ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᒫᔾᔨ 31, 2020

ᒫᑦᓯ 31, 2020

ᓯᕗᓕᖅᑎᒥ ᑐᓴᒐᒃᓴᖅ:

ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.

ᑕᐃᒪᐃᖁᔭᐅᓯᒪᓂᕐᒥᓄᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐅᑕᒥᑦ, ᐃᓕᓐᓂᐊᕐᕖᑦ ᐸᐃᕐᕆᕝᕖᓪᓗ ᒪᑐᓯᒪᓂᖏᑦ ᐅᖓᕙᕆᐊᖅᑕᐅᕗᑦ ᐄᐳᕈ 20 ᐅᓪᓗᐊ ᐃᓱᓕᓐᓇᓱᖕᓂᖓᓂ. ᑕᐃᑲᙵᓂᑦ, ᓘᒃᑖᖅ ᐹᑐᓴᓐ ᖃᐅᔨᒋᐊᒃᑲᓐᓂᓛᖅᐳᖅ ᐱᑎᑦᑎᓕᕐᓗᓂᓗ ᖃᓄᐃᓕᐅᖅᑕᐅᒃᑲᓐᓂᕆᐊᓕᖕᓂᒃ.

ᐃᓕᓐᓂᐊᕐᓂᓕᕆᔨᒃᑯᑦ ᐅᓪᓗᒥ ᓴᖅᑭᑎᑦᑎᓂᐊᖅᑐᑦ ᐆᒥᖓ, ᐊᖏᕐᕋᕆᔭᐅᔪᒥ ᐃᓕᑦᑎᕙᓪᓕᐊᓂᕐᒧᑦ ᐃᑭᐊᖅᑭᕕᒋᔭᐅᔪᒥᒃ ᐆᒥᖓ – www.angirrami.com – ᐱᑎᑦᑎᔪᒪᓪᓗᑎᒃ ᐊᑭᖃᙱᑦᑐᒥᒃ ᐊᑐᖅᑕᐅ\ᔪᓐᓇᖅᑐᓂᒃ ᐃᓄᒃᑐᑦ ᐃᓕᓐᓂᐊᕐᓂᕐᓂᒧᑦ ᐊᑐᖅᑕᐅᖃᑦᑕᕐᓂᐊᖅᑐᓂᒃ ᐃᓚᒌᓄᑦ ᑲᒪᔨᒋᔭᐅ\ᕙᒃᑐᓄᓪᓗ ᑕᒪᒃᑯᓂᖓ ᐊᑐᖅᑕᐅᕙᒃᑐᓂᒃ ᒪᑐᓯᒪᔪᖃᕐᓂᖓᓂ.

ᐃᓄᖕᓂᑦ ᐊᕆᐱᕆᔭᐅᖏᓐᓇᖃᑦᑕᖅᐳᖓ ᑕᒪᓐᓇ ᓄᓇᕗᑦ ᑭᖑᓪᓕᖅᐹᖑᓂᖓᓂᒃ ᐃᓂᒋᔭᐅᓪᓗᓂ ᑕᒫᓂ ᐃᓂᒋᔭᐅᔪᒥ ᑲᓇᑕᒥ ᓇᓗᓇᐃᖅᓯᒪᓪᓚᕆᒃᑐᓂᒃ ᓄᕙᒡᔪᐊᕐᓇᖅ-19−ᒥᒃ ᐱᑕᖃᓕᕐᓂᖓᓂᒃ. ᓇᓗᕈᔪᒃᐸᒃᐳᖓ ᖃᓄᖅ ᑖᔅᓱᒥᖓ ᑭᐅᓯᔭᕆᐊᒃᓴᖅ. ᖁᔭᓕᓯᒪᑦᑎᐊᖅᐳᖓ, ᑭᓯᐊᓂ ᐊᑐᕈᒪᓂᖅᐹᕋ, ᑕᒪᑦᑕᑦᑎᐊᖅ ᐅᔾᔨᖅᓱᑦᑎᐊᖅᑕ ᓇᐅᑦᑎᖅᓱᑦᑎᐊᖅᐸᒡᓗᑕᓗ.

ᑕᒪᓐᓇ ᐃᒪᓐᓇ ᑐᑭᖃᙱᓚᖅ, ᐅᔾᔨᖅᓱᕈᓐᓃᕐᓗᑕ ᓴᓚᐅᓱᙱᓪᓗᑕᓗ ᐃᓅᖃᑎᖃᖅᐸᖕᓂᕐᒥᒃ ᑎᒥᒃᑯᓪᓗ ᐅᖓᓯᒃᓴᕆᐊᖃᖅᐸᖕᓂᕐᒥᒃ, ᐊᒡᒐᓂᒃ ᐅᐊᓴᖅᐸᖕᓂᕐᒥᒃ ᐊᖏᕐᕋᖅᓯᒪᓂᕐᒥᒡᓗ. ᐅᔾᔨᖅᓱᐃᓐᓇᕆᐊᖃᖅᐳᒍᑦ ᑕᐅᑐᒐᖃᑦᑎᐊᕐᓗᑕᓗ.

ᖃᐅᔨᒪᕗᖓ ᐊᒥᓱᑎᒍᑦ ᐃᒃᐱᒋᔭᖃᕐᓂᑦᑎᓐᓂᒃ ᐊ\ᔪᖅᓯᐅᖃᓕᕐᓂᑦᑎᓐᓂᒃ ᐊᖏᕐᕋᑦᑎᓐᓂ, ᑭᓯᐊᓂᑦᑕᐅᖅ ᑕᒪᑐᒪᙵᑦ ᐊᖏᓂᖅᓴᒻᒪᕆᐅᕗᖅ. ᐃᒪᓐᓇᖔᖑᒋᐊᓚᐅᖅᑕ, ᐃᓱᒪᒥᐅᑕᕆᔭᕗᑦ ᐊᓯᔾᔨᕆᐊᕐᓗᒍ ᐃᒃᐱᒋᔭᖃᖔᓕᕐᓗᑕ ᐃᒪᓐᓇ, ᖁᐊᖅᓵᕐᓇᖅᑐᒦᙱᓐᓂᑦᑎᓐᓂ ᐊᖏᕐᕋᕆᔭᑦᑎᓐᓂ.

