ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 25, 2020

ᓄᕕᐱᕆ 25, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᑐᓴᒐᒃᓴᑦ - ᓄᕕᐱᕆ 25, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᐅᓪᓗᒥ, ᓄᓇᕗᒻᒥ ᖁᓕᓂᒃ ᐊᑕᐅᓯᕐᒥᒡᓗ (11) ᓄᕙᒡᔪᐊᕐᓇᖅ-19−ᑖᖅᑐᖃᖅᓯᒪᓕᕐᒥᔪᖅ. 8−ᑲᓐᓂᕐᓂᒃ ᐱᑖᖅᑐᖃᒃᑲᓐᓂᖅᓯᒪᕗᖅ ᐊᕐᕕᐊᕐᒥ ᐱᖓᓱᓂᒡᓗ ᓄᑖᓂᒃ ᑎᑭᕋᕐᔪᐊᕐᒥ.

ᓄᓇᕗᒻᒥ ᒫᓐᓇ ᑲᑎᖦᖢᒋᑦ 153−ᖑᓕᖅᑐᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒃᑐᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 4712−ᖑᓕᖅᑐᑦ. 813 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᐱᓇᓱᐊᕈᓯᕐᒥᒃ ᐊᑕᐅᓯᕐᒥᒃ ᐊᑐᓕᖅᐳᒍᑦ ᓴᙱᓂᖅᓴᓂᒃ ᑭᒃᑯᑐᐃᓐᓇᓂᒃ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐊᑐᖅᑕᑦᑎᓐᓂᒃ. ᐃᓛᓐᓂᒃᑯᑦ ᐃᒪᓐᓇᐅᖅᑰᔨᖃᑦᑕᕐᓂᐊᖅᐳᖅ, ᓲᕐᓗ ᓱᓐᓂᐅᑎᙱᓪᓗᑎᑦ, ᑭᓯᐊᓂᓕ ᐅᖃᐅᑎᑦᑎᐅᕈᓐᓇᖅᐸᒋᑦ, ᑕᒪᕐᒥᑦᑎᐊᖅ ᐱᓇᔪᒃᑕᓕᒫᑎᑦ ᐊᒃᓱᕈᖅᖢᑎᓪᓗ ᐱᓕᕆᐊᕆᖃᑦᑕᖅᑕᑎᑦ ᐃᑲᔪᕐᓂᖃᕐᒪᑕ.

ᑭᒃᑯᓕᒫᑦᑎᐊᖅ ᓴᙲᓐᓇᖁᕙᕗᑦ ᐃᓱᒪᒃᓴᖅᓯᐅᑦᑎᐅᒻᒪᕆᒡᓗᑎᒡᓗ. ᑕᒪᓐᓇ ᐊᑯᓂᐊᓗᒃ ᐊᑐᕐᓂᐊᖅᑕᕗᑦ ᑕᒪᕐᒥᑦᑎᐊᕐᓗ ᐊᑐᓂᑦ ᐃᓄᐃᑦ ᐱᓕᕆᓗᑎᒃ ᐅᓇᑖᕆᔭᖃᕐᓂᕐᒥᒃ ᓄᕙᒡᔪᐊᕐᓇᖅ-19−ᒥᒃ ᓄᓇᕗᒻᒥ.

