ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᒪᐃ 06, 2020

ᒪᐃ 06, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓐᓄᒃᓴᒃᑯᑦ. ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᖃᕐᓂᕐᒥᒃ ᐱᑕᖃᕐᓂᖓᓂᒃ ᓇᓗᓇᐃᓪᓚᕆᒃᓯᒪᔪᖃᙱᓚᖅ ᓄᓇᕗᒻᒥ.

ᐅᓪᓗᒥ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᔪᑦ 778-ᖑᓕᖅᑐᑦ. 326 ᒫᓐᓇ ᖃᐅᔨᓴᖅᑕᐅᔪᑦ, 452−ᓗ ᐃᓄᐃᑦ ᖃᐅᔨᓴᖅᑕᐅᔪᓐᓃᖅᖢᑎᒃ.

ᐅᖃᐅᓯᖃᕐᓂᐊᓕᕆᕗᖓ ᐱᓇᓱᐊᕈᓯᐅᓵᖅᑐᒥ ᐊᑭᓖᖃᑦᑕᕐᓂᐊᕐᓂᕋᐃᓪᓗᓂ ᐋᖅᑭᒃᓯᒪᓕᖅᑎᑕᐅᓚᐅᖅᑐᖅ ᐊᑐᓪᓚᕆᒋᐊᖃᖅᑐᒧᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᓂᕐᒧᑦ, ᓄᓇᓕᖕᓄᑦ ᐅᑎᖅᑐᓄᒃ ᑕᒪᐅᖓ ᐅᑭᐅᖅᑕᖅᑐᒧᑦ, ᐃᒡᓗᖔᖓᓅᓕᖅᑎᑕᐅᓯᒪᓕᖅᐳᖅ, ᑭᓇᑐᐃᓐᓇᑦᑎᐊᕐᓗ ᐊᑭᓖᒐᒃᓴᖅᑖᖅᑎᑕᐅᖃᑦᑕᔾᔮᙱᖦᖢᓂ.

ᓄᓇᕗᑦ ᒐᕙᒪᒃᑯᖏᑦ ᐊᑭᓖᖏᓐᓇᖃᑦᑕᕐᓂᐊᖅᑐᑦ ᑕᒪᒃᑯᓂᖓ ᐊᑭᓕᖅᓱᒐᒃᓴᓂᒃ, ᑕᒪᓐᓇ ᐊᑐᓪᓚᕆᒋᐊᓕᒃ ᐅᐸᒃᑕᐅᑦᑕᐃᓕᒪᓂᖅ ᓄᓇᖃᖅᑐᓄᑦ ᐅᑎᖅᑐᓄᑦ ᓱᓕ ᐊᑐᕆᐊᖃᑐᐊᖅᐸᑦ. 

ᓄᒃᑕᕐᓂᖅ ᒫᓐᓇᒃᑯᑦ ᖁᐊᖅᓵᕐᓇᕐᒪᑦ, ᓱᕋᐃᔪᒪᙱᖦᖢᑕᓗ ᐊᒃᓱᕈᖅᖢᑕ ᐱᓕᕆᖃᑦᑕᖅᓯᒪᔭᓕᒫᑦᑎᓐᓂᒃ. ᒫᓐᓇ ᑕᒪᓐᓇ ᖃᓂᒪᓐᓇᖅ ᓇᒧᙵᕈᓘᔭᖃᑦᑕᖅᓯᒪᑎᓪᓗᒍ, ᐊᐅᓪᓚᖃᑦᑕᖁᔨᙱᑉᐳᒍᑦ ᓄᓇᕗᑦ ᓯᓚᑖᓄᑦ, ᑭᓯᐊᓂᓗᑦᑕᐅᖅ ᐊᒃᓱᕈᖅᑎᑦᑎᔪᒪᙱᒃᑭᓪᓗᑕ ᑮᓇᐅᔭᑎᒎᖓᔪᑎᒍᑦ ᐃᓄᖕᓂᒃ.