ᑕᐃᒃᑯᓄᖓ ᓱᓕ ᑲᑎᑉᐸᒃᑐᓄᒃ ᐃᓅᖃᑎᒌᓕᖅᐸᒃᖢᑎᒃ ᐃᓕᖅᑯᓯᖃᓕᖅᐸᒃᖢᑎᒡᓗ ᑕᒪᒃᑯᐊ ᐊᑐᕆᐊᓖᑦ ᐊᑐᙱᓐᓂᖏᓐᓄᑦ ᑖᒃᑯᓄᖓ − ᓄᖅᑲᓕᕆᔅᓯ. ᓄᖅᑲᑐᐃᓐᓇᕐᓗᓯ. ᐊᑐᕆᐊᖃᙱᑦᑐᒥᒃ ᐊᑐᕋᔅᓯ, ᐃᓚᓯ, ᐱᖃᓐᓇᕆᔭᓯ, ᐃᓐᓇᐃᑦ ᓄᓇᓕᖕᒥᐅᓪᓗ ᖁᐊᖅᓵᕐᓇᖅᑐᒦᑎᓐᓇᔅᓯᐅᒃ. ᑕᐃᒪᐃᑦᑐᒃᑰᖅᑐᖃᕆᐊᖃᙱᑦᑐᖅ.

ᐊᖏᕐᕋᖅᓯᒪᓂᖅ ᐃᓄᖕᓂᒃ ᐃᓅᑎᑦᑎᓂᐊᖅᐳᖅ. ᐊᑏ ᐱᓕᕆᖃᑕᐅᒋᑦ ᓄᓇᓕᓯ ᓄᓇᕗᒻᒥᐅᓪᓗ ᖁᐊᖅᓵᕐᓇᖅᑐᒦᖁᓇᒋᑦ.

 

ᒥᓂᔅᑕᐅᑉ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᖏᑦ:

ᒪᑦᓯ 17−ᖑᓚᐅᕐᓂᖓᓂᑦ, ᓄᓇᕗᒻᒥ ᐃᓕᓐᓂᐊᕐᕖᑦ ᒪᑐᔭᐅᓯᒪᕗᑦ ᐃᑲᔪᕈᒪᓂᕐᒧᑦ ᓯᐅᒻᒪᒃᑎᕆᑦᑕᐃᓕᒪᔪᒪᓂᕐᒧᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ. ᑕᐃᒪᐃᓐᓂᖓᓄᑦ, ᐊᖓᔪᖅᑳᑦ ᑲᒪᔨᒋᔭᐅᕙᒃᑐᓪᓗ ᐊᐱᕆᖃᑦᑕᖅᓯᒪᕗᑦ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐃᑲᔪᕈᒪᓪᓗᒋᑦ ᓄᑕᖅᑲᑎᒃ ᐃᓕᓐᓂᐊᒋᖏᓐᓇᕐᓂᕐᒧᑦ.

ᐅᓪᓗᒥ ᓇᓗᓇᐃᖅᓯᕗᖓ ᐅᖃᐅᓯᖃᖅᖢᖓ ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓱᐃᓯᒪᓂᖏᓐᓂᒃ ᐃᓕᓐᓂᐊᕙᓪᓕᐊᓂᕐᒧᑦ ᐊᖏᕐᕋᕆᔭᐅᔪᒥ ᐃᑭᐊᖅᑭᕕᖕᒥᒃ ᐆᒥᖓ, ᐊᖏᕐᕋᒥ ᐃᓕᓐᓂᐊᕐᓂᖅ, (angirrami.com). ᑖᓐᓇ ᐃᑭᐊᖅᑭᕕᒋᔭᐅᔪᖅ ᒪᓂᒪᑎᑦᑎᕗᖅ ᐊᑭᖃᙱᑦᑐᒥᒃ ᐊᑐᖅᓯᔪᓐᓇᕐᓂᕐᒥᒃ ᐃᓚᖏᓐᓄᑦ ᑖᒃᑯᐊᑦᑕᐃᓐᓇᕐᓗᑦ ᐊᑐᖅᑕᐅᕙᒃᑐᓄᑦ ᐃᓕᓐᓂᐊᕐᕕᑦᑎᓐᓂ.

ᑖᒃᑯᐊ ᐃᓚᖃᖅᐳᑦ ᖃᕆᑕᐅᔭᒃᑯᑦ ᐱᔭᒃᓴᐅᔪᓂᒃ ᐅᖃᓕᒫᒐᕐᓂᒃ ᖃᕆᑕᐅᔭᒃᑰᖓᔪᓂᒃ ᐅᖃᓕᒫᒐᕐᓂᒃ ᐃᓕᓐᓂᕆᐅᖅᓴᓕᓵᖅᑐᓄᑦ ᐊᕐᕌᒍᓕᖕᓄᑦ ᖁᑦᑎᒃᓯᕙᓪᓕᐊᖓᓪᓗᑎᒃ; ᐃᓕᓐᓂᐊᖅᑎᑦᑎᔾᔪᑕᐅᒃᑐᑦ ᑐᓵᓪᓗᒋᑦ ᐅᖃᔨᒫᒐᐃᑦ ᐊᐅᓚᔪᙳᖅᑎᑕᐅᓯᒪᔪᓪᓗ ᑕᕐᕆᔭᒐᒃᓴᓄᑦ; ᐊᑐᖅᑕᐅᔪᓐᓇᖅᑐᓄᑦ ᐱᓕᕆᐊᒃᓴᓄᓪᓗ ᐃᓕᓐᓂᐊᖅᐸᓪᓕᐊᓗᓂ; ᐊᒻᒪᓗ ᐊᑐᖅᑕᐅᔪᓐᓇᖅᑐᓂᒃ ᐊᐅᓚᑦᑎᕝᕕᖃᕐᓂᐊᕐᓗᓂ ᐊᒃᓱᕈᓐᓇᖅᓯᔪᓂᒃ ᐃᓱᒪᒃᑯᓪᓗ ᖃᓄᙱᑦᑎᐊᕈᓐᓇᕐᓂᕐᓂᒃ.