ᑕᒪᐃᓐᓄᑦ ᐃᓄᖕᓄᑦ ᐊᖏᕐᕋᖅᓯᒪᔪᓄᑦ ᐳᓛᕆᐊᖃᑦᑕᙱᖔᖅᖢᑎᒃ; ᖁᔭᓐᓇᒦᒃ. ᑕᒪᐃᓐᓄᑦ ᐊᖓᔪᖅᑳᓄᑦ ᐊᖏᕐᕋᒥᓂ ᐃᖅᑲᓇᐃᔭᖅᑐᓄᑦ ᐊᑕᐅᑦᑎᒃᑰᖃᑎᖃᖅᖢᑎᒡᓗ ᐅᐸᒃᓯᒪᙱᒃᑲᓗᐊᕐᓗᒍ ᐃᓕᑎᑦᑎᕙᓪᓕᐊᓂᕐᒥᒃ ᕿᑐᕐᙵᒥᓂᒃ; ᖁᔭᓐᓇᒦᒃ. ᑕᒪᐃᓐᓄᑦ ᐊᑐᖅᑕᐅᓪᓚᕆᒋᐊᖃᖅᑐᓄᑦ ᐃᖅᑲᓇᐃᔭᖅᑎᓄᑦ, ᐃᖅᑲᓇᐃᔭᕆᐊᖃᑦᑕᖅᑐᓄᑦ ᐱᒻᒪᕆᐊᓗᖕᓂᓗ ᐱᔨᑦᑎᕋᕐᓂᕆᕙᒃᑕᔅᓯᓐᓄᑦ; ᖁᔭᓐᓇᒦᒃ. ᑕᒪᐃᓐᓄᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒐᕙᒪᒃᑯᓐᓄᓪᓗ ᐃᖅᑲᓇᐃᔭᖅᑎᓄᑦ, ᐱᓕᕆᓯᒋᐊᖅᑳᖃᑦᑕᕋᓗᐊᕈᔅᓯ, ᖃᐅᔨᔭᐅᙱᒃᑲᓗᐊᕐᓗᓯᓘᓐᓃᑦ ᐱᓕᕆᕙᒃᑐᓯᒍᑦ; ᖁᔭᓐᓇᒦᒃ. ᑕᒪᔅᓯᓐᓄᑦᑎᐊᖅ ᐊᑐᓂᑦ, ᐱᓇᔪᒃᑐᓯᒍᑦ ᐃᑕᔪᕈᒪᓪᓗᓯ ᓄᓇᓕᔅᓯᓐᓂᒃ; ᖁᔭᓐᓇᒦᒃ.

ᖃᐅᔨᒪᑦᑎᐊᖅᐳᖓ ᑕᒪᓐᓇ ᖃᓂᒪᓐᓇ ᓄᒫᓱᖕᓇᕐᒪᑦ ᑕᖃᓇᖅᖢᓂᓗ. ᑭᓯᐊᓂᓕ ᖃᐅᔨᒪᔪᖓ ᐱᓕᕆᐊᕆᔪᓐᓇᖅᑕᕗᑦ. ᖃᐅᔨᒪᔪᖓ ᐊᔪᙱᓐᓇᑦᑕ.

ᖃᓄᐃᙱᑦᑎᐊᕆᔅᓯ. ᐊᑦᑕᕐᓇᖅᑐᒦᑦᑕᐃᓕᒋᑦ. ᐊᖏᕐᕋᖅᓯᒪᒋᑦ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᖅᑎᑦᑎᔾᔪᑎᖏᑦ: 

ᐅᓪᓛᒃᑯᑦ. ᐅᓪᓗᒥ, ᐅᖃᐅᓯᖃᒃᑲᓐᓂᐊᕐᔪᒍᒪᕗᖓ ᖃᐅᔨᓴᕐᓂᕆᔭᐅᖃᑦᑕᖅᑐᒥᒃ. ᖃᐅᔨᓴᖅᓯᓂᖅ ᖃᓄᐃᑦᑐᓐᓃᖅᑎᑦᑎᓯᑲᐅᑎᒋᕙᙱᓚᖅ, ᐊᑐᑦᑎᐊᕈᓐᓇᙱᖦᖢᓂᓗ ᐃᓄᑑᓗᓂ. ᐊᐳᐊᖃᑦᑕᐅᑎᓚᐅᖅᑐᓂᒃ ᑐᔾᔭᖅᓯᓂᖅ, ᐃᓄᑑᑎᑦᑎᓂᖅ/ᐅᐸᒃᑕᐅᑦᑕᐃᓕᒪᑎᑦᑎᓂᖅ, ᐊᑐᕐᓂᖅ ᑎᒥᒃᑯᑦ ᐅᖓᓯᒃᓴᕆᐊᖃᕐᓂᕐᒥᒃ, ᒪᓕᖕᓂᕐᓗ ᐋᓐᓂᐊᖅᑕᐃᓕᒪᔪᓕᕆᓂᕐᒥᒃ ᑭᒃᑯᑐᐃᓐᓇᕐᓄᑦ ᐊᔪᓕᖅᑎᑕᐅᔾᔪᑎᓂᒃ ᐊᑕᐅᑦᑎᒃᑯᑦ ᐱᓕᕆᖃᑎᒌᒃᐳᑦ ᓇᒧᙵᕈᓘᔭᖅᑎᑦᑎᔪᒪᙱᖦᖢᑎᒃ ᓄᖅᑲᖅᑎᑦᑎᔪᒪᓪᓗᑎᒡᓗ ᓯᐊᒻᒪᒃᐸᓪᓕᐊᓇᔭᕐᓂᖓᓂᒃ ᓄᕙᒡᔪᐊᕐᓇᖅ-19.

ᑭᓇᑐᐃᓐᓇᖅ ᓄᕙᒡᔪᐊᕐᓇᖅ-19−ᒥᒃ ᓵᑦᑎᐊᕐᒥᐊᑕᖃᕐᓂᕈᓂ, ᑕᒪᓐᓇ ᖃᓕᒪᓐᓇ ᐱᒋᐊᖅᐸᒃᐳᖅ ᐃᒪᓐᓇ ᖃᐅᔨᒪᔭᐅᔪᒥᒃ, ᐆᒻᒪᕈᕋᓱᖕᓂᖓᓂ, ᑕᒪᓐᓇ ᐃᒪᓐᓇ ᑐᑭᖃᖅᖢᓂ, ᐱᕈᖅᐸᓪᓕᐊᓕᕐᓂᖓᓂᒃ ᑎᒥᖕᓂ. ᓯᕗᓪᓕᕐᓂ ᐅᓪᓗᓂ ᑕᒪᓐᓇ ᐱᕈᖅᐸᓪᓕᐊᕝᕕᒋᔭᒥᓂ, ᑖᓐᓇ ᖃᓂᒪᓐᓇᖅ ᖃᐅᔨᔭᕐᓂᙱᑦᑐᒻᒪᕆᐅᕗᖅ. ᑕᒪᒃᑯᐊ ᓯᕗᓪᓖᑦ ᐅᓪᓗᐃᑦ ᐊᑐᖅᑎᓪᓗᒋᑦ ᓵᑦᑎᐊᕐᒥᐊᑕᖄᓪᓚᓚᐅᕐᓗᓂ ᑕᒪᑐᒥᖓ ᖃᓂᒪᓐᓇᒥᒃ, ᐊᒥᓲᓂᑦ ᖃᐅᔨᓴᖅᑕᐅᔪᑦ ᓱᓕᙱᓪᓗᑎᒃ ᐱᖃᙱᓐᓂᕋᐃᓂᐊᖅᐳᑦ. 

ᖃᐅᔨᒪᙱᓪᓗᑕ ᑕᒪᕐᒥᑦᑎᐊᖅ ᐃᓄᐃᑦ ᖃᐅᔨᓴᖅᑕᕗᑦ ᓵᑦᑎᐊᕐᒥᐅᑕᖃᓚᐅᕐᓂᖏᓐᓂᒃ ᖃᓂᒪᓐᓇᒥᒃ, ᖃᐅᔨᓴᕆᐊᖃᕋᔭᖅᐳᒍᑦ ᑭᒃᑯᓕᒫᑦᑎᐊᓂᒃ ᐊᒥᓱᐃᖅᓱᒻᒪᕆᒡᓗᑕ ᖃᔅᓯᑲᓪᓚᖕᓄᑦ ᐅᓪᓗᓄᑦ. ᑕᐃᒪᐃᓕᐅᕈᑦᑕ, ᐊᑐᕐᓂᐊᖅᐳᒍᑦ ᐊᓐᓂᕐᓇᖅᑐᓂᒃ ᐊᑐᖅᑕᐅᔪᒃᓴᓂᒃ ᖃᐅᔨᓴᕈᑕᐅᕙᒃᑐᓂᒡᓗ, ᑲᔪᓯᓂᖃᑦᑎᐊᙱᓪᓗᑕᓗ. ᓱᓕᙱᑦᑐᑦ ᐱᖃᙱᓐᓂᕋᐃᔪᑦ ᐃᓚᒋᕙᐅᒃ ᐱᔾᔪᑕᐅᔪᑦ ᖃᓄᐃᒻᒪᑦ ᐊᒥᓱᒻᒪᕆᐊᓗᖕᓂᒃ ᖃᐅᓯᓴᖅᓯᕙᖕᓂᖅ ᐱᐅᓛᖑᙱᓐᓂᖓᓂᒃ ᖃᓄᐃᓕᐅᖅᑕᐅᓇᔭᕐᓗᓂ ᐱᓇᔪᒃᑕᑦᑎᓐᓂ ᖃᐅᔨᓇᓱᕐᖢᑕ ᑐᔾᔭᖅᓯᓇᓱᒃᖢᑕᓗ ᓇᒧᙵᕈᓘᔭᓕᕐᓂᖓᓂᒃ.