ᑭᒡᒐᖅᑐᖅᖢᒋᑦ ᒐᕙᒪᒋᔭᕗᑦ, ᒪᒥᐊᑉᐳᒍᑦ ᑕᒪᑐᒧᖓ ᓇᓗᓕᐅᖅᑲᔾᔪᑕᐅᓚᐅᖅᑐᒧᑦ.

ᐅᓐᓄᒃᓴᐅᔪᒥᑦᑕᐅᖅ ᐱᕕᒃᓴᖃᕐᓂᓐᓂ ᒪᒥᐊᑦᑐᒪᕗᖓ – ᐅᖃᐅᓯᖃᓚᐅᕋᒪ ᓇᒡᒐᔾᔭᒥ ᐱᕙᓪᓕᐊᔪᓕᕆᓂᕐᒧᑦ ᐱᓕᕆᓂᐅᔪᒥ, ᒪᒥᐅᔾᔪᑎᒋᓕᖅᑕᓐᓂᒃ. ᐅᖃᐅᓯᕆᔭᒃᑲ ᐃᓕᓴᐃᔨᓂᒃ ᐃᖅᑲᓇᐃᔭᖅᑐᒃᓯᐅᕐᓂᕐᒥᒃ ᐅᔾᔨᖅᓱᕐᓇᖓ ᐅᖃᐅᓯᕆᓚᐅᖅᐸᕋ ᓱᖁᑎᒋᑦᑕᐃᓕᒪᓪᓗᒍᓪᓗ. ᑕᒪᓐᓇ ᐊᒃᑐᐊᓂᖃᙱᑦᑎᐊᖅᐳᖅ ᖃᓄᖅ ᑖᒃᑯᐊ ᒐᕙᒪᒃᑯᑦ ᐊᓐᓂᕆᔭᖃᖅᑎᒋᖕᒪᖔᑕ ᐃᓕᓴᐃᔨᓂᒃ. ᑕᒪᓐᓇ ᐅᖃᖅᓵᓕᓂᐅᓗᐊᓚᐅᖅᐳᖅ ᑭᐅᓯᓂᐅᓪᓗᓂ, ᓈᒻᓚᙱᖦᖢᓂ ᑭᐅᓂᐅᓪᓗᓂ.

ᐅᒡᒍᐊᖅᐳᖓ, ᐃᓕᓴᐃᔨᓕᒫᓪᓗ ᖃᐅᔨᒪᖁᓪᓗᒋᑦ ᖁᔭᓕᓯᒪᔭᒻᒪᕆᐊᓗᒋᓂᓐᓂ ᐱᓕᕆᐊᖃᓪᓚᕆᒍᒪᕙᖕᓂᖏᓐᓂᒃ ᐱᓕᕆᓪᓚᕆᒍᒪᕙᖕᓂᖏᓐᓂᒡᓗ ᐃᓕᓐᓂᐊᖅᑎᖁᑎᑦᑎᓐᓄᑦ. ᐅᕙᖓ ᑕᕝᕙ ᓵᑕᒃᓴᐅᕗᖓ ᐊᐃᑦᑖᕈᓱᒃᓯᒪᓂᕆᔭᔅᓯᓐᓄᑦ, ᐅᔾᔨᖅᓱᕐᓂᖅᓴᐅᓗᖓᓗ ᐅᖃᓪᓚᖃᑦᑕᕐᓂᐊᓕᖅᖢᖓ ᓯᕗᓂᒃᓴᑦᑎᓐᓂ.

ᐃᓕᓴᐃᔩᑦ − ᖁᔭᓐᓇᒦᒃ ᖃᓄᓗᒃᑖᖅ ᐱᓕᕆᖃᑦᑕᕋᔅᓯ ᓄᓇᕗᒻᒥᐅᓄᑦ. ᐃᑲᔪᕐᓂᕆᖃᑦᑕᖅᑕᓯ ᐃᒃᐱᒋᔭᐅᔪᒻᓚᕆᐅᕙᒃᐳᑦ ᐊᒻᒪᓗ, ᐅᖃᐅᓯᕆᑦᑎᐊᙱᑕᕕᓂᒃᑲ ᐃᔅᓯᓐᓂᒃ ᑲᑕᒃᑎᑦᑎᓯᒪᑦᑕᓕᓕᑦ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ

ᑕᐃᒪᙵᓂᑦ ᓇᓗᓇᐃᖅᑕᐅᓪᓚᕆᓚᐅᖅᑎᓪᓗᒍ ᑕᐃᓐᓇ ᖃᐅᔨᔭᐅᔪᖅ ᓄᕙᒡᔪᐊᕐᓇᖅᑐᒥᒃ ᐱᓯᒪᓂᖓᓂᒃ ᓄᓇᕗᒻᒥ ᓱᓕᙱᖦᖢᓂ ᑕᐃᒪᐃᓐᓂᕋᐃᓚᐅᕐᓂᖓᓄᑦ, ᐅᑭᐅᖅᑕᖅᑐᒥᐅᑦ ᑕᑯᒃᓴᐅᑎᑦᑎᖃᑦᑕᖅᓯᒪᕗᑦ ᑲᑐᔾᔨᑎᒌᓪᓚᕆᖕᓂᕐᒥᒃ, ᐃᑲᔪᖅᑐᐃᓂᕐᒥᒃ, ᐱᒃᑯᓕᓂᕐᒥᒡᓗ. ᐊᔪᓕᖅᑎᑦᑎᓯᒪᒃᑲᓐᓂᕈᑏᑦ ᒥᑦᑎᒪᑕᓕᖕᒥ ᐊᑐᕈᓐᓃᖅᑎᑕᐅᓯᒪᓕᖅᐳᑦ, ᑕᐃᒪᓗᑐᖅ ᓄᓇᓕᖕᒥᐅᑦ ᖃᓱᓂᕐᒥᒃ ᐃᒃᐱᒋᔭᖃᑦᑎᐊᕐᓕᑦ, ᖃᐅᔨᒪᓕᕋᒥᒃ ᓄᕙᒡᐊᕐᓇᖅᑐᒥᒃ−ᐱᓯᒪᙱᓐᓂᕐᒥᓂᒃ.

ᑖᓐᓇ ᑐᓴᕈᒥᓇᑦᑎᐊᖅᑐᖅ.  ᐅᑭᐅᖅᑕᖅᑐᒥ ᐊᕕᒃᓯᒪᓂᐅᑎᓪᓗᑕ, ᐅᓪᓗᒥᒧᑦ ᑎᑭᖦᖢᒍ ᐱᓕᕆᐊᖃᑦᑎᐊᖅᓯᒪᕗᒍᑦ.

ᑭᓯᐊᒥᓂᓗᑦᑕᐅᖅ, ᖁᕕᐊᓱᖕᓂᕆᔭᕗᑦ ᐊᑐᙱᓐᓂᖅᓴᐅᓕᖅᕕᒋᔭᕆᐊᖃᙱᑦᑎᐊᖅᑕᕗᑦ. ᐱᒻᒪᕆᐅᓂᖅᓴᐅᕗᖅ ᑲᔪᓯᑎᑦᑏᓐᓇᕈᑦᑕ ᑕᒪᒃᑯᓂᖓ ᒪᓕᒋᐊᓕᖕᓂᒃ, ᑕᒪᒃᑯᐊᓗ ᑕᒪᑦᑕ ᖃᐅᔨᒪᔭᐃᓐᓇᕆᓕᖅᖢᑎᒍ. ᖁᐊᖅᓵᕐᓇᕐᓂᖓ ᓄᕙᒡᔪᐊᕐᓇᖅ-19 ᓱᓕ ᒫᓐᓇ ᐱᒻᒪᕆᐊᓘᕗᖅ, ᑲᔪᓰᓐᓇᕆᐊᖃᖅᖢᑕᓗ ᐊᑐᖅᐸᓪᓕᐊᖏᓐᓇᖅᑕᑦᑎᓐᓂᒃ.

