ᐅᖃᓚᐅᑎᓯᐅᑏᑦ

You are here

ᓄᕙᒡᔪᐊᕐᓇᖅ-19 ᓄᓇᕗᒻᒥ ᒐᕙᒪᒃᑯᑦ ᓄᑖᙳᕆᐊᖅᑎᑕᖏᑦ - ᔫᓂ 1, 2020

ᔫᓂ 01, 2020

 

ᒥᓂᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦᑭᒡᒐᖅᑐᖅᖢᒍ ᓯᕗᓕᖅᑎ ᓄᑖᙳᕆᐊᖅᑎᑕᐅᔪᑦ:

ᐅᓪᓛᒃᑯᑦ. ᑭᒡᒐᖅᑐᕐᓂᐊᖅᐸᕋ ᓯᕗᓕᖅᑎ ᓴᕕᑲᑖᖅ ᒪᕐᕉᖕᓄᑦ ᓄᑖᙳᕆᐊᖅᑎᑕᐅᔫᖕᓄᑦ.

ᓱᓕ ᓇᓗᓇᐃᖅᓯᒪᓪᓚᕆᒃᑐᓂᒃ ᑕᐃᒪᐃᓐᓇᓱᒋᔭᐅᔪᓂᒡᓘᓪᓃᑦ ᓄᕙᒡᔪᐊᕐᓇᖅ-19−ᒥᒃ ᐱᑕᖃᙱᓚᖅ ᓄᓇᕗᒻᒥ. ᐅᓪᓗᒥᒧᑦ ᑎᑭᖦᖢᒍ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᕝᕕᐅᓯᒪᔪᑦ 1,103−ᖑᕗᑦ. 142 ᐃᓄᐃᑦ ᒫᓐᓇ ᖃᐅᔨᓴᖅᑕᐅᕙᓪᓕᐊᖏᓐᓇᖅᐳᑦ.

ᐅᓪᓗᒥ ᔫᓂ 1−ᖑᕗᖅ, ᑕᒪᓐᓇᓗ ᐃᒪᓐᓇ ᑐᑭᖃᖅᖢᓂ, ᑕᒪᒃᑯᐊ ᐸᐃᕆᕝᕖᑦ ᒪᑐᐃᒃᑲᓐᓂᕈᓐᓇᓕᕐᓂᖏᓐᓂᒃ ᐅᓪᓗᒥ ᒋᐊᕐᓗᑎ, ᑕᐃᒪᐃᑦᑐᒪᒍᑎᒃ ᒪᑐᐃᑐᐃᓐᓇᕆᐊᖃᓕᕈᑎᒡᓗ ᐱᐅᓯᒋᐊᖅᓯᒪᔪᓂᒃ ᓴᓗᒪᓂᕐᒧᑦ ᐊᑐᖅᑕᐅᕙᒃᑐᓂᒃ. ᐊᕕᒃᓯᒪᓂᕐᒥ ᐅᑭᐅᖅᑕᖅᑐᒥ ᒥᕐᙳᓯᐃᕐᓯᕐᕖᑦ ᕼᐋᒻᓚᒃᑯᓐᓂᓗ ᓯᓚᒥ ᐱᙳᐊᕆᐊᖅᑐᕐᕖᑦ ᒫᓐᓇ ᒪᑐᐃᕈᓐᓇᓕᖅᐳᑦ, ᑲᑎᓐᓂᕆᔭᐅᔪᓪᓗ 25−ᓄᑦ ᐃᓄᖕᓄᑦ ᑎᑭᑦᑐᓐᓇᕐᓗᒍ ᐊᔪᕈᓐᓃᖅᑎᑕᐅᒋᕗᑦ.

ᓅᓚᐅᙱᓐᓂᑦᑎᓐᓂ ᐊᓯᖏᓐᓄᑦ ᓄᑖᙳᕆᐊᖅᑎᑕᐅᔪᓄᑦ, ᐱᕕᒃᓴᖃᕐᓂᕐᓂ ᐃᓕᓴᖅᓯᔪᒪᕗᖓ ᓄᓇᕗᒻᒥᐅᑦ ᐃᓕᓐᓂᐊᖅᑐᖁᑎᖏᑦ 2020−ᒧᑦ.

ᑐᑭᓯᐅᒪᑦᑎᐊᖅᐳᒍᑦ ᖃᓄᖅ ᐊᔪᕐᓇᖅᑎᒋᓵᕐᒪᖔᑕ ᑕᖅᑮᑦ ᐊᑐᓵᖅᑕᕗᑦ. ᑭᓱᑐᐃᓐᓇᐃᑦ ᐊᔨᒋᙱᓪᓚᕆᒃᓯᒪᕙᖏᑦ, ᐊᒻᒪᓗᑐᖅ ᑕᐃᒪ ᐱᔪᒪᔭᓕᒫᓯ ᐊᓂᒍᐃᓂᕐᒧᑦ ᖁᕕᐊᓱᑎᖃᕐᓂᕐᒧᓪᓗ ᐊᑐᕈᓐᓇᖅᓯᐅᒃ.

ᑕᐃᒪᓐᓇ ᐅᖄᓪᓚᓚᐅᕐᓗᖓ, ᐊᒃᓱᕈᖅᓯᒪᐃᓐᓇᕋᔅᓯ ᐊᒻᒪᓗ ᐊᓂᒍᐃᓪᓗᓯ. ᑭᓱᑐᐃᓐᓇᑦᑎᐊᒧᑦ ᑕᒪᓐᓇ ᐃᓕᔅᓯᓐᓂᑦ ᐱᔭᐅᔪᓐᓇᙱᓚᖅ; ᓄᕙᒡᔪᐊᕐᓇᖅ-19−ᓘᓐᓃᑦ.

ᐱᒃᑯᒋᔭᖃᖅᐳᒍᑦ ᓴᙱᓂᕆᔭᕐᓂᒃ, ᐊᓯᔾᔨᖅᓴᕋᐃᓐᓂᕆᔭᕐᓂᑦ ᐱᓕᕆᐊᖃᓪᓚᕆᒍᒪᓯᒪᓂᕐᓂᓪᓗ. ᑕᒪᓐᓇ ᖁᕕᐊᓱᒍᑎᒋᔭᐅᓪᓗᐊᖅᐳᖅ, ᐅᖓᓯᒋᒐᓗᐊᕐᓗᒍᓘᓐᓃᑦ, ᐊᖅᑯᓵᒐᒃᓴᐅᔪᒃᑯᓪᓘᓐᓂᑦ ᓄᓇᓯᐅᑎᒃᑯᑦ ᐊᓂᒍᐃᓂᕐᒧᑦ ᖁᕕᐊᓱᖃᑎᒌᒡᓗᓂ, ᐃᓄᑑᓗᓂ ᐊᔾᔨᓕᐅᖅᑕᐅᓗᓂ, ᓯᓚᒥᓘᓐᓃᑦ ᐃᓄᑭᓪᓗᓯ ᐃᓚᒌᓯᒍᑦ, ᐱᖃᓐᓇᕆᓛᖃᑎᒋᔅᓯᒍᓪᓘᓐᓃᑦ.

ᑕᒪᕐᒥᑦᑎᐊᖅ ᓄᓇᕗᒻᒥᐅᓕᒫᑦᑎᐊᖅ ᐃᓕᖕᓂᒃ ᐱᐅᓛᑦᑎᐊᒃᑐᒃᑰᖁᔨᕗᑦ ᐊᑐᕐᓂᐊᓕᕐᒥᔭᕐᓂᒃ ᓇᒧᙵᖅᐸᓪᓕᐊᓂᕆᔭᕐᓄᑦ. ᐱᒃᑯᓇᕐᓂᐊᖅᑐᒻᒪᕆᐅᕗᖅ ᐱᕚᓪᓕᒃᓇᒻᒪᕆᒡᓗᓂᓗ ᓯᕗᒻᒧᐊᖅᐸᓪᓕᐊᓂᐊᕐᓗᓂ ᐊᑐᕐᓂᐊᓕᕐᒥᔭᕐᓂᑦ, ᑕᒪᓐᓇ ᐊᑐᕐᓂᐊᕐᓗᒍ ᖁᐊᖅᓵᕐᓇᕈᓐᓃᓂᑐᐊᖅᐸᑦ.

ᐊᒃᓱᕈᖅᖢᑎᑦ ᐱᓕᕆᖃᖅᑕᖅᓯᒪᕗᑎᑦ ᐱᑐᐃᓐᓇᕆᐊᖃᓕᖅᖢᑎᓪᓗ. ᓇᒧᙵᐸᓪᓕᐊᓂᕆᓚᖓᔭᐃᑦ ᖃᓄᐃᑦᑑᒐᓗᐊᖅᐸᑦ, ᐱᔪᓐᓇᖅᑕᐃ ᑕᒪᓐᓇ.

ᑭᒡᒐᖅᑐᖅᖢᒋᑦ ᓄᓇᕗᑦ ᒐᕙᒪᒃᑯᑦ, ᐃᓕᓐᓂᐊᓵᖅᑐᑦ 2020−ᒥ ᐅᐱᒋᔪᒪᑦᑎᐊᖅᐸᒃᑲ!

 

ᒥᓂᔅᑕ ᐋᓐᓂᐊᖃᖕᓇᙱᑦᑐᓕᕆᔨᒃᑯᑦᓄᑖᙳᕆᐊᖅᑎᑕᖏᑦ:

ᑐᙵᓱᒃᑎᑦᑐᒪᕙᒃᑲ ᓄᓇᕗᒻᒥᐅᓕᒫᑦ ᐅᕙᓐᓄᑦ ᐃᓚᓕᐅᑎᖁᓪᓗᒋᑦ ᖁᕕᐊᓱᒍᑎᖃᕐᓗᑕ ᐆᒥᖓ, ᓄᓇᕐᔪᐊᓕᒫᒥ ᑕᕝᕙᑭᑐᙱᓐᓂᕐᒧᑦ ᐅᓪᓗᕆᔭᐅᔪᒥᒃ, ᑖᓐᓇᓗ ᓈᑦᑏᙳᔭᐅᓵᖅᑐᒥ, ᒪᐃ 31−ᒥ ᑕᐃᒪᐃᓵᖅᖢᓂ. ᑖᓐᓇ ᐊᕐᕌᒍᑕᒫᑦ ᐱᓕᕆᐊᖑᕙᒃᑐᖅ ᓇᓗᓇᐃᔭᐃᕗᖅ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᖁᐊᖅᓵᕐᓇᖅᑐᓂᒃ ᐊᒃᑐᐊᓂᓕᖕᓂᒃ ᑕᕝᕙᑭᒥᒃ ᐊᑐᖅᐸᖕᓂᕐᒥᒃ, ᐱᓇᔪᒡᕕᖃᕈᒪᓪᓗᓂᓗ ᐊᑐᖅᑕᐅᔪᓐᓇᑦᑎᐊᖅᑐᓄᑦ ᐊᑐᐊᒐᕐᓄᑦ ᒥᑭᒡᓕᒋᐊᖅᑎᑦᑎᔪᒪᓗᓂ ᑕᕝᕚᑭᐅᑉ ᐊᑐᖅᑕᐅᕙᖕᓂᖓᓂᒃ.

ᒪᓐᓇᐅᔪᒃᑯᑦ, ᑕᒪᑦᑕ ᐊᒃᓱᕈᖅᐳᒍᑦ ᐊᑐᓪᓚᕆᒃᑎᑦᑐᒪᓪᓗᒋᑦ ᑭᒃᑯᑐᐃᓐᓇᓂᒃ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐊᑐᖅᑎᓯᒪᔭᑦᑎᓐᓂᒃ, ᑕᒪᒃᑯᐊ ᓴᐳᔾᔨᓯᒪᓂᖏᓐᓂᒃ ᐅᕙᑦᑎᓐᓂᒃ ᖁᐊᓵᕐᓇᖅᑐᒥᑦ ᓄᕙᒡᔪᐊᕐᓇᖅ-19−ᒥᑦ. ᐃᓅᖃᑎᑦᑎᓐᓂᒃ ᐅᖓᓯᒃᓴᕋᓱᒃᐸᒃᐳᒍᑦ, ᐊᖏᕐᕋᖅᓯᒪᕙᒃᖢᑕ ᐊᔪᕐᓇᙱᓐᓂᓕᒫᖓ ᒪᓕᒃᖢᒍ, ᐊᒡᒐᕗᓪᓗ ᐅᐊᓴᖅᐸᒃᖢᑎᒍ ᐅᐊᓴᕈᓐᓇᖅᓯᑐᐊᕌᖓᑦᑎᒍ. ᑕᒪᒃᑯᐊ ᐱᓕᕆᐊᖑᔪᑦ ᐅᕙᑦᑎᓐᓂᒃ, ᓄᓇᓕᑦᑎᓐᓂᒃ, ᐅᑭᐅᖅᑕᖅᑐᒥᓗ ᐊᕕᒃᓯᒪᓂᑦᑎᓐᓂᒃ ᖁᐊᖅᓵᕐᓇᖅᑐᒦᙱᑎᑦᑎᕗᑦ. ᑕᕝᕙᑭᒥᒃ ᐊᑐᖅᐸᖕᓂᕐᒥᒃ ᓄᖅᑲᕐᓂᖅ ᐃᓚᒋᔭᐅᒋᕗᖅᑕᐅᖅ ᐅᕙᑦᑎᓐᓂᒃ ᓴᐳᑎᓯᒪᔪᒪᒍᑦᑕ ᐊᒃᑐᖅᓯᓂᕆᔭᐅᔪᒧᑦ ᑕᒪᑐᒧᖓ ᓄᓇᕐᔪᐊᕐᒥ ᓇᒧᙵᕈᓘᔭᖅᑐᒧᑦ ᖃᓂᒪᓐᓇᒧᑦ. ᖃᐅᔨᒪᔪᒍᑦ ᓄᕙᒡᔪᐊᕐᓇᖅ-19 ᐱᓪᓗᐊᑕᕈᑎᓕᒃ ᐊᓂᖅᑎᕆᔾᔪᑎᒃᑯᑦ ᐋᓐᓂᐊᖑᓂᖓᓂᒃ ᖃᐅᔨᓴᖅᓵᓕᔾᔪᑎᓪᓗ ᖃᐅᔨᑎᑦᑎᔪᑦ ᓱᐴᖅᑐᖃᑦᑕᕐᓂᖅ ᖃᐅᔨᔾᔪᑎᒃᓴᖏᓐᓂᒃ ᐱᐅᔪᓐᓃᖅᑎᑦᑎᒃᑲᓐᓂᓲᖅ. ᓱᐴᖅᑐᖅᐸᒃᑐᑦ ᐊᒃᑐᖅᑕᐅᓴᕋᐃᓐᓂᖅᓴᐅᓇᔭᕐᒥᔪᑦ ᓄᕙᒡᔪᐊᕐᓇᖅ-19−ᒧᑦ, ᓲᖃᐃᒻᒪ ᓱᐴᖅᑐᕐᓂᖅ ᐊᖏᒡᓕᒋᐊᖅᑎᑦᑎᖕᒪᑦ ᓯᐊᒻᒪᒃᑎᕆᓇᔭᕐᓂᕐᒥᒃᓴᐊᒃᑐᖅᓯᓂᒃᑯᑦ ᑮᓇᕐᒥᒃ ᖃᖅᖠᓂᒡᓗ. ᐳᐃᒍᖅᑕᐃᓕᒋᑦ: ᐊᒥᖅᑳᖃᑎᖃᖅᑕᐃᓕᒋᑦ ᓯᒡᒐᓖᓂᒃ, ᓱᕐᕋᖕᓇᖅᑐᓂᒃ ᐃᒧᓯᒪᔪᓂᒃ, ᓱᐴᖅᑐᑎᓂᒡᓘᓐᓃᑦ. ᒪᓂᖅᑲᒥᑦ ᐃᒋᑕᐅᓂᑯᓂᒃ ᓯᒡᒐᓖᕕᓂᕐᓂᒃ ᓱᕐᕋᖕᓇᖅᑐᕕᓂᕐᓂᒡᓘᓐᓃᑦ ᑎᒍᓯᑦᑕᐃᓕᕙᒡᓗᑎᒃ. ᐊᒡᒐᑎᑦ ᐅᐊᓴᕋᔪᒡᓗᒋᑦ, ᑮᓇᐃᓪᓗ ᐊᒃᑐᖅᑕᐃᓕᒪᒡᓗᒍ.

