ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᑐᓴᒐᒃᓴᖏᑦ - ᒫᑦᓯ 26, 2020

ᒫᑦᓯ 26, 2020

ᓯᕗᓕᖅᑎᒥ ᑐᓴᒐᒃᓴᖅ:

ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ  ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.

ᒪᓕᒋᐊᓕᖕᓂᒃ ᐊᑐᖅᑕᐅᔪᖃᖅᐳᖅ ᐱᓇᓱᐊᕈᓯᑦ ᐅᓄᓗᐊᙱᑦᑐᑦ ᑐᓴᓕᑕᐃᓐᓇᓚᐅᖅᑕᑦᑎᓐᓂᒃ. ᐅᓪᓗᒥ ᐱᕐᔪᐊᒥᒃ ᑐᓴᒐᒃᓴᖃᙱᓐᓂᖓᓄᑦ, ᑖᒃᑯᐊ ᐅᖃᐅᓯᕆᔪᒪᕙᒃᑲ:

  • ᓇᖕᒥᓂᖅ−ᖃᐅᔨᓴᕐᓂᖅ ᐃᒪᓐᓇ ᑐᑭᖃᖅᐳᖅ ᑎᒥᒃᑯᑦ ᖃᓄᐃᓐᓃᑦ ᐅᔾᔨᕆᑦᑎᐊᕋᓱᒡᓗᒍ ᐋᓐᓂᐊᕕᖕᒧᓪᓗ ᐅᖄᓚᓗᑎᑦ ᐊᓯᔾᔨᕐᓂᕐᓂ ᐅᔾᕈᓱᒃᑯᕕᑦ ᐋᓐᓂᐊᑲᑕᓕᕈᕕᓪᓘᓐᓃᑦ ᓲᕐᓗ ᖁᐃᖅᓱᑲᑕᒡᓗᑎᑦ, ᐆᓇᑲᑕᒡᓗᑎᑦ, ᐊᓂᖅᓵᑦᑎᐊᑲᑕᙱᓪᓗᑎᓪᓘᓐᓃᑦ.
  • ᐃᓄᑑᑲᑕᖕᓂᖅ ᑐᑭᖃᖅᐳᖅ ᐊᖏᕐᕋᖅᓯᒪᐃᓐᓇᕐᓗᑎᑦ, ᐃᒡᓗᒥᐅᖃᑎᑎᓪᓗ ᖃᓂᒋᑲᑕᙱᓪᓗᒋᑦ ᐅᓪᓗᓄᑦ 14-ᓄᑦ. ᐃᖅᑲᐃᓯᒋᐊᕈᑎ ᑭᒃᑯᓕᒫᑦᑎᐊᖅ ᓄᓇᕗᒻᒧᐊᓚᐅᖅᑐᖅ ᒫᔾᔨ 15-ᒥᑦ ᐱᒋᐊᖅᖢᓂ ᐃᓄᑑᑲᑕᒋᐊᖃᖅᐳᑦ ᐅᓪᓗᓄᑦ 14-ᓄᑦ.
  • ᐃᓅᖃᑎᒥᓂᒃ ᖃᓂᒃᓴᖅᑕᐃᓕᒪᓂᖅ ᐊᒻᒪ ᑎᒥᒃᑯᑦ ᖃᓂᒃᓴᙱᓐᓂᖅ ᐃᒪᓐᓇ ᑐᑭᖃᖅᐳᖅ ᐅᖓᓯᒌᖃᑦᑕᕐᓗᑎᒃ ᐊᑦᑕᕐᓇᙱᓐᓂᖅᓴᐅᖕᒪᑦ. ᒪᓕᒐᖃᖅᐳᑦ 2 ᒦᑕᓂᒃ ᐅᕝᕙᓘᓐᓃᑦ 6 ᐃᓯᒐᑦ ᐅᖓᓯᒌᒃᑎᒋᓗᓯ. ᐊᔪᕈᓐᓃᖅᓴᕈᑎᑦᑎᐊᕙᐅᕗᖅ ᒪᓕᒐᐅᓪᓗᓂᓗ ᐊᐃᑦᑐᕐᓗᐃᓗᐊᖅᑕᐃᓕᒪᑎᑦᑎᓂᕐᒧᑦ ᓄᕙᒡᔪᐊᕐᓇᖅ-19−ᒥᑦ.

