ᑲᒥᓯᓇᒥᙶᖅᑐᖅ

ᑲᒥᓯᓇᒥᙶᖅᑐᖅ

ᐱᒋᐊᖅᐸᓪᓕᐊᓂᐊᓕᖅᑎᓪᓗᒍ ᐱᖓᓱᖓᓐᓂᑦ ᑲᑎᒪᓂᖓᑦ ᓯᑕᒪᒋᓕᖅᑕᖓᑦ ᓄᓇᕗᒻᒥ ᒪᓕᒐᓕᐅᕐᕕᖕᒧᑦ

ᐅᖃᓪᓚᒃᑐᖅ:

ᐅᐱᓐᓇᖅᑐᖅ ᓂᐊᓕ ᑯᓱᒐᖅ

ᓄᓇᕗᒻᒥ ᑲᒥᓯᓇᐅᑉ ᑐᒡᓕᖓ

ᔫᓂ 2, 2015

ᐃᓐᓇᑐᖃᐃᑦ, ᐅᖃᖅᑎ, ᑲᑎᒪᔩᑦ ᒪᓕᒐᓕᐅᕐᕕᖕᒥᑦ, ᐊᒪᓗ ᖃᐃᖁᔭᐅᓯᒪᔪᑦ, ᖁᕕᐊᓱᑦᑎᐊᖅᑐᖓ ᑐᙵᓱᒃᑎᑦᑐᖕᓇᕋᑉᓯ ᐅᒃᑯᐃᖅᑕᐅᓂᖓᓄᑦ ᐱᖓᓱᖓᓐᓂᑦ ᑲᑎᒪᓂᕐᒧᑦ ᓯᑕᒪᒋᓕᖅᑕᖓᑦ ᓄᓇᕗᒻᒥ ᒪᓕᒐᓕᐅᕐᕕᖕᒧᑦ.

ᖁᕕᐊᓱᒃᐳᖓ ᑕᒡᕙᓃᖃᑕᐅᔪᖕᓇᕋᒪ ᐱᔨᑦᑎᕋᐃᓗᖓ ᓄᓇᕗᒻᒥᐅᓂᑦ ᐊᒪᓗ ᑐᒡᓕᕆᓕᖅᑕᖓᓂᑦ ᑲᒥᓯᓇᐅᑉ ᐅᖃᐅᓯᖓ ᒪᓕᒐᓕᐅᕐᕕᖕᒧᑦ ᐱᔾᔪᑎᖃᖅᑐᖅ ᑎᑭᐅᑎᓂᕐᓂᑦ ᐊᒪᓗ ᐱᕙᓪᓕᐊᓂᕆᓕᖅᑕᖓᓐᓂᑦ ᐅᑉᓗᒥᒧᑦ ᑎᑭᖢᒍ.

ᑲᔪᓯᔪᒍᑦ ᓴᙱᒃᑎᑎᒋᐊᒃᑲᓐᓂᕐᓂᕐᒧᑦ ᐱᐊᓂᖕᓂᕆᔭᕗᑦ ᐊᓂᒍᖅᑐᓂᑦ ᑲᑎᒪᓂᐅᓚᐅᖅᑐᑦ ᐊᒪᓗ ᓯᕗᒻᒧᒋᐊᕐᓗᑕ ᓇᓗᙱᓐᓂᖃᕐᓗᑕ ᐱᓕᕆᐊᕆᔭᕆᐊᖃᖅᑕᑉᑎᖕᓂᒃ ᐱᓕᕆᐊᖃᕐᓂᐊᕐᑎᓪᓗᑕ, ᓯᕗᒻᒧᑦ ᐊᑉᓗᖅᑕ.

ᓄᓇᕗᑦ ᓄᓇᐅᔪᖅ ᐊᔾᔨᖃᙱᖢᓂ. ᒐᕙᒪᕗᑦ ᐱᕈᐃᕙᓪᓕᐊᑎᑦᑎᔪᖅ ᐅᔾᔨᕈᓱᒃᑎᑦᑎᓂᕐᒥᒃ ᑐᑭᓯᐊᑎᑦᑎᓂᕐᒥᒡᓗ ᓄᓇᕗᑦ ᐱᓕᕆᐊᕆᖅᑲᐅᑕᐅᔪᒪᔭᖏᓐᓂᑦ ᐊᔾᔨᒌᖏᑦᑐᓄᑦ ᑕᐅᑐᒃᑐᓄᑦ ᑲᓇᑕᒥᑦ ᐊᒪᓗ ᓄᓇᕐᔪᐊᕐᒥᑦ. ᐊᖏᔪᑲᓪᓚᖕᒥᑦ ᐱᕕᖃᖅᑎᑦᑎᓃᑦ ᐊᑐᕐᓂᐊᖅᑕᕗᑦ ᐃᑲᔪᖅᑐᐃᓂᕐᒥᒃ ᐃᒃᐱᒋᔭᐅᓂᖏᑦ ᐃᓄᓗᒃᑖᑦ ᐊᒪᓗ ᓇᖕᒥᓂᖃᖃᑎᒌᒃᑐᓄᑦ ᐱᕙᓪᓕᐊᑎᓐᓂᕐᒧᑦ ᓄᓇᕗᑦ.

ᓯᕗᓕᐅᖅᑎᐅᓂᖏᓐᓂᑦ, ᒐᕙᒪᒃᑯᑦ ᐱᓂᐊᕐᓂᖃᐃᓐᓇᖅᑐᑦ ᐃᓕᓐᓂᐊᕐᓂᕐᒥᒃ, ᐱᕙᓪᓕᐊᓂᕐᒧᑦ ᐱᕈᐃᓂᕐᒥᒃ, ᐊᒪᓗ ᐊᔪᕈᖕᓃᖅᓴᐃᓂᕐᒥᒡᓗ ᐱᓕᕆᐊᒃᓴᓂᒡᓗ ᓯᕗᓪᓕᖅᐸᐅᑎᖢᒋᑦ. ᑕᑯᒃᓴᐅᑎᑦᑎᔪᒍᑦ ᑲᓇᑕᒥᐅᓂᒃ ᓄᓇᕗᑦ ᐃᑲᔪᐃᓂᖃᕐᒪᑦ ᐱᕈᖅᐸᓪᓕᐊᑎᑦᑎᓂᕐᒧᑦ ᖃᑉᓗᓈᑦ ᓄᓇᖓᓐᓂᑦ.

ᓴᙱᒃᑎᑎᓯᒪᔭᖅᐳᑦ ᐱᓕᕆᖃᑎᒌᖕᓂᐅᔪᖅ ᑲᓇᑕᒥᑦ ᐊᒪᓗ ᓄᓇᕗᒻᒥᑦ ᐱᖃᖃᑕᐅᔪᓂᒃ, ᐃᓱᒪᓕᐅᕆᔨᓂᒃ ᐊᒪᓗ ᐱᔅᓂᓯᖃᕐᓂᕐᒧᑦ ᓯᕗᓕᐅᖅᑎᐅᔪᓂᒃ.

-ᒪᕐᕈᐃᓕᖓᔪᒃᑯᑦ, ᐅᑭᐅᖅᑕᖅᑐᒥᑦ ᓯᕗᓕᐅᖅᑎᐅᔪᑦ ᓄᑖᖑᖅᑎᑦᑎᓚᐅᖅᑐᑦ ᐱᓂᐊᕐᓂᕆᔭᖏᓐᓂᒃ ᐅᑭᐅᖅᑕᖅᑐᒥᑦ ᑕᐅᑐᒐᖅ-ᒧᑦ ᐱᓕᕆᐊᖃᖅᑐᖅ ᐱᓪᓗᕆᒃᓴᕐᓂᖃᖅᑐᒥᒃ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᒥᑦ ᐋᓐᓂᐊᖃᖅᑕᐃᓕᒪᓂᖃᖅᑐᒥᒃ ᓄᓇᓕᖕᓂᑦ, ᓈᒻᒪᒃᑐᓂᒃ ᐱᕈᖅᐸᓪᓕᐊᓂᕐᒥᒃ ᐊᒪᓗ ᐊᔾᔨᒌᖏᑦᑐᓂᒃ ᐱᕕᖃᕐᓂᐅᔪᓂᒃ ᐊᕙᑎ ᒥᐊᓂᕆᔭᐅᑉᓗᓂ ᑭᖑᕚᒃᓴᕗᑦ ᐃᓱᒪᒋᔭᐅᑉᓗᑎᒃ.

ᓄᓇᕗᑦᑕᐅᖅ ᐱᑎᑦᑎᓂᖃᖅᓯᒪᔪᖅ ᖁᑦᑎᒃᑐᒥᒃ ᐱᓕᕆᓂᖃᖅᑐᓂᒃ, ᓲᕐᓗ ᐅᑭᐅᖅᑕᖅᑐᒥᑦ ᐱᕈᖅᐸᓪᓕᐊᓂᕐᒧᑦ ᑲᑎᒪᔩᑦ, ᐱᖓᖕᓇᖓᓂᑦ ᓯᕗᓕᐅᖅᑏᑦ ᑲᑎᒪᓂᖏᑦ, ᐅᑭᐅᖅᑕᖅᑐᒥᑦ ᐃᓱᒪᒃᑯᑦ ᖃᓄᐃᖏᓐᓂᕐᒧᑦ ᐱᔾᔪᑎᓕᖕᒥᑦ ᑲᑎᒪᓂᕐᓄᑦ, ᐊᒪᓗ ᒥᓂᔅᑕᐃᑦ ᑲᑎᒪᓂᖏᑦ ᐅᑭᐅᖅᑕᖅᑐᒥᑦ ᑲᑎᒪᔨᒃᑯᖏᓐᓂᑦ. ᑕᒪᒃᑯᓅᓇ ᐱᕕᖃᕐᓂᐅᔪᑎᒍᑦ ᖃᐅᔨᑎᑦᑎᔪᒍᑦ ᓄᓇᕗᒻᒧᑦ ᑐᕌᖅᑐᒥᒃ ᐊᒪᓗ ᐱᓕᕆᐊᒃᓴᕆᔭᖓᓂᒃ ᑲᓇᑕᒥᑦ. ᐃᓚᐅᖃᑕᐅᖏᓐᓇᕐᓂᖃᖅᑐᒍᑦ, ᐊᒪᓗ ᐃᑲᔪᐃᖃᑦᑕᖅᖢᑕ, ᐋᕿᒃᓯᔪᒥᒃ ᑐᕌᒐᕆᔭᑉᑎᖕᓂᑦ ᑎᑭᐅᑎᓂᐊᖅᑕᑉᑎᖕᓄᑦ.

ᔫᓂ 15-ᒥᑦ ᐊᒪᓗ 16-ᒥᑦ, ᓯᕗᓕᐅᖅᑎᕗᑦ ᑲᑎᒪᑎᑦᑎᓂᖃᓚᐅᖅᑐᖅ ᓯᕗᓕᐅᖅᑏᑦ ᑲᑎᒪᓂᕆᔭᖓᓐᓂᑦ ᖁᕐᓗᖅᑐᕐᒥᑦ, ᐅᖃᐅᓯᕆᓂᐊᖅᖢᒋᑦ ᑕᐅᑐᒐᖅ ᓂᐅᕕᐊᒃᓴᐃᑦ ᑎᑭᖅᑲᐅᒪᓂᕐᒧᑦ ᑕᒪᒃᑯᓄᙵ ᐊᑐᖅᑐᓄᑦ ᐊᒪᓗ ᐆᒻᒪᖅᑯᑎᒧᑦ, ᐊᒪᓗ ᖃᐅᔨᒋᐊᕐᓂᖃᕐᓗᑎᒃ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᖃᑎᒌᓄᑦ ᐱᔾᔪᑕᐅᔪᓂᒃ

ᐅᔭᕋᖕᓂᐊᖅᑐᓕᕆᓂᕐᒧᑦ ᐊᔪᕈᖕᓃᖅᓴᐃᓂᐅᔪᓂᒃ, ᓱᓇᑐᐃᓐᓇᓕᕆᓂᕐᒧᑦ ᐊᒪᓗ ᓯᓚᐅᑉ ᐊᓯᔾᔨᕐᓂᖓᓄᑦ.

ᓯᕗᓕᐅᖅᑎᐅᓂᑉᑎᒍᑦ, ᖃᑉᓯᐊᕐᔪᖕᓂᒃ ᐃᓚᐅᖃᑕᐅᓂᖃᖅᓯᒪᔪᒍᑦ ᑲᓇᑕᐅᑉ ᓯᕗᓕᐅᖅᑎᖓᓂᑦ ᐊᒪᓗ ᐅᖃᓪᓚᖃᑎᒋᑉᓗᒍ ᐱᖁᑎᓂᒃ ᐱᔭᕆᐊᖃᕐᓂᕆᔭᑉᑎᖕᓂᑦ ᐊᒪᓗ ᐱᔭᒃᓴᐅᑎᖃᕐᓂᖅ ᐱᕙᓪᓕᐊᑎᑦᑎᓂᕐᒥᒃ ᐱᕈᖅᐸᓪᓕᐊᓂᕐᒧᑦ. ᐱᓕᕆᐊᓄᑦ ᐃᓚᒋᔭᐅᔪᖅ ᓲᕐᓗ ᑲᓇᑕᐅᑉ ᖁᑦᑎᒃᑐᒥᑦ ᐅᑭᐅᖅᑕᖅᑐᖓᓂᑦ ᖃᐅᔨᓴᐃᕝᕕᒃ, ᓂᕆᐅᖕᓂᖃᑦᑎᐊᖅᑐᒍᑦ ᐃᓂᖃᕐᓂᖓᓂᒃᓱᓕ ᐱᖁᑎᓄᑦ ᐱᓕᕆᐊᓄᑦ ᐃᑲᔪᐃᓂᖃᕐᓂᐊᖅᑐᑦ ᓄᓇᕗᑦ ᐱᕈᖅᐸᓪᓕᐊᓂᖓᓄᑦ.

ᒐᕙᒪᒃᑯᑦ ᐃᓚᒋᔭᐅᖃᑕᐅᓯᒪᔪᑦ ᑲᓇᑕᒥᑦ ᒥᕐᖑᐃᖅᓯᕐᕕᓕᕆᔨᓄᑦ ᕿᓂᖅᓴᐃᓂᕐᒧᑦ Franklin ᐅᒥᐊᕐᔪᐊᕆᔭᐅᔪᑦ HMS Erebus-ᒧᑦ ᐊᒪᓗ HMS Terror-ᒧᑦ, ᑕᐃᒪᓐᓇᒧᑦ ᓇᓂᓯᓚᐅᖅᑐᑦ HMS Erebus-ᒥᑦ ᐊᕐᕌᓂ.

ᓇᓂᓯᓂᖃᓚᐅᖅᑐᑦ ᐃᓄᐃᑦ ᖃᐅᔨᒪᔭᑐᖃᖏᓐᑦ ᐊᒪᓗ ᓇᓂᔭᐅᓚᐅᖅᑐᑦ ᓄᓇᒥᑦ ᐃᑦᑕᕐᓂᑕᓕᕆᔨᖁᑎᑉᑎᖕᓄᑦ. ᐅᒃᐱᕈᓱᒃᑐᒍᑦ ᐃᓂᖃᕐᒪᑦ ᓴᙱᒃᑎᒋᐊᕐᓂᕐᒧᑦ ᐱᓕᕆᖃᑎᒌᖕᓂᕆᔭᕗᑦ ᑲᓇᑕᒥᑦ ᐊᒪᓗ ᑕᑯᒃᓴᐅᑎᑦᑎᒃᑲᓐᓂᕐᓗᑕ ᐃᓚᐅᔪᒪᓂᕆᓪᓚᑖᕐᓂᑉᑎᖕᓂᑦ ᐊᐅᓚᑦᑎᓂᕐᒧᑦ ᓇᖕᒥᓂᕆᔭᑉᑎᖕᓂᑦ ᐃᑦᑕᕐᓂᑕᕆᔭᑉᑎᖕᓄᑦ.

ᐱᓕᕆᖃᑎᖃᕈᒪᔪᒍᑦ ᓄᓇᕗᑦ ᑐᙵᕕᒃᑯᓐᓂᑦ ᐱᓕᕆᐊᕆᓗᒍ ᐊᖏᒡᓕᕙᓪᓕᐊᑎᓐᓂᖅ ᐊᔪᕈᖕᓃᖅᓴᓂᕐᒧᑦ ᐱᕕᖃᕐᓂᐅᔪᑦ ᓄᓇᖃᖃᑕᐅᔪᖁᑎᒋᔭᑉᑎᖕᓄᑦ ᐃᓄᖕᓂᑦ ᐱᔨᑦᑎᕋᐃᓂᒃᑯᑦ, ᑕᐃᒪᙳᖕᒪ ᑲᓇᑕᒥᑦ

ᐋᕿᒃᓯᖃᑎᒌᖕᓂᐅᔪᒥᑦ. ᖃᐃᔪᓂᑦ ᐱᓇᓱᐊᕈᓯᓂᑦ, ᐅᖃᓪᓚᒍᑎᖃᖃᑕᐅᓂᖃᕐᓂᐊᖅᑐᒍᑦ ᓯᕗᒻᒥᒋᐊᕐᓂᕐᒧᑦ.

ᐱᔾᔪᑎᒋᑉᓗᒍ ᓯᕗᒻᒧᑦ ᐊᑉᓗᖅᑕ, ᐱᕙᓪᓕᐊᓂᖃᕐᔪᐊᖅᑐᒍᑦ ᐱᓕᕆᐊᕆᑉᓗᒍ ᐱᓕᕆᐊᒃᓴᕗᑦ ᑕᒪᐃᓅᖓᔪᓗᒃᑖᒃᑯᑦ.

ᐱᓕᕆᓂᖃᖅᑐᒍᑦ ᐱᓂᐊᕐᓂᕆᔭᑉᑎᖕᓄᑦ ᓯᕗᓪᓕᖅᐸᐅᑎᓐᓂᕐᒧᑦ ᐃᓕᓐᓂᐊᖅᑐᓕᕆᓂᖅ ᑲᔪᓯᓂᖃᕐᓗᑕ ᑕᐅᑐᒐᖃᕐᓂᕐᒥᒃ ᐅᖃᓕᒫᕐᓂᕐᒥᒃ ᐱᕙᓪᓕᐊᓂᒃᑯᑦ ᓇᓕᒧᒌᒃᑐᒥᒃ ᐅᖃᓕᒫᓕᕆᓂᕐᒥᒃ ᐱᓕᕆᐊᒃᓴᒧᑦ, ᐱᓕᕆᐊᖑᔪᖅ ᐃᑲᔪᐃᓂᕐᒧᑦ ᑕᐅᑐᒐᖅ ᐊᒪᓗ ᐱᕚᓪᓕᖅᑎᓐᓂᕐᒧᑦ ᐅᖃᓕᒫᕆᐅᒃᓴᓂᕐᒧᑦ ᖃᓄᐃᓕᐅᕆᐊᖃᕐᓃᑦ ᐃᓕᓐᓂᐊᕐᕕᑉᑎᖕᓂᑦ.

ᒫᓐᓇ ᐱᓕᕆᖃᑎᖃᓕᖅᑐᒍᑦ ᐃᓕᑕᕆᔭᐅᓯᒪᔪᓂᒃ ᐊᒻᒪᓗ ᐊᔪᙱᑎᐊᑐᓂ ᐃᓪᓕᓂᐊᓂᐊᖅᑐᓕᔨᓂᒃ ᐃᓄᒃᑐ ᐅᖃᓕᒫᒐᒃᓴᓕᐅᖅᑎᓪᓗᑕ ᐃᓄᒃᑑᖅᑐᓂ. ᐊᒻᒪᓗ, ᐋᖀᐸᓪᓕᐊᒥᔪᒍ ᓇᓗᓇᐃᔭᐃᔾᔪᑎᒥᒃ ᐃᓕᑕᕐᓯᔪᑎᓂᒃ ᐊᔪᕈᓐᓃᖅᐸᓪᓕᐊᓂᖏᓐᓄ ᓇᓕᒧᒌᓕᑦᑎᐊᓕᖁᓪᓗᒋᑦ ᐅᖃᓕᒫᕈᓐᓇᓂᕆᔭᖏ ᐃᓕᓐᓂᐊᖅᑕᒥᓐᓂ.

ᐱᐅᔪᓂᒃ ᐱᕙᓪᓕᐊᓂᖅᑕᖃᖅᓯᒪᔪᖅ ᓯᕗᓕᖅᐹᖓᓃᑎᓗᒍ ᕿᒥᕐᕈᓂᕐᒥᒃ ᖃᓕᐅᔭᖅᐸᓂᒃ ᒪᓕᒃᑕᐅᔪᒃᓴᓕᐊᖑᓂᕐᒧᑦ ᐃᓕᓐᓂᐊᖅᑎᑦᑎᓂᕐᒥᒃ ᐃᓄᒃᑐᑦ ᐃᓕᓐᓂᐊᕐᕕᑉᑎᖕᓂᑦ. ᐅᖃᖃᑎᖃᑦᑕᐅᑎᓂᐅᔪᓂᒃ ᑕᒪᑐᒪ ᒥᒃᓵᓄᑦ ᐱᒋᐊᕈᒪᔪᒍᑦ 2015 ᐃᓗᐊᓂᑦ.

ᐱᓕᕆᖃᑎᖃᖅᑐᒍᑦ ᐃᓕᓐᓂᐊᖅᑐᓕᕆᔨᐊᓛᖑᔪᓂᒃ, ᐊᒪᓗ ᓯᓚᑖᒎᖓᔪᓂᒃ ᐱᓕᕆᖃᑎᑉᑎᖕᓂᑦ, ᓲᕐᓗ ᐃᓄᐃᑦ ᑕᐱᕇᑦ ᑲᓇᑕᒥᑦ-ᑯᓐᓂᑦ ᐊᑐᓕᖅᑎᑦᑎᓂᕐᒧᑦ

ᐃᓚᐅᖃᑕᐅᓂᕐᒧᑦ ᖃᓄᖅᑑᕈᑎᓂᒃ ᑐᕌᖓᑉᓗᓂ ᓄᓇᓕᖕᓄᑦ, ᐊᖓᔪᖅᑳᓄᑦ ᐊᒪᓗ ᖃᑕᙳᑎᒌᓄᑦ ᐃᓚᐅᖃᑕᐅᑲᓐᓂᖅᑎᓐᓂᕐᒧᑦ ᐃᓕᓐᓂᐊᖅᑎᐅᑉ ᐱᐊᓂᑦᑎᐊᕈᖕᓇᕐᓂᖓᓄᑦ. ᐊᑑᑎᖃᕐᓂᖓ ᑕᒪᑐᒪ ᐱᓕᕆᖃᑎᒌᖕᓂᐅᑉ ᑎᑎᕋᐅᓯᐅᓯᒪᑦᑎᐊᖅᑐᖅ, ᐊᒪᓗ ᑕᑯᒃᓴᐅᑎᑦᑎᔪᖅ ᑕᑯᔭᐅᑎᓐᓂᕐᒧᑦ ᐱᐅᔪᒥᒃ ᐊᒃᑐᖅᓯᒪᓂᖃᖅᑎᑦᑎᓂᖓ ᐃᓕᓐᓂᐊᕆᐊᖃᑦᑕᖅᑐᓂᒃ ᐊᒪᓗ ᐱᐊᓂᖕᓂᕆᔭᖏᓐᓄᑦ ᐃᓕᓐᓂᐊᖅᑏᑦ, ᐃᓕᓐᓂᐊᖅᑎᑦᑎᔨᓄᑦ ᐊᒪᓗ ᐃᓕᓐᓂᐊᕐᕕᖕᓄᑦ.

ᐱᓗᐊᖅᑐᒥᒃ ᐃᓕᓐᓂᐊᓕᓵᖅᑐᑦ ᐊᒪᓗ ᖁᑦᑎᖕᓂᓕᖕᓄᑦ 12, ᑐᑭᓯᐊᖕᒥᔪᒍᑦ ᐃᑲᔪᐃᓂᖃᕋᔭᕐᓂᖓ ᓯᓚᑦᑐᖅᓴᕐᕕᖕᒥᑦ ᐃᓕᑦᑎᕙᓪᓕᐊᓂᕐᒧᑦ. ᐊᖏᔪᒥᒃᑕᐅᖅ ᐊᔾᔨᒌᖏᑦᑐᓂᒃ ᓈᓴᐅᑎᑕᖃᖅᑐᖅ ᐃᑲᔪᐃᔪᓂᒃ ᐱᒻᒪᕆᐅᓂᖓᓄᑦ ᑎᑭᐅᑎᑎᓐᓂᖓᑕ ᓯᓚᑦᑐᖅᓴᕐᕕᖕᓄᑦ ᐃᓕᓐᓂᐊᕐᓂᕐᒧᑦ ᑲᓇᑕᒥᑦ. ᓇᓗᓇᙱᑦᑐᖅ ᐱᓕᕆᖃᑎᒌᖕᓂᖃᕐᓂᖏᑦ ᐱᓕᕆᐊᖃᕐᓂᐅᑉ, ᐊᖏᓂᖅᓴᒥᒃ ᑮᓇᐅᔭᓕᐅᕐᓂᐅᑉ ᖁᑦᑎᖕᓂᖅᓴᒥᒡᓗ ᐃᓕᓐᓂᐊᖅᓯᒪᓂᖃᕐᓂᐅᑉ.

ᖁᕕᐊᓱᒃᑐᒍᑦ ᑐᓴᖅᑎᑦᑎᓂᕐᒥᒃ ᒐᕙᒪᒃᑯᑦ ᐱᓕᕆᐊᖃᕐᓂᐊᕐᒪᑕ ᐃᖢᐊᖅᑐᖅᓯᐅᕐᓂᕐᒧᑦ ᖃᐅᔨᓴᐃᓂᕐᒥᒃ ᖃᐅᔨᔪᒪᓂᕐᒧᑦ ᑐᙵᕕᐅᓂᐊᖅᑐᕐᒥᑦ ᓯᓚᑦᑐᖅᓴᕐᕕᒡᔪᐊᒃᓴᕐᒧᑦ ᓄᓇᕗᒻᒥᑦ. ᐱᔾᔪᑎᖓ ᖁᑦᑎᖕᓂᖅᓴᒥᒃ ᐃᓕᓐᓂᐊᖅᓯᒪᓂᖅᑖᖅᑎᑦᑎᓂᕐᒧᑦ ᐊᖏᕐᕋᕆᔭᒥᑦ ᐊᔾᔨᐅᖏᑦᑐᒥᒃ ᓄᓇᑕᓕᖕᒥᑦ.

ᐱᓂᐊᕐᓂᕆᔭᐅᔪᖅ ᓯᕗᒻᒧᒃᑎᒃᑲᓐᓂᕐᓂᕐᒧᑦ ᖁᑦᑎᖕᓂᖅᓴᒥᒃ ᐃᓕᓐᓂᐊᕈᑎᑖᕐᓂᕐᒧᑦ, ᖃᑉᓯᐊᕐᔪᖕᓂᑦ ᐱᖃᖃᑕᐅᓂᐊᖅᑐᓂᒃ ᐱᓕᕆᖃᑎᒌᖃᑎᑖᕐᓂᐊᖅᑐᒍᑦ ᐊᑐᕐᓂᖃᕐᓗᓂ ᐊᔪᙱᓐᓂᖅᑖᕐᓂᕐᒧᑦ ᐃᓕᓐᓂᐊᕈᑎᑖᕈᖕᓇᖅᑐᒥᒃ ᐋᕿᒃᓯᓂᕐᒧᑦ ᐊᕙᓗᔭᐅᓯᒪᔪᒥᒃ ᐱᒻᒪᕆᐅᒋᔭᐅᔪᓂᒃ ᐃᓄᐃᑦ ᐃᓅᖃᑎᒌᖕᓂᕐᒧᑦ ᐃᒃᐱᒋᓂᕆᔭᖏᓐᓂᑦ. ᖁᕕᐊᓱᒃᖢᑕ ᑐᓴᖅᑎᑦᑎᔪᒪᔪᒍᑦ 2017-ᒧᑦ ᑎᑭᐅᑎᒍᑉᑕ, ᒪᓕᒐᓕᕆᓂᕐᒧᑦ

ᐃᓕᑕᕆᔭᐅᔾᔪᑎᑖᖅᑎᑦᑎᓂᕐᒧᑦ ᑐᕌᖓᔪᖅ. ᑖᒻᓇ ᐱᕙᓪᓕᐊᓂᖅ ᐱᓕᕆᐊᖑᓂᐊᖅᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᒃᑯᓐᓄᑦ ᐃᑲᔪᖅᑕᐅᓗᑎᒃ ᐃᖅᑲᖅᑐᐃᔪᓕᕆᔨᒃᑯᓐᓂᑦ.

ᐳᐃᒍᙱᑕᕗᑦ ᐱᓕᕆᐊᒧᑦ ᑐᕌᖓᔪᒥᒃ ᐊᔪᕈᖕᓃᖅᓴᓂᖅ ᐊᒪᓗ ᐊᔪᙱᓐᓂᖅᑖᕐᓂᕐᒧᑦ ᐊᔪᕈᖕᓃᖅᓴᓂᖅ. ᒐᕙᒪᒃᑯᑦ ᐊᕕᒃᑐᖅᓯᒪᔪᖏᑦ ᐃᓚᐅᑉᓗᑎᒃ, ᐱᓕᕆᖃᑎᒋᔭᕗᑦ ᓯᓚᑖᓂᑦ ᐱᔨᑦᑎᕋᖅᑎᐅᔪᑦ ᐱᓕᕆᐊᖃᕐᓂᕐᒧᑦ ᐊᖏᔫᔪᒥᒃ ᐱᓕᕆᐊᒧᑦ ᑐᕌᖓᔪᓂᒃ ᐃᓕᓐᓂᐊᕐᓂᕐᒧᑦ ᐱᕕᖃᖅᑎᑦᑎᓃᑦ ᐊᒪᓗ ᑐᓗᖅᑕᕈᑕᐅᔪᓂᒃ. ᑐᕌᒐᐅᔪᖅ ᖃᐅᔨᔪᒪᓂᕐᒧᑦ ᒫᓐᓇᐅᔪᖅ ᖃᓄᐃᖓᓂᐅᔪᖅ ᐱᓕᕆᐊᒧᑦ ᑐᕌᖓᔪᓂᒃ ᐃᓕᓐᓂᐊᕐᓃᑦ ᐊᒪᓗ ᐱᓕᕆᐊᑦ ᐱᓕᕆᐊᖅᑖᕐᓂᕐᒧᑦ ᐱᕙᓪᓕᐊᓂᒃᑯᑦ ᑕᐅᑐᒃᖢᒍ ᐊᒪᓗ ᖃᓄᖅ ᐃᖢᐊᖅᑐᒃᑯᑦ ᓯᕗᒻᒧᒍᖕᓇᕐᓂᕐᒥᒃ ᐱᓕᕆᐊᕆᑦᑎᐊᑲᓐᓂᕐᓂᐊᕐᓗᒋᑦ ᐱᔪᒪᔭᖏᑦ.

ᒐᕙᒪᒃᑯᑦ ᐱᕙᓪᓕᐊᓂᖃᖅᑐᑦ ᐊᑐᐊᒐᒥᒃ ᐱᐊᓂᒃᐸᓪᓕᐊᓂᕐᒧᑦ ᐱᓕᕆᐊᓄᑦ ᐱᔭᕇᓯᓯᒪᓂᕐᒥᑦ ᑐᕌᖓᔪᓂᒃ ᐊᑐᐊᒐᖅ ᐱᕕᖃᖅᑎᑦᑎᓇᔭᖅᑐᖅ ᐱᓕᕆᐊᒧᑦ ᑐᕌᖓᔪᓂᒃ ᐃᓕᓐᓂᐊᖅᑎᓂᒃ ᐱᓕᕆᓂᕐᒥᒃ ᐊᔾᔨᒌᖏᑦᑐᓂᒃ ᐱᓕᕆᕝᕕᐅᔪᓂᑦ, ᐊᒻᒪᓗ ᐊᖏᒡᓕᒋᐊᖅᑎᑦᑎᓗᓂ ᐊᔪᕈᖕᓃᖅᓴᓂᕐᒥᒃ.

ᐃᓱᓕᑎᓪᓗᒍ ᐅᑭᐅᖑᔪᖅ, ᓂᖃᐃᑐᖃᑦᑕᖅᑐᑦ ᑐᕌᖅᑎᑕᐅᑲᐅᑎᒋᖃᑦᑕᕐᓂᐊᓕᖅᑐᑦ ᐱᓕᕆᐊᖅᑖᕐᓂᕐᒧᑦ ᐱᕙᓪᓕᐊᔪᓕᕆᔨᒧᑦ ᐃᑲᔪᖅᑕᐅᓗᑎᒃ ᐱᓕᕆᐊᖅᑖᖅᐸᓪᓕᐊᓂᕐᒧᑦ ᐊᔪᕈᖕᓃᖅᓴᓂᒃᑯᑦ ᐊᒪᓗ ᐱᓕᕆᐊᖅᑖᕋᑕᓕᕐᓗᑎᒃ.

ᐊᔪᕐᓇᙱᑦᑕᕌᖓᑦ, ᐊᑐᓕᖅᑎᑦᑎᓂᐊᕐᒥᔪᒍᑦ ᐱᓕᕆᐊᒃᓴᓂᒃ ᐊᖏᒡᓕᒋᐊᖅᑎᓐᓂᕐᒧᑦ ᐱᓕᕆᔨᑖᖅᐸᓪᓕᐊᓂᕐᒧᑦ ᐊᔪᕈᖕᓃᖅᓴᐃᓂᖅ ᐃᓚᐅᑎᓪᓗᒋᑦ ᓄᓇᓕᖕᒥᑦ ᐱᖃᖃᑕᐅᔪᑦ, ᐃᖃᓗᐃᑦ ᒥᑦᑕᕐᕕᖓᓂᑦ ᓴᓇᔭᐅᕙᓪᓕᐊᓂᕐᒧᑦ ᐱᓕᕆᐊᖅ.

ᐊᖏᒡᓕᒋᐊᖅᑎᑦᑎᓂᐊᖅᑐᑦ ᐱᓕᕆᔨᑖᖅᐸᓪᓕᐊᓂᕐᒧᑦ ᐊᔪᕈᖕᓃᖅᓴᐃᓂᕐᒥᒃ ᐊᒪᓗ ᐱᓕᕆᐊᖅᑖᕐᓂᕐᒧᑦ ᓄᓇᕗᒻᒥᐅᓄᑦ.

ᐃᓄᖕᓄᑦ ᐱᔨᑦᑎᕋᐃᓂᕐᒧᑦ ᐃᓗᐊᓂᑦ, ᖃᐅᔨᔪᑎᑦ ᓯᕗᒻᒧᒃᐸᓪᓕᐊᓪᓗᕆᒃᓴᕋᑉᑕ ᓯᕗᓕᐅᖅᑎᐅᓂᕐᒧᑦ ᐱᕙᓪᓕᐊᓂᕐᒧᑦ ᑐᕌᖓᔪᒥᑦ. ᑕᐅᑐᒐᖃᖅᑐᖅ ᐊᐅᓚᑦᑎᔨᙳᖅᐸᓪᓕᐊᔪᓂᒃ ᐊᒪᓗ ᐃᓱᒪᑕᙳᖅᐸᓪᓕᐊᔪᓂᒃ, ᐱᓗᐊᖅᑐᒥᒃ ᐱᓕᕆᔨᓄᑦ ᐃᓱᒪᑕᕆᔭᐅᑎᑕᐅᔪᑦ ᖃᐅᔨᒪᓂᖏᑦ ᐱᕚᓪᓕᖁᓪᓗᒋᑦ. ᓯᑎᐱᕆᙳᖅᐸᑦ, ᐱᒋᐊᕐᓂᐊᖅᑕᕗᑦ ᓯᕗᓕᖅᐹᖅ ᐊᑐᕐᓂᐊᖅᑕᕗᑦ ᐊᒪᓗ ᖃᐅᔨᒪᓕᖅᑎᑦᑎᕙᓪᓕᐊᓂᖃᕐᓗᓂ.

ᐃᑲᔪᐃᓂᖃᐃᓐᓇᖅᑐᒍᑦ ᐊᔪᕈᖕᓃᖅᓴᐃᓂᕐᒥᒃ ᐊᒪᓗ ᐱᕙᓪᓕᐊᓂᕐᒧᑦ ᐱᐅᓯᒋᐊᖅᑎᓐᓂᕐᒥᒃ ᐃᓄᐃᑦ ᐱᓕᕆᐊᖅᑖᕐᓂᖏᑦ ᐃᓄᖕᓂᒃ ᐱᔨᑦᑎᕋᐃᓂᕐᒥᑦ ᐊᒪᓗ ᐱᓕᕆᖃᑕᐅᖏᓐᓇᕐᓂᕐᒧᑦ ᐊᔾᔨᒌᖏᑦᑐᓂᒃ ᐊᕕᒃᑐᖅᓯᒪᔪᓂᑦ ᐱᐊᓂᑦᑎᐊᖅᑎᓐᓂᕐᒧᑦ.

ᖃᐅᔨᒪᔪᒍᑦ ᐃᓕᓐᓂᐊᖅᓯᒪᔪᖅ ᐃᑲᔪᐃᓂᖃᑦᑎᐊᕐᒪᑦ ᐊᔪᖅᓴᙱᑉᐹᓪᓕᕐᓂᕐᒧᑦ, ᑭᓯᐊᓂ ᖃᓄᐃᓕᐅᕐᓂᖅᑕᖃᕆᐊᖃᖅᑐᖅ ᐋᕿᒃᓯᓂᕐᒧᑦ ᐃᖢᐃᓗᑕᐅᔪᓂᒃ ᓂᖃᐃᑐᖅᑕᖅᑎᑦᑎᓂᕐᒥᒃ. ᒫᓐᓇᐅᔪᖅ, ᑭᖑᓪᓕᖅᐹᓕᐅᖅᑐᒍᑦ ᖃᓄᐃᖓᓂᐅᔪᓂᒃ ᕿᒥᕐᕈᓂᕐᒧᑦ ᓂᖃᐃᑐᖅᑕᖅᑐᓕᕆᓂᕐᒧᑦ ᑐᕌᖓᔪᖁᑎᑉᑎᖕᓂᑦ. ᐃᓚᐅᖃᑕᐅᑎᑉᐸᓪᓕᐊᑎᑦᑎᓂᐊᖅᑐᒍᑦ ᐃᓄᖕᓂᒃ ᐅᑭᐊᒃᓵᖅ, ᕿᒥᕐᕈᓗᒃᑖᕐᓂᖅ ᓂᖃᐃᑐᖅᑕᖅᑐᓕᕆᓂᕐᒥᒃ ᐊᔪᖅᓴᓗᐊᕈᖕᓃᖅᑎᑦᑎᓂᕐᒧᑦ ᑲᑎᒪᓂᐅᓂᐊᖅᑐᒥᑦ.

ᖃᐅᔨᒪᔪᒍᑦ ᐱᕙᓪᓕᐊᑎᑦᑎᓂᖅᑕᖃᕆᐊᖃᕐᒪᑦ ᐊᑐᖅᑕᐅᓂᐊᖅᑐᓂᒃ ᐃᑲᔪᐃᓂᕐᒧᑦ ᓄᑕᖅᑲᓂᒃ, ᐃᓐᓇᑐᖃᓂᒃ ᐊᒪᓗ ᓄᓇᕗᒻᒥᐅᓂᒃ ᒥᐊᓂᕆᔭᐅᔭᕆᐊᖃᖅᑐᓄᑦ. ᐱᔭᒃᓴᑎᒍᑦ, ᐊᓯᐊᖑᖅᑎᕆᓂᐊᖅᑐᒍᑦ ᐃᓐᓇᑐᖃᓄᑦ ᐅᖅᓱᐊᓗᖕᒧᑦ ᐃᑲᔪᐃᓂᕐᒧᑦ

ᑐᕌᖓᔪᒧᑦ, ᐸᐃᕆᔨᖃᕐᓂᕐᒧᑦ, ᕿᒥᕐᕈᓗᒍ ᐊᔪᖅᑎᑕᐅᖃᑦᑕᕐᓂᖅ ᑲᓇᑕᒥᑦ ᓄᑕᕋᕐᒧᑦ ᐃᑲᔫᑎ ᓂᖃᐃᑐᖃᑦᑕᕈᖕᓇᖅᑐᓄᑦ ᓈᓴᐅᓯᕆᓃᑦ, ᐊᒪᓗ ᓴᖅᑭᑦᑎᓗᓂ ᐊᑯᓂᐅᔪᒥᒃ-ᑕᑭᓂᖓ ᒥᐊᓂᖅᓯᓂᕐᒧᑦ ᖃᓄᖅᑑᕈᑎᒥᒃ.

ᓄᓇᓕᒃᐳᑦ ᐋᓐᓂᐊᖃᖅᑕᐃᓕᒪᓂᖃᑦᑎᐊᕆᐊᖃᖅᑐᑦ ᐊᒪᓗ ᐊᑐᕈᖕᓇᖅᑕᖓᓐᓂᒃ ᐱᑕᖃᕐᓗᑎᒃ ᐱᕈᖃᑕᐅᔪᖕᓇᕐᓂᖏᓐᓄᑦ ᐅᕙᑉᑎᖕᓂᑦ, ᐊᒪᓗ ᐃᓱᒪᒧᑦ ᐃᓄᐃᓪᓗ ᖃᓄᐃᖏᑦᑎᐊᕐᓂᖏᑦ ᓄᓇᕗᒻᒥᐅᓗᒃᑖᑦ ᑕᑭᔪᒥᒃ-ᐊᑯᓂᐅᔪᒥᒃ ᐱᓕᕆᐊᖑᖅᑲᐅᑕᐅᓂᐊᖅᑐᖅ.

ᐃᓱᒪᒃᑯᑦ ᐋᓐᓂᐊᖃᕐᓂᖅ, ᐊᔪᓕᖅᓯᒪᓂᖃᕐᓂᖅ ᐊᒪᓗ ᐊᖏᕐᕋᒥᑦ ᐱᑦᑎᐊᖏᑐᕋᐅᓐᓂᖅ ᐊᒃᓱᕈᖕᓇᖅᑎᑦᑎᓂᖃᖅᑐᖅ ᓱᓕ ᓄᓇᕘᒥ. ᐱᓂᐊᕐᓂᖃᖅᑐᒍᑦ ᑐᓂᓯᓂᕐᒥᒃ ᐱᕝᕕᐅᔪᖕᓇᖅᑐᓂᒃ ᓄᓇᓕᖕᒦᖓᔪᓄᑦ ᐋᕿᒃᓯᓂᕐᓂᑦ ᐃᑲᔪᐃᔪᑦ ᖃᑕᙳᑎᑉᑎᖕᓂᑦ ᐊᒪᓗ ᐃᓄᖕᓂᑦ ᓇᓂᓯᓂᕐᒧᑦ ᐃᑲᔪᖅᑕᐅᔪᖕᓇᕐᓂᕐᒥᒃ ᐱᔭᕆᐊᖃᖅᑕᖏᓐᓂᒃ ᒪᒥᑉᐸᓪᓕᐊᓂᕐᒧᑦ. ᐱᔾᔪᑎᒃᓴᓕᐅᑲᓐᓂᖅᑐᒍᑦ ᐊᑐᖅᑕᐅᓂᐊᖅᑐᒥᒃ ᑲᖏᖅᖠᓂᕐᒥᑦ ᐃᓂᒋᔭᐅᓂᐊᖅᑐᒥᒃ ᐃᓱᒪᓗᐊᕿᔪᓄᑦ ᐃᒡᓗᕐᔪᐊᕐᒥᑦ, ᐊᒪᓗ 2016 ᐱᒋᐊᓵᖅᑎᓪᓗᒍ, ᐊᔪᕈᖕᓃᖅᓴᐃᓂᖅᑕᖃᖅᑎᑦᑎᒃᑲᓐᓂᕐᓗᓂ ᓄᓇᑖᖃᑕᐅᓯᒪᔪᓄᑦ ᐊᔪᓕᖅᓯᒪᓂᐅᔪᒧᑦ.

ᐱᓕᕆᔪᒍᑦ ᐱᓕᕆᖃᑎᒋᔭᑉᑎᖕᓂᑦ ᓄᑖᖑᖅᑎᑎᓐᓂᕐᒧᑦ ᐊᒪᓗ ᓴᙱᒃᑎᑎᓐᓂᕐᒧᑦ ᐱᓇᓱᖕᓂᕆᔭᖅᐳᑦ ᐃᖕᒥᓃᖅᑕᐃᓕᒪᓂᕐᒧᑦ, ᐊᖏᒡᓕᒋᐊᕐᓗᒍ ᐱᓕᕆᖃᑎᒌᖕᓂᖅ ᐊᒪᓗ ᒥᒃᖠᒋᐊᕐᓗᒍ ᓈᓴᐅᑏᑦ ᐃᖕᒥᓃᖃᑦᑕᖅᑐᓄᑦ. ᑲᑎᒪᓂᕐᒥᒃ ᐱᒋᐊᑲᓐᓂᕈᑉᑕ ᐊᐅᔭᒥᑦ ᓄᖅᑲᖓᖅᑳᕐᓗᑕ, ᓴᖅᑭᑦᑎᔪᒪᔪᒍᑦ ᓄᓇᕗᒻᒥ ᐃᖕᒥᓃᖅᑕᐃᓕᒪᓂᕐᒧᑦ ᖃᓄᖅᑑᕈᑎᒥᒃ ᕿᒥᕐᕈᓂᕐᒧᑦ ᐅᓂᑉᑳᒥᑦ. ᕿᒥᕐᕈᓂᕐᒥᑦ ᓇᓂᔭᕗᑦ ᐊᑐᕈᒪᔭᖅᐳᑦ ᐱᕙᓪᓕᐊᓂᕐᒥᒃ ᐱᐅᓯᒋᐊᖅᓯᒪᔪᒥᒃ ᖃᓄᐃᓕᐅᕐᓂᕐᒧᑦ ᐸᕐᓇᐅᑎ

ᐱᓕᕆᐊᕆᑦᑎᐊᑲᓐᓂᕐᓂᖅᓴᐅᔪᒪᓂᕐᒧᑦ ᐱᔭᕆᐊᖃᖅᑕᕗᑦ.

ᒐᕙᒪᒃᑯᑐᐃᓐᓇᐅᖏᑦᑐᓄᑦ ᐱᓕᕆᐊᖑᔭᕆᐊᖃᖅᑐᑦ ᑕᒪᒃᑯᐊ, ᐊᒪᓗ ᐃᓚᐅᖃᑕᐅᔪᖃᕆᐊᖃᖅᑐᖅ ᖃᑉᓰᑦ ᐱᖃᖃᑕᐅᔪᑦ ᐋᓐᓂᐊᖃᖅᑕᐃᓕᒪᓂᖅ ᖃᓄᐃᖏᑦᑎᐊᖅᑎᓐᓂᕐᒧᑦ ᑕᒪᐃᓐᓄᑦ.

ᖃᐅᔨᒪᔪᒍᑦ ᖃᑕᙳᑎᒌᓄᑦ ᐱᑦᑎᐊᖏᔾᔪᑎᓂᕐᒧᑦ ᑐᕌᖓᔪᖅ ᓄᓇᕗᒻᒥᑦ ᑕᒪᕐᒥᒃ ᐱᕝᕕᐅᔪᖕᓇᖅᑐᑦ ᐊᒪᓗ ᐱᕙᓪᓕᐊᓂᖅ ᐱᑕᖃᙱᓗᐊᕐᓂᖓ. ᕿᓂᖅᑐᒍᑦ ᓴᖅᑭᑦᑎᓂᕐᒥᒃ ᓄᑖᓂᒃ ᐱᕝᕕᐅᔪᖕᓇᖅᑐᓂᒃ ᑮᓇᐅᔭᖅᑑᑎᑎᒍᑦ ᒥᒃᖠᒋᐊᖅᑎᓐᓂᕐᒧᑦ ᑕᒪᓐᓇ.

ᑕᐃᒪᓐᓇᐃᖓᔪᒃᑯᑦ, ᐅᑭᐅᖑᔪᖅ, ᕿᒥᕐᕈᓂᖃᕐᓂᐊᖅᑐᒍᑦ ᓴᐃᓪᓕᕕᒃ ᐊᑐᐊᒐᒥᑦ ᑮᓇᐅᔭᖃᖅᑎᓐᓂᕐᒧᑦ ᖃᑕᙳᑎᒌᓄᑦ ᐱᑦᑎᐊᖏᔾᔪᑎᓂᕐᒧᑦ ᕿᒫᕕᖕᓂᑦ ᐱᐅᓯᒋᐊᖅᑎᓐᓂᕐᒧᑦ.

ᐋᓐᓂᐊᖃᖅᑕᐃᓕᒪᓂᖃᖅᑎᓐᓂᖅ ᓄᓇᓖᑦ, ᑐᑭᖃᖅᑐᖅ ᐱᓕᕆᓪᓗᕆᒃᓴᕐᓂᖃᕆᐊᖃᖅᑐᒍᑦ ᐱᔪᖕᓇᖅᓯᑎᓪᓗᒋᑦ ᓄᓇᓖᑦ ᓴᖅᑭᑦᑎᓂᕐᒥᒃ ᐋᕿᒃᓱᐃᔾᔪᑎᓂᒃ.

ᐊᖏᔪᒥᒃ ᐃᓚᒋᔭᐅᔪᖅ ᐋᓐᓂᐊᖃᖅᑕᐃᓕᒪᓂᖃᕐᓂᖅ ᓄᓇᓕᖕᒥᑦ ᐱᔭᐅᔪᖅ ᐃᑲᔪᖅᑕᐅᔪᖕᓇᕐᓂᕐᒥᒃ ᐃᓚᒋᑉᓗᒍ ᖃᓄᐃᖏᑦᑎᐊᕐᓂᖅ. ᑕᐃᒪᓐᓇᒧᑦ, ᐅᑭᐅᖅ ᖃᐃᔪᒥᑦ, ᐊᖏᒡᓕᒋᐊᖅᑎᓐᓂᐊᖅᑕᕗᑦ ᐱᓕᕆᖃᑎᒌᖕᓃᑦ ᒐᕙᒪᑎᒎᖏᑦᑐᖅ ᑲᑐᔾᔨᖃᑎᒌᑦ ᐊᒪᓗ ᓄᓇᓕᖕᒦᖓᑐᓂᑦ ᑲᑐᔾᔨᖃᑎᒌᑦ, ᐊᒪᓗ ᓇᒻᒥᓂᖃᑦᑐᑦ ᐊᒪᓗ ᓂᕿᑦᑎᐊᕙᐃᑦ ᐅᑭᐅᖅᑕᖅᑐᒥᑦ ᐅᖃᐅᔾᔨᓂᕐᒧᑦ ᑲᑎᒪᔩᑦ ᓂᕿᑦᑎᐊᕙᖃᕐᓂᕐᒧᑦ

ᐱᓕᕆᐊᖑᓇᓱᒃᑐᑦ ᐃᑲᔪᐃᔪᖅ ᐱᓕᕆᐊᒥᒃ ᓂᕿᑦᑎᐊᕙᖃᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ.

ᐱᓕᕆᐊᖃᕐᓂᐊᖅᑐᒍᑦ ᓂᖀᑦ ᐊᑭᖏᓐᓂᒃ ᖃᐅᔨᓴᐃᖃᑦᑕᕐᓂᕐᒥᒃ ᐊᕐᕌᒍᑕᒫᑦ ᑭᒡᓕᓕᐅᕆᓂᕐᒧᑦ ᓈᓴᐅᑎᓄᑦ/ᑎᑎᖅᑲᓄᑦ ᑲᑎᖅᓱᐃᓂᕐᒥᒃ, ᐊᒪᓗ ᖃᐅᔨᓂᕐᒧᑦ ᓇᒧᙵᖅᐸᓪᓕᐊᓂᐅᔪᓂᒃ ᐊᒪᓗ ᑐᓗᖅᑕᕈᑎᓂᒃ ᐃᑲᔪᐃᓂᖃᖅᑐᑦ ᓂᕿᑦᑎᐊᕙᖕᓂᒃ ᐱᔪᖕᓇᕐᓂᕐᒧᑦ. ᓈᓴᐅᑏᑦ/ᑎᑎᖅᑲᐃᑦ ᑲᑎᑕᐅᔪᑦ ᖃᐅᔨᓴᐃᓂᕐᒥᑦ ᐃᑲᔪᐃᓂᐊᖅᑐᑦ ᐊᑐᐊᒐᓕᐊᑉᑎᖕᓂᑦ ᐊᒪᓗ ᑐᕌᖓᔪᑎᖕᓂᑦ. ᐱᓕᕆᐊᖃᕐᓂᐊᕐᒥᔪᒍᑦ ᐊᒃᑐᖅᑕᐅᓯᒪᓗᐊᖃᑦᑕᖅᑐᑦ ᓂᕿᖃᑦᑎᐊᕈᖕᓇᕐᓂᕐᒧᑦ ᐱᖃᑦᑕᕈᖕᓇᕐᓂᖏᓐᓄᑦ ᐃᓄᐃᑦ ᓂᕿᖏᓐᓂᒃ.

ᓴᙱᔪᒥᒃ ᐱᑕᖃᖅᑎᑦᑎᒐᓗᐊᖅᑎᓪᓗᒋᑦ ᒐᕙᒪᒃᑯᑦ ᐱᓕᕆᔨᐅᓂᕐᒧᑦ ᐊᒪᓗ ᑐᓂᓯᓂᕐᒧᑦ ᐱᒃᑲᓐᓂᕈᖕᓇᕐᓂᕐᒥᒃ ᓂᕿᑦᑎᐊᕙᖕᓂᒃ ᓄᓇᓕᑉᑎᖕᓂᑦ ᑐᕌᖓᔪᑎᒍᑦ ᓲᕐᓗ ᐅᑉᓛᕈᒥᑕᖅᑎᑦᑎᓂᕐᒧᑦ ᑐᕌᖓᔪᑦ ᐃᓕᓐᓂᐊᕐᕕᖕᓂᑦ, ᐱᑕᖃᖅᑎᑦᑎᔭᕆᐊᖃᕋᑦᑕ ᓂᕿᑦᑎᐊᕙᖃᖅᑎᑦᑎᓂᕐᒥᒃ ᐱᐅᓂᖅᓴᒥᒃ ᐱᔪᖕᓇᖅᑎᑦᑎᓂᕐᒥᒃ ᐃᓄᐃᑦ ᓂᕿᖏᓐᓂᑦ ᐊᒪᓗ ᒥᐊᓂᕆᒻᒫᕐᓗᒋᑦ ᓂᕐᔪᑎᐅᑎᕗᑦ ᑭᖑᕚᕆᓂᐊᖅᑕᑉᑎᖕᓄᑦ.

ᒫᓐᓇᐅᔪᖅ ᕿᒥᕐᕈᓂᖃᖅᑐᒍᑦ ᓇᓂᔭᐅᔪᓂᒃ ᐊᒪᓗ ᐃᒪᓐᓈᖅᑐᐃᓂᐊᖅᖢᑕ ᐱᐅᓯᕚᓪᓕᖅᑎᑦᑎᓂᐅᓂᐊᖅᑐᓂᒃ ᒪᖃᐃᑎᓂᒃ ᐃᑲᔪᐃᓂᕐᒧᑦ ᑐᕌᖓᔪᑉᑎᖕᓄᑦ, ᐱᐊᓂᒡᓗᒋᓪᓗ ᐅᑉᓗᒥᒨᓕᖓᓕᖅᑐᖅᓯᒪᔪᑦ ᐃᓄᐃᑦ ᓂᕿᖏᓐᓄᑦ ᑐᕌᖓᔪᖅ.

ᐃᒡᓘᒌᓕᖅᑎᓯᒪᐃᓐᓇᕐᓂᐊᕐᓗᒍ ᒪᖃᐃᓐᓂᖅ ᐊᒪᓗ ᓂᕐᔪᑏᑦ, ᓴᖅᑭᑦᑎᔪᒪᔪᒍ ᒪᖃᐃᑎᓄᑦ ᐃᓕᓐᓂᐊᕈᑎᓂᒃ ᑐᕌᖓᔪᒥᒃ, ᑕᐅᑐᒐᖃᓗᐊᕐᓗᓂ ᓱᖁᓯᐊᖏᑎᑦᑎᓂᒃᑯᑦ ᒪᖃᐃᓐᓂᕐᒧᑦ ᐊᔪᙱᓐᓂᐅᔪᓂᒃ. ᐱᓕᕆᖃᑎᖃᖅᑐᒍᑦ ᐊᓯᖏᓐᓂᑦ ᐱᐅᓛᒃᑯᑦ

ᐊᑐᖅᑕᐅᖃᑦᑕᖅᑐᑦ ᒥᒃᓵᓄᑦ ᐊᒪᓗ ᓱᓇᑐᐃᓐᓇᖅ ᑐᕌᖓᔪᖅ ᑕᐃᒪᓐᓇᐃᑐᖅ ᓄᓇᕗᒻᒥᐅᓄᑦ ᑐᕌᖓᓗᓂ.

ᑲᔪᓯᑎᓪᓗᑕ ᐱᓕᕆᓂᑉᑎᖕᓂᒃ ᐊᓯᐅᔨᑦᑕᐃᓕᒪᓂᕐᒧᑦ ᓂᕐᔪᑎᑉᑎᖕᓂᑦ, ᐃᓚᐅᑎᑦᑕᕆᐊᖃᖅᑕᕗᑦ ᐊᓯᐅᔨᑦᑕᐃᓕᒪᓂᕐᒧᑦ ᖃᐅᔨᒪᔭᐅᓂᐅᔪᑦ ᐅᑉᓗᒥᐅᓕᖅᑐᖅ ᐃᓅᓯᕐᒥᑦ, ᓲᕐᓗ ᐊᓯᐅᔨᑦᑕᐃᓕᒪᓂᖅ ᐊᕙᑎᑉᑎᖕᓂᑦ ᐱᖁᑎᑦᑎᒍᑦ ᐆᒻᒪᖅᑯᑎᖃᖅᖢᓂ ᐃᖢᐊᖅᑐᒥᑦ.

ᑕᐃᒪᓐᓇᒧᑦ, ᐊᕐᕌᒍ, ᐆᒃᑐᕋᐅᑎᒥᒃ ᐱᓕᕆᐊᒥᒃ ᐱᒋᐊᕐᓂᐊᖅᑐᒍᑦ ᓯᕿᓂᕐᒥᑦ ᐆᒻᒪᖅᑯᑎᑖᕐᓂᕐᒧᑦ ᐃᒡᓗᕐᔪᐊᕐᒧᑦ ᓴᓇᔭᐅᓂᐊᖅᑐᒧᑦ ᐊᐅᔭᖓᓂᑦ 2016. ᖃᐅᔨᓴᐃᓂᖅ ᐆᒃᑐᕋᐅᑎᒥᒃ ᐊᑐᕈᖕᓇᖅᑎᑦᑎᔪᖅ ᖃᓄᐃᖓᓂᐅᔪᓂᒃ ᐃᓕᑕᖅᓯᓂᕐᒧᑦ ᐱᕕᐅᔪᓂᒃ ᐃᓕᓂᐊᕐᓗᒋᑦ ᐊᓯᐊᖑᕐᓂᐅᔪᓄᑦ ᓯᕗᓂᒃᓴᒥᑦ ᖃᓄᐃᖓᓂᕆᓂᐊᖅᑕᖓᓄᑦ ᐊᒪᓗ ᐅᑉᓗᒥᒨᓕᖅᑐᕐᓗᒍ ᐊᑐᖅᑕᕗᑦ ᓴᓇᔭᐅᓂᖓᓄᑦ ᒫᓐᓇᐅᔪᖅ ᐃᒡᓗᕐᔪᐊᒃᓴᐃᑦ.

ᒪᓕᒃᑕᐅᔪᒃᓴᖅ ᖃᓄᐃᓕᐅᕐᓂᕐᒧᑦ ᐃᒡᓗᕐᔪᐊᕐᒧᑦ ᐅᖃᖃᑎᒌᖕᓂᕐᒦᑐᖅ ᐊᒪᓗ ᐱᐊᓂᖕᓂᐊᖅᖢᓂ ᐅᑭᐅᒥᑦ ᑲᑎᒪᓂᕐᒥᑦ ᑐᓂᐅᑕᐅᓂᖓᒍᑦ ᑭᖑᓪᓕᖅᐹᒃᑯᑦ ᐅᓂᑉᑳᖅ ᐅᐱᕐᖔᖑᓕᕐᒥᒃᐸᑦ. ᖃᐅᔨᓴᐃᓂᖃᖅᑐᒍᑦ ᖃᓄᒃᑲᓐᓂᖅ ᐊᖏᒡᓕᒋᐊᖅᑎᓐᓂᕐᒥᒃ ᑕᒪᑐᒧᙵ ᓇᖕᒥᓂᕆᔭᑉᑎᖕᓄᑦ ᐃᒡᓗᕐᔪᐊᓄᑦ ᐱᖁᑎᑉᑎᖕᓂᑦ ᖃᐅᔨᓂᕐᒧᑦ ᓇᓂ ᐱᑕᖃᕐᒪᖔᑦ ᐱᖁᑎᓂᒃ ᐃᑲᔪᐃᔪᖕᓇᖅᑐᓂᒃ ᑲᔪᓯᑎᓐᓂᕐᒧᑦ ᐱᓕᕆᐊᖃᕐᓂᖅ ᒪᓕᒃᑕᐅᔪᒃᓴᖅ ᖃᓄᐃᓕᐅᕐᓂᕐᒧᑦ ᐅᖃᖃᑎᒌᖕᓂᒃᑯᑦ.

ᐱᖁᑎᖃᕈᖕᓇᕐᓂᖅ ᐱᕈᖅᐸᑦ ᐱᕈᖅᐸᓪᓕᐊᓂᕆᔭᑉᑎᒍᓪᓗ, ᐃᓕᑕᖅᓯᓂᐊᖅᑐᒍᑦ ᖃᓄᖅ ᐊᖏᒡᓕᒋᐊᖅᑎᓐᓂᐊᕐᒪᖔᑉᑎᒍᑦ ᐊᑑᑎᖃᕐᓂᐅᓂᐊᖅᑐᖅ ᐊᒪᓗ ᑕᑯᒃᓴᐅᓂᖓ

ᐃᓚᐅᖃᑕᐅᓂᐅᑉ ᐊᖏᔪᓂᒃ ᐱᕝᕕᐅᔪᓂᒃ ᕿᒥᕐᕈᓂᕐᒧᑦ ᓄᓇᕗᒻᒥ ᐊᒃᑐᖅᓯᓂᕐᒧᑦ ᕿᒥᕐᕈᔨᖏᑦᑎᒍᑦ. ᐃᓚᐅᖃᑕᐅᓂᕗᑦ ᓴᙱᒃᑎᓐᓂᐊᖅᑐᖅ ᐱᔭᕆᐊᖃᕐᓂᐅᑎᓪᓗᒍ ᓴᖅᑭᑕᐅᓂᖓᒍᑦ ᐃᓄᐃᑦ-ᐱᕈᖅᐸᓪᓕᐊᓂᕐᒧᑦ ᖃᐅᔨᓴᐃᓂᕐᒧᑦ ᒪᓕᒃᑕᐅᔪᒃᓴᖅ ᐊᒪᓗ ᓄᓇᓕᖕᒥᐅᑦ ᐃᓚᐅᖃᑕᐅᓂᖏᓐᓄᑦ ᐊᑐᐊᒐᖅ ᐊᒪᓗ ᒪᓕᒃᑕᐅᔪᒃᓴᖅ ᐃᖢᐊᖅᓴᐃᔨᓄᑦ ᐊᒪᓗ ᕿᒥᕐᕈᔨᓄᑦ ᐊᖏᔪᓂᒃ ᐱᕙᓪᓕᐊᓂᕐᒧᑦ ᐱᓕᕆᐊᓄᑦ ᓄᓇᕗᒻᒥᑦ.

ᐃᓚᐅᖃᑕᐅᖏᓐᓇᖅᑐᒍᑦ ᓱᓕ ᐊᒪᓗ ᐱᓕᕆᖃᑎᒋᑉᓗᒋᑦ ᐱᓕᕆᕝᕖᑦ ᐱᓕᕆᖃᑎᖃᕐᓂᕐᒧᑦ ᐊᒪᓗ ᐃᑲᔪᐃᓂᕐᒧᑦ ᓄᓇᕗᑦ ᐊᕕᒃᑐᖅᓯᒪᔪᖏᓐᓂᑦ ᓂᕐᔪᑎᓂᒃ ᖃᐅᔨᒋᐊᖃᑦᑕᕐᓂᐅᔪᓄᑦ. ᓯᑎᐱᕆ 2015-ᖑᓕᖅᐸᑦ, ᐅᖃᖃᑎᖃᑦᑕᐅᑎᓂᖃᒃᑲᓐᓂᐅᓂᐊᖅᑐᑦ, ᑐᓂᓯᔪᖕᓇᕐᓂᐊᖅᑐᒍᑦ ᕿᑭᖅᑖᓗᖕᒥᑦ ᑐᒃᑐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᓂᕐᔪᑎᓂᒃ ᐊᐅᓚᑦᑎᓂᕐᒧᑦ ᑲᑎᒪᔨᖏᓐᓄᑦ ᐃᓱᒪᒃᓴᖅᓯᐅᕈᑎᒋᓂᐊᕐᓗᓂᔾᔪᒃ. ᐊᑐᓕᖅᑎᑦᑎᔪᒪᖕᒥᔪᒍᑦ ᐃᒪᓐᓈᖅᑑᑕᐅᓚᐅᖅᑐᓂᒃ ᒪᖃᐃᑎᓂᒃ ᐃᑲᔪᐃᓂᕐᒧᑦ ᕿᒥᕐᕈᓂᕐᒥᑦ, ᐊᒪᓗ ᑲᔪᓯᓗᓂ ᐱᐅᓯᒋᐊᖅᑎᓐᓂᖅ ᐊᔪᕈᖕᓃᖅᓴᐃᓂᕐᒧᑦ ᑐᕌᖓᔪᖅ ᓂᕐᔪᓯᕆᔨᑉᑎᖕᓄᑦ.

ᓈᒻᒪᒃᓴᓚᐅᖅᑐᒍᑦ ᓄᑖᒥᒃ ᓂᕐᔪᓯᕆᓂᕐᒧᑦ ᒪᓕᒐᓂᒃ ᐊᒪᓗ ᓂᕆᐅᒃᖢᑕ ᑕᒪᓐᓇ ᐱᒋᐊᕐᓂᐊᕐᓂᖓᓄᑦ ᔪᓚᐃ 1, 2015-ᒥᑦ.

ᐊᒪᓗ ᐃᒡᓗᒌᓕᖅᑎᓯᒪᓂᕐᒧᑦ ᐊᓯᔨᑦᑕᐃᓕᒪᓂᖅ ᐱᕈᖅᐸᓪᓕᐊᓂᕐᒧᑦ ᐊᒪᓗ ᐱᖁᑎᓄᑦ ᖃᓄᐃᓕᐅᕐᓂᐅᔪᓄᑦ, ᐅᒡᓚᕋᖅᑎᓂᒃ ᑎᑭᑎᑦᑎᕙᓪᓕᐊᑲᓐᓂᕐᓂᖃᕐᓂᐊᖅᑐᒍᑦ, ᐊᒪᓗ ᓴᓇᙳᐊᖅᑎᓂᒃ ᑲᒪᔨᓂᒃ ᐊᔾᔨᒌᖏᑦᑐᒃᑯᑦ ᐊᑐᕐᓗᑕ.

ᑐᓂᓯᓂᐊᖅᑐᒍᑦ ᒪᓕᒐᒥᒃ ᐋᕿᒋᐊᖅᓯᓂᕐᒧᑦ ᐃᖏᕐᕋᔭᖕᓂᖅ ᐊᒪᓗ

ᐅᒡᓚᕋᖅᑐᓕᕆᓂᕐᒧᑦ ᐱᖁᔭᖅ-ᒥᑦ ᓄᓇᕗᒻᒧᑦ ᐊᔾᔨᒋᓕᖅᑎᒃᑲᓐᓂᕆᐊᕐᓗᒍ ᐊᒪᓗ ᐊᑐᓕᖅᑎᓪᓗᒋᑦ ᐋᕿᒋᐊᖅᓯᓃᑦ ᐊᑐᕈᖕᓇᕐᓂᐊᖅᑐᑦ ᐱᕈᖅᑎᒋᐊᕐᓂᕐᒧᑦ ᑕᒪᓐᓇ.