  • ᐃᓅᖃᑎᑎᑦ ᖃᓂᒋᓗᐊᖅᑕᐃᓕᒪᓗᒋᑦ.
  • ᐊᐴᑎᓯᒪᑦᑕᐃᓕᓗᑎᒃ ᐃᓄᖕᓂᒃ ᐃᒡᓗᒥᐅᑕᐅᖃᑎᒋᙱᑕᕐᓂᒃ.
  • ᐃᓱᓕᑦᑕᖅᑎᓪᓗᒋᑦ ᓇᒧᙵᐅᓂᕆᕙᒃᑕᑎᑦ ᐱᓕᕆᔭᖅᑐᖅᖢᑎᑦ.
  • ᓂᐅᕕᖅᐸᒡᓗᑎᑦ ᐱᖁᑎᓂᒃ ᐃᒡᓗᒥᐅᑕᐅᖃᑎᒌᓯ ᐊᑐᕆᐊᖃᖅᑕᑐᐃᓐᓇᖏᓐᓂᒃ.
  • ᐊᒻᒪᓗ, ᓲᖃᐃᒻᒪ, ᐊᒡᒐᑎᑦ ᐅᐊᓴᖅᐸᒡᓗᒋᑦ.

ᑲᑎᓯᒪᔪᓂᒃ ᐊᑐᖅᑕᐅᔪᓐᓇᖅᑐᓂᒃ ᐱᖃᑕᙱᓚᖅ, ᓇᓗᙱᑦᑎᐊᕐᓗᓂ ᐱᑕᖃᖅᑎᑦᑎᙱᑦᑐᓐᓇᖅᑐᓂᒃ ᓄᕙᒡᔪᐊᕐᓇᖅ-19−ᒥᒃ. ᖁᕕᐊᓲᑎᖃᓪᓚᕆᒃᑲᓗᐊᖅᑎᓪᓗᑕ ᒥᑦᑎᒪᑕᓕᖕᒥᐅᓂᒃ, ᑕᒪᕐᒥᑦᑎᐊᖅ ᓄᓇᕗᒻᒥᐅᑦ ᓇᐅᑦᑎᖅᓱᐃᓐᓇᕆᐊᓖᑦ ᐅᔾᔨᖅᓱᖅᐸᒡᓗᑎᒡᓗ.   ᒪᓕᒃᐸᒡᓗᒋᑦ ᒪᓕᖁᔭᐅᔪᑦ, ᑎᓕᐅᕐᓗᒋᓪᓗ ᐱᖃᓐᓇᕆᔭᑎᑦ, ᐃᓚᑎᑦ, ᖃᓂᒋᔭᑎᓪᓗ ᐃᒡᓗᔅᓯᓐᓂ ᑕᐃᒪᐃᓕᐅᖏᓐᓇᖃᑦᑕᖁᓗᒋᑦ.

ᓄᓇᕗᒻᒥᐅᓕᒫᑦ ᖁᔭᓕᔪᒪᕙᒃᑲ ᑲᔪᓰᓐᓇᖅᑐᒥᒃ ᐅᑕᖅᑭᑦᑎᐊᖃᑦᑕᕈᓐᓇᕐᒪᑕ, ᑐᑭᓯᐅᒪᔪᓐᓇᕐᒪᑕ, ᐱᓕᕆᖃᑕᐅᑦᑎᐊᖃᑦᑕᕈᓐᓇᕐᒪᑕᓗ. ᐊᑕᐅᑦᑎᒃᑯᑦ ᑭᓯᐊᓂ ᑕᒪᓐᓇ ᐊᓂᒍᖅᑎᑦᑐᓐᓇᖅᑕᕗᑦ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᓄᒃᑕᕐᓂᖅ ᐊᕕᒃᓯᒪᓂᐅᒃ ᐅᑭᐅᖅᑕᖅᑐᒥ ᓯᓚᑖᓄᑦ ᒪᐃ 7, 2020−ᖑᓂᖓᓂᑦ:

ᓄᓇᕗᑦ ᒐᕙᒪᖓᑕ ᐋᖅᑭᓚᐅᖅᑕᖓ ᐊᑭᓖᑎᑦᑎᖃᑦᑕᕈᒪᓪᓗᑎᒃ $2,100−ᓂᒃ ᐃᓄᖕᒧᑦ ᐊᑕᐅᓯᕐᒧᑦ $1,050−ᓂᒡᓗ ᐃᓚᒋᔭᐅᒃᑲᓐᓂᖅᑐᓄᑦ ᑕᒪᓐᓇ ᐊᑐᕆᐊᖃᓪᓚᕆᒋᐊᖃᖅᑐᖅ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᓂᕐᒧᑦ ᐅᓪᓗᕆᔭᐅᔪᓄᑦ ᓄᓇᓕᖕᓄᑦ ᐅᑎᕐᓂᐊᓕᖅᑐᓄᑦ ᐅᑭᐅᖅᑕᖅᑐᒧᑦ ᐊᕕᒃᓯᒪᓂᕐᒧᑦ ᐊᑐᕈᓐᓃᖅᑎᑕᐅᕗᖅ.

ᓄᓇᕗᑦ ᒐᕙᒪᒃᑯᖏᑦ ᐊᑭᓖᖏᓐᓇᖃᑦᑕᕐᓂᐊᖅᑐᑦ ᑕᒪᒃᑯᓂᖓ ᐊᑭᓕᖅᓱᒐᒃᓴᓂᒃ, ᑕᒪᓐᓇ ᐊᑐᓪᓚᕆᒋᐊᓕᒃ ᐅᐸᒃᑕᐅᑦᑕᐃᓕᒪᓂᖅ ᓄᓇᖃᖅᑐᓄᑦ ᐅᑎᖅᑐᓄᑦ ᓱᓕ ᐊᑐᕆᐊᖃᑐᐊᖅᐸᑦ. 

ᐳᐃᒍᖅᑐᖃᖅᑕᐃᓕᓕ ᓄᒃᑕᕐᓂᖅ ᓄᓇᕗᑦ ᓯᓚᑖᓄᑦ ᓄᕙᒡᔪᐊᕐᓇᖅ-19−ᑕᖃᖅᑎᓪᓗᒍ ᐊᑐᖁᔭᐅᙱᓚᖅ.

 

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᒃᓴᖅ, ᓇᖕᒥᓂᕐᓗ ᖃᐅᔨᓴᕐᓂᕐᒧᑦ ᐊᑐᖅᑕᐅᔪᓐᓇᖅᑐᖅ

ᑭᓇᑐᐃᓐᓇᑦᑎᐊᖅ ᐃᓱᒪᒋᔭᖃᖅᑐᖅ ᐊᐴᑎᓯᒪᓯᒪᓂᕐᒥᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ ᐅᖃᐅᔾᔭᐅᕗᑦ ᐅᖄᓚᖁᔭᐅᓪᓗᑎᒃ ᓄᕙᒡᔪᐊᕐᓇᕐᒧᑦ−ᐅᖄᕝᕕᐅᔪᓐᓇᖅᑐᒥᒃ ᐅᕗᖓ, 1-888-975-8601−ᒧᑦ  10−ᓗ ᐅᓪᓛᒥᑦ  6−ᓗ ᐅᓐᓄᒃᓴᒧᑦ ᐊᑯᓐᓂᖏᓐᓂ, ᖃᐅᔨᑎᓪᓗᒋᓪᓗ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᖕᒥᓂᒃ ᖃᐅᔨᑎᑲᐅᑎᒋᓗᒋᓪᓗ,  ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᓂᓗ ᐊᖏᕐᕋᖅᓯᒪᓗᓂᓗ 14−ᓄᑦ ᐅᓪᓗᓄᑦ.

