ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᒃᑐᖅᑕᐅᔪᑦ ᖃᕆᓴᐅᔭᖏᓐᓂ ᓴᐳᔾᔨᓯᒪᔾᔪᑎᑦ ᖃᓄᐃᓕᔭᐅᑎᓪᓗᒋᑦ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᔪᓕᖅᑎᑕᐅᓚᐅᖅᐳᑦ ᒪᓕᒐᕐᒥᒃ ᓱᕋᐃᔪᓂᒃ ᖃᕆᓴᐅᔭᒃᑯᑦ ᖃᓄᖓᓴᖅᑕᐅᓪᓗᑎᒃ ᔭᓄᐊᕆ 15−ᒥ. ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᖃᕆᑕᐅᔭᖏᑦ ᓯᖁᒥᑕᐅᓚᐅᖅᑐᑦ, ᑖᒃᑯᐊᓗ ᐆᒻᒪᖅᑯᑎᓕᕆᔨᒃᑯᑦ ᖃᓄᐃᓕᐅᓯᑲᐅᑎᒋᓚᐅᖅᑐᑦ ᑕᒪᓐᓇ ᓄᖅᑲᖓᑎᓐᓇᓱᒃᖢᒍ.

ᖃᕆᑕᐅᔭᓂ ᓴᐳᔾᔨᓯᒪᔨᑦ ᓯᓚᑖᓂ ᖃᐅᔨᒪᔨᑕᐃᑦ ᐱᓕᕆᖃᑎᖃᖅᑐᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓂ ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᖃᕋᓴᐅᔭᓕᕆᔨᖏᓐᓂ ᖃᐅᔨᓴᖅᖢᑎᒃ ᐱᔾᔪᑎᖓᓂᒃ ᐊᔪᓕᖅᑎᑕᐅᓂᖓᑕᓗ ᐊᖏᓂᖓᓂ.

"ᖃᐅᔨᑐᐊᕋᑦᑕ ᐊᑲᐅᙱᓕᐅᕈᑎᑕᖃᑐᐃᓐᓇᕆᐊᖃᕐᓂᖓᓂ, ᐱᒋᐊᖅᑎᑦᑎᓚᐅᖅᐳᒍᑦ ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᑎᒥᒃ ᑕᒪᑐᒥᖓ ᐊᐅᓚᑦᑎᔪᒪᓪᓗᑕ," ᕆᒃ ᕼᐊᓐᑦ ᑕᐃᒪᓐᓇ ᐅᖃᖅᖢᓂ, ᐊᖓᔪᖅᑳᖅ ᐊᐅᓚᑦᑎᔨᓪᓗᐊᑕᕐᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ. "ᑐᕌᒐᖃᖅᐳᒍᑦ ᐊᐅᓚᓂᕆᒐᔪᒃᑕᑦᑎᓐᓄᑦ ᐅᑎᕈᒪᓪᓗᑕ ᖃᐅᔨᓇᓱᒡᓗᑕᓗ ᑭᓱᑦ ᑐᓴᐅᒪᔾᔪᑎᑦ ᐊᒃᑐᖅᑕᐅᓯᒪᖕᒪᖔᑕ, ᐱᓕᕆᓗᑕᓗ ᐱᔪᓐᓇᕐᓂᓕᒫᑦᑎᓐᓂᒃ ᐱᔨᑦᑎᕋᕐᓗᒋᑦ ᐊᑭᓕᖅᓱᐃᔨᒋᔭᕗᑦ."

ᐊᐅᓚᐅᑎᖃᕐᕖᑦ ᓱᓕ ᐃᖏᕐᕋᔪᑦ ᑕᐃᒫᑐᐃᓐᓇᖅ. ᓄᓇᕗᒻᒥᐅᑦ ᓱᓕ ᐅᖃᐅᓯᖃᕈᓐᓇᖅᑐᑦ ᐆᒻᒪᖅᑯᑎᓄᑦ ᖃᒥᙵᓂᐅᔪᓂᒃ ᑐᐊᕕᕐᓇᖅᑐᓂᒡᓗ ᐃᑲᕐᕋᓄᑦ 24-ᓄᑦ ᐅᖄᓚᓗᑎᒃ ᐅᕗᖓ 1-833-313-3030.

ᕿᓚᒻᒥᐅᓗᐊᕐᒪᑦ ᖃᐅᔨᔭᕆᐊᒃᓴᖅ ᑖᒃᑯᐊ ᐱᒋᐊᖅᑏᑦ ᐱᔪᓐᓇᓚᐅᖕᒪᖔᑦ ᐊᑭᓕᖅᓱᐃᕙᒃᑐᑦ ᒥᒃᓵᓄᑦ ᑎᑎᕋᖅᓯᒪᔪᓂᑦ. ᓱᓕ ᖃᐅᔨᓴᖅᐸᓪᓕᐊᔪᑦ, ᖁᓪᓕᒃᑯᑦ ᖃᐅᔨᒃᑲᐃᓂᐊᖅᑐᖅ ᓇᓕᐊᖕᓂᑐᐃᓐᓇᖅ ᐱᓕᕆᖃᑕᐅᔪᓂᒃ ᐊᒃᑐᖅᑕᐅᔪᖃᖅᐸᑦ ᓱᕋᐃᔪᓂᑦ.