ᓄᓇᕗᒻᒥᐅᑕᐃᑦ ᖃᑉᓯᐅᓂᖏᑦ ᑲᔪᓯᓂᖃᖅᑐᖅ ᐱᕈᖅᐸᓪᓕᐊᓂᕐᒥᒃ ᐊᒪᓗ ᑎᑭᑉᐸᓪᓕᐊᔪᑦ ᓄᓇᕗᒻᒧᑦ, ᐊᖁᑎᒥᑦ ᐊᑕᓇᖅᑐᖅᑕᖃᙱᒋᐊᖅᑎᑦᑎᔭᕆᐊᖃᖅᑐᒍᑦ, ᐊᒪᓗ ᒪᓕᒐᕗᑦ ᐊᔾᔨᖃᕐᓗᑎᒃ ᐊᓯᖏᓐᓂᕐᒥᐅᓂᒃ ᐊᔾᔨᒌᖕᓂᖅᑕᖃᕆᐊᖃᖅᑐᓂᑦ. ᓄᓇᕗᑦ ᐊᑎᓕᐅᓚᐅᖅᑕᖓᓂᑦ ᑲᓇᑕᐅᑉ ᐃᖏᕐᕋᔪᓕᕆᓂᕐᒧᑦ ᐊᖏᖃᑎᒌᒍᑎᖏᓐᓄᑦ ᑎᑭᐅᑎᒋᐊᕈᒪᔪᒍᑦ. ᑕᒡᕘᓇ ᑕᐅᑐᒃᑕᑉᑎᒍᑦ, ᐋᕿᒋᐊᖅᓯᔪᒪᔪᒍᑦ ᓄᓇᒃᑰᕈᑏᑦ ᒥᒃᓵᓄᑦ ᐱᖁᔭᖅ-ᒥᑦ, ᐃᓚᐅᔪᖃᕐᓂᐊᖅᑐᖅ ᐊᑯᖅᑎᓪᓗᒋᑦ ᐊᑯᕐᓂᖏᓐᓂᒃ ᐃᓱᒪᔪᖕᓃᕈᑕᐅᔪᖕᓇᖅᑐᓂᒃ ᐱᑕᖃᖅᑎᑦᑎᑦᑕᐃᓕᒪᔾᔫᒥᓂᐊᖅᑐᒥᒃ ᐊᒪᓗ ᐊᑐᓕᖅᑎᓪᓗᒍ ᓄᓇᒃᑰᕈᑏᑦ ᒥᒃᓵᓄᑦ ᐱᖁᔭᖅ ᐊᖏᓂᖅᓴᐅᔪᒧᑦ ᐃᖏᕐᕋᔪᐃᑦ ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᐱᖁᔭᖅ-ᒧᑦ.

ᖃᓄᐃᓕᐅᕈᑎᓂᒃ ᐊᑐᓕᖅᑎᑦᑎᓂᐊᖅᑐᒍᑦ ᐱᓕᕆᐊᖃᕐᓂᕐᒧᑦ ᐊᓯᖏᓐᓂᒃ ᐱᖁᔭᓂᒃ ᐊᔾᔨᒌᖕᓂᖃᙱᑦᑐᓂᒃ ᐅᑉᓗᒥᒨᓕᖅᑐᖅᓯᒪᔪᓂᒃ ᐃᓄᐃᑦ ᐋᓐᓂᐊᖃᖅᑕᐃᓕᒪᓂᖏᓐᓄᑦ ᐊᑐᖅᑕᐅᖃᑦᑕᖅᑐᓂᒃ. ᑕᐃᒪᓐᓇᒧᑦ, ᓴᖅᑭᑦᑎᓂᐊᖅᑐᒍᑦ ᐃᓄᖕᓄᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐱᖁᔭᖅ-ᒥᑦ ᐃᓚᒋᔭᐅᔪᓂᒃ ᑲᓇᑕᒦᖓᔪᓂᒃ ᐊᒪᓗ ᓄᓇᕐᔪᐊᕐᒦᖓᔪᓂᒃ ᐃᓗᓕᖃᖅᑐᒥᒃ ᐊᒪᓗ ᑕᑯᒃᓴᐅᑎᑦᑎᑉᓗᓂ ᐊᔾᔨᐅᖏᓐᓂᕆᔭᖓᓃᑐᖅ ᓄᓇᕗᑦ. ᐊᒪᓗ, ᐱᓕᕆᓂᖃᐃᓐᓇᖅᑐᒍᑦ ᐋᕿᒋᐊᖅᓯᓂᕐᒥᒃ ᐃᓱᒪᒥᒃ ᐋᓐᓂᐊᖃᖅᑕᐃᓕᒪᓂᕐᒧᑦ ᐱᖁᔭᖅ-ᒥᑦ, ᐊᔾᔨᒋᓕᕐᔫᒥᓂᐊᕐᒪᒍᑦᑕᐅᖅ ᖃᓄᐃᑑᓂᕆᔭᑉᑎᖕᓄᑦ.

ᒐᕙᒪᒃᑯᑦ ᐋᕿᒋᐊᖅᓯᔪᒪᔪᑦ ᓂᐅᕕᖃᑦᑕᖅᑐᓂᒃ ᒥᐊᓂᖅᓯᓂᕐᒧᑦ ᐱᖁᔭᖅ-ᒥᑦ, ᑐᕌᒐᖃᖅᑐᖅ ᒥᐊᓂᖅᓯᓂᕐᒧᑦ ᐊᑐᖅᑕᐅᕙᒃᑐᓂᑦ ᐊᒪᓗ ᒪᓕᒐᓂᒃ ᒪᓕᒐᕋᓛᓂᒡᓗ

ᐱᑕᖃᕐᓂᐊᖅᑐᑦ ᐱᔾᔪᑎᖃᖅᑐᓂᒃ ᓂᐅᕕᖃᑦᑕᕐᓂᕐᒥᒃ ᐊᒪᓗ ᓂᐅᕕᐊᒃᓴᖃᖃᑦᑕᕐᓂᕐᒧᑦ ᐱᔨᑦᑎᕋᐅᑎᓄᓪᓗ ᐊᒪᓗ ᓴᕿᑎᑦᑎᓗᑎᒃ ᐊᑭᓕᐅᑎᔪᑦᓴᓄᑦ ᓯᒃᑮᑦ ᑮᓇᐅᔭᖑᑦᑎᑕᐅᔭᕋᖓᑕ ᑮᓇᐅᔭᒃᑯᕕᐅᖏᑦᑐᓄᑦ.

ᐊᒪᓗ, ᐱᖁᔭᒃᓴᓕᐅᕐᓂᐊᖅᑐᒍᑦ ᐋᕿᒋᐊᖅᓯᓂᕐᒧᑦ ᐊᑦᑕᓇᖅᑐᒦᑎᑦᑎᑦᑕᐃᓕᒪᓂᕐᒧᑦ ᐱᖁᔭᖅ-ᒥᑦ. ᐱᖁᔭᒃᓴᓕᐊᖅ ᐱᓕᕆᕝᕕᖕᒥᑦ ᐅᓗᕆᐊᓇᖅᑐᓂᒃ ᐊᑐᖅᑕᐅᔪᓄᑦ ᑐᑭᓯᐅᒪᔾᔪᑎ-ᒧᑦ (WHMIS) ᐊᑐᖅᑕᐅᔪᒥᒃ ᐊᔾᔨᖃᓕᖅᑎᓐᓂᕐᒧᑦ ᑲᓇᑕᐅᑉ ᒪᓕᒐᖏᓐᓄᑦ.

ᐃᓱᒪᒃᓴᖅᓯᐅᖅᑐᒍᑦ ᐊᓯᖏᓐᓂᒃ ᐊᑐᕈᖕᓇᕐᓂᕐᒧᑦ ᐊᖏᒡᓕᒋᐊᖅᑎᓐᓂᕐᒧᑦ ᑕᑯᒃᓴᐅᓂᖓ ᐱᔫᒥᓵᕆᓂᐅᑉ. ᐃᓚᓯᓗᓂ ᐊᑐᖅᑕᐅᔪᖕᓇᕐᓂᐊᖅᑐᓂᒃ ᐱᓕᕆᐊᖃᕐᓂᕐᒧᑦ ᐱᔫᒥᓵᕆᓂᕐᒧᑦ ᑲᑐᔾᔨᖃᑎᒌᖑᔪᑦ ᐅᕙᓘᓃᑦ ᐃᓄᑑᓗᑎᒃ ᐃᓚᒋᔭᐅᔪᖅ ᐱᓇᓱᖕᓂᕆᔭᑉᑎᖕᓄᑦ ᐊᖏᒡᓕᒋᐊᖅᑎᑦᑎᓂᕐᒧᑦ ᒐᕙᒪᒃᑯᑦ ᐊᑐᓗᒃᑖᖅᑎᑦᑎᓂᖃᕈᖕᓇᕐᓂᖓᑦ ᑕᒪᑐᒥᙵᑦ, ᑐᑯᒃᓴᐅᔪᒃᑯᑦ ᐊᒪᓗ ᐊᑑᑎᖃᖅᑐᒃᑯᑦ. ᑕᒪᓐᓇ ᐱᓕᕆᐊᖅ ᐃᑲᔪᐃᓂᖃᖅᑐᖅ ᖃᓄᐃᓕᐅᕐᓂᕆᐊᓂᒃᑕᑉᑎᖕᓄᑦ ᐱᓕᕆᐊᒥᒃ ᕿᒥᕐᕈᓂᕐᒧᑦ ᐱᕙᓪᓕᐊᓯᒪᓕᖅᑐᖅ ᐊᒪᓗ ᓈᓴᐃᔩᑦ ᐃᑲᔫᑏᑦ ᐊᒪᓗ ᑐᓂᕐᕈᓯᐊᑦ ᒥᒃᓵᓄᑦ ᐊᖏᖃᑎᒌᒍᑎᓄᑦ.

ᓯᕗᒻᒧᑦ ᐊᑉᓗᖅᑕᒃᑯᑦ, ᒐᕙᒪᒃᑯᑦ ᐊᑐᓕᓚᐅᖅᑐᑦ ᑕᐅᑐᒐᕐᒥᑦ, ᑐᕌᒐᓂᒃ ᐊᒪᓗ ᐱᓕᕆᐊᖑᖅᑲᐅᑕᐅᓂᐊᖅᑐᓂᒃ ᓴᖅᑭᑦᑎᓂᕐᒧᑦ ᓴᙱᔪᒥᒃ ᐊᒪᓗ ᐊᔪᖏᑦᑎᐊᖅᑐᒥᒃ ᓄᓇᕗᒻᒥᑦ ᓄᓇᕗᒻᒥᐅᓗᒃᑖᑦ ᐱᕕᖃᕐᓂᐅᔪᓂᒃ ᕿᓂᕈᖕᓇᕐᓂᕐᒧᑦ ᓄᓇᓕᖓᓐᓂᑦ ᐊᒪᓗ ᓄᓇᕗᒻᒥᑦ ᐊᕕᒃᑐᖅᓯᒪᔪᓂᑦ ᑎᑭᐅᑎᓗᑎᒡᓗ ᓇᖕᒥᓂᖅ ᐱᔪᒪᓂᕆᔭᖓᓐᓄᑦ ᐊᒪᓗ ᐱᔪᖕᓇᕐᓂᕆᔭᖓᓐᓄᑦ.

ᓱᖁᓯᐊᖏᑎᑦᑎᓂᖅ ᐊᒪᓗ ᐱᔭᒃᓴᖃᕐᓂᕐᒧᑦ ᐱᕙᓪᓕᐊᓂᖅ ᓄᓇᒥᑦ ᐱᕝᕕᐅᔪᖕᓇᖅᑐᓂᒃ ᑐᕌᖅᑎᑦᑎᔪᖅ ᐃᒡᓗᒌᒃᑐᒥᒃ ᐱᕈᖅᐸᓪᓕᐊᓂᕐᒧᑦ ᐊᒪᓗ ᑲᑎᓯᒪᔪᑎᒍᑦ ᑕᐅᑐᒐᕗᑦ ᐊᔪᕈᖕᓃᖅᓴᓂᕐᒧᑦ ᐊᒪᓗ ᐃᓕᓐᓂᐊᕐᓂᕐᒧᑦ ᐱᒻᒪᕆᐅᓂᖅᐹᖑᔪᖅ ᑕᐅᑐᒐᕆᔭᑉᑎᖕᓂᑦ ᐱᙳᖅᑎᑦᑎᓂᕐᒧᑦ ᐊᒪᓗ ᐱᐅᓯᕚᓪᓕᖅᑎᓐᓂᕐᒧᑦ ᐃᓅᖃᑎᒌᖕᓂᕆᔭᑉᑕ ᖃᓄᐃᖏᑦᑎᐊᕐᓂᕆᔭᖓᓂᑦ. ᕿᓂᖅᑐᒍᑦ ᐅᔾᔨᕈᓱᓕᖅᑎᑦᑎᒃᑲᓐᓂᕐᓂᐅᔪᓂᒃ ᓴᙱᓂᕆᔭᑉᑎᖕᓂᑦ, ᑕᑯᒃᓴᕈᖅᑎᑕᐅᓯᒪᔪᖅ ᐅᑭᐅᕆᔭᐅᔪᒧᑦ ᐊᐅᓚᑦᑎᓂᕐᒥᑦ ᐊᒪᓗ ᐊᖏᒡᓕᒋᐊᖅᑎᑦᑎᓂᕐᒥᒃ ᐊᑐᖅᑐᐊᕈᖕᓇᖅᑕᑉᑕ ᑭᒡᓕᖓᓂᑦ.

