ᑮᓇᐅᔾᔭᒃᓴᕋᓱᖕᓂᖅ
ᓄᓇᕗᒻᒥ ᐊᕐᕌᒍ ᐃᓗᐊᓂ ᓴᖅᑭᑎᑕᐅᕙᒃᑐᑦ ᑲᑎᓕᒫᖅᖢᒋᑦ (GDP) $1.75-ᐱᓕᐊᓐᖑᓚᐅᖅᐳᑦ 2010-ᒥ (ᑭᒡᓕᓯᓂᐊᖅᑎᒃᑯᑦ ᑲᓇᑕᒥ) ᐅᓄᖅᓯᒋᐊᖅᓯᒪᔪᑦ 11.4-ᐳᓴᓐᓂᒃ. ᑲᑎᒪᔨᕐᔪᐊᑦ ᑲᑎᒪᔨᖏᑦ ᑲᓇᑕᒥ ᓯᕗᓂᒃᓴᑦᑎᓐᓂ ᓄᓇᕗᑦ ᑮᓇᐅᔭᓕᐅᕈᑎᒃᓴᖏᓐᓂᒃ ᐅᓄᖅᓯᕙᓪᓪᓕᐊᓂᐊᕋᓱᒋᓐᓈᕗᑦ 9.2-ᐳᓴᓐᓂᒃ ᐊᕐᕌᒍᓂ ᑕᓪᓕᒪᓂᑦ ᐊᒡᒋᖅᑐᓂᑦ.
ᒐᕙᒪᒃᑯᑦ ᐊᑭᓕᐅᑎᖏᑦ ᐅᓄᕐᓂᖅᐹᖑᔾᔪᑕᐅᓚᐅᖅᐳᑦ GDP-ᖓᓂ 71-ᐳᓴᓐᖑᓪᓗᓂ. ᑭᓯᐊᓂ, ᐊᑐᒐᒃᓴᐃᑦ ᐅᓄᖅᓯᕙᓪᓕᐊᑎᓪᓗᒋᑦ ᐃᖃᓗᓕᕆᓂᕐᓗ, ᐊᓯᐊᓄᑦ ᓄᓇᒧᑦ ᓂᐅᕐᕈᑎᖃᖃᑦᑕᖅᑐᑦ ᐃᓚᒋᔭᐅᕙᓪᓕᐊᑐᐃᓐᓇᓕᖅᐳᑦ ᑮᓇᐅᔭᓕᐅᕈᑎᒃᓴᑦᑎᓐᓄᑦ. 2010-ᒥ, ᐊᓯᐊᓄᑦ ᓄᓇᒧᑦ ᓂᐅᕐᕈᑎᒋᔭᐅᔪᑦ 147-ᐳᓴᓐᓂᒃ ᐅᓄᖅᓯᒋᐊᓚᐅᖅᐳᑦ $222-ᒥᓕᐊᖑᓚᐅᖅᖢᑎᒃ 2009-ᒥ $555-ᒥᓕᐊᖑᓕᖅᖢᑎᒃ 2010-ᒥ.
ᐅᔭᕋᖕᓂᐊᒐᒃᓴᓂᒃ ᕿᓂᕐᓂᖅ ᐅᔭᕋᖕᓂᐊᕐᓂᕐᓗ
ᐱᕙᓪᓕᐊᑎᑦᑎᓂᖅ ᐅᔭᕋᖕᓂᐊᒐᒃᓴᓂᒃ ᐅᖅᓱᐊᓗᓕᕆᓂᕐᒥᓪᓗ ᓯᕗᓂᒃᓴᑦᑎᓐᓂ ᓴᖅᑭᑎᑦᑎᑐᐃᓐᓇᕆᐊᖃᖅᐳᑦ ᑮᓇᐅᔭᓕᐅᕈᑎᒃᓴᓂᒃ ᐃᑲᔫᑕᐅᓪᓚᕆᒍᓐᓇᖅᑐᓂᑦ ᓄᓇᕗᒻᒥᐅᓄᑦ. ᐊᕐᕌᒍᓂ ᐅᓄᓗᐊᙱᑦᑐᓂᑦ ᐊᓂᒍᖅᑐᓂᒃ, ᓄᓇᕗᒻᒥᐅᑦ ᐃᑲᔪᖅᑕᐅᕐᔪᐊᖃᑦᑕᖅᓯᒪᕗᑦ ᐅᔭᕋᖕᓂᐊᒐᒃᓴᓂᒃ ᕿᓂᖅᑐᓄᑦ, ᐱᕙᓪᓕᐊᑎᑦᑎᓂᕐᒧᑦ ᐊᒻᒪ ᒎᓗᓕᕆᓂᕐᒧᑦ.