ᐊᑕᐅᓯᖅ ᐅᓪᓗᖅ ᐊᓂᒍᐊᓪᓚᓚᐅᖅᑎᓪᓗᒍ ᓵᑦᑎᐊᒥᐅᑕᖃᓚᐅᖅᖢᓂ ᓄᕙᒡᔪᐊᖕᒧᑦ, ᖃᐅᔨᓴᖅᑕᐅᓂᖅ ᐃᒪᐃᙱᓐᓇᐅᔭᑲᓴᑦᑎᐊᖅᐳᖅ, ᐱᖃᙱᓐᓂᕋᐃᓪᓗᓂ. ᑕᒪᓐᓇ ᖃᐅᔨᓴᖅᓯᓂᕐᒧᑦ ᐊᑐᖅᑕᐅᑦᑎᐊᕈᓐᓇᖕᓂᖓ ᐱᐅᓯᕙᓪᓕᐊᖑᔭᖅᑎᓪᓗᒍ ᐅᓪᓗᐃᑦ ᐊᓂᒍᖅᐸᓪᓕᐊᓂᖏᓐᓂ, ᑕᒪᓐᓇ ᖃᐅᔨᓴᖅᓯᓂᖅ ᐃᓇᖏᖅᓯᔪᓐᓇᙱᓚᖅ ᐅᐸᒃᑕᐅᑦᑕᐅᓕᒪᑎᑦᑎᓂᕐᒥᒃ. ᐊᒻᒪᑦᑕᐅᖅ ᓱᓕ, ᖃᐅᔨᒪᔭᕆᐊᖃᕋᔭᖅᐳᒍᑦ ᖃᖓᓪᓚᑦᑖᒃᑯᒻᒪᕆᒃ ᓵᑦᑎᐊᕐᒥᐅᑕᖃᓚᐅᕐᒪᖔᑕ ᐃᓄᐃᑦ ᖃᐅᔨᓴᕐᓯᕝᕕᒋᔭᕗᑦ, ᖃᐅᔨᒪᑦᑎᐊᕈᒪᒧᑦ ᖃᐅᔨᓴᕋᓗᐊᕐᒪᖔᑦᑎᒍ ᐅᓪᓗᐊᓂᑦ 7−ᖓᓂᑦ ᐅᖓᑖᓂᓪᓘᓐᓃᑦ.

ᖃᐅᔨᓴᖅᓯᓂᖅ ᐱᐅᔪᓪᓚᕆᑯᓘᔪᓐᓇᙱᒻᒪᑦ, ᑕᐃᒪᐃᓐᓂᖓᓄᓪᓗ ᑲᑎᓯᒪᑎᑦᑎᓂᖅ ᖃᐅᔨᓴᖅᓯᓂᕐᒥᒃ ᐊᐴᑎᔭᐅᓯᒪᓚᐅᖅᑐᓂᒃ ᑐᔾᔭᖅᓯᓂᖅ ᐅᐸᒃᑕᐅᑦᑕᐃᓂᒪᑎᑦᑎᓂᕐᓗ ᐱᐅᓛᖑᕗᑦ ᑲᔪᓯᓂᖃᑦᑎᐊᓛᖑᔪᓐᓇᖅᖢᓂ ᓇᒧᙵᕈᓘᔭᑎᔾᔮᙱᓪᓗᒍ ᓇᒧᙵᕈᓘᔭᓕᕐᓂᖓ, ᓄᖅᑲᖅᑎᑦᑐᒪᓗᒍᓗ ᓇᒧᙵᖅᐸᓪᓕᐊᓂᖓ ᑕᑐᒪ ᖃᓕᒪᓐᓇᐅᑉ. 

