ᑮᓇᐅᔭᓕᕆᔨᒃᑯᑦ

ᑮᓇᐅᔭᓕᕆᔨᒃᑯᑦ ᑐᓴᖅᑎᑦᑎᔨᒋᔭᐅᓪᓗᐊᑕᖅᐳᑦ ᓄᓇᕗᑦ ᒐᕙᒪᖓᓄᑦ ᑮᓇᐅᔭᓕᕆᔾᔪᑕᐅᔪᓕᒫᑦ ᑮᓇᐅᔭᖅᑑᑎᒃᓴᓪᓗ ᒥᒃᓵᓄᑦ. ᑮᓇᐅᔭᓕᕆᔨᒃᑯᑦ ᑭᒃᑯᑐᐃᓐᓇᑦ ᑮᓇᐅᔭᖏᓐᓂᒃ ᐊᑐᖅᑕᐅᑦᑎᐊᕋᓗᐊᕐᒪᖔᑦ ᖃᐅᔨᒪᓇᓱᖃᑦᑕᖅᐳᑦ ᒐᕙᒪᒃᑯᑦ ᓯᕗᓪᓕᐅᑎᔪᒪᔭᖏᓐᓂᒃ ᐃᑲᔪᕈᒪᓪᓗᒋᑦ ᐊᔾᔨᒌᒃᑎᑦᑎᓗᑎᒃ ᑭᒃᑯᑐᐃᓐᓇᓄᑦ ᐱᔭᐅᔪᓐᓇᖅᑎᑕᐅᓗᑎᒃ ᑲᒪᒋᔭᐅᔪᓐᓇᕐᓗᓂᓗ. ᑮᓇᐅᔭᓕᕆᔨᒃᑯᑦ ᑐᑦᑕᕐᕕᒋᔭᐅᕗᑦ ᐋᖅᑭᒃᓯᒪᔪᒥ ᐊᑐᖃᑦᑕᖅᖢᑎᒃ ᐊᓯᓕᒫᖏᓐᓂᒃ ᐱᓕᕆᕝᕕᒋᔭᐅᔪᓂ ᑐᑦᑕᕐᕕᒋᔭᐅᔪᓂᓪᓗ ᓄᓇᕗᑦ ᒐᕙᒪᒃᑯᑦ ᐃᓗᐊᓃᑦᑐᓂᒃ ᐃᑲᔪᕈᑕᐅᔪᓂᒃ, ᑕᓯᐅᖅᑎᒋᔭᐅᓪᓗᑎᒃ ᐃᑲᔫᑎᒃᓴᐅᔭᕆᐊᓕᖕᓂᒃ ᐊᑐᕈᓐᓇᖁᓪᓗᒋᑦ ᐱᓕᕆᐊᒃᓴᖏᓐᓂᒃ ᐱᔨᑦᑎᕋᐅᑎᖏᓐᓂᓪᓗ ᑲᔪᓯᑎᑦᑎᔪᓐᓇᖁᓪᓗᒋᑦ.

ᑮᓇᐅᔭᓕᕆᔨᒃᑯᓐᓄᑦ ᐱᓕᕆᐊᒃᓴᕆᑎᑕᐅᓪᓗᐊᑕᖅᑐᑦ ᐋᖅᑭᒃᑕᐅᓯᒪᕗᑦ ᑮᓇᐅᔭᓂᒃ ᐊᐅᓚᑦᑎᓂᕐᒧᑦ ᐱᖁᔭᕐᒥ. ᐱᖁᔭᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓂ ᐱᔪᓐᓇᐅᑎᑖᖅᑎᑦᑎᖃᑦᑕᖅᐳᖅ ᐱᓕᕆᐊᒃᓴᖃᖅᑎᑦᑎᕙᒃᖢᓂᓗ. ᐱᖁᔭᖅ ᐱᓕᕆᕝᕕᒋᔭᐅᔪᑦ ᐱᓕᕆᐊᒃᓴᖏᓐᓂᒃ ᐋᖅᑭᒃᓯᓯᒪᒋᕗᖅ ᑮᓇᐅᔭᓂᒃ ᐊᐅᓚᑦᑎᓂᕐᒧᑦ ᑲᑎᒪᔨᓄᑦ ᑐᕌᖓᔪᓂᒃ, ᐊᒻᒪᓗ ᒥᓂᔅᑕᐅ ᑐᒡᓕᐊᑕ ᑮᓇᐅᔭᓕᕆᔨᒻᒪᕆᐅᓪᓗ ᑲᒪᒋᔭᕆᐊᖃᖅᑕᖏᓐᓂᒃ.

