ᐅᖃᓚᐅᑎᓯᐅᑏᑦ

You are here

ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑭᒡᓕᖏᑦ ᖃᓱᔭᐅᓂᐊᕐᓕᕐᑐᑦ ᐃᖃᓗᖕᓂᑦ

ᒪᐃ 31, 2021

ᐱᕙᓪᓕᐊᔪᑦ ᓴᖅᑭᑕᑦ

ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᑭᒡᓕᖏᑦ ᖃᓱᔭᐅᓂᐊᕐᓕᕐᑐᑦ ᐃᖃᓗᖕᓂᑦ

ᐃᖃᓗᐃᑦ, ᓄᓇᕗᑦ (ᒪᐃ 31, 2021) −ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐊ, ᓘᒃᑖᖅ ᒪᐃᑯ ᐹᑐᓴᓐ, ᑐᓴᖅᑎᑦᑎᕗᖅ ᐊᓯᔾᔨᖅᑐᓂ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᖅᑕᐃᓕᒪᔪᓕᕆᓂᖅ ᑭᒃᑯᑐᐃᓐᓇᕐᓄᑦ ᒪᓕᒃᑕᐅᔭᕆᐊᓕᖕᓄᑦ ᐃᖃᓗᖕᓂᑦ ᐅᓪᓗᒥ.

“ᐊᒥᓲᓂᖏᑦ ᓄᕙᒡᔪᐊᕐᑐᑦ ᐃᖃᓗᖕᓂᑦ ᐊᒃᐸᖅᐸᓪᓕᐊᖏᓐᓇᕐᐳᑦ ᐋᓐᓂᐊᓕᕇᒃᑯᑎᒧᓪᓗ ᑲᐱᔭᐅᑲᑕᒃᑐᑦ ᓄᓇᓕᐸᐅᔭᓂ ᐊᒥᓲᓪᓗᑎᒃ. ᐊᑐᐃᓐᓇᐅᓂᖓ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎ ᑐᑭᖃᕐᑐᖅ ᑭᒡᓕᖃᕐᓯᒪᕗᖅ ᓯᐊᒻᒪᒃᐸᓪᓕᐊᓂᖓ, ᐊᕐᕕᐊᑑᙱᑦᑐᖅ ᒪᑑᓇᐅᑉ ᓯᕗᕐᖓᓂ ᐊᑐᐃᓐᓇᐅᓚᐅᖅᑳᕋᓂ,” ᐅᖃᖅᑐᖅ ᓘᒃᑖᖅ ᐹᑐᓴᓐ. “ᑖᒃᑯᐊ ᐱᔾᔪᑕᐅᔪᑦ ᐊᑦᑕᕐᓇᕈᓐᓃᕈᑕᐅᕗᖅ ᖃᓱᓂᐊᕐᓗᒋᑦ ᑭᒡᓕᖃᖅᑎᑕᐅᔪᑦ ᐃᖃᓗᖕᓂᑦ.

ᐱᒋᐊᕐᓗᓂ ᕿᑎᖅᑰᒻᒥᑦ, ᔫᓂ 3, ᐃᒡᓘᑉ ᐃᓗᐊᓂ ᐃᓄᖃᕈᓐᓇᕐᓯᔪᖅ ᑕᓪᓕᒪᓂ ᐊᒻᒪᓗ ᐃᓚᒋᔭᐅᓗᑎᒃ ᐃᒡᓗᒥᐅᖃᑎᒌᑦ ᓯᓚᒥᓪᓗ ᑲᑎᑦᑐᓐᓇᕐᓯᔪᑦ 25 ᐃᓄᐃᑦ. ᐊᑐᖁᔭᐅᒻᒪᕆᒃᐳᖅ ᐃᓄᐃᑦ ᐃᓅᖃᑎᒌᖕᓂᖏᑦ ᒥᑭᔾᔫᒥᖁᔭᐅᓪᓗᑎᒃ. ᐊᑯᓂᐅᔪᒥᑦ ᐸᖅᑭᕕᑦ, ᐸᖅᑭᔭᐅᙱᓐᓇᕐᑐᒃᑯᕕᑦ, ᑐᔪᖕᒥᕕᑦ ᐋᓐᓂᐊᕕᓪᓗ ᐊᒥᓲᓛᓂ ᒪᕐᕉᖕᓂ ᐳᓛᖅᑎᖃᕈᓐᓇᕐᑐᑦ ᐃᓚᓪᓚᕆᖏᓐᓂᑦ, ᐃᓄᒃᒧᑦ ᐊᑕᐅᓯᖕᒧᑦ, ᒪᑐᐊᕐᓯᒪᔭᕆᐊᖃᕐᓗᑎᒃ.