ᐊᒻᒪᑦᑕᐅᖅ ᐊᑕᓕᕐᕕᐅᔪᓐᓇᖅᑐᓂᒃ ᖃᕆᑕᐅᔭᒃᑯᑦ ᐱᕝᕕᐅᔪᓐᓇᖅᑐᓂᒃ ᐱᔨᕆᕝᕕᒋᔭᐅᔫᑉ ᐃᓄᒃᑐᑦ ᐅᖃᐅᓯᕐᒧᑦ ᐃᓕᓐᓂᐊᖅᑎᑦᓂᕐᒧᑦ ᐱᔭᐅᔪᓐᓇᖅᑐᓂᒃ ᖃᕆᑕᐅᔭᒃᑯᑦ:

  • ᐅᖃᐅᓰᑦ ᐱᙳᐊᕈᓰᑦ ᖁᕕᐊᓇᖅᑐᓂᒃ ᐱᓕᕆᐊᒃᓴᖁᑎᖃᖅᐳᑦ ᐃᑲᔪᖅᑐᐃᔪᓂᒃ ᐃᓄᐃᑦ ᐅᖃᐅᓯᖓ ᖃᓄᐃᓕᖓᓂᖓᓂᒃ ᖃᓄᕐᓗ ᓂᐱᖏᓐᓂᒃ ᐃᓕᓴᖅᓯᔪᓐᓇᕐᓂᕐᓂᒧᑦ, ᐅᖃᐅᓯᕐᓄᓪᓗ ᐱᕙᓪᓕᐊᓂᕆᔭᐅᔪᒥᒃ.
  • ᑎᑎᕋᕆᐅᖅᓴᐅᑎ ᓴᖅᑭᑎᑦᑎᕗᖅ ᐃᓄᐃᑦ ᐅᖃᐅᓯᖓᓄᑦ ᓇᓗᓇᐃᒃᑯᑕᕐᓄᑦ ᓂᐱᖏᓐᓄᑦ ᑎᑎᕋᖅᓯᕙᓪᓕᐊᓂᕐᒧᓪᓗ ᖃᓄᐃᓕᐅᖅᑕᐅᕙᓪᓕᐊᕙᒃᑐᓄᑦ.
  • ᕿᒥᕐᕈᓇᐅᑦ ᐱᓕᕆᕝᕕᒋᔭᐅᔫᑉ ᓄᑖᖑᓪᓗᓂ ᐃᓄᒃᑎᑐᑦ ᖃᕆᑕᐅᔭᒃᑯᑦ ᐅᖃᓕᒫᒐᕐᓄᑦ ᕿᒥᕐᕈᐊᒐᖃᕐᕕᖕᒥ ᐊᑐᖅᑕᐅᔪᓐᓇᖅᐸᒃᖢᓂ.

ᑕᒪᒃᑯᐊ ᖃᕆᑕᐅᔭᒃᑯᑦ ᐱᔭᐅᔪᓐᓇᖅᑐᑦ ᒪᓂᒪᕗᑦ Android−ᓄᑦ ᐊᒻᒪᓗ iOS−ᓄᑦ ᐊᑐᖅᑕᐅᕙᒃᑐᓄᑦ ᖃᕆᑕᐅᔭᒃᑯᓪᓗ ᐱᔭᐅᔪᓐᓇᖅᖢᑎᒃ ᐅᑯᓇᙵᑦ, Google Play ᐅᕙᓘᓐᓃᑦ Apple App ᓂᐅᕕᕐᕕᖕᓂᑦ.

ᐊᖏᕐᕋᒥ ᐃᓕᓐᓂᐊᕐᓂᖅ ᐱᑎᑦᑎᕙᒃᐳᖅ ᐊᑕᓕᕐᕕᐅᔪᓐᓇᖅᑐᓂᒃ ᐊᓯᖏᓐᓄ ᖃᕆᑕᐅᔭᒃᑯᑦ ᐃᑭᐊᖅᑭᕕᒃᑯᑦ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐃᓕᓐᓂᐊᖅᑎᑦᑎᔾᔪᑕᐅᕙᒃᑐᓄᑦ ᓲᕐᓗ, ᖃᐅᔨᓴᖅᑐᓕᕆᓂᖅ, ᓈᓴᐅᓯᕆᓂᖅ, ᖃᓄᐃᓕᐅᖅᑕᐅᕙᓚᐅᖅᑐᓕᕆᓂᖅ, ᐃᓄᓕᕆᓂᕐᒥᒡᓗ. 

ᐅᔾᔨᕈᓱᖁᒡᒋᕗᖓᑦᑕᐅᖅ ᑖᓐᓇ ᐃᑭᐊᖅᑭᕕᐅᔪᓐᓇᖅᑐᖅ ᖃᕆᑕᐅᔭᒃᑯᑦ ᐅᓪᓗᒥ ᐱᒋᐊᖅᑎᑕᐅᒐᓗᐊᖅᑎᓪᓗᒍ, ᓄᑖᓂᒃ ᐊᑐᖅᑕᐅᔪᓐᓇᖅᑐᓂᒃ ᖃᖓᙳᕌᖓᑦ ᐃᓕᓯᕝᕕᐅᖃᑦᑕᕐᓂᐊᖅᐳᖅ. ᓯᕗᓪᓕᖅᐸᐅᔾᔭᐅᓯᒪᔪᖅ ᑕᒪᒃᑯᐊ ᐃᓄᒃᑎᑑᖓᔪᑦ ᐃᓄᐃᓐᓇᖅᑑᖓᔪᓪᓗ ᐊᑐᖅᑕᐅᔪᓐᓇᖅᑐᑦ ᐃᑭᐊᖅᑭᕕᖕᒧᐊᖅᑎᕈᒪᓪᓗᑎᒍ ᓱᒃᑲᓕᔪᓐᓇᕐᓂᓕᒫᕗᑦ ᒪᓕᒡᓗᒍ. ᖃᓪᓗᓈᑑᖓᔪᑦ ᐅᐃᕖᑎᑑᖓᔪᓪᓗ ᐊᑐᖅᑕᐅᔪᓐᓇᖅᑐᑦ ᖃᖓᑦᑎᐊᒃᑯᑦ ᐃᓕᐅᖅᑲᖅᑕᐅᔨᓛᕐᒥᔪᑦ.

