᐅᔪᖅ

ᓯᕗᓕᖅᑎ ᓴᕕᑲᑖᖅ ᐃᑉᐱᒍᓱᓐᓂᕐᒧᑦ ᐃᖅᑲᐅᒪᑦᑎᕗᖅ ᐱᓂᕐᓗᒃᑕᐅᓯᒪᔪᓂᑦ ᑕᐃᑲᓂ ᑳᒻᓘᑉᔅᒥ ᐊᓪᓚᓄᑦ ᐃᓕᓐᓂᐊᕆᐊᖅᑎᑕᐅᓯᒪᔪᓂᑦ

ᐃᖃᓗᐃᑦ, ᓄᓇᕗᑦ (ᒪᐃ 30, 2021) − ᓯᕗᓕᖅᑎ ᓴᕕᑲᑖᖅ ᐅᓪᓗᒥ ᐅᖃᐅᓯᖃᖅᐳᖅ:

"ᖁᐊᖅᓵᕐᓇᖅᑐᒻᒪᕆᐊᓗᒃ ᑖᓐᓇ ᑐᓴᖅᑎᑦᑎᒍᑕᐅᓯᒪᔪᖅ ᓇᓂᔭᐅᔪᖃᓚᐅᕐᓂᖓᓂᑦ 215ᓂᑦ ᓄᑕᖅᑲᓂᑦ ᐃᓗᕕᖅᑕᐅᓯᒪᔪᓂᑦ ᐊᑕᐅᑦᑎᒦᑦᑐᓂᑦ ᑕᐃᑲᓂ ᑳᒻᓘᑉᔅ ᐊᓪᓚᐃᑦ ᐃᓕᓐᓂᐊᕆᐊᕐᕕᒋᖃᑦᑕᓚᐅᖅᓯᒪᔭᖓᓐᓂᑦ ᑕᐃᒪᓐᓄᓪᓗ ᓄᓇᖃᖅᑳᖅᓯᒪᔪᓄᑦ ᑕᕝᕙᓂ ᑲᓇᑕᒥ ᐆᒻᒪᑎᒃᑯᑦ ᐋᓐᓂᖃᑕᐅᓪᓗᑎᑦ ᕿᒃᓵᖃᑎᒋᓗᒋᓪᓗ ᑖᒃᑯᐊ ᑎᒃ"ᐃᒻᓘᑉᔅ ᑎ ᓯᒃᐅᐃᐸᒥᒃ (Tk'emlúps te Secwépemc) ᓄᓇᖃᖅᑳᖅᓯᒪᔪᑦ ᓄᓇᓕᖃᖅᑎᒌᑦ.

ᑲᓇᑕᒥ ᖃᓄᐃᑦᑑᓯᒪᓂᖓ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᑦ ᐃᓕᓐᓂᐊᕐᕕᖏᓐᓂᑦ ᐃᑎᔪᐊᓗᒻᒥᑦ ᑭᖑᕚᕇᓐᓄᑦ ᐊᒃᓱᕈᓐᓇᖅᑐᒧᑦ ᐊᒃᑐᖅᑕᐅᖃᑕᐅᓂᓯᒪᔪᖅ, ᐊᒻᒫᖅᑖᖅᓯᒪᔪᖅ ᐃᓕᖅᑯᓯᖏᑦ ᓄᖑᑎᑕᐅᒋᐊᓚᐅᕐᓂᖏᓐᓄᑦ ᐱᔮᕆᔭᐅᓪᓗᑎᑦ ᐊᒻᒪᓗ ᐊᓯᔾᔨᖅᑕᐅᓇᓱᓚᐅᕐᓂᖏᓐᓄᑦ ᐃᓕᖅᑯᖏᑦ.