ᐊᐳᑎᓯᒪᖃᑎᖃᓚᐅᕐᓂᕐᒧᑦ ᑐᔾᔭᖅᓯᔩᑦ ᐊᔪᕈᓐᓃᖅᓴᖅᑎᑕᐅᓯᒪᕗᑦ ᐋᖅᑭᒃᓯᒪᓕᖅᑎᑦᑎᔪᓐᓇᕐᓂᕐᒥᒃ ᑭᒃᑯᑦ ᐱᐅᓛᖑᓇᔭᕐᒪᖔᑕ ᖃᐅᔨᓴᕐᕕᒋᓂᐊᕐᓗᒋᑦ, ᖃᖓᒃᑯᓪᓗ ᑕᒪᓐᓇ ᖃᐅᔨᓴᖅᓯᓂᖅ ᐊᑐᕐᓂᖃᑦᑎᐊᓛᖑᔪᓐᓇᕋᔭᕐᒪᖔᑦ. ᐅᖃᐅᓯᖃᒃᑲᓐᓂᑦᑎᐊᕈᒪᕗᖓ ᐅᓇ ᐅᖃᐅᓯᖅ, ᐊᐴᑎᖃᑦᑕᐅᑎᔪᕕᓂᓄᑦ ᑐᔾᔭᖅᓯᔨ, ᓄᑖᖑᑐᐃᓐᓇᕆᐊᖃᕋᓗᐊᖅᑎᓪᓗᒍ ᑭᒃᑯᑐᐃᓐᓇᓄᑦ ᐊᒥᓱᓄᑦ, ᑕᒪᓐᓇ ᓄᑖᙳᙱᓚ ᐊᑐᖅᑕᐅᒃᑐᑐᖃᐅᓪᓗᓂ ᐋᓐᓂᐊᖃᖕᓇᙱᑦᑐᓕᕆᓂᕐᒧᑦ ᐱᓕᕆᓂᐅᕙᒃᑐᓂ. ᐊᑐᖃᑦᑕᖅᓯᒪᕗᒍᑦ .ᐊᐴᑎᖃᑦᑕᐅᑎᓂᕐᒧᑦ ᑐᔾᔭᖅᓯᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᐊᕐᕌᒍᒐᓴᖕᓄᑦ ᐃᑲᔪᕈᒪᓂᕐᒧᑦ ᑭᐅᓯᓂᕐᒥᒃ ᐊᐃᑦᑐᕐᓘᑕᐅᔪᓄᑦ ᐊᔾᔨᒌᙱᓐᓂᓕᖕᓄᑦ ᓲᕐᓗ, ᐳᕙᒡᓗᖕᓇᕐᒥᑦ ᓄᓕᐊᕐᓂᒃᑯᓪᓗ ᐊᐃᑦᑐᕐᓘᑕᐅᕙᒃᑐᓄᑦ ᐋᓐᓂᐊᕆᔭᐅᓕᖅᐸᒃᑐᓄᑦ. ᐋᓐᓂᐊᖃᖕᓇᙱᑦᑐᓕᕆᓂᕐᒧᑦ ᐱᓕᕆᖃᑎᒌᒃᑎᑕᕗᑦ ᐊᔪᙱᓐᓂᓕᒻᒪᕆᐅᕗᑦ ᐊᒃᓱᕈᖅᖢᑎᒡᓗ ᐱᓕᕆᓪᓗᑎᒃ ᐃᑲᔪᕈᒪᓪᓗᑎᒃ ᓄᖅᑲᖅᑎᑦᑎᓂᕐᒥᒃ ᓇᒧᙵᕈᓘᔭᖅᐸᓪᓕᐊᓂᖓᑕ ᑕᒪᑐᒪ ᖃᓂᒪᓐᓇᐅᑉ.

