ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᓄᕕᐱᕆ 27, 2020

ᓄᕕᐱᕆ 27, 2020

COVID-19 Qalagjuarnikkut GN-kunnin Nutaamik Tuhaqtidjutaa - Hikutirvia 27, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᐅᓪᓗᒥ, ᓄᓇᕗᒻᒥ ᑎᓴᒪᓂᒃ (4) ᓄᕙᒡᔪᐊᕐᓇᖅ-19−ᑖᖅᑐᖃᖅᓯᒪᓕᕐᒥᔪᖅ, ᑕᒪᕐᒥᒃ ᐊᕐᕕᐊᕐᒦᖦᖢᑎᒃ.

ᓄᓇᕗᒻᒥ ᒫᓐᓇ ᑲᑎᖦᖢᒋᑦ 151−ᖑᓕᖅᑐᑦ ᓄᕙᒡᔪᐊᕐᓇᖅ-19−ᒧᑦ ᖃᓂᒻᒪᒃᑐᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 4744−ᖑᓕᖅᑐᑦ. 765 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᖃᐅᔨᒪᕗᖓ ᐃᓚᖓᒍᑦ ᓇᓗᓇᕈᔪᖃᑦᑕᖅᓯᒪᓂᖓᓂᒃ ᐱᓇᓱᐊᕈᓯᕐᓂ ᐊᑐᓵᖅᑕᑦᑎᓐᓂ, ᑲᒪᒋᔭᖃᕆᐊᖃᖅᓯᒪᓕᕐᓂᑦᑎᓐᓄᑦ ᑕᒪᓐᓇ ᖃᓂᒪᓐᓇᖅ ᐊᕕᒃᓯᒪᓂᑦᑎᓐᓃᓪᓚᕆᓕᑉᓂᖓᓂᒃ ᐅᑭᐅᖅᑕᖅᑐᒥ. ᐊᓕᐊᓇᐃᒍᓱᒃᐳᖓ ᐅᖃᕈᓐᓇᕋᒪ ᐃᒪᓐᓇ, ᓄᓇᕗᑦ ᒐᕙᒪᒃᑯᖏᑦ ᐱᑎᑦᑎᓂᐊᖅᐳᑦ $1−ᒥᓕᐊᓂᒃ ᓄᓇᓕᖕᒥᐅᑦ ᓂᕿᒧᑦ ᐱᓕᕆᕝᕕᐅᕙᖕᓂᖏᓐᓄᑦ, ᑐᓂᓯᓂᐊᕐᓂᕐᒧᑦ ᐊᖏᖃᑎᖃᖃᑎᒋᓯᑲᐅᑎᒋᓪᓗᒋᑦ ᕼᐋᒻᓚᒋᔭᐅᔪᑦ. ᑕᐃᒪᓐᓇ, ᓄᓇᓖᑦ ᐊᑐᓕᕈᓐᓇᕐᓂᖅᐳᑦ ᓂᕿᓕᕆᓂᕐᒧᑦ ᐱᓕᕆᐊᒃᓴᒥᒃ ᑲᔪᓯᑎᑦᑎᓂᕐᒥᒡᓗ ᓇᖕᒥᓂᖅ ᐱᔭᕆᐊᖃᖅᑕᑎᒃ ᒪᓕᒍᒪᓪᓗᒋᑦ.

ᖃᔅᓯᐅᓂᖓ ᖃᐅᔨᒪᔭᐅᓕᕐᓂᐊᖅᐳᖅ ᓄᓇᓕᖕᒥᐅᑦ ᐊᖏᑎᒋᓂᖓ ᒪᓕᒡᓗᒍ. ᓄᓇᓖ 1000 ᑐᖔᓂ ᐃᓄᓖᑦ $20,000−ᑖᕐᓂᐊᖅᐳᑦ, 1000 ᐅᖓᑖᓂ ᐃᓄᓖᑦ $45,000−ᑖᕐᓂᐊᖅᐳᑦ, ᐊᒻᒪ ᐃᖃᓗᐃᑦ $100,000−ᓂᒃ ᐱᑎᑕᐅᓂᐊᖅᐳᖅ. ᐊᒻᒪᓗᑦᑕᐅᖅ ᑮᓇᐅᔭᖅᑕᖃᒃᑲᓐᓂᕐᓂᐊᖅᐳᖅ ᓄᓇᓕᖕᓄᑦ ᐊᒃᑐᖅᑕᐅᓯᒪᔪᓄᑦ ᓄᕙᒡᔪᐊᕐᓇᖅ-19−ᒧᑦ, ᐃᑲᔪᕈᒪᓪᓗᒋᑦ ᖃᓄᑐᐃᓐᓇᖅ ᑐᐊᕕᕐᓇᖅᑐᓄᑦ ᐱᔭᐅᔭᕆᐊᓕᖕᓄᑦ.

ᑕᐃᒪᐃᖏᓐᓇᐅᔭᖅᖢᑕᓗ, ᑕᒫᓃᑉᐳᒍᑦ ᐃᑲᔪᕈᒪᓪᓗᑕ, ᐱᓕᕆᐊᖃᖅᖢᑕᓗ ᓇᓂᓯᓂᕐᒥᒃ ᐊᑐᕈᓐᓇᖅᑕᑦᑎᓐᓂᒃ ᖃᐅᔨᒪᑦᑎᐊᕈᒪᓂᕐᒧᑦ ᐃᑲᔪᖅᑐᖅᑕᐅᔭᕆᐊᖃᓂᕐᓄᑦ ᐃᑲᓱᔪᖅᑐᖅᑕᐅᒐᓗᐊᕐᒪᖔᖅᐱᑦ ᑕᒪᒃᑯᓇᓂ ᐅᓪᓗᓂ ᐊᒃᓱᕈᕐᓇᖃᑕᖅᑐᓂ.

ᖁᔭᓐᓇᒦᒃ ᓄᓇᕗᒻᒥᐅᓕᒫᑦ ᑲᔪᓰᓐᓇᖅᖢᓯ ᐅᑕᖅᑭᑦᑎᐊᖏᓐᓇᕋᔅᓯ, ᐃᓄᑦᑎᐊᕙᔭᐅᒐᔅᓯ, ᐱᔪᒃᓯᔪᒪᓂᖃᑦᑎᐊᕋᔅᓯ, ᐊᒃᓱᕈᖅᖢᓯᓗ ᐱᓕᕆᖃᑦᑕᖅᓯᒪᓂᔅᓯᓐᓄᑦ ᐱᓇᓱᐊᕈᓯᐅᓵᖅᑐᓂ ᑐᓵᖅᑕᑦᑎᓐᓂ. ᐱᒃᑯᓕᕗᖓ ᖁᔭᓕᓪᓗᖓᓗ ᖃᓄᑐᐃᓐᓇᓕᒫᖅ ᐱᓕᕆᐊᕆᖃᑦᑕᖅᓯᒪᔭᔅᓯᓐᓄᑦ ᐅᓇᑖᕆᔭᖃᖅᑎᓪᓗᑕ ᓄᕙᒡᔪᐊᕐᓇᖅ-19−ᒥᒃ. ᐊᑏ ᓴᙲᓐᓇᓚᐅᖅᑕ ᑲᑐᔾᔨᖃᑎᒌᒡᓗᑕᓗ.

ᖃᓄᐃᙱᑦᑎᐊᕆᔅᓯ. ᐊᑦᑕᕐᓇᖅᑐᒧᐊᖅᑕᐃᓕᒋᔅᓯ. ᐊᐃᓯᒪᓗᓯ.