2011-ᒥ, ᐅᔭᕋᖕᓂᐊᒐᒃᓴᓂᒃ ᕿᓂᕈᑕᐅᔪᑦ $300-ᒥᓕᐊᓐ ᐅᖓᑖᓄᐊᓚᐅᖅᐳᑦ ᒎᓗ, ᓯᑎᓂᖅᐹᑦ ᐅᔭᕋᑦ ᐊᒻᒪ ᓴᕕᕋᔭᒃᓴᑦ ᓇᓂᔭᐅᕙᓪᓕᐊᖃᑦᑕᓚᐅᕐᒪᑕ ᓱᓕ ᓇᓂᔭᐅᕙᓪᓕᐊᖏᓐᓇᖅᖢᑎᒃ ᓄᓇᕘᓕᒫᒥ. 2011-ᒥ, 270,801 ounce ᒎᓗᓂᒃ ᓴᖅᑭᑎᑕᐅᔪᖃᓚᐅᖅᐳᖅ Meadowbank ᐅᔭᕋᖕᓂᐊᕐᕕᖕᒥ ᐊᑭᖃᓪᓗᐊᖅᖢᓂ $420-ᒥᓕᐊᓂᒃ.
ᐊᖑᓇᓱᒍᓯᑐᖃᐃᑦ
ᑮᓇᐅᔭᓕᐅᕈᑕᐅᓪᓚᑦᑖᖅᐸᒃᑐᑦ ᖄᒃᑲᓐᓂᐊᒍᑦ, ᓄᓇᕗᒻᒥ ᐃᓕᖅᑯᓯᑐᖃᕐᒥᓂᒃ ᐊᑐᓪᓚᕆᖃᑦᑕᕆᕗᑦ ᐊᖑᓇᓱᖕᓂᕐᒥᒃ, ᓄᓇᕗᑦ ᑮᓇᐅᔭᓕᐅᕈᑎᒃᓴᖓᓄᑦ ᐊᑐᕐᓂᖃᓪᓚᕆᒃᖢᓂ.
ᓄᓇᕗᒻᒥ ᑮᓇᐅᔭᓕᐅᕋᓱᒃᐸᒃᑐᑦ ᐱᐅᓯᕆᔭᐅᕙᓚᐅᖅᑐᒥᑦ ᑐᙵᕕᖃᖃᑦᑕᖅᐳᑦ ᐃᓄᐃᑦ ᐊᖑᓇᓱᒃᐸᒃᖢᑎᒃ, ᓱᓕ ᓄᓇᒧᑦ ᐊᒃᑐᐊᓂᖃᓪᓚᕆᒃᖢᑎᒃ. ᐊᖓᓇᓱᖕᓂᖅ ᐆᒪᔪᐃᓪᓗ ᓂᕿᑖᕈᑕᐅᕙᒃᐳᑦ; ᐊᒥᖏᑦ ᕿᓯᖏᓪᓗ ᐊᓐᓄᕌᓕᐊᕆᔭᐅᕙᒃᖢᑎᒃ; ᓴᐅᓂᖏᓪᓗ ᓴᓇᔭᐅᕙᒃᖢᑎᒃ, ᐱᙳᐊᓕᐊᕆᔭᐅᕙᒃᖢᑎᒃ ᓴᓇᙳᐊᖅᑕᐅᕙᒃᖢᑎᒡᓗ. ᖃᖓᑦᑎᐊᖅ ᖃᐅᔨᓴᖅᑐᑦ ᓇᓚᐅᑦᑖᓚᐅᖅᐳᑦ ᐅᓪᓗᒥ ᐊᖑᓇᓱᒃᐸᒃᑐᓄᑦ ᑮᓇᐅᔭᓕᐅᕈᑕᐅᕙᒃᑐᖅ $40-ᒥᓕᐊᓐᖑᓇᓱᒋᔭᐅᓪᓗᓂ ᐊᕐᕌᒍᓕᒫᒧᑦ. ᓄᓇᕗᒻᒥ ᓇᑦᑎᕋᓱᒃᐸᒃᑐᑦ ᑮᓇᐅᔾᔭᒃᓴᕋᓱᖕᓂᑐᐃᓐᓇᐅᙱᒻᒪᑦ, ᐃᓅᓯᐅᖕᒪᑦ ᐃᓄᖕᓂᒃ ᓄᓇᒧᑦ ᖃᓂᒃᓴᒃᑲᓐᓂᕈᑕᐅᕙᒃᖢᓂ. 40,000 ᖃᓂᒋᔮᓂ ᐊᕐᕌᒍᑕᒫ ᓇᑦᑎᖅᑐᖃᖃᑦᑕᖅᐳᖅ ᓄᓇᕗᒻᒥ. ᐃᓇᖐᔾᔪᑕᐅᔪᑦ ᓂᕿᑦ ᐊᑭᖏᑦ ᓇᑦᑎᐅᑉ ᓂᕿᖓᓂ $5-ᒥᓕᐊᓐᑐᐸᓗᓪᓗᐊᖅᐳᑦ. ᕿᓰᑦ ᓴᓇᔭᐅᕙᒃᑐᑦ $1-ᒥᓕᐊᒃᑲᓐᓂᕐᓂᒃ ᐊᑭᖃᖅᐳᑦ ᓴᓇᙳᐊᖅᑎᓄᑦ ᓴᓇᐅᒐᓄᓪᓗ.
ᐃᖃᓗᓕᕆᓂᖅ
ᓄᓇᕗᒻᒥ ᓴᖅᑭᑎᑦᑎᓚᐅᖅᐳᑦ ᑮᓇᐅᔭᓕᐅᕐᕕᖕᒥ ᖃᓕᕋᓕᖕᓄᑦ, ᑭᖑᖕᓄᑦ, ᐃᖃᓗᖕᓄᓪᓗ ᓄᓇᕐᔪᐊᓕᒫᒥ ᓂᐅᕐᕈᑎᖃᖅᐸᒃᑐᓂᒃ ᐱᔪᓐᓇᖅᑎᑦᑎᓗᑎᒃ ᐊᔾᔨᒌᙱᕈᓘᔭᖅᑐᓂᑦ ᓂᕆᔭᒃᓴᓂᒃ. ᓄᓇᒥ ᐃᒪᕕᖕᒥᓗ ᖃᓕᕋᓕᕆᓂᖅ ᐃᖅᑲᓇᐃᔭᕐᕕᐅᓪᓚᕆᖃᑦᑕᖅᐳᑦ ᕿᑭᖅᑖᓗᖕᒥ. ᖃᓕᕋᓕᖕᓄᑦ, ᓄᓇᕗᑦ ᐃᒪᕕᖕᒥ ᑰᑕᖃᖅᐳᑦ ᓴᓂᕐᕙᐃᔪᓐᓇᖅᖢᑎᒃ 9,500 ᐅᖓᑖᓂ metric tonnes-ᓂᒃ, ᓄᓇᖁᑎᓕᖕᓄᑦ ᐊᑭᖃᓚᐅᖅᖢᓂ $70-ᒥᓕᐊᓂᒃ 2011-ᖑᑎᓪᓗᒍ. ᑕᕝᕙᓂᑦᑕᐃᓐᓇᖅ ᐊᕐᕌᒍᒥ, 60 metric tonnes-ᖏᓐᓇᑯᓗᖕᓂᒃ ᖃᓕᕋᓕᒃᑐᖃᓚᐅᖅᐳᖅ ᑖᒃᑯᓇᙵᑦ 500 metric tonnes-ᓂᒃ ᐱᔭᐅᔪᓐᓇᖅᑐᓂᑦ ᓄᓇᖓᑕ ᑰᑕᖓᓂᑦ. ᑕᒪᑐᒪᓂ ᐊᕐᕌᒍᒥ ᓯᑯ ᐱᐅᓯᕚᓪᓕᖅᓯᒪᓕᖅᑎᓪᓗᒍ, ᓄᓇᓕᖕᓂ ᐃᖃᓗᒐᓱᒃᑎᑦ ᓂᕆᐅᒃᐳᑦ ᓈᒻᒪᒃᓯᓂᐊᕋᓱᒋᓪᓗᑎᒃ 500 metric tonne-ᓂᒃ ᑰᑕᖓᓃᑦᑐᓂᒃ. ᑮᓇᐅᔭᓕᐅᕐᕕᖏᑦ ᐃᖃᓗᖕᓂ ᓂᐅᕐᕈᑎᖃᖅᐸᒃᑐᑦ ᓱᓕ ᖃᐅᔨᓴᖅᑕᐅᓚᐅᙱᑎᓪᓗᒋᑦ, ᐃᖃᓗᓕᕆᓂᖅ ᐱᒻᒪᕆᐅᔪᒥᒃ ᐱᕈᖅᐸᓪᓕᐊᑐᐃᓐᓇᖅᑐᒥᑦ ᐃᑲᔫᑕᐅᖃᑦᑕᖅᐳᖅ ᐊᕕᒃᓯᒪᓂᕆᔭᑦᑕ ᑮᓇᐅᔾᔭᓕᐅᕋᓱᖕᓂᖓᓄᑦ. ᑮᓇᐅᔭᖃᖅᑎᑕᐅᓪᓗᑎᒃ ᒐᕙᒪᑐᖃᒃᑯᓐᓂ, ᓄᓇᕗᑦ ᒐᕙᒪᖓᑦ ᓂᐅᕕᓵᓚᐅᖅᐳᑦ ᓄᑖᖑᓂᖅᓴᒥᑦ ᖃᐅᔨᓴᕈᑎᒥᒃ ᐅᒥᐊᕐᒥᒃ-ᓄᓕᐊᔪᖕᒥᑦ- ᖃᐅᔨᓴᖅᑎᑦ ᖃᐅᔨᒪᔾᔪᑎᒃᓴᓂᒃ ᑲᑎᑦᑎᔪᓐᓇᖅᓯᑎᑦᑎᓪᓗᑎᒃ ᐃᒪᕐᒥᐅᑕᑦ ᐆᒪᔪᖏᓐᓂᒃ, ᐃᓂᒋᕙᒃᑕᖏᓐᓂᒃ, ᐅᓄᕐᓂᖏᓐᓂᒡᓗ ᐃᒫᓃᑦᑐᓂᒃ ᓄᓇᕗᑦ ᖃᓂᒋᔭᖓᓃᑦᑐᓂᒃ.
