ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 9, 2020

ᓄᕕᐱᕆ 09, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ

ᓯᕗᓕᖅᑎᐅᑉ ᑐᓴᒐᒃᓴᖏᑦ ᓄᑖᑦ

ᐅᓪᓛᒃᑯᑦ, ᒫᓐᓇ ᒪᕐᕉᖕᓂᒃ ᓇᓗᓇᐃᖅᑕᐅᔪᖃᖅᓯᒪᓕᖅᐳᖅ ᓄᕙᕐᔪᐊᕐᓇᖅ-19−ᖃᕐᓂᕋᖅᑕᐅᔫᖕᓂᒃ ᓴᓂᑭᓗᐊᕐᒥ. ᓄᓇᓕᖕᓂ ᓇᓗᓇᐃᖅᑕᐅᔪᖃᙱᑦᑐᖅ ᐊᐃᑦᑐᕐᓗᒃᑕᐅᔪᖃᕐᒪᖔᑦ ᑖᒃᑯᓇᙵᑦ ᒪᕐᕉᖕᓂᒃ ᓄᕙᕐᔪᐊᕐᓂᕋᖅᑕᐅᔫᖕᓂᒃ −ᐃᒡᓗᒥᐅᖃᑎᒌᒃ ᐊᐃᑦᑐᕐᓗᐃᖃᑦᑕᐅᑎᓇᓱᒋᔭᐅᕗᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 3834−ᖑᓕᖅᑐᑦ. 634 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᑐᐊᕕᕐᓇᖅᑐᓕᕆᔨᓂᑦ ᓴᓂᑭᓗᐊᕐᒧᐊᖅᑐᖃᓚᐅᖅᑐᖅ ᓯᕙᑖᕐᕕᖕᒥ ᐃᑲᔪᕆᐊᖅᑐᓂᒃ, ᐊᒻᒪ ᐃᑲᔫᑎᒃᓴᒃᑲᓐᓂᕐᓂᒃ ᐊᑐᐃᓐᓇᐅᑎᑦᑎᒃᑲᓐᓂᕈᒪᓪᓗᑎᒃ ᖃᓂᒋᔭᐅᔪᕕᓂᕐᓂᒃ ᖃᐅᔨᓴᖅᑎᓪᓗᒋᑦ ᖃᐅᔨᓴᕆᐊᖃᖅᐸᑕᓗ ᖃᐅᔨᓴᕐᓂᐊᖅᑐᓂᑦ.

ᐅᖃᖃᑦᑕᐃᓐᓇᓚᐅᕋᑦᑕ ᑕᐃᒪᐃᓐᓂᐊᕐᓂᖓᓂ ᓄᕙᕐᔪᐊᕐᓇᖅ-19 ᓄᓇᕗᒻᒧᐊᕋᓗᐊᖅᐸᑦ ᓄᓇᕗᒻᒧᐊᙱᒃᑲᓗᐊᖅᐸᓪᓘᓐᓃᑦ. ᒫᓐᓇ ᑕᕝᕙᓃᓕᖅᐳᒍᑦ, ᑕᐃᒪᐃᒻᒪᑦ ᖃᓄᖅᑑᕆᐊᖃᓕᖅᐳᒍᓪᓗ. ᖃᐅᔨᒪᒐᑦᑎᒍᑦ ᐋᓐᓂᐊᖅᑐᓕᕆᔨᒃᑯᑦ ᖃᓄᐃᓕᐅᕈᑎᒋᓯᒪᔭᖏᑦ ᒫᓐᓇᓗ ᓄᓇᕗᒻᒥᐅᑦ ᑖᒃᑯᓂᖓ ᐊᑐᑲᑕᒋᐊᖃᓕᖅᐳᑦ ᒪᓕᑦᑎᐊᕐᓗᒋᑦ.

ᑕᒪᑦᑕ ᖃᓄᐃᓕᐅᕆᐊᖃᖅᐳᒍᑦ ᐃᒃᐱᒋᑦᑎᐊᕐᓗᑎᒍᑦ ᓄᓇᖅᑲᑎᕗᑦ, ᐊᔪᙱᑕᑦᑎᓐᓂ ᐱᓕᕆᓗᑕ ᐊᑦᑕᕐᓇᖅᑕᐃᓕᒪᑎᑦᑎᓗᑕ ᐊᓯᑦᑎᓐᓂ.