ᐊᖓᔪᖅᑳᕆᔭᐅᔪᑦ, ᐃᓐᓇᐃᓪᓗ ᐊᐱᕆᔪᒪᖕᒥᔭᒃᑲ ᓄᑕᖅᑲᓄᑦ ᐅᖃᖃᑎᖃᖁᓪᓗᒋᑦ ᐃᓅᖃᑎᒥᓂᒃ ᖃᓂᒃᓴᓗᐊᕆᐊᖃᙱᓐᓂᕐᒥᒃ ᐊᒻᒪ ᖃᓄᐃᒻᒪᑦ ᑕᒪᓐᓇ ᐱᒻᒪᕆᐅᖕᒪᖔᑦ.

ᐃᓅᖃᑎᒌᑦ ᐊᒻᒪ ᑎᒥᒃᑯᑦ ᖃᓂᒃᓴᓗᐊᖅᑕᐃᓕᒪᓂᖅ ᓄᑖᖑᓪᓗᓂ ᐊᑐᖅᑕᐅᖃᑦᑕᓕᖅᑐᖅ. ᑭᓇᑐᐃᓐᓇᕐᓘᓐᓃᑦ ᐅᓪᓗᓄᑦ 14−ᓄᑦ ᐃᓄᑑᔭᕆᐊᖄᓂᓵᕋᓗᐊᖅᐸᑦ ᑕᐃᒪᐃᑦᑕᕆᐊᖃᕆᕗᖅ.

ᑭᒃᑯᓕᒫᑦᑎᐊᑦ ᑕᒪᑐᒥᖓ ᐱᔭᕆᐅᖅᓴᕆᐊᖃᖅᐳᑦ, ᖃᖓᓕᒫᑦᑎᐊᖅ. ᐊᓕᐊᓇᐃᙱᑦᑑᒐᓗᐊᖅ, ᖃᐅᔨᒪᔪᐃᓐᓇᐅᔪᒍᑦ. ᑭᓯᐊᓂ ᐊᒃᓱᐊᓗᒃ ᐱᒻᒪᕆᐅᕗᖅ ᓄᓇᕗᒻᒥᐅᓕᒫᑦ ᖃᓄᐃᙱᑦᑎᐊᖁᓪᓗᒋᑦ. ᐊᒻᒪ ᐊᔪᕐᓇᔾᔮᙱᑉᐳᖅ ᑕᐃᒪᐃᓕᐅᖅᑐᐃᓐᓇᐅᒍᑦᑕ.

ᐃᓅᖃᑎᑦᑎᓐᓂ ᖃᓂᒃᓴᓗᐊᖃᑦᑕᙱᓪᓗᑕ ᓄᕙᒡᔪᐊᕐᓇᖅ−19-ᒥᑦ ᓴᐳᑎᓯᒪᑦᑎᐊᓛᖑᔪᓐᓇᖅᐳᒍᑦ.

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ  ᓄᕙᒡᔪᐊᕐᓇᖅ-19−ᖃᓕᑐᐃᓐᓇᕆᐊᓕᖕᓄᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

 

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᓂ ᑐᓴᒐᒃᓴᑦ

ᐋᓐᓂᐊᕐᕕᐊᓗᖕᒥ ᐊᖓᔪᖅᑳᒻᒪᕆᖕᒧᑦ ᐊᐅᓪᓚᖃᑦᑕᖅᑐᓄᑦ ᐊᑐᖁᔭᐅᔪᑦ/ᐱᒻᒪᕆᐅᔪᑦ ᐃᖅᑲᓇᐃᔭᖅᑏᑦ ᐊᑐᐊᒐᖏᑦ ᐅᕙᓂ ᓴᖅᑭᑎᑕᐅᓯᒪᓕᖅᐳᑦ: https://www.gov.nu.ca/health/information/covid-19-novel-coronavirus

ᐊᐅᓪᓚᑲᑕᒃᑐᓕᒫᑦ ᐃᓄᑑᔭᕆᐊᖃᖃᑦᑕᕐᓂᐊᓕᖅᐳᑦ ᓇᓗᓇᐃᖅᑕᐅᓯᒪᔪᒥᑦ ᑐᔪᕐᒥᕕᖕᒥᑦ ᓄᓇᕗᑦ ᓯᓚᑖᓂ ᐅᓪᓗᓄᑦ 14-ᓄᑦ, ᑭᓯᐊᓂ ᐱᒻᒪᕆᐅᔪᑦ ᐃᖅᑲᓇᐃᔭᖅᑏᑦ ᖃᓂᒪᖅᑰᔨᙱᑦᑐᑦ.