ᑭᖑᓪᓕᕐᒥᒃ, ᐱᕕᖃᕐᓂᓐᓂ ᖁᔭᓕᔪᒪᕙᒃᑲ ᑕᒪᕐᒥᑦᑎᐊᖅ ᐊᑐᖅᑕᐅᓪᓚᕆᒋᐊᖃᖅᐸᒃᑐᑦ ᐃᖅᑲᓇᐃᔭᖅᑏᑦ, ᓇᓗᙱᑦᑎᐊᕋᓱᐃᓐᓇᖅᑐᑦ ᐱᔨᑦᑎᕋᖅᑕᐅᓃᑦ ᓄᓇᑦᑎᓐᓂ ᑲᔪᓰᓐᓇᕋᓗᐊᕐᒫᖔᑕ, ᐱᓗᐊᙳᐊᖅᖢᓂ ᓄᓇᓕᖕᓂ ᑕᐃᒃᑯᓇᓂ ᐊᒃᑐᖅᑕᐅᓯᒪᔪᓂ ᓄᕙᒡᔪᐊᕐᓇᖅ-19−ᒧᑦ. ᐅᖃᐅᑎᑦᑎᐊᒃᑲᓐᓂᕈᒪᒃᑲᓐᓂᕆᕙᔅᓯᑦᑕᐅᖅ ᐃᒪᓐᓇ ᐅᖃᕐᓗᖓ, ᑕᐃᒃᑯᐊ ᐊᑐᕆᐊᓖᑦ ᐅᔾᔨᖅᓱᕐᓂᕐᒧᑦ ᐊᑐᕈᕕᒋᑦ − ᒪᑐᐊᖅᓯᒪᖃᑦᑕᕈᕕᑦ, ᐊᑐᖃᑦᑕᕈᕕᑦ ᑎᒥᒃᑯᑦ ᐅᖓᓯᒃᓴᕐᓂᕐᒥᒃ ᐊᔪᕐᓇᙱᑐᐊᕌᖓᑦ, ᑕᐃᒪᓕ ᐊᑐᖅᐳᑎᑦ ᐊᑐᖅᑕᐅᔭᕆᐊᓕᓂᒃ ᒥᑭᒡᓕᒋᐊᖅᑎᑦᑎᓂᐊᕐᓗᓂ ᐃᓕᖕᓄᑦ, ᐃᓚᖕᓄᑦ ᓄᓇᓕᖕᓄᓪᓗ ᖁᐊᖅᓴᕐᓇᖅᑐᒥᒃ.

ᖁᔭᓐᓇᒦᒃ.

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus

ᐅᓪᓗᒥᒧᑦ ᐊᖑᒻᒪᑎᓛᓂᒃ ᑐᓴᖅᑕᐅᔪᒃᓴᓂᒃ ᒫᓐᓇᒧᑦ ᑭᒃᑯᑐᐃᓐᓇᓄᑦ ᖃᓄᐃᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ: https://www.gov.nu.ca/health/information/nunavuts-path

ᓄᕙᒡᔪᐊᕐᓇᖅ-19−ᖃᖅᑐᑦ ᓄᓇᓖᑦ ᒪᓕᒡᓗᒋᑦ: ᓄᕕᐱᕆ 25

ᓄᓇᓕᒃ ᐃᑉᐸᒃᓴᖅ ᓇᓗᓇᐃᖅᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ    ᐅᓪᓗᒥ ᓇᓗᓇᐃᖅᑕᐅᔪᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ ᐊᓯᔾᔨᕐᓂᕆᔭᖓ ᐱᑕᖃᓪᓚᑦᑖᕐᓂᕋᖅᑕᐅᓯᒪᔪᓂᑦ ᓈᓴᖅᑕᐅᓯᒪᓂᖏᑕ (+/-) ᐃᑉᐸᒃᓴᖓᓂᑦ
ᐊᕐᕕᐊᑦ 107 115 8
ᑎᑭᕋᕐᔪᐊᖅ 16 19 3
ᑲᖏᖅᖠᓂᖅ 19 19 0
ᓴᓂᑭᓗᐊᖅ  2 2 0
ᑲᑎᖦᖢᒋᑦ  144 155 11

ᖃᐅᔨᓴᖅᓯᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᐅᓪᓗᒥᒧᑦ ᑎᑭᖦᖢᒍ: ᓄᕕᐱᕆ 25

ᓄᓇᓕᒃ ᖃᐅᔨᓴᖅᑕᐅᒐᒥ ᐱᖃᓪᓚᕆᖕᓂᕋᖅᑕᐅᕗᖅ ᖃᐅᔨᓴᖅᑕᐅᒐᒥ ᐱᖃᙱᓐᓂᕋᕐᑕᐅᕗᖅ
ᐊᕐᕕᐊᑦ 115 386
ᑎᑭᕋᕐᔪᐊᖅ 19 58
ᑲᖏᖅᖠᓂᖅ 19 164
ᓴᓂᑭᓗᐊᖅ 2 168
ᑲᑎᖦᖢᒋᑦ  155 776

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏᑦ: ᓄᕕᐱᕆ 25

ᑲᑎᖦᖢᒋᑦ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂᒃ ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ ᑲᑎᖦᖢᒋᑦ ᐊᓂᒍᐃᓯᒪᔪᑦ ᑲᑎᖦᖢᒋᑦ ᐃᓄᐃᑦ ᒪᓕᒃᑕᐅᔪᑦ ᒫᓐᓇ ᐃᓄᐃᑦ ᖃᐅᔨᓴᖅᑕᐅᔪᑦ
155 153 2 4712 813