 

ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᒐᒃᓴᖏᑦ: 

ᐱᓇᐊᕈᓯᐅᑉ ᓄᙳᐊᓄᐊᓃᓕᕐᒥᑎᓪᓗᑕ ᖃᓄᕈᓘᔭᖅ ᐊᔪᓕᖅᑎᑕᐅᓯᒪᑎᓪᓗᑕ, ᖁᔭᓐᓇᒦᕈᒪᕙᒃᑲ ᓄᓇᕗᒻᒥᐅᑦ.  ᐊᐱᕆᓚᐅᖅᓯᒪᕙᔅᓯ ᐱᓇᓱᐊᕈᓰᒃ ᒪᕐᕉᓕᖅᑑᖕᓂ ᐅᖃᐅᓯᖃᖅᑎᓪᓗᑕ ᑕᒪᓐᓇ ᖃᓄᕈᓘᔭᖅ ᐊᔪᓕᖅᑎᑕᐅᓯᒪᓂᖅ ᑕᒪᔾᔭᑐᐊᑦᑎᐊᖑᓂᖓᓄᑦ ᑕᒪᑐᒥᖓ ᖃᓂᒪᓐᓇᒥᒃ ᓵᓚᖃᕈᑎᒋᓂᐊᕐᓗᑎᒍ, ᒪᓕᓪᓚᕆᖃᑦᑕᕈᑦᑕ ᐃᓅᖃᑎᑦᑎᓐᓂᒃ ᐅᖓᓯᒌᒃᑕᖁᔭᐅᓂᑦᑎᓐᓂᒃ, ᓈᓚᒋᐊᖃᖅᐳᒍᑦ ᐋᓐᓂᐊᖃᓇᙱᑦᑐᓕᕆᔨᒻᒪᕆᐅᑉ ᑎᓕᓯᔾᔪᑎᒋᓯᒪᔭᖏᓐᓄᑦ ᐅᐸᒃᑕᐅᑦᑕᐅᓕᒪᕙᖕᓂᕐᒧᑦ, ᐊᒻᒪᓗ ᐃᓚᕗᑦ, ᓄᓇᖅᑲᑎᕗᑦ, ᐱᓗᐊᙳᐊᖅᖢᓂᓗ, ᐃᓐᓇᕆᔭᕗᑦ ᓴᐳᑎᓯᒪᔭᕆᐊᖃᖅᑕᕗᑦ.  

ᑕᑯᓯᒪᓕᖅᐳᒍᑦ ᖃᓄᖅ ᑕᒪᓐᓇ ᖃᓂᒪᓐᓇ ᐊᒃᑐᖅᓯᓯᒪᖕᒪᖔᑦ ᓄᓇᓕᑦᑎᓐᓂᒃ. ᑕᑯᓯᒪᓕᖅᐳᒍᑦ ᖃᓄᖅ ᓱᒃᑲᓕᑎᒋᔪᒥᒃ ᐊᓯᔾᔨᖅᑐᖃᕈᓐᓇᕐᒪᖔᑦ, ᐱᔾᔪᑎᑦᑎᓐᓂᒡᓗ ᑕᐅᑐᒐᖃᐃᓐᓇᕆᐊᖃᖅᐳᒍᑦ ᐅᓈᑖᕆᔭᖃᖅᑎᓪᓗᑕ ᓱᒃᑲᐃᒡᓕᒋᐊᖅᑎᑦᑎᔪᒪᓂᕐᒧᑦ ᐃᓱᓕᑦᑕᖅᑎᑦᑎᔪᒪᓂᕐᒧᓪᓗ ᓯᐊᒻᒪᒃᐸᓪᓕᐊᓂᖕᔭᖓᓂᒃ. ᖃᐅᔨᒪᑦᑎᐊᖅᑐᖓ ᐊᔪᕐᓇᕐᓂᐊᖅᑐᒻᒪᕆᐊᓗᒃ, ᑕᒪᔅᓯᐊᓗᒃ ᑎᓕᐅᖅᐸᔅᓯ ᐳᓚᕋᖃᑦᑕᐅᑎᙱᐊᓪᓚᒋᔅᓯ ᐃᒡᓗᔅᓯᓘᓐᓃᑦ ᐊᓯᐊᓄᑦ ᑲᑎᙵᕈᓘᔭᑲᑕᙱᓪᓗᓯ. ᑕᒪᓐᓇ ᐱᒻᒪᕆᕐᔪᐊᕌᓗᕗᖅ.

ᐊᑐᓪᓚᕆᑦᑎᐊᖅᐸᒡᓗᓯ ᑎᒥᒃᑯᑦ ᐅᖓᓯᒌᖃᑦᑕᐅᑎᓂᕐᒥᒃ, ᐊᒡᒐᓯ ᐅᐊᓴᖅᐸᒡᓗᒋᑦ, ᖁᐃᖅᓱᖅᐸᒡᓗᓯ ᐃᑯᓯᔅᓯᓐᓄᑦ, ᖄᕆᔭᐅᔪᑦ ᓴᓗᒻᒪᖅᓴᒐᔪᒃᐸᒡᓗᒋᑦ ᒪᑐᐊᖅᓯᒪᕙᒡᓗᑎᓪᓗ ᐃᒡᓗᕕᑦ ᓯᓚᑖᓃᓕᕌᖓᕕᑦ.

ᓴᙱᕗᒍᑦ, ᐊᑐᖅᓯᑦᑎᐊᓕᕈᓐᓇᖅᐸᒃᖢᑕ ᐊᔪᙱᖦᖢᑕᓗ. ᐱᓕᕆᖃᑎᒌᑦᑎᐊᓚᐅᖅᑕ ᐃᑲᔪᕈᒪᓗᒋᑦ ᓄᓇᓕᕗᑦ ᐋᓐᓂᐊᙱᑦᑎᐊᖁᓗᒋᑦ ᖃᓄᐃᙱᑦᑎᐊᖁᓗᒋᓪᓗ. ᑲᒪᒋᖃᑦᑕᐅᑎᓗᓯ ᖁᐊᖅᓵᕐᓇᙱᑦᑐᒃᑯᑦ, ᐅᖓᓯᒌᒃᐸᒡᓗᓯᓗ.

ᐃᓕᓴᕆᔭᕆᐊᖃᕐᒥᔭᕗᑦᑕᐅᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᒋᕙᒃᑕᕗᑦ, ᓄᓇᓕᖕᓂᑐᐊᖑᙱᑦᑐᖅ, ᑕᒪᒃᑯᐊᓗ ᐅᐸᒃᓯᒪᙱᒃᑲᓗᐊᕐᓗᒋᑦ ᐅᖄᓚᐅᑎᒃᑯᑦ ᐱᓕᕆᕙᒃᑐᑦ, ᐃᑲᕐᕋᒐᓴᖕᓂᒃ ᐱᓕᕆᕙᒃᐳᑦ ᖃᓄᐃᙱᑦᑎᐊᖁᓪᓗᓯ, ᑕᐃᒪᐃᓐᓂᖓᓄᓪᓗ ᑐᙵᓇᕐᕕᒋᕙᒡᓗᒋᑦ ᐅᖃᖃᑎᒋᓕᕌᖓᔅᓯᐅᒃ, ᖁᔭᒋᕙᒡᓗᒋᓪᓗ ᐊᔪᕈᓐᓃᑐᐊᕌᖓᕕᑦ.