ᑕᐃᒃᑯᐊ ᓄᓇᕗᒻᒧᑦ ᐅᑎᖅᐸᓪᓕᐊᔪᑦ ᐊᖏᖅᑕᐅᓯᒪᔭᕆᐊᖃᖅᐳᑦ ᐋᓐᓂᐊᕕᐊᓗᖕᒥ ᐊᖓᔪᖅᑳᒻᒪᕆᐅᑉ ᐊᒡᓚᕝᕕᖓᓂ ᐃᕐᖐᓈᖅᑕᐅᒃᑯᓪᓗ ᑎᑎᕋᖁᔭᐅᓪᓗᑎᒃ ᐅᕗᖓ CPHOTravelRequests@gov.nu.ca.

ᐊᑭᖃᙱᑦᑐᖅ ᐅᖄᓚᕝᕕᐅᔪᓐᓇᖅᑐᖅ ᑭᓇᑐᐃᓐᓇᕐᒧᑦ ᐊᐅᓪᓚᖅᓯᒪᓵᓚᐅᖅᑐᓄᑦ ᐅᕝᕙᓘᓐᓃᑦ ᐋᓐᓂᐊᑲᑕᓕᖅᐸᑦ ᓄᕙᒡᔪᐊᕐᓇᖅ−19-ᒧᑦ ᖃᓂᒪᒍᑕᐅᔪᓂᑦ:
1-888-975-8601 ᑭᐅᔭᐅᖃᑦᑕᕐᓂᐊᖅᑐᖅ 7:30-ᒥ ᐅᓪᓛᒃᑯᑦ ᐱᒋᐊᕐᓗᓂ 7:30-ᒧᑦ ᐅᓐᓄᒃᑯᑦ ᑎᑭᓪᓗᒍ.

ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

  • ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᐅᑕᐅᕙᒃᑐᓄᑦ ᐃᑲᔪᖅᑕᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ ᐱᓇᓱᐊᕈᓯᓕᒫᖅ ᐅᓪᓗᓄᑦ 7-ᓄᑦ.
  • ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑎᒍᑦ ᒪᓕᓪᓗᒋᑦ.
  • ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ.
  • ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.
  • ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
  • ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
  • ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᕆᔭᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.
  • ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.
  • ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ. ᑕᑯᔭᐅᕝᕕᒃᓴᓖᕝᖃᖅᑐᓕᒫᑦ ᐃᓂᒃᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.
  • ᐃᓱᒪᓕᕆᔨ ᐅᐃᕆᓯᒪᔪᓕᕆᔨᓗ ᓅᓯᒪᓕᖅᐳᑦ ᐅᖄᓚᐅᑎᒃᑯᑦ ᖃᐅᔨᒋᐊᕐᕕᐅᔪᓐᓇᖅᖢᑎᒃ ᐃᑲᔪᖅᑐᐃᓂᕐᒧᓪᓗ ᐃᓚᖏᓐᓄᑦ ᑲᒪᒋᔭᐅᔪᓄᑦ. ᑕᑯᔭᒃᓴᓕᐊᖑᓯᒪᔪᑦ ᐄᔭᒐᖏᓐᓂᑦ ᐊᐃᒃᓯᕆᐊᓖᑦ ᐊᒻᒪ ᑎᑎᖅᑲᓕᕆᔭᕆᐊᓖᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ.
  • ᐊᖏᕐᕋᕆᔭᐅᔪᓄᑦ ᐅᐸᒃᑕᐅᖃᑦᑕᖅᑐᑦ ᐄᔭᒐᖏᑕ ᒥᒃᓵᓄᑦ ᐊᑕᐅᓯᐅᓈᖅᑎᕐᓗᒋᑦ ᐱᓕᕆᐊᖃᑦᑕᕐᓂᐊᖅᑐᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᐊᔾᔨᒌᙱᑦᑐᓄᑦ ᐋᓐᓂᐊᕕᖕᒥ ᑕᑯᔭᐅᖃᑦᑕᖅᑐᑦ ᓄᖅᑲᖅᑎᑕᐅᔪᑦ. ᐱᓕᕆᔪᖃᖅᐸᓪᓕᐊᕗᖅ ᑐᑭᓯᓇᓱᒃᖢᑎᒃ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.
  • ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.

