You are here
ᐱᓇᓱᐊᖅᒐᒃᓴᐃᑦ/ᑮᓇᐅᔭᖃᖅᑎᑕᐅᔪᓐᓇᖅᑐᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑮᓇᐅᔭᖃᖅᑎᑦᓯᓲᑦ ᐊᔾᔨᒌᖏᑦᑑᑏᓄᑦ ᐱᓇᓱᐊᒐᒃᓴᖃᖅᑎᑦᑎᓗᑎᒃ ᐃᒻᒥᒎᓇᖅᑐᓄᑦ, ᓇᒻᒥᓂᖃᖅᑐᓄᑦ, ᑎᒥᐅᔪᓄᑦ ᐊᒻᒪᓗ ᓄᓇᓕᓐᓂ ᒪᑯᓂᖓ ᐱᕕᒃᓴᖃᖅᑎᑦᓯᓱᑦ:
ᑕᓐᓇ ᓄᓇᓕᖕᓂᒃ ᐃᑲᔪᕐᓂᖃᕋᔭᖅᑐᖅ ᐱᑐᒃᑎᑦᓯᓗᑎᒃ ᐱᕕᒃᓴᖅᑕᕐᕕᐅᔪᓐᓇᖅᑐᓄᑦ. ᑮᓇᐅᔭᖃᖅᑎᑦᑎᔪᓐᓇᖅᑐᖅ ᓯᓚ ᖃᓄᐃᑦᑐᑐᐃᓐᓇᐅᒐᓗᐊᖅᑎᓪᓗᒍ ᐅᕝᕙᓘᓐᓃᑦ ᓯᓚ ᑭᓯᐊᓂ ᐃᒪᐃᑑᑎᓗᒍ ᐊᖁᑎᒋᔭᐅᓲᓄᑦ ᐱᓱᒡᕕᐅᓲᓄᓪᓗ.
ᓄᓇᓕᓐᓂ ᓂᐅᕐᕈᔪᓕᕆᓂᒃᑯᑦ ᐊᒻᒪ ᐃᓕᖅᑯᓯᓕᕆᓂᒃᑯᑦ
ᐱᓕᕆᐊᒃᓴᖅ ᓴᙱᒃᑎᒋᐊᖅᑎᑦᑎᓗᓂ ᓄᓇᓕᖕᓂ ᒪᑭᐅᒪᐃᓐᓇᕈᑎᒃᓴᖏᓐᓂᑦ ᐸᕐᓇᒃᓯᒫᓂᒍᓐᓇᕐᓂᕐᒥᒃᓗ ᐳᓚᕋᖅᑐᓕᕆᓂᕐᒧᑦ, ᐱᐅᓯᒋᐊᖅᑎᑦᑎᓗᓂᓗ ᐱᕙᓪᓕᐊᔾᔪᑎᓂᑦ ᓴᓇᑐᓂᕐᒧᑦ ᐱᓕᕆᐊᖃᖅᐸᑦᑐᓄᑦ ᓲᕐᓗ ᓂᔾᔭᐅᑎᓕᕆᓂᖅ, ᖃᕋᓴᐅᔭᒃᑯᑦ ᑐᓴᒐᒃᓴᓕᕆᓂᖅ, ᑎᑎᕋᖅᑎᓄᑦ ᑕᑯᕋᓐᓈᖅᑎᑦᓯᔨᓄᓪᓗ.
ᓄᓇᓖᑦ ᐃᓚᐅᑎᑕᐅᓂᖏᓐᓄᑦ ᐃᑲᔫᑎᓄᑦ ᐱᓕᕆᐊᒃᓴᑦ
ᓄᓇᓖᑦ ᐃᓚᐅᑎᑕᐅᓂᖏᓐᓄᑦ ᐃᑲᔫᑎᓄᑦ ᐱᓕᕆᐊᒃᓴᑦ ᐃᑲᔪᖅᑐᐃᓂᐊᖅᐳᑦ ᑮᓇᐅᔭᑎᒍᑦ ᐱᓕᕆᐊᑉ ᐱᕙᓪᓕᐊᓂᖓᓂ, ᓯᕗᓂᐊᓂᑦ ᒪᓕᒐᐃᓖᑦ ᐅᔭᕋᖕᓂᐊᖕᓂᐊᕐᓗᑎᒃ ᐊᐅᓚᓐᓂᐊᕐᓗᑎᒡᓗ. ᐅᑯᐊ ᐱᓕᕆᐊᒃᓴᐃᑦ ᓴᖅᑭᔮᖅᑎᑦᑎᔪᓐᓇᖅᑐᑦ ᑐᑭᓕᖕᒥᑦ ᐊᖏᕈᑎᒥᑦ ᐃᓚᐅᑎᑦᑎᓂᐊᕐᓗᑎᒃ ᓄᓇᕗᒻᒥᐅᓂᑦ ᒪᓕᒃᓗᑎᒃ ᓄᓇᓖᑦ ᓯᕗᓪᓕᐅᔾᔭᒃᓴᖏᓐᓂᑦ ᐱᔪᒥᓇᓛᖑᕗᑦ.