ᐅᔾᔨᖅᓱᑦᑎᐊᕐᓗᑎᒃ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᑭᓕᕐᓱᐃᕙᒃᑐᓕᒫᑦ ᐅᔾᔨᖅᓱᖁᔭᐅᕗᑦ ᓴᐳᔾᔨᓯᒪᖁᓪᓗᒋᑦ ᐃᒻᒥᓅᖓᔪᓂᑦ ᑎᑎᕋᖅᓯᒪᔪᓂᑦ. ᐊᑭᓕᖅᓱᐃᕙᒃᑐᑦ ᖃᐅᔨᓴᐃᓐᓇᕆᐊᖃᖅᐳᑦ ᑮᓇᐅᔭᒃᑯᕕᖕᒥᑦ ᐊᑭᓕᒃᓴᓂᒍᓐᓇᐅᑎᒥᒡᓗ ᐊᐅᒃᑕᔫᒥᑦ ᐊᑐᒐᔪᙱᑦᑐᒥᑦ ᐊᑐᖅᑕᐅᖕᒪᖔᑦ. ᐃᓱᒪᒋᖕᒥᓗᒋᑦ ᐊᓯᔾᔨᕐᓗᒋᑦ ᓇᖕᒥᓂᖅ ᐃᓯᕈᑏᑦ (ᓲᕐᓗ ᐃᕐᖐᓐᓇᒃᑰᕈᑎᒃᑯᑦ ᖃᕆᑕᐅᔭᒃᑯᓪᓗ ᑮᓇᐅᔭᓕᕆᓃᑦ). ᓴᙱᔪᑦ ᐃᓯᕈᑏᑦ ᑕᑭᔫᒐᔪᒃᑐᑦ ᐱᖃᓯᐅᔾᔨᕙᒃᖢᑎᒡᓗ ᖁᑦᑎᖕᓂᖅᓴᓂᒃ ᐊᑦᑎᖕᓂᖅᓴᓂᓪᓗ ᑎᑎᖅᑲᓂᒃ ᐊᔾᔨᒌᖏᑦᑐᓂᒃ ᓈᓴᐅᑎᓂᑦ ᐊᔾᔨᐅᙱᑦᑐᓂᒡᓗ ᑎᑎᖅᑲᓂᒃ.

ᖃᕆᑕᐅᔭᓕᕆᔾᔪᑎᑦ ᖁᓪᓕᒃᑯᓐᓂ ᐱᔨᑦᑎᕋᖅᑕᐅᕙᒃᑐᓂᑦ ᑎᑎᕋᕐᕕᖏᓐᓂᒡᓗ ᓱᓕ ᐊᑐᐃᓐᓇᐅᙱᒻᒪᑕ ᒫᓐᓇ.

ᐊᑭᓕᖅᓱᐃᔨᓄᑦ ᐃᑲᔪᖅᑕᐅᔪᒪᓗᓂ, ᐅᕗᖓ ᐅᖃᓗᒍᓐᓇᖅᐳᑎᑦ 1-866-710-4200 ᓂᐱᓕᐅᕐᓗᑎᓪᓗ. ᖃᐅᔨᒋᐊᕐᕖᑦ ᑭᐅᔭᐅᓂᐊᖅᑐᑦ ᐱᔨᑦᑎᕋᐅᑏᑦ ᐅᑎᑐᐊᖅᐸᑕ.

ᐊᑭᓕᖅᓱᐃᔨᑦ ᐊᑭᓕᒐᒃᓴᒥᓂᒃ ᐊᑭᓖᖏᓐᓇᕈᓐᓇᖅᐳᑦ ᓇᖕᒥᓂᖅ ᐊᑐᕐᓗᑎᒃ ᐊᑭᓕᖅᓱᐃᔨᑦ ᑎᑎᕋᕐᕕᖏᓐᓂᒃ ᐃᖃᓗᖕᓂ ᐊᒻᒪ ᖃᒪᓂ'ᑐᐊᕐᒥ, ᓂᐅᕕᖅᑎᒃᑯᑦ/ᑯᐊᐸᒃᑯᑦ ᐊᒻᒪ ᓄᓇᓕᖕᓂ ᑮᓇᐅᔭᒃᑯᕕᖕᓂ ᓄᓇᓕᓕᒫᓂᒃ, ᐊᒻᒪ ᑮᓇᐅᔭᒃᑯᕕᒃᑯᑦ ᓅᑕᐅᓗᑎᒃ ᐅᖃᓘᑎᒃᑯᑦ ᐅᕝᕙᓘᓐᓃᑦ ᐃᑭᐊᖅᑭᕕᒃᑯᑦ ᑮᓇᐅᔭᒃᑯᕕᒃᑯᑦ. ᒫᓐᓇᐅᔪᖅ, ᐊᑭᓕᒃᓴᓂᒍᓐᓇᐅᑎᑦ ᐊᐅᒃᑕᔫᑦ ᐊᑭᓕᐅᑎᑦ ᐊᖏᖅᑕᐅᔪᓐᓇᙱᑦᑐᑦ ᐅᐸᒍᑎᓗᑎᒃ ᐅᕝᕙᓘᓐᓃᑦ ᐅᖃᓘᑎᒃᑯᑦ ᑮᓇᐅᔭᒃᑯᕕᒃᑯᑦ.

ᓄᑖᙳᕆᐊᖅᓯᒪᔪᓂᒃ ᑐᓴᖅᑎᑦᑎᔪᖃᖃᑦᑕᕐᓂᐊᖅᐳᖅ ᐊᑐᐃᓐᓇᐅᓕᕌᖓᑕ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᖁᔭᓕᕗᑦ ᓄᓇᓕᖕᒥᐅᓂᑦ ᑐᑭᓯᐅᒪᑦᑎᐊᕐᓂᖏᓐᓄᑦ ᒪᒥᐊᑉᐳᓪᓗ ᐊᑲᐅᙱᓪᓕᐅᖅᑎᑦᑎᓐᓂᕈᑎᒃ.

###

ᑐᓴᒐᒃᓴᓂᑦ ᖃᐅᔨᒋᐊᕐᕕᒃᓴᖅ:

ᕈᓃ ᐴᓱ

ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ

(867) 222-2075

qec-comms@outlook.com