ᐊᒻᒪ ᓱᓕ, ᐃᓱᓕᑦᑎᓕᖅᑎᓪᓗᖓ, ᓄᓇᕗᒻᒥᐅᓕᒫᑦ ᖁᔭᒋᔪᒪᕙᒃᑲ ᐊᒃᓱᕈᖅᖢᑎᒃ ᐱᓕᕆᕙᖕᓂᖏᓐᓄᑦ ᐱᓕᕆᖃᑎᒌᒍᒪᓪᓗᑎᒃ. ᑕᒪᓐᓇ ᓵᓚᒋᔪᓐᓇᖅᑕᕗᑦ. ᖁᔭᓐᓇᒦᒃ.

 

ᒥᓂᔅᑕ ᐱᕙᓪᓕᐊᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᓄᑖᙳᕆᐊᑕᖏᑦ: 

ᒫᑦᓯᒥ ᐊᔪᓕᖅᑎᑕᐅᕈᓘᔭᕐᓇᒥ, ᐱᓕᕆᕝᕕᒋᔭᕋ ᐱᒋᐊᖅᑎᑦᑎᓚᐅᖅᓯᒪᕗᖅ ᑐᕌᕆᔭᖃᖅᖢᓂ ᐱᒋᐊᖅᑎᑕᐅᔪᒥᒃ ᐃᑲᔪᕈᒪᓪᓗᒋᑦ, ᓴᓇᙳᐊᖅᑏᑦ/ᓴᓇᓗᒃᑏᑦ, ᐳᓚᕋᖅᐸᒃᑐᓄᑦ ᐊᐅᓚᑦᑎᔩᑦ, ᓂᐅᕕᕐᕕᐅᕙᒃᑐᑦ ᐊᓯᖏᓪᓗ ᒥᑭᑦᑐᑦ ᓄᓇᕗᒻᒥ ᓇᖕᒥᓂᕆᔭᐅᔪᑦ ᐱᐅᙱᑦᑐᒃᑯᑦ ᐊᒃᑐᖅᑕᐅᔪᑦ ᓄᕙᒡᔪᐊᕐᓇᖅ-19−ᒧᑦ ᓄᓇᕐᔪᐊᕐᒥ ᖃᓂᒪᓐᓇᒧᑦ. 

ᑕᐃᖕᓇ ᐱᒋᐊᖅᑕᐅᔪᖅ ᐱᑎᑦᑎᖃᑦᑕᐃᓐᓇᖅᐳᖅ $5000.-ᒧᑦ ᑎᑭᓪᓗᒍ ᒥᑭᑦᑐᓄᑦ ᓇᖕᒥᓂᕆᔭᐅᔪᓄᑦ ᐃᑲᔪᖅᑐᐃᓂᕐᒧᑦ ᐱᓕᕆᐊᖑᔪᒥ ᑮᓇᐅᔭᖃᖅᑎᑦᑎᓂᕐᒧᑦ ᐃᑲᔪᕈᒪᓪᓗᒋᑦ ᐊᔪᖅᑎᑕᐅᙱᑦᑐᑦ ᓇᖕᒥᓂᕆᔭᐅᔪᑦ ᐊᑭᑐᓗᐊᙱᑦᑐᓄᑦ ᐱᓕᕆᐊᖃᕐᓂᕐᒧᑦ ᐊᑭᓕᖅᓱᕆᐊᖃᓕᖅᐸᒃᑐᓄᑦ ᓂᕆᐊᓇᙱᑦᑐᓄᓪᓘᓐᓃᑦ ᐊᑭᓕᕆᐊᓕᖕᓄᑦ, ᐊᑭᓕᖅᑕᐅᙱᑉᐸᑕ, ᖁᐊᖅᓵᕐᓇᖅᑎᑦᑎᑐᐃᓐᓇᕆᐊᓖᑦ ᑲᔪᓯᔪᓐᓇᕐᓂᖓᓂᒃ ᓇᖕᒥᓂᕆᔭᐅᔪᖅ ᑲᑐᔨᖃᑎᒌᒡᓘᓐᓃᑦ. ᐊᔪᖅᑎᑕᐅᙱᑦᑐᑦ ᐊᐅᓚᑦᑎᓂᕐᒧᑦ ᐊᑭᓕᖅᓱᒐᒃᓴᐃᑦ ᐃᓚᖃᖅᐳᑦ ᐅᑯᓂᖓ ᑭᓯᐊᓂᓗ ᑖᒃᑯᓄᖓᑐᐊᖑᙱᑦᑐᖅ: ᐃᒡᓗᒥᒃ ᐊᑐᖅᑐᐊᕐᓂᕐᒧᑦ, ᓇᓪᓕᐊᒃᑯᒫᓕᕆᓂᕐᒧᑦ, WSCC−ᑯᓐᓄᑦ ᐊᑕᓂᕐᒧᑦ, ᓚᐃᓴᒧᑦ, ᐱᔪᓐᓇᐅᑎᓄᓪᓗ ᐊᑭᓄᑦ, ᐅᖅᑰᓴᕐᓂᕐᒧᑦ, ᐆᒻᒪᖅᑯᑎᖃᕐᓂᕐᒧᑦ, ᐅᖄᓚᐅᒻᒧᑦ, ᐃᑭᐊᖅᑭᕕᖕᒧᑦ ᐊᓯᖏᓐᓄᓪᓗ ᐊᐅᓚᓂᕐᒧᑦ ᐊᑭᓕᖅᓱᕆᖃᖅᐸᒃᑐᓄᑦ. ᐱᓕᕆᕝᕕᒋᔭᐅᔪᖅ ᐱᑎᑦᑎᔪᓐᓇᙱᓚᖅ ᐊᑭᓕᖅᓱᐃᓕᕐᓂᕐᒥᒃ ᐊᓯᐅᔨᔭᐅᔪᒧᑦ ᑮᓇᐅᔭᓕᐊᖑᔭᕆᐊᓕᖕᒧᑦ ᑮᓇᐅᔭᖅᑖᕆᔭᐅᕙᓪᓕᐊᔪᓄᓪᓘᓐᓃᑦ.

ᑕᒪᒃᑯᐊ ᐊᑦᑎᒃᑐᒦᑦᑐᑦ ᑐᓐᓂᖅᑯᑕᐅᔪᑦ ᐃᑲᔪᖅᐸᒃᐳᑦ ᓄᓇᕗᒻᒥ ᓇᖕᒥᓂᒥᕆᔭᐅᔪᓂᒃ, ᐊᔪᖅᑎᑦᑎᙱᖦᖢᓂ ᑕᒪᓐᓇ ᐊᖑᒻᒪᑎᔪᓐᓇᕐᓂᕐᒥᒃ ᒪᐅᖓᑦᑎᐊᖅ ᐱᔭᐅᔭᕆᐊᓕᖕᓄᑦ, ᑕᐃᒪᐃᓕᐅᕐᓂᕐᒥᓂᓗ ᐊᑐᓕᖅᐸᒃᖢᓂ ᒪᓂᒪᑎᑕᐅᔪᓂᒃ ᑮᓇᐅᔭᖃᖅᑎᑕᐅᓂᕐᒧᓪᓘᓐᓃᑦ ᖃᓄᐃᓕᖓᔪᑦ.  