ᑖᓐᓇ ᐃᓚᐃᓐᓇᕆᑐᐃᓐᓇᖏᑦᑕᖓ ᐅᓂᒃᑳᓂᑦ ᑖᖅᑐᐊᓗᒃ ᑲᓇᑕᒥ ᖃᓄᐃᑦᑑᓯᒪᓂᖓᓂᑦ ᑭᖑᓂᑦᑎᓐᓂᑦ, ᓱᓕ ᑲᔪᓰᓐᓇᖅᑐᖅ ᐋᓐᓂᕐᓇᖅᑑᓪᓗᓂᓗ ᐅᓪᓗᒥ ᐃᓅᓯᕆᔭᐅᔪᖅ ᑕᒪᐃᓐᓄᑦ ᑖᒃᑯᓄᖓ ᓄᓇᖃᖅᑳᖅᓯᒪᔪᓄᑦ, ᐃᓄᓐᓄᓪᓗ ᐊᒻᒪᓗ ᒪᐃᑏᓄᑦ. ᓯᕗᒧᑦ ᐃᖏᕐᕋᓯᒋᐊᕈᓐᓇᖁᓪᓗᑕ, ᑲᓇᑕᒥᐅᑦ ᑕᒪᕐᒥᒃ ᑖᒃᑯᓂᖓ ᓵᖓᑦᑎᔭᕆᐊᓖᑦ ᑲᑉᐱᐊᓇᖅᑐᐊᓗᓐᓂ, ᒥᔅᓯᖃᕐᓂᒥᓪᓗ ᓱᓕᔪᓂᑦ ᑐᑭᓯᓗᑎᑦ, ᑖᒃᑯᐊ ᐊᑭᓴᖅᑐᖅᑕᐅᓗᑎᑦ ᐱᓂᕐᓗᑦᑕᐅᓯᒪᓂᖏᑦ ᐊᒻᒪᓗ ᓯᕗᒧᑦ ᐱᕙᓪᓕᐊᓗᑕ ᑐᑭᖃᑦᑎᐊᖅᑐᒥᑦ ᐋᕿᒋᐊᕈᑎᖃᕐᓂᐅᓗᓂ ᐅᕙᒍᑦ ᓇᒻᒥᓂᑦᑎᓐᓂᑦ ᐋᖅᑭᔅᓱᖅᑕᑎᓐᓂᑦ.

ᐃᖅᑲᐅᒪᓗᒋᑦ ᑕᕐᓂᖏᑦ ᐱᐅᔪᒻᒪᕆᐅᓚᐅᖅᑐᑦ, ᐱᔭᐅᓚᐅᖅᑐᑦ, ᖁᔭᓈᖅᑕᐅᑐᐃᓐᓇᖅᑐᑎᑦ ᓱᓇᒃᓴᐅᖏᑦᑐᑎᑐᓪᓗᑦ ᐃᑉᐱᒋᔭᐅᓇᑎᑦ ᑖᒪᑐᒧᖓ ᐱᓕᕆᔾᔪᑕᐅᓯᒪᔪᒧᑦ ᓱᕋᐃᔾᔪᑕᐅᓪᓗᓂ ᐋᖅᑭᑦᑕᐅᓯᒪᓚᐅᖅᑐᒧᑦ ᒪᓕᑦᑐᑎᑦ, ᓄᓇᕗᑦ ᒐᕙᒪᒃᑯᖏᑦ ᓴᐃᒻᒪᑎᓂᑦ ᐊᒻᒧᐊᑎᑦᑎᓯᒪᓂᐊᖅᑐᑦ ᐊᕝᕙᓯᑦᑎᑕᐅᓯᒪᓗᑎᑦ ᐅᓪᓗᓄ 9ᓄᑦ− 215ᓄᑦ ᐃᑲᕐᕋᓄᑦ ᑐᕌᖓᓗᓂ ᑕᒪᓐᓇ ᑖᒃᑯᓄᖓ ᐊᑐᓂᒃ ᓇᓪᓕᒋᔭᐅᔪᓄᑦ 215ᓄᑦ ᓄᑕᖅᑲᓄᑦ.

ᓄᓇᕗᒻᒥᐅᑦ ᑭᒡᒐᖅᑐᕐᓗᒋᑦ, ᓇᒡᓕᒍᓱᓐᓂᑎᑦᑎᓐᓂᑦ ᐅᖃᐅᑎᕙᒃᑲ ᐃᑲᔪᖅᑐᕐᓗᒋᑦ ᐃᓚᒋᔭᐅᔪᑦ ᑖᒃᑯᓄᖓ ᐱᓂᕐᓗᑦᑕᐅᓯᒪᓂᑰᔪᓄᑦ, ᑕᐃᒪᐃᓐᓄᓪᓗ ᐊᓂᒍᐃᓯᒪᖃᑕᐅᔪᓄᑦ ᑕᒪᑐᒧᖓ ᐊᑦᑐᖅᑕᐅᖃᑕᐅᓯᒪᓄᒃᑯᑦ ᐃᓕᓐᓂᐊᕆᐊᖅᑎᑕᐅᓯᒪᓂᕐᒧᑦ. ᓇᖏᖃᑎᒌᑉᐳᒍᑦ ᑲᑐᔾᔨᓗᑕ, ᐃᓕᖅᑯᓯᑦᑎᓐᓂᑦ ᐊᐅᓚᔾᔭᑦᑕᐅᖏᓪᓗᑕ ᐅᖃᐅᓯᖅᑎᒍᓪᓗ, ᒪᒥᒍᒪᓂᕐᒧᑦ ᐊᔪᐃᓐᓇᕐᓗᑕ."

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca