ᐅᖃᓚᐅᑎᓯᐅᑏᑦ

You are here

ᓄᓇᕗᒻᒥ ᐅᑎᖅᑐᑦ ᓇᓗᓇᐃᖅᑕᐅᓯᒪᙱᑦᑐᖃᕐᓂᕐᒧᑦ ᓄᕙᔾᔪᐊᕐᓇᖅ 19-ᒥᒃ

ᒪᐃ 04, 2020

 

ᓴᖅᑭᖅᑎᑕᐅᑦᓴᐅᑎᒋᒋᐊᓕᒃ

ᐃᖃᓗᐃᑦ, ᓄᓇᕗᑦ (ᒪᐃ 04, 2020) − ᓘᑦᑖᖅ ᒪᐃᑯᓪ ᐸᑐᓴᓐ, ᓄᓇᕗᒻᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖅ, ᓇᓗᓇᐃᖅᓯᓯᒪᔪᖅ ᓇᓗᓇᐃᖅᑕᐅᓯᒪᔪᖃᙱᓐᓂᖓᓂ ᓄᕙᔾᔪᐊᕐᓇᖅᑐᓕᓐᓂᒃ 19 ᓄᓇᕗᒻᒥ. ᐱᓇᓱᐊᕈᓯᐅᓚᐅᖅᑐᒥ ᖃᐅᔨᔭᒥᓂᖅ ᒥᑦᑎᒪᑕᓕᒻᒥ ᖃᐅᔨᓴᖅᑕᐅᒃᑲᓐᓂᕐᓂᕐᖓᑦ ᓇᓗᓇᐃᖅᑕᐅᓚᐅᖅᑐᖅ ᑕᒻᒪᖅᑐᓂ ᓇᓗᓇᐃᖅᑕᐅᓐᓂᕆᐊᖓᓂᒃ ᓄᕙᔾᔪᐊᕐᓇᖅᑐᖃᙱᑦᑑᓂᖓᓂᒃ.

“ᐊᑕᖏᖅᑐᓂᒃ ᐱᓕᕆᔾᔪᓯᖃᕋᑦᑕ ᖃᐅᔨᓴᖃᑦᑕᓂᕐᒧᑦ ᓇᓗᓇᐃᔭᐃᖃᑦᑕᓂᕐᒧᓪᓗ ᓄᕙᔾᔪᐊᕐᓇᖅ 19 ᓄᓇᕗᒻᒥ ᓇᓗᓇᐃᖅᑕᐅᓯᒪᖁᓪᓗᒍ ᖃᐅᔨᓴᕈᑏᑦ ᓇᓗᓇᐃᖅᑕᐅᖃᑦᑕᕐᓂᖏᓪᓗ ᐊᑐᖅᑕᐅᖃᑦᑕᖁᓪᓗᒋᑦ. ᖃᐅᔨᓴᖅᓯᖃᑦᑕᕐᓂᖅ ᐃᓚᒋᔭᐅᔪᖅ, ᐊᓯᖏᓐᓂᓪᓗ ᖃᐅᔨᓴᕆᐊᖃᑦᑕᕐᓂᖅ, ᖃᐅᔨᓴᖅᐸᓪᓕᐊᖏᓐᓇᕐᓂᖅ ᑐᑭᓯᑦᓯᐊᕋᓱᐊᖃᑦᑕᕐᓂᕐᓗ ᐊᑕᖏᖅᑐᓂᒃ ᖃᐅᔨᒍᑕᐅᖃᑦᑕᖁᓪᓗᒋᑦ,” ᐅᖃᖅᓯᒪᔪᖅ ᓘᑦᑖᖅ ᐸᑐᓴᓐ. “ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᖃᙱᒻᒪᑦ ᓄᕙᔾᔪᐊᕐᓇᖅᑐᓕᓐᓂᒃ 19 ᖃᐅᔨᓴᖅᑕᐅᔪᒥᓂᕐᓂᒃ ᒥᑦᑎᒪᑕᓕᒻᒥᒃ, ᐃᓱᒪᓕᐅᕈᑎᖃᓕᓚᐅᖅᑐᒍᑦ ᓯᕗᓪᓕᖅᐹᖅ ᖃᐅᔨᓴᕋᑦᓴᐅᓚᐅᖅᑐᖅ ᖃᐅᔨᓴᖅᑕᐅᒃᑲᓐᓂᖁᓪᓗᒍ ᐊᒻᒪᓗ ᐊᓯᐊᓂᒃ ᓄᑖᒥᒃ ᖃᐅᔨᓴᖅᑕᐅᖁᓪᓗᒍ ᑭᖑᓂᐊᒍᑦ ᓯᑕᒻᒥᕐᒥ ᓇᓗᓇᐃᖅᓯᓚᐅᖅᑎᓪᓗᑕ.”