ᐱᓕᕆᕝᕕᒋᔭᐅᔪᑦ ᐊᐅᓚᑦᑎᔨᓪᓗᐊᑕᕆᔭᐅᓂᐊᖅᐳᑦ ᐊᕐᕌᒍᓕᒫᒧᑦ ᓄᓇᕗᑦ ᒐᕙᒪᒃᑯᑦ ᑮᓇᐅᔭᕆᔭᐅᔭᕆᐊᓕᖕᓂᒃ ᐋᖅᑭᒃᓱᐃᓇᓱᖕᓂᐊᖅᑎᓪᓗᒋᑦ, ᑕᓯᐅᖅᑎᒋᔭᐅᕙᒃᖢᑎᒡᓗ ᐊᐅᓚᑦᑎᔨᐅᓪᓗᑎᒡᓗ ᒐᕙᒪᐃᑦ ᐊᑕᖏᖅᖢᒋᑦ ᐊᑐᕆᐊᖃᖅᑕᖏᓐᓂᒃ ᐊᑐᑦᑎᐊᖁᓪᓗᒋᑦ. ᐊᒻᒪ, ᐱᓕᕆᕝᕕᒋᔭᐅᔪᑦ ᐸᕐᓇᐃᔨᐅᑎᑕᐅᕗᑦ ᐊᕐᕌᒍᓕᒫᒧᑦ ᑮᓇᐅᔭᓂᒃ ᐸᕐᓇᒃᑕᐅᔭᕆᐊᖃᖅᐸᒃᑐᓂᒃ ᐊᒻᒪ ᐊᑯᓂᐊᔪᖅ ᐸᕐᓇᐅᑎᓕᐊᖑᕙᒃᑐᓂᒃ ᐃᑲᔪᖅᑐᐃᔾᔪᑕᐅᔪᓂᒃ ᐱᕙᓪᓕᐊᑎᑦᑎᓂᐊᕐᓗᓂ ᐊᐅᓚᑦᑎᓂᐊᕐᓗᓂᓗ ᐋᖅᑭᑦᑎᐊᖅᓯᒪᔪᒥᒃ ᑐᙵᕕᒋᔭᐅᓂᐊᖅᑐᒥᒃ ᑮᓇᐅᔭᓕᕆᓂᕐᒧᑦ ᓄᓇᕘᒧᑦ ᑐᕌᖓᔪᒥᒃ. ᐱᓕᕆᕝᕕᒋᔭᐅᓪᓗᐊᑕᖅᑐᖅ ᐅᑯᓂᖓ ᑲᒪᒋᔭᒃᓴᖃᓪᓗᐊᑕᖅᐳᖅ:

• ᐊᐅᓚᑦᑎᔨᐅᓗᑎᒃ ᑮᓇᐅᔭᒃᑑᑎᒃᓴᑦ ᐱᕙᓪᓕᐊᑎᑕᐅᓂᐊᖅᑐᓂᒃ ᓄᓇᕗᑦ ᒐᕙᒪᖓᓄᑦ;
• ᐅᓂᒃᑳᕆᕙᒡᓗᒋᑦ ᒐᕙᒪᒃᑯᑦ ᑮᓇᐅᔭᖅᑖᕆᕙᓪᓕᐊᔭᖏᑦ ᐊᑐᖅᐸᓪᓕᐊᔭᖏᓪᓗ;
• ᑮᓇᐅᔭᓕᕆᓂᐅᑉ ᒥᒃᓵᓄᑦ ᐅᖃᐅᔾᔨᕙᒡᓗᑎᒃ ᑮᓇᐅᔭᓂᒃ ᐊᐅᓚᑦᑎᔨᑦ ᑲᑎᒪᔨᖏᓐᓄᑦ ᒥᓂᔅᑕᐅᖃᑎᒌᓄᓪᓗ;
• ᐊᑐᖅᑕᐅᖃᑦᑕᕐᓂᐊᖅᑐᒥᒃ ᓴᖅᑭᑎᑦᑎᖃᑦᑕᕐᓗᑎᒃ ᒐᕙᒪᒃᑯᑦ ᒐᕙᒪᒃᑯᓪᓗ ᑐᑦᑕᕐᕕᒋᔭᖏᑦ ᑕᑎᒋᔭᐅᔪᓐᓇᑦᑎᐊᖅᑐᐃᓐᓇᐅᖁᓪᓗᒋᑦ, ᐱᖃᓯᐅᑎᓪᓗᒋᑦ ᐃᖅᑲᓇᐃᔭᖅᑎᓄᑦ ᐊᑭᓕᖅᓲᑕᐅᕙᒃᑐᑦ ᐊᓯᖏᓪᓗ ᑮᓇᐅᓕᕆᔾᔪᓯᐅᕙᒃᑐᑦ; ᐊᒻᒪ
• ᐋᖅᑭᒃᓱᐃᕙᒡᓗᑎᒃ ᐊᑐᐊᒐᕐᒥᒃ ᑎᓕᐅᕈᑕᐅᓂᐊᖅᑐᒥᒃ ᑮᓇᐅᔭᓕᕆᓂᕐᒧᑦ ᐊᐅᓚᑦᑎᔾᔪᑎᒋᔭᐅᔪᒧᑦ ᐊᒻᒪ ᑮᓇᐅᔭᑦ ᐅᓄᕐᓂᖏᓐᓂ ᖃᐅᔨᓴᕐᓂᕐᒥᒃ ᐃᖅᑲᓇᐃᔭᖅᑐᓕᕆᓂᕐᒧᑦ.