ᑭᓇᑐᐃᓐᓇᑦᑎᐊᖅ ᐊᑐᕈᓐᓇᖅᑐᖅ ᖃᕆᑕᐅᔭᒃᑰᕈᓐᓇᐅᑎᒥᒃ ᐱᓕᕆᐊᖃᕈᓐᓇᕆᕗᖅᑕᐅᖅ ᓇᖕᒥᓂᖅ ᐃᑭᐊᖅᑭᕕᒃᑯᑦ ᓇᖕᒥᓂᖅ−ᖃᐅᔨᓴᕈᓐᓇᕐᓂᕐᒥᒃ ᐅᕙᓂ, nu.thrive.health

ᐅᓄᕐᓂᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐊᓂᑦᑕᐃᓕᔭᕆᐊᖃᖅᑐᓄᑦ ᐃᓂᖏᑦ)

ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ

ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᒪᐃ 5-ᒥᑦ ᐱᒋᐊᖅᖢᓂ

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᓯᒪᔪᓄᑦ

177

ᑭᒃᑯᑐᐃᓐᓇᑦ

137

ᑲᑎᖦᖢᒋᑦ

314

 

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐊᐅᓪᓚᕐᕕᒃᓴᖓᑕ ᐅᓪᓗᐊ

ᖃᔅᓯᐅᓂᖏᑦ ᓄᑕᕐᓂᐊᖅᑐᑦ ᐅᐸᒃᑕᐅᑦᑕᐃᓕᒪᔪᓂᖔᕐᓗᑎᒃ

ᒪᐃ 5

22

ᒪᐃ 6

15

ᒪᐃ 7

24

ᒪᐃ 8

12

ᒪᐃ 9

21

ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ

ᐱᒋᐊᕐᖢᓂ ᒪᐃ 5−ᒥ, 872−ᓂᒃ ᑐᒃᓯᕋᖅᓯᒪᔪᖃᖅᐳᖅ, 667−ᖑᓂᖏᑦ ᐱᔭᕆᐊᖃᒻᒪᕆᒃᑐᓂᒃ ᐃᖅᑲᓇᐃᔭᖅᑎᒃ ᑐᒃᓯᕋᕈᑕᐅᓪᓗᑎᒃ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ

Nbre

%

ᐊᖏᖅᑕᐅᓯᒪᔪᑦ (ᐃᓚᖃᖅᐳᖅ ᐱᒻᒪᕆᐊᓗᖕᓂᑦ ᐱᒻᒪᕆᐅᓗᐊᙱᑦᑐᓂᒡᓗ)

727

83,4 %

ᐊᖏᕐᑕᐅᙱᑦᑐᑦ

107

12,3 %

ᐅᑕᖅᑭᔪᑦ

38

4,4 %

ᑲᑎᖦᖢᒋᑦ

872

100 %

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᓄᓇᕗᑦ ᒐᕙᒪᖓ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᖃᐅᖅᐳᖅ ᐱᔨᑦᑎᕋᖁᑎᖃᐅᖅᐳᕐᓗ ᒪᓂᒪᓪᓗᑎᒡᓗ ᐃᑲᔪᖅᑐᐃᔾᔪᑕᐅᔪᒪᓪᓗᑎᒃ ᐱᓂᕐᓗᒡᕕᐅᓯᒪᔪᓂᒃ ᐋᓐᓂᖅᓯᖅᑕᐅᖃᑦᑕᖅᓯᒪᔪᓂᓪᓗ. ᐃᖅᑲᐃᑎᑦᑐᒪᕙᕗᑦ ᓄᓇᕗᒻᒥᐅᑦ ᓱᓕ ᑕᒫᓃᑉᐳᒍᑦ, ᐃᑲᔪᕈᓐᓇᖅᖢᑕᓗ ᑕᒪᑐᒪᓂ ᒫᓐᓇ ᐊᔪᕐᓇᓯᑐᖅᓯᐅᓇᖅᑐᒻᒪᕆᐊᓗᖕᒦᓐᓂᑦᑎᓐᓂ. ᖃᐅᔨᒪᕗᒍᑦ ᐃᓅᓯᖅ ᐊᔪᕐᓇᖅᑐᒻᒪᕆᐊᓘᓂᖓᓂᒃ ᐊᒥᓱᓄᑦ ᐃᓚᒌᓄᑦ ᐃᓄᑐᐃᓐᓇᓄᓪᓗ, ᑕᒪᓐᓇᓗ ᐊᒃᓱᕈᕐᓇᖅᓱᖅᑎᐅᖅᑎᑦᑎᒃᑲᓐᓂᕈᓐᓇᖅᖢᓂ ᐊᖏᕐᕋᕆᔭᐅᔪᓂ. ᐃᓱᒪᑦᑕᐃᓕᒋᑦ ᐃᒃᓯᓐᓇᑰᓇᓱᒋᓗᑎᑦ ᐃᓄᑑᓇᓱᒋᓗᑎᓪᓘᓐᓃᑦ, ᑕᒫᓃᑉᐳᒍᑦ ᐃᑲᔪᕈᒪᓪᓗᑕ.