ᐱᐅᓛᖅ ᐊᑐᕈᓐᓇᖅᑕᕗᑦ ᖃᓄᐃᙱᑦᑎᐊᕈᓐᓇᕐᓂᕆᔭᑦᑎᓐᓄᑦ ᓱᐴᖅᑐᖃᑦᑕᕈᓐᓃᕐᓂᐅᓇᔭᖅᐳᖅ. ᐋᖅᑭᒃᓯᒪᓕᖅᑎᑦᑎᓗᑕ ᓱᐴᖅᑐᖃᑦᑕᕈᒪᔪᓐᓃᕐᓂᕐᒥᒃ, ᐅᕙᑦᑎᓐᓂᒃ ᓴᐳᑎᓯᒪᔪᓐᓇᖅᐳᒍᑦ ᓄᕙᒡᔪᐊᕐᓇᖅ-19−ᒥᑦ ᐅᓪᓗᒥ, ᐱᐅᓯᒋᐊᖅᑎᒻᒪᕆᒡᓗᒍᓗ ᐃᓅᓯᕗᑦ ᖃᓄᐃᙱᓐᓂᕆᔭᕗᑦ ᐊᒡᒋᖅᐸᓪᓕᐊᔪᓄᑦ ᐱᓇᓱᐊᕈᓯᕐᓄᑦ, ᑕᖅᑭᓄᑦ, ᐊᕐᕌᒍᓄᓪᓗ. ᐃᑲᔪᖅᑕᐅᔪᓐᓇᕐᓂᖅ ᒪᓂᒪᕗᖅ ᑭᓇᑐᐃᓐᓇᑦᑎᐊᒧᑦ ᕿᓂᕈᒪᔪᒧᑦ ᐊᑐᕈᓐᓇᕋᔭᖅᑕᒥᓂᒃ ᐃᑲᔪᖅᑕᐅᓂᐊᕐᓗᑎᒃ ᓄᖅᑲᕐᓂᕐᒧᑦ. ᑐᓴᖅᑎᓪᓗᒍ ᐃᓅᓯᓕᕆᔨ ᑕᕝᕚᑭ ᑕᒫᓂ ᐃᓂᖃᙱᓚᖅ ᕙᐃᔅᐳᒃ ᒪᒃᐱᖅᑐᒐᖓᒍᑦ ᐅᐊᓗᒃᓗᑎᓪᓘᓐᓃᑦ 1-866-368-7848 24 ᐃᒃᑲᕐᕋᓄᑦ ᒪᑐᐃᖓᓲᖅ ᐅᓪᓗᕐᒥ, 7 ᐅᓪᓗᓄᑦ ᐱᓇᓱᐊᕈᓯᕐᒥ. ᐱᔨᑦᑎᕋᕐᓂᐅᔪᖅ ᐃᓛᒃᑰᖅᑐᖅ ᐊᑭᖃᙱᖦᖢᓂᓗ. ᐃᓅᓯᓕᕆᔩᑦ ᐃᓕᖕᓂᒃ ᐃᑲᔪᕈᓐᓇᖅᑐᑦ ᐃᓄᒃᑎᑐᑦ, ᖃᓪᓗᓈᑐᑦ, ᐃᓄᐃᓐᓇᖅᑐᓐ ᐊᒻᒪ ᐅᐃᕖᑐᑦ.

ᑕᕝᕚᑭᒦᑦᑐᒥᒃ ᐅᐃᕆᓐᓇᖅᑐᒥᒃ ᐃᓈᖐᔪᖅ ᑲᒪᔾᔪᑕᐅᕙᒃᑐᖅ, ᒪᓂᒪᒋᕗᖅᑕᐅᖅ ᐊᑭᖃᕋᓂ ᐅᑯᑎᒎᓇᖅ, ᓇᓪᓕᐅᒃᑯᒫᖃᖏᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᖅ ᐱᓕᕆᐊᖑᕙᒃᑐᑎᒍᑦ ᓄᓇᔅᓯᓐᓂ ᐋᓐᓂᕕᐊᓕᐊᕐᕕᔅᓯᓐᓂ, ᐄᔭᒐᖅᑖᕐᕕᖕᒥᓘᓐᓃᑦ. ᐅᖄᓚᖅᑳᕐᓗᓯ, ᐊᐱᕆᓗᒍᓗ ᐋᓐᓂᐊᖃᓇᙱᑦᑐᓕᕆᔨᓯ ᑐᓴᒐᒃᓴᓄᑦ ᐊᑐᖅᑕᐅᖔᓕᕈᓐᓇᖅᑐᓄᓪᓗ ᑕᒪᑐᒧᖓ ᑕᕝᕙᑭᒦᑦᑐᒥᒃ ᐅᐃᕆᓐᓇᖅᑐᒥᒃ ᐃᓇᖐᓲᕐᒥᒃ.

ᖁᔭᓐᓇᒦᒃ.

 

ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᖏᑦ:

ᐅᓪᓛᒃᑯᑦ. ᑲᒪᒋᔭᐅᓪᓗᓂ ᓘᒃᑖᒧᑦ ᐹᑐᓴᓐ−ᒧᑦ, ᓄᓇᕗᑦ ᒐᕙᒪᖓ ᖃᐅᔨᓴᖅᓯᒃᑲᓐᓂᖅᐸᓪᓕᐊᓕᖅᐳᖅ ᐊᑐᖅᑕᐅᔭᕆᐊᓕᖕᓂᒃ ᐃᓕᐅᖅᑲᖅᑕᐅᓚᐅᖅᑐᓂᒃ ᑕᐃᒪᐅᔾᔪᑎᖃᖅᖢᑎᒃ ᓄᕙᒡᔪᐊᕐᓇᖅ-19−ᒥᒃ. “ᓄᓇᕗᑦ ᐊᑐᕐᓂᐊᖅᑕᖓ: ᓯᕗᒻᒧᐊᖅᐸᓪᓕᐊᓂᖅ ᓄᕙᒡᔪᐊᕐᓇᖅ-19 −ᑕᖃᕐᓂᖓᓂ" ᑖᓐᓇᓗ ᓴᖅᑭᑕᐅᓵᓚᐅᖅᖢᓂ ᐱᓇᓱᐊᕈᓯᐅᓵᖅᑐᒥ, ᓴᖅᑭᑎᑦᑎᓪᓗᓂᓗ ᒐᕙᒪᒃᑯᑦ ᖃᓄᐃᓕᐅᕐᓂᐊᖅᑕᖏᓐᓂᒃ ᖃᓱᑎᑦᑎᒋᐊᕈᒪᓪᓗᑎᒃ ᐊᔪᓕᖅᑎᑦᑎᓯᒪᔾᔪᑎᓂᒃ, ᐊᒃᑐᐊᓂᓕᖕᓂᒃ ᒥᑭᒡᓕᒋᐊᖅᑎᑦᑎᔪᒪᓪᓗᑎᒃ ᖁᐊᖅᓵᕐᓇᖅᑐᓂᒃ ᐊᒃᑐᐊᓂᓕᖕᓂᒃ ᖃᓂᒪᓐᓇᖅᑐᒧᑦ, ᑕᐃᒪᐃᓕᐅᕐᓂᕐᒥᓂᓗ ᒥᑭᒡᓕᒋᐊᖅᑎᑦᑎᓯᒪᓗᑎᒃ ᐊᒃᑐᖅᓯᓂᕆᔭᐅᔪᓂᒃ ᓄᓇᕗᒻᒥᐅᓄᑦ. ᑐᙵᕕᒋᓪᓗᒍ ᒫᓐᓇ ᖃᐅᔨᔾᔪᑕᐅᓯᒪᔪᖅ ᖁᐊᖅᓵᕐᓇᕋᔭᖅᑐᓄᑦ ᐊᒃᑐᖅᓯᓂᐅᓇᔭᖅᑐᓄᓪᓗ ᑕᒪᒃᑯᓄᖓ ᐊᑐᖅᑕᐅᑎᑕᐅᔪᓄᑦ, ᒪᑐᐃᖅᓯᒃᑲᓐᓂᕐᓂᖅ ᐃᖅᑲᓇᐃᔭᕐᕕᒋᔭᐅᔪᓂᒃ ᐃᓱᒪᒋᔭᐅᕗᖅ ᐊᑦᑎᒃᑐᒦᓐᓇᓱᒋᔭᐅᓪᓗᓂ ᐊᑐᖅᑕᐅᓕᕋᔭᕐᓂᖏᓐᓄᑦ ᑎᑎᕋᕐᕖᑦ.