 

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᒪᓕᒐᓕᕆᔨᒃᑯᑦ ᐋᖅᑭᒃᓱᐃᖏᓐᓇᕐᓂᐊᖅᑐᑦ ᐃᓕᓐᓂᐊᒐᒃᓴᓂᒃ ᐱᓕᒻᒪᒃᓴᒐᒃᓴᓂᓪᓗ ᐃᓄᖕᓂᑦ ᐃᖅᑲᓇᐃᔭᖅᑎᓂᒃ ᐃᑲᔪᖅᑐᐃᔪᓂᒃ ᒪᓕᒐᓕᕆᔨᒃᑯᑦ ᐱᔨᑦᑎᕋᖅᑎᖏᓐᓂᒃ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᒫᓐᓇ ᐊᑐᖅᑕᐅᔪᖅ ᒪᓕᒃᖢᒍ, ᒪᓕᒐᓕᕆᔨᒃᑯᑦ ᐃᐅᓪᒍᓐᑯᐃᓐ ᓯᓚᑦᑐᖅᓴᕐᕕᒡᔪᐊᕐᒥ ᐅᖃᖃᑎᖃᓚᐅᖅᖢᑎᒃ ᐃᓕᓐᓂᐊᖅᑕᐅᓂᐊᖅᑐᖅ ᐃᓄᖕᓄᑦ ᑎᒍᔭᐅᓯᒪᕝᕕᖕᒥ ᐱᓕᕆᔨᒃᓴᓄᑦ ᓄᖅᑲᖅᑎᑕᐅᓯᒪᓕᖅᑐᖅ ᐱᒋᐊᕐᕕᒃᓴᖃᓚᐅᖅᑑᒐᓗᐊᖅ ᐋᑐᕚᒥ ᓯᓚᑦᑐᖅᓴᕐᕕᐊᓂ ᒪᐃ 4, 2020-ᒥ.

 

ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᕆᔭᖏᑦ

ᒫᑦᓯ 26-ᒥ ᐱᒋᐊᖅᖢᓂ, ᓄᓇᓕᖕᓂ ᐊᖑᓇᓱᒃᑎᓄᑦ ᐃᑲᔫᑎᑦ 21−ᓄᑦ ᓄᓇᓕᖕᓄᑦ ᐱᓕᕆᐊᖑᓯᒪᓕᖅᐳᑦ, ᐊᑭᓕᖅᑕᐅᓛᖅᖢᑎᒡᓗ ᒫᑦᓯ 27-ᒥᑦ. ᑕᐃᒃᑯᐊ ᐱᑎᑕᐅᓂᐊᖅᑐᑦ ᐃᕐᖐᓈᖅᑕᐅᒃᑯᑦ ᓇᒃᓯᐅᔾᔨᕝᕕᐅᖃᑦᑕᖅᑐᑦ ᐊᑭᓕᖅᑕᐅᑲᐅᑎᒋᓂᐊᖅᐳᑦ. ᐊᓯᖏᓪᓕ ᑎᑎᖅᑲᖅᑯᕕᒃᑯᑦ ᑮᓇᐅᔭᒃᓴᖏᑦ ᓇᒃᓯᐅᔾᔭᐅᓂᐊᖅᖢᑎᒃ, ᑭᖑᕙᕆᐊᖅᓯᒪᓂᐊᖅᖢᑎᒃ ᑮᓇᐅᔭᖅᑖᕆᓂᐊᖅᑕᖏᑦ.

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖃᑦᑕᕐᓗᒋᑦ ᑭᐳᐃᓪᓗ ᐊᓪᓚᖅᑐᖅᐸᒡᓗᒋᑦ, ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓗᓯ, ᓇᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐊᓐᓂᐊᖃᕐᓇᙱᑦᑐᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.