ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐊᐃᕆᓕ 30, 2020

ᐄᐳᕈ 30, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᐅᓪᓗᒥ, ᓇᓗᓇᐃᖅᓯᓪᓚᕆᓕᖅᐳᖓ ᓄᓇᕗᒻᒥᐅᑦ ᓯᕗᓪᓕᖅᐹᒥᒃ ᓇᓗᓇᐃᖅᓯᕕᐅᓪᓚᑦᑖᖅᓯᒪᓕᕐᓂᖏᓐᓂᒃᓄᕙᒡᔪᐊᕐᓇᖅ-19−ᑕᖃᓕᖕᓂᖓᓂᒃ ᒥᑦᑎᒪᑕᓕᖕᒥ.

ᓗᑖᖅ  ᐹᑐᓴᓐ ᐅᖃᐅᓯᖃᕐᓂᐊᖅᐳᖅ ᐊᑕᖐᑦᑎᐊᖅᑐᒥᒃ, ᐋᖅᑭᒃᓱᖅᑕᐅᑦᑎᐊᖅᓯᒪᔪᒥᒃ ᑐᐊᕕᕐᓇᖅᑐᒧᑦ ᑭᐅᓯᓂᕐᒥᒃ ᓄᕙᒡᔪᐊᕐᓇᖅ-19−ᒧᑦ ᓄᓇᕗᒻᒥ, ᑭᓯᐊᓂᓗ ᓄᓇᕗᒻᒥᐅᑦ ᐃᖅᑲᐃᑎᑦᑐᒪᕙᒃᑲ ᐱᒻᒪᕆᐊᓗᖕᒥᒃ:

ᑭᓇᑐᐃᓐᓇᑦᑎᐊᖅ ᑖᔅᓱᒥᖓ ᖃᓂᒪᓐᓇᒥᒃ ᐱᔪᒪᙱᑦᑎᐊᖅᐳᖅ. ᑭᓇᑐᐃᓐᓇᖅ ᑕᒪᐅᙵᐅᔾᔨᓚᐅᙱᑦᑐᖅ ᑕᒪᑐᒥᖓ ᐋᓐᓂᐊᕐᓇᒥᒃ ᓄᓇᕗᒻᒧᑦ ᐱᔮᕆᓪᓗᓂ. ᑭᓇᑐᐃᓐᓇᑦᑎᐊᖅ ᑲᙳᓵᖅᑕᐅᔭᕆᐊᖃᙱᓚᖅ ᓵᑕᐅᔭᕆᐊᖃᙱᓚᕐᓗ ᒪᓐᓇ.

ᓄᓇᕐᔪᐊᓕᒫᑦᑎᐊᖅ ᐊᑐᖅᐳᖅ ᑕᒪᑐᒥᖓ ᓇᓗᓈᕿᓐᓇᖅᑐᒥᒃ ᑲᑉᐱᐊᓱᖕᓇᖅᑐᒥᒡᓗ. ᐃᓄᑑᙱᓚᒍᑦ. ᓄᓇᕗᑦ ᑭᑭᑕᐅᙱᑦᑎᐊᖅᐳᖅ ᑕᒪᑐᒧᖓ ᓄᓇᕐᔪᐊᓕᒫᒥ ᐋᓐᓂᐊᓇᕆᔭᐅᓕᖅᑐᒥ.

ᒫᓐᓇᓕ ᑕᕝᕙ ᐅᑕᖅᑭᓂᖃᑦᑎᐊᕆᐊᖃᓕᖅᐳᒍᑦ, ᐃᓄᑦᑎᐊᕙᐅᓗᑕᓗ ᐊᖏᕐᕋᖅᓯᒪᕙᒡᓗᑕᓗ. ᑕᒪᑐᒥᖓ ᐅᓂᒍᐃᑎᑦᑎᓂᐊᖅᐳᒍᑦ. ᓄᕙᒡᔪᐊᕐᓇᖅ-19 ᓵᓚᒋᓂᐊᖅᐸᕗᑦ ᓄᓇᕗᒻᒥ.

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ

ᑕᑯᓯᒪᑎᓪᓗᓯ ᑐᓴᖅᓯᒪᓕᖅᑎᓪᓗᓯᓗ, ᐅᓪᓗᒥ ᐅᖃᐅᓯᖃᖅᐳᒍᑦ ᓄᕙᒡᔪᐊᕐᓇᖅ-19−ᑕᖃᕐᓂᖓᓂᓐ ᒥᑦᑎᒪᑕᓕᖕᒥ. ᑕᐃᒪᖓᓂᑦ ᑕᒪᓐᓇ ᓄᓇᕐᔪᐊᕐᒥ ᐋᓐᓂᐊᕐᓇᖅ ᐱᒋᐊᓚᐅᖅᑎᓪᓗᒍ, ᖃᐅᔨᒪᓚᐅᖅᐳᒍᑦ ᑲᑎᓯᒪᔪᓂᒃ ᐱᑕᖃᙱᓐᓂᖓᓂᒃ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐱᑕᖃᙱᓪᓚᑦᑖᖅᑎᑦᑎᔪᓐᓇᖅᑐᓂᒃ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ. ᓂᕆᐅᒋᔭᖃᓚᐅᖅᐳᒍᑦ ᖃᖓᖑᖅᐸᑦ ᑕᒪᓐᓇ ᖃᓂᒪᓐᓇ ᖃᐅᔨᔭᐅᓛᕐᓂᖓᓂᑦ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᑦᑎᓐᓂ. ᐱᓇᔪᓪᓚᕆᒃᓯᒪᑎᓪᓗᑕᑦᑕᐅᖅ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᐱᕙᒡᒋᔭᖅᓯᒪᔭᑦᑎᓐᓂ, ᐊᒻᒪᐃᓛᒃᑕᐅᖅ ᐋᖅᑭᒃᓱᐃᓯᒪᒋᕗᒍᑦ ᐃᓗᓕᖃᐅᑦᑎᐊᖅᑐᒥᒃ ᑭᐅᓯᓂᕐᒧᑦ ᐱᕙᒌᔭᐅᒻᒥᒃ ᒥᑭᓛᒃᑰᖅᑎᑦᑐᒪᓪᓗᒍ, ᐊᔪᕐᓇᙱᓐᓂᓕᒫᖓᒍᑦ, ᑕᒪᓐᓇ ᓄᕙᒡᔪᐊᕐᓇᖅ-19 ᐊᒃᑐᖅᓯᓂᖃᕐᓂᓂᖓᓂᒃ ᓄᓇᕗᒻᒥᒃ.