ᐊᒡᒐᑎᑦ ᐅᐊᓴᒐᔪᒡᓗᒋᑦ. ᐃᓅᖃᑎᑎᑦ ᖃᓂᒋᓗᐊᖃᑦᑕᙱᓪᓗᒋᑦ ᐅᖓᓯᒋᖃᑦᑕᕐᓗᒋᓪᓗ − ᓂᐅᕕᕐᕕᖕᒥ, ᐃᖅᑲᓇᐃᔭᕐᕕᔅᓯᓐᓂ, ᑎᑎᖅᑲᒃᑯᕕᖕᒥ ᓇᓂᑐᐃᓐᓇᕐᓗ ᐃᓄᒋᐊᒃᑐᒃᑯᕕᖕᒥ. ᐊᓪᓕᕋᐃᑦ ᐊᒃᑐᖅᑕᐅᒐᔪᒃᑐᑦ ᐊᓪᓚᖅᑐᕋᔪᒡᓗᒋᑦ. ᖃᓂᒪᒍᕕᑦ ᐊᖏᕐᕋᖅᓯᒪᐃᓐᓇᕆᑦ.

ᐳᐃᒍᖅᑕᐃᓕᒋᑦᑎ ᖃᓄᐃᓕᐅᕐᓂᓯ ᑭᒃᑯᓕᒫᑦᑎᐊᑦ ᖃᓄᐃᙱᓐᓂᖏᓐᓂᒃ ᐊᒃᑐᐃᔪᓐᓇᕐᒪᑕ.
 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᖅᑎᑦᑎᔾᔪᑎᖏᑦ ᓄᑖᑦ

ᐅᓪᓛᒃᑯᑦ. ᐱᓇᓱᐊᕈᓯᐅᑉ ᓄᙳᐊᓂ ᐱᖃᑖᓂᒃ ᓄᕙᕐᔪᐊᕐᓇᖅ-19−ᓕᖕᒥᒃ ᓇᓗᓇᐃᖅᓯᓚᐅᖅᐳᒍᑦ ᓴᓂᑭᓗᐊᕐᒥ. ᐃᖃᓗᖕᓂ ᖃᐅᔨᓴᖅᑕᐅᓚᐅᖅᐳᖅ, ᖃᐅᔨᓴᕐᕕᒋᔭᕗᑦ ᐊᑐᓕᖅᑎᑕᐅᓚᐅᕐᒪᑦ ᖃᐅᔨᓴᖅᑕᐅᔾᔪᑎᖏᓐᓄᑦ ᓇᓗᓇᐃᖅᑕᐅᓂᐊᖅᑐᓄᑦ. ᑖᓐᓇ ᐱᖃᕐᓂᕋᖅᑕᐅᔪᖅ ᐃᒡᓗᒥᐅᖃᑎᒋᔭᐅᕗᖅ ᓯᕗᓪᓕᕐᒥ ᐱᖃᕐᓂᕋᖅᑕᐅᓚᐅᖅᑐᒧᑦ ᓄᓇᓕᖕᓂᓗ ᓇᓗᓇᐃᖅᑕᐅᔪᖃᙱᖦᖢᓂ ᐊᐃᑦᑐᕐᓗᒃᑕᐅᔪᖃᕐᒪᖔᑦ. ᐱᖃᑖ ᐱᖃᕐᓂᕋᖅᑕᐅᔪᖅ ᐃᓄᒃ ᖃᓂᒪᖅᑰᔨᙱᑉᐳᖅ ᖃᓄᐃᙱᖦᖢᓂᓗ.