ᐅᓪᓗᒥ, ᐅᖃᐅᓯᖃᖅᐳᖓ ᐃᒪᓐᓇ, ᓄᓇᕗᑦ ᒐᕙᒪᖓ ᐊᖏᕐᕋᓂ ᐃᖅᑲᓇᐃᔭᖅᑎᑦᑎᓂᖓ ᐃᓱᓕᓐᓂᖓᓂᒃ ᓄᓇᕗ ᒐᕙᒪᖓᑕ ᐃᖅᑲᓇᐃᔭᖅᑎᖏᓐᓄᑦ. ᐱᒋᐊᕐᓗᓂ ᓇᒡᒐᔾᔭ, ᔫᓂ 8, 2020, ᓄᓇᕗᑦ ᒐᕙᒪᖓᓄᑦ ᐃᖅᑲᓇᐃᔭᖅᑏᑦ ᒫᓐᓇ "ᐊᖏᕐᕋᒥᓂ ᐃᖅᑲᓇᐃᔭᖅᑐᑦ" ᐅᑎᕐᓂᐊᓕᖅᐳᑦ ᐃᖅᑲᓇᐃᔭᕐᕕᒋᕙᒃᑕᑐᖃᒥᓄᑦ.

ᑕᒪᓐᓇ ᐋᖅᑭᒃᓯᒪᓕᖅᑎᑕᐅᔪᖅ ᐋᖅᑭᑕᐅᓚᐅᖅᐳᖅ ᐅᖃᖃᑎᒋᔭᐅᕌᓪᓚᓚᐅᖅᖢᑎᒃ ᑭᒃᑯᑐᐃᓐᓇᓂᒃ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐱᓕᕆᖃᑎᒌᑦ, ᐅᑯᐊᓗ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑎᒃᑯᑦ. ᐃᓕᓴᖅᓯᕗᒍᑦ ᖃᓄᐃᙱᑦᑎᐊᖅᑐᒥᒃ ᐃᖅᑲᓇᐃᔭᕐᕕᖃᕆᐊᖃᓪᓚᕆᖕᓂᖏᓐᓂᒃ ᐃᖅᑲᓇᐃᔭᖅᑎᓕᒫᑦ ᐋᓐᓂᐊᖃᑦᑕᐃᓕᒪᓂᕐᒧᑦ ᖃᓄᐃᖏᑦᓯᐊᕐᓂᕐᒧᓪᓗ ᓴᖅᑭᑎᑦᑎᔪᓐᓇᕐᓗᑎᒃ ᐊᔾᔨᒌᙱᑦᑐᓂᑦ ᐊᔪᙱᑕᖏᓐᓂᒃ, ᐊᔪᙱᓐᓂᖏᓐᓂᒃ, ᐊᒻᒪ ᐆᒻᒪᕆᖕᓂᖓᓂᒃ ᓄᓇᕗᒻᒥᐅᓕᒫᓄᑦ ᐱᔨᑦᑎᕋᖅᑎᓪᓗᒋᑦ.

ᐃᑲᔪᖅᑐᐃᔪᒪᓂᕐᒧᑦ ᖁᐊᖅᓵᕐᓇᙱᑦᑐᒥᒃ ᖃᓄᐃᓐᓇᙱᑦᑎᐊᖅᑐᒥᒡᓗ ᐃᖅᑲᓇᐃᔭᖅᕕᖃᕐᓂᕐᒥᒃ, ᓄᓇᕗᑦ ᒐᕙᓚᖓ ᒪᓕᒃᐳᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᒪᓕᒋᐊᖃᖅᑎᑕᖏᓐᓂᒃ ᖁᐊᖅᓵᕐᓇᖅᑐᓄᑦ ᖃᐅᔨᓴᖅᓯᕙᖕᓂᕐᓂᒥᒃ ᐃᖅᑲᓇᐃᔭᕐᕕᒋᔭᐅᔪᓂᓗ ᐅᔾᔨᖅᓱᖅᑕᐅᖅᑳᕆᐊᓕᖕᓄᑦ, ᒪᒡᓂᓐᓇᕐᓂᐊᖅᖢᑎᒡᓗ ᑕᒪᐃᓐᓂᑦᑎᐊᖅ ᑎᓕᓯᔾᔪᑕᐅᓯᒪᔪᓂᒃ ᐊᑐᕆᐊᖃᙱᑎᑕᐅᔪᓂᒡᓗ ᐋᖅᑭᒃᑕᐅᓯᒪᔪᓂᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᒥᑦ ᑕᐃᒪᐃᔾᔪᑎᖃᖅᖢᓂ ᓄᕙᒡᔪᐊᕐᓇᖅ-19−ᒥᒃ. ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᑦ ᐲᓐᓇᖃᑦᑕᕐᓂᐊᕐᒥᔪᑦ ᑲᔪᓰᓐᓇᖅᑐᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᑐᓴᖅᐅᔪᒃᓴᓂᒃ ᒪᓕᒃᑕᐅᔭᕆᐊᓕᖕᓂᒡᓗ. ᓄᓇᕗᑦ ᒐᕙᒪᖓᑕᑦᑕᐅᖅ ᐃᖅᑲᓇᐃᔭᖅᑎᖁᑎᒥᓄᑦ ᐃᓚᒌᓄᓪᓗ ᐃᑲᔪᖅᑐᐃᓐᓂᕐᒧᑦ ᐱᓕᕆᐊᕆᕙᒃᑕᖓᑦ ᐊᒻᒪᑦᑕᐅᖅ ᒪᓂᒪᒋᕗᖅ ᐃᑲᔪᖅᑐᐃᔪᒪᓪᓗᓂ ᖃᓄᐃᙱᑦᑎᐊᕋᔭᕐᓂᖏᓐᓄᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᑦ ᐃᓚᖏᓪᓗ.

ᑭᒡᒐᖅᑐᐃᔩᑦ ᑕᒪᐃᓐᓂᑦ ᐊᑐᓂᑦ ᐱᓕᕆᕝᕕᒋᔭᐅᔪᓂᑦ ᑕᒪᑐᒪᓂ ᐱᓇᓱᐊᕈᓯᕐᒥ ᐱᓕᕆᐊᖃᖅᐳᑦ ᖃᐅᔨᒪᑦᑎᐊᕈᒪᓪᓗᑎᒃ ᐃᖅᑲᓇᐃᔭᕐᕖᑦ ᐱᑐᐃᓐᓇᕆᐊᖃᓕᕋᓗᐊᕐᒪᖔᑕᐅᑎᕋᔭᕐᓂᖏᓐᓂᒃ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᑦ, ᑕᒪᓐᓇᓗ ᐅᖓᓯᒃᓴᕆᐊᖃᕐᓂᖅ ᑲᔪᓯᑎᑕᐅᖏᓐᓇᕋᓗᐊᕐᒪᖔ ᖃᐅᔨᒪᑦᑎᐊᕐᒥᓗᑎᒃ. ᐃᓚᖓᒍᑦ ᐊᓯᔾᔨᑲᑕᒋᐊᖃᕐᓂᖅ ᐊᑐᖅᑕᐅᑐᐃᓐᓇᕆᐊᓕᒃ ᐃᖅᑲᓇᐃᔭᖅᑏᑦ ᓅᑉᐸᓪᓕᐊᓕᖅᐸᑕ ᐊᖏᕐᕋᒥᓂᑦ ᐃᖅᑲᓇᐃᔭᕐᕕᖕᒥᓄᑦ.