ᑕᒪᕐᒥᑦᑎᐊᖅ ᐊᑐᖅᑕᐅᔪᓐᓇᖅᑐᑦ ᓇᓂᔭᐅᔪᑦ ᑕᕝᕙᓂ ᐃᓂᒥ ᓴᖅᑭᑎᑕᐅᓚᐅᖅᐳᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐱᓕᕆᖃᑎᒋᕙᒃᑕᖏᓐᓂᓪᓗ, ᐃᓚᒋᔭᐅᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᒡᒐᖅᑐᐃᔨᓗ ᓄᑕᖅᖃᕝᑲᓄᑦ ᒪᒃᑯᒃᑐᓄᓪᓗ ᑎᑎᕋᕐᕕᖓ, ᐊᒻᒪᓗᑦᑕᐅᖅ ᐃᓗᓕᕆᔨᒃᑯᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐊᕙᑎᓕᕆᔨᒃᑯᑦ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ.

ᖁᔭᓕᔪᒪᕙᒃᑲ ᑕᒪᕐᒥᑦᑎᐊᖅ ᐃᓕᓐᓂᐊᖅᑏᑦ, ᐊᖓᔪᖅᑳᑦ, ᑲᒪᒡᒋᔭᐅᕙᒃᑐᓪᓗ ᐅᑕᖅᑭᔪᓐᓇᑦᑎᐊᕐᓂᖏᓐᓄᑦ. ᖃᐅᔨᒪᕗᖓ ᐃᓕᔅᓯᓐᓄᑦ ᐊᒥᓱᓄᑦ ᐊᔪᕐᓇᙱᑦᑐᑯᓗᖃᑦᑕᖅᓯᒪᙱᓚᖅ ᑕᒪᒃᑯᐊ ᐃᓕᓐᓂᐊᕐᕖᑦ ᐸᐃᕆᕝᕖᓪᓗ ᒪᑐᓯᒪᓂᖏᓐᓄᑦ. ᑭᓯᐊᓂᑦᑕᐅᖅ, ᑕᒪᑦᑎᑕᑦᑎᐊᖅ ᐱᓕᕆᐊᖃᕆᐊᖃᖅᐳᒍᑦ ᐱᓕᕆᔪᓐᓇᖅᑕᑦᑎᓐᓂᒃ ᓯᐊᒻᒪᒃᑎᕆᑦᑕᐃᓕᒪᔪᒪᓂᖅ ᓄᕙᒡᔪᐊᕐᓇᖅ-ᒥᒃ.

ᖃᐅᔨᒪᑦᑎᐊᖁᕙᔅᓯ ᐱᓕᕆᕝᕕᒋᔭᕋ ᐊᒃᓱᕈᖅᖢᓂ ᐱᓕᕆᖃᑦᑕᖅᓯᒪᓂᖓᓂᒃ ᑖᓐᓇ ᐃᑭᐊᖅᑭᕕᐅᕙᒃᑐᖅ ᐱᑐᐃᓐᓇᕆᐊᖃᓕᖅᑎᑦᑐᒪᓪᓗᒍ ᐊᔪᕐᓇᙱᓐᓂᓕᒫᖓ ᐊᑐᕐᓗᒍ ᖃᓂᓛᒃᑯᑦ.

ᑎᓕᐅᖅᐸᒃᑲ ᓄᓇᕗᒻᒥᐅᑦ ᕿᓂᖁᓪᓗᒋᑦ ᑕᒪᐃᓐᓂᑦᑎᐊᖅ ᐊᑐᖅᑕᐅᔪᓐᓇᖅᑐᓂᒃ ᑖᔅᓱᒪ ᐃᑭᐊᖅᑭᕕᐅᑉ ᒪᓂᒪᑎᖃᑦᑕᕐᓂᐊᖅᑕᖏᓐᓂᒃ. ᐃᓕᑦᑎᕙᓪᓕᐊᓂᖅ ᐃᓚᓕᐅᑎᓗᒍ ᖃᐅᑕᒫᑦ ᐊᑐᖅᐸᒃᑕᕐᓄᑦ!

ᖁᔭᓐᓇᒦᒃ, ᖁᐊᓇ, thank you, merci.

 

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᖃᓕᑐᐃᓐᓇᕆᐊᓕᖕᓄᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᒫᓐᓇ ᖃᔅᓯᐅᓂᕆᔭᖏᑦ ᓄᓇᕗᒻᒥᐅᑦ ᐅᐸᒃᑕᐅᑦᑕᐃᓕᒪᔪᒦᑦᑐᑦ ᐃᓂᓂ ᖃᓪᓗᓈᑦ ᓄᓇᖓᓐᓂ ᑲᓇᑕᒥ

315-ᓂᒃ ᐃᓄᖕᓂᒃ ᒫᓐᓇ ᐅᐸᒃᑕᐅᑦᑕᐃᓕᒪᔪᒦᑦᑐᖃᖅᐳᖅ ᐃᓂᓂ ᖃᓪᓗᓈᑦ ᓄᓇᓐᓂ ᑲᓇᑕᒥ. 178-ᖑᓪᓗᑎᒃ ᓄᓇᕗᒻᒥᐅᑦ ᐋᓐᓂᐊᕕᓕᐊᖅᖢᑎᒃ ᐊᐅᓪᓚᖅᓯᒪᓪᓗᑎᒃ, 78−ᖑᓪᓗᑎᒃ. ᓄᓇᕗᒻᒥᐅᖑᓪᓗᑎᒃ ᐅᑎᖅᑐᑦ ᐅᑭᐅᖅᑕᖅᑐᒧᒃ 59−ᖑᓪᓗᑎᒡᓗ ᓄᓇᕗᒻᒥᐅᑕᐅᓪᓗᑎᒃ ᐃᓕᓐᓂᐊᖅᑎᐅᓪᓗᑎᒃ.

ᐋᓐᓂᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᓂ ᐱᔨᑦᑎᕈᖏᑦ

  • ᖃᐅᔨᓴᖅᑕᐅᒍᕕᑦ ᓄᕙᒡᔪᐊᕐᓇᖅ-19−ᒧᑦ ᐊᑐᕐᓗᑎᓪᓗ ᖃᐅᔨᔾᔪᑕᐅᔪᓐᓇᖅᑐᓂᒃ, ᐊᑭᓕᒐᒃᓴᖅᑖᖅᑎᑕᐅᔪᓐᓇᖅᐳᑎᑦ ᐊᖏᕐᕋᕆᔭᐃᑦ ᕿᒪᖕᓂᕈᕕᐅᒃ. ᐊᐱᕆᓗᒋᑦ ᖃᓂᒃᖠᑎᑦ/ᐃᓚᑎᑦ/ᐱᖃᓐᓇᕆᔭᑎᑦ ᕿᒪᐃᖃᑦᑕᖁᓗᒋᑦ ᓂᕆᔭᒃᓴᕐᓂᑦ ᐹᕕᑦ ᓯᓚᑖᓂ.
  • ᐊᑐᖅᓯᔪᓐᓇᓯᑲᐅᑎᒋᓂᖅ ᑐᐊᕕᕐᓇᖅᑐᓄᑦ ᓴᖅᑭᑉᐸᓪᓕᐊᔪᓄᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᕙᖕᓂᕐᒧᑦ ᐱᔨᑦᑎᕋᕈᑕᐅᕙᒃᑐᑦ ᑲᔪᓰᓐᓇᖅᐳᑦ. ᑕᒪᕐᒥᑦᑎᐊᖅ ᑐᐊᕕᕐᓇᙱᑦᑐᑦ ᐱᔪᒪᔾᔪᑕᐅᔪᑦ ᐱᓕᕆᐊᖑᔭᕆᐊᖃᕐᓂᖏᑎᒍᑦ ᐋᖅᑭᒃᑕᐅᖃᑦᑕᕐᓂᐊᖅᐳᑦ ᖃᐅᑕᒫᑦ.
  • ᓄᓇᕗᒻᒥᐅᑦ ᐅᖄᓚᖅᑳᕆᐊᖃᖃᑦᑕᖅᐳᑦ ᕿᑭᖅᑕᓂ ᐋᓐᓂᐊᕕᒧᑦ, ᐃᖃᓗᖕᓂ ᐅᖁᒪᐃᓐᓂᓐᓂᐊᕐᕕᖕᒧᑦ ᓇᓕᐊᖕᓄᑐᐃᓐᓇᕐᓘᓐᓃᑦ ᓄᓇᕗᒻᒥ ᐋᓐᓂᐊᕕᖕᒧᑦ ᐅᐸᒃᓯᓚᐅᖅᑳᕋᑎᒃ. ᓇᓂᓯᔪᓐᓇᖅᐳᑎᖅ ᐅᖄᓚᐅᑎᑦ ᓈᓴᐅᑎᖏᓐᓂᒃ ᑕᒪᐃᓐᓄᑦ ᐋᓐᓂᐊᕐᓕᐊᕐᕕᖕᓄᑦ ᐅᕙᓂ, https://gov.nu.ca/health/information/health-centres
  • ᐅᓪᓗᒥᒧᑦ ᑎᑭᖦᖢᒍ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.
  • ᓄᓇᓕᑐᐊᑦ ᐊᑐᖅᑕᐅᔭᕆᐊᖃᒻᒪᕆᒃᑐᓪᓗ ᐃᖅᑲᓇᐃᔭᖅᑏᑦ ᐊᔪᖅᑎᑕᐅᙱᓚᑦ ᓄᓇᕗᒻᒧᙵᐅᔭᕆᐊᒃᓴᖅ.
  • ᐃᓄᒋᐊᒡᓗᓂ ᑲᑎᓐᓂᕆᔭᐅᕙᒃᑐᑦ ᐊᔪᖅᑎᑕᐅᕗᑦ.
  • ᓘᒃᑖᑦ ᓄᓇᓕᖕᓄᙵᐅᖃᑦᑕᕐᓂᐊᖅᑐᑦ ᓱᓕ.
  • ᐳᓛᕆᐊᕐᓃᑦ ᑕᒪᐃᓐᓄᑦ ᐋᓐᓂᐊᕕᓕᐊᕐᕕᖕᓄᑦ ᐃᓱᓕᑦᑕᖅᑎᑕᐅᓂᐊᖅᐳᑦ ᒥᑭᒡᓕᒋᐊᖅᑎᓯᒪᔪᒪᓪᓗᒍ ᖁᐊᖅᓵᕐᓇᖅᑐᖅ ᓇᒧᙵᖅᑎᑦᑎᕙᓪᓕᐊᕙᖕᓂᖅ ᑕᒪᑐᒥᖓ ᖃᓂᒪᓐᓇᖅᑐᒥᒃ.
  • ᐃᓱᒪᒃᑯᑦ ᖃᓄᐃᖏᑦᑎᐊᕐᓂᕐᒧᑦ ᐃᑲᔪᖅᑐᕈᑕᐅᕙᒃᑐᑦ ᒪᓂᒪᑎᑕᐅᕗᑦ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐅᓪᓗᒥ, ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑎᑦᑎᕗᑦ ᐃᓕᓐᓂᐊᖅᐸᓪᓕᐊᓂᕐᒧᑦ ᐊᖏᕐᕋᕆᔭᐅᔪᒥ ᐃᑭᐊᖅᑭᕕᖕᒥᒃ ᐆᒥᖓ, ᐊᖏᕐᕋᒥ ᐃᓕᓐᓂᐊᕐᓂᖅ, (angirrami.com). ᑖᓐᓇ ᐊᖏᕐᕋᕆᔭᐅᔪᒥ ᐃᓕᓐᓂᐊᕈᓐᓇᕐᓂᕐᒧᑦ ᐃᑭᐊᖅᑭᕕᒃ ᐋᖅᑭᒃᓱᖅᑕᐅᓂᑯ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᐱᑎᑦᑎᕙᒃᐳᖅ ᐊᑭᖃᙱᑦᑐᒥᒃ ᐊᑐᖅᓯᔪᓐᓇᕐᓂᕐᒥᒃ ᐃᑲᔪᕈᒪᓪᓗᒋᑦ ᓄᑕᖅᑲᑦ ᒪᒃᑯᒃᑐᓗ ᐃᓕᑦᑎᕙᓪᓕᐊᖏᓐᓇᕐᓂᕐᒥᒃ ᐅᖃᐅᓯᕐᒥᑎᒍᑦ ᐃᓕᓐᓂᐊᕐᕖᑦ ᒪᑐᔭᐅᓯᒪᓂᖏᓐᓂ.