ᓄᓇᓕᖕᒥᑦ ᐃᓗᐃᑦᑐᕈᖅᑎᑦᓯᒋᐊᕐᓂᕐᒧᑦ ᐊᕿᒃᓱᐃᓂᕐᒧᑦ ᐱᓇᓱᐊᖅᑕᐅᔪᓐᓇᖅᑐᑦ
ᑖᓐᓇ ᐱᓇᓱᐊᖅᑕᐅᔪᓐᓇᖅᑐᖅ ᐃᓗᐃᑦᑐᕈᖅᑎᑦᓯᕙᓪᓕᕈᑕᐅᔪᓐᓇᖅᑐᖅ ᕼᐊᒻᓚᑦᑯᓐᓄᑦ ᖁᕝᕙᖅᐸᓪᓕᖅᑎᑦᑎᔪᑎᒋᔪᓐᓇᕐᓂᐊᖅᑕᖏᓐᓄᑦ ᒪᑭᑕᒐᓱᐊᕐᓂᕐᒧᑦ ᐱᕙᓪᓕᐊᓂᐅᔪᓄᑦ.
ᑮᓇᐅᔭᖃᖅᑎᑕᐅᔾᔪᑏᑦ ᐊᑐᐃᓐᓇᐅᔪᑦ ᐃᓄᒃᓯᐅᑎᓂᒃ ᓂᕿᓂᒃ ᑐᓂᐅᖃᐃᔾᔪᑎᒃᓴᓄᑦ ᐱᓕᕆᐊᒃᓴᖅ ᐃᑲᔪᖅᑐᐃᓂᐊᕐᓗᓂ ᓄᓇᕗᒻᒥᐅᓂᒃ ᐱᔭᐅᔭᕆᐊᓕᖕᓂᒃ ᐃᑲᔪᕐᓗᓂ ᓂᕿᖃᖅᑎᑦᓯᓂᕐᒥᒃ ᐱᐅᓯᐅᒥᑎᑦᓯᓗᓂᓗ ᐱᑕᖃᖅᑎᑦᓯᓂᕐᒥᒃ, ᐊᑭᑭᑑᓗᓂ, ᖃᓄᐃᖏᑦᓯᐊᕐᓇᕐᑐᒥᒃ ᐃᓄᒃᓯᐅᑎᓂᒃ ᓂᕿᖃᖅᑎᑦᓯᓂᕐᒥᒃ.
ᐃᒻᒥᒎᖅᖢᓂ ᑭᓱᑐᐃᓐᓇᓂᒃ ᖃᐅᔨᓴᕐᓂᕐᒥᒃ ᐱᓕᕆᐊᒃᓴᑦ ᒪᒃᑯᒃᑐᓄᑦ
ᐃᒻᒥᒎᖅᖢᓂ ᑭᓱᑐᐃᓐᓇᓂᒃ ᖃᐅᔨᓴᕐᓂᕐᒥᒃ ᐱᓕᕆᐊᒃᓴᑦ ᒪᒃᑯᑦᑐᓄᑦ (I-SPY) ᑮᓇᐅᔭᖃᖅᑎᑦᑎᔪᓐᓇᖅᑐᖅ ᓴᕿᑎᑦᑎᔾᔪᑎᒃᓴᐅᓂᐊᖅᑐᓄᑦ ᐊᒻᒪᓗ ᑭᓱᑐᐃᓐᓇᓂᒃ ᖃᐅᔨᓴᕐᓂᕐᒨᖓᔪᓄᑦ ᐃᓕᓐᓂᐊᕈᑎᒃᓴᓕᐅᕈᑕᐅᓂᐊᖅᑐᓄᑦ ᓄᓇᕗᒻᒥ ᒪᒃᑯᒃᑐᓄᑦ.
ᐅᑭᐅᖅᑕᖅᑐᒥᑦ ᖃᖓᑕᓲᖅᑎᐅᓂᕐᒥᒃ ᐃᓕᓐᓂᐊᕈᒪᔪᓄᑦ ᐃᓕᓐᓂᐊᑦᑎᐊᕐᓯᒪᓂᕐᒧᑦ ᐃᑲᔫᑎᒃᓴᐃᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐃᓕᓐᓂᐊᕈᒪᒐᔭᖅᑐᓂᒃ ᐃᑲᔫᑎᒃᓴᓄᒃ ᖃᖓᑕᔫᖅᑎᒃᓴᐅᓂᕐᒧᑦ ᓵᓚᖃᐅᓯᐊᖅᑎᑦᓯᓱᖑᕗᑦ ᖃᓄᑐᐃᓐᓇᖅ ᖃᖓᑕᓲᖅᑎᐅᓂᕐᒥᒃ ᐃᖃᓇᐃᔮᖃᕈᒪᒐᔭᕐᑐᓂᒃ. ᐃᓕᓐᓂᐊᕈᑎᐅᒐᔭᕐᓗᑎᒃ ᖃᖓᑕᓂᕐᒨᖓᔪᓂᒃ ᐅᕝᕙᓘᓐᓃᑦ ᒥᕝᕕᒻᒥ ᐃᖏᕐᕋᑎᑦᓯᔨᐅᓗᓂ ᐅᕝᕙᓘᓐᓃᑦ ᐊᐅᓚᑦᓯᓂᓕᕆᔨᐅᒐᔭᕐᓗᓂ, ᐊᔾᔨᒌᖏᑦᑐᓂᒃ ᖃᖓᑕᔪᓐᓇᖅᑐᓂᒃ ᐊᐅᓚᐅᓯᕆᔨᐅᒐᔭᕐᓗᓂ, ᐅᕝᕙᓘᓐᓃᑦ ᖃᖓᑕᓲᕐᒥᒃ ᐊᖁᑎᐅᓂᕐᒥᒃ ᐱᓕᒻᒪᒃᓴᕈᒪᒐᔭᕐᑐᓄᑦ. $5,000-ᒧᑦ ᑎᑭᑦᑐᒥᒃ ᐃᑲᔫᓯᐊᕈᓐᓇᕐᐳᑎᑦ ᐊᑭᓕᐅᑎᒃᓴᕆᒐᔭᕐᑕᕐᓂᒃ ᖃᖓᑕᓲᓕᕆᓂᕐᒥᒃ ᐃᓕᓐᓂᐊᕈᑎᒃᓴᕐᓄᑦ!
ᐱᔪᓐᓇᕐᓂᓖᑦ ᐅᔭᕋᒃᓯᐅᖅᑎᐅᓂᕐᒥᒃ ᑐᒃᓯᕋᐅᑎᓕᐅᕈᓐᓇᖅᑐᑦ ᑐᓂᕐᕈᓯᐊᖅᑕᐅᔪᓐᓇᖅᑐᒃ $8,000-ᓂᒃ ᐊᕐᕌᒍᒧᑦ ᑭᖒᒪᓇᕐᓂᖏᓐᓄᑦ ᑮᓇᐅᔭᖅᑑᑎᒃᓴᓄᑦ ᖃᐅᔨᓴᕈᑕᐅᓂᐊᕐᓗᑎᒃ ᓄᑖᓂᒃ ᐅᔭᕋᒃᑕᕐᕕᐅᔪᓐᓇᓂᐊᕐᑐᓂᒃ ᓄᓇᕗᒻᒥ. ᑖᓐᓇ ᑮᓇᐅᔭᖃᖅᑎᑦᓯᓂᕐᒧᑦ ᐃᑲᔫᑎᒃᓴᖅ ᑐᕌᖓᔪᖅ ᐱᓕᕆᐊᖑᔪᓅᖓᓗᓂ ᑮᓇᐅᔭᖅᑑᑎᐅᒐᔭᕐᑐᓄᑦ ᐅᒃᑑᑎᒋᓗᒍ ᐅᒃᓱᐊᓗᖃᕐᓂᖅ, ᓄᓇᒃᑰᕈᑏᑦ ᓴᓇᔭᐅᔾᔪᑎᖏᓐᓄᑦ, ᓂᕿᖃᕆᐊᖃᕐᓂᕐᒧᑦ ᓄᓇᐃᓐᓇᕐᒦᓂᕐᒥᓄᑦ, ᐃᑲᔪᖅᑎᖃᕐᓂᕐᒧᑦ ᑮᓇᐅᔾᔭᒃᓵᒃᓴᓄᑦ, ᐅᔭᕋᒃᓯᐅᖅᑎᓯᐅᑎᓄᑦ ᐱᖁᑎᓄᑦ, ᐊᒻᒪᓗ ᐅᔭᕋᓐᓂᐊᒐᒃᓴᓂᒃ ᖃᐅᔨᓴᕐᓂᕐᒧᑦ ᐊᑭᖏᓐᓄᑦ.
ᑖᓐᓇ ᐱᓇᓱᐊᒐᒃᓴᐅᔪᓐᓇᖅᑐᖅ ᑐᕌᖓᓗᐊᖑᐊᖅᑐᖅ ᐱᒋᐊᖅᐸᓪᓕᐊᓕᓵᖅᑐᓄᑦ ᒥᑭᓐᓂᖅᓴᓄᑦ ᓇᖕᒥᓂᕆᔭᐅᔪᓂᒃ, ᓄᓇᓕᖕᓂ ᑎᒥᐅᔪᓄᑦ ᐊᒻᒪᓗ ᐃᒻᒥᒎᓇᖅᑎᖅᑐᓄᑦ ᐃᑲᔫᓯᐊᒃᓴᖅ ᐱᕈᖅᐸᓪᓕᐊᔪᓐᓇᖁᓪᓗᒋᑦ.
ᓄᓇᕗᒻᒥ ᐅᔭᕋᖕᓂᐊᕐᕕᓕᕆᔪᓂᒃ ᐃᓕᓐᓂᐊᒐᒃᓴᓄᑦ ᑮᓇᐅᔭᑦ
ᓄᓇᕗᑦ ᒐᕙᒪᒃᑯᑦ ᐱᔾᔪᑎᖓ ᐅᔭᕋᖕᓂᐊᕐᕕᖕᓂ ᐃᓕᓐᓂᐊᖅᑕᐅᔪᒃᓴᓄᑦ ᑮᓇᐅᔭᑦ ᐊᖏᒡᓕᒋᐊᖅᑕᐅᖁᓪᓗᒋᑦ ᐃᖅᑲᓇᐃᔮᖅᑖᖑᔪᓐᓇᖅᑐᑦ ᓄᓇᕗᒥᐅᓄᑦ ᐅᔭᕋᖕᓂᐊᕐᕕᖕᓂ ᐊᔾᔨᐸᓗᖏᓐᓂᒡᓗ ᐱᓕᕆᐊᖑᓲᓂᒃ. ᐅᔭᕋᖕᓂᐊᕐᕕᖕᓂ ᐃᓕᓐᓂᐊᖅᑕᐅᔪᒃᓴᓄᑦ ᑮᓇᐅᔭᑦ ᐱᕕᖃᕈᑕᐅᓕᒑᕗᑦ ᓵᑕᒃᓴᐅᔪᓐᓇᕐᓗᑎᒃ ᐃᑲᔫᑎᑦ ᐱᕙᓪᓕᐊᔾᔪᑕᐅᔪᓐᓇᕐᓗᑎᒃ, ᐊᐅᓚᑕᐅᔪᓐᓇᕐᓗᑎᒃ ᐱᐊᓂᒃᑕᐅᔪᓐᓇᕐᓗᑎᒡᓗ ᐅᔭᕋᖕᓂᐊᒐᒃᓴᓄᑦ ᐃᓕᓐᓂᐊᖅᑕᐅᔭᕆᐊᓖᑦ ᓄᓇᕗᒥᐅᓄᑦ.
ᑖᓐᓇ ᐱᓇᓱᐊᒐᒃᓴᖅ ᐱᕕᖃᖅᑎᑦᓯᕗᖅ ᐃᑲᔫᑎᐅᓂᐊᕐᑐᓂᒃ ᓇᖕᒥᓂᕆᔭᐅᔪᓄᑦ, ᓄᓇᓕᖕᓂᑦ ᒐᕙᒪᒃᑯᓐᓄᑦ, ᓇᖕᒥᓂᖅ ᑮᓇᐅᔭᓕᐅᕋᓱᐊᕈᑎᒋᓂᐊᖏᓪᓗᒍ ᑎᒥᐅᔪᓄᑦ ᐊᒻᒪᓗ ᑲᑐᔾᔨᖃᑎᒌᖑᔪᓄᑦ. ᑕᕘᓇ ᐱᓇᓱᐊᒐᒃᓴᐅᔪᓐᓇᖅᑐᒃᑯᑦ, ᓇᖕᒥᓂᖁᑎᓖᑦ ᑐᓂᕐᕈᓯᐊᕈᓐᓇᖅᑐᑦ ᓂᕈᑦᑐᕆᐊᕈᑎᒃᓴᓄᑦ ᐅᕝᕙᓘᓐᓃᑦ ᐱᒋᐊᕈᑎᒃᓴᖏᑦ ᐊᑭᖏᓐᓄᑦ. ᓄᓇᓕᖕᓂ ᒐᕙᒪᒃᑯᑦ, ᓇᖕᒥᓂᖅ ᑮᓇᐅᔭᓕᐅᕋᓱᐊᕈᑎᒋᓂᐊᖏᓪᓗᒍ ᑎᒥᐅᔪᐃᑦ ᑲᑐᔾᔨᖃᑎᒌᖑᔪᐃᓪᓗ ᑮᓇᐅᔭᖃᖅᑎᑕᐅᔪᓐᓇᖅᑐᑦ ᐱᓕᒻᒪᒃᓴᕈᑎᒃᓴᓄᑦ, ᓂᐅᕐᕈᓯᐅᕈᑎᒃᓴᓄᑦ ᐊᒻᒪᓗ ᓄᓇᓕᖕᒥᑦ ᐱᕙᓪᓕᐊᑎᑦᓯᓂᕐᒧᑦ.
ᐱᒍᔾᔨᕖᑦ
ᐃᖃᓇᐃᔭᖅᕕᐅᔪᑦ ᐱᕕᖃᖅᑎᑦᓯᓱᖑᕗᖅ ᐱᕙᓪᓕᐊᔪᓕᕆᔨᒃᑯᓐᓂᑦ ᐃᖏᕐᕋᔪᓕᕆᔨᒃᑯᓪᓗ ᐱᒍᔾᔨᑎᖏᓐᓂᒃ ᑐᕋᐃᓐᓇᖅᑐᒥᒃ ᐅᕝᕙᓘᓐᓃᑦ ᐱᖓᔪᒋᔭᐅᓪᓗᑎᒃ ᐃᓚᐅᔫᖃᑕᐅᔪᓄᑦ.
ᓴᓇᙳᐊᖅᑏᑦ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑮᓇᐅᔭᖃᖅᑎᑦᑎᓲᖑᕗᑦ ᓄᓇᕗᒻᒥᑦ ᓴᓇᖑᐊᖅᑏᑦ ᑲᑐᔾᔨᖃᑎᒌᒃᑯᖏᓐᓂᒃ. ᓄᓇᕗᒻᒥᑦ ᓴᓇᖑᐊᖅᑏᑦ ᑲᑐᔾᔨᖃᑎᒌᒃᑯᖏᑦ ᑮᓇᐅᔭᖃᖅᑎᑕᐅᔾᔪᑎᒥᓂᒃ ᐊᑐᖅᖢᑎᒃ ᖁᕝᕙᕆᐊᖅᑎᑦᑎᔪᑎᖃᓲᖑᕗᑦ ᐱᕈᖅᓴᐃᓂᕐᒥᒃ ᐱᒃᑯᒋᔭᖃᕐᓂᕐᒥᒡᓗ ᓄᓇᕗᒻᒥ ᓴᓇᖑᐊᖅᑎᓂᒃ ᐊᒻᒪᓗ ᓴᓇᖑᐊᒐᖏᓐᓂᒃ.
ᓱᑲᔪᒥᒃ ᐃᑭᐊᖅᑭᔾᔪᑎᖃᕐᓂᖅ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑮᓇᐅᔭᖃᖅᑎᑦᑎᓲᖑᕗᑦ ᓄᓇᕗᒻᒥᑦ ᓱᒃᑲᔪᒥᒃ ᐃᑭᐊᖅᑭᔾᔪᑎᖃᖅᓂᕐᒧᑦ ᐱᕙᓪᓕᐊᔪᓕᕆᔨᒃᑯᑦ ᑎᒥᖁᑎᖓᓐᓂᒃ. ᑎᒥᐅᔪᖅ ᐱᑕᖃᖅᑎᑦᓯᓪᓗᓂ ᐃᓄᖕᓄᑦ ᐊᔪᖏᑦᑎᐊᖅᑐᒥᒃ, ᐊᑭᑐᔫᖏᑦᑐᒥᒃ ᓱᒃᑲᔪᒥᒃ ᐃᑭᐊᖅᑭᔾᔪᑎᖃᕈᓐᓇᖁᓪᓗᒋᑦ ᓄᓇᕗᒻᒥ ᓄᓇᓕᓕᒫᖏᑦ.