ᖃᐅᔨᒪᕗᒍᑦ ᐃᓕᓐᓂᐊᕐᕖᑦ ᒪᑐᓚᐅᕐᓂᖏᓐᓄᑦ ᓇᓗᓇᕈᔪᖕᓂᖓᓄᓪᓗ ᐊᐅᔭᒃᑯᑦ ᐅᓪᓗᒃᑯᑦ ᐱᓕᕆᔪᖃᖃᑦᑕᕐᓂᐊᕐᒪᖔᑦ ᑕᒪᑐᒪᓂᐅᔪᖅ, ᐊᖓᔪᖅᑳᕆᔭᐅᔪᓪᓗ ᓄᑕᕋᐃᑦ ᑲᒪᒋᔭᐅᕙᖕᓂᖏᓐᓄᑦ ᐊᓯᖔᖏᑎᒍᑦ ᐱᓕᕆᐊᖃᕆᐊᖃᕐᓂᐊᕐᓂᖏᓐᓄᑦ, ᑕᐃᒪᐃᓐᓂᖓᓄᓪᓗᕗᑦ ᑲᒪᒋᔨᒋᔭᐅᕙᒃᑐᓂᒃ ᖃᐅᔨᒋᐊᓯᑲᐅᑎᒋᖁᓪᓗᒋᑦ ᖃᓄᖔᕈᓐᓇᕋᔭᕐᓂᕐᒥᒃ ᐅᖃᖃᑎᒋᓂᐊᕐᓗᒋᑦ.

ᒫᓐᓇᐅᔪᒃᑯᓪᓗ, ᐃᓱᓕᑦᑕᖅᑐᒥᒃ ᑭᒃᑯᑐᐃᓐᓇᐃᑦ ᐅᐸᖃᑦᑕᕈᓐᓇᕐᓂᐊᖅᑐᑦ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖏᓐᓄᑦ ᐃᑲᔪᖅᑐᐃᔪᒪᓂᕐᒥᓄᑦ ᐃᓅᖃᑎᒌᑦ ᐅᖓᓯᒌᒋᐊᖃᖅᐸᖕᓂᖏᓂᒃ, ᖃᓄᐃᙱᑦᑎᐊᖁᔨᓂᕐᒧᓪᓗ ᖁᐊᖅᓵᕐᓇᖅᑐᒦᖁᔨᙱᓐᓂᕐᒧᑦ ᓄᓇᕗᒻᒥᐅᓕᒫᑦᑎᐊᓂᒃ.

ᐱᕕᒃᓴᖃᕐᓂᕐᓂᑦᑕᐅᖅ ᖁᔭᓕᔪᒪᕙᒃᑲ ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᓕᒫᖏᑦ ᐊᒃᓱᕈᖅᖢᓯ ᐱᓕᕆᖃᑦᑕᖅᓯᒪᓂᔅᓯᓐᓄᑦ ᐱᓕᕇᓐᓇᖃᑦᑕᕈᒪᓂᔅᓯᓐᓄᓪᓗ ᑕᒪᒃᑯᓇᓂ ᐅᓪᓗᓂ ᐊᑐᖅᑕᑦᑎᓐᓂ. ᖃᓄᐃᙱᑦᑎᐊᕐᓂᕆᔭᓯ ᓯᕗᓪᓕᖅᐸᐅᑦᑎᐊᑎᓯᒪᑦᑎᐊᖅᐸᕗᑦ.

ᖁᔭᒋᔪᒪᕙᒃᑲᑦᑕᐅᖅ ᓄᓇᕗᒻᒥᐅᑦ ᑲᔪᓰᓐᓇᖅᑐᒥᒃ ᐅᑕᖅᑭᔪᓐᓇᑦᑎᐊᖃᑦᑕᖅᓯᒪᒐᔅᓯ ᑐᑭᓯᐅᒪᖃᑦᑕᖅᓯᒪᒐᔅᓯᓗ, ᑲᔪᓯᓂᖃᖅᑎᓪᓗᑕ ᐊᑐᕆᐊᓕᖕᓄᑦ ᐱᓕᕆᐊᒃᓴᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᓪᓗ.

ᖁᔭᓐᓇᒦᒃ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᙳᕆᐊᖅᑎᑕᖏᑦ

ᐅᓪᓛᒃᑯᑦ. ᐅᓪᓗᒥ ᐱᒋᐊᕐᓇᐅᕗᖅ ᓄᓇᕗᒻᒥᐅᑦ ᐊᑐᕐᓂᐊᖅᑕᖓᓄᑦ ᓯᕗᒻᒧᑦ. ᐸᐃᕆᕝᕖᑦ, ᐊᕕᒃᓯᒪᓂᕐᓂ ᒥᕐᙳᐃᖅᓯᕐᕖᑦ, ᓯᓚᒥᓗ ᐱᙳᐊᕆᐊᖅᑐᕐᕖᑦ ᒪᑐᐃᒃᑲᓐᓂᕈᓐᓇᓕᖅᑎᑕᐅᕗᑦ, ᖃᔅᓯᐅᔪᓐᓇᕐᓂᕆᔭᖏᑕᓗ ᐃᓱᓕᑦᑕᕐᓂᖓ ᓯᓚᒥ ᑲᑎᓐᓂᐊᖅᑐᓄᑦ ᐅᓄᖅᓯᒋᐊᖅᑕᐅᕗᖅ 25-ᓄᑦ. ᐅᓪᓗᒥᓗ ᓯᕗᓪᓕᖅᐹᖑᓂᐊᕆᕗᖅ ᐱᓇᓱᐊᕈᓯᖅ ᒪᕐᕈᐃᖅᓱᕐᓗᒍ ᖃᐅᔨᓴᕐᓂᕆᖃᑦᑕᕐᓂᐊᖅᑕᑦᑎᓐᓂᒃ ᐱᔾᔪᑎᖃᕐᓗᑕ ᓄᑖᙳᕆᐊᖅᑎᑦᑎᓇᔭᕐᓂᕐᒥᒃ ᑭᒃᑯᑐᐃᓐᓇᓂᒃ ᐋᓐᓂᐊᖃᑦᑕᐃᓕᑎᑦᑎᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ.

ᕿᓂᖅᐸᓪᓕᐊᑎᓪᓗᑕ ᐊᓯᔾᔨᖅᑎᕆᓂᕐᒥᒃ ᑭᒃᑯᑐᐃᓐᓇᓂᒃ ᐋᓐᓂᐊᖃᑦᑕᐃᓕᑎᑦᑎᓂᕐᒧᑦ ᐊᑐᖅᑎᑕᑦᑎᓐᓂᒃ, ᐱᕕᒃᓴᖃᓚᐅᑲᒍᒪᒋᕗᖓ ᐅᖃᐅᓯᖃᒃᑲᓐᓂᕐᓗᖓ ᓄᓇᕗᒻᒥᐅᓕᒫᑦᑎᐊᓄᑦ, ᑕᒪᑐᒪ ᐱᒻᒪᕆᐅᓂᖓᓄ ᑲᔪᓰᓐᓇᖅᑎᑦᑎᓂᖅ ᐃᓅᖃᑎᒥᓂᒃ ᐅᖓᓯᒃᓴᕆᐊᖃᖅᐸᖕᓂᕐᒥᒃ. ᐋᖅᑭᒃᓯᒪᓕᕋᓗᐊᖅᑎᓪᓗᑕ ᐅᓪᓗᒥ ᐊᓯᔾᔨᖅᑎᕆᓂᕐᒥᒃ ᐊᑐᖅᑕᐅᔭᕆᐊᓕᖕᓂᒃ, ᓱᓕ ᐋᖅᑭᒃᓯᒪᙱᓚᒍᑦ ᑕᒪᓐᓇ ᐃᓅᖃᑎᒥᒃ ᐅᖓᓯᒃᓴᕆᐊᖃᖅᐸᖕᓂᖅ ᐃᓱᒪᒋᙱᒥᐊᕐᓗᒍ, ᓱᓕ ᐊᑐᕆᐊᖃᕐᓗᒍ.

