ᐅᖃᓚᐅᑎᓯᐅᑏᑦ

You are here

ᓄᓇᕗᑦ ᒐᕙᒪᒃᑯᖏᑦ ᓄᓇᕗᑦ ᑐᙵᕕᒃᑯᓪᓗ ᐊᑐᐃᓐᓇᐅᑎᑦᓯᓂᐊᖅᑐᑦ $2 ᒥᓕᐊᓐᓂᒃ ᓄᓇᓕᓐᓂ ᓂᕆᔭᑦᓴᖃᖅᑎᑦᓯᓂᕐᒧᑦ ᐃᑲᔫᑎᓄᑦ ᓄᕙᔾᔪᐊᕐᓇᖅᑐᖃᖅᑎᓪᓗᒍ COVID-19

ᐄᐳᕈ 03, 2020

ᐱᕙᓪᓕᐊᔪᑦ ᑐᓴᕋᑦᓴᑦ 

ᓄᓇᕗᑦ ᒐᕙᒪᒃᑯᖏᑦ ᓄᓇᕗᑦ ᑐᙵᕕᒃᑯᓪᓗ ᐊᑐᐃᓐᓇᐅᑎᑦᓯᓂᐊᖅᑐᑦ $2 ᒥᓕᐊᓐᓂᒃ ᓄᓇᓕᓐᓂ ᓂᕆᔭᑦᓴᖃᖅᑎᑦᓯᓂᕐᒧᑦ ᐃᑲᔫᑎᓄᑦ ᓄᕙᔾᔪᐊᕐᓇᖅᑐᖃᖅᑎᓪᓗᒍ COVID-19 

ᐃᖃᓗᐃᑦ, ᓄᓇᕗᑦ (ᐃᐳᕈ 3, 2020) − ᓄᓇᕗᒻᒥ ᓯᕗᓕᖅᑎ ᔫ ᓴᕕᑲᑖᖅ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑦ ᐊᓗᑭ ᑰᑦᑎᖅ ᐅᓪᓗᒥ ᓇᓗᓇᐃᖅᓯᖅᑲᐅᔫᒃ $2 ᒥᓕᐊᓐ ᐅᖓᑖᓃᑦᑐᓂᒃ ᓄᓇᓕᓐᓂ ᓂᕆᔭᑦᓴᖃᖅᑎᑦᓯᓂᕐᒧᑦ ᐃᑲᔫᑎᓄᑦ ᓱᕈᓯᕐᓄᑦ ᐃᓄᑐᖃᕐᓄᓪᓗ ᐱᔾᔪᑕᐅᓪᓗᓂ ᓄᕙᔾᔪᐊᕐᓇᖅ COVID-19 ᓯᐊᕐᒪᐸᓪᓕᐊᓂᖓ. 

ᑖᒃᑯᐊ ᑮᓇᐅᔭᐃᑦ ᑐᓂᐅᖅᑲᖅᑕᐅᓂᐊᖅᑐᑦ ᕼᐊᒻᓚᓄᑦ, ᐊᐅᓚᑦᓯᖁᓪᓗᒋᑦ ᓄᓇᓕᓐᓂ ᐃᑲᔫᑎᑦᓴᓂᒃ ᓈᒻᒪᓈᕆᔭᖏᓐᓄᑦ. ᑮᓇᐅᔭᐃᑦ ᑐᓂᔭᐅᖃᑦᑕᓂᐊᖅᑐᑦ ᓄᓇᓖᑦ ᐊᖏᓂᖏᑦ ᒪᓕᑦᑕᐅᓗᑎᒃ: ᓄᓇᓖᑦ ᐃᓄᓖᑦ 1000 ᑐᖔᓂ $40,000, ᓄᓇᓖᑦ ᐃᓄᓖᑦ 1000 ᐅᖓᑖᓄᑦ $90,000, ᐊᒻᒪᓗ ᐃᖃᓗᐃᑦ $200,000. ᑖᒃᑯᐊ ᑮᓇᐅᔭᐃᑦ ᓂᕿᑦᓯᐊᕙᓐᓂᒃ ᐊᑐᐃᓐᓇᐅᑎᑦᓯᒍᑕᐅᓂᐊᖅᑐᑦ ᓄᓇᕗᒻᒥ ᐃᑲᔪᖅᑕᐅᒋᐊᖃᕐᓂᖅᓴᓄᑦ, ᐊᑐᖅᑕᐅᓗᑎᒃ ᓄᓇᓕᓐᓂ ᖃᔨᐅᒪᓂᖏᑦ ᐱᓕᕆᖃᑎᒌᑦᑎᐅᓂᖏᓪᓗ ᓄᕙᔾᔪᐊᕐᓇᖅᑐᖃᖅᑎᓪᓗᒍ. 