ᐅᓪᓗᑐᐃᓐᓇᐅᑎᓪᓗᒍ, ᑐᐊᕕᕐᓇᖅᑐᓕᕆᔨᕗᑦ ᓴᓂᑭᓗᐊᕐᒧᑦ ᐊᐅᓪᓚᖅᑎᑦᑐᒪᓕᓚᐅᖅᐸᕗᑦ ᐃᖅᑲᓇᐃᔭᖅᑎᓂᒃ ᐃᑲᔪᕆᐊᕐᓗᑎᒃ. ᐊᑕᐅᓯᕐᒥᒃ ᐃᖢᐊᖅᓴᐃᔨᒥᒃ ᐊᒻᒪ ᖃᐅᔨᓴᖅᑎᒥᒃ ᐊᐅᓪᓚᖅᑎᑕᐅᔪᖃᓚᐅᖅᐳᖅ ᖃᓂᒋᔭᐅᓚᐅᖅᑐᓂᑦ ᖃᐅᔨᓴᖅᑎᓪᓗᒋᑦ ᐃᑲᔪᕆᐊᖅᑐᓂᑦ. ᐱᖓᔪᖓᑦ ᐃᖢᐊᖅᓴᐃᔨ ᐅᓪᓗᒥ ᓴᓂᑭᓗᐊᓕᐊᖅᑲᐅᕗᖅ. ᑐᐊᕕᕐᓇᖅᑐᓕᕆᔨᒃᑯᑦ ᐃᑲᔪᖅᑐᖅᑕᐅᒋᕗᑦ ᐅᖓᓯᒃᑐᒥᑦ ᖃᕆᓴᐅᔭᒃᑯᑦ ᐋᓐᓂᐊᖅᑐᓕᕆᔨᑦ ᐃᖢᐊᖅᓴᐃᔨᖏᓐᓂᒃ ᐃᓄᖕᓂᒃ ᐅᖃᓘᑎᒃᑯᑦ ᖃᐅᔨᒋᐊᑲᑕᒃᖢᑎᒃ.

ᖃᓂᒋᔭᐅᓚᐅᖅᑐᑦ ᖃᐅᔨᓴᖅᑕᐅᖏᓐᓇᕐᓂᐊᖅᐳᑦ ᖃᐅᔨᓴᒐᒃᓴᐃᓪᓗ ᖃᐅᑕᒫ ᐊᐅᓪᓚᖅᑎᑕᐅᕙᒡᓗᑎᒃ ᐃᖃᓗᖕᓄᑦ ᖃᐅᔨᓴᖅᑕᐅᓂᐊᖅᑐᑦ. ᒫᓐᓇᒧᑦ ᑎᑭᖦᖢᒍ, ᐅᓗᕆᐊᓇᖅᑐᒦᑦᑐᓕᒫᑦ ᖃᓂᒋᔭᐅᓚᐅᖅᑐᑦ ᓇᓗᓇᐃᖅᑕᐅᓯᒪᔪᑦ ᓄᓇᓕᖕᓃᑉᐳᑦ.

ᖃᐅᔨᒪᔪᖓ ᓯᕘᕋᓇᖅᑐᖃᕕᒡᔪᐊᕐᒪᑦ ᓇᓗᓇᖅᑐᒦᖦᖢᑎᒡᓗ ᒫᓐᓇ ᑭᓯᐊᓂ ᐱᓕᕆᖃᑎᒌᒡᓗᑕ ᐊᑲᐅᓛᖑᓂᐊᖅᐳᖅ. ᐋᓐᓂᐊᖅᑐᓕᕆᔨᒃᑯᓐᓂ ᐃᖢᐊᖅᓴᐃᔨᒧᑦ ᐅᖄᓚᕝᕕᐅᒍᕕᑦ, ᐅᖃᓘᑎ ᑭᐅᓂᐊᖅᐸᐃᑦ. ᐅᖃᐅᓯᐅᔪᑦ ᑕᖅᑲᒃᑯᓄᖓ ᐅᖃᐅᓯᐅᕈᓘᔭᔾᔮᙱᑦᑐᑦ. ᐋᓐᓂᐊᑲᑕᒃᑯᕕᑦ, ᐋᓐᓂᐊᕐᕕᖕᒧᑦ ᐅᖄᓚᑲᐅᑎᒋᔭᕆᐊᖃᓪᓚᕆᒃᐳᑎᑦ. ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᐱᓕᕆᖃᑎᒋᓗᒋᑦ ᖃᓂᒪᓐᓇᒥ ᐊᐃᑦᑐᕐᓗᐃᖃᑦᑕᐅᑎᙱᓐᓂᖅᓴᐅᓂᐊᖅᐳᒍᑦ.