ᐃᓕᓐᓂᐊᕐᕖᑦ ᒪᑐᐃᒃᑲᓐᓂᕈᓐᓇᖅᓯᕗᑦ ᐊᑐᕆᐊᓕᒃ 3-ᒦᓪᓗᑎᒃ 2020-2021 ᓄᓇᕗᒻᒥ ᐃᓕᓐᓂᐊᕐᕖᑦ ᒪᑐᐃᖅᑕᐅᓂᖓᑕ ᐸᕐᓇᐅᑎᖓᓂ. ᒐᕙᓚᒃᑯᑦ ᑎᑎᕋᕐᕕᖏᑦ ᓇᖕᒥᓂᖁᑎᒋᔭᐅᔪᓪᓗ ᐅᒃᑯᐃᕈᓐᓇᓛᓕᕐᒥᔪᑦ ᒪᑐᐊᕐᓯᒪᓗᑎᒃ ᐅᖓᓯᒌᒃᓗᑎᒃᓗ. ᐃᒡᓘᑉ ᐃᓗᐊᓂ ᐃᑲᔪᖃᑎᒌᓄᑦ ᑲᑎᙵᔪᓐᓇᕐᓯᔪᑦ 20−ᐅᓗᑎᒃ ᐃᓄᖏᑦ ᐃᒡᓘᓪᓗ ᐃᓗᐊᓂ ᖃᓄᐃᓕᐅᕈᓐᓇᕐᓯᔪᑦ ᐃᓄᖕᓄᑦ 25ᕝᓄᑦ ᐅᕝᕙᓘᓐᓃᑦ 25 ᐳᓴᓐᑎ ᐃᓄᒋᐊᒃᑕᐅᔪᓐᓇᕐᑐᒥᑦ, ᓇᓕᐊᑐᐃᓐᓇᖅ ᐊᒥᓲᙱᓐᓂᕐᓴᖅ. ᑐᒃᓯᐊᕐᕕᑦ ᐅᒃᑯᐃᕈᓐᓇᕐᑐᖅ ᐅᐸᒃᑕᐅᔪᓐᓇᕐᓗᑎᒃ ᐃᙱᙱᓪᓗᑎᒃ ᐃᓄᒋᐊᕐᓗᑎᒃ 25−ᓂᑦ ᐅᕝᕙᓘᓐᓃᑦ 25 ᐳᓴᓐᑎ ᐃᓄᒋᐊᒍᓐᓇᕐᑕᖓᓂ, ᓇᓕᐊᑐᐃᓐᓇᖅ ᐊᒥᓲᙱᓐᓂᕐᓴᖅ.

ᓯᐊᕐᕆᔮᕐᕕᖕᒥ ᐃᓄᖕᓄᑦ ᑲᑎᙵᔪᑦ ᐃᓄᒋᐊᒃᑎᒋᔪᓐᓇᕐᓂᐊᖅᐳᑦ 25-ᓂᒃ ᐅᕝᕙᓘᓐᓃᑦ 25% ᐃᒡᓗᕐᔪᐊᕐᒧᑦ ᐃᓯᕈᓐᓇᖅᑐᑦ, ᓇᓕᐊᑐᐃᓐᓇᖅ ᒥᑭᓐᓂᖅᓴᐅᑐᐊᖅᐸᑦ. ᖁᙱᐊᕆᐊᖅᑐᑦ 25 ᐅᖓᑖᓂᐅᙱᑦᑐᖅ ᐃᓕᒌᓄᑦ ᕿᑎᒃᑐᖃᙱᓪᓗᓂ. ᐅᖃᓕᒫᒐᖃᕐᕕᑦ, ᖁᙱᐊᕆᐊᕐᕖᑦ ᑕᑯᓐᓇᒐᖃᕐᕖᓪᓗ, ᐅᒃᑯᐃᖓᔪᑦ ᐃᓄᖕᒧᑦ ᐃᓚᒌᓄᓪᓗ. ᐃᖃᐃᓕᓴᕐᕖᑦ ᐅᒃᑯᐃᕈᓐᓇᕐᑐᑦ ᐃᓄᑐᐊᖑᓗᑎᒃ ᒪᑐᐊᕐᓯᒪᓗᑎᒃᓗ. ᓯᓚᒥ ᐱᙳᐊᕐᕕᓕᒫᑦ, ᓄᓇᓕᖕᓂᑦ ᒥᕐᖑᐃᖅᓯᕖᑦ, ᓄᓇᕘᒥᓪᓗ ᒥᕐᖑᐃᖅᓯᕖᑦ ᒪᑐᐃᕈᓐᓇᖅᐳᑦ, ᐃᒡᓗᖁᑎᖏᑦ ᑭᓯᐊᓂ ᒪᑐᓯᒪᓗᑎᒃ.

ᐃᖃᓗᖕᓂᑦ ᐊᐅᓪᓚᕐᓂᖅ ᑎᑭᓐᓂᕐᓗ ᑭᒡᓕᖃᕐᑐᑦ ᓱᓕ, ᒪᑐᐊᕐᓯᒪᔭᕆᐊᖃᖅᖢᑎᒃᓗ ᐃᓄᒋᐊᒃᑐᒃᑯᕕᖕᓂᑦ (ᑎᑎᕋᕐᕖᓪᓗ) ᐊᒻᒪᓗ ᐅᖓᓯᒃᑎᒋᓗᙱᒃ 6 ᐃᓯᒐᑦ ᐊᓯᖏᓐᓂᑦ. ᓇᖕᒥᓂᕐᒧᑦ ᐱᔨᑦᑎᕋᕐᕕᑦ ᓲᕐᓗ ᓄᔭᓕᕆᕝᕕᑦ ᐱᐅᓴᕐᑕᐅᕖᓪᓗ, ᐊᒻᒪᓗ ᑕᕐᕆᔭᕐᕖᑦ ᒪᑐᓯᒪᐃᓐᓇᕐᓗᑎᒃ. ᓂᕆᕝᕕᑦ ᐱᔪᓐᓇᐅᑎᓕᓪᓗ ᑭᒡᓕᖃᖅᑐᑦ ᑎᑭᓴᐃᕕᐅᓂᖕᒧᑐᐊᖅ.

“ᐃᖃᓗᖕᒥᐅᑦ, ᐊᒃᓱᕈᓚᐅᕐᐳᒍ ᐊᐅᓚᓐᓇᓱᒃᖢᑎᒍᑦ ᓯᐊᒻᒪᒃᐸᓪᓕᐊᓂᐅᔪᖅ. ᐊᑏ ᐱᑦᑎᐊᓖᓐᓇᕆᑦᑎ ᑲᒪᑦᑎᐊᕐᓗᓯᓗ ᐃᓱᓕᒪᐊᔅᓯᓐᓂᑦ,” ᐅᖃᓚᐅᕐᑐᖅ ᓯᕗᓕᖅᑎ ᔫ ᓴᕕᑲᑖᖅ. “ᐅᑯᐊ ᖃᓱᔭᐅᔪᑦ ᒪᓕᒃᑕᐅᔭᕆᐊᓕᑦ ᐱᔾᔪᑕᐅᓪᓗᐊᙱᑦᑐᑦ ᖃᓄᐃᓕᐅᕐᓂᐊᕐᓗᓂ, ᑭᓯᐊᓂ ᐱᕕᑦᑎᐊᕙᐃᑦ ᐱᕙᓪᓕᐊᖏᓐᓇᕐᓗᓂ ᐃᓅᓂᖅ ᖁᐱᕐᕈᐊᕐᔪᒃᑕᓕᖕᒥᑦ. ᖁᔭᓐᓇᒦᑦ ᐊᒃᓱᕈᖅᖢᓯ ᐱᓕᕆᒐᔅᓯ ᕿᓄᐃᓵᕐᓂᔅᓯᓐᓂᓪᓗ."

ᑲᐱᔭᐅᕕᑦ ᐅᒃᑯᐃᖓᐃᓐᓇᕐᓗᑎᒃ ᓄᓇᕗᒻᒥᑦ. ᐅᖃᓗᒋᑦ ᐋᓐᓂᐊᕐᕕᔅᓯᓐᓄ ᐃᓂᒃᓴᓕᐅᕐᓂᕐᒧᑦ. ᐋᓐᓂᐊᓕᕇᒃᑯᑎ ᐊᑦᑕᕐᓇᖏᑦᑐᖅ ᓴᐳᔾᔭᐅᔾᔪᑎᐅᒻᒪᑦ ᐊᐃᑦᑐᕐᓗᓐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ.

ᑭᓇᑐᐃᓐᓇᑦᑎᐊᖅ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ-19−ᓕᖕᒧᑦ ᐅᖄᓚᖁᔭᐅᕗᖅ ᓄᕙᒡᔪᐊᕐᓇᒧᑦ ᐅᖄᓚᕝᕕᐅᔪᓐᓇᖅᑐᒧᑦ, 1-888-975-8601−ᒧᑦ 10−ᒥᑦ ᐅᓪᓛᒃᑯᑦ 6−ᓗ ᐅᓐᓄᒃᑯᑦ ᐊᑯᓐᓂᖓᓂ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓄᑦ,

ᐅᐸᒃᑕᐅᑦᑕᐃᓕᒪᓯᑲᐅᑎᒋᓗᓂᓗ ᐊᖏᕐᕋᒥᓂ ᐅᓪᓗᓄᑦ 14-ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.
ᑐᓴᒐᒃᓴᓕᐊᖑᓵᓄ ᐅᕗᙵᐅᓗᑎᑦ www.gov.nu.ca

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
cmacleod@gov.nu.ca

ᑯᕆᔅ ᐴᒡᓕᐊ
ᐊᐅᓚᑦᑎᔨᐅᑲᐃᓐᓇᖅᑐᖅ, ᑐᓴᐅᒪᔪᓕᕆᔨᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5949
cpuglia@gov.nu.ca