ᐅᖃᓚᐅᑎᓯᐅᑏᑦ

You are here

ᒥᓂᔅᑕᐃᑦ ᑐᕋᒐᖓᓐᓂᒃ ᐋᖅᑭᑦᓯᒋᐊᖅᑐᖅᑐᑎᒃ ᑲᑎᒪᓂᖓᑦ ᐱᔭᕇᖅᑐᖅ ᐃᒡᓗᓕᒻᒥ

ᔭᓐᓄᐊᓕ 19, 2018

ᐱᕙᓪᓕᐊᔪᑦ ᑐᓴᕋᑦᓴᑦ

 

ᒥᓂᔅᑕᐃᑦ ᑐᕋᒐᖓᓐᓂᒃ ᐋᖅᑭᑦᓯᒋᐊᖅᑐᖅᑐᑎᒃ ᑲᑎᒪᓂᖓᑦ ᐱᔭᕇᖅᑐᖅ ᐃᒡᓗᓕᒻᒥ

ᐃᖃᓗᐃᑦ, ᓄᓇᕗᑦ (ᔭᓐᓄᐊᓕ 19, 2018) – ᓯᕗᓕᖅᑎ ᐹᓪ ᖁᐊᓴ ᒥᓂᔅᑕᐅᖃᑎᒌᓪᓗ ᑲᑎᒪᓚᐅᖅᑐᑦ ᑕᕝᕙᓂ ᐱᓇᓱᐊᕈᓯᕐᒥ ᐅᖃᖃᑎᒌᒋᐊᖅᑐᖅᑐᑎᒃ ᓯᕗᓪᓕᐅᑎᒍᒪᓂᐊᖅᑕᖏᓐᓂᒃ ᒐᕙᒪᒃᑯᑦ ᓄᑖᒥᒃ ᑐᕌᒐᖅᑖᕆᓂᐊᖅᑕᖓᓂ ᓄᓇᕗᑦ ᑕᓪᓕᒪᖓᓐᓂ ᒪᓕᒐᓕᐅᖅᑏᑦ. ᒥᓂᔅᑕᐃᑦ ᐊᐅᓪᓚᖅᓯᒪᓪᓗᑎᒃ ᑲᑎᒪᓂᕆᓚᐅᖅᑕᖓᒃ ᐃᒡᓗᓕᒻᒥ ᐱᔭᕇᓚᐅᖅᑐᑦ ᓯᑕᒻᒥᕐᒥ.

ᐱᓇᓱᐊᕈᓯᓕᒫᑦ ᑲᑎᒪᒋᐊᖅᑐᖅᓯᒪᑎᓪᓗᒋᑦ, ᒥᓂᔅᑕᐃᑦ ᑲᑎᖃᑎᖃᓚᐅᖅᑐᑦ ᑑᒃᑲᖅ ᐃᓐᓇᒻᒪᕇᑦ ᑲᑎᒪᔨᖏᓐᓂᒃ, ᐃᒡᓗᓕᒃ ᕼᐊᒻᓚᒃᑯᑦ ᑲᑎᒪᔨᖏᓐᓂᒃ, ᑭᖑᓪᓖᑦ ᑕᕐᕆᔭᓕᐅᖅᑎᓂᒃ, ᐃᖅᑲᓇᐃᔭᖅᑎᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᐊᓪᓚᕝᕕᖏᓐᓂ, ᐃᓕᓐᓂᐊᖅᑎᓂᒃ ᒥᑭᔫᑕᐅᓂᖅᓴᓄᑦ ᐃᓕᓐᓂᐊᕐᕕᐊᓗᒻᒥᓗ, ᓄᓇᓕᓐᓄᓗ ᓂᕆᕕᔾᔪᐊᖃᑕᐅᓚᐅᖅᑐᑎᒃ ᓯᑕᒻᒥᐅᑉ ᐅᓐᓄᖓᓂ.

"ᑲᑐᔾᔨᓗᑕ, ᓯᕗᓂᑦᑎᓐᓄᑦ ᑕᑯᓐᓇᕐᓂᖃᖅᑐᒍᑦ ᑕᑯᒍᒪᓪᓗᑕ ᓯᕗᓂᑦᓴᖃᑦᓯᐊᕐᓂᕐᒥᒃ ᓄᓇᕗᒻᒥ ᓄᓇᕗᒻᒥᐅᓄᓪᓗ," ᐅᖃᖅᓯᒪᔪᖅ ᓯᕗᓕᖅᑎ ᖁᐊᓴ. "ᐱᓇᓱᐊᕈᓯᒐᓚᐅᓂᐊᖅᑐᓂ, ᐃᓱᒪᒋᔭᐅᓯᒪᔪᑦ ᐅᖃᐅᓯᐅᖃᑦᑕᓚᐅᖅᑐᑦ ᐊᐅᓪᓚᖅᓯᒪᓪᓗᑕ ᑲᑎᒪᓂᑦᑎᓐᓂ ᒪᓕᒐᓕᐅᖅᑎᓕᒫᑦ ᑲᑎᒪᓂᖓᓄᑦ ᓂᕈᐊᖅᑕᐅᓯᒪᔪᓕᒫᓄᑦ ᒪᓕᒐᓕᐅᖅᑎᓄᑦ, ᐅᖃᐅᓯᑦᓴᒥᓐᓂᑦᑕᐅᖅ ᓇᓗᓇᐃᖅᓯᒍᓐᓇᕐᓂᐊᕐᖓᑕ ᑕᑯᔪᒪᔭᑦᑎᓐᓂᒃ ᓄᓇᑦᑎᓐᓂ. ᑕᒪᓐᓇ ᑲᑐᔾᔨᓂᐅᔪᖅ ᓇᓗᓇᐃᖅᑕᐅᓯᒪᖁᓪᓗᒍ ᐃᓚᐅᖃᑕᐅᔪᐃᓐᓇᐅᓗᑕ ᐱᓕᕆᐊᕆᒋᐊᖃᕐᓂᐊᖅᑎᑕᓐᓂᒃ ᐱᕙᓪᓕᐊᓂᖃᑦᓯᐊᖁᓪᓗᒍ ᓄᓇᕗᑦ."

ᒪᓕᒐᓕᐅᖅᑎᓕᒫᑦ ᑲᑎᒪᓛᖅᑐᑦ ᒪᑦᑎᒪᑕᓕᒻᒥ ᕕᕝᕗᐊᓕᒥ ᐱᔭᕇᖅᑕᐅᒋᐊᖅᑐᕐᓗᓂ ᑭᖑᓪᓕᖅᐹᖅᓯᐅᑎᖓᑦ ᒐᕙᒪᒃᑯᑦ ᑐᕌᒐᑖᖅᑲᐅᕆᓂᐊᖅᑕᖓᑕ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᕼᐃᓗᕆ ᑲᐃᓯ
ᐊᖏᔪᖅᑳᖅ, ᐱᕙᓪᓕᐊᔪᓕᕆᔨᓄᑦ ᑲᒪᔨ
ᓯᕗᓕᖅᑎ ᖁᐊᓴᐅᑉ ᐊᓪᓚᕝᕕᖓᓂ
(867)975-5059
hcasey@gov.nu.ca