ᓴᓇᑦᑕᐃᓕᒥ, ᐅᖃᐅᔾᔭᐅᓚᐅᖅᐳᒍᑦ ᒫᓂᑑᐸᒥ ᐋᓐᓂᐊᖅᑐᓕᕆᔨᖏᓐᓂᒃ ᓄᓇᕗᒻᒥᐅᑕᒥᑦ ᐋᓐᓂᐊᕐᕕᓕᐊᖅᑐᓄᑦ ᐃᓄᑐᐊᒃᑯᕕᖕᒦᑦᑐᒥᑦ ᐅᐃᓂᐹᖕᒥ ᓄᕙᕐᔪᐊᕐᓇᖅ-19−ᖃᕐᓂᕋᖅᑕᐅᔪᖃᕐᒪᑦ. ᐅᐃᓂᐹᖕᒥ ᓄᕙᕐᔪᐊᕐᓂᕋᖅᑕᐅᔪᖅ ᓴᓂᑭᓗᐊᕐᒥ ᓄᕙᕐᔪᐊᖅᑐᒧᑦ ᐊᒃᑐᐊᓂᖃᙱᑐᐃᓐᓇᕆᐊᓕᒃ.

ᑕᐃᓐᓇ ᐃᓄᒃ ᖃᓄᐃᙱᓐᓂᕋᖅᑕᐅᔪᖅ ᒪᓕᒃᑎᑕᐅᓪᓗᓂᓗ ᐃᓄᑐᐊᒃᑯᕕᖕᒦᑦᑐᑦ ᐱᓕᕆᔾᔪᓯᖏᓐᓂᒃ. ᖃᐅᔨᒋᐊᕈᑎᒃᓴᓪᓗᐊᑕᑦ ᐃᓄᖕᒧᑦ ᐊᐃᑦᑐᕐᓗᒃᑕᐅᓯᒪᓂᕋᖅᑕᐅᔪᒧᑦ ᐃᓄᑐᐊᒃᑯᕕᖕᒧᐊᓚᐅᙱᑎᓪᓗᒍ ᐅᒃᐱᕈᓱᒃᐳᒍᓪᓗ ᐃᓄᑐᐊᒃᑯᕕᖕᒦᖃᑕᐅᔪᑦ ᐊᐃᑦᑐᕐᓗᒃᑕᐅᓗᐊᔾᔮᕋᓱᒋᙱᖦᖢᒋᑦ. ᐊᐃᑦᑐᕐᓗᒃᑕᐅᓯᒪᔪᖅ ᐃᓄᑐᐊᒃᑯᕕᖕᒦᑉᐳᖅ ᐃᒡᓗᕈᓯᐊᓂᓗ ᒫᓐᓇᐅᔪᖅ ᐊᓂᔭᕆᐊᖃᙱᖦᖢᓂ.

ᑭᖑᓪᓕᖅᐹᒥ, ᐅᓂᒃᑳᓕᐊᒥᒃ ᐱᑎᑕᐅᓚᐅᕋᑦᑕ ᐋᓐᓂᐊᕐᕕᖕᒥ ᐃᖅᑲᓇᐃᔭᖅᑎᖓᓂᑦ ᐅᖃᐱᓗᒡᕕᐅᑲᑕᖕᓂᖓᓂᑦ ᐅᖃᐅᔾᔭᐅᑦᑎᐊᑲᑕᙱᖦᖢᓂᓗ ᐃᓚᖏᓐᓂ ᓄᓇᓕᖕᓂ ᓄᕙᕐᔪᐊᕐᓇᖅ-19−ᓕᖕᒥᑦ ᐅᖃᐅᓯᐅᔪᖃᓚᐅᖅᑎᓪᓗᒍ. ᑖᒃᑯᐊ ᐊᖑᑏᑦ ᐊᕐᓇᐃᓪᓗ ᖃᓪᓗᓈᓂᙶᖅᐳᑦ ᐱᒻᒪᕆᐊᓗᖕᒥᒃ ᐱᔨᑦᑎᕋᕆᐊᖅᑐᖅᖢᑎᒃ ᑲᒪᔨᐅᖃᑕᐅᔭᖅᑐᖅᖢᑎᒡᓗ ᓇᑭᑐᐃᓐᓇᖅ ᓄᓇᕗᒻᒥᐅᓂᑦ. ᒪᓕᒋᐊᖃᓪᓚᕆᒃᑐᑦ ᐋᖅᑭᒃᑕᐅᓯᒪᕗᑦ ᐋᓐᓂᐊᖅᑐᓕᕆᔨᑦ ᐊᑐᖁᔭᖏᑦ ᒪᓕᒃᑕᐅᑦᑎᐊᖁᓪᓗᒋᑦ.