ᐃᓄᐃᑦ ᐊᐱᕆᔭᐅᕗᑦ ᖃᐅᔨᒋᐊᕐᕕᖃᖁᔭᐅᓪᓗᑎᒃ ᐃᓚᒌᓂ ᐋᓐᓂᖅᓯᔪᖃᖅᐸᖕᓂᖓᓄᑦ ᐱᓕᕆᕝᕕᖃᖔᓕᕐᓂᕐᒧᑦ ᐱᖁᔭᕐᒧᑦ (FAIA) ᐅᖄᓚᕝᕕᐅᔪᓐᓇᖅᑐᒧᑦ ᐊᐱᖅᑯᑎᒃᓴᖃᕐᓂᕈᑎᒃ ᐃᑲᔪᖅᑕᐅᔭᕆᐊᖃᕈᑎᒡᓘᓐᓃᑦᐆᒥᖓ ᓈᓴᐅᒻᒥᒃ ᐊᑐᕐᓗᑎᒃ, 1-844-534-1038. ᑕᒪᓐᓇ ᐅᖄᓚᓂᖅ ᖃᐅᔨᓴᖅᑕᐅᓂᐊᖅᐳᖅ ᖃᐅᔨᒪᓕᕈᒪᓂᕐᒧᑦ ᐃᑲᔪᖅᑕᐅᔭᕆᐊᖃᕐᓂᕐᒧᑦ ᐱᔭᐅᔭᕆᐊᓕᖕᒧᑦ ᑐᕌᖅᑎᑕᐅᓗᓂ ᓄᓇᓕᖕᓂ ᐱᑐᐃᓐᓇᐅᙱᑦᑐᓕᕆᓂᕐᒧᑦ ᑖᓐᓇᓗ ᐃᑲᔪᕈᓐᓇᖅᖢᓂ ᐱᓇᔫᑎᒋᔭᐅᔪᓄᑦ ᐊᑐᖅᑕᐅᔪᓐᓇᖅᑐᓂᒡᓗ ᓇᓗᓇᐃᖅᓯᔪᓐᓇᖅᖢᓂ. 

ᐱᓂᕐᓗᒡᕕᐅᓯᒪᔪᑦ ᐱᔨᑦᑎᕋᕐᕕᐅᕙᖕᓂᖏᓐᓄᑦ ᑎᑎᕋᕐᕕᒃ ᒫᓐᓇ ᑭᒃᑯᑐᐃᓐᓇᓄᑦ ᒪᑐᓯᒪᑲᓚᐅᖅᐳᖅ. ᑭᓯᐊᓂᓗᑦᑕᐅᖅ, ᓄᓇᕗᒻᒥᐊᑦ ᑎᑎᕋᕐᕕᖕᒧᑦ ᐅᖄᓚᔭᕆᐊᓖᑦ ᐅᖄᓚᔪᓐᓇᖅᐳᑦ ᐅᕗᖓ ᐊᑭᓕᕆᐊᖃᙱᑦᑐᒧᑦ, 1-866-456-5216-ᒧᑦ ᐅᕗᖓᓘᓐᓃᑦ ᖃᕆᑕᐅᔭᒃᑯᑦ ᑎᑎᕋᕐᓗᑎᒃ,victimservices@gov.nu.ca. ᐱᔨᑦᑎᕋᕐᓂᕆᔭᐅᔪᑦ ᐱᑎᑕᐅᖃᑦᑕᕐᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ.