ᑕᐃᒪᐃᖁᔭᐅᓯᒪᓂᕐᒥᓄᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐅᑕᒥᑦ, ᐃᓕᓐᓂᐊᕐᕖᑦ ᐸᐃᕐᕆᕝᕖᓪᓗ ᒪᑐᓯᒪᓂᖏᑦ ᐃᓕᓐᓂᐊᖅᑎᓄᑦ ᓄᑕᖅᑲᓄᓪᓗ ᐅᖓᕙᕆᐊᖅᑕᐅᕗᑦ ᐄᐳᕈ 20 ᐅᓪᓗᐊ ᐃᓱᓕᓐᓇᓱᖕᓂᖓᓂ. ᑕᐃᑲᓃᓕᕈᑦᑕ ᖃᖓᙳᖅᐸᓪᓗ, CPHO-ᑯᑦ ᖃᐅᔨᓴᖅᓯᒃᑲᓐᓂᓛᖅᐳᑦ ᐱᑎᑦᑎᓗᑎᒡᓗ ᖃᓄᐃᓕᐅᕆᐊᖃᓕᕐᓂᕐᒥᒃ.

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᑎᒍᔭᐅᓯᒪᕕᓕᕆᔩᑦ ᐱᓕᕆᐊᖃᖅᓯᒪᒻᒪᕆᒃᐳᑦ ᓇᓂᓕᒫᒃᑯᑦ ᖃᐅᔨᒪᑦᑎᐊᕈᒪᓂᕐᒥᓄᑦ ᐱᕙᒡᒋᔭᖅᓯᒪᒐᓗᐊᕐᒪᖔᑦᑕ ᐃᑲᔪᖅᑐᐃᓂᐊᕐᓗᑕ ᐃᖅᑲᓇᐃᔭᑦᑎᖁᑎᑦᑎᓐᓂᒃ, ᑎᒍᔭᐅᓯᒪᔪᓂᒃ ᓄᓇᓕᖕᒥᐅᓂᒡᓗ ᑕᒪᐅᓇᓕᒫᖅ ᑭᒃᑯᑐᐃᓐᓇᓄᑦ ᖃᓄᐃᙱᑦᑎᐊᖅᑎᑦᑎᓂᕐᒧᑦ ᑐᐊᕕᕐᓇᓯᔪᒥ. ᒫᓐᓇᒃᑯᑦ ᐊᖏᔪᑲᓪᓚᖕᒥᒃ ᑐᓴᖅᑕᐅᔪᒃᓴᖃᖅᐸᒃᐳᖅ ᐱᕙᓪᓕᐊᔪᓕᕆᔨᒃᑯᓐᓂ ᐊᓯᖏᓐᓂᑦ ᐱᔪᓐᓇᕐᕕᒋᔭᐅᔪᓂᑦ ᐃᓂᓂᑦ ᖃᓄᐃᓕᐅᕐᒪᖔᑕᓕ ᑎᒍᔭᐅᓯᒪᕝᕕᖁᑎᒥᓂ ᐊᓯᖏᓐᓂ ᐱᔪᓐᓇᕐᕕᐅᔪᓂ ᐃᓂᓂ.

ᖃᐅᔨᒪᑦᑎᐊᕈᒪᓂᕐᒧᑦ ᓄᓇᕗᒻᒥᐅᑦ ᐊᖑᒻᒪᑎᒐᓗᐊᕐᒪᖔᑕ ᖃᐅᔨᒪᓪᓗᑎᒡᓗ ᒫᓐᓇ ᐱᓕᕆᐊᖑᕙᓪᓕᐅᔪᓄᑦ ᓄᓇᕗᒻᒥ, ᐅᑯᓂᖓ ᓄᑖᙳᕆᐊᖅᓯᒪᔪᓂᒃ ᐱᑎᑦᑎᕗᒍᑦ. ᐃᒪᓐᓇᒻᒪᕆᐅᕗᖅ, ᑐᕌᕆᔭᕗᑦ ᖃᐅᔨᒪᑦᑎᐊᕈᒪᓂᐅᕗᖅ ᑕᒪᓐᓇ ᖃᓂᒪᓐᓇᖅᑐᖅ ᑎᒍᔭᐅᓯᒪᕝᕕᖕᓄᑦ ᐃᓂᓄᐊᙱᒃᑲᓗᐊᕐᒪᖔᑦ.