ᐳᓚᕋᖅᑐᓕᕆᓂᖅ
ᐊᔾᔨᖃᙱᑦᑐᖅ ᐃᓄᐃᑦ ᐃᓕᖅᑯᓯᖓ ᐊᒻᒪ ᑲᔾᔮᕐᓇᖅᑐᒻᒪᕆᐊᓗᒃ ᓄᓇᖓ ᓄᓇᕗᒻᒥ ᐳᓚᕋᐸᒃᑐᓂᒃ ᑕᑯᔭᐅᔪᒪᐃᓐᓇᖃᑦᑕᖅᐳᖅ ᓇᑭᑐᐃᓐᓇᖅ ᓄᓇᕐᔪᐊᒥᙶᖅᑐᓂᑦ. 14,000 ᖃᓂᒋᔮᓂ ᐃᓄᐃᑦ ᓄᓇᕗᒻᒧᑦ ᐳᓛᕆᐊᖃᑦᑕᖅᐳᑦ ᐊᕐᕌᒎᓕᒫᖅ. ᐊᔾᔨᒌᙱᑦᑐᑦ ᐳᓚᕋᖅᐸᒃᑐᑦ ᐅᑯᓂᖓ ᐱᓕᕆᐊᒃᓴᖃᖃᑦᑕᖅᐳᑦ ᓄᓇᒥ ᐳᓚᕋᖅᑐᓕᕆᓂᖅ, ᑮᓇᐅᔭᓕᒡᔪᐊᑦ ᐊᖑᓇᓱᒋᐊᖅᐸᒃᑐᑦ, ᐃᖃᓗᒐᓱᖕᓂᖅ, ᐃᓕᖅᑯᓯᑐᖃᓕᕆᓂᖅ, ᑲᔾᔭᐅᓴᒃᑎᑦᑎᓂᖅ ᐃᓕᓐᓂᐊᖅᖢᑎᒡᓗ ᐱᓕᕆᕙᒃᑐᑦ.
ᓄᓇᕗᒻᒥ ᑎᓴᒪᐃᑦ ᑲᓇᑕᒥ ᒥᕐᙳᐃᖅᓯᕐᕖᑦ ᐊᒻᒪ 15 ᐊᕕᒃᓯᒪᓂᕆᔭᑦᑕ ᒥᕐᙳᐃᖅᓯᕐᕕᖏᑦ ᐱᕕᒃᓴᖃᖅᑎᑦᑎᒃᑲᓐᓂᖃᑦᑕᖅᐳᑦ ᐳᓚᕋᖅᑎᓂᒃ ᕿᒥᕐᕈᔪᒪᔪᓂᒃ ᓄᓇᕗᑦ ᑲᔾᔮᕐᓇᕐᓂᐊᓗᐊᓂᒃ. ᓄᓇᕗᒻᒥ ᒥᕐᙳᐃᖅᓯᕐᕖᑦ ᑕᖕᒫᖅᓯᒪᕝᕕᐅᖃᑦᑕᖅᐳᑦ ᐊᒻᒪ ᐅᓄᖅᑐᒻᒪᕆᐊᓗᖕᓂᑦ ᐳᓚᕋᖅᑎᓂᒃ ᑲᔾᔮᕆᔭᐅᕙᒃᖢᑎᒃ. ᐅᒥᐊᕐᔪᐊᒃᑯᑦ ᒫᓐᓇ ᐳᓚᕋᖃᑦᑕᓕᕐᒥᔪᑦ ᓄᓇᕗᑦ ᓄᓇᓕᖏᓐᓄᑦ ᐊᕐᕌᒐᑕᒫ ᑮᓇᐅᔭᓕᐅᕈᑕᐅᑦᑎᐊᖅᐸᒃᖢᓂ ᐊᖏᕐᕋᖃᑦᑐᓄᑦ ᓴᓇᐅᒐᕐᖏᓐᓂᒃ ᓂᐅᕐᕈᑎᖃᖅᐸᒃᖢᑎᒃ.