ᑕᒪᓐᓇ ᐱᒋᐊᖅᑕᐅᓯᒪᔪᖅ ᐅᔾᔨᕐᓇᖅᑐᒻᒪᕆᖕᒥᒃ ᐱᒋᐊᕐᓂᖃᖅᓯᕗᖅ; ᐱᒋᐊᓕᓵᖅᑎᑕᐅᓚᐅᖅᑎᓪᓗᒍ ᓄᕕᐱᕆᐅᓪᓗ ᕿᑎᐊᓂ ᓯᕗᓪᓕᕐᒥ ᐱᕙᓪᓕᐊᓕᓚᐅᖅᑎᓪᓗᒋᑦ ᐱᓇᔫᑎᒋᔭᐅᔪᓂᒃ ᐱᑎᑦᑎᓚᐅᖅᐳᖅ ᑲᑎᖦᖢᒋᑦ $439,834.75-ᓂᒃ ᐃᑲᔪᖅᑐᐃᓂᕐᒧᑦ ᑮᓇᐅᔭᖁᑎᒋᔭᐅᓂᐊᖅᑐᓂᒃ 106-ᓄᑦ ᓄᓇᕗᒻᒥ ᓇᖕᒥᓂᕆᔭᐅᔪᓄᑦ.

ᐅᓪᓗᒥ ᑕᕝᕙᓃᑉᐳᖓ ᐅᖃᐅᓯᖃᕈᒪᓪᓗᖓ ᐊᐃᑉᐸᖓᓂᒃ ᐱᓂᐊᕐᕕᐅᔪᒥᒃ ᑕᒪᑐᒧᖓ ᐱᒋᐊᖅᑕᐅᓯᒪᔪᒧᑦ. ᐅᓂᒃᑲᐅᓯᖄᓂᑐᐊᕈᑎᒃ ᓯᕗᓪᓕᕐᒥᒃ ᑐᓐᓂᖅᑯᓯᐅᕆᓚᐅᖅᑕᒥᓄᑦ, ᒥᑭᑦᑐᑦ ᓇᖕᒥᓂᕆᔭᐅᔪᑦ ᒫᓐᓇ ᐊᑐᕈᓐᓇᓕᕆᕗᑦ ᐊᐃᑉᐸᖓᓄᑦ ᐱᕝᕕᐅᔪᓐᓇᖅᑐᒧᑦ ᑐᓐᓂᖅᑯᑕᐅᔪᓄᑦ $5000.-ᒧᑦ ᑎᑭᓪᓗᒍ.  ᒐᕙᒪᐅᑎᓪᓗᑕ ᐃᑲᔪᖅᑐᐃᔪᒪᓪᓚᕆᒃᐳᒍᑦ ᓇᖕᒥᓂᖅᓱᕈᓐᓇᕐᓂᕐᒥᒃ ᓄᓇᓕᖕᓂᓗ ᐃᖅᑲᓇᐃᔭᖅᑎᑦᑎᓂᕐᒥᒃ; ᓄᓇᕗᒻᒥᐅᑦ ᒥᑭᑦᑐᑦ ᓇᖕᒥᓂᓕᕆᔭᖏᑦ ᐱᒻᒪᕆᐊᓘᓪᓗᑎᒃ ᐃᓚᒋᔭᐅᕗᑦ ᑮᓇᐅᔭᓕᐅᕋᓱᖕᓂᕆᕙᒃᑕᑦᑎᓐᓂ.

ᐊᑐᓚᐅᖅᓯᒪᔭᒥᑎᑐᑦ, ᐱᓇᔪᖕᓂᐊᕐᓗᑎᒃ ᑮᓇᐅᔭᑎᒍᑦ ᐃᑲᔪᖅᑕᐅᓂᕐᒧᑦ, ᐱᓇᔪᒃᑐᑦ ᐱᔭᕇᖅᓯᑐᐃᓐᓇᕋᔭᖅᐳᑦ ᑐᓂᓯᓗᑎᒡᓗ ᓇᐃᑦᑐᒥᒃ ᒪᕐᕉᖕᓂᒃ−ᒪᒃᐱᖅᑐᒐᓕᖕᒥᒃ ᐱᓇᔫᑎᒋᔭᒥᓂᒃ ᑎᑎᕋᖅᓯᒪᔪᒥᒃ ᐱᑎᑦᑎᓗᑎᒡᓗ ᐅᓂᒃᑳᖅᓯᒪᔪᒥᒃ ᖃᓄᖅ ᑖᓐᓇ ᓇᖕᒥᓂᕆᔭᐅᔪᖅ ᐊᒃᑐᖅᑕᐅᓯᒪᖕᒪᖔᑦ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ ᓄᓇᕐᔪᐊᓕᒫᒥ ᖃᓂᒪᓐᓇᒧᑦ.  ᐱᓕᕆᕝᕕᒋᔭᕋᑦᑕᐅᖅ ᐋᖅᑭᒃᓱᐃᓯᒪᒋᕗᖅ ᐊᑕᐅᓯᕐᒥᒃ ᒪᒃᐱᖅᑐᒐᓕᖕᒥᒃ ᑎᑎᕋᕆᐊᓕᖕᒥᒃ ᐃᑲᔪᕈᒪᓪᓗᒋᑦ ᐱᓇᔪᒃᑐᑦ ᖃᐅᔨᓂᕐᒥᒃ ᓇᖕᒥᓂᖃᕐᓂᕐᒧᑦ−ᐊᒃᑐᐊᓂᓕᖕᓄᑦ ᐱᓕᕆᕝᕕᖃᕐᓂᕐᒧᑦ ᐊᑭᒋᓇᔭᖅᑕᖏᓐᓂᒃ ᓲᕐᓗ: ᐃᒡᓗᒥᒃ ᐊᑐᖅᑐᐊᕐᓂᕐᒧᑦ, WSCC-ᒧᑦ ᐊᑭᓖᔭᕆᐊᖃᖅᐸᖕᓂᕐᒧᑦ, ᓚᐃᓴᒧᑦ ᐱᔪᓐᓴᐅᑎᖃᕐᓂᕐᒧᓪᓗ ᐊᑭᓄᑦ, ᐅᖅᑰᓴᐅᑎᖃᕐᓂᕐᒧᑦ, ᐆᒻᒪᖅᑯᑎᖃᕐᓂᕐᒧᑦ ᐊᓯᖏᓐᓄᓪᓗ ᐊᐅᓚᑦᑎᓂᕐᒧᑦ ᐊᑭᓕᖅᓱᕆᐊᖃᖅᐸᒃᑐᓄᑦ. ᑖᒃᑯᐊ ᑐᓴᖅᑕᐅᔪᒃᓴᑦ ᐊᒻᒪᓗᑦᑕᐅᖅ ᐃᓗᓕᖃᐅᑦᑎᐊᖅᑐᑦ ᐊᕕᒃᓯᒪᓂᕐᓂ ᖃᐅᔨᒋᐊᕐᕕᖃᕐᓂᕐᒧᑦ ᐃᓗᓕᖏᑦ  ᒪᓂᒪᕗᑦ ᐅᕙᓂ gov.nu.ca/sbsp.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ: 

ᐅᓪᓛᒃᑯᑦ. ᐃᑉᐸᒃᓴᖅ, ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖓᕙᕆᐊᖅᑎᑦᑎᓚᐅᖅᐳᖅ ᑭᒃᑯᑐᐃᓐᓇᓂᒃ ᖃᓄᐃᙱᑎᑦᑎᓂᕐᒧᑦ ᑐᐊᕕᕐᓇᖅᑐᒥᒃ ᑎᓯᐱᕆ 10−ᒧᑦ. ᐅᖓᕙᕆᐊᖅᑎᑦᑎᓂᖅ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᑐᐊᕕᕐᓇᖅᑐᒥᒃ ᐱᓇᓱᐊᕈᓰᒃ ᒪᕐᕉᒃ ᐱᔭᕇᑐᐊᕌᖓᑎᒃ, ᐱᑎᑦᑎᕙᒃᐳᖅ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒥᒃ ᐱᔪᓐᓇᐅᑎᖃᕐᓂᕐᒥᒃ ᐱᓕᕆᐊᒃᓴᒃᑲᓐᓂᕐᓂᒃ ᐊᑐᖅᑕᐅᓇᔭᖅᑐᓂᒃ, ᓲᕐᓗ ᓴᖅᑭᑎᑦᑎᓂᖅ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᑎᓕᓯᔾᔪᑎᓂᒃ, ᑭᐅᓯᔪᒪᓂᕐᒧᑦ ᖃᓄᐃᓕᖓᓂᕆᔭᐅᔪᓄᑦ ᓲᕐᓗ ᑕᒪᑐᒧᖓ ᑲᔪᓰᓐᓇᖅᑐᒧᑦ ᓄᓇᕐᔪᐊᓕᒪᒥ ᖃᓂᒪᓐᓇᒧᑦ.