ᑐᑭᓯᐅᒪᔪᒍᑦ ᐃᓄᐃᑦ ᐃᓱᒫᓘᒋᔭᐅᓂᖏᓐᓂᒃ ᐃᓄᑐᐊᒃᑯᕕᖕᒦᓚᐅᙱᖦᖢᑎᒃ ᓄᓇᕗᒻᒧᐊᖅᐸᒃᑐᑦ, ᑭᓯᐊᓂ ᐃᒪᐃᑦᑐᓐᓇᕐᒪᑦ ᐃᓄᖕᓂᑦ ᑕᒪᐅᙵᖅᑎᑦᑎᑲᐅᑦᑐᙱᒃᑯᑦᑕ ᐅᓗᕈᓂᐊᖅᑐᒦᑦᑐᖃᑐᐃᓐᓇᕆᐊᖃᕐᒪᑦ. ᐊᔪᙱᓐᓂᓕᒫᑦᑎᓐᓂ ᐱᓕᕆᓇᓱᖃᑦᑕᖅᑐᒍᑦ ᐅᓗᕆᐊᓇᖅᑐᒦᑦᑐᒥᒃ ᓄᓇᕗᒻᒧᐊᖅᑎᑦᑎᑦᑕᐃᓕᒪᓪᓗᑕ ᐃᖅᑲᓇᐃᔭᕆᐊᖃᓪᓚᕆᒃᑐᑦ ᐅᓄᓗᐊᙱᒻᒪᑕ.

ᖁᔭᓐᓇᒦᒃ.

 


ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖓᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐋᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᔨᑦᑎᕋᐅᑎᖏᑦ

ᑭᓯᐊᓂ ᑐᐊᕕᕐᓇᖅᐸᑦ, ᓴᓂᑭᓗᐊᒥᐅᑦ ᐋᓐᓂᐊᕐᕕᖕᒧᑦ ᐅᖄᓚᖅᑳᖃᑦᑕᖁᔭᕗᑦ ᐊᑐᕆᐊᖃᖅᑕᒥᓂᒃ ᐅᖃᐅᔾᔭᐅᓂᐊᕐᒪᑕ. ᑭᓇᑐᐃᓐᓇᑦᑎᐊᖅ ᐊᐱᖅᑯᑎᒃᓴᓕᒃ ᓄᕙᒡᔪᐊᕐᓇᖅ-19 ᒥᒃᓵᓄᑦ ᐊᐱᕆᔭᐅᕗᑦ ᐅᖄᓚᖁᔭᐅᓪᓗᑎᒃ ᐅᕗᖓ, 1-888-975-8601.
ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ) ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 7−ᒥ ᐱᒋᐊᖅᖢᓂ

 

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ)  
ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 7−ᒥ ᐱᒋᐊᖅᖢᓂ
ᐋᓐᓂᐊᕐᕕᓕᐊᖅᑐᑦ 417
ᑭᒃᑯᑐᐃᓐᓇᑦ 245
ᑲᑎᖦᖢᒋᑦ 662


ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐃᓄᑐᐊᒃᑯᕕᖕᒦᑦᑐᑦ
ᓄᕕᐱᕆ 7 0
ᓄᕕᐱᕆ 8 19
ᓄᕕᐱᕆ 9 78
ᓄᕕᐱᕆ 10 46
ᓄᕕᐱᕆ 11 59
ᑲᑎᖦᖢᒋᑦ 202

 

ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ

ᓄᕕᐱᕆ 9−ᒥ ᐱᒋᐊᖅᖢᒍ, 8480−ᓂᒃ ᑐᒃᓯᕋᖅᑐᖃᓚᐅᖅᐳᖅ, 3985−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.
 