ᓄᓇᕘᒥ ᑮᓇᐅᔭᖅᑖᕆᔭᐅᕙᓪᓕᐊᕙᒃᑐᑦ ᒐᕙᒪᑐᖃᒃᑯᓐᓂ ᐊᖏᖃᑎᖃᖅᓯᒪᓂᒃᑯᑦ ᐊᐃᑦᑑᓯᐊᖑᕙᖕᓂᖏᓐᓄᑦ ᐊᓯᖏᓐᓂᓪᓗ ᐸᕐᓇᒃᑕᐅᓯᒪᓪᓗᑎᒃ ᑮᓇᐅᔭᓂᒃ ᐊᖏᕈᑕᐅᓯᒪᔪᓂᒃ, ᐱᓕᕆᕝᕕᒋᔭᐅᔪᑦ ᒐᕙᒪᑐᖃᒃᑯᓐᓂ ᐱᓕᕆᖃᑎᖃᑦᑎᐊᖃᑦᑕᖅᐳᑦ. ᑲᔪᓯᑎᑦᑎᑦᑎᐊᖁᔨᓪᓗᑎᒃ ᐊᔾᔨᖃᙱᑦᑐᓂᒃ ᐱᔭᐅᔭᕆᐊᓕᖕᓂᒃ ᖃᓄᐃᓕᖓᓂᕆᔭᖏᓐᓂᓪᓗ ᓄᓇᑦᑎᓐᓃᑦᑐᑦ ᑭᒡᒐᖅᑐᖅᑕᐅᑦᑎᐊᖁᓪᓗᒋᑦ ᐋᖅᑭᒃᑕᐅᓯᒪᓂᖏᓐᓂᒃ ᐋᖅᑭᒃᓱᐃᔾᔪᑕᐅᖃᑦᑕᕐᓂᐊᖅᑐᓂᒃ ᑮᓇᐅᔭᑦ ᐅᓄᕐᓂᖏᓐᓂᒃ ᑲᓇᑕᐅ ᒐᕙᒪᒃᑯᖏᑦ ᒐᕙᒪᑐᖃᒃᑯᓪᓗ ᑮᓇᐅᔭᑦ ᐋᖅᑭᒃᓱᖅᑕᐅᓯᒪᔪᑦ ᒪᓕᒡᓗᒋᑦ.

ᐊᖏᓂᖅᓴᖅ ᑕᐅᑐᖅᑰᖅᑕᐅᓯᒪᔪᖅ ᑐᑭᓯᒋᐊᕐᓗᒍ ᑮᓇᐅᔭᓕᕆᔨᒃᑯᑦ ᐱᓕᕆᖃᑦᑕᖅᑕᖏᑦ ᐃᓕᓴᖅᓯᓯᒪᑐᐃᓐᓇᕐᓗᑎᒃ ᐱᔭᕆᐊᖃᙱᒻᒪᑕ ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᓐᓂᒃ, ᑭᓯᐊᓂ ᓇᓗᓇᐃᖅᓯᓯᒪᔭᕆᐊᖃᕐᒥᖕᒪᑕ ᐃᓕᓴᖅᓯᓯᒪᓗᑎᒡᓗ ᐊᓯᖏᓐᓂᒃ ᐱᓕᕆᖃᑎᒌᒃᑐᓂᒃ ᑲᑎᙵᔪᓂᒡᓗ ᒪᑭᒪᔾᔪᑎᖃᖅᐸᒃᑐᓂᒃ ᐱᓕᕆᕝᕕᒋᔭᐅᔪᑦ ᖃᓄᐃᓕᐅᕐᓂᖏᓐᓄᑦ. ᐱᓕᕆᖃᑎᒌᒃᐸᒃᑐᑦ ᓇᖕᒥᓂᖃᖃᑕᐅᔪᓪᓗ ᐅᑯᓂᖓ ᐃᓚᓕᐅᔾᔨᓯᒪᕗᑦ ᓄᓇᕗᑦ ᑲᓇᑕᐅᓪᓗ ᐊᕕᒃᑐᖅᓯᒪᓂᖏᓐᓂ, ᓇᓗᓇᐃᖅᑕᐅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᓂᒃ, ᓄᓇᑦᑎᓐᓂ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᒋᔭᖏᓐᓂᒃ ᐊᒻᒪ ᑐᑦᑕᕐᕕᒋᔭᐅᔪᓂᒃ ᐱᓗᐊᖅᑐᒥᓪᓗ, ᓄᓇᕗᒻᒥᐅᓂᒃ.