You are here
ᓄᓇᕗᑦ ᒐᕙᒪᒃᑯᑦ ᑐᓴᖅᑎᑦᑎᕗᑦ ᐊᖓᔪᖅᑲᐅᑎᓂᒃ ᐊᐅᓚᑦᑎᔨᒃᓴᓂᒃ ᑎᒃᑯᐊᖅᑕᐅᔪᖃᕐᓂᖓᓂ
ᑐᓴᒐᒃᓴᑦ ᓴᖅᑭᑕᐅᔪᑦ
ᐃᕐᖐᓐᓇᖅ ᓴᖅᑭᑦᑕᕆᐊᓕᒃ
ᓄᓇᕗᑦ ᒐᕙᒪᒃᑯᑦ ᑐᓴᖅᑎᑦᑎᕗᑦ ᐊᖓᔪᖅᑲᐅᑎᓂᒃ ᐊᐅᓚᑦᑎᔨᒃᓴᓂᒃ ᑎᒃᑯᐊᖅᑕᐅᔪᖃᕐᓂᖓᓂ
ᖁᕐᓗᖅᑐᖅ, ᓄᓇᕗᑦ (ᔫᓂ 15, 2015) – ᓯᕗᓕᖅᑎ ᐲᑕ ᑕᑉᑑᓇ ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᐅᑯᓂᖓ ᐊᓯᔾᔨᕐᓂᐊᓕᖅᑐᓂᒃ ᓄᓇᕗᑦ ᒐᕙᒪᒃᑯᓐᓄᑦ ᐊᖓᔪᖅᑲᐅᑎᑦ ᐊᐅᓚᑦᑎᔨᒃᓴᓂᒃ.
ᐱᒋᐊᖅᖢᒍ ᒪᐃ 29, 2015, ᕘᔾᔨᓂᐊ ᖁᓚᐅᑦ ᓗᐊᐃᑦ ᒐᕙᒪᓕᕆᔨᒃᑯᑦ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᑖᕆᓚᐅᖅᑕᖓ. ᕘᔾᔨᓂᐊ ᓗᐊᐃᑦ ᐊᐅᓚᑦᑎᔨᒃᑯᓐᓄᑦ ᑐᑭᒧᐊᒃᑎᐅᓚᐅᖅᐳᖅ ᐋᖅᑭᒃᓯᒪᐅᑎᒃᓴᓄᑦ ᐸᕐᓇᐃᔨᓄᑦ ᒐᕙᒪᓕᕆᔨᒃᑯᓐᓂ, ᑭᖑᓂᖔᑦᑎᓐᓂᓪᓗ ᓄᓇᕗᑦ ᑐᙵᕕᒃᑯᓐᓄᑦ ᐊᐅᓚᑦᑎᔨᒻᒪᕆᒋᔭᐅᓚᐅᖅᖢᓂ.
ᐱᒋᐊᕐᓗᒍ ᔫᓂ 15, 2015, ᐲᑕ ᑐᒥᐅᓪᑎ, ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕᐅᑉ ᑐᒡᓕᐊᑕ ᐃᑲᔪᖅᑎᒋᔭᖓ, ᕿᓚᒥᐅᒐᓗᐊᖅ ᐊᖓᔪᖅᑳᕆᔭᐅᓚᐅᑲᖕᓂᐊᖅᑐᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ (QEC). ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᖓᔪᖅᑳᒃᓴᖅ ᐱᓇᔪᒃᑕᐅᔪᒃᓴᒫᙳᕐᓂᐊᖅᖢᓂ, ᐃᓚᒋᔭᐅᓗᓂ ᓄᓇᕗᑦ ᒐᕙᒪᒃᑯᑦ ᐱᓕᕆᐊᕆᔪᒪᔭᖓᓐᓄᑦ ᒪᒃᐱᖅᑕᐅᓇᓱᒃᑐᓄᑦ ᑕᑯᒃᓴᕈᖅᑎᑕᐅᓇᓱᒃᑐᓄᓪᓗ ᒐᕙᒪᒃᑯᑦ ᐊᐅᓚᓂᕆᔭᖏᓐᓄᑦ.
ᐲᑕ ᑐᒥᐅᓪᑎ ᐃᓇᖐᔪᖅ ᐊᓚᐃᓐ ᐸᕆᐅ-ᒥ, ᐅᓪᓗᒥ ᓄᖅᑲᓕᒑᔪᖅ ᓄᓇᕗᒻᒥ ᒐᕙᒪᒃᑯᓐᓂ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓃᓚᐅᙱᑎᓪᓗᒍ, ᐊᓚᐃᓐ ᐸᕆᐅ ᐊᖓᔪᖅᑳᕆᔭᐅᓚᐅᖅᓯᒪᔪᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ.
"ᓴᙱᒃᑎᒋᐊᖅᑎᑦᑏᓐᓇᕋᑦᑕ ᓯᕗᓕᖅᑎᐅᓂᕆᔭᑦᑎᓐᓂ ᑎᒃᑯᐊᖅᓯᕙᒃᖢᑕ ᐊᔪᙱᑦᑎᐊᖅᑐᓂᒃ ᐱᔪᓐᓇᕐᓂᖅᑖᖃᑕᐅᓯᒪᔪᓂᒃ ᐅᔾᔨᕐᓇᖅᑐᓄᑦ ᐊᐅᓚᑦᑎᔨᒋᔨᑖᕆᕙᒃᖢᑎᒍᑦ, ᐱᓕᕆᓇᓱᓪᓚᕆᖕᓂᐊᕆᓪᓗᑕ ᐱᓕᕆᐊᕗᑦ ᐃᖏᕐᕋᑎᑦᑎᐊᖏᓐᓇᕋᓱᒡᓗᒍ," ᐅᖃᓚᐅᖅᐳᖅ ᓯᕗᓕᖅᑎ ᑕᑉᑑᓇ. "ᐊᓚᐃᓐ ᐸᕆᐅ ᖁᔭᒋᔭᒻᒪᕆᐊᓗᒐ ᒐᕙᒪᒃᑯᓐᓄᑦ ᐱᔨᑦᑎᕋᖅᑎᑦᑎᐊᕙᐅᓚᐅᕐᓂᖓᓄᑦ ᑭᖑᓂᙶᑦᑎᓐᓂ ᐃᖅᑲᓇᐃᔮᕆᖃᑦᑕᖅᓯᒪᔭᖏᓐᓂᒃ."
###
ᑐᓴᐅᒪᔪᓕᕆᔨᒃᑯᓐᓂ ᖃᐅᔨᒋᐊᕐᕕᒃᓴᖅ:
ᔮᔅᒦᓇ ᐱᐊᐸ
ᐊᐅᓚᑦᑎᔨᒻᒪᕆᒃ, ᒐᕙᒪᓕᕆᔨᒃᑯᓐᓄᑦ
ᓯᕗᓕᖅᑎ ᑕᑉᑑᓇᐅᑉ ᐊᒡᓚᕝᕕᐊᓂ
ᓄᓇᕗᑦ ᒐᕙᒪᖓ
ᐅᖄᓚᐅᑦ: 867-975-5059
ᐃᕐᖐᓐᓈᖅᑕᐅᑦ: ypepa@gov.nu.ca