ᓇᒻᒥᓂᖃᖅᑐᓂᒃ ᐱᕙᓪᓕᐊᑎᑦᓯᓂᖅ
ᐱᓕᕆᕕᐅᔪᖅ ᑮᓇᐅᔭᖃᖅᑎᑦᑎᓲᖅ ᓇᖕᒥᓂᖃᖅᑐᓂᒃ ᒪᑯᑎᒎᓇᖅ ᒥᑭᓐᓂᖅᓴᒥᒃ ᓇᒻᒥᓂᖃᖅᑐᓄᑦ ᐃᑲᔫᑎᒃᓴᐃᑦ ᐊᒻᒪᓗ ᑮᓇᐅᔭᓕᐅᕋᓱᐊᕈᓐᓇᕐᓂᕐᒧᑦ ᐋᕿᒃᓯᒪᐅᑎᒃᓴᐃᑦ ᐱᓇᓱᐊᖅᑕᐅᔪᓐᓇᖅᑐᑦ. ᐱᑕᖃᕐᒥᔪᖅ ᑐᑭᒧᐊᑦᑎᐊᕈᑎᒃᓴᒥᒃ ᓄᓇᕗᒻᒥ ᓇᖕᒥᓂᖃᕐᓂᕐᒧᑦ ᐱᒋᐊᖅᑎᑦᑎᔾᔪᑎᐅᔪᓐᓇᖅᑐᓂᒃ. ᐱᓕᕆᕕᐅᔪᖅ ᑮᓇᐅᔭᖃᖅᑎᑦᑎᓲᖅ ᓄᓇᕗᒻᒥᑦ ᓇᖕᒥᓂᖃᖅᑐᓄᑦ ᑮᓇᐅᔭᒃᑯᕕᒃ ᑯᐊᐳᕆᓴᖓᓂᒃ. ᑕᓐᓇ ᑯᐊᐳᕇᓴᓐ ᑮᓇᐅᔭᖃᖅᑎᑦᑎᓲᖅ ᐊᖏᓂᖅᓴᓂᒃ ᓇᖕᒥᓂᕆᔭᐅᔪᓂᒃ ᐊᑮᑐᖃᕐᓂᕐᒧᑦ ᑮᓇᐅᔭᖃᖅᑎᑕᐅᔾᔪᑎᑖᕈᓐᓇᖏᓕᖅᓯᒪᔪᓄᑦ ᓂᐅᕕᐊᒃᓴᖃᑎᓂᒃ.
ᓄᓇᓕᓐᓂ ᐱᕙᓪᓕᐊᑎᑦᓯᓂᖅ
ᐱᓕᕆᕕᐅᔪᖅ ᐃᑲᔪᖅᑐᐃᓲᖑᕗᖅ ᐱᕙᓪᓕᐊᓂᐅᔪᓂᒃ ᓄᓇᓕᖕᓄᑦ ᒪᑭᑕᒐᓱᐊᕈᑎᐅᔪᓄᑦ ᑮᓇᐅᔭᖃᖅᑎᑦᓯᓪᓗᓂ ᐃᑲᔫᑎᒃᓴᓂᒃ ᒧᓂᓯᐹᓕᑎᓄᑦ ᐊᒻᒪᓗ ᒐᕙᒪᒃᑯᓐᓄᑦ ᐊᐅᓚᑕᐅᖏᑦᑐᓄᑦ ᑎᒥᐅᔪᓄᑦ.
ᑮᓇᐅᔭᓕᐅᕋᓱᐊᕈᓐᓇᕐᓂᕐᒧᑦ ᐋᕿᒃᓯᒪᐅᑎᒃᓴᐃᑦ ᐱᓇᓱᐊᒐᒃᓴᐅᔪᐃᑦ ᐊᑖᓂᖢᓂ, ᓄᓇᕗᒻᒥᑦ ᒪᑭᑕᒐᓱᐊᕐᓂᕐᒧᑦ ᑐᙵᕕᒃ ᑮᓇᐅᔭᖃᕐᕕᒃ ᑐᕌᒐᖃᓲᖑᕗᖅ ᓄᓇᓕᖕᓂᒃ ᑎᒥᐅᔪᓂᒃ ᐃᖃᓇᐃᔮᖃᖅᐸᒃᑐᓂᒃ ᐱᐅᓯᐅᒥᑎᑦᓯᓇᓱᖕᓂᕐᒥᒃ ᐊᔪᖏᑎᑦᑎᓂᕐᒥᒃ ᓄᓇᕗᒻᒥᐅᓂᒃ ᐃᓚᐅᖃᑕᐅᖁᔨᓪᓗᑎᒃ ᓄᓇᕗᑦ ᒪᑭᑕᒐᓱᐊᕐᓂᖓᓄᑦ. ᓇᖕᒥᓂᖅ ᐃᖃᓇᐃᔭᕐᕕᓕᖕᓄᑦ ᐱᕙᓪᓕᐊᑎᑦᓯᓂᕐᒧᑦ ᑮᓇᐅᔭᖃᖅᑎᕕᒃ ᑮᓇᐅᔭᑎᒍᑦ ᐃᑲᔫᓯᐊᖅᑎᑦᑎᓲᖅ ᓄᓇᓕᖕᓂᒃ ᑎᒥᐅᔪᓂᒃ ᓇᖕᒥᓂᖅ ᐃᖃᓇᐃᔭᕐᕕᖃᕈᓐᓇᖁᓪᓗᒋᑦ ᐊᒻᒪᓗ ᓇᖕᒥᓂᕐᒥᓂᒃ ᑲᒪᔪᓐᓇᕐᓂᕐᒥᒃ ᐱᔨᑦᓯᕈᓐᓇᖁᓪᓗᒋᑦ.