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓄᑐᐊᒃᑯᕖᑦ)  
ᖃᓄᐃᑦᑕᖅᑐᖅᖢᑎᒃ ᐊᐅᓪᓚᖅᓯᒪᖕᒪᖔᑕ  ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 24−ᒥ ᐱᒋᐊᖅᖢᒍ
ᐋᓐᓂᐊᕐᕕᓕᐊᖅᑐᑦ 359
ᑭᒃᑯᑐᐃᓐᓇᑦ 131
ᑲᑎᖦᖢᒋᑦ  490

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ  ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᐸᒃᑕᐅᑦᑕᐃᓕᕕᖕᓂᒃ
ᓄᕕᐱᕆ 25 2020 69
ᓄᕕᐱᕆ 26 2020 50
ᓄᕕᐱᕆ 27 2020 25
ᓄᕕᐱᕆ 28 2020 2
ᓄᕕᐱᕆ 29 2020 2
ᑲᑎᖦᖢᒋᑦ  148

ᐱᑕᖃᕆᐊᖃᓪᓚᕆᒃᑐᓂᒃ ᐃᖅᑲᓇᐃᔭᖅᑎᓂᒃ ᑐᒃᓯᕋᐅᑏᑦ:

ᓄᕕᐱᕆ 24−ᒥ ᐱᒋᐊᖅᖢᒍ, 9333−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4359−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ # %
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ) 6219 66.6%
ᐊᖏᖅᑕᐅᙱᑦᑐᑦ 281 3.0%
ᐅᑕᖅᑭᔪᑦ 232 2.5%
ᐊᐅᓪᓚᕐᕕᐅᔪᓐᓇᕐᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ  2601 27.9%
ᑲᑎᖦᖢᒋᑦ  9333 100%

 

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᓄᑖᑦ ᐱᓕᕆᐊᒃᓴᓂᒃ ᐱᕙᓪᓕᐊᑎᑕᐅᔪᑦ/ᐱᔨᑦᑎᕋᐅᑎᓂᒃ:

  • ᐃᓄᖕᒧᑦ ᐊᑕᐅᓯᕐᒧᑦ ᐊᑐᖅᑕᐅᕙᒃᑐᒃᑲᓐᓂᓂᒃ ᓴᐳᒻᒥᓂᕐᒧᑦ ᐃᓕᓐᓂᐊᕐᕕᖕᓄᐊᖅᑎᕆᔪᖃᕐᓂᐊᖅᐳᖅ ᐱᓇᓱᐊᕈᓯᐅᓂᐊᖅᑐᒥ ᐃᑲᔪᖅᑐᕈᒪᓪᓗᒋᑦ ᑲᔪᓰᓐᓇᖅᑐᒧᑦ ᐋᓐᓂᐊᖅᑕᐃᓕᒪᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ.   ᖃᐅᓱᐃᑦᑐᒧᐊᖅᑕᐅᓂᖏᑦ ᑭᖑᕙᓯᑐᐃᓐᓇᕆᐊᓖᑦ ᑕᐃᒪᐃᔾᔪᑎᖃᕐᓗᑎᒃ ᖃᖓᑕᓲᓕᕆᔩᑦ ᐋᖅᑭᒃᓱᖅᓯᒪᔭᖏᓐᓄᑦ. ᑖᓐᓇ ᐃᓄᖕᒧᑦ ᐊᑕᐅᓯᕐᒧᑦ ᐃᒻᒥᓂᒃ ᓴᐳᒻᒥᓂᕐᒧᑦ ᐊᑐᖅᑕᐅᕙᒃᑐᖅ ᐅᑯᓂᖓ ᐃᓚᖃᖅᐳᖅ:
    • ᑮᓇᒧᑦ ᓴᐳᒻᒥᔾᔪᑏᑦ (ᖃᓄᖅ ᐊᑐᖅᑕᐅᔭᕆᐊᖃᕐᓂᖏᓐᓂᒃ ᑕᒪᐃᑎᒍᑦ ᐅᖃᐅᓯᖅᑎᒎᖓᓂᖃᖅᖢᓂ)
    • ᐃᒋᑕᐅᓕᕈᓐᓇᖅᑐᓂᒃ ᑮᓇᒧᑦ ᒪᑐᐊᓂᒃ; ᐊᒻᒪᓗ
    • ᐊᒡᒑᒃ. 

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕐᓂᖓᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.