ᐃᓄᐃᑦ ᓴᓇᐅᒐᖏᑦ
ᐃᓄᐃᑦ ᓴᓇᐅᒐᖏᓐᓂᒃ ᑭᓱᓕᐅᕐᕖᑦ ᓱᓕ ᐃᓚᒋᔭᐅᓪᓚᕆᒃᐳᑦ ᑮᓇᐅᔭᓕᐅᕈᑎᒃᓴᑦᑎᓐᓄᑦ ᓄᓇᓕᖕᓄᑦ ᐅᓄᖅᑐᓄᑦ ᓄᓇᕗᒻᒥ. ᒐᕙᒪᒃᑯᑦ ᐱᓕᕆᕝᕕᖓᓂ ᖃᐅᔨᓴᓚᐅᖅᑐᑦ ᓇᓗᓇᐃᖅᓯᓚᐅᖅᐳᑦ ᓴᓇᐅᒐᕐᓄᑦ ᓴᓇᙳᐊᒐᕐᓄᓪᓗ ᐃᑲᔫᑎᖃᖃᑦᑕᕐᓂᖏᓐᓄᑦ $33-ᒥᓕᐊᓂᒃ ᓄᓇᕗᑦ ᑮᓇᐅᔭᓕᐅᕈᑎᖏᓐᓄᑦ. ᐅᓄᖅᑐᑦ ᓄᓇᕗᒻᒥ ᓴᓇᙳᐊᖅᐸᒃᑐᑦ ᓄᓇᕐᔪᐊᓕᒫᒥ ᐃᓕᓴᕆᔭᐅᓯᒪᓕᖅᐳᑦ. ᑲᓇᑕᓕᒫᒥᐅᑲᓴᐃᑦ ᖃᐅᔨᒪᓂᖅᓴᐅᑎᓪᓗᒋᑦ ᓴᓇᙳᐊᒐᒃᓴᓂᒃ ᓴᓇᙳᐊᖅᓯᒪᔪᓂᒃ ᑎᑎᖅᑐᒐᕐᓂᓪᓗ ᓄᓇᓕᖕᓂ ᓲᕐᓗ ᑭᙵᓂ ᖃᒪᓂ’ᑐᐊᕐᒥᓗ, ᓄᓇᕐᔪᐊᓕᒫᒥ ᐃᓕᓴᕆᔭᐅᓯᒪᔪᑦ ᐊᑭᓐᓇᕐᒥᐅᑕᐃᑦ ᒥᖑᐊᖅᓯᒪᔪᑦ ᓄᕕᖅᓴᒐᒃᓴᐃᓪᓗ ᓴᖅᑭᑎᑕᐅᖃᑦᑕᖅᐳᑦ ᐸᓐᓂᖅᑑᒥ.
ᓄᓇᕗᒻᒥ ᓴᓇᙳᐊᖅᑏᑦ ᓇᖕᒥᓂᖅ ᐊᑎᖅᑖᖅᐸᓪᓕᐊᓕᖅᐳᑦ ᑕᕐᕆᔭᐅᓯᐅᕐᓂᒃᑯᑦ, ᓈᓚᐅᑎᒃᑯᑦ, ᐊᒻᒪ ᓄᑖᓂᒃ ᑐᓴᖅᑎᑦᑎᔾᔪᑎᒃᑯᑦ; ᓄᓇᕐᔪᐊᓕᒫᒥ ᑲᔪᓯᑦᑎᐊᖅᓯᒪᔪᑦ ᑕᕐᕆᔮᒃᓴᐃᑦ ᓲᕐᓗ “The Necessities of Life” ᐊᒻᒪ “Atanarjuat - ᐅᕿᓚᔪᖅ” ᓇᓗᓇᕈᓐᓃᖅᑎᑦᑎᕗᑦ ᑕᒪᐃᓐᓂᒃ ᐊᔪᙱᓐᓂᖏᓐᓂᒃ ᓄᓇᕗᒻᒥᐅᑦ ᓴᖅᑭᑎᑦᑎᓯᒪᔪᑦ, ᐊᒻᒪ ᑕᑯᔭᐅᓪᓗᑎᒃ ᑕᑯᔪᒥᒋᔭᐅᖃᑦᑕᖅᓯᒪᓪᓗᓂ ᓄᓇᖓ ᓄᓇᕗᒻᒥ ᐱᓕᕆᕝᕕᐅᓪᓗᓂ ᑕᕐᕆᔭᐅᓯᐅᖅᑎᓄᑦ.