ᑕᒪᕐᒥᒃ ᓄᓇᕗᒻᒥᑦ ᓄᓇᓖᑦ ᑮᓇᐅᔭᑎᒍᑦ ᐃᑲᔫᓯᐊᕈᓐᓇᖅᑐᑦ ᑕᕙᖓᑦ ᐱᓕᕆᕕᐅᔪᒥᒃ ᐃᖃᓇᐃᔭᖅᑎᒃᓴᐅᓂᐊᖅᑐᒧᑦ ᑐᕌᖓᓗᓂ ᓄᓇᓕᖕᒥᑦ ᐱᕙᓪᓕᐊᔪᓕᕆᔨᐅᓂᐊᖅᑐᒥᒃ, ᐊᕿᒃᓱᐃᔨᐅᓂᐊᕐᓗᓂ ᓄᓇᓕᖕᒥᑦ ᐱᕙᓪᓕᐊᑎᑦᓯᓂᕐᒧᑦ ᐸᕐᓇᒃᓯᒪᐅᑎᒃᓴᓂᒃ, ᐊᒻᒪᓗ ᐊᑐᓕᖅᑎᑦᑎᔨᐅᓗᓂ ᐱᓇᓱᐊᖅᑕᐅᔪᒃᓴᐃᑦ ᓇᓗᓇᐃᖅᑕᐅᓯᒪᓂᖏᓐᓂᒃ ᑕᕝᕙᓂ ᐸᕐᓇᒃᓯᒪᐅᑎᒥᒃ. ᑕᓐᓇ ᐃᑲᔪᖅᓯᒋᐊᕈᑎᒃᓴᖅ ᐊᑐᐃᓐᓇᐅᑎᑕᐅᔪᖅ ᐅᑯᓇᖓᑦ ᓄᓇᓕᖕᒥ ᐃᓗᐃᑦᑐᕈᖅᑎᑦᓯᒋᐊᕐᓂᕐᒧᑦ ᐊᕿᒃᓱᐃᓂᖅ ᐃᓂᓪᓚᒃᑕᐅᓯᒪᓪᓗᓂ ᐅᕙᓂ ᐊᑐᐊᒐᐃᑦ ᐱᕕᒃᓴᐅᔪᓐᓇᖅᑐᓄᑦ ᐱᓕᕆᖃᑎᒌᖕᓂᒃᑯᑦ.
ᑕᕐᕆᔭᐅᓯᐊᕐᓂᖅ, ᑕᓚᕖᓴᓐ, ᐊᒻᒪᓗ ᓄᑖᓂᒃ ᐱᕙᓪᓕᐊᔪᓕᕆᓂᖅ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᑮᓇᐅᔭᖃᖅᑎᑦᓯᓱᖑᕗᑦ ᓄᓇᕗᒻᒥᑦ ᑕᕐᕆᔭᐅᓯᖅᑎᓂᒃ ᐱᕙᓪᓕᐊᑎᑦᓯᔩᑦ ᑎᒥᖁᑎᖓᓐᓂ. ᑕᕐᕆᔭᐅᓯᐅᖅᑐᓕᕆᔩᒃᑯᑦ ᖁᕝᕙᕆᐊᖅᑎᑦᑎᓲᖑᕗᑦ ᓄᓇᕗᑦ ᐅᐸᒃᑕᐅᓗᓂ ᑕᕐᕆᔭᐅᓯᐅᕐᕕᐅᔪᓐᓇᖁᓪᓗᒍ ᑕᕐᕆᔭᐅᓯᐅᖅᐸᒃᑐᑦ ᐱᕕᖃᖅᑎᑦᓯᔪᓐᓇᖁᓪᓗᒋᑦ ᓄᓇᕗᒻᒥᐅᓂᒃ ᐃᖃᓇᐃᔮᖃᕐᓂᐊᕐᓗᑎᒃ ᑕᕐᕆᔭᐅᓯᐅᕐᓂᕐᒥᒃ, ᑕᓚᕖᓴᑯᕐᑐᒃᓴᓂᒃ ᐊᒻᒪᓗ ᓄᑖᓂᒃ ᐱᕙᓪᓕᐊᔪᓕᕆᓂᕐᒥᒃ. ᑮᓇᐅᔭᖃᖅᑎᑦᑎᓲᖑᕗᖅ ᐃᓄᒃᑎᑑᖅᑐᓂᒃ ᑕᕐᕆᔭᐅᓯᐊᕆᔭᐅᓂᐊᖅᑐᓄᑦ.