ᐅᖃᖃᑎᖃᖅᓯᒪᓕᖅᐳᒍᑦ ᕼᐋᒻᒪᓚᒃᑯᓐᓄᑦ ᐱᔪᓐᓇᐅᑎᓕᖕᓂᒃ ᐱᒋᐊᖅᑎᑦᑎᓯᒪᓕᖅᖢᑕᓗ ᑐᐊᕕᕐᓇᖅᑐᒃᑯᑦ ᑭᐅᓯᓇᔭᕐᓂᕐᒥᒃ ᐱᕙᒌᔭᓯᒪᔭᑦᑎᓐᓂᒃ. ᑐᐊᕕᕐᓇᖅᑐᒃᑯᑦ ᑭᐅᓯᓂᕐᒥᒃ ᐱᓕᕆᔩᑦ ᒥᑦᑎᒪᑕᓕᖕᒧᙵᐅᓯᒫᓂᓕᖅᐳᑦ ᑕᐃᑯᙵᕐᓂᐊᖅᖢᑎᒡᓗ ᐅᓐᓄᒃᓴ ᐱᒋᐊᓕᓵᐸᓗᒃᑎᓪᓗᒍ. ᑖᒃᑯᐊ ᐱᓕᕆᔭᖅᑐᖅᑐᑦ ᐱᒋᐊᖅᑎᑦᑎᓯᑲᐅᑎᒋᓂᐊᖅᑐᑦ ᓇᒧᙵᕈᓘᔭᖅᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᓂᐊᖅᑐᓂᒃ, ᐱᒋᐊᖅᑎᑦᑎᓗᑎᒡᓗ ᑭᒃᑯᑦ ᖃᓂᒋᔭᖃᖅᓯᒪᖕᒪᖔᑕ/ᐊᐳᖅᓯᓯᒪᓐᓂᕐᒪᖔᑕ, ᓇᐅᑦᑎᖅᓱᖅᓯᓗᑎᒡᓗ ᖃᓄᐃᙱᒃᑲᓗᐊᕐᒪᖓᑕ ᐋᓐᓂᐊᙱᒃᑲᓗᐊᕐᒪᖔᑕ ᐃᓄᐃᑦ ᐊᖏᕐᕋᒥᓂ ᐅᐸᒃᑕᐅᑦᑕᐃᓕᒪᓂᕐᒧᑦ ᑎᓕᓯᔾᔪᑕᐅᓯᒪᔪᑦ. ᒥᑦᑎᒪᑕᓕᖕᒥ ᐋᓐᓂᐊᕕᓕᐊᕐᕕᒃ ᐃᖅᑲᓇᐃᔭᖅᑎᖃᑦᑎᐊᖅᐳᖅ ᐱᕙᒌᔭᖅᓯᒪᓪᓗᑎᒡᓗ, ᑕᒪᒃᑯᐊᓗ ᐋᓐᓂᐊᕕᖕᒥ ᐊᐅᓚᑎᑕᐅᕙᒃᑐᑦ ᑲᔪᓯᓂᐊᖅᖢᑎᒃ.

ᑕᒪᕐᒥᑦᑎᐊᖅ ᒥᑦᑎᒪᑕᓕᖕᒧᙵᐅᓃᑦ ᒥᑦᑎᒪᑕᓕᖕᒥᒑᕐᓃᓪᓗ ᓄᖅᑲᖅᑎᑕᐅᕗᑦ. ᑕᒪᓐᓇ ᐃᓚᖃᖅᐳᖅ ᖃᓄᑐᐃᓐᓇ ᓄᒃᑕᕐᓂᕆᔭᐅᕙᒃᑐᓂᒃ  ᑕᐃᑯᖓ ᑕᐃᑲᙵᓪᓗ ᓄᓇᒃᑯᓪᓘᓐᓃᑦ. ᑕᒪᓐᓇ ᓄᒃᑕᕐᓂᕐᒥᒃ ᓄᖅᑲᖅᑎᑦᑎᓂᖅ ᑕᐃᒪᐃᑦᑕᕆᐊᖃᖅᐳᖅ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᓪᓗᓂ ᒥᑭᓛᒃᑰᖅᑎᑦᑎᔪᒪᓂᕐᒧᑦ ᖁᐊᖅᓵᕐᓇᖅᑐᒥᒃ ᓄᕙᒡᔪᐊᕐᓇᖅ-19−ᒥᒃ ᓯᐊᒻᒪᑐᐃᓐᓇᕆᐊᖃᕐᓂᓂᒃ ᖃᔅᓯᑲᓪᓚᖕᓄᑦ ᓄᓇᓕᖕᓄᑦ ᐊᑕᐅᑦᑎᒃᑰᕐᓗᓂ.