ᓄᑖᙳᕆᐊᖅᑎᑦᑎᒃᑲᓐᓂᕐᓂᖅ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᑐᐊᕕᕐᓇᖅᑐᒥᒃ ᐱᓇᓱᐊᕕᓰᒃ ᒪᕐᕉᒃ ᐊᓂᑐᐊᕌᖓᑎᒃ ᑐᑭᖃᙱᓚᖅ ᐃᒪᓐᓇ, ᑕᒪᒃᑯᐊ ᒫᓐᓇ ᐊᔪᓕᖅᑎᑦᑎᔾᔪᑏᑦ ᐊᑐᐃᓐᓇᓂᐊᕐᓂᖏᓐᓂᒃ ᑎᓯᐱᕆ 10−ᖑᕋᓱᖕᓂᖓᓂ, ᑭᓯᐊᓂᓕ ᐅᕙᑦᑎᓐᓂᒃ ᐱᕕᒃᓴᖃᖅᑎᑦᑎᕗᖅ ᓴᖅᑭᑎᑦᑎᔪᓐᓇᕐᓂᕐᒥᒃ ᐋᖅᑭᒋᐊᖅᓯᔪᓐᓇᕐᓂᕐᒥᒡᓗ ᑎᓕᓯᔾᔪᑕᐅᓯᒪᔪᓂᒃ ᑭᐅᓯᔪᒪᓂᕐᒧᑦ ᖃᓄᐃᓕᖓᓂᕆᔭᐅᔪᓄᑦ, ᐊᔪᕐᓇᕈᓐᓃᖅᑎᑦᑎᒋᐊᕐᓗᓂ ᓱᑲᒋᐊᖅᑎᑦᑎᓗᓂᓘᓐᓃᑦ ᐊᔪᖅᑎᑦᑎᓯᒪᔾᔪᑎᓂᒃ, ᓇᓗᓇᐃᔭᖅᑕᐅᓯᒪᔪᑎᑐᑦ ᓄᓇᕗᑦ ᓇᒧᙵᐅᕙᓪᓕᐊᓂᕆᓇᔭᖅᑕᖓᓄᑦ.

ᑭᓱᑦ ᓇᓗᓇᐃᔭᐃᕙᑦ ᖃᓄᐃᓕᐅᖅᑕᐅᔭᕆᐊᖃᕐᓂᐊᓕᕐᒥᔪᓂᒃ ᓄᓇᕗᑦ ᓇᒧᙵᖅᐸᓪᓕᐊᓂᕆᔭᖓᓄᑦ − ᐋᖅᑭᒃᑕᐅᔪᓄᑦ ᑲᔪᓯᑎᑦᑎᔪᒪᓗᓂ, ᐊᑐᕈᓐᓃᖅᑎᑦᑎᔪᒪᓗᓂ ᐊᑐᓕᖅᑎᑦᑎᒃᑲᓐᓂᕈᒪᓗᓂᓘᓐᓃᑦ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᔪᓕᖅᑕᖅᑎᑦᑎᔪᓂᒃ− ᐅᓇᐅᕗᖅ, ᖃᓄᐃᓕᖓᓂᕆᔭᖓ ᓄᕙᒡᔪᐊᕐᓇᖅ-19 ᑕᒫᓂ ᐅᑭᐅᖅᑕᖅᑐᒥ,ᖃᐅᓴᖅᓯᓂᕐᒧᑦ ᐊᔪᙱᓐᓂᕆᔭᑦᑎᓐᓂᒃ, ᖃᓄᐃᓕᖓᓂᕆᔭᖓᓄᓪᓗ ᓄᕙᒡᔪᐊᕐᓇᖅ-19 ᖃᓪᓗᓈᑦ ᓄᓇᖏᓐᓂ. ᒫᓐᓇ ᐱᕙᒌᔭᖅᓯᒪᔭᕗᑦ ᐱᔭᕇᖅᓯᔪᒪᓂᐅᕗᖅ ᒪᕐᕉᖕᓂᒃ ᐱᓇᓱᐊᕈᓰᖕᓂᒃ ᑕᒪᒃᑯᐊ ᒫᓐᓇ ᐊᑐᖅᑕᐅᔭᕆᐊᓖᑦ ᐃᓂᖏᓐᓃᓪᓗᑎᒃ. ᑕᐃᓐᓇ ᐊᑐᕆᐊᓕᒃ ᐱᐊᓂᒃᐸᑦ, ᐋᖅᑭᒋᐊᖅᓯᒃᑲᓐᓂᕐᓂᐊᖅᐳᒍᑦ ᐊᑐᖅᑕᐅᔭᕆᐊᓕᖕᓂᒃ ᑕᒪᐃᓐᓄᑲᓴᒃ ᓄᓇᓕᖕᓄᑦ, ᑕᒪᓐᓇ ᑐᙵᕕᖃᖅᑎᓪᓗᒍ ᖃᓄᖅ ᐊᖏᑎᒋᖕᒪᖔᑦ ᓄᕙᒡᔪᐊᕐᓇᖅ-19 ᑕᒪᐃᓐᓂ ᐊᑐᓂᑦ ᓄᓇᓕᖕᓂ.

ᐅᓪᓘᓵᖅᑐᓂ, ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᖃᑎᒌᑦ ᐋᖅᑭᒃᓯᓯᒪᓕᖅᐳᑦ ᐊᒥᓲᓂᖅᓴᐃᑦ ᐃᓄᐃᑦ ᐱᔪᓐᓃᖅᓯᒪᓕᕐᓂᖏᓐᓂᒃ ᓄᕙᒡᔪᐊᕐᓇᖅ-19−ᒥᑦ. ᐃᓄᐃᑦ ᐱᔪᓐᓃᕌᖓᑕ, ᖁᐊᖅᓵᕐᓇᖅᑎᑦᑎᕙᙱᓚᑦ ᓯᐊᒻᒪᒃᑎᕆᔭᕆᐊᒃᓴᖅ ᑕᒪᑐᒥᖓ ᖃᓂᒪᓐᓇᒥᒃ, ᐅᖃᐅᔾᔭᐅᕙᒃᖢᑎᒡᓗ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ ᐅᐸᒃᑕᐅᑦᑕᐃᒪᔭᕆᐊᖃᔾᔮᔪᓐᓃᕐᓂᖏᓐᓂᒃ. ᑭᓯᐊᓂᓗᑦᑕᐅᖅ, ᑖᒃᑯᐊ ᒪᓕᒋᐊᖃᖅᑎᑕᐅᕗᑦ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᔪᓕᖅᑕᕈᑎᓂᒃ.