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ # %
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ) 5646 66.6%
ᐊᖏᖅᑕᐅᙱᑦᑐᑦ 279 3.3%
ᐅᑕᖅᑭᔪᑦ 208 3.0%
ᐊᐅᓪᓚᕐᕕᐅᔪᓐᓇᕐᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ 2297 27.1%
ᑲᑎᖦᖢᒋᑦ 8480 100%

 


ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐃᓕᓐᓂᐊᕐᕕᓕᒫᑦ

  • ᒪᓕᒃᖢᒍ ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᖓᑦ, ᓴᓂᑭᓗᐊᖅ ᓱᓕ ᐊᑐᕆᐊᓕᒃ 4-ᒦᓐᓂᐊᖅᐳᑦ: ᓄᓇᓕᖕᓂ ᓯᐊᒻᒪᒃᐸᓪᓕᐊᑎᑕᐅᔪᖅ ᓄᕙᒡᔪᐊᕐᓇᖅ-19 ᑐᓴᖅᑎᑕᐅᒃᑲᓐᓂᓚᐅᙱᓐᓂᕐᒥᓂ.
  • ᐊᓯᖏᓐᓂᒃ ᓄᓇᓕᖕᓂ ᐃᓕᓐᓂᐊᕐᕕᖕᓂᓪᓘᓐᓃᑦ ᒫᓐᓇ ᐊᒃᑐᖅᑕᐅᓯᒪᔪᖃᙱᑦᑐᖅ. • ᐱᓕᕆᕝᕕᖓ ᐋᖅᑭᒃᓱᐃᕙᓪᓕᐊᓕᖅᐳᖅ ᐃᑭᐊᖅᑭᕕᒃᑰᕈᑎᓖᑦ ᖃᕆᓴᐅᔭᕋᓛᓂᑦ ᐃᓕᓐᓂᐊᖅᑎᓄᑦ ᐃᖅᑲᓇᐃᔭᖅᑎᓄᓪᓗ ᐊᑐᖅᑕᐅᓂᐊᖅᑐᓂᑦ ᐹᑦᓵᓕ ᐃᓕᓐᓂᐊᕐᕕᐊᓂ ᐃᓕᓐᓂᐊᕈᑎᒥᓂᒃ ᑲᔪᓯᖁᓪᓗᒋᑦ. • ᒫᓐᓇᐅᔪᖅ, ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑎᓪᓗ ᓄᐃᔭᒃ ᓄᑲᖅᖡᑦ ᐃᓕᓐᓂᐊᕐᕕᐊᓂ ᖃᕆᓴᐅᔭᒃᑰᕈᑎᓂᒃ ᐱᑎᑕᐅᔾᔮᙱᑦᑐᑦ, ᐱᓕᕆᕝᕕᒋᔭᐅᔪᖅ ᓱᓕ ᒫᓐᓇ ᐅᑕᖅᑭᖕᒪᑕ ᖃᕆᓴᐅᔭᒃᑰᕈᑎᓂᒃ ᑲᑉᐳᔾᔭᕆᐊᓕᖕᓂᑦ iPad−ᓄᑦ ᓈᒻᒪᒃᑐᓂᒃ. ᐱᓕᕆᕝᕕᒋᔭᐅᔪᖅ ᑖᒃᑯᓂᖓ ᑎᑭᑕᐅᒃᐸᑕ ᐋᖅᑭᒃᓱᐃᕌᓂᒃᐸᑕᓗ, ᓴᓂᑭᓗᐊᕐᒧᑦ ᓇᒃᓯᐅᔾᔭᐅᓂᐊᖅᐳᑦ. ᒫᓐᓇᓕ, ᓇᔫᑎᖏᓪᓗᑎᒃ ᐃᓕᓐᓂᐊᖅᑎᑕᐅᓂᐊᖅᑐᑦ ᓄᑲᒃᖡᑦ ᐃᓕᓐᓂᐊᕐᕕᐊᓂ ᐅᖃᓘᑎᒃᑯᑦ ᑐᑭᓯᒋᐊᖅᑎᑕᐅᑲᑕᖕᓂᐊᖅᐳᑦ ᐃᓕᓐᓂᐊᕈᑎᒃᓴᖏᓪᓗ ᑲᑎᖅᓱᖅᓯᒪᓗᑎᒃ. • ᓄᓇᕗᒻᒥ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᓕᒫᑦ, ᑕᐃᒃᑯᐊᓗ ᓴᓂᑭᓗᐊᕐᒦᑦᑐᑦ, ᐊᔪᕈᓐᓃᖅᓴᖅᑎᑕᐅᕌᓂᓚᐅᖅᐳᑦ ᐃᐊᑦᔅᐱ ᖃᕆᓴᐅᔭᒃᑯᑦ ᐃᓕᓐᓂᐊᕈᑎᒃᓴᒥᒃ. ᐱᓕᕆᕝᕕᐅᔪᖅ ᑐᕌᒐᖃᖅᐳᑦ ᐃᐊᑦᔅᐱ−ᒥᑦ ᓇᓕᖅᑲᓕᐅᕈᑎᖃᓕᖁᓪᓗᒋᑦ ᓴᓂᑭᓗᐊᕐᒥᐅᑦ ᐃᖅᑲᓇᐃᔭᖅᑎᖏᑦ ᐋᖅᑭᒃᑕᐅᓗᑎᒃ ᐱᓇᓱᐊᕈᓯᐅᑉ ᕿᑎᐊᓂ, ᐊᒻᒪᐃᓛᒃ ᐃᓕᓴᐃᔩᑦ ᐃᓕᓐᓂᐊᖅᑎᖏᓐᓂᒃ ᐃᐊᑦᔅᐱᒧᑦ ᐃᓚᐅᖁᔨᓕᕐᓂᐊᖅᖢᑎᒃ. • ᐊᑦᑕᕐᓇᖅᑕᐃᓕᒪᓂᕐᒧᑦ ᒪᓕᒃᑕᐅᔭᕆᐊᓖᑦ ᖃᕆᓴᐅᔭᓕᕆᔾᔪᑎᑦ ᐃᓕᓐᓂᐊᕈᑎᒃᓴᐃᓪᓗ ᑐᓂᐅᖅᑲᐅᑕᐅᓕᖅᐸᑕ ᐃᓕᓐᓂᐊᕐᕕᖕᓄᑦ ᓇᒃᓯᐅᔾᔭᐅᓛᕆᕗᑦ. • ᓴᓂᑭᓗᐊᕐᒥ ᐃᓕᓐᓂᐊᕐᕖᑦ ᓴᓗᒻᒪᖅᓴᐃᔾᔪᑎᒃᓴᒃᑲᓐᓂᕐᓂᑦ ᐱᑎᑕᐅᒃᑲᓐᓂᓚᐅᖅᐳᑦ ᐅᑐᐱᕆᐅᑎᓪᓗᒍ, ᐊᒻᒪ ᐃᓄᖕᒧᑦ ᓴᐳᒻᒥᔾᔪᑎᒃᑲᓐᓃᑦ ᓴᓂᑭᓗᐊᕐᒧᑦ ᓇᒃᓯᐅᔾᔭᐅᓛᕆᕗᑦ ᐃᑲᔪᖅᑐᐃᓗᑎᒃ ᖃᕆᓴᐅᔭᓕᕆᔾᔪᑎᑦ ᐊᒻᒪ ᐃᓕᓐᓂᐊᕈᑎᒃᓴᑦ ᑲᑎᖅᓱᖅᓯᒪᔪᑦ ᑐᓂᐅᖅᑲᐅᑕᐅᓕᖅᐸᑕ.
  • ᑕᑯᔪᒪᒍᕕᑦ ᖃᓄᖅ ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᖅᑎᓂᒃ ᓴᐳᔾᔨᓯᒪᖃᑦᑕᕐᒪᖔᑕ, ᑕᑯᒋᐊᕐᓗᒍ: gov.nu.ca/education.

 

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ

ᑐᒃᓯᕋᐅᑎᑦ ᐅᑭᐅᖅᑕᖅᑐᒧᐊᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ ᐊᐅᓪᓚᕈᒪᔪᓄᑦ ᐃᒡᓗᓕᐅᕆᐊᖅᑐᖅᑐᓄᑦ ᐱᓕᕆᐊᒃᓴᓄᑦ, ᐃᕐᙲᓐᓈᖅᑕᐅᒃᑯᑦ ᓇᓂᔭᐅᔪᓐᓇᖅᐳᖅ ᐅᕙᙵᑦ, CPHOconstructionrequests@gov.nu.ca

ᐃᒡᓗᓕᐅᖅᑏᑦ ᐊᓂᒍᐃᔪᑦ ᐃᓄᑐᐊᒃᑯᕕᖕᒥ ᒫᓐᓇᒧᑦ ᑎᑭᖦᖢᒍ: 2086

 

ᓄᓇᕗᒻᒥᐅᓂ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᖃᖅᐳᒍᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.