ᒥᓂᔅᑕᐅᑉ ᑐᙵᓵᕆᓂᖓᑦ

ᒥᓂᔅᑕ ᑕᐃᕕᑎ ᐊᕿᐊᕈᖅ

ᑕᐃᕕᑎ ᐊᕿᐊᕈᖅ ᐊᑭᑦᑐᕋᐅᑎᖃᑎᖃᓐᖏᖢᓂ ᓂᕈᐊᖅᑕᐅᒃᑲᓐᓂᓚᐅᖅᑐᖅ ᑭᒡᒐᖅᑐᐃᔨᐅᓂᐊᖅᖢᓂ ᖁᑦᑎᒃᑐᕐᒥᐅᓂᒃ ᐊᕐᕕᓂᓕᖓᓐᓂ ᓄᓇᕗᒻᒥ ᒪᓕᒐᓕᐅᖅᑎᓂ. ᒥᔅᑐ ᐊᕿᐊᕈᖅ ᓂᕈᐊᖅᑕᐅᓚᐅᖅᑐᖅ ᒥᓂᔅᑕᐃᑦ ᑲᑎᒪᔨᖏᓐᓃᖃᑕᐅᓂᐊᕐᓗᓂ ᓄᕕᐱᕆ 17, 2021-ᒥ, ᓄᓇᕗᒻᒥ ᓯᕗᓕᖅᑏᑦ ᑲᑎᒪᐅᑕᐅᓚᐅᖅᑎᓪᓗᒋᑦ. ᒥᓂᔅᑐ ᐊᕿᐊᕈᖅ ᑎᑎᕋᕐᕕᖕᒥᓄᑦ ᐊᖏᖅᑎᑕᐅᓚᐅᖅᑐᖅ ᓄᕕᐱᕆ 19, 2021-ᒥ. ᐊᕙᑎᓕᕆᔨᒃᑯᓐᓄᑦ ᐊᒻᒪ ᒪᓕᒐᓕᕆᔨᒃᑯᓐᓄᑦ ᒥᓂᔅᑕᐅᔪᖅ. 

ᒥᔅᑐ ᐊᕿᐊᕈᖅ ᑕᓪᓕᒪᖓᓐᓂ ᒪᓕᒐᓕᐅᖅᑎᐅᖃᑕᐅᓚᐅᖅᑐᖅ, ᐊᑕᐅᓯᐅᓐᖏᑦᑐᓂᒡᓗ ᒥᓂᔅᑕᖃᕐᕕᖃᓚᐅᖅᖢᓂ, ᐃᓚᓕᐅᖢᒍ ᓯᕗᓕᖅᑎᐅᑉ ᑐᖏᓕᖓ, ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᔾᔪᑎᓕᕆᓂᕐᒧᓪᓗ ᒥᓂᔅᑕ, ᑮᓇᐅᔭᓕᕆᔨᒃᑯᓐᓄᑦ ᒥᓂᔅᑕ ᐊᒻᒪ ᐃᖅᑲᓇᐃᔭᖅᑐᓕᕆᓂᕐᒧᑦ ᒥᓂᔅᑕ. 

ᒥᔅᑐ ᐊᕿᐊᕈᖅ ᐱᕈᖅᓴᓚᐅᖅᓯᒪᔪᖅ ᐊᐅᓱᐃᑦᑐᕐᒥ, ᑲᓇᑕᒥ ᖁᑦᑎᖕᓂᖅᐹᖑᓪᓗᓂ ᓄᓇᓕᒃ. ᐊᑕᐅᓯᐅᓐᖏᑦᑐᓂᒃ ᖁᕝᕙᓯᒃᑐᓂᒃ ᐃᖅᑲᓇᐃᔮᖃᖃᑦᑕᖅᓯᒪᔪᖅ, ᐃᓚᓕᐅᓪᓗᒍ ᓄᓇᕗᑦ ᒐᕙᒪᒃᑯᑦ ᖁᕝᕙᓯᖕᓂᖅᐹᓄᑦ ᐊᔾᔨᒌᓐᖏᑦᑐᓄᑦ ᐃᖅᑲᓇᐃᔮᓄᑦ. ᐅᑯᐊᖑᕗᑦ ᐃᓚᖏᑦ, ᐋᔩᖃᑎᒌᒃᑎᓄᑦ ᐊᖓᔪᖅᑳᖑᓯᒪᔪᖅ, ᒥᓂᔅᑕᐅᑉ ᑐᖏᓕᕆᓪᓗᓂᐅᒃ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᖅᑎᒃᑯᓐᓂ, ᒥᓂᔅᑕᐅᑉ ᑐᖏᓕᕆᓪᓗᓂᐅᒃ ᐊᕙᑎᓕᕆᔨᒃᑯᓐᓄᑦ ᐊᒻᒪ ᒥᓂᔅᑕᒧᑦ ᑐᖏᓕᕆᔭᐅᓪᓗᓂ ᐊᒥᓱᑲᓪᓚᓐᓂ ᒐᕙᒪᒃᑯᑦ ᐱᓕᕆᕕᖏᓐᓂ ᐊᒻᒪ ᒥᓂᔅᑕᐃᑦ ᑲᑎᒪᔨᖏᓐᓄᑦ ᑎᑎᕋᖅᑎᐅᓪᓗᓂ. 

ᒥᔅᑐ ᐊᕿᐊᕈᖅ ᓄᓇᓕᖕᓂ ᐊᑭᓕᖅᓱᖅᑕᐅᓐᖏᖢᓂ ᐸᖅᓴᐃᔨᐅᖃᑦᑕᖅᓯᒪᔪᖅ ᐊᒻᒪ ᐊᐅᓱᐃᑦᑐᕐᒥ ᐊᐃᕕᑦ ᐊᖑᓇᓱᒃᑐᓕᕆᔨᒃᑯᓐᓄᑦ ᑲᑎᒪᔨᐅᖃᑕᐅᓪᓗᓂ.

ᑕᐃᕕᑎ ᐊᒻᒪ ᑭᐅᕈᓪ ᐊᕿᐊᕈᖅ ᕿᑐᕐᖓᖃᖅᐴᒃ ᐊᐃᒥᒥᒃ, ᒐᒪᐃᓕᐅᓪ, ᐱᓖᓇ, ᑯᕆᔅᑏᓐ, ᒥᓂ, ᓵᒻᓴᓐ ᐊᒻᒪᓗ ᕼᐅᑉ. 5-ᓂᑦ ᐃᕐᖑᑕᖃᕐᒥᔫᒃ. ᒥᔅᑐ ᐊᕿᐊᕈᖅ ᖁᕕᐊᒋᔭᖃᖅᑐᖅ ᐊᖑᓇᓱᖕᓂᕐᒥᒃ ᐃᖃᓗᒐᓱᖕᓂᕐᒥᒡᓗ.