ᑐᓴᖅᓯᒪᕗᒍᑦ ᐃᓄᐃᒡᒎᖅ ᐃᓱᒫᓗᖃᑦᑕᕐᒪᑕ ᐱᑖᕋᔭᕆᐊᒃᓴᖅ ᓄᕙᒡᔪᐊᕐᓇᖅ-19−ᒥᒃ ᐋᓐᓂᐊᕕᓕᐊᕐᓂᕈᑎᒃ. ᐋᓐᓂᐊᕐᕕᓕᒫᕗᑦ ᐊᑦᓱᕈᖅᑐᖅ ᐱᓕᕆᐊᖃᕐᓂᕐᒧᑦ ᐅᓗᕆᐊᓇᖏᑦᑐᒦᓗᐊᑦᑕᐃᓕᒪᑎᑦᓯᓂᕐᒧᑦ ᓄᕙᕐᔪᐊᕐᓇᖅ-19-ᒥ. ᓇᓗᓇᐃᖅᓯᔪᑦ ᐱᐅᓯᑎᑦᓯᓂᕐᒧᑦ ᓴᓗᒻᒪᖅᓴᐃᓂᕐᒥᑦ, ᐃᖅᑲᓇᐃᔭᖅᑏᑦ ᐊᑐᕋᓗᐊᕐᒪᖔᑕ ᒪᑐᐊᕐᓂᑦ ᐊᓯᖏᓪᓗ ᓇᒻᒥᓂᖅ ᓴᐳᒻᒥᔾᔪᑎᓂᑦ ᐱᖁᑎᓂᑦ ᓈᒻᒪᒐᐃᒻᒪᑦ, ᐋᓐᓂᐊᕐᕕᓕᐊᖅᓯᒪᔪᓕᒫᑦ ᐊᑐᕆᐊᖃᖅᑐᑦ ᒪᑐᐊᕐᓂᑦ.

ᒫᓐᓇᐅᔪᖅ, ᐋᓐᓂᐊᕐᕕᓕᐊᕐᓂᕐᒧᑦ ᐱᔪᓐᓇᕐᓂᐅᔪᖅ ᐃᓅᓕᓴᖅᑕᐅᒋᐊᓕᓐᓄᑦ ᑭᓯᐊᓂ ᐅᖄᓚᐅᑎᒃᑯᑦ ᐱᔭᐅᔪᓐᓇᖏᑦᑐᓄᑦ. ᐋᓐᓂᐊᕐᕕᓕᐊᖁᔭᐅᓯᒪᒍᕕᑦ, ᐱᔾᔪᑎᒋᕙᐅᒃ ᐋᓐᓂᐊᓯᐅᖅᑎᐅᑉ ᓘᑦᑖᓪᓘᓐᓃᑦ ᓇᓗᓇᐃᖅᓯᓯᒪᑉᐸᑦ ᖃᐅᔨᓴᖅᑕᐅᒋᐊᖃᕐᓂᕐᓄᑦ ᐋᓐᓂᐊᖅᑐᓕᕆᔭᐅᓂᕐᒧᑦ.   ᖁᐊᖅᓵᕐᓇᙱᓚᖅ ᐋᓐᓂᐊᕕᓕᐊᕆᐊᒃᓴᖅ, ᑭᖑᕙᓯᒃᑎᑦᑎᑦᑕᐃᓕᒋᑦ ᐊᑐᕆᐊᖕᓂᒃ ᐃᓗᐊᖅᓴᖅᑕᐅᓂᕐᒧᑦ ᑲᒪᒋᔭᐅᓂᕐᒥᒃ.

ᑕᒪᓐᓇ ᐱᓇᓱᐊᕈᓯᖅ ᐱᒋᐊᓕᓵᖅᑎᓪᓗᒍ, ᓇᓗᓇᐃᖅᓯᓚᐅᖅᐳᖓ ᐃᖅᑲᓇᐃᔭᖅᑎᒃᑲᓐᓂᕐᓂᒃ ᐅᑭᐅᖅᑕᖅᑐᒧᐊᖅᑐᖃᕐᓂᐊᕐᓂᖓᓂᒃᐃᑲᔪᕆᐊᖅᑐᕐᓗᑎᒃ ᓇᒧᙵᕈᓘᔭᓕᖅᑐᒧᑦ ᑭᐅᓯᓂᕆᔭᑦᑎᓐᓄᑦ. ᖁᕕᐊᓱᒃᐳᖓ ᐅᖃᕈᓐᓇᓕᕋᒪ ᖁᔭᓐᓇᒦᖑᑎᓪᓗᒋᑦ ᐅᑯᐊ, Red Cross, ᑎᓴᒪᒃᑲᓐᓂᕐᓂᒃ ᐊᔪᙱᓐᓂᓕᒻᒪᕆᖕᓂᒃ ᐊᑐᖅᑕᐅᔪᓐᓇᖅᑐᓂᒃ ᐱᓂᐊᖅᐳᒍᑦ ᐊᔪᔪᙱᓐᓂᖃᕐᓗᑎᒃ ᓇᒧᙵᕈᓘᔭᖅᑎᑦᑎᑦᑕᐃᓕᒪᓂᕐᒥᒃ ᐊᐅᓚᑦᑎᕝᕕᖃᕐᓂᕐᒥᒡᓗ,  ᑎᑭᓐᓂᐊᖅᖢᑎᒃ ᐃᑲ\ᔪᕆᐊᖅᑐᕐᓗᑎᒃ ᐱᓕᕆᔨᒋᔭᑦᑎᓐᓂᒃ ᐊᕐᕕᐊᕐᒥ. ᑖᒃᑯᐊ ᐱᑎᑦᑎᓂᐊᖅᐳᑦ ᐱᐅᔪᒻᒪᕆᖕᒥᒃ ᐃᑲᔪᖅᑐᐃᓂᕐᒥᒃ ᖃᐅᔨᓴᖅᓯᕙᒡᓗᑎᒃ, ᐊᔪᕈᓐᓃᖅᓴᖅᑎᑦᑎᓂᕐᒥᒃ ᐊᑐᖅᑕᐅᕙᒃᑐᓂᒡᓗ ᕿᒥᕐᕈᐊᖅᓯᒃᑲᓐᓂᕐᓂᕐᒥᒃ ᐱᐅᓯᒋᐊᖅᑎᑦᑎᓂᐊᖅᑐᓂᒃ ᒫᓐᓇ ᐊᑐᖃᑦᑕᖅᑕᑦᑎᓐᓂᒃ. ᐱᓕᕆᖃᑎᒌᒃᑐᑦ ᐱᓕᕆᓂᐊᖅᐳᑦ, ᑕᐃᒪᐃᓕᐅᕐᓂᕐᒥᓂᒡᓗ ᐃᒃᐱᒋᔭᖃᑦᑎᐊᕐᓗᑎᒃ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᔪᓕᖅᑕᑎᑦᑎᔾᔪᑎᑦᑎᓐᓂᒃ. ᒪᓕᖕᓂᐊᕆᕗᑦᑕᐅᖅ ᑭᑭᑕᐅᓂᕐᒧᑦ ᐃᖅᑲᓇᐃᔭᖅᑎᐅᓂᕐᒧᑦ ᒪᒋᐊᖃᖅᑎᑕᑦᑎᓐᓂᒃ ᐊᑐᕐᓗᑎᒃ ᒪᑐᐊᓂᒃ ᑕᒪᐃᓐᓂ ᐃᓄᒋᐊᒡᕕᐅᓲᓂ ᐃᖅᑲᓇᐃᔭᕐᕕᒋᔭᐅᕙᒃᑐᓂᓗ, ᐅᐸᒃᑕᐅᑦᑕᐃᓕᒪᕙᒡᓗᑎᒡᓗ ᐃᖅᑲᓇᐃᔭᕈᓐᓃᕌᖓᒥᒃ.