ᐅᔾᔨᕆᔭᖃᖅᓯᒪᕗᒍᑦ ᐊᐳᖃᑦᑕᐅᑎᕙᒃᑐᓂᒃ ᑐᔾᔭᖅᓯᓂᒃᑯᑦ ᖃᐅᔨᓴᖅᑕᐅᕙᓪᓕᐊᔪᓂᒃ ᐃᓄᖕᓂᒃ, ᑕᒪᒃᑯᐊ ᐃᓄᐃᑦ ᐊᐳᖃᑦᑕᐅᑎᕙᓪᓕᐊᕙᖕᓂᖏᑦ ᐅᔾᔨᕐᓇᖅᑐᒃᑯᑦ ᐊᖏᒡᓕᕙᓪᓕᐊᓂᖏᓐᓂᒃ. ᐊᖏᓂᖅᓴᐅᒃᐸᑕ ᐊᐳᖃᑦᑕᐅᑎᕙᖕᓃᑦ ᐅᔾᔨᕐᓇᖅᑐᒻᒪᕆᒃᑯᑦ ᐊᔪᕐᓇᕐᓂᖅᓴᐅᓇᔭᖅᑐᖅ ᓇᓗᓇᐃᖅᓯᔭᕆᐊᒃᓴᖅ ᐊᑐᖅᑎᑦᑎᑕᐃᓕᔭᕆᐊᒃᓴᕐᓗ ᓯᐊᒻᒪᒃᐸᓪᓕᐊᓇᔭᕐᓂᖓᓂᒃ ᓄᕙᒡᔪᐊᕐᓇᖅ-19 ᓄᓇᓕᑦᑎᓐᓂ.

ᓄᕙᒡᔪᐊᕐᓇᖅ-19 ᓱᓕ ᖁᐊᖅᓵᕐᓇᖅᑎᑦᑎᕗᖅ ᓄᓇᕗᒻᒥᐅᓄᑦ, ᐊᒻᒪᓗ ᑭᑭᑕᐅᓇᔭᙱᑦᑎᐊᖅᖢᑕ ᑕᒪᑐᒧᖓ ᓇᒧᙵᕈᓘᔭᖅᓯᒪᔪᒧᑦ ᖃᓂᒪᓐᓇᒧᑦ. ᐅᓪᓗᒥ ᒪᐅᖓ ᐅᕙᑦᑎᓐᓂᒃ ᑎᑭᐅᑎᓯᒪᑎᑉᐳᒍᑦ, ᖁᔭᓐᓇᒦᒃ ᑲᑐᔾᔨᓪᓗᑕ ᐱᓇᔪᖃᑦᑕᓯᒪᓂᑦᑎᓐᓄᑦ, ᑭᓯᐊᓂᓗᑦᑕᐅᖅ ᓱᓕ ᑕᒪᒃᑯᐊ ᐱᓇᔪᒃᑕᕗᑦ ᑲᔪᓰᓐᓇᕆᐊᖃᓪᓚᕆᒃᖢᑎᒃ.

ᑕᐃᒪᓐᓇ ᐅᖄᓪᓚᓚᐅᖅᖢᖓ, ᖁᕕᐊᓱᒃᐳᖓ ᐅᑯᓂᖓ ᓄᑖᙳᕆᐊᕐᓂᐊᓕᖅᑐᓂᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐊᑐᖅᑕᐅᔭᕆᐊᓕᖕᓄᑦ ᐊᑐᖅᑕᐅᓂᐊᓕᕐᒥᔪᓄᑦ ᐱᓇᓱᐊᕈᓯᐅᓂᐊᖅᑑᖕᓂ ᒪᕐᕉᖕᓂ.

ᒫᓐᓇ ᐊᑐᓯᑲᐅᑎᒋᓪᓗᓂ, ᑕᒫᓂᑦᑕᐃᓐᓇᖅ ᐅᑭᐅᖅᑕᖅᑐᒥ ᖃᖓᑕᓂᕐᒧᑦ ᐅᖃᐅᔾᔪᓯᐊᖑᓯᒪᔪᑦ ᐊᑐᕈᓐᓃᖅᑎᑕᐅᑲᐅᑎᒋᕗᑦ. ᖃᖓᑕᓂᖅ/ᓄᒃᑕᕐᓂᖅ ᓄᓇᕗᑦ ᓯᓚᑖᓄᑦ ᓱᓕ ᐊᑐᖁᔭᐅᙱᓚᖅ. ᑭᒃᑯᑐᐃᓐᓇᐃᑦ ᐊᐅᓪᓚᖅᑐᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᐅᑉ ᓯᓚᑖᓄᑦ ᖃᐅᔨᒪᔭᕆᐊᖃᖅᐳᑦ ᑕᒪᒃᑯᓂᖓᑐᐃᓐᓇᐅᙱᑦᑐᖅ ᐃᓄᑑᔭᕆᐊᖃᖅᑎᑕᐅᓂᕐᓂᒃ ᐅᑎᕐᓂᐊᕐᓗᓂ, ᑭᓯᐊᓂᓗᑦᑕᐅᖅ ᐊᓯᖏᓐᓂᒃ ᐊᑐᖅᑕᐅᔭᕆᐊᓕᖕᓂᒃ ᐊᓯᖏᑦ ᓄᓇᓖᑦ ᐱᔪᓐᓇᐅᑎᓖᑦ ᐃᓕᓯᒪᑐᐃᓐᓇᕆᐊᖃᖅᑕᖏᓐᓂᒃ ᐃᓱᓕᑦᑕᖅᑎᑦᑎᔪᒪᓪᓗᑎᒃ ᐊᑐᓗᐊᖅᑎᑦᑎᑦᑕᐃᓕᒪᔪᒪᓪᓗᑎᒡᓗ ᓄᒃᑕᕐᓂᕆᔭᐅᕙᒃᑐᒥᒃ.

ᔫᓂ 8−ᖑᓕᖅᐸᑦ, ᐃᖅᑲᓇᐃᔭᕐᕖᑦ ᓂᐅᕕᕐᕕᐅᕙᒃᑐᓪᓗ ᒪᑐᐃᒃᑲᓐᓂᕈᓐᓇᓕᖅᑎᑕᐅᕗᑦ, ᑕᒪᒃᑯᓂᖓ ᖁᐊᖅᓵᕐᓇᖅᑕᐃᓕᒪᓂᕐᒧᑦ ᐊᑐᕆᐊᓕᖕᓂᒃ ᐊᑐᖅᑎᑦᑎᓯᒪᑐᐊᖅᐸᑕ. ᑕᑯᔭᖅᑐᕐᕖᑦ ᓴᓇᐅᒐᕐᓂᒃ, ᑕᑯᔭᒐᖃᕐᕖᑦ, ᕿᒥᕐᕈᐊᒐᖃᕐᕖᓪᓗ ᒪᑐᐃᕈᓐᓇᕆᕗᑦᑕᐅᖅ ᐊᑕᐅᓯᕐᒧᑦ ᐃᓄᖕᒧᑦ ᑕᑯᔭᐅᓂᐊᕐᓗᑎᒃ ᑕᑯᔭᖅᑐᕐᕕᐅᓂᐊᕐᓗᑎᒡᓗ, ᑭᓯᐊᓂᓗᑦᑕᐅᖅ ᓱᓕ ᖃᔅᓯᐊᕐᔫᓗᑎᒃ ᑕᑯᔭᖅᑐᖃᑎᒌᖕᓃᑦ ᐊᔪᖅᑎᑕᐅᕗᑦ. ᐊᒻᒪᑦᑕᐅᖅ ᐊᖏᓂᖅᓴᒥᒃ ᒪᓂᒪᓂᖅᑕᖃᖃᑦᑕᕐᓂᐊᓕᖅᐳᖅᐅᐸᒃᓯᓗᓂ ᖃᓄᐃᙱᓐᓂᕐᒧᑦ ᖃᐅᔨᓴᖅᑕᐅᓂᕐᓂᒃ ᐋᓐᓂᐊᕕᓕᐊᕐᕕᖕᓂ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ.