ᐊᖏᔪᒻᒪᕆᐊᓗᖕᒥᑦ ᐱᔪᖕᓇᕐᓂᖃᖅᑐᒍᑦ ᐊᒪᓗ ᑲᔪᓯᔭᕆᐊᖃᖅᑐᒍᑦ ᐃᓚᒌᖃᑎᒌᖕᓂᐅᔪᒥᒃ ᕿᓂᖅᓴᐃᓂᕐᒧᑦ ᐱᕕᐅᔪᓂᒃ ᓄᓇᕗᒻᒥᑦ ᐊᒪᓗ ᓯᕗᒻᒧᒡᓗᑕ ᐊᔾᔨᒌᖕᓂᖃᕐᓂᐅᔪᓂᒃ ᐱᔾᔪᑕᐅᔪᓂᒃ ᐅᑭᐅᖅᑕᖅᑐᒥᑦ ᓯᓚᑎᒋᔭᑉᑎᖕᓄᑦ.

ᐊᔾᔨᒌᖕᓂᖃᕐᓂᐅᔪᓂᒃ ᓇᓂᓯᓂᕐᒥᒃ ᐊᒥᓱᓂᒃ ᑲᑐᔾᔨᖃᑎᒌᓂᑦ ᐊᔾᔨᒌᖏᑦᑐᓂᒃ ᐱᔭᒃᓴᖃᖅᑐᓂᒃ ᐊᒪᓗ ᐊᐅᓚᑕᐅᔪᑦ ᐊᖏᕈᑎᖃᖅᓯᒪᓂᒃᑯᑦ ᐊᑐᕐᓂᐊᖅᑕᖓᑦ ᒐᕙᒪᒃᑯᑦ. ᑲᔪᓯᔪᒍᑦ ᓯᕗᓕᐅᖅᑎᓯᒪᓂᕐᒧᑦ ᐃᒡᓗᒌᖕᓂᖏᑦ ᐱᖅᑯᓯᖅ ᐊᒪᓗ ᐃᓕᓐᓂᐊᕐᔪᐊᖅᓯᒪᓂᑯᒃᑯᑦ ᖃᐅᔨᒪᓂᖅ ᐱᔨᑦᑎᕋᐅᑎᒥᒃ ᑐᓂᓯᓂᕐᒧᑦ, ᐊᑐᐊᒐᓂᒃ ᐊᒪᓗ ᑐᕌᖓᔪᓕᐅᕆᓂᕐᒧᑦ.

ᓄᓇᕗᑦ ᐅᑉᓗᕆᓂᐊᖅᑕᖓᓂᑦ ᓇᓗᓇᐃᖅᓯᔪᒍᑦ ᐅᑎᕐᓂᖓ ᐊᐳᑎᒥᑦ ᓴᓇᙳᐊᕐᓂᕐᒥᒃ ᓄᓇᕗᒻᒧᑦ ᒥᔅᑕ ᑖᒥᔅ ᓯᑕᓐ-ᒧᑦ, ᒥᓂᔅᑕᒋᔭᐅᓚᐅᖅᑐᖅ ᐃᓄᓕᕆᔨᒃᑯᓐᓂᑦ. ᓄᓇᕗᑦ ᑐᙵᕕᒃᑯᑦ ᑐᓂᓯᓚᐅᖅᑐᑦ ᓴᓇᙳᐊᖅᓯᒪᔪᒥᒃ ᒥᓂᔅᑕᐅᑎᓪᓗᒍ ᐱᓕᕆᐊᕆᖃᑦᑕᕐᓂᕆᓚᐅᖅᑕᖏᓐᓄᑦ, 1992-ᒥᑦ ᐊᖏᖃᑎᒌᒍᑎᒥᒃ ᓴᖅᑭᑦᑎᓂᐅᓚᐅᖅᑐᑦ ᓄᓇᕗᒻᒥᑦ. ᖁᕕᐊᓲᑎᒋᑉᓗᓂᐅᒃ ᑐᓂᕐᕈᓯᐊᖅ ᓴᓇᙳᐊᒐᖅ

ᐅᑎᖅᑎᓐᓂᐊᖅᑕᖓ ᓄᓇᕗᑦ ᐱᔾᔪᑎᒋᑉᓗᒍ, ᐊᒪᓗ ᒪᓕᒐᓕᐅᕐᕕᖕᒦᓐᓂᐊᖅᑐᖅ ᐱᖅᑯᓯᑐᖃᐅᓯᕕᖕᒥᑦ ᐱᑕᖃᓕᖅᐸᑦ ᓄᓇᕗᒻᒥᑦ.

ᐱᕈᖅᐸᓪᓕᐊᑎᑦᑎᑎᓪᓗᑕ ᓯᕗᓂᒃᓴᑉᑎᖕᓂᑦ, ᐳᐃᒍᖅᓯᒪᙱᑦᑕᕗᑦ ᖄᖏᖅᑐᑦ ᑕᐃᑉᓱᒪᓂᑕᐃᑦ. ᐱᖅᑯᓯᓕᕆᔨᒃᑯᑦ ᐱᓕᕆᖃᑎᖃᖅᓯᒪᔪᑦ ᖃᑉᓯᐊᕐᔪᖕᓂᑦ ᐱᓕᕆᖃᑎᒋᔭᖏᓐᓂᑦ ᐱᕙᓪᓕᐊᓂᕐᒧᑦ ᓄᓇᕗᒻᒥ ᐱᖅᑯᓯᑐᖃᖃᕐᕕᒃᓴᒥᑦ ᐸᐸᑦᑎᓇᔭᖅᑐᖅ ᑕᐃᑉᓱᒪᓂᑕᕐᓂᑦ, ᐃᑦᑕᕐᓂᑕᕐᓂᑦ ᐊᒪᓗ ᐃᑦᑕᕐᓂᑕᖃᕐᕕᖕᒥᐅᑕᓂᒃ ᐊᒪᓗ ᐃᓂᖃᖅᑎᑦᑎᓗᓂ ᓄᑖᓂᒃ ᐱᔭᐅᕙᓪᓕᐊᔪᓂᒃ, ᓲᕐᓗ ᐊᐳᑎᒥᒃ ᓴᓇᙳᐊᖅᓯᒪᔪᑦ ᐊᒪᓗ ᐃᒪᖅᑳ ᐱᖁᑏᑦ Franklin ᐃᖏᕐᕋᖃᑦᑕᕐᓂᕆᓚᐅᖅᑕᖓᓂᑦ.

ᐱᓕᕆᓂᖃᐃᓐᓇᖅᑐᒍᑦ ᐱᖅᑯᓯᑐᖃᓕᕆᓂᕐᒧᑦ ᑲᑐᔾᔨᖃᑎᒌᓂᒃ ᐊᒪᓗ ᓯᓚᑖᓂᙶᖅᑐᓂᒃ ᐱᓕᕆᖃᑎᒋᔭᑉᑎᖕᓂᑦ ᑮᓇᐅᔭᓂᒃ ᐱᕈᖅᓱᐃᓂᕐᒧᑦ ᐊᒪᓗ ᓴᖅᑭᑦᑎᓂᕐᒥᒃ ᓄᑖᓂᒃ ᐱᓕᕆᖃᑎᒋᓂᐊᖅᑕᑉᑎᖕᓂᑦ ᓂᕆᐅᖕᓂᖃᒧᑦ ᐅᒃᑯᐃᖅᓯᓂᕐᒥᒃ ᐱᖅᑯᓯᑐᖃᐅᓯᕝᕕᒃᓴᒥᑦ 2021-ᒥᑦ.

ᐱᔪᖕᓇᕐᓂᕆᔭᖏᑦ ᐃᓄᖁᑎᑉᑕ ᓄᓇᕗᒻᒥᑦ ᑭᒡᓕᖃᙱᑦᑐᖅ. ᓯᕗᒻᒧᒋᐊᕐᓂᒃᑯᑦ ᐊᑕᐅᑎᒃᑰᕐᓗᑕ ᓴᙱᔪᒥᒃ ᐋᕿᓯᓂᒃᑯᑦ, ᖃᓄᐃᖏᑦᑐᒥᒃ ᐱᐅᓂᖅᓴᒥᒃ ᓯᕗᓂᒃᓴᖃᕈᖕᓇᖅᑐᒍᑦ ᐅᕙᑉᑎᓄᓗᒃᑖᖅ.

ᐊᖏᔪᒻᒪᕆᖕᒥᑦ ᐱᓕᕆᐊᒥᒃ ᐊᒪᓗ ᐱᕙᓪᓕᐊᓂᖅᑕᖃᓚᐅᖅᑐᖅ ᓯᕗᓪᓕᕐᒥᑦ ᐊᒪᓗ ᑐᒡᓕᖓᓂᑦ ᑲᑎᒪᓂᐅᔪᓂᒃ ᓯᑕᒪᒋᓕᖅᑕᖓᓂᒃ ᒪᓕᒐᓕᐅᕐᕕᖕᒧᑦ ᑲᑎᒪᔨᐅᔪᓄᑦ ᐊᑑᑎᖃᖅᓯᒪᒻᒪᕆᒃᑐᑦ ᐅᖃᓪᓚᐅᓯᖃᕐᓂᐅᔪᓂᒃ, ᑐᕌᒐᓂᒃ ᐊᒪᓗ ᐱᐊᓂᒃᓯᒪᔪᓂᒃ ᑕᒪᐅᖓ ᑎᑭᖢᒍ.

ᐃᓕᑕᖅᓯᔪᒍᑦ ᑲᔪᓯᔭᕆᐊᖃᕐᓂᑉᑎᖕᓂᑦ ᐱᓇᓱᖕᓂᕆᔭᑉᑎᖕᓂᑦ ᑎᑭᐅᑎᓂᕐᒧᑦ ᑐᕌᒐᕆᔭᕗᑦ ᐊᒪᓗ ᐱᐊᓂᒡᓗᒋᑦ ᑕᑯᒃᓴᐅᔪᑦ ᖃᓄᐃᖓᓃᑦ ᓄᓇᕗᒻᒥᐅᓗᒃᑖᓄᑦ ᖃᐃᔪᒥᑦ ᑲᑎᒪᓂᐅᓂᐊᖅᑐᒥᑦ ᐃᓱᓕᑎᓪᓗᒍ ᐱᔭᒃᓴᕆᔭᕗᑦ.

ᖁᔭᓕᔪᒪᕗᖓ ᐃᓕᑦᓯᓂᓕᒫ ᐊᒃᑐᕈᕐᖢᓯ ᐱᓕᕆᖃᑦᑕᓚᐅᕋᑦᓯ ᐊᒻᒪᓗ ᐃᖃᔪᕐᓂᖃᑦᑎᐊᓚᐅᕋᑦᓯ, ᑕᒫᓂ ᐅᐱᕐᖔᒥᑦ ᐊᐅᔭᒥᓪᓗ ᓄᖃᖓᑦᑎᐊᖁᕙᑦᓯ ᐊᒻᒪᓗ ᖃᓄᐃᖏᑦᑎᐊᕐᓗᓯ ᐃᓚᑦᓯᓐᓂᑦ ᐱᖃᑎᖃᑦᑎᐊᕐᓗᓯ ᓄᓇᖃᑎᑦᓯᓐᓂᓪᓗ.

ᒪᑦᓇ.