ᐊᑐᖅᑕᐅᓕᖅᑐᑦ ᐃᓕᔭᐅᓯᒪᕙᖐᖅᑐᑦ ᐃᓚᖃᖅᐳᑦ ᓄᖅᑲᖅᑎᑦᑎᓂᕐᒥᒃ ᑕᒪᐃᓐᓂᒃ ᑕᕝᕙᓂᕐᒥᐅᑕᐅᙱᑦᑐᓂᒃ ᐳᓛᕆᐊᖅᑎᑦᑎᕙᖕᓂᕐᒥᒃ ᐊᑐᓪᓚᕆᒋᐊᖃᙱᑦᑐᓂᒡᓗ ᓇᒧᙵᐅᖃᑦᑕᕐᓂᕆᔭᐅᕙᒃᑐᓂᒃ. ᖁᔭᓕᕗᒍᑦ ᐅᑕᖅᑭᒃᑦᑎᐊᖃᑦᑕᕐᓂᖏᓐᓄᑦ ᐃᑲᔪᖅᑐᐃᖃᑦᑕᕐᓂᖏᓐᓄᓪᓗ ᐱᓯᒪᔭᑦᑎᓐᓂᒃ ᑎᒍᔭᐅᓯᒪᔪᓂᑦᓴᐃᓚᖏᓐᓂᓪᓗ ᑕᐃᒪᐃᓕᐅᓕᕐᓂᖏᓐᓄᑦ, ᖃᐅᔨᒪᓪᓗᑕᓗ ᑕᒪᓐᓇ ᐊᔪᕐᓇᙱᑦᑐᑯᓘᙱᓐᓂᖓᓂᒃ.

ᖁᕝᕙᕆᐊᖅᓯᒪᓕᕐᓂᖏᓐᓄᑦ ᖁᐊᖅᓵᓇᖅᑕᐃᓕᒪᓂᕐᒧᑦ ᖁᐊᖅᓵᕐᓇᑐᐃᓐᓇᕆᐊᓖᑦ ᐊᒃᑐᐊᓂᓖᑦ ᑎᒍᔭᐅᓯᒪᔪᓕᕆᓂᕐᒧᑦ, ᐱᑎᑦᑎᔪᓐᓇᙱᓚᒍᑦ ᐃᓗᓕᒃᑲᓐᓂᖏᓐᓂᒃ ᐱᔾᔪᑎᖃᕐᓗᑕ ᐃᓛᒃᑰᖅᑐᓂᒃ ᐃᓂᒋᔭᐅᔪᒧᑦ ᐱᕙᒌᔭᖅᓯᒪᔭᕗᑦ.

ᑭᓯᐊᓂᓗᑦᑕᐅᖅ, ᐱᑎᑦᑎᔪᓐᓇᖅᐳᒍᑦ ᐅᑯᓂᖓ ᑐᓴᖅᑕᐅᔪᒃᓴᓂᒃ ᐱᔾᔪᑎᓕᖕᓂᒃ ᖃᓄᐃᓕᐅᖅᑕᐅᕙᓪᓕᐊᓕᖅᑐᓂᒃ:

  • ᑕᒪᕐᒥᑦᑎᐊᖅ ᑕᐃᑯᙵᖅᑎᑕᐅᔪᑦ ᐅᐸᒃᑕᐅᑦᑕᐃᓕᒪᔪᒦᑎᑕᐅᕙᒃᐳᑦ 14−ᓄᑦ ᐅᓪᓗᓄᑦ ᑕᐃᑯᙵᕌᖓᒥᒃ.
  • ᑎᒍᔭᐅᓯᒪᕖᑦ ᐃᓕᐅᖅᑲᐃᓯᒪᕗᑦ ᐊᒡᒐᓄᑦ ᖁᐱᕐᕈᐃᔭᐃᔾᔪᑎᒃᑲᓐᓂᕐᓂᒃ ᐃᓂᓂᒃ ᑕᒪᒃᑯᓇᓂ ᐊᖅᑯᓵᖅᑕᐅᒐᔪᖕᓂᕆᔭᖏᓐᓂ.
  • ᑭᐅᓯᓂᕐᒧᑦ/ᐊᑕᐅᓰᓐᓇᕐᒦᑎᑦᑎᓂᕐᒧᑦ ᐊᑐᖅᑕᐅᔪᓐᓇᖅᑐᑦ ᐃᓪᓕᖅᓱᖅᑕᐅᕗᑦ ᐊᒡᒑᖕᓂᒃ, ᒪᑐᐊᕈᑎᓂᒃ, ᑮᓇᒧᑦ ᓴᐴᓗᑕᕐᓂᒃ, ᐊᓐᓄᕌᑯᑖᖕᓂᒃ ᖃᓄᐃᓕᐅᖁᔨᓯᒪᔪᓂᒡᓗ ᑖᒃᑯᐊ ᐊᑐᕐᓂᐊᕐᓗᒋᑦ.
  • ᐃᓗᐊᖅᓴᐃᔩᑦ ᐱᓕᕆᓪᓚᕆᒃᖢᑎᒃ ᖃᐅᔨᓴᖅᓯᕗᑦ ᑎᒍᔭᐅᓯᒪᔪᓂᒃ ᑎᒍᔭᐅᒑᖓᑕ ᖃᐅᔨᔾᔪᑕᐅᔪᓐᓇᖅᑐᓄᑦ ᓄᕙᒡᔪᐊᖅᑐᑦ-19-ᒥᒃ
  • ᐃᓂᒋᔭᐅᔪᑦ ᐊᖏᒡᓕᒋᐊᖅᑎᑦᑎᕗᑦ ᓂᕿᓂᒃ ᐊᑐᖅᑕᐅᔭᕆᐊᓕᖕᓂᒡᓗ ᖃᐅᔨᒪᑦᑎᐊᕈᒪᓂᕐᒥᓄᑦ ᑕᒪᒃᑯᐊ ᐃᓂᒋᔭᐅᔪᑦ ᐱᖃᐅᑦᑎᐊᕋᓗᐊᕐᒪᖔᑕ ᑕᒪᓐᓇ ᖃᓂᒪᓐᓇᖅ ᓇᒧᙵᕈᓘᔭᓕᕐᓂᖅᐸᑦ
  • ᐊᖏᒡᓕᒋᐊᖅᓯᒪᔪᓂᒃ ᓴᓗᒻᒪᖅᓴᐃᓂᐅᕙᒃᑐᓂᒃ ᖃᐅᔨᒪᑦᑎᐊᕈᒪᓂᕐᒧᑦ ᖄᕆᔭᐅᔪᑦ ᑭᓇᑐᐃᓐᓇᖅᓯᐅᑏᑦ ᓴᓗᒪᒐᓗᐊᕐᒪᖔᑕ ᐊᖏᔨᓕᒋᐊᖅᓯᒪᔪᒃᑯᑦ ᓴᓗᒻᒪᖅᓴᐃᓂᕆᔭᐅᕙᒃᑐᒃᑯᑦ ᐅᓪᓗᓕᒫᒥ.