ᑐᐊᕕᕐᓇᖅᑐᒃᑯᑦ ᐃᑲᔪᕆᐊᖅᓯᒪᔪᑦ ᓯᕗᓪᓕᖅᐹᒥ ᓄᐊᓚᐅᖅᑕᖏᑦ ᖃᐅᔨᓴᕋᑦᓴᐃᑦ ᑲᑎᑦᑕᒥᓂᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᓄᕙᔾᔪᐊᕐᓇᖅᑐᖃᓚᐅᙱᒻᒪᑕ ᓇᓗᓇᐃᖅᑕᐅᓪᓗᑎᒃ ᐃᖃᓗᓐᓂ.

ᐃᓘᓐᓇᑎᒃ ᓄᓇᕗᒻᒥ ᑎᓕᓯᔾᔪᑎᐅᓯᒪᔪᑦ ᑭᒃᑯᓕᒫᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑐᐊᕕᕐᓇᖅᑑᓂᖓᓄᑦ ᓱᓕ ᐊᑐᕐᓂᐊᖅᑐᑦ. ᑭᓯᐊᓂᓕ, ᖄᒃᑲᓐᓂᖓᒍᑦ ᒪᓕᑦᑕᐅᒋᐊᖃᖅᑎᑕᐅᓚᐅᖅᑐᑦ ᒥᑦᑎᒪᑕᓕᒻᒥ ᓇᓗᓇᐃᖅᑕᐅᓚᐅᖅᑎᓪᓗᒍ ᓄᕙᔾᔪᐊᕐᓇᖅᑐᖃᕐᓂᖓᓂᒃ 19 ᖁᔭᓈᖅᑕᐅᓯᒪᓕᖅᑐᑦ. ᒫᓐᓇᑦᓴᐅᑎᒋ ᐱᒋᐊᕐᓗᓂ, ᑎᑭᕝᕕᐅᖃᑦᑕᕐᓂᖏᑦ ᐊᐅᓪᓚᕐᕕᐅᖃᑦᑕᕐᓂᖏᓪᓗ ᒥᑦᑎᒪᑕᓕᒻᒥᒃ ᐊᓯᖏᓐᓂᓗ ᓄᓇᕗᒻᒥ ᓄᓇᓕᖏᓐᓂ ᐱᒋᐊᒃᑲᓐᓂᕈᓐᓇᖅᓯᔪᑦ, ᓄᓇᓕᖓᓄᓪᓗ ᑐᕌᖓᔪᑦ ᐃᓱᓕᑦᑕᕐᕕᐅᑎᑕᐅᔪᑦ ᓇᒻᒥᓂᖃᖅᑎᐅᔪᓄᑦ ᐱᔨᑦᓯᕋᐅᑎᓄᓪᓗ ᒥᑦᑎᒪᑕᓕᒻᒥ ᖁᔭᓈᖅᑕᐅᔪᑦ.

“ᑕᒪᓐᓇ ᐅᕿᓪᓕᕚᓪᓕᕈᑕᐅᒐᓗᐊᖅ ᐊᒥᓱᓄᑦ ᓄᓇᕗᒻᒥᐅᓄᑦ, ᑐᑭᖃᙱᑦᑐᖅ ᑭᓇᑐᐃᓐᓇᖅ ᖃᓱᒍᑎᖃᕆᐊᖃᕐᓂᖓᓂᒃ ᐅᕝᕙᓗ ᒪᓕᒍᓐᓃᕆᖃᕐᓂᖏᓐᓂᒃ ᐃᓅᖃᑎᒌᑦ ᖃᓂᒌᓗᐊᑦᑕᐃᓕᒋᐊᖃᕐᓂᖏᓐᓂᒃ, ᐊᒡᒐᑎᑦ ᐅᐊᓴᐃᓐᓇᖃᑦᑕᕐᓗᒋᑦ ᓴᓗᒻᒪᕆᐊᖃᑦᑕᕐᓗᒋᓪᓗ ᐊᑦᑐᖅᑕᐅᒐᔪᑦᑐᑦ, ᐊᖏᕐᕋᖅᓯᒪᖃᑦᑕᕐᓗᑎᓪᓗ,” ᐅᖃᖅᓯᒪᔪᖅ ᓯᕗᓕᖅᑎ ᔫ ᓴᕕᑲᑖᖅ. “ᐊᑦᓱᕉᑎᖃᐃᓐᓇᕆᑦᓯ ᒪᓕᑦᓯᐊᕐᓗᒋᑦ ᑕᒪᒃᑯᐊ ᒪᓕᑦᑕᐅᒋᐊᓖᑦ ᖃᓄᐃᑦᑕᐃᓕᖁᓪᓗᑎᑦ ᐊᓯᑎᓪᓗ. ᐊᑕᖏᖅᑐᑕ ᐃᑲᔪᕈᓐᓇᖅᑐᐃᓐᓇᐅᔪᒍᑦ ᓄᓇᓕᕗᑦ ᐊᑦᑕᓇᖅᑐᒦᑦᑕᐃᓕᑎᑕᐅᖁᓪᓗᒋᑦ.”

ᖃᓄᐃᒍᑕᐅᒍᓐᓇᖅᑐᑦ ᓄᕙᔾᔪᐊᕐᓇᖅ 19-ᒧᑦ ᐃᓚᖏᑦ ᐆᑎᕐᓇᕐᓂᖅ, ᖁᐃᖅᓱᖃᑦᑕᕐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ, ᑭᓇᑐᐃᓐᓇᖅ ᓱᓕᔪᖅᓴᕈᓂ ᓴᐳᔾᔭᐅᓯᒪᙱᓪᓗᓂ ᑲᑎᓯᔪᒥᓂᐅᓱᕆᒍᓂ ᓄᕙᔾᔪᐊᕐᓇᖅ 19-ᒧᑦ ᐅᖄᓚᖁᔭᐅᔪᑦ ᓄᕙᔾᔪᐊᕐᓇᖅ 19 ᐅᖓᓯᑦᑐᒥᒃ ᐊᑭᖃᙱᑦᑐᒧᑦ 1888-975-8601 ᐊᑯᓐᓂᖓᓂ 10 ᐅᓪᓛᓴᒃᑯᑦ ᐊᒻᒪᓗ 6 ᐅᓐᓄᕋᑖᒃᑯᑦ, ᐃᑭᐊᖅᑭᕕᒃᑯᑦ ᓇᒻᒥᓂᖅ ᖃᐅᔨᓴᕈᓐᓇᓂᕐᒧᑦ ᐊᑐᕐᓗᑎᒃ ᐅᕙᓂ https://nu.thrive.health/covid19/en ᖃᐅᔨᒃᑲᐃᓗᑎᓪᓘᓐᓃᑦ ᓄᓇᑦᓯᓐᓂ ᐋᓐᓂᐊᕐᕕᒻᒧᑦ ᕿᓚᒥᑦᓴᐅᑎᒋ, ᕿᓚᒥᑦᓴᐅᑎᒋᓗ ᐊᓂᑦᑕᐃᓕᓕᕐᓗᑎᑦ ᐊᖏᕐᕋᓐᓂᒃ ᐅᓪᓗᓂᒃ 14-ᓂᒃ.

ᑐᑭᓯᒋᐊᕈᑎᑦᓴᒃᑲᓐᓂᖅᑕᖃᕐᓂᐊᖅᑐᖅ ᐅᓪᓗᒥ 3-ᒥ ᐅᓐᓄᓴᒃᑯᑦ ᐱᕙᓪᓕᐊᔪᓕᕆᔨᓄᑦ ᓇᓗᓇᐃᔭᐃᓕᖅᑲᑕ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᐅᒍᓐᓇᖅᑑᒃ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐳᓕᐊ
ᑐᓴᕋᑦᓴᓕᕆᓂᕐᒧᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
867-975-5762
cpuglia@gov.nu.ca