“ᐃᓕᓐᓂᐊᕐᕕᑦ ᒪᑐᓯᒪᓂᖏᓐᓄᑦ ᐊᒥᓲᓗᐊᖅᑐᑦ ᓄᓇᕗᒻᒥᐅᑦ ᓱᕈᓯᖏᑦ ᐅᓪᓛᕈᒻᒥᓴᖃᑦᑕᕈᓐᓃᕐᖓᑕ ᐅᕝᕙᓘᓐᓃᑦ ᐅᓪᓗᕈᒻᒥᓴᖅᑐᖃᑦᑕᕋᑎᒃ ᐱᖃᑦᑕᓚᐅᖅᑕᒥᓐᓂᒃ ᓂᕆᔭᑦᓴᖃᑦᓯᐊᖅᑎᑦᓯᒍᑕᐅᖃᑦᑕᓚᐅᖅᑐᓂᒃ ᓄᓇᓕᑦᑎᓐᓂ,” ᐅᖃᖅᓯᒪᔪᖅ ᓯᕗᓕᖅᑎ ᓴᕕᑲᑖᖅ. “ᐊᑦᓱᕉᑎᖃᖅᑐᒍᑦ ᐃᑲᔪᕈᒪᓂᕐᒧᑦ ᓄᓇᕗᒻᒥᐅᓕᒫᓂᒃ ᓵᙵᔭᐅᑎᓪᓗᑕ ᑕᒪᑐᒥᖓ ᓄᕙᔾᔪᐊᕐᓇᖅᑐᒥᒃ, ᖁᕕᐊᒻᒪᕆᑦᑐᑕᓗ ᐃᑲᔪᕈᓐᓇᕋᑦᑎᒍ ᓱᕈᓯᕗᑦ ᐃᓄᑐᖃᕗᓪᓗ ᑲᑐᔾᔨᖃᑎᒋᓪᓗᒋᑦ ᓄᓇᕗᑦ ᑐᙵᕕᒃᑯᑦ ᒫᓐᓇᐅᔪᖅ ᓇᓗᓈᕿᓇᖅᑐᒃᑰᑎᓪᓗᑕ.” 

“ᒫᓐᓇᑲᐅᑎᒋ, ᐱᒻᒪᕆᐅᒻᒪᑦ ᑐᕌᒐᖃᕆᐊᖃᕐᓂᕗᑦ ᓯᐊᕐᒪᖅᑕᐃᓕᑎᑦᓯᓂᕐᒧᑦ. ᐃᓚᒋᔭᐅᓪᓗᑎᒃ ᐊᑐᐃᓐᓇᖃᖅᑎᑦᓯᓂᖅ ᓂᕿᑦᓯᐊᕙᓐᓂᒃ ᑎᒥᒥᒍᑦ ᐊᓐᓇᐅᒪᔾᔪᑎᖃᑦᓯᐊᖁᓪᓗᒋᑦ. ᐊᔭᐅᖅᑐᕆᐊᖅᑕᒃᑲ ᓄᓇᓕᓕᒫᑦ ᑭᓱᑐᐃᓐᓇᕐᓂᒃ ᐃᓱᒪᒋᔭᖃᕈᓐᓇᖁᓪᓗᒋᑦ ᓴᓇᑐᓗᑎᓪᓗ ᐱᓕᕆᔾᔪᓯᕆᓂᐊᖅᑕᒥᓐᓂᒃ ᐊᐅᓚᑦᓯᓂᐊᖅᑎᓪᓗᒋᑦ ᑕᒪᑐᒥᖓ ᐃᑲᔫᑎᒥᒃ,” ᐅᖃᖅᓯᒪᔪᖅ ᐊᖏᔪᖅᑳᖅ ᑰᑦᑎᖅ. 

ᑮᓇᐅᔭᓂᒃ ᐃᑲᔫᑎᖃᕐᓂᕐᒧᑦ ᐊᖏᕈᑏᑦ ᓂᕆᐅᒋᔭᐅᔪᑦ ᐱᔭᕇᖅᑕᐅᓛᕐᓂᖏᓐᓂᒃ ᕼᐊᒻᓚᒃᑯᓐᓄᑦ ᐱᓇᓱᐊᕈᓯᐅᓛᖅᑐᒥ. ᓂᕆᔭᑦᓴᐃᑦ ᐱᔾᔪᑎᓖᑦ ᐊᑕᖏᖅᑐᓂᒃ ᓂᕿᑦᓯᐊᕙᓐᓂᓪᓗ ᐊᑐᐃᓐᓇᐅᑎᑦᓯᓂᕐᒧᑦ, ᓂᕿᓕᕆᔾᔪᓯᐅᔪᓪᓗ ᒪᓕᑦᓯᐊᕈᑕᐅᒋᐊᖃᕐᓂᐊᖅᑐᑦ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᖁᔭᐅᓂᖏᓐᓂᒃ. 

### 

ᑐᑭᓯᒋᐊᕈᒪᒍᕕᑦ, ᖃᐅᔨᒋᐊᕐᕕᒋᓗᒋᑦ ᐅᑯᐊ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
ᓯᕗᓕᖅᑎ ᓴᕕᑲᑖᖅ ᐊᓪᓚᕝᕕᖓᓂ
867-975-5059
cmacleod@gov.nu.ca

ᖃᔮᖅ ᐃᐅᓪᔅᕗᑦ
ᑐᓴᕋᑦᓴᓕᕆᓂᕐᒧᑦ ᐊᖏᔪᖅᑳᖅ
ᓄᓇᕗᑦ ᑐᙵᕕᒃ ᑎᒥᖓᑦ
867-975-4955 ᐅᖓᓯᑦᑐᒥᒃ ᐊᑭᖃᙱᑦᑐᖅ: 1-888-646-0006
qellsworth@tunngavik.com
www.tunngavik.com

ᒪᓚᐃᔭ ᒥᑭᔾᔪᒃ
ᑐᓴᕋᑦᓴᓕᕆᔨᒃᑯᓐᓄᑦ ᑐᑭᒧᐊᖅᑎᑦᓯᔨᐅᑲᐃᓐᓇᖅᑐᖅ
ᓄᓇᕗᑦ ᑐᙵᕕᒃ ᑎᒥᖓᑦ
ᐅᖄᓚᐅᑎᖓ: (867) 975-4907 ᐅᖓᓯᑦᑐᒥᒃ ᐊᑭᖃᙱᑦᑐᖅ: 1-888-646-0006
mmikijuk@tunngavik.com
www.tunngavik.com