ᖄᒃᑲᓐᓂᐊᒍᑦ ᑕᒪᒃᑯᐊ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᐱᓕᕆᐊᖑᔪᑦ, ᐱᓕᕆᕝᕕᒋᔭᐅᔪᖅ ᕿᒥᕐᕈᐊᖅᓯᒃᑲᓐᓂᖅᓯᒪᕗᖅ ᑕᒪᐃᓐᓂᑦᑎᐊᖅ ᑎᒍᔭᐅᓯᒪᔪᓂᒃ ᐊᔪᖅᑎᑕᐅᙱᑦᑐᓂᒃ ᐊᓂᓵᓕᑎᑕᐅᔭᕆᐊᒃᓴᖅ ᐅᓄᕈᓐᓃᖅᑎᒋᐊᕈᒪᓪᓗᒋᑦ ᑎᒍᔭᐅᓯᒪᕗᑦ ᐊᔪᕐᓇᙱᓐᓂᓕᒫᖓ ᒪᓕᒡᓗᒍ.

ᐱᓕᕆᐊᖃᐃᓐᓇᕐᓂᐊᖅᐳᒍᑦ ᐃᑲᔪᖅᑐᐃᓂᐊᖅᑐᓂᒃ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᖁᐊᖅᓵᕐᓇᖅᑐᒦᙱᓐᓂᖏᓐᓄᓪᓗ ᑎᒍᔭᐅᓯᒪᔪᖁᑎᕗᑦ, ᐃᖅᑲᓇᐃᔭᖅᑏᑦ ᑕᒪᕐᒥᑦᑎᐊᕐᓗ ᓄᓇᕗᒻᒥᐅᑦ.

ᐊᕙᑎᓕᕆᔨᒃᑯᑦ

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᓄᑖᓂᒃ ᖃᐅᔨᓴᖅᓯᓂᕐᒧᑦ ᐱᔪᓐᓇᐅᑎᓂᒃ ᑐᓂᓯᔪᖃᑦᑕᔮᙱᑦᑐᖅ ᒪᑐᔭᐅᓯᒪᓕᕐᓂᖏᓐᓄᑦ ᐊᖑᓇᓱᒃᑐᓕᕆᔩᑦ ᓇᒧᙵᐅᓂᕐᒧᓪᓗ ᐃᓱᓕᑦᑕᖅᑎᑕᐅᔪᓄᑦ ᐊᒃᑐᐊᓂᓕᖕᓄᑦ ᓄᕙᒡᔪᐊᕐᓇᖅ-19−ᒧᑦ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ

ᒫᓐᓇᐅᓂᖓᓂ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓇᓗᓇᐃᖅᓯᔪᒪᔪᑦ ᐊᑭᓕᖅᓱᐃᔪᓂ ᑎᒥᐅᔪᖅ ᐲᔭᐃᔾᔮᙱᓐᓂᖏᓂᒃ ᑮᓇᐅᔭᖁᑎᖃᕐᕕᒋᔭᐅᔪᓂ ᐅᕝᕙᓘᓐᓃᑦ ᐃᓕᐅᖅᑲᐃᔾᔮᙱᓐᓂᖏᓐᓂᒃ ᐃᓱᓕᕝᕕᒃᓴᖃᕐᓂᖏᓐᓂᒃ ᑭᖑᓂᐊᒍᑦ ᐅᖃᐅᓯᒃᑲᓐᓂᓚᐅᙱᓐᓂᖏᓐᓂ ᖃᐅᔨᒪᑦᑎᐊᕈᒪᓂᕐᒧᑦ ᑕᒪᒃᑯᐊ ᐊᑐᖅᑐᐊᖅᑏᑦ ᐊᑐᙱᑦᑐᓐᓇᕐᓂᖏᓐᓄᑦ ᐊᒃᓱᕈᕐᓇᖅᓯᔪᒥᒃ ᐊᑐᕆᐊᖃᙱᑦᑑᒐᓗᐊᒥᒃ ᑕᒪᓐᓇ ᓄᕙᒡᔪᐊᕐᓇᖅ-19 ᓇᒧᙵᕈᓘᔭᖅᓯᒪᑎᓪᓗᒍ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᐅᕗᙵᕐᓗᑎᑦ www.qec.nu.ca.

ᓄᓇᕗᒻᒥ ᓯᓚᑦᑐᖅᓴᕐᕕᒃ

ᑐᓴᖅᑕᐅᔪᒃᓴᓕᒫᓄᑦ ᓄᓇᕗᒻᒥ ᓯᓚᑦᑐᖅᓴᕐᕕᐅᑉ ᐱᓕᕆᐊᕆᔭᒃᓴᖁᑎᖏᓐᓄᑦ ᐊᔪᕈᓐᓃᖅᓴᒐᒃᓴᓄᓪᓗ ᐅᐱᕐᙶᒥ ᐃᓕᓐᓂᐊᖅᑕᐅᔪᒃᓴᓄᑦ, ᐅᕗᖓ ᑕᑯᔭᖅᑐᕐᓗᒋᑦ: https://arcticcollege.ca/s/NAC-Q-A-Spring-semester.pdf

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐊᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.