ᐅᕙᓂᓕ ᐃᖃᓗᖕᓂ, ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑦᑕᕐᕕᒋᔭᐅᔪᖅ ᑲᓇᑕᒥ ᐱᑎᑦᑎᓯᒪᕗᖅ ᐱᓕᕆᔨᒋᔭᐅᓂᐊᖅᑐᒥᒃ ᐱᓕᕆᔨᒥᒃ ᐱᓇᓱᐊᕈᓯᐅᓂᐊᖅᑑᖕᓄᑦ ᒪᕐᕉᖕᓄᑦ, ᑕᒪᓐᓇᓗ ᐃᑲᔪᕐᓂᐊᖅᖢᓂ ᐊᑕᐅᓰᓐᓇᓕᓕᖅᑎᑦᑎᓗᓂ ᐱᓇᔪᒍᑕᐅᔪᓂᒃ ᐃᑲᔪᖅᑕᐅᔪᒪᓂᕐᒧᑦ ᒐᕙᒪᑐᖃᒃᑯᓐᓂᑦ, ᐱᑎᑦᑎᓗᓂᓗ ᐃᑲᔪᖅᑐᖅᑕᐅᒃᑲᓐᓂᕐᓂᕐᒥᒃ ᐱᓕᕆᔾᔪᑕᐅᕙᒃᑐᓄᑦ.  ᖁᔭᓐᓇᒦᒃ.

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ: 

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐱᓕᕆᕝᕕᖓ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus

ᐅᓪᓗᒥᒧᑦ ᐊᖑᒻᒪᑎᓛᓂᒃ ᑐᓴᖅᑕᐅᔪᒃᓴᓂᒃ ᒫᓐᓇᒧᑦ ᑭᒃᑯᑐᐃᓐᓇᓄᑦ ᖃᓄᐃᑎᑦᑎᑦᑕᐃᓕᒪᓂᕐᒧᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ:  https://www.gov.nu.ca/health/information/nunavuts-path

ᓄᕙᕐᔪᐊᕐᓇᖅ-19−ᒧᑦ ᓄᓇᓕᖕᓂ ᐱᓕᖕᓂ ᑭᒡᓕᓯᓂᐊᖅᑕᐅᓯᒪᔪᑦ: ᓄᕕᐱᕆ 27

ᓄᓇᓕᒃ ᐃᑉᐸᒃᓴᖅ ᓇᓗᓇᐃᖅᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ   

ᐅᓪᓗᒥ ᓇᓗᓇᐃᖅᑕᐅᔪᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ

ᐊᓯᔾᔨᕐᓂᕆᔭᖓ ᐱᑕᖃᓪᓚᑦᑖᕐᓂᕋᖅᑕᐅᓯᒪᔪᓂᑦ ᓈᓴᖅᑕᐅᓯᒪᓂᖏᑕ (+/-) ᐃᑉᐸᒃᓴᖓᓂᑦ

ᑲᑎᖦᖢᒋᑦ ᐊᓂᒍᐃᓯᒪᔪᑦ
ᐊᕐᕕᐊᑦ 115 119 4 2
ᑎᑭᕋᕐᔪᐊᖅ 19 19 0 2
ᑲᖏᖅᖠᓂᖅ 19 19 0 2
ᓴᓂᑭᓗᐊᖅ 2 2 0 2
ᑲᑎᖦᖢᒋᑦ  155 159 4 8

ᖃᐅᔨᓴᖅᓯᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᐅᓪᓗᒥᒧᑦ ᑎᑭᖦᖢᒍ: ᓄᕕᐱᕆ 27

ᓄᓇᓕᒃ

ᖃᐅᔨᓴᖅᑕᐅᒐᒥ ᐱᖃᓪᓚᕆᖕᓂᕋᖅᑕᐅᕗᖅ

ᖃᐅᔨᓴᖅᑕᐅᒐᒥ ᐱᖃᙱᓐᓂᕋᕐᑕᐅᕗᖅ
ᐊᕐᕕᐊᑦ 119 471
ᑎᑭᕋᕐᔪᐊᖅ 19 80
ᑲᖏᖅᖠᓂᖅ 19 188
ᓴᓂᑭᓗᐊᖅ 2 168
ᑲᑎᖦᖢᒋᑦ  159 907

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏᑦ: ᓄᕕᐱᕆ 27

ᑲᑎᖦᖢᒋᑦ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂᒃ ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ ᑲᑎᖦᖢᒋᑦ ᐊᓂᒍᐃᓯᒪᔪᑦ ᑲᑎᖦᖢᒋᑦ ᐃᓄᐃᑦ ᒪᓕᒃᑕᐅᔪᑦ ᒫᓐᓇ ᐃᓄᐃᑦ ᖃᐅᔨᓴᖅᑕᐅᔪᑦ
159 151 8 4744 765

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᓄᑐᐊᒃᑯᕖᑦ)  
ᖃᓄᐃᑦᑕᖅᑐᖅᖢᑎᒃ ᐊᐅᓪᓚᖅᓯᒪᖕᒪᖔᑕ  ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᓄᕕᐱᕆ 26−ᒥ ᐱᒋᐊᖅᖢᒍ
ᐋᓐᓂᐊᕐᕕᓕᐊᖅᑐᑦ 339
ᑭᒃᑯᑐᐃᓐᓇᑦ 159
ᑲᑎᖦᖢᒋᑦ  498

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ  ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᐸᒃᑕᐅᑦᑕᐃᓕᕕᖕᓂᒃ
ᓄᕕᐱᕆ 27 45
ᓄᕕᐱᕆ 28 2
ᓄᕕᐱᕆ 29. 4
ᓄᕕᐱᕆ 30 91
ᑎᓯᐱᕆ 01 − 28
ᑲᑎᖦᖢᒋᑦ  170

ᐱᑕᖃᕆᐊᖃᓪᓚᕆᒃᑐᓂᒃ ᐃᖅᑲᓇᐃᔭᖅᑎᓂᒃ ᑐᒃᓯᕋᐅᑏᑦ:

ᓄᕕᐱᕆ 26−ᒥ ᐱᒋᐊᖅᖢᒍ, 9453−ᓂᒃ ᑐᒃᓯᕋᖅᑐᖃᓚᐅᖅᐳᖅ, 4431−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ # %
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ) 6265 66.3%

ᐊᖏᖅᑕᐅᙱᑦᑐᑦ

281 3.0%
ᐅᑕᖅᑭᔪᑦ 298 3.2%
ᐊᐅᓪᓚᕐᕕᐅᔪᓐᓇᕐᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᑦ  2609 27.6%
ᑲᑎᖦᖢᒋᑦ  9453 100%

 

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐅᖃᐅᓯᐅᓚᐅᖅᑎᓪᓗᒍ ᒐᕙᒪᑐᖃᒃᑯᓐᓂᑦ ᓄᕕᐱᕆ 25−ᒥ, ᓄᓇᕗᑦ ᒐᕙᒪᖓ ᐱᓯᒪᓕᖅᐳᖅ ᑮᓇᐅᔭᖁᑎᒋᔭᐅᒃᑲᓐᓂᕐᓂᐊᖅᑐᓂᒃ ᐃᑲᔪᖅᑐᐃᔪᒪᓪᓗᑎᒃ ᐅᐸᒃᓯᒪᙱᒃᑲᓗᐊᕐᓗᒍ ᐃᓕᑦᑎᕙᓪᓕᐊᓇᔭᕐᓂᕐᒥᒃ.   

ᑮᓇᐅᔭᓂᒃ ᒪᓂᒪᔪᖃᖅᑎᓪᓗᒍ $1.18−ᒥᓕᐊᓂᒃ, ᐃᓕᓐᓂᐊᕐᓂᓕᕆᔨᒃᑯᑦ ᐱᕙᒌᔭᖅᓯᒪᕗᑦ ᓂᐅᕕᕈᒪᓪᓗᑎᒃ ᐅᑯᓂᖓ:

  • 2,192−ᓂ ᐱᓕᕆᔾᔪᑎᓂᒃ (ᐊᕕᒃᑕᐅᓗᓂ ᐅᑯᖕᓄᙵ, Chromebooks ᐊᒻᒪᓗ Apple iPads)
  • 2,192−ᓂᒃ ᓄᒃᑕᖅᑎᑕᒃᓴᐅᔪᓂᒃ ᖃᕆᑕᐅᔭᒧᑦ ᑲᑉᐳᑎᔭᐅᕙᒃᑐᓂᒃ
  • 350−ᓂᒃ ᓱᕋᒃᓴᕋᐃᙱᑦᑐᓂᒃ ᐴᓂᒃ ᐃᓚᖃᕐᓗᓂ ᓇᕿᑦᑕᕐᕕᖕᒥᒃ iPad−ᓄᑦ

ᐱᓕᕆᔾᔪᑏᑦ ᐃᑭᐊᖅᑭᕕᖕᒧᓪᓗ ᐊᑐᖅᑕᐅᔪᓐᓇᖅᑐᑦ ᑐᓂᐅᖅᑲᐅᑕᐅᓂᐊᖅᐳᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᕕᖕᒥᓗ ᐃᖅᑲᓇᐃᔭᖅᑎᓄᑦ ᐊᒃᑐᖅᑕᐅᓯᒪᔪᓂ ᓄᓇᓕᖕᓂ. ᑖᒃᑯᐊ ᐱᓕᕆᔾᔪᑏᑦ ᐃᓚᒋᐊᕈᑕᐅᕗᑦ 3,000−ᓄᑦ ᐱᓕᕆᔾᔪᑎᓄᑦ ᓂᐅᕕᖅᑕᐅᓯᒪᕙᒌᖅᑐᓄᑦ ᐱᓕᕆᕝᕕᒋᔭᐅᔪᒥᑦ.

 

ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᐱᔨᑦᑎᕈᑎᖏᑦ 

ᐅᓪᓗᒥ ᒥᓂᔅᑕ ᐊᕿᐊᕈᖅ ᐱᒋᐊᖅᑎᑦᑎᖅᑲᐅᕗᖅ ᐊᐃᑉᐸᖓᓄ ᐱᓕᕆᐊᖑᓂᐊᖅᑐᒥᒃ ᒪᑯᓄᖓ, ᒥᑭᑦᑐᓄᑦ ᓇᖕᒥᓂᕆᔭᐅᔪᓄᑦ ᐃᑲᔪᖅᑐᐃᓂᕐᒧᑦ ᐱᓕᕆᐊᖑᔫᑉ ᐱᓕᕆᐊᖃᓪᓚᕆᒍᒪᕝᕕᖃᖅᖢᓂ ᓄᕙᒡᔪᐊᕐᓇᖅ-19−ᒧᑦ ᐃᑲᔪᖅᑐᐃᓂᕐᒥᒃ. ᒥᑭᑦᑐᑦ ᓄᓇᕗᒻᒥ ᓇᖕᒥᓂᕆᔭᐅᔪᑦ ᒫᓐᓇ ᐊᑐᕈᓐᓇᓕᖅᐳᑦ ᐊᐃᑉᐸᖓᓄᑦ ᑐᓐᓂᖅᑯᑕᐅᔪᓐᓇᖅᑐᓄᑦ $5,000-ᒧᑦ ᑎᑭᓪᓗᒍ. ᑕᒪᒃᑯᐊ ᐊᑦᑎᒃᑐᒦᑦᑐᑦ ᑐᓐᓂᖅᑯᑕᐅᔪᑦ ᐃᑲᔪᖅᐸᒃᐳᑦ ᓄᓇᕗᒻᒥ ᓇᖕᒥᓂᒥᕆᔭᐅᔪᓂᒃ, ᐊᔪᖅᑎᑦᑎᙱᖦᖢᓂ ᑕᒪᓐᓇ ᐊᖑᒻᒪᑎᔪᓐᓇᕐᓂᕐᒥᒃ ᒪᐅᖓᑦᑎᐊᖅ ᐱᔭᐅᔭᕆᐊᓕᖕᓄᑦ, ᑕᐃᒪᐃᓕᐅᕐᓂᕐᒥᓂᓗ ᐊᑐᓕᖅᐸᒃᖢᓂ ᒪᓂᒪᑎᑕᐅᔪᓂᒃ ᑮᓇᐅᔭᖃᖅᑎᑕᐅᓂᕐᒧᓪᓘᓐᓃᑦ ᖃᓄᐃᓕᖓᔪᑦ. 

ᐊᑕᐅᓯᕐᒥᒃ ᒪᒃᐱᖅᑐᒐᓕᖕᒥᒃ ᑎᑎᕋᕆᐊᓕᖕᒥᒃ ᐃᑲᔪᕈᒪᓪᓗᒋᑦ ᐱᓇᔪᒃᑐᑦ ᖃᐅᔨᓂᕐᒥᒃ ᓇᖕᒥᓂᖃᕐᓂᕐᒧᑦ−ᐊᒃᑐᐊᓂᓕᖕᓄᑦ ᐱᓕᕆᕝᕕᖃᕐᓂᕐᒧᑦ ᐊᑭᒋᓇᔭᖅᑕᖏᓐᓂᒃ ᓲᕐᓗ: ᐃᒡᓗᒥᒃ ᐊᑐᖅᑐᐊᕐᓂᕐᒧᑦ, WSCC-ᒧᑦ ᐊᑭᓖᔭᕆᐊᖃᖅᐸᖕᓂᕐᒧᑦ, ᓚᐃᓴᒧᑦ ᐱᔪᓐᓴᐅᑎᖃᕐᓂᕐᒧᓪᓗ ᐊᑭᓄᑦ, ᐅᖅᑰᓴᐅᑎᖃᕐᓂᕐᒧᑦ, ᐆᒻᒪᖅᑯᑎᖃᕐᓂᕐᒧᑦ ᐊᓯᖏᓐᓄᓪᓗ ᐊᐅᓚᑦᑎᓂᕐᒧᑦ ᐊᑭᓕᖅᓱᕆᐊᖃᖅᐸᒃᑐᓄᑦ. ᑖᒃᑯᐊ ᑐᓴᖅᑕᐅᔪᒃᓴᐃᑦ ᐊᒻᒪᓗᑦᑕᐅᖅ ᐃᓗᓕᖃᐅᑦᑎᐊᖅᑐᖅ ᖃᐅᔨᒋᐊᕐᕕᒃᓴᓄᑦ ᒪᕐᕉᖕᓂᒡᓗ ᒪᒃᐱᖅᑐᒐᓕᒃ ᐱᓇᔪᒍᑎᒋᔭᐅᔪᓐᓇᖅᑐᖅ ᐅᕙᓂ ᒪᓂᒪᕗᖅ gov.nu.ca/sbsp.

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕐᓂᖓᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.