ᓄᓇᕗᒻᒥᐅᑕᐅᓂᕐᒧᑦ ᓇᓗᓇᐃᒃᑯᑕᐃᑦ ᐊᐅᒃᑕᔫᑦ
ᐱᓕᕆᕕᒃ ᐱᑕᖅᑎᑦᑎᓱᖑᕗᖅ ᓇᓗᓇᐃᒃᑯᑕᕐᒥᒃ ᐊᐅᒃᑕᔫᕐᒥᒃ ᓄᓇᕗᒻᒥᐅᓄᑦ.
ᓄᓇᕗᒻᒥ ᐊᖁᑦᑐᓐᓇᐅᑎᒃ ᓚᐃᓴᓐᓯ
ᐱᓕᕆᕕᒃ ᐱᑕᖅᑎᑦᑎᓲᖑᕗᖅ ᐊᖁᑦᑐᓐᓇᐅᑎᒥᒃ ᓚᐃᓴᓐᓯᒥᒃ ᓄᓇᕗᒻᒥᐅᓄᑦ ᐊᖁᒋᐊᖅᓴᓂᕐᒥᒃ ᐱᔭᕇᖅᓯᔪᓄᑦ.
ᐳᓚᕋᖅᑐᓕᕆᓂᖅ
ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᖁᕝᕙᕆᐊᖅᑎᑦᑎᓲᖑᕗᑦ ᓄᓇᕗᑦ ᐅᐸᒐᒃᓴᐅᖁᓪᓗᒍ ᐳᓛᕈᒪᔪᓄᑦ, ᓄᓇᕗᒻᒥ ᐳᓚᕋᖅᑐᓕᕆᔨᒃᑯᓐᓂᑦ ᑮᓇᐅᔭᖃᖅᑎᑦᑎᓱᖑᕗᖅ, ᐃᑲᔪᖅᑐᐃᓂᖏᓐᓄᑦ ᖁᕝᕙᕆᐊᖅᑎᑦᓯᓂᖏᓐᓄᓪᓗ ᑕᒃᑯᓄᖓ ᐃᓚᒋᔭᐅᔪᖁᑎᖏᓐᓄᑦ.
ᓇᐃᓴᐅᓯᕆᓂᕐᒥᒃ ᓱᖅᑯᐃᖅᓯᓇᓱᖕᓂᕐᒥᒡᓗ ᓵᓚᖃᐅᑏᑦ
ᐱᓕᕆᕕᐅᔪᖅ ᑐᕌᒐᖃᕐᐳᖅ ᓇᐃᓴᐅᓯᕆᓂᕐᒥᒃ ᓱᖅᑯᐃᖅᓯᓇᓱᖕᓂᕐᒥᒡᓗ ᓵᓚᖃᐅᓯᐊᖅᑎᑦᓯᓂᕐᒥᒃ ᖁᕝᕙᕆᐊᖅᑎᑦᑎᔾᔪᑎᐅᓂᐊᕐᓗᓂ ᖃᐃᓪᓚᖅᑐᑎᐅᓂᐊᕐᓗᓂᓗ ᐃᓕᓐᓂᐊᖅᑎᓄᑦ ᐱᔪᒪᓂᖃᓕᖁᓪᓗᒋᑦ ᐊᒻᒪᓗ ᐃᖃᓇᐃᔮᖃᕈᓐᓇᖅᓯᖁᓪᓗᒋᑦ ᓇᐃᓴᐅᓯᕆᓂᕐᒥᒃ, ᓱᖁᐃᖅᓯᓇᓱᖕᓂᕐᒥᒃ ᐊᒻᒪᓗ ᓄᑖᓂᒃ ᐃᓱᕐᕆᐅᑎᑖᖅᐸᓪᓕᐊᓂᐅᔪᓂᒃ. ᐃᓕᓐᓂᐊᖅᑐᐃᑦ ᖁᕝᕙᓯᖕᓂᓕᒃ 8, 10 12-ᒥᒡᓗ ᑐᑭᓯᐅᒪᓂᖃᑦᑎᐊᖅᑐᐃᑦ ᓇᐃᓴᐅᓯᕆᓂᕐᒥᒃ ᐊᒻᒪ/ᐅᕝᕙᓘᓐᓃᑦ ᓱᖅᑯᐃᓯᓇᓱᖕᓂᕐᒥᒃ ᓵᓚᖃᐅᓯᐊᕈᓐᓇᖅᑐᑦ $350-ᒧᑦ ᑎᑭᑦᑐᒥᒃ.