ᔫᓂ 15−ᖑᓕᖅᐸᑦ, ᑭᒍᑎᓕᕆᓃᑦ, ᑎᒥᒃᑯᑦ ᐃᓗᐊᖅᓴᖅᑕᐅᓃᑦ, ᐃᖃᐃᓕᓴᖅᑕᐅᓃᑦ ᑎᒥᒃᑯᑦ, ᐃᖃᐃᓕᓴᖅᑕᐅᓗᓂᓗ ᑲᒪᒋᔭᐅᓃᑦ ᐱᒋᐊᕈᓐᓇᖅᓯᑎᑕᐅᒋᕗᑦ. ᐃᖃᐃᓕᓴᕐᕖᑦ ᐳᐃᔾᔪᕌᕐᕖᓪᓗ ᒪᑐᐃᒃᑲᓐᓂᕈᓐᓇᖅᓯᑎᑕᐅᓂᐊᕆᕗᑦ ᐃᓄᑑᓗᓂ ᐃᖃᐃᓕᓴᕐᓂᕐᓄᑦ ᐳᐃᔾᔪᕋᕆᐊᓗᓂᓗ ᑲᐃᕕᑲᑕᑐᐃᓐᓇᕐᓗᓂ ᐳᐃᔾᔪᕋᕐᕕᖕᒥᒃ.

ᐅᔾᔨᕈᓱᖕᓂᐊᖅᐳᓯ, ᑕᒪᒃᑯᐊ ᐊᑐᖅᑕᐅᔭᕆᐊᓖᑦ ᐊᓯᔾᔨᖅᑕᐅᑐᐃᓐᓇᕆᐊᖃᕐᓂᖏᓐᓂᒃ ᖃᓄᐃᓐᓂᕆᔭᐅᔪᑦ ᐊᓯᔾᔨᕐᓂᖅᐸᑕ.

ᖁᔭᓐᓇᒦᒃ.

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓂ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᓄᕙᒡᔪᐊᕐᓇᖅ-19−ᒧᑦ ᐅᖄᓚᕝᕕᒃᓴᖅ, ᓇᖕᒥᓂᕐᓗ ᖃᐅᔨᓴᕐᓂᕐᒧᑦ ᐊᑐᖅᑕᐅᔪᓐᓇᖅᑐᖅ

ᑭᓇᑐᐃᓐᓇᑦᑎᐊᖅ ᐃᓱᒪᒋᔭᖃᕈᓂ ᐊᐴᑎᓯᒪᓚᐅᕋᓱᒋᓗᓂ ᓄᕙᒡᔪᐊᕐᓇᖅ-19−ᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᒧᑦ ᐅᖄᓚᕝᕕᐅᔪᓐᓇᖅᑐᒧᑦ ᐅᕗᖓ, 1-888-975-8601 10−ᒥᑦ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖓᓂ, ᐅᕝᕙᓘᓐᓃᑦ ᖃᐅᔨᑎᑲᐅᑎᒋᓗᒋᑦ ᓄᓇᓕᖕᓂ ᐋᓐᓂᐊᕕᖓᑦ, ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᑎᓪᓗ ᐊᖏᕐᕋᖅᓯᒪᓗᑎᓪᓗ ᐅᓪᓗᓄᑦ 14-ᓄᑦ.

ᑭᓇᑐᐃᓐᓇᑦᑎᐊᖅ ᖃᕆᑕᐅᔭᒃᑰᕈᓐᓇᐅᑎᖃᖅᑐᖅ ᐱᓕᕆᔪᓐᓇᕆᕗᖅ ᐃᑭᐊᖅᑭᕕᒃᑯᑦ ᓇᖕᒥᓂᖅ−ᖃᐅᔨᓴᕈᒪᔪᑦ ᐅᕙᓂ, nu.thrive.health

ᐅᓄᕐᓂᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐊᓂᑦᑕᐃᓕᔭᕆᐊᖃᖅᑐᓄᑦ ᐃᓃᑦ)

ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ

ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᒪᐃ 29-ᒥᑦ ᐱᒋᐊᖅᖢᓂ

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᓯᒪᔪᑦ

158

ᑭᒃᑯᑐᐃᓐᓇᑦ

116

ᐃᓕᓐᓂᐊᖅᑏᑦ

0

ᑲᑎᖦᖢᒋᑦ

274


ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐊᐅᓪᓚᕐᕕᒃᓴᖓᑕ ᐅᓪᓗᐊ

ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐅᐸᒃᑕᐅᑦᑕᐃᓕᒪᔪᓂᖔᖅᑐᑦ

ᒪᐃ 30

0

ᒪᐃ 31

9

ᔫᓂ 1

35

ᔫᓂ 2

6

ᔫᓂ 3

16


ᐱᕕᒡᔪᐊᓂᒃ ᐃᖅᑲᓇᐃᔭᖅᑎᓂᒃ ᐱᔪᒪᔾᔪᑕᐅᔪᑦ

ᒪᐃ 31−ᒥ ᐱᒋᐊᖅᖢᓂ, 1,291−ᓂᒃ ᑐᒃᓯᕋᖅᓯᒪᔪᖃᖅᐳᖅ, 987−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃᑐᒃᓯᕋᕈᑕᐅᔪᑦ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ

#

%

ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᒻᒪᕆᐊᓗᖕᓂᑦ ᐱᒻᒪᕆᐅᓗᐊᙱᑦᑐᓂᒡᓗ)

1100

85.7%

ᐊᖏᕐᑕᐅᙱᑦᑐᑦ

146

11.4%

ᐅᑕᖅᑭᔪᑦ

45

3.0%

ᑲᑎᖦᖢᒋᑦ

1291

100%

ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ. ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.

  • ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
  • ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
  • ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.
     

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᕆᔭᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.

ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ. ᑕᒪᕐᒥᑦᑎᐊᖅ ᑕᑯᔭᔅᓴᓕᐊᖑᓯᒪᔪᑦ ᐃᓂᔅᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.

MHA−ᑯᑦ ᐅᖄᓚᐅᑎᒃᑯᖔᖅ ᖃᐅᔨᓴᖅᑕᐅᖃᑦᑕᕐᓂᐊᓕᖅᑐᑦ ᐃᑲᔪᖅᑕᐅᖃᕐᓗᑎᓪᓗ ᐃᓚᖏᓐᓄᑦ ᐃᓄᓕᕆᔭᐅᖃᑦᑕᖅᑐᓄᑦ. ᑕᑯᔭᔅᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᔅᓯᕆᐊᓖᑦ ᐊᒻᒪ ᐱᓕᕆᖃᖅᑕᕐᓂᕆᕙᑦᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ. ᐊᖏᕐᕋᕆᔭᐅᔪᓂ ᐅᐸᒃᓯᕙᖕᓃᑦ ᐃᓗᐊᖅᓴᐃᔭᖅᑐᕐᓗᓂ ᐱᓕᕆᐊᖑᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ ᑕᐃᒪᐃᓕᐅᕆᐊᖃᖅᐸᑕ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

ᑐᐊᕕᕐᓇᖅᑐᑐᐊᑦ ᑭᒍᑎᓕᕆᔨᒧᑦ ᐱᓕᕆᐊᖑᖃᑦᑕᕐᓂᐊᖅᐳᑦ ᓄᓇᕗᒻᒥ ᓄᓇᓕᓕᒫᓂᑦ ᐊᓯᐊᓂᒃ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.

ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᖃᐅᔨᒪᓕᕈᒪᓂᕐᒧᑦ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.

ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.

ᐳᓛᕆᐊᖅᑐᖃᖃᑦᑕᕈᓐᓇᔾᔮᙱᑦᑐᖅ ᐊᕗᖓᑲᓪᓚ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᐅᓂ ᓄᓇᕗᒻᒥ − ᑎᒥᒥᒍᑦ ᐃᓕᖅᑯᓯᖅᓱᙱᑦᑐᓄᑦ ᐃᓂᒋᔭᐅᔪᓂ ᐃᓐᓇᐃᓪᓗ ᐊᖏᕐᕋᕆᔭᖏᓐᓂ.