ᖃᐅᔨᒪᓕᓚᐅᙱᓐᓂᑦᑎᓐᓂ ᓯᐊᒻᒪᑐᐃᓐᓇᕆᐊᖃᕐᓂᖓᓂᒃ ᑕᒪᓐᓇ ᖃᓂᒪᓐᓇ ᓄᓇᓕᖕᓂ, ᑕᒪᕐᒥᑦᑎᐊᖅ ᐊᑐᓪᓚᕆᒋᐊᖃᙱᑦᑐᑦ ᑎᑎᕋᕐᕖᑦ ᐱᔨᑦᑎᕋᕐᓂᕆᔭᐅᕙᒃᑐᓪᓗ ᒪᑐᔭᐅᓂᐊᖅᐳᑦ. ᐃᓄᖕᓂᒃ ᑲᑎᑦᑐᖃᕆᐊᖃᙱᖅᑐᖅ ᐊᖏᕐᕋᕆᔭᐅᔪᓂ, ᑕᒪᕐᒥᑦᑎᐊᕐᓗ ᒥᑦᑎᒪᑕᓕᖕᒥᒥᐅᑦ ᐊᐱᕆᔭᐅᕗᑦ ᑲᔪᓰᓐᓇᖁᔭᐅᓪᓗᑎᒃ ᑲᔪᓯᑎᑦᑎᓂᕐᒥᒃ ᐃᓅᖃᑎᒌᑦ ᐅᖓᓯᒌᒋᐊᖃᕐᓂᖏᓐᓂᒃ ᓴᓗᒪᑦᑎᐊᖅᐸᒡᓗᑎᒡᓗ.

ᒥᑦᑎᒪᑕᓕᖕᒥᐅᓄᑦ, ᖃᐅᔨᒪᕗᒍᑦ ᑕᒪᓐᓇ ᑐᓴᖅᑕᐅᓕᓵᖅᑐᖅ ᑲᑉᐱᐊᓇᑐᐃᓐᓇᕆᐊᖃᕐᓂᖓᓂᒃ. ᑭᓯᐊᓂᓗᑦᑕᐅᖅ, ᓄᓇᕗᑦ ᒐᕙᒪᖓ ᓇᓗᓇᐃᖅᓯᑦᑎᐊᕈᒪᕗᑦ ᑭᒃᑯᑐᐃᓐᓇᓄᑦ, ᑕᒪᓐᓇ ᓄᒃᑕᕐᓂᖅ ᐊᔪᓕᖅᑎᑕᐅᒐᓗᐊᖅᑎᓪᓗᒍ, ᓱᓕ ᐃᑲᔪᖅᑕᐅᔪᓐᓇᕐᓂᐊᖅᐳᓯ ᐃᑲᔪᖅᑐᖅᑕᐅᕙᒡᓗᓯᓗ. ᐱᒻᒪᕆᐊᓗᐃᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᑲᔪᓯᑎᑕᐅᓂᐊᖅᐳᑦ, ᐱᕙᒌᔭᖅᑐᖃᖅᖢᓂᓗ ᖃᐅᔨᒪᑦᑎᐊᕈᒪᓂᕐᒧᑦ ᐊᑐᕈᓐᓇᕐᓃᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᓲᕐᓗ, ᐅᖅᑰᓴᕐᓂᕐᒧᑦ, ᐆᒻᒪᖅᑯᑎᖃᕐᓂᕐᒧᑦ, ᐃᒪᖃᕐᓂᕐᒧᑦ, ᑭᓈᓗᐃᔭᖅᑕᐅᕙᖕᓂᕐᒧᑦ, ᑐᓴᐅᒪᑎᑦᑎᓂᕆᔭᐅᕙᒃᑐᓪᓗ ᓱᖁᓯᔾᔮᙱᓚᑦ. ᑕᐅᑐᒐᕆᓪᓗᐊᑕᖅᑕᕗᖅ ᒫᓐᓇ ᖃᐅᔨᔪᒪᔭᖃᕐᓂᖅ ᓯᐊᒻᒪᒃᑎᑦᑎᙱᓐᓂᕐᓗ ᑕᒪᑐᒥᐊ ᐋᓐᓂᐊᕐᓇᒥᒃ ᐱᑕᖃᖅᑎᑦᑎᑦᑕᐃᓕᒪᔪᒪᓂᕐᒧᑦ ᓇᒧᙵᒃᑲᓐᓂᖅᐸᓪᓕᐊᓂᖓᓂᒃ ᓄᓇᓕᖕᓂ ᐊᓯᖏᓐᓄᓪᓗ ᓄᓇᓕᖕᓄᑦ.

ᑭᓇᑐᐃᓐᓇᑦᑎᐊᖅ ᐅᒃᐱᕆᔭᖃᖅᑐᖅ ᓵᑦᑎᐊᕐᒥᐅᑕᖃᖅᓯᒪᓂᕐᒥᓂᒃ ᐅᐸᒃᓯᓯᒪᓚᐅᕐᓂᕐᒥᓂᒃ ᑕᒪᑐᒥᖓ ᒡᐊᓐᓂᐊᕐᓇᒥᒃ ᐅᖃᐅᔾᔭᐅᕗᑦ ᐅᖄᓚᖁᔭᐅᓪᓗᑎᒃ ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᐅᔪᓐᓇᖅᑐᒧᑦ ᐅᕗᖓ, 1-888-975-8601, 10−ᓗ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖏᓐᓂ, ᐅᖄᓚᖢᑎᓪᓘᓐᓃᑦ ᓄᓇᔅᓯᓐᓂ ᐋᓐᓂᐊᕕᓕᐊᕐᕕᔅᓯᓐᓄᑦ. ᐋᓐᓂᐊᕕᓕᐊᖅᑕᐃᓕᒋᑦ ᐅᐸᒡᓗᒍ ᑭᓯᐊᓂ ᑕᐃᒪᐃᖁᔭᐅᒍᕕᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒻᒪᕆᖕᒥᑦ.

ᓄᓇᕗᒻᒥᐅᓕᒫᓄᑦ, ᖃᐅᔨᒪᒋᔅᓯ ᑕᒪᒃᑯᐊ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᔪᑦ ᐊᑐᐃᓐᓇᖅᓯᒪᔭᕗᑦ ᒫᓐᓇ ᐱᒻᒪᕆᐊᓘᓂᖅᓴᐅᓕᖅᐳᑦ. ᑭᒃᑯᑐᐃᓐᓇᑦᑎᐊᑦ ᐊᑐᕆᐊᖃᖅᐳᑦ ᐃᓅᖃᑎᒥᓂᒃ ᐅᖓᓯᒃᓴᕆᐊᖃᕐᓂᕐᒥᒃ, ᐊᖏᕐᕋᖅᓯᒪᕙᒡᓗᑎᒃ ᐊᔪᕐᓇᙱᑐᐅᕌᖓᑦ, ᐊᐴᑎᑦᑕᐃᓕᒪᕙᒡᓗᑎᒡᓗ ᐃᒡᓗᒥᐅᑕᐅᖃᑎᒋᙱᑕᒥᓄᑦ. ᐊᑕᐅᑦᑎᒃᑯᑦ, ᐱᓇᔪᒃᑕᕗᑦ ᓱᒃᑲᐃᒡᓕᒋᐊᖅᑎᑦᑎᔪᓐᓇᖅᐳᑦ ᑕᒪᑐᒪ ᓄᕙᒡᔪᐊᕐᓇᖅ-19 ᓯᐊᒻᒪᒃᐸᓪᓕᐊᓂᖓᓄᑦ.

ᑭᖑᓪᓕᕐᒥᒃ, ᑭᒃᑯᑐᐃᓐᓇᓕᒫᑦ ᐃᖅᑲᐃᑎᑦᑐᒪᕙᒃᑲ ᐱᒻᒪᕆᐊᓘᓂᖓᓂᒃ ᐃᓄᑦᑎᐊᕙᐅᕙᖕᓂᖅ. ᒫᓐᓇᓕ ᑕᕝᕙ ᑭᓇᑐᐃᓐᓇᒥᒃ ᐸᓯᔭᕆᐊᖃᙱᓚᒍᑦ, ᑲᙳᓵᕆᔭᕆᐊᖃᙱᓚᒍᓪᓗ. ᒫᓐᓇᓕ ᑕᕝᕙ ᓇᒡᓕᖕᓂᖃᕆᐊᖃᖅᐳᒍᑦ, ᐃᑲᔪᖅᑐᐃᓗᑕᓗ, ᓄᓇᕗᒻᒥᐅᑲᑕᐅᖃᑎᑦᑎᓐᓂᒃ.

ᓄᓇᕗᑦ ᒐᕙᒪᖓ ᖁᔭᓕᕗᖅ ᓄᓇᕗᒻᒥᐅᓕᒫᓂᒃ ᐱᓇᔪᒃᓯᒪᓂᖃᕐᓂᖏᓐᓄᑦ ᐅᓪᓗᒥᒧᑦ ᑎᑭᖦᖢᒍ. ᐱᓇᔪᐃᓐᓇᕐᓂᐊᖅᐳᒍᑦ ᐱᓇᔪᒍᓐᓇᕐᓂᓕᒫᑦᑎᓐᓄᒃ ᑕᒪᓐᓇ ᖃᓂᒪᓐᓇ ᓇᒧᙵᕈᓘᔭᖅᑎᑦᑕᐃᓕᒪᓗᒍ, ᒥᑭᓈᖅᑎᑦᑐᒪᓪᓗᒍᓗ ᐊᒃᑐᖅᓯᓂᕆᔭᖓ ᒥᑦᑎᒪᑕᓕᖕᒥᐅᓂᒃ, ᑕᒫᓂᓕᒫᕐᓗ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ. ᑭᓯᐊᓂ ᑲᑐᔾᔨᓗᑕ ᓴᐳᒻᒥᔪᓐᓇᖅᐸᕗᑦ ᐊᕕᒃᓯᒪᓂᕆᔭᕗᑦ ᐅᑭᐅᖅᑕᖅᑐᒥ ᑕᒪᑐᒪᙵᑦ ᖁᐊᖅᓵᕐᓚᖅᑐᒥᑦ ᓄᕙᒡᔪᐊᕐᓇᖅ-19−ᒥᑦ.

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᒥᑦᑎᒪᑕᓕᖕᒥᐅᑦ ᐅᖄᓚᖅᑳᕆᐊᖃᖅᐳᑦ ᐋᓐᓂᐊᕕᓕᐊᕐᕕᖕᒥᓄᑦ ᓯᕗᓪᓕᕐᒥᒃ. ᑕᒪᕐᒥᑦᑎᐊᖅ ᐃᓂᒃᓴᓕᐅᖅᑕᐅᓯᒪᔪᑦ ᒥᑦᑎᒪᑕᓕᖕᒥ ᐋᓐᓂᐊᕕᓕᐊᕐᕕᖕᒥ ᓄᖅᑲᖅᑎᑕᐅᕗᑦ. ᑭᓯᐊᓂ ᑐᐊᕕᕐᓇᖅᑐᓄᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᒪᓂᒪᑎᑕᐅᕗᑦ.

ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᒃᓴᖅ, ᓇᖕᒥᓂᕐᓗ ᖃᐅᔨᓴᕐᓂᕐᒧᑦ ᐊᑐᖅᑕᐅᔪᓐᓇᖅᑐᖅ

ᑭᓇᑐᐃᓐᓇᑦᑎᐊᖅ ᐃᓱᒪᒋᔭᖃᖅᑐᖅ ᐊᐴᑎᓯᒪᓯᒪᓂᕐᒥᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ ᐅᖃᐅᔾᔭᐅᕗᑦ ᐅᖄᓚᖁᔭᐅᓪᓗᑎᒃ ᓄᕙᒡᔪᐊᕐᓇᕐᒧᑦ−ᐅᖄᕝᕕᐅᔪᓐᓇᖅᑐᒥᒃ ᐅᕗᖓ, 1-888-975-8601−ᒧᑦ  10−ᓗ ᐅᓪᓛᒥᑦ  6−ᓗ ᐅᓐᓄᒃᓴᒧᑦ ᐊᑯᓐᓂᖏᓐᓂ, ᖃᐅᔨᑎᓪᓗᒋᓪᓗ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᖕᒥᓂᒃ ᖃᐅᔨᑎᑲᐅᑎᒋᓗᒋᓪᓗ,  ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᓂᓗ ᐊᖏᕐᕋᖅᓯᒪᓗᓂᓗ 14−ᓄᑦ ᐅᓪᓗᓄᑦ.

ᓄᓇᕗᒻᒥᐅᑦᑕᐅᖅ ᐊᑐᕈᓐᓇᕆᕗᑦ ᓇᖕᒥᓂᖅ−ᖃᐅᔨᓴᕐᓂᕐᒥᒃ ᐊᑐᖅᑕᐅᔪᓐᓇᖅᑐᒥᒃ ᒪᓂᒪᔪᒥᒃ ᐅᕙᓂ, www.gov.nu.ca

ᓄᓇᓕᖕᓂ ᐊᐅᓪᓚᖃᑦᑕᕐᓂᖅ ᑲᑎᙵᒋᐊᖃᙱᓐᓂᖏᓐᓂᒡᓗ ᑎᓕᓯᔾᔪᑕᐅᔪᑦ

ᒥᑦᑎᒪᑕᓕᒃ

ᑕᒪᕐᒥᑦᑎᐊᖅ ᒥᑦᑎᒪᑕᓕᖕᒧᙵᐅᕙᖕᓃᑦ ᒥᑦᑎᒪᑕᓕᖕᒥᙶᖅᐸᖕᓃᓪᓗ ᐊᔪᓕᖅᑎᑕᐅᕗᑦ ᑭᓯᐊᓂ:

  • ᐃᓄᐃᑦ ᑎᑎᖅᑲᖅᑖᖅᓯᒪᔪᑦ CPHO-ᒥᑦ
  • ᑎᖕᒥᓲᒃᑯᑦ ᐋᓐᓂᐊᕕᓕᐊᕆᐊᖃᖅᖢᑎᒃ ᐊᐅᓚᖅᑎᑕᐅᔪᑦ
  • ᖃᖓᑕᓲᓕᕆᔩᑦ
  • ᓄᓇᕗᒻᒥᐅᑦ ᐃᓄᐃᑦ ᐊᑐᖅᑐᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᒥᓂᒃ ᐋᖅᑭᒃᑕᐅᓯᒪᔪᑎᑐᑦ ᑎᑎᕋᖅᓯᒪᔪᒥ 5−ᒥᐊᐅᓪᓚᕈᓐᓇᖅᐳᑦ ᐅᑎᕈᓐᓇᖅᖢᑎᒡᓗ ᒥᑦᑎᒪᑕᓕᖕᒧᑦ ᑭᓯᐊᓂ ᓄᒃᑕᕆᐊᖃᙱᑦᑎᐊᖅᑐᑦ ᐊᓯᐊᓄᑦ ᓄᓇᓕᖕᓄᑦ
  • ᑭᒃᑯᑐᐃᓐᓇᑦᑎᐊᑦ ᖃᖓᑕᓲᒃᑯᑦ ᐊᐅᓪᓚᖅᑐᑦ ᒥᑦᑎᒪᑕᓕᖕᒧᓪᓗ ᐊᖅᑯᓵᕆᐊᖃᕐᓗᑎᒃ ᓯᓚ ᐱᔾᔪᑕᐅᓗᓂ ᐅᕝᕙᓘᓐᓃᑦ ᑐᐊᕕᕐᓇᖅᑐᖃᕐᓂᖅᐸᑦ.

ᑐᑐᐊᕕᕐᓇᖅᑐᒃᑯᑦ ᐃᓗᐊᖅᓴᐃᔨᓕᐅᕈᔾᔨᔩᑦ ᖃᖓᑕᓲᒃᑯᑦ ᓄᒃᑕᕐᓂᕆᔭᒥᓂᒃ ᐃᓱᓕᑦᑕᖅᑎᑦᑎᔭᕆᐊᖃᖅᐳᑦ ᒥᑦᑕᕐᕕᖕᒧᑦ ᐋᓐᓂᐊᕕᖕᒧᓪᓗ, ᐊᑐᕆᐊᖃᖅᖢᑎᒡᓗ ᓇᖕᒥᓂᖅ ᓴᐳᑎᓯᒪᓂᕐᒧᑦ ᐊᑐᖅᑕᐅᔪᓐᓴᖅᑐᓂᒃ.

ᑕᒪᕐᒥᒃ ᑮᓇᐅᔭᓕᐅᕋᓱᐊᙱᑦᑐᑦ ᑮᓇᐅᔭᓕᐅᕋᓱᐊᖅᑐᓪᓗ ᓇᖕᒥᓂᖃᕐᕖᑦ ᐊᐅᓚᑕᐅᔪᑦ ᒥᑦᑎᒪᑕᓕᖕᒥ ᒪᑐᔭᕆᐊᖃᖅᑐᐃᓐᓇᐅᕗᑦ, ᑭᓯᐊᓂ:

  • ᓂᐅᕕᕐᕖᑦ ᓂᕿᑖᕐᕖᑦ
  • ᐅᖅᓱᖅᑖᕕᒃ ᐊᒻᒪᓗ ᓄᓇᓯᐅᑎᓄᑦ ᓱᕋᒃᓯᒪᔪᓕᕆᕝᕖᑦ;
  • ᑎᑎᖅᑲᖅᑲᑯᕕᑦ
  • ᓂᕆᔭᖅᑐᕐᕖᑦ ᒪᑐᐃᙶᕐᓗᑎᒃ ᐊᐃᔭᐅᓂᐊᖅᑐᓄᑦ.

ᐃᓄᒋᐊᒃᑐᒃᑯᕕᓕᒫᑦ ᑭᒡᓕᖃᖅᑎᑕᐅᔪᐃᓐᓇᐅᓕᕐᓗᑎᒃ ᑕᓪᓕᒪᑦ ᐃᓄᐃᑦ ᑲᑎᑉᐸᓕᕐᓗᑎᒃ ᑐᖔᓂᓪᓘᓐᓃᑦ.

ᐃᓄᒋᐊᒃᑐᖃᖅᐸᒍᓐᓃᕐᓗᓂ ᐃᒡᓗᒋᔭᐅᔪᓂᒃ.

ᑕᒪᓐᓇ ᑎᓕᓯᔾᔪᑕᐅᓯᒪᔪᖅ ᖃᐅᔨᒋᐊᖅᑕᐅᕝᕕᐅᒃᑲᓐᓂᕈᓐᓇᖅᐳᖅᐅᕙᓂ:
https://gov.nu.ca/health/information/covid-19-novel-coronavirus

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᐱᒻᒪᕆᐊᓗᐃᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᑲᔪᓯᑎᑕᐅᓂᐊᖅᐳᑦ, ᐱᕙᒌᔭᖅᑐᖃᖅᖢᓂᓗ ᖃᐅᔨᒪᑦᑎᐊᕈᒪᓂᕐᒧᑦ ᐊᑐᕈᓐᓇᕐᓃᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᓲᕐᓗ, ᐅᖅᑰᓴᕐᓂᕐᒧᑦ, ᐆᒻᒪᖅᑯᑎᖃᕐᓂᕐᒧᑦ, ᐃᒪᖃᕐᓂᕐᒧᑦ, ᑭᓈᓗᐃᔭᖅᑕᐅᕙᖕᓂᕐᒧᑦ, ᑐᓴᐅᒪᑎᑦᑎᓂᕆᔭᐅᕙᒃᑐᓪᓗ ᓱᖁᓯᔾᔮᙱᓚᑦ.

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ, ᐃᓚᒋᔭᐅᓪᓗᓂ ᕼᐋᒻᓚᒋᔭᐅᔪᖅ, ᐱᕙᒌᔭᖅᓯᓯᒪᕗᑦ ᐃᒪᕐᒥᒃ ᐱᑖᕐᕕᐅᕙᓪᓕᐊᖃᑦᑕᕐᓂᐊᖅᑐᒥᒃ/ᒥᓪᓗᐊᕐᕕᐅᖃᑦᑕᕐᓂᐊᖅᓱᒥᒃ ᖃᐅᔨᒪᑦᑎᐊᕈᒪᓂᕐᒧᑦ ᓄᓇᓕᖕᒥᐅᑦ ᑲᔪᓰᓐᓇᖅᑐᒥᒃ ᐃᒪᖃᖅᑎᑕᐅᒐᓗᐊᕐᒪᖔᑕ

ᑕᒪᓐᓇ ᐊᑐᖅᑕᐅᓚᐅᑲᖕᓂᐊᖅᑐᖅ ᒥᓪᓗᐊᖅᓯᕝᕕᒃ ᐃᓚᖃᕐᓂᐊᖅᐳᖅ:

  • ᒥᓪᓗᐊᖅᓯᔾᔪᑎᒥᒃ ᓯᒡᔭᖓᓂ ᑖᔅᓱᒪ ᐃᒥᖅᑕᖅᑕᐅᕝᕕᐅᕙᒃᑑᑉ,
  • ᒥᓪᓗᐊᖅᓯᕙᓪᓕᐊᓂᐊᖅᑐᒥᒃ ᓱᓪᓗᓂᖕᒥᒃ ᐃᓕᓯᔪᖃᕐᓗᓂ ᐃᑰᑕᖅᑕᐅᓯᒪᔪᒧᑦ ᐊᖕᒪᔪᕐᒧᑦ ᓯᑯᒥ,
  • ᓱᓪᓗᓕᖕᒥᒃ ᑯᕕᑎᑦᑎᓂᐊᖅᑐᒥᒃ ᐃᒻᒥᖅᓱᐃᓗᓂ ᓄᓇᓯᐅᑎᐊᑉ ᐃᒪᕐᒥᒃ ᐅᓯᕝᕕᐊᓄᑦ,
  • ᐊᒡᒐᒃᑰᖅᑐᖃᕐᓗᓂ ᔮᕕᒃᓯᓕᖅᑕᐅᕙᒡᓗᓂ ᓄᓇᒥᐅᑎᐅᑉ ᐅᓯᕝᕕᐊᓄᑦ, ᐊᒻᒪᓗ,
  • ᑖᓐᓇ ᒥᓪᓗᐊᖅᑐᖅ ᐋᖅᑭᒃᑕᐅᓂᐊᖅᐳᖅ ᐊᑐᖅᑕᐅᓚᐅᑲᖕᓂᐊᖅᑐᒧᑦ ᖃᑦᑕᒧᑦ ᓇᒧᙵᕈᓘᔭᖅᑎᑦᑎᔪᒪᙱᓐᓂᕐᒧᑦ ᐅᖅᓴᒃᑕᐅᓕᕌᖓᑦ.
     

ᑕᒪᓐᓇ ᐋᖅᑭᒃᓯᒪᓕᕈᑕᐅᔪᖅ ᐊᐅᓚᑕᐅᔪᓐᓇᖅᐳᖅ ᕼᐋᒻᒪᓚᒃᑯᑦ ᐃᖅᑲᓇᐃᔭᖅᑎᖏᓐᓂᑦ. ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐱᓕᕆᐊᖃᓕᖅᐳᑦ ᐋᖅᑭᒃᓯᒪᔾᔪᑕᐅᙱᓐᓇᕐᓂᐊᓕᖅᑐᒥᒃ ᐊᑐᓕᖅᑎᑕᐅᓗᒥ ᐊᑐᓕᖅᑎᑕᐅᓗᓂᓗ ᐊᐅᔭᒥ ᑕᒪᑐᒪᓂ.

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐃᓕᓐᓂᐊᕐᕖᑦ ᒥᑦᑎᒪᑕᓕᖕᒥ ᒪᑐᔭᐅᓯᒪᕗᑦ ᓄᓇᓕᖕᒥᐅᓄᑦ, ᐃᓚᒋᔭᐅᓪᓗᑎᒃ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ, ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ ᐊᓯᐊᓂᒃ.

ᑐᓂᐅᖅᑲᐃᕙᖕᓂᖅ ᐃᓕᓐᓂᐊᖅᑏᑦ ᐃᓕᑦᑎᕙᓪᓕᐊᓂᕐᒧᑦ ᐊᑐᖃᑦᑕᕐᓂᐊᖅᑕᖏᓐᓂᒃ ᒥᑦᑎᒪᑕᓕᖕᒥ ᓄᖅᑲᖅᑎᑕᐅᕗᖅ ᐅᖃᐅᓯᐅᒃᑲᓐᓂᓚᐅᙱᓐᓂᖓᓂ.

ᑕᒪᕐᒥᑦᑎᐊ ᐃᓕᓐᓂᐊᕐᓂᓕᕆᓂᕐᒧᑦ ᐃᖅᑲᓇᐃᔭᖅᑏᑦ, ᐃᓚᒋᔭᐅᓪᓗᑎᒃ ᐃᓕᓐᓂᐊᕐᕕᖕᓂ ᐃᖅᑲᓇᐃᔭᖅᑏᑦ, ᐃᖅᑲᓇᐃᔭᕆᐊᖃᖅᑎᑕᐅᕗᑦ ᐊᖏᕐᕋᕆᔭᒥᓂ ᐊᔪᕐᓇᙱᑉᐸᑦ.

ᑕᒪᒃᑯᐊ ᐊᑐᖅᑕᐅᔪᒃᓴᐃᑦ ᓇᓗᙱᑦᑎᐊᕈᑕᐅᓂᐊᖅᐳᑦ ᖃᓄᐃᙱᑦᑎᐊᕐᓂᖏᓐᓄᑦ ᖁᐊᖅᓵᕐᓇᖅᑐᒦᙱᓐᓂᖏᓐᓂᒡᓗ ᒥᑦᑎᒪᑕᓕᖕᒥ ᐃᓕᓐᓂᐊᖅᑏᑦ, ᐃᓚᒌᑦ, ᐃᖅᑲᓇᐃᔭᖅᑏᓪᓗ.

ᐃᓕᓐᓂᐊᕐᓂᓕᕆᔨᒃᑯᑦ ᐃᑲᔪᖅᑐᐃᓂᐊᖅᐳᑦ ᐊᓯᖏᓐᓄᑦ ᓄᓇᕗᑦ ᒐᕙᒪᖓᑕ ᐱᓕᕆᕝᕕᖏᓐᓄᑦ ᑕᐃᒪᐃᑦᑕᕆᐊᖃᕌᖓᑕ.

ᐃᓄᓕᕆᔨᒃᑯᑦ

ᑕᒪᕐᒥᑦᑎᐊᖅ ᐃᓄᓕᕆᔨᒃᑯᑦ ᐱᓕᕆᐊᕆᕙᒃᑕᖏᑦ ᐱᔨᑦᑎᕋᕐᓂᕆᕙᒃᑕᖏᓪᓗ ᑲᔪᓯᑎᑕᐅᕗᑦ ᐅᖄᓚᐅᑎᒃᑯᑦ−ᑕᒪᕐᒥᑦᑎᐊᖅ ᐊᑐᓪᓚᕆᒃᑕᐅᔭᕆᐊᓖᑦ ᐱᔨᑦᑎᕋᕐᓃᑦ (ᓲᕐᓗ ᑐᐊᕕᕐᓇᖅᑐᒃᑯᑦ ᐱᔨᑦᑎᕋᕐᓂᕆᔭᐅᕙᒃᑐᑦ ᓄᑕᖅᑲᓄᑦ, ᒪᒃᑯᒃᑐᓄᑦ, ᐊᕐᓇᓄᑦ, ᐊᖏᕐᕋᖃᙱᑦᑐᓄᑦ, ᐃᓐᓇᕐᓄᓪᓗ ᑎᒥᒍᑦ ᐊᔪᕈᑎᖃᖅᑐᓄᑦ ᒪᓂᒪᕗᑦ 24/7) ᓱᓕ ᐊᑐᖅᑕᐅᔪᓐᓇᖃᑦᑕᖅᐳᑦ.  ᖃᐅᔨᒋᐊᕐᕕᒋᓗᒍ ᐅᓇ, 867-899-1886, 24/7.

ᐃᖅᑲᓇᐃᔭᖅᑐᓕᕆᔨᒃᑯᑦ

ᓄᓇᕗᑦ ᒐᕙᒪᖓᑕ ᐊᖏᕐᕋᕆᔭᐅᔪᓂ ᐃᖅᑲᓇᐃᔭᕐᓂᕐᒧᑦ ᐊᑐᖅᑕᐅᔪᓐᓇᖅᑐᖁᑎᖓᑦ ᐊᑐᓕᖅᑕᐅᓚᐅᖅᑐᖅ ᒫᑦᓯ 20-ᒥ, ᓄᓇᕗᑦ ᒐᕙᒪᖓᒃᑯᖏᓐᓄᑦ ᐃᖅᑲᓇᐃᔭᖅᑏᑦ ᒥᑦᑎᒪᑕᓕᖕᒥ ᐃᑲᔪᖅᑐᖅᑕᐅᖏᓐᓇᖅᐳᑦ ᐃᖅᑲᓇᐃᔭᖁᔭᐅᓪᓗᑎᒃ ᐊᖏᕐᕋᕆᔭᒥᓂ ᐊᔪᓐᓇᙱᓐᓂᓕᒫᖓ ᒪᓕᒡᓗᒍ.

ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᐃᓚᒌᓄᓪᓗ ᐃᑲᔪᖅᑕᐅᔪᓐᓇᕐᓂᖏᓐᓄᑦ ᐱᓕᕆᐊᖅ (EFAP) Hᐆᒻᕗᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᐃᓐᓇᐅᑎᑦᓯᔪᑦ ᐊᔾᔨᒌᖏᑦᑑᑎᓂᑦ ᑲᙳᓇᖅᑐᓂᑦ ᐱᔨᑦᓯᕋᕐᓂᕐᒧᑦ ᐃᖅᑲᓇᐃᔭᖅᑎᓂᑦ ᐃᓚᒌᖏᓐᓂᓪᓗ. ᐊᒥᓱᑦ ᑖᒃᑯᐊ ᑲᙳᓇᖅᑐᓂᑦ ᐱᔨᑦᓯᕋᕐᓂᕐᒧᑦ ᐃᑲᔪᖅᑐᐃᓂᕐᒥᑦ ᐃᓕᓐᓂᑦ, ᐊᓯᖏᓐᓂᑦ ᐃᖅᑲᓇᐃᔭᖅᑎᓂᑦ ᐃᓚᒌᓂᓪᓗ ᐱᔾᔪᑎᓄᑦ ᐊᐱᖅᑯᑎᓄᑦ ᓯᕘᕋᓂᖃᑐᐃᓐᓇᕆᐊᖃᕐᓂᕐᒥᓪᓗ ᓴᖅᑭᖅᓯᒪᔪᒥᑦ ᓄᕙᕐᔪᐊᕐᓇᕐᒧᑦ (COVID-19). ᐃᖅᑲᓇᐃᔭᖅᑏᑦ ᐃᓚᖏᓪᓗ ᐅᖄᓚᔪᓐᓇᖅᐳᑦ ᐅᕗᖓ 1-800-663-1142.

ᑭᓇᑐᐃᓐᓇᑦᑎᐊᖅ ᐃᓱᒪᒋᔭᖃᖅᑐᖅ ᐊᐴᑎᓯᒪᓯᒪᓂᕐᒥᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ ᐅᖃᐅᔾᔭᐅᕗᑦ ᐅᖄᓚᖁᔭᐅᓪᓗᑎᒃ ᓄᕙᒡᔪᐊᕐᓇᕐᒧᑦ−ᐅᖄᕝᕕᐅᔪᓐᓇᖅᑐᒥᒃ ᐅᕗᖓ, 1-888-975-8601−ᒧᑦ  10−ᓗ ᐅᓪᓛᒥᑦ  6−ᓗ ᐅᓐᓄᒃᓴᒧᑦ ᐊᑯᓐᓂᖏᓐᓂ, ᖃᐅᔨᑎᓪᓗᒋᓪᓗ ᓄᓇᓕᖕᒥᓂ ᐋᓐᓂᐊᕕᓕᐊᕐᕕᖕᒥᓂᒃ ᖃᐅᔨᑎᑲᐅᑎᒋᓗᒋᓪᓗ,  ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᓂᓗ ᐊᖏᕐᕋᖅᓯᒪᓗᓂᓗ 14−ᓄᑦ ᐅᓪᓗᓄᑦ.

ᐃᖅᑲᓇᐃᔭᖅᑏᑦ ᑐᓴᖅᑎᑦᑎᔭᕆᐊᖃᖅᐳᑦ ᐊᐅᓚᑦᑎᔨᒋᔭᒥᓂᒃ ᓇᖕᒥᓂᖅ ᐅᐸᒃᑕᐅᑦᑕᐃᓕᒪᑎᒃᑯᑎᒃ.

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᐱᔨᑦᑎᕈᑎᖏᑦ

ᓄᓇᓕᖕᓂ ᐊᐅᓚᓂᕆᔭᐅᔪᓄᑦ ᑎᑎᕋᕐᕕᒃ ᒥᑦᑎᒪᑕᓕᖕᒥ ᓱᓕ ᒪᑐᓯᒪᕗᖅ. ᖃᐅᔨᒋᐊᖅᑐᖃᕈᒪᒃᐸᑦ, ᐅᕗᖓ ᑎᑎᕋᖅᑐᖃᕐᓗᓂ CEDO@pondinlet.ca

ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᖏᑦ

ᐱᓕᕆᕝᕕᒋᔭᐅᔪᖅ ᓄᖅᑲᖅᑎᑦᑎᕗᖅ ᓂᐅᕕᖅᐸᖕᓂᕐᒥᓂᒃ ᕿᓯᖕᓂᒃ/ᐊᒥᕐᓂᒃ ᑕᐃᒪᐃᔾᔪᑎᖃᖅᖢᓂ ᑕᒪᓐᓇ ᓇᓗᓇᐃᖅᑕᐅᓪᓚᑦᑖᖅᑐᖃᕐᓂᖓᓂᒃ ᓄᕙᒡᔪᐊᕐᓇᖅ-19−ᒥᒃ ᒥᑦᑎᒪᑕᓕᖕᒥ. ᐊᕙᑎᓕᕆᔨᒃᑯᑦ ᑲᔪᒡᓯᓐᓇᕐᓂᐊᖅᐳᑦ ᓂᐅᕕᖃᑦᑕᕐᓂᕐᒥᒃ ᐊᒥᕐᓂᒃ/ᕿᓯᖕᓂᒃ ᐊᓯᖏᓐᓂ ᓄᓇᓕᖕᓂ.

ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ

ᓄᓇᓕᖕᓂ ᐃᒡᓗᓕᕆᔩᑦ ᑎᑎᕋᕐᕕᖓᑦ ᒥᑦᑎᒪᑕᓕᖕᒥ ᐱᑎᑦᑎᖃᑦᑕᐃᓐᓇᕐᓂᐊᖅᐳᖅ ᐅᑐᐊᕕᕐᓇᖅᑐᓄᑐᐊᖅ ᐱᔨᑦᑎᕋᕐᕕᖃᕐᓂᕐᒥᒃ ᑭᓯᐊᓂ. ᐃᒡᓗᓂᒃ ᐊᑐᖅᑐᐊᖅᑏᑦ ᐅᖄᓚᔪᓐᓇᖅᐳᑦ 1-867-899-1418−ᒧᑦ; 1 867-899-8910−ᒧᑦ ᑐᐊᕕᕐᓇᖅᑐᖁᑎᖃᕈᑎᒃ. ᓄᓇᓕᖕᓂ ᐃᒡᓗᓕᕆᔨᒃᑯᑦ ᑎᑎᕋᕐᕕᖓᑦ ᒥᑦᑎᒪᑕᓕᖕᒥ ᒪᑐᕗᖅ.

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐸᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.