 

ᐃᓄᓕᕆᔨᒃᑯᑦ

ᐋᓐᓂᖅᓯᕆᓂᕐᒦᒃᑯᕕᑦ ᖃᐅᔨᒪᔭᖃᕈᕕᓪᓘᓐᓃᑦ ᐋᓐᓂᖅᓯᕆᓂᕐᒦᑦᑐᒥᒃ ᐱᔨᑦᑎᕈᑎᓂᒃ ᐃᑲᔪᖅᑐᖅᑕᐅᓂᕐᒧᓪᓗ, ᐃᑲᔪᖅᑕᐅᔪᓐᓇᖅᐳᑎᑦ.

ᐅᖃᖃᑎᖃᕈᓐᓇᖏᒃᑯᕕᑦ ᓄᓇᓕᖕᓂ ᐃᓄᓕᕆᔨᒧᑦ, ᐃᓄᓕᕆᔨᒃᑯᓐᓄᑦ ᐅᖄᓚᒋᑦ ᐅᕗᖓ 1-855-522-5201 ᐃᑲᔪᖅᑕᐅᔪᒪᔾᔪᑎᓐᓄᑦ. ᑐᑭᓯᒋᐊᕈᑎᒃᑲᓐᓂᕐᓂᑦ ᑕᑯᔪᓐᓇᖅᐳᑎᑦᖁᓪᓖᒃᑯᑦ ᓄᓇᕗᒻᒥ ᐊᕐᓇᐃᑦ ᑲᑎᒪᔨᖏᒃᑯᑦ ᕙᐃᔅᐳᖓᓂ.

ᐃᑲᔪᖅᑐᖅᑕᐅᔭᕆᐊᖃᕈᕕᑦ, ᓇᓖᕌᒐᒃᓴᖃᖅᐳᑎᑦ. ᐃᑲᔪᖅᑕᐅᓇᓱᒋᑦ ᐅᖄᓚᕝᕕᒋᓗᒋᓪᓗ ᓇᓕᐊᑐᐃᓐᓇᖅ ᐅᑯᓄᖓ: 

ᓄᓇᕗᒻᒥ ᐱᕋᔭᒃᑕᐅᔪᕕᓂᕐᓄᑦ ᐱᔨᑦᑎᕋᐅᑏᑦ

1 866 456-5216

ᐃᓚᒌᓄᑦ ᐱᓂᕐᓗᖃᑦᑕᐅᑎᑦᑕᐃᓕᒪᓂᕐᒧᑦ ᐱᖁᔭᖅ, ᐅᖄᓚᐅᑖ

1 844 534-1038

ᓄᓇᕗᒻᒥ ᑲᒪᑦᑎᐊᖅᑐᑦ ᐅᖄᓚᐅᑎᖓ 

1 800 265-3333
(24/7)

ᓄᑕᖅᑲᓄᑦ ᐃᑲᔪᖅᑕᐅᕕᖕᒧᑦ ᐅᖄᓚᐅᑦ 

1 800 668-6868

ᐃᓵᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᑦ 

1 866 804-2782

ᐃᒥᐊᓗᒻᒧᑦ ᓄᖅᑲᕋᓱᐊᕐᓂᖅ 

1 888 616-4011

ᐱᖁᔭᓕᕆᓂᕐᒧᑦ ᑲᑐᔾᔨᖃᑎᒌᑦ ᓄᓇᕗᒻᒥ
−ᒪᓕᒐᕐᓄᑦ ᑐᑭᓯᒋᐊᕐᕕᒃ/ᒪᓕᒐᓕᕆᔨᒧᑦ ᐊᑐᖁᔨᔾᔪᑏᑦ:

1 888 990-4665

ᑐᑭᓯᒋᐊᕐᕕᒃ − ᖃᓄᐃᖏᑦᑎᐊᕐᓂᕐᒧᑦ (ᐃᖃᓗᐃᑦ):

1 867 979-2400

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐸᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.