 

ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐱᔨᑦᑎᕋᕐᓂᕆᔭᐅᕙᒃᑐᑦ

ᑕᒪᕐᒥᑦᑎᐊᖅ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᑦ ᐅᑎᓛᖅᑐᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᕐᕕᖏᓐᓄᑦ, ᐱᒋᐊᕐᓗᓂ ᑕᒪᓐᓇ ᔫᓂ 8, 2020−ᒥ. ᑕᒪᓐᓇ ᐋᖅᑭᒃᓯᒪᓕᖅᑎᑕᐅᔪᖅ ᐋᖅᑭᑕᐅᓚᐅᖅᐳᖅ ᐅᖃᖃᑎᒋᔭᐅᕌᓪᓚᓚᐅᖅᖢᑎᒃ ᑭᒃᑯᑐᐃᓐᓇᓂᒃ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐱᓕᕆᖃᑎᒌᑦ, ᐅᑯᐊᓗ, ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᒡᓗ ᖃᐅᔨᓴᖅᑎᒃᑯᑦ.

ᐃᑲᔪᖅᑐᐃᔪᒪᓂᕐᒧᑦ ᖁᐊᖅᓵᕐᓇᙱᑦᑐᒥᒃ ᖃᓄᐃᓐᓇᙱᑦᑎᐊᖅᑐᒥᒡᓗ ᐃᖅᑲᓇᐃᔭᖅᕕᖃᕐᓂᕐᒥᒃ, ᓄᓇᕗᑦ ᒐᕙᓚᖓ ᒪᓕᒃᐳᖅ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ ᒪᓕᒋᐊᖃᖅᑎᑕᖏᓐᓂᒃ ᖁᐊᖅᓵᕐᓇᖅᑐᓄᑦ ᖃᐅᔨᓴᖅᓯᕙᖕᓂᕐᓂᒥᒃ ᐃᖅᑲᓇᐃᔭᕐᕕᒋᔭᐅᔪᓂᓗ ᐅᔾᔨᖅᓱᖅᑕᐅᖅᑳᕆᐊᓕᖕᓄᑦ, ᒪᒡᓂᓐᓇᕐᓂᐊᖅᖢᑎᒡᓗ ᑕᒪᐃᓐᓂᑦᑎᐊᖅ ᑎᓕᓯᔾᔪᑕᐅᓯᒪᔪᓂᒃ ᐊᑐᕆᐊᖃᙱᑎᑕᐅᔪᓂᒡᓗ ᐋᖅᑭᒃᑕᐅᓯᒪᔪᓂᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᒥᑦ ᑕᐃᒪᐃᔾᔪᑎᖃᖅᖢᓂ ᓄᕙᒡᔪᐊᕐᓇᖅ-19−ᒥᒃ. ᐃᓅᖃᑎᒥᒃ ᐅᖓᓯᒃᓴᕆᐊᖃᕐᓂᖅ ᑲᔪᓯᑎᑕᐅᖏᓐᓇᕐᓂᐊᖅᑐᖅ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖏᓐᓂ, ᓄᓇᕗᑦ ᒐᕙᒪᖓᑕᓗ ᐃᖅᑲᓇᐃᔭᖅᑎᖏᑦ ᐱᑎᑕᐅᕙᓪᓕᐊᖏᓐᓇᖃᑦᑕᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᑐᓴᖅᑕᐅᔪᒃᑕᓂᒃ, ᐃᖅᑲᐃᑎᑦᑎᔾᔪᑎᓂᒡᓗ, ᑲᔪᓰᓐᓇᖅᑐᒃᑯᑦ. ᓄᓇᕗᑦ ᒐᕙᒪᖓᑕᑦᑕᐅᖅ ᐃᖅᑲᓇᐃᔭᖅᑎᖁᑎᒥᓄᑦ ᐃᓚᒌᓄᓪᓗ ᐃᑲᔪᖅᑐᐃᓐᓂᕐᒧᑦ ᐱᓕᕆᐊᕆᕙᒃᑕᖓᑦ ᐊᒻᒪᑦᑕᐅᖅ ᒪᓂᒪᒋᕗᖅ ᐃᑲᔪᖅᑐᐃᔪᒪᓪᓗᓂ ᖃᓄᐃᙱᑦᑎᐊᕋᔭᕐᓂᖏᓐᓄᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᑦ ᐃᓚᖏᓪᓗ.

ᒫᓐᓇᐅᔪᒃᑯᓪᓗ, ᐃᓱᓕᑦᑕᖅᑐᒥᒃ ᑭᒃᑯᑐᐃᓐᓇᐃᑦ ᐅᐸᖃᑦᑕᕈᓐᓇᕐᓂᐊᖅᑐᑦ ᓄᓇᕗᑦ ᒐᕙᒪᖓᑕ ᑎᑎᕋᕐᕕᖏᓐᓄᑦ ᐃᑲᔪᖅᑐᐃᔪᒪᓂᕐᒥᓄᑦ ᐃᓅᖃᑎᒌᑦ ᐅᖓᓯᒌᒋᐊᖃᖅᐸᖕᓂᖏᓂᒃ, ᖃᓄᐃᙱᑦᑎᐊᖁᔨᓂᕐᒧᓪᓗ ᖁᐊᖅᓵᕐᓇᖅᑐᒦᖁᔨᙱᓐᓂᕐᒧᑦ ᓄᓇᕗᒻᒥᐅᓕᒫᑦᑎᐊᓂᒃ. ᑭᒃᑯᑐᐃᓐᓇᐃᑦ ᖃᐅᔨᒋᐊᖃᑦᑕᕈᓐᓇᕐᓂᐊᖅᑐᑦ ᓱᓕ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑎᖏᓐᓄᑦ ᑕᐃᒪᐃᑦᑕᕆᐊᖃᕌᖓᒥᒃ ᐅᖄᓚᐅᑎᒃᑯᑦ ᖃᕆᑕᐅᔭᒃᑯᓪᓗ ᑎᑎᕋᖃᑦᑕᐅᑎᕝᕕᒃᑯᑦ. ᐅᐸᒃᓯᓯᒪᒻᒪᕆᒡᓗᓂ ᑲᑎᖃᑎᖃᕆᐊᖃᖅᑐᖃᕐᓂᖅᐸᑦ,ᑭᒃᑯᑐᐃᓐᓇᐃᑦ ᐊᐱᕆᔭᐅᕗᑦ ᒪᓕᖁᔭᐅᓪᓗᑎᒃ ᐃᓅᖃᑎᒥᒃ ᐅᖓᓯᒃᓴᕆᐊᖃᖅᐸᖕᓂᕐᒥᒃ ᐊᓯᖏᓐᓂᒡᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ ᐊᑐᖅᑕᐅᔭᕆᐊᓕᖕᓂᒃ.

ᓄᓇᕗᑦ ᒐᕙᒪᒃᑯᖏᑕ ᐱᓕᕆᕝᕕᖏᑦ ᐱᑎᑦᑎᖃᑦᑕᐃᓐᓇᕐᓂᐊᖅᐳᑦ ᑭᒃᑯᑐᐃᓐᓇᓄᑦ ᓄᑖᙳᕆᐊᖅᓯᒪᔪᓂᒃ ᖃᓄᑐᐃᓐᓇᖅ ᐋᖅᑭᒋᐊᖅᓯᔪᖃᒃᑲᓐᓂᕌᖓᑦ ᐱᓕᕆᐊᕆᑎᑕᒥᓄᑦ ᐱᔨᑦᑎᕋᕐᓂᕆᔭᒥᓄᓪᓗ, ᑕᒪᓐᓇ ᐃᖅᑲᓇᐃᔭᕐᓂᖅ ᐊᖏᕐᕋᕆᔭᐅᔪᓂ ᐱᓕᕆᐊᖑᖃᑦᑕᖅᓯᒪᔪᖅ ᐃᓱᓕᓕᖅᑎᓪᓗᒍ.

 

ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦᓱᓕᑦᑕᕐᓃᑦ ᐃᖅᑲᓇᐃᔭᖅᑎᓄᑦ ᐅᖃᐅᔾᔪᐃᔾᔪᑕᐅᔪᓂᑦ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᕕᑦ.