ᐅᖃᓚᐅᑎᓯᐅᑏᑦ

You are here

ᒥᐊᓕᒐᕐᒥᐅᑦ ᖃᖓᑕᔫᖓᑦ ᐊᔪᖅᓯᓯᒪᔪᖅ ᐃᖃᓗᓐᓂ

ᐄᐳᕈ 23, 2020


ᓇᓗᓇᐃᕈᑎ

ᒥᐊᓕᒐᕐᒥᐅᑦ ᖃᖓᑕᔫᖓᑦ ᐊᔪᖅᓯᓯᒪᔪᖅ ᐃᖃᓗᓐᓂ

ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᓴᖅᑭᖅᑎᑦᓯᖅᑲᐅᔪᖅ ᑖᑦᓱᒥᖓ ᓇᓗᓇᐃᕈᑎᒥᒃ:

“ᐅᓪᓛᖅ, ᓇᒻᒥᓂᖁᑎᒋᔭᐅᔪᖅ ᒥᐊᓕᒐᐃᑦ ᓄᓇᖓᓐᓂ ᐊᑎᓕᐅᖅᑕᐅᓯᒪᔪᖅ ᖃᖓᑕᔫᖅ ᑐᕌᖅᑐᖅ ᖄᓈᖅ, ᑲᓛᖡᑦ ᓄᓈᓐᓄᑦ ᒥᒍᓐᓇᕐᓂᖏᒻᒪᑦ ᑐᕌᖔᓕᖅᑐᒥᓂᖅ ᐃᖃᓗᓐᓄᑦ.

ᓱᓇᒃᑯᑖᖅᑕᐅᑎ ᖃᖓᑕᔫᖅ ᑕᓪᓕᒪᓂᒃ ᐃᖅᑲᓇᐃᔭᖅᑎᖃᖅᑲᐅᔪᖅ ᐃᑭᒪᔪᓂᒃ ᑲᑎᑕᐅᖅᑲᐅᓪᓗᑎᒃ ᑲᓇᑕᒥ ᑭᒡᓕᖏᓐᓂᒃ ᐱᔨᑦᓯᕋᖅᑎᖏᓐᓄᑦ ᐊᒻᒪᓗ ᓄᓇᕗᒻᒥ ᑲᓇᑕᒥ ᑭᒡᓕᖏᓐᓂᒃ ᐱᔨᑦᓯᕋᖅᑎᖏᓐᓄᑦ ᖃᖓᑕᔫᒃᑯᕕᒻᒥ ᐃᖅᑲᓇᐃᔭᖅᑎᖏᓐᓄᑦ. ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖓᑦ ᖃᐅᔨᒃᑲᖅᑕᐅᑦᓴᐅᑎᒋᖅᑲᐅᔪᑦ.

ᑲᓇᑕᒥ ᑭᒡᓕᖏᓐᓂᒃ ᐱᔨᑦᓯᕋᖅᑎᒃᑯᑦ ᖃᓄᐃᙱᓐᓂᕋᐃᖅᑲᐅᔪᑦ ᐃᖅᑲᓇᐃᔭᖅᑎᖏᓐᓂᒃ ᖃᓄᐃᒍᑎᖃᖅᑲᐅᙱᒻᒪᑕ ᐆᑎᕐᓇᖅᑐᖃᕋᑎᓪᓗ ᖃᖓᑕᔫᒦᑦᑎᓪᓗᒋᑦ ᓱᓕ ᖃᐅᔨᓴᖅᑕᐅᓐᓂᕐᖓᑕ.

ᑎᓕᔭᐅᓯᒪᐅᑎᒃᑯᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᖏᔪᖅᑳᖓᓂᒃ, ᐃᖅᑲᓇᐃᔭᖅᑎᖏᑦ ᓅᑕᐅᓂᐊᖅᑐᑦ ᐊᑐᕐᓗᑎᒃ ᓇᒻᒥᓂᖅ ᑎᒥᒥᒍᑦ ᓴᐳᒻᒥᔭᐅᒍᑎᓂᒃ ᐊᑦᑕᓇᖅᑐᒦᑦᑕᐃᓕᑎᑦᓯᓂᕐᒧᓪᓗ ᒪᓕᑦᓯᐊᕐᓗᑎᒃ ᖃᓂᒌᑦᑕᐃᓕᓗᑎᓪᓗ ᓄᓇᓕᓐᓂ ᑐᔪᕐᒥᕕᒻᒨᖅᑕᐅᓗᑎᒃ, ᐊᓂᒋᐊᖃᔾᔮᙱᑦᑐᑦ ᐃᓪᓗᕈᓯᕐᒥᓂᒃ ᐅᐊᑦᓯᖃᕐᓗᑎᒃ, ᑕᒫᓃᓐᓂᖏᓐᓂ ᐃᖃᓗᓐᓂ.

ᑲᑎᓚᐅᔾᔮᙱᑦᑐᑦ ᖃᖓᑕᔫᒥ ᐃᖅᑲᓇᐃᔭᖅᑎᖏᑦ ᑭᒃᑯᑐᐃᓐᓇᐃᓪᓗ.

ᓄᑖᓂᒃ ᑐᓴᕋᑦᓴᖃᓕᖅᑲᑦ ᑐᓴᖅᑎᑦᓯᒋᐊᓛᖅᑐᑦ.”

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-222-5763
cmacleod@gov.nu.ca